Okhaliherya Eguvernu ya Muluku Moororomeleya ni Murima Wotheene

1, 2. (a) Malakiheryo xeeni yaakhalihenrye atthareli a Yesu okhuma khalai mpakha olelo-va? (b) Moota xeeni anyokhani ahu yaamananiha aya onixintta, nto etthu xeeni ekhumelenle?

YESU iira eemenleene ohoolo wa Pilaato, mulipa oophuka milattu muulupale a nloko na aYuda, nto aahilavula masu anivareleya muteko wa atthareli awe oororomeleya okhuma okathi ole mpakha olelo-va. Yesu aahimmye so: ‘Omwene aka khuhiyó wa vathí-va. Wàri wa vathí-va, arumeyi aka yamukumiha ekhotto, wira kihiveleliwe w’aYuda. Vano omwene aka khuhiyó wa vathí-va’. (Yoh. 18:36) Ekeekhai wira Pilato aahimwiiviha Yesu, masi okhwa khiwanwenrye Yesu mwa okathi munceene. Yesu aahihihimuxiwa. Mamwene a oRoma, yaahimananiha waamala-maliha atthareli a Yesu, masi khiyaawenrye. MaKristau yaahuulaaniha mitthaka sa Omwene, elapo yotheene.​—aKol. 1:23.

² Nuumala Omwene okhalihiwa 1914, anamalamulela ootupa valaponi yaarina atoropa, yaahimananiha waamala-maliha atthu a Muluku. Masi khuuvo owenrye onimala-maliha. Iguvernu ni igrupu sinceene sa ipoliitika sawaniha ekhotto siheererya onikhanyererya wira nikhaliherye. Masi khuuvo owenrye oniiriha hiyo okhala ookawanyeya. Olelo-va, atthu a Omwene anikhala va ele enihimmwa okhala ilapo soovirikana sa olumwenku ola. Hata vari siiso, hiyo ninnivikaniha okhala oowiiraana olumwenku wotheene, nihiirelaka mpantta myaha sa epoliitika sa olumwenku ola. Wiiraana wahu yowooniherya yoowi Omwene onnilamulela, ni wira Mwene Yesu Kristu onnivikaniha waahoolela, waareeriha ni waakhapelela atthu awe. Vano moone moota owenrye awe opaka eyo, ni moota okhalihenrye awe mwa enamuna enilipiha nroromelo nahu, omala-maliha milattu saakumiheriwa ahu, vaavo vanivikaniha ahu “ohirela mpantta elapo”.​—Yoh. 17:14.

3, 4. (a) Etthu xeeni yaakhumelenle okathi otikitheriwe awe Omwene? (b) Niireke okhala wene atthu a Muluku yaaniiwexexa mwaha wa ohiirela mpantta elapo? Mutthokiherye.

³ Nuumala okhalihiwa Omwene, yaahikhumelela ekhotto wiirimu, nto Satana aahiriheliwa valaponi. (Musome Wisupulula 12:7 -10, 12.) Yaahikhumelela-tho ekhotto ekina vathi vaava, yeeherenrye ororomeleya wa atthu a Muluku. Masi awosa yaahilakela otthara ntakiheryo na Yesu, ni ohiirela mpantta olumwenku ola. Wuupaceryani arumeyi ale khiyaiwexexa oratteene ele yaataphulela aya ohiirela mpantta myaha sa ipoliitika.

⁴ Mwa ntakiheryo, myaha sa Volume VI a Aurora do Milênio,a waakhumenle 1904, wahaatumererya maKristau ohiirela mpantta ikhotto. Masi, vahihimya-tho so, akhala wira muKristau onniitthaniwa orowa etoropa, owo ohaana omananiha ovekela muteko mukina wa etoropa, ohikhanle owana ekhotto. Akhala wira eyo kheweryanen’ye, nto khiroohiwaka okhottoni, owo ohaana omananiha ohimwiiva mutthu. Olavulaka sa mwaha owo, Herbert Senior, yoowo aakhala oGra-Bretanha aabatiziwe 1905, onihimya so: “Okathi ole anna anceene khiyaasuwela saana etthu yoowiira, ni vanivila wiiwexexa saana akhala wira vaamureerela mutthu okela etoropa masi ohirowaka owana ekhotto”.

5. Moota xeeni erevista ya The Watch Tower 1 a Setembro 1915, yaapacenrye aya wiiwanyeiha saana mwaha woohiirela mpantta elapo?

⁵ Nto erevista, The Watch Tower ya 1 a Setembro 1915, yaahipacerya olokiherya wiiwexexa wahu mmwaha owo. Voohimya sa yootumererya eyo eliivuru eni Studies in the Scriptures (Otokosa Soolepa) yaahimya so: “Khannisuwela akhala wira okela etoropa nnaamwi ohiwanaka, khonivonyola ororomeleya wahu”. Masi sai akhala wira muKristau oleeliwa wira onimoopeliwa mwaha wokhootta owara ifardamento ni ovara muteko wa etoropa? Erevista ele yaahimyale so: “Niireke yaarowa okhala etthu yootepexa mutthu woopeliwa mwaha woororomela wa Mukhulupale a Murettele ni omananiha wiiwelela malamulo Awe, voovirikana ni woopeliwa mwaha woovara miteko sa mamwene a valaponi ni waakhaliherya, nto woonasa wene mutthu ovonyonle ene sowiixuttiha sa Mwene a Wiirimu? Mwa inamuna iyo piili sa okhwa, hiyo ninrowa othanla enamuna yoopacerya, eyo piiyo, ninthanla okhwa mwaha woororomeleya wa Mwene ahu a Wiirimu”. Nnaamwi yaalavulinwe masu ala, mwaha ole waamaliheriwe so: “Khahiyo wira eyo ti etthu enitumererya ahu. Hiyo nnimooniherya paahi”.

6. Ntakiheryo na munna Herbert Senior ninwiixuttihani exeeni?

⁶ Anna akina yaahiiwexexa, nto khuthanla okhootta muteko wa etoropa. Herbert Senior, yoole oromoliwe onihimya so: “Miyo nkoona ovirikana waya, ovara muteko wookuruxa ikaruma sa ekhotto mpakitini [muteko wa etoropa ohiniwaniwa ekhotto], ni owoopa akapwitthi”. (Luka 16:10) Nto mwaha wookhootta orowa etoropa, Munna Senior aahitthukiwa. Owo ni anna akina 4, yiirela mpantta egrupu ya atthu 16, yaakhoottale orowa otoropani mwaha wa yowuupuxerya ya murima aya, atthu awo akina yaari a itiini sikina, yaawo yaatthukiwe okathi vakhaani ekhatteya ya Richmond, oGra-Bretanha, yeeyo muhoolo mwaya yaasuweliwa okhala Richmond 16. Mukwaha mukina, Herbert ni atthu yaari ntoko owo yaahikuxiwa voohisuwela aroihiwaka opuro wawaniwa ekhotto, oFrança. Nuumala ophiya yaalamuliwe woopeliwa. Owo ni atthu akina yaheemexiwa ohoolo wira yoopeliwe ni atoropa yaakunxe ikapwitthi, masi khiyoopeliwe. Nto, olamuliwa waya wiiviwa wahiturukiwa, khurowa otthukweliwa iyaakha muloko.

7. Exeeni atthu a Muluku yaiwexenxe aya okathi waapacenrye aya Ekhotto ya Nenli ya Olumwenku?

⁷ Okathi waakhumelenle aya Ekhotto ya Nenli ya Olumwenku, atthu a Yehova ntoko egrupo, yaahoona saana ele yaataphulela aya ohiirela mpantta myaha sa epoliitika ni ele yaatthuneya wira atthare ntakiheryo na Yesu. (Math. 26:51-53; Yoh. 17:14-16; 1 Ped. 2:21) Mwa ntakiheryo erevista The Watchtower ya 1 a Novembro 1939, yaahikumiherya mwaha woohiliyaleya waarina muru oni “Ohiirela mpantta”, nto waahimyale so: “Nlamulo nintumereriwa aya weettelaka atthu a Yehova ti nle na ohiirela mpantta woomalela myaha sa maloko voohimya sa ekhotto”. Olavulaka sa mwaha owo Simon Kraker, yoowo muhoolo mwaha aarumenle oSeedi Mundial, oBrooklyn New York, aahimmye so: “Kahiixutta wira atthu a Muluku ahaana okhala a murettele ni atthu otheene a mulaponi, hata okathi wa ekhotto”. Yoolya ele yomunepani yaaphiyale okathi wooreerela ni yahaakhaliherya atthu a Muluku wiilokiherya otupheliwa waya wa muhoolo mwaha wa ororomeleya waya wa Omwene wa Muluku.

8, 9. Yaakhwanenle sai eprofesia ya murummwa Yohani?

⁸ Murummwa Yohani aahihimya vahinatthi wira nuumala okhumelela Omwene 1914, enowa yuulupale, Satana Diabo, yaarowa omananiha waamala-maliha atthu otheene anikhaliherya Omwene wa Muluku orumeelaka maasi a muro wa nthoonyeryo onikhuma mwaano mwawe.b (Musome Wisupulula 12:9, 15.) Yaakhwanenle sai eprofesia ya Yohani? Okhuma 1920 orowa ohoolo, waahikumelela ovaanyihiwa wa atthu a Muluku. Munna Kraker ni anna akina yaakhala epantte onikela epheyo ya wAmerica okathi wa ekhotto ya nenli ya olumwenku, yaahitthukiwa mwaha wookhaliherya moororomeleya Omwene wa Muluku. Tthiri, okathi wa ekhotto ele Anamoona a Yehova yaari atthu ootepexa waatta mwa atthu yatthukiwe mukhatteya wEstados Unidos yaarina mulattu wokhootta orowa etoropa mwaha wa ophavela waya omwiiwelela Muluku.

⁹ Diabo ni atthu awe aaphavela ohonona ororomeleya wa Atthu a Omwene, voohicikha etthu sa opuro waakhala aya. Okhuma wAfrica, Europa ni wEstados Unidos, anna yaaniroihiwa otribunaali ni mapuro makina waphukiwa milattu. Mwaha wa yoolakela aya ehinturukeya ya ohiirela mpantta myaha sa epoliitika, awo yaanitthukiwa, omaniwa ni orakalihiwa. Elapo ya wAlemanha, atthu a Muluku yanihooxiwa mwaha wookhootta wira heil Hitler, wala okhaliherya ekhotto. Vanihimmwa wira okathi ole atthu oowiiraka 6.000, yaahitthukiwa ni maNazista, ni wira atthu anivikana 1.600, wAlemanha ni ilapo sikina, yaale yaari Anamoona a Yehova yaahikhwa mwaha wohooxiwa. Hata vari siiso, Diabo khaawenrye wamala-maliha atthu a Muluku.​—Mar. 8:34, 35.

10. “Etthaya” enithoonyerya exeeni nto yaakhalihenrye sai atthu a Muluku?

¹⁰ Eprofesia yaalempwale ni murummwa Yohani, yaahooniherya wira, “etthaya”, eyo piiyo, anamalamulela a elapo ela ooreerela murima, yaarowa omirya ‘màsi a muró’ wa anamavaanyiha, wira yaakhaliherye atthu a Muluku. Nto epantte ela ya eprofesia yiiranen’ye sai? Iyaakha soottharelana nuumala Ekhotto ya Nenli ya Olumwenku Wotheene, “etthaya”, yahikhoottiha ohooxiwa wa atthu anikhaliherya moororomeleya Omwene wa Mesiya. (Musome Wisupulula 12:16.) Mwa ntakiheryo, itribunaali suulupale sa mulaponi sanaakhaliherya Anamoona a Yehova okathi waakhootta aya okela etoropa ni ohiirela mpantta sowiira sinilipiha elapo. Wanipacerya, ninrowa othokorerya milattu seiye Anamoona siwenrye aya oganyari akhaliheriwaka ni Yehova voohimya sa muteko wa etoropa.​—Esal. 68:21.

11, 12. Mulattu xeeni yaarina aya Anna Sicurella ni Thlimmenos ni aamalihiwe sai?

¹¹ Estados Unidos. Antoni Sicurella, aari mwaana mmosa mwa anamwane 6 yahuuwale ni anamuyari yaari Anamoona. Ahibatiziwa orineene iyaakha 15. Okathi aarina awe iyaakha 21, owo ahilempwa opuro waalempwa atthu yaarowa etoropa nto khuhimya wira aari murumeyi a Muluku. Nuuvira iyaakha 2, 1950, owo aahivekela wira eemereriwe ni nlamulo okhala mutthu ohinrowa etoropa mwaha wa yowuupuxerya ya murima awe. Nnaamwi erelatoorio ya FBI, yahaaphwanye mulattu, makhulupale yaaphuka mulattu yahikhootta yooveka awe. Nuumala mulattu ole othokoreriwa ikwaha sinceene, eTribunaali Yuulupale ya EUA, yaahinwiriyana munna Sicurella, nto khurukunuxa ele yaalamuliwe ni khweemya yooveka ya munna Sicurella. Weemereriwa wawe waahikumiherya ntakiheryo naarowa otthariwaka ni atthu akina a wEstados Unidos yaawo yaheemya orowa etoropa mwaha wa yowuupuxerya ya murima aya.

¹² Grecia. 1983, Iakovos Thlimmenos ahihimmwa okhala mutthu ohiniiwelela khulamuliwa otthukweliwa mwaha wookhootta owara ifardamento sa etoropa. Nuumala okhuma mukhatteya, aahivekela muteko wa ekontabilista, masi aahikhoottiheriwa mwaha wookhala mutthu aatthukiwe. Owo aahiroiha otribunaali, masi nuumala okhoottihiwa otribunaali ya oGrecia, owo aahiveka wira mulattu awe waphukiwe ni etribunali ya Corte Europeia dos Direitos Humanos (CEDH). Mwaakha wa 2000, nikhuuru nuulupale na CEDH, nenlo nirina majuiz 17, naahilamula mulattule khumwaakiha, khuvaha ntakiheryo wira ohikhaleke mutthu onithanyiha. Nikhuuru nle nihinatthi ophuka mwaha ole, anna owiiraka 3.500 oGrecia, yaahilempwa okhala anakrime okhala wira yahitthukweliwa mwaha wokhootta okela etoropa. Nuumala ophukiwa mwaha ole, elapo ya oGrecia, yaahirumeela nlamulo nle wira annihu ehooniwe-tho okhala anakrime. Ohiya-vo nlamulo nle ninnaavaha atthu otheene oGrecia edireito ya ovara muteko mukina woohikhala miteko sa etoropa, nto nlamulo nle naakumiheriwe iyaakha vakhaani ottuli, naahilipihiwa okathi waatthikeliwa aya olokiheriwa malamulo a oGrecia.

13, 14. Etthu xeeni enoona anyu wira munoowerya wiixutta mmwaha waaphukiwe wa Anna Stefanov and Bayatyan?

¹³ Bulgaria. 1994, Ivailo Stefanov, aarina iyaakha 19 okathi waitthaniwe awe wira akele etoropa. Owo ahikhootta okela etoropa wala ovara miteko sikina sinikhaliherya ekhotto. Aahilamuliwa otthukiwa mukattheya myeeri 18, masi aahiveka wira otthikele ophukiwa mulattu ole, etthariwaka yooveka awe ya ohirowa etoropa mwaha wa yowuupuxerya ya murima awe. Mulattu awe waahiroihiwa wa CEDH. Mwaakha wa 2001, mulattu ohinatthi ophukiwa, wahikhumelela wiiwanana nto munna Stefanov aahitaphuliwa ni guvernu. Guvernu a oBulgaria, khahiyo oromutaphula paahi munna Stefanov, masi oweemererya-tho atthu akina oBulgaria wira yatthuna vale pooti othanla ovara muteko mukina ohiniirela mpantta etoropa.c

¹⁴ Arménia. Vahan Bayatyan aahooniwa okhala ooreerela okhanyereriwa ovara miteko sa etoropa, mwaakha wa 2001.d Owo aahikhootta miteko iyo sa etoropa, masi khaavahiwe edireito ya ophukeliwa otribunaali ya elapo awe. Mweeri wa Setembro 2002, aahileeliwa wira aarowa otthukiwa iyaakha piili ni nimeya, masi aahitaphuliwa omalinheene myeeri 10 ni nimeya. Nto okathi owo aahivekela wira mulattu awe waphukiwe ni CEDH, yeeyo yaakhulenle ophuka mulattu owo. Masi, nuumala ophuka mulattu ole nihiku na 27 Outubro 2009, etribunaali ele yaahinvaha nthowa. Olamuliwa wawe waakhala ntoko wira anna otheene wArménia, yaarina mulattu mmosaru, khiyaarina nlipelelo. Masi, nikhuuru nuulupale na CEDH, naheemya ovarerya mulattu ole. Nto nihiku na 7 Julyo 2011, nikhuuru nuulupale na CEDH nahilamula nimwaakiheryaka Vahan Bayatyan. Ola waari mukwaha woopacerya CEDH, yoonale aya wira atthu anikhootta orowa etoropa mwaha wa sookupali sa etiini aya ahaana okhapeleliwa nirumeeliwaka nlamulo na edireito ya wuupuwela moota mukina, yowuupuxerya ni okokhorela. Nlamulo nlo naahaaphwanyiha mureerelo ohiya Anamoona a Yehova paahi masi atthu anceene yaale anikhala ilapo sineettela malamulo a Europa.e

15. Xeeni atthu a Yehova ahiniirela aya mpantta soolema sinivuwiha elapo?

¹⁵ Atthu a Yehova annooniherya ororomeleya waya wa Omwene a Mesiya, ohiya ni okhootta waya paahi okela etoropa masi-tho mwaha wa ohiirelaka mpantta meera anivuwiha elapo. Nuumala okhumelela Ekhotto ya Nenli ya Olumwenku, atthu annitepa ophavela ovuwiha elapo aya. Atthu a ilapo sinceene annikhanyereriwa opaka itthu sinooniherya wira annivuhiwa elapo aya, itthu ntoko omwiipa hino, wala wuntela ebandera ya elapo aya. Masi, hiyo khiivo-tho etthu ekina enikokhorela ahu ohikhanle Yehova paahi. (Okhum. 20:4, 5) Nto eyo ennikumiherya olupatthiwa wuulupale. Hata vari siiso, Yehova onniruma “etthaya” wira emirye olupatthiwa iwo. Vano moone milattu sikina sihinliyaleya siganyanri ahu nikhaliheriwaka ni Yehova orweela mwa Kristu onnikhaliherya.​—Esal. 3:9

16, 17. Mulattu xeeni yaarina aya Lillian ni William Gobitas, nto mwaha ole onniixuttiha exeeni?

¹⁶ Estados Unidos. 1940, eTribunaali Yuulupale ya EUA majuiz 8, omuhiya mmosa, yaahilamula yaakhaliheryaka Anamoona a Yehova, mulattu waasuweliwe okhala wa Minersville School District ni Gobitis. Lillian Gobitas,f yoowo aarina iyaakha 12, nave munna awe, William, aarina iyaakha 10, awosa yaaphavela okhala oororomeleya wa Yehova, tivonto yaahikhootta wuntela ebandera ni olaphela wira yaarowa ovuwihaka elapo aya. Mwaha waivaavo, yahoomoliwa oxikola. Mulattu aya waahiroihiwa oTribunaali Yuulupale, ni eTribunaali yaahimyale wira exikola khiyaatthekenle nlamulo, maana eniphavela wira atthu othene a elapo ele akhale owiraana. Nlamulo nle naahikumiherya mooro wa olupatthiwa wuulupale. Anamwane anceene a Anamoona a Yehova yaahoomoliwa oxikola, Anamoona oowunnuwa yahoomoliwa omutekoni, nave akina anceene yaahihooxiwa mwaha wa ottupheliwa ni mittitthi sa atthu oonanariwa. Eliivuru eniithaniwa The Lustre of Our Country enihimya wira “olupatthiwa wa Anamoona okhuma mwaakha wa 1941 mpakha 1943 waari olupatthiwa wuulupalexa wa atthu aneettela etiini, eseekulu 20 wAmerica”.

¹⁷ Masi otthapa wa awanani ahu khiwaalokenle. Mwaakha wa 1943, eTribunaali Yuulupale, yaahiphuka mulattu mukina waalikana ni ole wa Gobitis. Mulattu owo waasuweliwe West Virginia State Board of Education ni Barnette. Mukwaha ola, eTtribunaali Yuulupale yahaakhaliherya Anamoona a Yehova. Ola waari mukhwaha woopacerya eTribunaali Yuulupale ya EUA, yaarukununxe aya nlamulo voohivira okathi munceene. Nuumala olamuliwa vookhalela, olupatthiwa wa atthu a Yehova waahivukuwa wEstados Unidos. Okhuma vaavale orowa ohoolo idireito sa atthu a wEstados Unidos saahilipihiwa.

18, 19. Etthu xeeni ehimyale awe Pablo Barros wira temukhalihenrye okhala oolipa murima, nto arumeyi akina a Yehova anrowa omutakiha sai?

¹⁸ Argentina. Pablo ni Hugo Barros, yaarina iyaakha 8 ni 7 khula mmosa, yahoomoliwa oxikola mwaakha wa 1976, mwaha woohitthara yoolema ya othomeya ebandera. Mukwaha mmosa, direitara a oxikola aahimukakha ni ommana Pablo vamuru. Owo aahiwiirela anamwane ale wira ahale oxikola khuviriha ewoora ntero, aphavelaka waakhanyererya wiirela mpantta soolema sinivuwiha elapo. Uupuwelaka muxankiho ole, Pablo onihimya so: “Nahaakhaliheriwe ni Yehova, kinoona wira khuuvo aarowa owerya ovikana muxankiho ole ni okhala oororomeleya”.

¹⁹ Okathi mulattu ole waaroihiwe awe otribunaali, juiz aahilipiherya yeele yaahimmwale oxikola wira Pablo ni Hugo yaahaana woomoliwa. Masi mulattu ole waahivekiwa oroihiwa eTribunaali Yuulupale ya wArgentina. Nto 1979 eTribunaali ele yaahirukunuxa nlamulo na etribunaali ekina khuhimyaka so: “Ehukhumu ya owoomola anaxikola ennivirikanya edireito ya osoma (Artigo 14) ni muritti wa Guvernu wa omwiixuttiha osoma khula mutthu oxikola (Artigo 5”). Nlamulo nle nahaakhaliherya anamwane a Anamoona owiiraka 1.000. Akina khiyoomoliwe, nto akina ntoko Pablo ni Hugu yaahiitthaniwa wira atthikele osoma ixikola sa guvernu.

20, 21. Moota xeeni mulattu waarina aya Roel ni Emily Embralinag onilipiha aya nroromelo nanyu?

²⁰ Filipinas. 1990, Roel Embralinagg aarina iyaakha 9, nto murokorawe Emily aarina iyaakha 10, awosa ni anaxikola akina oowiiraka 66 Anamoona a Yehova, yaahoomoliwa oxikola mwaha wa ohintela ebandera. Leonardo, paapa awe Roel ni Emily, aahimananiha waatthokiherya amahoolela a exikola ele, masi mahala ene. Okathi mwaha ole waatepa aya, Leonardo aahilepa epaphelo ovekelaka wira mulattu ole oroihiwe oTribunaali Yuuluaple. Masi Leonardo khaarina musurukhu hata advogado wira omukhaliherye. Emusi ele yaanipaka mavekelo mooluttuweliwa wira Yehova aakhaliherye. Okathi owo wotheene anamwane ale yaanitheiwa ni oveihiwa oxikola. Leonardo oona wira khaarowa oganyari mulattu ole maana khaasuwela itthu sinci sa malamulo.

²¹ Masi itthu khuturukeya, nto emusi ele yaahikhaliheriwa ni advogado Felino Ganal, yoowo aatonko ovara muteko owo va empresa yoottittimiheya ya madvogado elapo ele. Okathi wa mulattu ole, munna Ganal iira okhumme ene empresa ele, nto khukhala Namoona a Yehova. Nto nuumala ophukiwa oTribunaali Yuulupale, mowiiraana etribunaali ele yaahirukunuxa ele yaalamuliwe, nto khuhimya wira Anamoona ahoomoliweke oxikola. Ninnoona-tho wira ale yamananiha opahula ororomeleya wa atthu a Muluku, yahooceela.

22, 23. (a) Exeeni eniirinhe oganyari milattu sinceene otribunaali? (b) Wiiraana wahu ni anna a olumwenku wotheene onooneya sai?

²² Xeeni atthu a Muluku awenrye aya oganyari milattu sihinliyaleya sinceene? Hiyo khanrina owerya orina aya anapoliitika. Masi, elapo ti elapo, ni khula etribunaali, alipa oophuka milattu a murima saana anikhaliherya yavaanyihaka anamalupattha ootakhala, nto okathi onipaka aya eyo, annikumiherya malamulo wira yeetteliweke elapo eyo. Vohaaniherya, Kristu tonnikhaliherya oganyari wahu milattu iyo. (Musome Wisupulula 6:2.) Xeeni vaniimananiha ahu oroiha milattu iyo otribunaali? Yoolakela ahu khahiyo oturuka malamulo a khula elapo. Masi, yoolakela ahu ori ottittimiherya wira nivikaniheke omurumeela Mwene ahu, Yesu Kristu, vohikhoottiheriwa.​—Mit. 4:29.

²³ Hata niryeene eriyari ya atthu aniwana-wana mwaha wa ipoliitika ni onyokhana wuulupale, Mwene ahu yoowo onilamulela, Yesu Kristu, ooreeliha wiimananiha wa atthareli awe a ilapo sotheene wira avikaniheke ohiirela mpantta myaha sa epoliitika. Satana khowenrye omananiha wawe wira onikawanye ni onixintta. Mwene ahu ohaatthukumanya atthu imilyau sinceene yaawo anikhoottha “wixuttihiwa owana ekhotto”. Okhala wahu ntoko nikhuuru na ilapo sotheene, na anna arina murettele, etthu eniireya mwa mutikiniho, nto yooniheryaka vohikhootteya wira Omwene wa Muluku onnilamulela!​—Yes. 2:4.