Janeiro

Nihiku nootepa ohakalaliha wa anamathelana, nihiku nenne animuyara aya mwaana oopacerya. Nnaamwi anamuyari amphentaka vanceene mwaana owo, awo khanlipelela wiira onrowa ovikanihaka okhala mwaana okathi wootheene. Nto vaakhanle wiira eyo yaamwiiraneya, awo yaamuxankiheyaka. Moolikanasa, nnaamwi Yehova ohakalalaka vanceene vaavo nimpacerya ahu wiixutta ekeekhai, owo khoniphavela wiira nimaleleke vaavo. (1 Akor. 3:1) Ohiya-vo, owo oniphavela wiira nikhale makristau anuupuwela ntoko atthu aalupale. Mbiibiliyani nuulumo na ekereku nitaphuleliwe noowi “mutthu muulupale”, pooti otaphulelaka mutthu orina “waamini woolipa.” (1 Akor. 2:6) Sintoko siisaale mwaana oninnuwa awe mpakha okhala mutthu muulupale, nave hiyo nnoowerya okhalana waamini woolipa, naahihiye olipiha ompatthani ahu ni Yehova. Nto napaka eyo, nnookhala makristau arina waamini woolipa. Hata nirina ene waamini woolipa, niireke khivanreerela wuncererya omwaamini wahu Yehova? — 1 Tim. 4:15. w24.04 2 itti. 1, 3

Vaakhanle wiira mutthu mukina ohookohani so: Yehova ti pani? Mwaarowa omwaakhula sai? Woonasa wene, mwaarowa omwaakhula wiira ‘Yehova, Tiithi aka, Muluku aka ni Mpatthani aka’. Nave nyuwo pooti okhalana maihanelo aahiiso moolumo makina mukhanle anyu oorumeela mmuhimyaka Yehova. Niireke mootoko wuupuwela wiira Yehova Mulipa-oniwaakhelani? Mwene Davidi, onnimulikanyiha Yehova ntoko mulipa-oniwaakhela aletto. Nave onnaalikanyiha arumeyi oororomeleya, ntoko aletto a Yehova. Davidi aahikoha so: “Yehova, ti pani onrowa okhalaka mutentani mwanyu? Ti pani onrowa okhalaka vamwaako vanyu voowaarya?” (Esal. 15:1) Yoolepa ela, enninikhaliherya wiiwexexa wiira vanniweryaneya hiyo okhala aletto a Yehova, eyo piiyo, okhala apatthani awe. Ohinatthi opattuxa itthu sootheene, Yehova aakhala mekhawe. Nuuvira okathi, owo aahimpattuxa Mwanawe ompacerya. Okathi owo, Yehova aahooniherya okhala Mulipa-oniwaakhela aletto, omwaakhelaka Mwanawe owo ntoko muletto oopacerya a muheemani mwawe. Nto Yehova aahihakalala vanceene mwaha woopaka eyo. Biibiliya, onihimya wiira Yehova ‘aanimusiveliha’ mwanawe. Nave Mwaana owo ori muletto oopacerya, onihimya so: “Okathi wootheene kaanitteeliwa murima ohoolo wawe.” — Mir. 8:30. w24.06 2 itti. 1-3

Nrowe nithokorerye yoowiiraneya ya Davidi. Muttitthi wa atthu oowiiraka 340.000 waahiiraana wiira amukhalihe Davidi Mwene a wIsarayeli wootheene. Atthu ale, yaahikhala mahiku mararu omiyaakoni waattamela oHebroni. Awo yaari oohakalala, avaanelaka, ni yiipaka isipo sa omuttottopela Yehova. (1 Wah. 12:39) Eriyari ya muttitthi ole aahikhala mmiravo mmosa aitthaniwa Sadoki. Atthu anceene khiyaanwenhe, masi Yehova aahinweha, ni oniphavela wiira nisuwele wiira Sadoki aari vaavale. (1 Wah. 12:​22, 26-28) Sadoki aari namukuttho ni aavara vamosa ni Namukuttho Muulupale Abiyatari. Yehova aahinvaha Sadoki owerya ni ankhili wiira osuweleke oratteene itthu Yena aaphavela awe. (2 Sam. 15:27) Owo aari mulopwana oolipa murima. Mahiku ala ookiserya ninkhala ahu, Satana onniimananiha vanceene wiira omala-malihe omwaamini wahu Yehova. (1 Ped. 5:8) Nto nihaana olipa murima, nimulipelelaka Yehova wiira ompwetexe Satana ni olumwenku ola wootakhala. (Esal. 31:24) Napaka eyo, nnoowerya otakiha olipa murima wa Sadoki. w24.07 2 itti. 1-3

Okathi Yehova ampattuxale awe mulopwana ni muthiyana oopacerya, owo aaphavela wiira ahakalalaseke. Aahaavaha opuro wooreera wiira akhaleke, aahaatheliha ni aahaavaha muteko woohakalaliha. Awo yaahaana waasarya anaaya mulaponi mootheene, nave yaahaana wiiriha elapo yootheene okhala eparayiisu ntoko exarti ya wEdeni. Masi aahaaruma etthu emosa yaamukhaani. Nuumala-vo, aahaalopola wiira vakhala wiira yammukhootta, ahiiwelelaka etthu aarumme awe, awo yaamookhwa mwaha wa etampi aya. Nto etthu yiiraneyale, tiila: Nlaikha nimosa, nenno nahamphenta Muluku nnakhala nahaaphenta Adamu ni Eva, naahiweehererya wiira apake etampi ele. Adamu ni Eva yaahiiwelela nlaikha nno nootakhala. Siiso, awo khiyaamwiiwelenle Tiithi aya, yoowo aaphenta vanceene. Tivonto awo yaahimutthekela Yehova. Ntoko ninsuwela ahu, ele Yehova aahimmye awe, yaahiiraneya. Okhuma nihiku nne orowa ohoolo, awo yaamuhaawaka mwaha wa itthu yaapanke aya. Awo yaarowa wuuluvalaka, nuumala-vo yaamookhwa. — Maph. 1:​28, 29; 2:​8, 9, 16-18; 3:​1-6, 17-19, 24; 5:5. w24.08 3 etti. 3

Yehova ni Mwanawe, aniphavela wiira nihakalaleke. Esaalimu 119:​2, enihimya so: “Oohakalala taale aniiwelela moolumo awe oowuupuxerya, Yaale animwaavya ni murima aya wootheene”. Nave-tho Yesu aahimmye so: “Oohakalala taale aniiwa nuulumo na Muluku, aneettela!” (Luka 11:28) Ntoko arumeyi a Yehova, hiyo na atthu oohakalala. Mwaha wa xeeni? Okathi ninsoma ahu Nuulumo na Muluku ni weettela ele nniixutta ahu. (Yak. 1:​22-25) Opaka eyo tenrowa onikhaliherya omuhakalaliha Yehova. (Mus. 12:13) Okathi ninkhala ahu moovarihana ni ele nniixutta ahu mbiibiliyani, emusi ahu ni ompatthani ahu ni atthu akina onnitepa olipa. Ohiya-vo, ninnisyaka mixankiho sinaaphwanya atthu ahinimurumeela Yehova. Moohaanyiherya, hiyo ninnikupali ele mwene Davidi aahimmye awe. Nuumala wiipa nsipo naalavula sa malamulo, sooruma ni ophukela wa Yehova, owo aahimmye so: “Ale aneettela malamulo anyu, annitthuveliwa vanceene.” — Esal. 19:​7-11. w24.09 2 itti. 1-3

Yehova onnisuwela mixankiho sootheene sinaaphwanya arumeyi awe. Nave onnisuwela okathi ninhakalala ahu ni okathi ninriipiwa ahu murima. (Esal. 37:18) Yehova onnihakalala vaavo nimmurumeela ahu ni murima ahu wootheene, hata siniphwanyaka mixankiho! Tivonto, owo ori oolikana ene wiira onikhaliherye ni onimaalihe. Esaalimu 147:3 enihimya wiira Yehova “onnitthukwa makhwatta” a atthu ariipiwe murima. Yoolepa ela, ennooniherya moota Yehova onaakhapelela awe ale ariipiwe murima. Masi, nihaana opaka exeeni wiira nittottele mureerelo nikhaliheryo na Yehova? Muupuwele ntakiheryo nla. Meetiku pooti owerya omukhaliherya mutthu ovulanle wiira openuwe. Masi wiira ottottele mureerelo nikhaliheryo nawe, mutthu owo ovulanle ohaana otthara ni ovaha ephoole malakiheryo a meetiku owo. Orumeelaka nuulumo nawe, Yehova onnaamaaliha ale sinaaphwanya mixankiho ni onnaavaha miruku soophenta. w24.10 6 itti. 1-2

Khalai, iliivuru sahu saanitthokiherya etthu Yehova aarowa awe owiiriha ale onaathokorerya awe okhala oohixariya. Hiyo naahimya wiira atthu awo khiyaarina nlipelelo na ohihimuxiwa. Mwa ntakiheryo, nkuupuwelani ikurupu tthaaru sa atthu Yehova aapwetenxe awe yahaakhanle anaxariya. Ekurupu yoopacerya, atthu yaale yaakhwiiye ni Epula ya Mutaaseke, ya nenli maloko 7 yaakhala Elapo Yooleiheriwa Yehova aarumihale awe wiiviwa ni ekurupu ya neeraru, atthu 185.000 a wAsiiria yaiviwe ni nlaikha nimosa na Yehova. (Otum. 7:​1-3; Yes. 37:​36, 37) Niireke Biibiliya onnihimya akhala wiira Yehova oohaapwetexa atthu ale moomalela, aahiiso onoorowa waahihimuxa muhoolo? Khanisuwenle. Khaninsuwela moota Yehova amphukenle awe khula mmosa a atthu awo. Nave khaninsuwela akhala wiira yaahikhalana eparakha ya wiixutta voohimya sa Yehova ni oottharuwa. w24.05 3 itti. 5-7

Yesu aahilavula nlikanyiho na muthiyana naamukhweli. Nlikanyiho nlo, naahaavara murima atthareli a Yesu okhala wiira okathi ole, yaari yoolema atthu othokoreriwaka moohixariya. (Luka 18:​1-5) Nave nlikanyiho nlo, pooti onikhaliherya okhala wiira woonasa wene, nootoko aahiiso ninnilipelela othokoreriwa moohixariya. Atthu anceene olelo-va, ta nthalu, oowiixinnuwiha ni oowootha. Ti nthowa naya, nihintikinihiwa ahu okathi ninthokoreriwa ahu moohixariya. (Mus. 5:8) Woonasa wene, etthu nihinlipelela ahu ori othokoreriwa moohixariya ni anna ni arokora, masi eyo pooti wiiraneya. Ekeekhai wiira anna ni arokora, khanlikana ni atthu akina annihaaxa. Masi awo atthu ayariwe arina ene etampi. Ntakiheryo na Yesu, nnoonikhaliherya oweha moota aavilenle awe ohixariya, ni moota nikhanle ahu otthara ntakiheryo nawe. Ntoko siisaale nniimananiha ahu waapixerya murima atthu ahinimurumeela Yehova masi annithokorerya moohixariya, mwa enamuna emosa-ru, nihaana wiimananiha waapixerya murima anna ni arokora! w24.11 2 itti. 1-2

Ephaawu yaari etthu ya faita yinceene yaarumeeliwa ni atthu aniromoliwa mbiibiliyani. (Maph. 14:18; Luka 4:4) Ikwaha sikina, Biibiliya onnirumeela nuulumo noowi “ephaawu” ophavelaka ohimya soolya sikina. (Math. 6:11; Mit. 20:7) Miiriirya miili sootepexa osuweliwa Yesu aapanke awe, saahela muhina iphaawu. (Math. 16:​9, 10) Mwiiriirya mmosa ori Yohani ekapiitulu 6. Arummwa a Yesu khiyaareere okhulumuwa nuumala weetta mukwaha alaleeryaka ni avaraka miteko sikina, nto yaanipirisari ophumurya. Nuumala-vo, Yesu ni awiixutti awe yaahikhuruwa mukalawani, anarowa opuro woomaaleleya. (Mar. 6:​7, 30-32; Luka 9:10) Nto awo yaahiphiya nipuro noomaaleleya waattamela oBethisaida. Moohipisa atthu anceene yaahiphiya opuro ole wiira akumaane ni Yesu. Owo khaawoomonle atthu ale. Mwaha wa owoonela othunku, aahiwiixuttiha voohimya sa Omwene ni aahaapenuxa iretta saya. Okhala wiira vaaniila, awiixutti ale yaahipacerya okohana moota atthu ale yaarowa aya ophwanya yoolya. Woonasa wene, akina yaahikhalana eyoolya aya vakhaani, masi akina yaahaana orowa mmawaani wiira yathume eyoolya. — Math. 14:15;. w24.12 2 itti. 1-2

Anamuyari ahu oopacerya, Adamu ni Eva, yaari atthu oohittheka ni yaakhala mparayiisu. (Maph. 1:27; 2:​7-9) Awo yanwerya okhalana okumi wooloka ni woohimala. Masi itthu sootheene saahiturukeya nuumala Adamu ni Eva ottheka. Awo yaahiyeleela eparakha yookhala mparayiisu ni nlipelelo naya na okhala mahiku ootheene valaponi-va. Nto etthu xeeni Adamu ni Eva yaahiyenrye aya anaaya? Biibiliya onihimya so: “Etampi yookela moolumwenkuni mwaha wa mulopwana mmosa [Adamu], nto etampi eyo yooruuha okhwa. Siiso, okhwa ohaaphwanya atthu otheene, okhala wira atthu otheene aattheka.” (Arom. 5:12) Nto Adamu oonihiyerya etampi, yeeyo enikumiherya okhwa. Etampi nihiyeriwe ahu, enilikana ni musurukhu munceene okomphwale nihinwerya ahu oliva. (Esal. 49:8) Yesu aahilikanyiha soottheka sahu ni evaale aahiiso okopha. (Math. 6:12; Luka 11:4) Okathi nimpaka ahu etampi, vanoolikana ni omukophela Yehova. Nto nihaana oliva mwaha wa etampi eyo nipanke ahu. Vakhala wiira khaninliva, etampi eyo enimala okathi ninkhwa ahu. — Arom. 6:​7, w25.02 2-3 itti. 2-3

Eparakha yuulupale nirina ahu waalaleerya atthu akina voohimya sa Nuulumo na Muluku! Masi eparakha eyo khahiyo ya atthu pure. Mwa ntakiheryo, okathi Yesu aari awe valaponi, owo kheemerenrye wiira malaikha ootakhala elavuleke voohimya sa yena. (Luka 4:41) Olelo-va, enniiraneya etthu emosa-ru. Ohinatthi mutthu wiirela mpantta muteko woolaleerya ni atthu a Yehova, owo ohaana owehiwa aaphwanelelaka eparakha eyo. Nnimooniherya wiira ninnivaha efaita eparakha eyo, akhala wiira nnimwiimananihaka opaka ele eniwerya ahu wiira nilaleerye. Sintoko Yesu, yoolakela ahu ori waala epyo ya Omwene vamurimani wa atthu ni owiixuttiha ikeekhai sa mbiibiliyani. (Math. 13:​3, 23; 1 Akor. 3:6) Ottharaka ntakiheryo na Yesu, mutthenkeso wa Yehova onnipaka sootheene oniwerya awe, wiira waakhaliherye atthu osuwela nsina na Muluku. Enamuna emosa onipaka awe eyo, ori omukumiherya Biibiliya a Elapo Esya a Soolempwa Soowaarya. Otaphuleliwa wa Biibiliya oomalela aahiiso oohimalela, onniphwanyaneya mattaava oowiiraka 270. w24.04 9 itti. 8-9

Alopwana akina ni arina etthoko yoohakalala, khula nihiku annipaka etthu wiira amooniherye omphenta waya mwaaraya. (1 Yoh. 3:18) Mulopwana pooti omooniherya mwaarawe wiira onnimphenta, opakaka itthu saamukhaani ntoko, onvarela ntata okathi aneetta aya aahiiso onvaha etthu. Nave-tho, owo pooti omwinviyarela mensaxe ohimyaka wiira: “Nkireere wunkheliwa.” Nave, nyuwo pooti omukoha so: “Muniviriha sai nihiku nla na olelo?” Ikwaha sikina, nyuwo pooti omulepela ekarta mulavulaka moolumo ooreera, yaawo anooniherya omphenta wanyu. Okathi mulopwana onipaka awe itthu iya, onnimuttittimiha mwaarawe ni onnilipiha ekasamento awe. Mulopwana onnooniherya wiira onnimuttittimiha mwaarawe, olavulaka itthu sinimuhakalaliha. Mwa ntakiheryo, owo ohaana omuxukhurela mwaha wa itthu sinceene onipaka awe. (Akol. 3:15) Okathi mulopwana onimuttottopela awe mwaarawe ni onimuleela awe wiira onimphenta vanceene, muthiyana owo onnilipa ni onnoona wiira onniphentiwa ni ottittimihiwa. w25.01 11 etti. 15; 13 etti. 16

Moolumo ari Esaalimu 15 animala ni yooleiherya eni: “Mutthu oniira siiso, khonrowa omora”. Nasaalimu, onnitthokiherya nthowa naya Yehova oniphavela awe wiira nipakeke itthu sootheene sinihimmwa Esaalimu ela. Okhala wiira Yehova oniphavela wiira nihakalaleke. Tivonto, vaavo nimpaka ahu itthu sootheene yena onnivekela awe, ninnikhalana okumi woohakalaliha nave owo onninikhapelela. Ale ari aletto a muheemani mwa Yehova, annilipelela itthu soohakalaliha muhoolo. Ale ari oothanliwa ni oororomeleya, khareerane “mapuro ookhala”, yaawo Yesu olokihenrye awe wiirimu. (Yoh. 14:2) Ale anrowa waakhela okumi woohimala valaponi vaava, annilipelela wiiraneya eprofesia eri Wiisuupulula 21:3. Moohaanyiherya, nookhalana eparakha yuulupale mwaha wa olattuliwa ni Yehova wiira nikhale apatthani awe ni okhala aletto a muheemani mwawe mahiku ootheene! — Esal. 15:​1-5. w24.06 13 itti. 19-20

Nuulumo noowi ovuwa, nintaphulela exeeni? Mbiibiliyani, nuulumo noowi “ovuwa”, pooti otaphulela etthu enimwiiriha mutthu owo osuweliwa vanceene. Yehova aahipaka etthu yootikiniha, yeeyo yooniherya ovuwa wawe nuumala nloko na Isarayeli woopoliwa wExiitu, weiwo naari aya ipottha. Nkahaya muupuwele ela: Imilyau sinceene sa aisarayeli, yaahithukumana mukerekhere mwa mwaako Sinayi, wiira awiriyane etthu Muluku aarowa awe waaleela. Nto neeku nooriipa, naahikhuneela mwaako ole. Niinaano-ru, waahikhumelela mwiixi waakhunenle mwaako wootheene. Nave-tho, yaahikhumelela etetere yuulupale, vaahiverunya ni naahiiwanyeya nsu nuulupale naalikana ni etari ni nlope. (Okhum. 19:​16-18; 24:17; Esal. 68:8) Okathi Yehova aapanke awe itthu iya, aisarayeli yaahitikinihiwa vanceene nuumala oweha owerya Muluku orina awe. Enamuna emosa nikhanle ahu onvaha Yehova ovuwa, ori waaleela atthu akina voohimya sa owerya wuulupale orina awe ni mikhalelo sawe sikina sooreera. Nave ninninvuwiha Muluku, okathi nnooniherya ahu wiira tonikhalihenrye opaka etthu eyo. — Yes. 26:12. w25.01 2 itti. 2-3

Okathi aisarayeli yaarowa aya Elapo Yooleiheriwa, alopwana oottittimihiwa yaahimurukunuwela Moise ni okhulupale aavahiwa awe ni Yehova. Awo yaahimmye so: “Nloko nootheene [ohiya paahi Moise] noothanliwa ni Muluku. Nave, Yehova ori eriyari aya”. (Mmr. 16:​1-3) Ekeekhai wiira atthu a nloko naari “noothanliwa ni Muluku”, masi Yehova aamuthanlale Moise wiira oweettiheke arumeyi awe. Nto okathi alopwana ale oohiiwelela yamphukela aya Moise, vaalikana ni omphukela Yehova. Awo khiyaawehexexa itthu Yehova aaphavela awe, masi yaawehexexa itthu yaaphavela aya, ntoko owerya waya ni okhulupale aya. Muluku aahaapwetexa alopwana awo waahela muhina atthu anceene yaakupali. (Mmr. 16:​30-35, 41, 49) Mwa enamuna emosa-ru, olelo-va Yehova khonisiveliwa ni atthu ale ahiniiwelela malakiheryo a mutthenkeso awe. w24.07 11 etti. 11

Ninkhala okathi atthu anceene ahinikupali aya wiira onoophiya wanikisa wa makhalelo ala oohiloka. Awo anniniveeha mwaha wookupali eyo. (2 Ped. 3:​3, 4) Sookhala itthu sikina nihinsuwela ahu. Nihaana okupali wiira wanikisa onoophiya, nto okathi enrowa aya wiiraneya eyo nikupaliki wiira Yehova onoonikhapelela. Nave nihaana olipiha waamini wahu wiira Yehova onnimurumeela “murumeyi oororomeleya ni a ankhili” wiira onivaheke malakiheryo. (Math. 24:45) Okathi anrowa aya opacerya maxakha maalupale, woonasa wene, nnimwaakhela malakiheryo ookhalela anrowa onikhaliherya woopola ikumi sahu. Tthiri ola okathi ninreerela ahu wiixutta waaroromela ale Yehova onaarumeela awe wiira anivaheke malakiheryo. Vakhala wiira khinnaaroromela ni owiiwelela ale avahiwe okhulupale, moohaanyiherya vanrowa okhala vooxankiha wiiwelela okathi ninrowa ahu ovahiwa malakiheryo nuumala opacerya maxakha maalupale. w24.09 11 itti. 11-12

Mwaninyu, khonrowa omwaamini Muluku mwaha woowi nyuwo munnimwaamini. Mwaninyu pooti opacerya wiikoha so: ‘Kinsuwela sai wiira Muluku ookhala? Kiireke kihaana okupali ele Biibiliya onihimya awe?’ Biibiliya onnitumererya wiira ‘nirumeeleke muupuwelo ahu’ ni ‘nivareryeke itthu sootheene’. (Arom. 12:1; 1 Ates. 5:21) Masi munrowa owerya sai omukhaliherya mwaninyu olipiha waamini wawe? Mmukhaliheryeke mwaninyu okupali wiira ele Biibiliya oniixuttiha awe ekeekhai. Okathi mwaninyu onookohaaweni, murumeeleke okathi owo wiira mmukhaliherye ophwanya waakhuliwa wa makoho awe, murumeelaka ikaruma sa otokosa ntoko Indice Das Publicações da Torre de Vigia ni Eliivuru Enaakhaliherya Anamoona a Yehova Otokosa Myaha Sikumiheriwe. Mpantta oni “Biibiliya” wa eliivuru eyo ya nenli, mphavelase opuro oni “Uupuxeriwe ni Muluku” wiira mphwanye soohimmwa sinooniherya wiira Biibiliya khahiyo paahi eliivuru yooreera elempwale ni apinaatamu. Ohiya-vo, onookupali wiira Biibiliya “Nuulumo na Muluku.” — 1 Ates. 2:13. w24.12 14-15 itti. 4-5

Axitokweene anrowa omutakiha sai Yesu? Axitokweene ahaana owiixuttiha anna, waahela muhina amiravo ovara saana miteko sa mmulokoni. Axitokweene khanlipelela wiira ale aniwiixuttiha aya, khanrowa ofalyariki. Masi ahaana waavaha miruku wiira yiixutteke okhala oowiiyeviha, oororomeleya ni oowiivahererya wiira yaakhaliherye atthu akina. (1 Tim. 3:1; 1 Ped. 5:5) Ohiya paahi olaleerya, Yesu aahaavaha awiixutti awe muteko wa wiixuttiha. Awiixutti yuupuwela wiira khiyaarowa owerya ovara muteko ole Yesu aarumme awe. Masi Yesu aanisuwela wiira awo yanwerya ovara muteko ole. Ti maana aya aahimmye awe wiira “siisaale Tiithi okirumme awe, nave miyo kinnoorumani nyuwo.” — Yoh. 20:21. w24.10 16 etti. 15; 17 etti. 17

Davidi, aari mwene aamuroromela Yehova. Owo aari mulipa-oowiipa, mulipa-oolepa ipoesia, nakhotto ni profeta. Nave owo saanimphwanya mixankiho. Mwa ntakiheryo, aahaana omutthyawa mwene Sawuli yoowo aamulupattha vanceene. Nave-tho nuumala okhala mwene, owo aahaana omutthyawa mwanawe Absalomi yoowo aaphavela omwaakha omwene. Nnaamwi samphwannye sooweha iya ni sikina, Davidi khaahiyale okhala oororomeleya wa Yehova. Yehova omuhimyaka Davidi, aahimmye so: ‘Onnihakalaliha murima aka’. Tivonto, ninnireerela ovaha ephoole miruku seiyo Davidi aahimmye awe! (1 Mam. 15:5.) Mwa ntakiheryo, muupuwele miruku Davidi anvahale awe mwanawe Salomoni, yoowo aarowa okhala mwene a aisarayeli. Yehova aahimuthanla mmiravo Salomoni yoowo aarowa oteka etemplo, memmo atthu yaarowa aya omukokhorelaka Yehova. (1 Wah. 22:5) Salomoni aahikhalana muteko munceene woovara, nave ampirisariki okhaliheriwa ni Yehova wiira oweettiheke atthu ale. Davidi aalavunle exeeni wiira omulipihe mwanawe? Davidi aahimuleela mwanawe wiira akhala wiira ammwiiwelelaka Yehova, owo anvaraka itthu ni miruku ni aamweettaka saana. — 1 Mam. 2:​2, 3. w24.11 10 itti. 9-11

Mulopwana onaaveeha aahiiso waahasula amwaarawe, ohaana opaka itthu sinittharelana wiira otthikele okhalana waataana wooloka ni Yehova vamosa ni mwaarawe. Etthu yoopacerya, owo ohaana osuwela wiira etthu opanke awe ti yootakhala. Nave ohaana osuwela wiira Yehova onniweha itthu sootheene. (Esal. 44:21; Mus. 12:14; Ahep. 4:13) Ya nenli, owo ohaana ohiya mweettelo awe ni ottharuwa omuhasula mwaarawe. (Mir. 28:13) Ya neeraru, owo ohaana onvekela musammaha mwaarawe. Moottharelana owo ohaana onvekela Yehova wiira omulevelele itampi sawe. (Mit. 3:19) Nave-tho, owo ohaana omuxonttela Yehova wiira onvahe ophavela ni ikuru wiira owerye oturuka mweettelo, muupuwelo, moolumo ni miteko sawe soohiloka. (Esal. 51:​10-12; 2 Akor. 10:5; Afil. 2:13) Ya neexexe, ohaana okhala moovarihana ni mavekelo awe ni wiixutta onyokha inamuna sootheene sa otakhala ni moolumo ooveeha. (Esal. 97:10) Ya neethanu, moowaakuveya, owo ohaana ovekela nikhaliheryo na axitokweene. (Yak. 5:​14-16) Ya neethanu namosa, owo ohaana ompaka palano wiira ohitthikele waahaaxa amwaarawe. w25.01 11 etti. 14

Niireke munnimphenta Yehova, yoowo oovahaleni itthu sooreera ohela muhina okumi anyu? Niireke munniphavela omooniherya omphenta wanyu? Enamuna yooloka mukhanle anyu oopaka eyo, ori wiivahererya wa Yehova ni opatisiwa. Eyo enimookhaliheryani wiirela mpantta emusi ya Yehova. Mwiira siiso, Tiithi anyu ni mpatthani anyu Yehova, onrowa oweettihakani ni wookhaliheryani maana muniirela mpantta emusi awe. (Esal. 73:24; Yes. 43:​1, 2) Ohiya-vo, vaavo muniivahererya anyu wa Yehova ni opatisiwa, munniphwanya nlipelelo na okumi woohimala. (1 Ped. 3:21) Niireke yookhala etthu enookhoottiheryani opatisiwa? Vakhala wiira munaakhula wiira aayo, muhiliyale wiira khamukhanle mekhinyu. Okhuma khalai, atthu imilyau sinceene, yaahaana opaka marukunuxo ni mweettelo aya ni enamuna yuupuwela aya, wiira aphwanelele opatisiwa. Olelo-va, awo annimurumeela Yehova mooluttuweliwa ni moohakalala. w25.03 2 itti. 1-2

Mbiibiliyani, itampi sahu sinilikanyihiwa ni muritti woolemela. Mwene Davidi olavulaka sa itampi sawe, aahimmye so: “Itampi saka sihuukeleya vamuru vaka; ntoko muritti woolemela, nkiniwerya oteexa.” (Esal. 38:4) Yehova onnimulevelela mutthu onittharuwa itampi sawe. (Esal. 25:18; 32:5) Nuulumo na eheeperi noowi “olevelela”, nintaphulela “ottukhula” aahiiso “oteexa”. Hiyo pooti omulikanyiha Yehova ni mulopwana a ikuru oniteexa itampi sahu onarihela ottaiwene. Biibiliya onnirumeela nlikanyiho nikina wiira onikhaliherye oweha moota Yehova oniroiha awe ottaiwene itampi sahu. Esaalimu 103:12 enihimya so: “Ntoko siisaale onikhuma nsuwa orakamelanne aya ni onikela nsuwa, owo onnipweha itampi sahu, ottaiwene ni hiyo.” Onikhuma nsuwa ni onikela nsuwa ti woorakamelana vanceene. Ni moolumo makina, nasaalimu aaphavela ohimya wiira Yehova onnirihela ottaiwene itampi sahu. Eyo entaphulela wiira Yehova onninlevelela moomalela. Nto osuwela eyo enninimaaliha! w25.02 9 itti. 5-6

Pedru aahiixutta etthu ni wiiyeviha wa Yesu. Nuumala Yesu otthikela wiirimu, murummwa Pedru aahipaka mwiiriirya mmosa. Owo aahimpenuxa mulopwana aayariwe oorakala ene. (Mit. 1:​8, 9; 3:​2, 6-8) Muttitthi muulupale wa atthu, waahiweha mwiiriirya ole ni waahimurukurerya murummwa Pedru. (Mit. 3:11) Masi Pedru khaaphavela ovuwihiwa ni atthu ale, hata aahuuwale eriyari ya atthu yaavaha efaita yinceene efaama aahiiso okhulupale. Ohiya opaka eyo, Pedru aahiiyeviha ni aahaaleela atthu ale wiira anvuwiheke Yehova ni Yesu, ohimyaka wiira: “Mwa nsina na Yesu, ni mwaha woowi hiyo ninnaamini nsina nawe, metto sa mulopwana ola munimoona anyu ni munimusuwela anyu, soolipihiwa.” (Mit. 3:​12-16) Nnoowerya otthara ntakiheryo na Pedru, nihihiyaka okhala atthu oowiiyeviha. Ninniwiirela itthu sooreera atthu akina mwaha woowi ninnimphenta Yehova ni atthu, ohiya mwaha woophavela wooniwa. Hiyo ninnooniherya wiira naatthu oowiiyeviha mweekeekhai, vaavo nimmurumeela ahu Yehova ni waapakela itthu sooreera anna ni arokora, hata atthu akina ahisuwelaka itthu nipanke ahu. — Math. 6:​1-4. w25.03 10-11 itti. 11-12

Hiyo nnoowerya wuncererya ohakalala wahu ni muteko woolaleerya nuupuwelelaka moota nnimphenta ahu Yehova ni atthu. (Math. 22:​37-39) Nkuupuwelani moota Yehova onihakalala awe okathi onniweha awe nivaraka muteko woolaleerya ni moota atthu akina anrowa aya ohakalala yapacerya omusoma Biibiliya! Nuupuweleleke woopoliwa wahu ni naapixeryeke murima ale anaakhulela muhupi ninlaleya ahu mwa enamuna yooloka. (Yoh. 6:40) Ankhi vakhala wiira yookhala enookhoottiheryani okhuma owaani? Vakhala wiira ti siiso, muupuweleke etthu mukhanle anyu oopaka wiira mooniherye omphenta wanyu Yehova ni atthu. Okathi wa oretta wa koronaviiru, Samuel ni Dania, khiyaawerya okhuma owaani. Okathi owo wootheene wooxankiha, awo yaanilaleerya amurumeelaka telefoni, alepaka ikarta ni wiiriha soosoma sa Biibiliya amurumeelaka Zoom. Mwaha wa makhalelo aya ale ooxankiha, Samuel ni Dania, khiyaawerya onvarela muteko Yehova ntoko yaapaka aya khalai. Hata vari siiso, awo yaanipaka ele yaawerya aya ni yaanihakalala ni mareeliho yaaphwanya aya. w24.04 18 itti. 15-16

Nnaamwi ekasamento ehikhanle maphattuwelo a ohakalala, anna ni arokora a iyaakha soovirikana annikhalana palano oophavela othela aahiiso otheliwa. Nto muhinatthi omwaavya, muhaana okhalana waataana wooloka ni Yehova, wiivarerya ni osuwela akhala wiira munoowerya omukhapelelaka mwa inamuna sootheene. (1 Akor. 7:36) Akhala wiira muniphavela othela aahiiso otheliwa, muhinatthi opacerya onamorari, ti vooloka osuwela akhala wiira ookhalana mikhalelo muniphavela anyu. Mwaahiire siiso, pooti okhootta othelana ni mutthu orina mikhalelo sooloka, masi mmweemererya ohirina mikhalelo sooloka. Ohimya ekeekhai, mutthu munireerela anyu othelana ohaana okhala mukristau oopatisiwa. (1 Akor. 7:39) Masi eyo khentaphulela wiira khula mukristau opatisiwe, ookhalana mikhalelo sooloka wiira muthelane. Mwiikoheke so: ‘Soolukama xeeni kirina aka? Mikhalelo xeeni kiniphavela aka wiira okhalane ole kiniphavela aka othelana? Kinaathokorerya sai atthu akina?’ w24.05 20 etti. 1; 21 etti. 3

Ntoko atthu aninamorari, munrowa ophuka sai mixankiho sikhanle ookhumelela vakhala wiira ikwaha sikina khamuniiwanana? Niireke eyo enitaphulela wiira khivanrowa oweryaneya othelana? Khahiyo ti yeeyo, maana ale aninamorari aakhalana miyoonelo soovirikana. Ekasamento ennikhala yoolipa vakhala wiira atthu oowanli annittittimihana ni toowaakuva olimalela makhalelo ni soophavela sa khula mmosa. Enamuna muniphuka anyu mixankiho nenna-va, enimooniherya vakhala wiira ekasamento anyu enookhumela saana. Mwiikoheke so: ‘Ninnivaanela mwa enamuna yoottittimihana ni mooreerelana murima? Niireke ninneemererya soovonya sahu ni wiimananiha opaka marukunuxo? Niireke ninnihiya itthu sikina siviraka, ovekelana muswammaha nave na atthu oolevelela?’ (Aef. 4:31) Nto akhala wiira ikwaha sinceene munnivaanyihana ni onyakulihana okathi woonamorari, eyo enooniherya wiira hata muthelanaka khiivo enrowa oturukeya. Nto akhala wiira mmosa a nyuwo onnoona wiira khamuniiwanana, etthu munireerela anyu opaka oowanli ori omaliha onamorari iwo. w24.05 29 etti. 12

Vaavo khula okathi nintthara ahu malakiheryo a Yehova, nave nimpaka ahu soothanla sinivarihana ni Biibiliya, ninnikhala ntakiheryo nooloka. Osoma Nuulumo na Muluku ni olipiha omwaamini wahu Yehova, onoonikhaliherya omuroromela yena ni malakiheryo awe. Nave khaninrowa wootothiwa ni soowiixuttiha soowoothiwa aahiiso itthu sinihimmwa ni atthu akina sinivonyola malamulo a mbiibiliyani. (Aef. 4:14; Yak. 1:​6-8) Nave-tho nnoowerya waakhaliherya ale sinaaphwanya mixankiho aahiiso sooweha. (1 Ates. 3:​2, 3) Axitokweene ahaana okhala atthu anisuwela wiiphimela itthu sootheene, anuupuwela vookhalela, oowiitthokiha saana ni oowaakhela aletto. Nave axitokweene ahaana waakhaliherya atthu akina ‘attharaka moororomeleya nuulumo na Muluku’. (Tito 1:9; 1 Tim. 3:​1-3) Arumeelaka ntakiheryo naya ni muteko wa waaxukurya ni waalipiha anna ni arokora, axitokweene anniwerya waakhaliherya anamalaleerya ohicompela mithukumano, muteko woolaleerya ni yoosoma ya omwaneene. Vaavo anna ni arokora sinaaphwanya aya mixankiho ni ahinoona aya etthu yoopaka, axitokweene anniwuupuxerya efaita erina aya omuroromela Yehova ni wuupuwelela sooleiherya sawe. w24.06 31 itti. 16-18

Okathi Yesu aari awe mulaponi, aahiwiixuttiha atthu wiira Tiithi awe onniphavela vanceene onilevelela, okathi ninttheka ahu. Muthokorerye nlikanyiho na mwaana aarimenle. Mwaana owo, aahithanla okhuma vate va paapa awe ni aahipaka itthu soonanara. Masi okathi mwaana owo “aapacenrye awe wuupuwela saana”, aahitthikela owaani. Paapa awe aapanke exeeni? Yesu aahimmye wiira mwaana ole ‘nlelo ori ene ottaiwene, paapa awe . . . , aahimutthimakela, omukhupaarela, onanvaha epeexo.’ Mwaana ole uupuwela wiira paapa awe khaarowa omulevelela. Tivo, aahinvekela paapa awe wiira okhale namuteko a vatthokoni vawe. Masi paapa awe aaniphavela vanceene omulevelela. Aahimwiirela wiira “mwanaka ola”, ni aahimwaakhela vatthokoni vawe. Paapa ole aahimmye wiira: “Owo aahirimeela, vano, oophwanyiwa.” (Luka 15:​11-32) Okathi Yesu aari awe wiirimu, ikwaha sinceene aahinweha Tiithi awe aamorelaka ikharari ni aakuvaka waalevelela ale yaarukunuxa murima aya. Mweekeekhai, nlikanyiho nla na mwaana aarimenle Yesu aaromonle awe, ti noolipiha vanceene. Nave ninnooniherya moota Tiithi ahu, Yehova, ori awe oomoriwa ikharari. w24.08 11 itti. 11-12

Mukristau orina muupuwelo wooloka, onnipaka khula etthu oniwerya awe, wiira opake soothanla sooloka sinivarihana ni ele Muluku oniphavela awe. Owo onnisuwela wiira, khiivo etthu erina efaita yuulupale enivikana waataana wawe ni Yehova. Ohiya-vo, owo onnirekonyeseri wiira khonisuwela itthu sootheene. Mutthu orina muupuwelo wooloka, onnimuroromela Yehova nave okathi wootheene onnitthara malakiheryo a Yehova. Vaavo nimpaka ahu soothanla sirina efaita yuulupale, ninvekeleke Yehova malakiheryo awe niroromelaka wiira owo onnisuwela etthu eri yooloka para hiyo. Ti voohakalaliha, osuwela wiira Yehova onipattunxe wiira niweryeke otakiha mikhalelo sawe! (Maph. 1:26) Ekeekhai wiira khaninwerya omutakiha Yehova moomalela. — Yes. 55:9. w25.03 11 etti. 13; 13 itti. 17-18

Muhikhalaneke moonelo woohiloka voohimya sa atthu akina. Vakhala wiira mutthu khonixukhurela itthu nipanke ahu, niikoheke so: ‘Niireke wiira mutthu ola okhala wene toohixukhuru aahiiso orooliyala?’ Pooti wiira aakhala mathowa amwiirihe ohipaka etthu naalipelela ahu. Atthu akina tooxukhuru, masi vannaavila wooniherya oxukhuru waya, okhala wiira khalai tiyaavaha atthu akina. Akhala wiira ninnaaphenta anna ni arokora, eyo enoonikhaliherya ohikhalana moonelo woohiloka ni ohihiya waavaha murima onittenle ene. (Aef. 4:2) Mukhaleke oopixa murima. Olavulaka sa ovaha, mwene Salomoni olempe so: “Muyeeherye yoolya anyu mmaasini, munoophwanya ohoolo.” (Mus. 11:​1, Piipiliya Emakhuwa.) Moolumo ala anniixuttiha wiira atthu akina annooniherya oxukhurela waya ‘muhoolo’. w24.09 30 itti. 18-19

Okathi onilaleiwa aya mmulokoni wiira mutthu mmosa oopwapweliwa, hiyo pooti oviriha okathi ni mutthu owo, maana noosuwela wiira owo oorukunuxa murima awe ni oottharuwa mweettelo awe woohiloka. Mutthu owo nlelo onniirela mpantta muloko ni onipirisari okhaliheriwa ni anna ni arokora wiira ohihiye opaka itthu sooreera. (Ahep. 10:​24, 25) Masi eyo ennivirikana ni mutthu onikumihiwa mmulokoni. Hiyo ‘ninnihiya weetta’ ni mutthu owo, ‘nnakhala khaninlya ni mutthu owo.’ (1 Akor. 5:11) Niireke moolumo ala anitaphulela wiira nihaana omuthanya mutthu owo? Nnaari. Hiyo khaninrowa ovirihaka okathi ni mutthu owo. Masi akhala wiira mutthu owo mmusi ahu aahiiso aari mpatthani ahu, ohinatthi okumihiwa mmulokoni, hiyo pooti omulattula orowela mithukumano. w24.08 30 itti. 13-14