Matheyo
16 Afarisi ni asaduki yaahimwaattamela Yesu. Nto aphavelaka omweehererya, awo yaahinvekela wira owooniherye ethoonyeryo enikhuma wiirimu. 2 Vano Yesu aahiwaakhula wira: “Nsuwa naakelaka,* nyuwo munnihimya wira: ‘Okathi onrowa okhala wooreera, maana wiirimu khoreere oxeerya’. 3 Nave voosiisu, munnihimya wira: ‘Olelo enimoopa epheyo ni orupa epula, maana wiirimu khoreere oxeerya, ni wooriipela’. Nyuwo munnisuwela otaphulela makhalelo a musulu, masi khamunsuwela otaphulela ithoonyeryo sa okathi. 4 Nyuwo atthu* ootakhala ni oohiroromeleya! Nyuwo munnithipelela ophavela ethoonyeryo, masi khamunrowa ovahiwa ethoonyeryo ekina, ehikhanle ethoonyeryo ya profeta Yona”. Nuumala ohimya siiso, aahivenya onarowa.
5 Okathi awiixutti yaalapuwela aya ekhopela ekina, yaahiliyala okuxa iphaawu. 6 Yesu aahaaleela wira: “Mutthukule maitho, mwiipasoope saana ni eferemento ya afarisi ni asaduki”. 7 Nto, awiixutti yaahipacerya olavula yaawo-ru, ariki: “Hiyo khanikunxe iphaawu”. 8 Yesu osuwelaka etthu yaalavula aya yaawo-ru, aahaakoha wira: “Nyuwo atthu oowaamini vakhaani, xeeni munilavulasa anyu wira khamurina iphaawu? 9 Niireke wira nlelo khamwiiwexenxe? Aahiiso khamunuupuwela iphaawu iye thanu saavahiwe atthu 5.000, ni ittanka* sinceene mwaasarihale anyu? 10 Nnakhala khamunuupuwela iphaawu iye 7 saavahiwe atthu 4.000, ni ittanka* sinceene suulupale mwaasarihale anyu? 11 Vano, muhinisuwela sai wira nkaahimya iphaawu? Miyo kaahimya wira mwiipasoope saana ni eferemento ya afarisi ni asaduki”. 12 Nto awiixutti yaahisuwela wira Yesu khaahimya wiipasoopa ni eferemento ya iphaawu, masi ni mwiixuttiho wa afarisi ni asaduki.
13 Yesu aahiphiya muttetthe wa oKesareya wa Filipe. Weiwo aahaakoha awiixutti awe wira: “Atthu anihimya wira Mwaana a mutthu ti pani?” 14 Awo yaahimwaakhula wira: “Aakhala anihimya wira mwa Yohani Mpatisa, akina anihimya wira mwa Eliya, akina-tho anihimya wira mwa Yeremiya, aahiiso mmosa a maprofeta”. 15 Yesu aahaakoha wira: “Ankhi nyuwo, munihimya wira miyo ka pani?” 16 Simoni Pedru aahaakhula wira: “Nyuwo mwa Kristu, Mwaana a Muluku mukumi”. 17 Nto Yesu aahimuleela wira: “Oohakalala ti nyuwo, Simoni mwaana a Yona, okhala wira khamusuwelihiwe etthu ela ni pinaatamu, masi musuwelihiwe ni Tiithi aka ori wiirimu. 18 Nave-tho, aahimuleela wira: Nyuwo mwa Pedru, nto vamwala vaava, kinooteka muloko aka, nave okhwa* khonrowa omala-maliha muloko owo. 19 Miyo kinimoovahani ixaavi* sa Omwene wa wiirimu. Khula etthu enrowa anyu owala* vathi-va, enrowa okhala yoowaleya* ene wiirimu, nave khula etthu enrowa anyu ohula* vathi-va, enrowa okhala yoohuleya* ene wiirimu”. 20 Nto, Yesu aahaalopola oratteene awiixutti ale wira ahimuleele mutthu wira owo aari Kristu.
21 Okhuma okathi ole, Yesu aahipacerya waatthokiherya awiixutti awe wira ohaana orowa oYerusalemu, ohaana ohaaxiwa vanceene ni makhulupale a ayuda, ni makhulupale a anamukuttho ni alipa-oowiixuttiha Nlamulo. Nave ohaana wiiviwa, masi onrowa ohihimuxiwa nihiku na neeraru. 22 Nto Pedru aahimukuxa Yesu omuroiha opuro mukina, onapacerya ompwapwela, iiraka: “Pwiya, mwiireerele murima. Itthu iyo khasinrowa wookhumelelani nnakhala vakhaani”. 23 Masi Yesu aahimurerya ettuli Pedru, onahimya wira: “Mukhume ohoolo waka, Satana! Nyuwo mwa nluku ninkikwattuliha, maana murina miyuupuwelo sa apinaatamu, ohiya sa Muluku”.
24 Vano, Yesu aahaahimeerya awiixutti awe wira: “Akhala mutthu oniphavela okitthara, aikhootte mmansawe, okuxe mwiri awe wa nihaaxeryo,* okitthareke voohihiyererya. 25 Ole oniphavela woopola okumi awe, onoomurimeela. Masi, ole onimurimeela okumi awe mwaha wa miyo, onoophwanya. 26 Mweekeekhai, mutthu oniphwanya-ni, waakhela olumwenku wotheene, variki okumi awe orowaka opweteya? Aahiiso, onrowa ovaha exeeni wira oturuke ni okumi awe? 27 Tthiri, Mwaana a mutthu onimoorwa vamosa ni malaikha awe ni ovuwa wa Tiithi awe. Nave onoomuliva khula mutthu ottharihelaka miteko sa mutthu owo. 28 Kinooleelani ekeekhai wira, aakhala ari vaava ahinrowa okhwa, ahimoonale toko Mwaana a mutthu orwaaka Moomweneni mwawe”.