Março

Biibiliya, onnaaromola atthu yaari axariya masi nuumala-vo, ahiya okhala axariya. Mmosa a yaawo aari mwene Salomooni. Owo aanimusuwela oratteene Yehova, nave aanisuwela enamuna yooloka ya omukokhorela, mwaha waivaavo Yehova aahimureeliha. Masi muhoolo mwaya, Salomooni aahipacerya waakokhorela amuluku eethiru. Yehova aahinanariwa vanceene, nave itthu Saloomoni aapanke awe saahaakumiherya mixankiho atthu anceene mwa iyaakha sinceene. Masi Biibiliya onihimya wiira, “Salomoni aahirowa omumula ni amuhavinre awe”, opuro yoowo yaavithiwe aya atthu oowaamini ntoko Mwene Davidi. (1 Mam. 11:​5-9, 43; 2 Mam. 23:13) Masi niireke enamuna aavithiwe awe enooniherya wiira onoohihimuxiwa? Biibiliya khonihimya eyo. Masi ohihimuxiwa yoovaha ya Muluku ahu oophenta, Yehova. Owo onnaavaha eparakha eyo, atthu yaale aniphavela wiira amurumeeleke mahiku ootheene. (Yoobi 14:​13, 14; Yoh. 6:44) Niireke Salomoni onimwaakhela eparakha eyo ya ohihimuxiwa? Yehova paahi tonisuwela waakhuliwa wa nikoho nlo. Etthu enisuwela ahu, ti yoowi Yehova khula okathi onipaka itthu mwa xariya. w24.05 4 etti. 9

Hiyo ninnikhala aletto a muheemani mwawe ya nthoonyeryo, vaavo nniivahererya ahu wa Yehova. Muheemani-mmo, nookhalana eyoolya yinceene, yeeyo enlipiha waataana wahu ni Yehova ni wa atthu akina, yaawo ari aletto a Yehova. Moohicikha mapuro ninkhala ahu, ootheene ahu vanooweryaneya okhala aletto a Yehova. Eheema ya Yehova, enniphwanyaneya mapuro ootheene ari aya arumeyi awe. (Wis. 21:3) Ankhi arumeyi a Yehova akhwiiye, niireke nihaana ohimya wiira awo nave aletto a muheemani mwawe? Aayo! Xeeni ninhimya ahu siiso? Mwaha woowi, nlelo atthu awo ari mmuupuweloni mwa Yehova. Yesu aatthokihenrye so: “Alipa-ookhwa annihihimuxiwa, hata Moise ohooniherya muliivuruni olavulaka mwaha wa mwiri waapatta mooro, okathi aamuhimya awe Yehova okhala ‘Muluku a Abrahamu, Muluku a Isarayeli ni Muluku a Isaakhi ni Muluku a Yakobe’ owo khahiyo Muluku a alipa-ookhwa, masi Muluku a atthu akumi, okhala wiira onniwoona ootheene okhala akumi.” — Luka 20:​37, 38. w24.06 3 itti. 6-7

Sadoki aaronwe oHebroni iilokihenrye ene para owana ekhotto. (1 Wah. 12:38) Sadoki aaniphavela ni murima awe wootheene omukhaliherya Davidi ni owaakiha aisarayeli mmatatani mwa awanani aya. Aanipirisari okhala oolipa murima, okhala wiira khahiyo aari nakhotto aasuwela owana oratteene ikhotto. Moota xeeni namukuttho Sadoki aixuntte awe okhala oolipa murima? Sadoki aakhala ni alopwana ootupa ni oolipa murima, moohaanyiherya aixuntte ottharaka matakiheryo a alopwana awo. Mwa ntakiheryo, mwaha wa Davidi okhala oolipa murima, eyo yaahiwiiriha aisarayeli omuthanla wiira okhale Mwene aya, ahimyaka wiira: “Ti nyuwo munrowa oweettihaka . . . aisarayeli”. (1 Wah. 11:​1, 2) Okathi wootheene Davidi aarowa awe owana ni awanani awe, owo aanimuroromela Yehova. (Esal. 138:3) Nave Sadoki aahiixutta okhala oolipa murima ottharaka matakiheryo a alopwana akina, ntoko Yehoyada vamosa ni mwanawe, yoowo aari nakhotto, iitthaniwa Benaya ni maxeefi makina 22 yaamukhalihenrye Davidi. — 1 Wah. 11:​22-25; 12:​26-28. w24.07 3 itti. 5-6

Saulo a oTarso, aanaalupattha vanceene awiixutti a Yesu Kristu. Makristau manceene yuupuwela wiira Saulo khaarowa orukunuxa murima awe nnakhala vakhaani. Masi Yesu aanisuwela wiira Saulo anwerya oturuka muupuwelo awe ni orukunuxa murima. Yesu ni Tiithi awe, yaahoona wiira Saulo aahikhalana mikhalelo sooreera. Yesu aahihimya wiira: “Miyo koomuthanla mulopwana owo.” (Mit. 9:15) Nave Yesu aahirumeela mwiiriirya wiira omwiirihe Saulo orukunuxa murima. (Mit. 7:58–8:3; 9:​1-9, 17-20) Nuumala okhala mukristau, Saulo, yoowo muhoolo mwaya aasuweliwe okhala murummwa Paulo, ikwaha sinceene aahooniherya oxukhurela wawe mwaha wa oreereliwa murima ni omoreliwa ikharari. (1 Tim. 1:​12-15) Ekwaha emosa, Paulo aahiiwa wiira anna a muloko wa oKorinto, yaahimuhiya mmulokoni, mulopwana mmosa aarupihana voohiloka. Nto Paulo aalenle wiira apake exeeni? Etthu Paulo aahimmye awe, enniniixuttiha moota Yehova onooniherya awe ophenta, okathi onaattaruxa awe arumeyi awe ni moota onaamorela awe ikharari, vaavo anirukunuxa aya murima. w24.08 13 itti. 15-16

Iyaakha sinceene saattharelana, vakhaani-vakhaani, Yehova aahiiwanyeiha oratteene moota apinaatamu oottheka yaarowa aya omwaattamela. Nuumala okhumelela muxankiho ole wEdeni, Abeli, yoowo aari mwaana a nenli a Adamu ni Eva, tori pinaatamu oopacerya aamwaaminni Yehova. Abeli aahinvaha mukuttho Yehova mwaha woowi aanimphenta, aaniphavela omuhakalaliha ni aniphavela omwaattamela yena. Abeli ari makampusi, tivo aahikuxa ipwittipwitthi sawe saamukhaani, ohita wiira onvahe mukuttho Yehova. Nto niireke Yehova aaheemererya? Aayo! Yehova aahisiveliwa ni Abeli ni soovaha sawe. (Maph. 4:4) Nave, Yehova aahihakalala ni mikuttho saavahiwa ni atthu akina, yaawo yamphenta ni yaamuroromela. Mutthu mmosa ti Nowe. (Maph. 8:​20, 21) Mwaha wa weemererya mikuttho iyo, Yehova ohooniherya wiira apinaatamu oottheka, anoowerya omuhakalaliha ni omwaattamela. w24.08 3 itti. 5-6

Hiyo pooti oxankiheya ni woona owereya mwaha wa ohixariya onikhumelela. (Mus. 7:7) Hata arumeyi oororomeleya a Yehova a khalai ntoko Yoobi ni Habakuki, yaahikhalana moonelo mmosa-ru. (Yoobi 6:​2, 3; Hab. 1:​1-3) Ekeekhai wiira khahiyo vootthekeya okhalana moonelo owo, masi nihaana okhalana ephoole wiira nihipake etthu yaarowa onikumiherya aahiiso waakumiherya mixankiho atthu akina, ni yaarowa otepiha mwaha owo. Ikwaha sikina vanikhala wiira atthu anipaka itthu soohiloka khanihukhummwa. Mwaha waivaavo, nyuwo pooti opaceryaka waanyiherya vakhala wiira vannireerela opaka itthu sooloka. Nwehe etthu yiiraneyale ni nasaalimu, yoowo aapacenrye oweha wiira atthu yaapaka itthu sootakhala yaanikhumela saana, masi ale yaapaka itthu sooreera yaamutepa okhalana mixankiho. Owo aahimmye so: “Okathi wootheene, atakhali khanixanka ni etthu”. (Esal. 73:12) Owo aahixankiheya ni ohixariya aaweha awe, mpakha opacerya waanyiherya akhala wiira vaari vooloka wiimananiha omurumeela Yehova. Owo ahincererya ohimyaka so: “Okathi kaaphavenle aka osuwela oratteene etthu ene, eyo yaahikixankiha.” — Esal. 73:​14, 16. w24.11 3 itti. 5-7

Hiyo ninninvuwiha Yehova okhala wiira ninnimuttittimiha vanceene. Tthiri, sookhala itthu sinceene sinniiriha omuttittimiha. Yehova ookhalana owerya wa opaka etthu eniphavela awe, nave khonitemwa. (Esal. 96:​4-7) Itthu sipattunxe awe, sinnooniherya wiira ookhalana miruku sinceene. Owo oonivaha okumi ni itthu sootheene sinnikhaliherya okhala akumi. (Wis. 4:11) Muluku toororomeleya. (Wis. 15:4) Itthu sootheene sinipaka awe sinneetta saana. Nave khula okathi itthu sootheene onileiherya awe, onnimaliherya. (Yox. 23:14) Tivonto, olavulaka sa Yehova, profeta Yeremiya aahimmye so: “Eriyari ya atthu a maloko ootheene arina ankhili ni a omwene wootheene wa mulaponi, Khuuvo onlikana ni nyuwo.” (Yer. 10:​6, 7) Mweekeekhai, sookhala itthu sinceene sinniiriha omuttittimiha Tiithi ahu a wiirimu. Hiyo ninninvuwiha Yehova okhala wiira ninnimphenta vanceene. w25.01 3 itti. 5-6

Ale aninvirikanya Muluku, aniphavela wiira itthu sooloka sa mutthenkeso wa Yehova, sikhaleke ntoko soohiloka. Mwa ntakiheryo, nihiixutta mbiibiliya wiira Yehova oniphavela wiira arumeyi awe akhalaneke mweettelo wooloka, ni asyakeke opaka itthu saarowa ohonona waataana waya ni yena. Nave Yehova ohimmye wiira akhala mutthu onipaka itampi ni ohinattharuwa, ohaana okumihiwa mmulokoni. (1 Akor. 5:​11, 12; 6:​9, 10) Okhala wiira ninniiwelela nlamulo nlo, awanani ahu anihimya wiira khannaapixerya murima atthu akina, nnaaphukela vootakhala ni khinnaaphenta atthu. Ninnimusuwela ole ori nwanani a mutthenkeso wa Yehova. Satana Diabo tonimwarya-mwarya soowoothiwa voohimya sa mutthenkeso wa Yehova. Owo “nawoothe ni topacenrye wootha”. (Yoh. 8:44; Maph. 3:​1-5) Nto khanintikinihiwa osuwela wiira Satana, onnaarumeela atthu wiira amwarya-mwarye soowoothiwa voohimya sa mutthenkeso wa Yehova. w24.04 10-11 itti. 13-14

Yapacerya maxakha maalupale, woonasa wene atthu akina anrowa onweha “Babiloonia Muulupale” opwetexiwaka, animuupuwela wiira mwa iyaakha sinceene Anamoona a Yehova yaanilaleya itthu sinrowa wiiraneya. Niireke atthu awo pooti opacerya omwaamini Yehova? (Wis. 17:5) Vakhala wiira eyo enimwiiraneya, enoorowa onuupuxerya etthu yiiraneyale iyaakha sinceene wExiitu, okathi wa Moise. Muupuwele wiira “atthu akina anjene” yaahaahoola aisarayeli okathi yaakhuma aya wExiitu. Woonasa wene, akina a yaawo yaahipacerya omwaamini Yehova nuumala oweha siiraneyaka Ihukhumu Muloko Moise aalaleya awe. (Okhu. 12:38) Moolikanasa, nuumala Babiloonia opwetexiwa, niireke nnoorowa oxankiheya ni woona okhala voohixariya atthu akina otakaahana ni hiyo? Nnaari! Masi hiyo nimphavela okhala ntoko Tiithi ahu, yoowo ori “Muluku oomoriwa ikharari ni oovilela, oopisa onanariwa, ooreera murima ni oororomeleya”. — Okhu. 34:6. w24.05 11 itti. 12-13

Exeeni ekhanle ookhumelela vakhala wiira nnoohiya “otthara moolumo ooreera”? Nrowe nthokorerye ntakiheryo nimosa. Okathi wa makristau oopacerya, akina a yaawo, yaanilaleya itthu soowoothiwa ahimyaka wiira nihiku na Yehova noophiya. Woonasa wene awo yaakhenle ekarta yaahimya siiso, yaakhala wiira yaalempwale ni murummwa Paulo. Nto ehinatthi ovarerya mwaha ole, makristau makina a oTesaloonika yaahikupali soohimmwa iyo ni enapacerya omwara-mwarya. Masi vaakhanle wiira yaahivarerya saana itthu Paulo aawiixuttinhe awe, awo khiyaarowa owokiwa. (2 Ates. 2:​1-5) Paulo aahaaleela anna awo, wiira khivaareerela okupali khula etthu yaaleeliwe aya. Ophavelaka waakhaliherya ni itthu saarowa okhumelela muhoolo, Paulo aamalinhe ekarta aalepenle awe atesaloonika, ohimyaka so: “Kinlepa makhomaso ala ni ntata naka. Miyo kinlepa siisa ipaphelo saka sootheene”. — 2 Ates. 3:17. w24.07 12 itti. 13-14

Makristau aheeperi, yaanipirisari ovilela wiira awerye oxintta mixankiho saarowa weehererya waamini waya. Nnaamwi akina yaalupatthinwe khalai, masi akina yaakenle ekristau okathi wa murettele. Tivonto, murummwa Paulo aahiwuupuxerya wiira yaahana wiilokiherya wiira awerye oxintta olupatthiwa ni ohihiya ororomeleya mpakha okhwa, ntoko Yesu. (Ahep. 12:4) Ayuda anceene yaaninanariwa ni yaamutepa okhala ootakhala mwaha wa atthu anceene yaakela ekristau. Okathi aalaleerya awe oYerusalemu, Paulo aahitupheliwa ni muttitthi wa atthu. Ayuda oowiiraka 40, “yaahimpaka palano ni yaahilapha, ahimyaka wiira khiyaarowa olya etthu nnakhala owurya, ahimwiivale toko Paulo”. (Mit. 22:22; 23:​12-14) Nnaamwi yaanyokhiwa ni olupatthiwa, makristau ale yaanipirisari othukumana wiira amukokhorele Yehova, olaleya ihapari sooreera ni olipiha waamini waya. w24.09 12 etti. 15

Yohani aari murummwa aaphentiwa vanceene ni Yesu Kristu. (Math. 10:2) Yohani aanimuhoola Yesu okathi aalaleerya awe, aahiweha miiriirya aapaka awe ni aari ni Yesu okathi wootheene wooxankiha. Owo aahinweha Yesu okathi iiviwa awe ni nuumala ohihimuxiwa. Nave Yohani aahaaweha atthu anceene yaawo yaakela ekristau, okathi ole wa arummwa. Nto owo aahikhala okathi munceene owehaka moota ihapari sooreera saalaleeriwa aya atthu anceene vathi-va. (Akol. 1:23) Nnaamwi uuluvanle vanceene, murummwa Yohani aahikhalana eparakha ya olepa eliivuru yookuxa murima yeeyo erina “moolumo a itthu Yesu Kristu oonihenrye awe”. (Wis. 1:1) Yohani oolepa eliivuru erina nsina nawe. Nave owo oolepa-tho iliivuru sikina tthaaru. Ekarta awe ya neeraru, aamulepenle munnawe yoowo amphentexa awe ntoko mwanawe. (3 Yoh. 1) Itthu owo aalempe awe, saahaalipiha anna okathi ole ni sinninlipiha olelo-va. w24.11 12 itti. 15-16

Mulopwana onimphenta mwaarawe, onninvaha efaita ni onnimuthokorerya saana. Owo onnimoona ntoko yoovaha yooreera enikhuma wa Yehova. (Mir. 18:22; 31:10) Tivonto, owo onnimureerela murima ni omuttittimiha hata okathi woorupihana. Mwaha waivaavo, owo khaarowa opaka etthu yaarowa ohimusivela aahiiso omwiiriha oxanka mmuupuweloni ni vamurimani vawe. Ohiya-vo, onimwiimananiha opaka ele eniwerya awe wiira okhalane murima wooloka ohoolo wa Yehova. (Mit. 24:16) Nyuwo alopwana, Yehova onnihakalala vanceene okathi onoowehaaweni mmuttittimihaka mwaarinyu ni moolumo ni miteko sanyu. Tivonto, muhihiye omuttittimiha mwaarinyu. Muhipakeke itthu saarowa omuriipiha murima. Ohiya-vo, mumphenteke, mmuttittimiheke ni mmuthokoreryeke mooreera murima. Mwapaka eyo, owo onooweha wiira munnimphenta ni omuthokorerya. Vakhala wiira munoomuttittimiha mwaarinyu, eyo enimookhaliheryani olipiha waataana orina anyu ni Yehova. — Esal. 25:14. w25.01 13 itti. 17-18

Okhalela nthiti muteko woolaleerya, toniwiiriha Anamoona a Yehova ovirikanaka ni atthu akina aniihimya okhala makristau. Exeeni enrowa onikhaliherya ohihiya okhalela nthiti olaleerya? Nnoowerya wiixutta etthu ni ntakiheryo na Yesu na moota wookhalela nthiti muteko woolaleerya. Okathi aari awe valaponi, Yesu aanikhalela nthiti waalaleerya atthu ihapari sooreera. Yesu aahilikanyiha muteko awe woolaleerya, ni mulopwana mmosa aaphatteiye mwiri wa efiiku ematta awe ya ewuuva. Mulopwana owo aahiviriha iyaakha tthaaru okhapelelaka mwiri ole wahiima. Mwa enamuna emosa-ru, Yesu aahiviriha iyaakha tthaaru aalaleeryaka ayuda. Masi anamunceene a yaawo khiyeemerenrye muhupi aalaleya awe. Ntoko siisaale mulopwana ole ahaanyanyanle awe mwiri ole wa efiiku, nave-tho Yesu khaahiyale waalaleerya atthu nave kaakhulumunwe. (Luka 13:​6-9) Osuwela itthu Yesu iixuttiha awe ni otthara ntakiheryo nawe, sinoonikhaliherya okhalela nthiti muteko woolaleerya. w25.03 14-15 itti. 1-4

Ankhi vakhala wiira ookhala munimoona anyu oreerela othelana? Niireke moowakuveya muhaana omuleela etthu munuupuwela anyu ni yena? Biibiliya onihimya wiira mutthu a ankhili khonipaka etthu ohuupuwenle. Nyuwo munimooniherya okhalana ankhili, mwiivahaka okathi wiira musuwele moota onipaka awe itthu, onaathokorerya awe anna ni arokora ni amusi awe, masi muhinatthi omuleela ele munuupuwela anyu. Munrowa owerya sai omusuwela saana ole oosivenleni masi yena moohisuwela? Munoowerya osuwela waataana orina awe ni Yehova, mikhalelo sawe ni mweettelo awe, okathi wa mithukumano sa mmulokoni aahiiso mithukumano sikina. Mwa ntakiheryo, munoosuwela tani ari apatthani awe, ni itthu xeeni sinilavula awe. (Luka 6:45) Niireke soolukama sawe sinoolikana ni sawinyu? Nyuwo pooti waakoha axitokweene a muloko awe aahiiso anna ni arokora akina arina waataana wooloka ni Yehova animusuwela oratteene. (Mir. 20:18) Nyuwo pooti okoha voohimya sa mikhalelo sawe ni mweettelo awe. (Ruth. 2:11) Okathi munimusuwela anyu ole oosivenleni, musyakeke omunyoonyiha aahiiso omuriipiha murima. Muttittimiheke miyoonelo sawe ni muhiviriheke okathi munceene muri ene ni mutthu owo, mphavelaka osuwela itthu sootheene mpakha ommala-maliha. w24.05 22 itti. 7-8

Axitokweene annimutakiha Yesu, ahaakuvelaka wuupuwela wiira mutthu owo khoniphavela oturuka muupuwelo awe ni mweettelo awe. Atthu akina pooti orukunuxa murima ekwaha yoopacerya anithukumana aya ni axitokweene. Masi atthu akina annipirisari okathi munceene. Tivonto axitokweene pooti opirisariki othukumana ni mutthu owo ikwaha sikina. Woonasa wene, nuumala othukumana ekwaha yoopacerya, mukristau owo pooti wuupuwelela oratteene etthu oleeliwa awe, nto eyo pooti omwiirihaka wooniherya wiiyeviha ni onvekela Yehova wiira omulevelele etampi awe. (Esal. 38:18) Siiso, ekwaha ya nenli anrowa aya othukumana, mutthu owo pooti wooniheryaka otepa oriipiwa murima ovikana ekwaha yoopacerya. Axitokweene annooniherya othunku ni oreera murima wiira amukhaliherye mutthu owo opanke etampi orukunuxa murima. Awo annivekela Yehova wiira aareelihe wiimananiha waya ni annilipelela wiira munnaya ole onimoona wiira oopaka etthu yoohiloka ni onoorukunuxa murima. — 2 Tim. 2:​25, 26. w24.08 22-23 itti. 12-13

Yehova khoniphavela wiira opwetexiwe mutthu! Oniphavela wiira ale apanke etampi yuulupale, atthikele waataana nuuwo. (2 Akor. 5:20) Tivonto, okathi wootheene Yehova onnaatumererya arumeyi awe amuhiyale, wiira arukunuxe murima ni ahokolowele wa yena. Axitokweene a mmulokoni, annivara muteko vamosa ni Yehova wiira yaakhaliherye ale apanke itampi suulupale orukunuxa murima aya. (Arom. 2:4; 1aKor. 3:9) Nkahaya muupuwelele ohakalala onikhumelela wiirimu, okathi mutthu mmosa opanke etampi yuulupale, onirukunuxa awe murima! Tiithi ihu a wiirimu Yehova, onnitteeliwa murima vanceene, khula okathi epwittipwitthi yaarimenle enitthikela aya mmulokoni. Omphenta wahu Yehova, onnincerereya okathi nnuupuwelela ahu othunku awe, omoriwa wawe ikharari ni oreera wawe murima wuulupale. — Luka 1:78. w24.08 31 itti. 16-17

Vaakhanle wiira Yesu aheemererya okhala mwene, owo aarowa okhaliheryaka ipoliitika sa ayuda, seiyo saalamuleliwa ni aroma. Biibiliya onihimya so: ‘Aahirowa omwaako mekhawe’. Nnaamwi aakhanyereriwa ni atthu akina, owo khiirenle mpantta ipoliitika. Tthiri nla ntakiheryo nooloka ninreerela ahu otthara! Ekeekhai wiira atthu khanrowa onivekela wiira nitatuxe ephaawu, nnakhala waapenuxa atthu mwa mwiiriirya aahiiso ovekeliwa okhala namalamulela. Masi awo pooti onivekela wiira nikhaliheryeke epoliitika, ni onikhanyererya onvotari mutthu animoona aya wiira onrowa okhala namalamulela ooloka. Tthiri Yesu oonivaha ntakiheryo nooloka. Owo aahikhootta wiirela mpantta myaha sa epoliitika vaavo aahimmye awe so: “Omwene aka khahiyo wa olumwenku ola”. (Yoh. 17:14; 18:36) Ntoko Yesu, nihaana wiimananiha otthara ntakiheryo nawe. Hiyo ninniroromela ni okhaliherya Omwene wa Muluku. Nave ninnaaleela atthu akina voohimya sa Omwene owo ni ninnivekela wiira orwe. — Math. 6:10. w24.12 4 itti. 5-6

Okathi munimusoma anyu Biibiliya, nweheke moota mukhanle anyu oovarihela muteko etthu muniixutta anyu. Mwa ntakiheryo, mutakiheke exariya ya Yehova, muhaathanyaka atthu akina. Mutakiheke moota Yesu amphenta awe Tiithi awe ni aaphenta awe atthu akina, mweemereryaka ohaawa mwaha wa nsina na Yehova ni mwiivahereryaka wiira mwaakhaliherye anna ni arokora. Nave-tho, mmutakiheke Yesu mwaalaleeryaka atthu akina wiira asuwele itthu sooreera Yehova onipaka awe mmureerelo wa apinaatamu, wiira awo-tho, yaamini yoowoopola. Akhala wiira khannihiya wiixutta voohimya sa yoowoopola, ninrowa otepaka omphenta Yehova ni Yesu. Niira siiso, awo anrowa otepaka oniphenta. (Yak. 4:8) Tivonto, nihihiye orumeela oratteene itthu sootheene Yehova onnivaha awe, wiira nitepeke wiixutta voohimya sa yoowoopola. w25.01 25 itti. 16-17

Yoolepa ya olelo, enninlipiha ehimyaka so: “Nyuwo . . . molevelela sottheka saka sothene”. Eyo entaphulela wiira Yehova onnirihela ottaiwene itampi sa mutthu ottharunwe ni khonuupuwela-tho. Ni moolumo makina, mwene Ezekiya aaphavela ohimya so: “Nyuwo moottipiha itampi saka vanakhala ntoko kasitonko wiiraneya”. Biibiliya onnilavula nlikanyiho nikina niri Mikeya 7:​18, 19. Ni moolumo ala, ninniweha wiira Yehova onnirihela itampi sahu mapuro oowiixa a mphareya. Khalai, okathi etthu yaamorela aya mapuro oowiixa a mphareya, khuuvo-tho aawerya ophwanya. Malikanyiho ala, anniniixuttiha wiira okathi ninttharuwa ahu, Yehova onninrula muritti ahu, eyo piiyo, itampi sahu. Sintoko Davidi ohimmya awe “oohakalala taale aleveleliwe miteko saya sootakhala, ni siliyaliwe itampi saya”. (Arom. 4:7) Tthiri nno tori olevelela weekeekhai! w25.02 9 itti. 7-8

Olelo-va, valaponi yookhala eparayiisu ya nthoonyeryo memmo anamunceene anikhala aya ni murettele ni aniluttuweliwa aya ovara itthu sooreera. Nto ale ari mparayiisu mmo, aalakela ohikhuma. Nave aniphavela wiira atthu anceene akhaleke naawo opuro owo wooreera. Eparayiisu eyo exeeni? Eyo eparayiisu ya nthoonyeryo, eyo piiyo, okokhorela weekeekhai! Olumwenku ola wootheene, Satana osariha itthu soohiloka ntoko onyokhana, otakhala ni itthu soowoopiha. Masi Yehova owenrye sai opaka eparayiisu eyo ya nthoonyeryo, arumeyi awe anikhala aya ni murettele ni moowiirana? (1 Yoh. 5:19; Wis. 12:12) Muluku ahu oophenta, onnisuwela wiira ninkhala olumwenku ola wootakhala. Tivonto, onnivaha awe itthu nimprisari ahu wiira nilipihe omwaamini wahu ni wiira nihihiye omurumeela ni murettele. Biibiliya onnilavula sa eparayiisu ya nthoonyeryo ntoko ‘ntthyawelo’ ni “ematta ehinimala maasi”. (Yes. 4:6; 58:11) Akhaliheriwaka ni Yehova, ale anikhala mparayiisu mmo annikhalana murettele ni ovareleleya, nnaamwi ari ene mahiku ookiserya ni ooxankiha. — Yes. 54:14; 2 Tim. 3:1. w24.04 20 itti. 1-2

Akhala wiira muniphavela othela aahiiso otheliwa, moohaanyiherya monvekela Yehova voohimya sa mwaha owo. Ekeekhai wiira Yehova khonimuthanlela mutthu ole onrowa awe othelana. Masi onookhaliherya wiimananiha wanyu ni moonelo anyu wiira mumphwanye ole munireerela anyu othelana, akhala wiira khamunihiya omuleela yoophavela anyu ni moonelo anyu. (Esal. 62:8) Munvekeleke Yehova wiira oovaheeni ankhili ni opixa murima. (Yak. 1:5) Akhala wiira mooviriha okathi munceene mumphavelasaka munna aahiiso murokora wiira muthelane, muhihiye, maana Yehova onnileiherya wiira onimookhaliheryani, onimoovahani ophenta ni onnithokorerya itthu munipirisari anyu.(Esal. 55:22) Mukhalaneke ephoole, wiira omphavela ole munrowa anyu othelana ehikhale etthu yoopacerya mookumini mwanyu. (Afil. 1:10) Hata muthenle ene wala mutheliwe ene aahiiso nnaari, eyo khentaphulela wiira mookhalana ohakalala weekeekhai. Masi aniphwanya ohakalala weekeekhai, taale arina waataana wooloka ni Yehova. (Math. 5:3) Nave ale ahithenle aahiiso ahitheliwe, aakhalana eparakha ya wuncererya muteko anninvarela aya Muluku. (1 Akor. 7:​32, 33) Nto murumeeleke saana okathi owo. w24.05 21 etti. 4; 22 etti. 6

Okathi mikavi munireerela anyu oviriha munamorariki? Akhala wiira munipaka soothanla mwaakuveyasaka aahiiso mwaha wookhummwa murima, eyo pooti okumiherya mixankiho. (Mir. 21:5) Nto onamorari wanyu ohaana oviriha okathi munceene wiira mmusuwele saana ole oninamorari ni nyuwo. Masi muhaana okhalana ephoole wiira muhivirihe okathi munceenexa ovikana vanireerela aya. Biibiliya onihimya so: “Otepa owehererya onniripiha murima.” (Mir. 13:12) Etthu xeeni atthu akina akhanle aya oopaka, akhala wiira annisuwela wiira aakhala makristau aninamorari? Enamuna emosa mukhanle anyu oopaka eyo, ori waalattula wiira mulye hoothe, yiirele mpantta omulompa Muluku vatthokoni vanyu aahiiso othweela hoothe. (Arom. 12:13) Nave hiyo pooti waakhaliherya naaholaka mikwaha saya, waavaha puleya aahiiso owooliha evaranta ahu wiira avaanele myaha saya, masi vaniweryaneya aya waaweha. (Akal. 6:10) Akhala wiira ale aninamorari annoovekelani wiira mwaahoole, munimwaakhaliherya vanceene. Mukhalaneke ephoole wiira muhaahiye awo ari ene mekhaya, masi mwaavaheke okathi wiira avaanele myaha saya nyuwo muhiwiriyanaka. w24.05 30 itti. 13-14

Axitokweene anneererya osuwela etthu emwiirinhe mutthu ole opaka etampi. Niireke waataana wa mutthu owo ni Yehova waanivukuwa, mwaha wa ohimusoma Biibiliya ni ohilaleerya? Niireke mutthu owo oohiya onvekela Yehova okathi wootheene? Niireke eyo yaahimwiiriha ohiya owanana soophavela sawe soohiloka? Apatthani awe taani, nave matthekulelo awe taavi? Itthu onithanla awe sinimwiiriha wuupuwelela exeeni ni ophavela opaka exeeni? Niireke onnisuwela moota Tiithi awe Yehova, onoonela awe etthu opanke awe? Axitokweene pooti omukoha mutthu owo, makoho anrowa omukhaliherya wuupuwelela itthu siirinhe ompatthani awe ni Yehova ovukuwa ni simwiirinhe opaka etampi. Awo aahaana opaka eyo amureerelaka murima ni ahimukohaka itthu sa mookumini mwawe ahinreerela aya osuwela. (Mir. 20:5) Awo pooti orumeela malikanyiho wiira amukhaliherye mutthu owo woona wiira etthu opanke awe ti yoohiloka. Pooti wiira muthukumano woopacerya mutthu owo pooti oriipiwa murima, mwaha wa mweettelo awe ni etthu opanke awe. Nave pooti wiira mutthu owo onoorukunuxa murima okathi ene yoowo. w24.08 22 itti. 9-11

Yesu aanikhalela nthiti olaleerya “ihapari sooreera sa Omwene”, maana aanisuwela wiira eyo ti etthu Muluku aaphavela awe wiira opakeke. Etthu Yesu aatepexa awe ovahexa efaita, waari olaleerya ihapari sooreera. Hata miyeeri 6 sookiserya sa muteko awe woolaleerya, owo “aaheetteetta ipooma sotheene ni mittetthe sotheene” owiixuttihaka atthu. (Luka 13:22) Yesu, aahiwiixuttiha atthu akina, wiira yalaleyeke ihapari sooreera sintoko yena iira awe. (Luka 10:1) Olelo-va, Yehova ni Yesu aniphavela wiira nikhaleleke nthiti olaleya ihapari sooreera, okhala wiira muteko orina efaita yuulupale. (Math. 24:14; 28:​19, 20) Nnoowerya okhalela nthiti muteko woolaleerya, vakhala wiira ninnaathokorerya atthu ntoko Yehova onaathokorerya awe. Owo oniphavela wiira atthu a makhalelo ootheene yiiwe ni yeemererye ihapari sooreera wiira yoopowe. (1 Tim. 2:​3, 4) Okhala wiira ihapari iyo pooti woopola ikumi sa atthu, Yehova onninikhaliherya olokiherya inamuna ninlavula ahu ni atthu. Nto hata atthu ahiphavelaka niinano omurumeela Yehova, woonasa wene, anoowerya opaka eyo muhoolo ahinatthi maxakha maalupale. w25.03 15-16 itti. 5-7

Vano, mukristau pooti orumeela murima awe wiixuttihiwe ni Biibiliya wiira osuwele etthu onrowa awe othanla. Akina pooti ophavela omukoha ihaali, aahiiso omwaakhela omuthukumanoni. Masi hiyo khaninrowa ovaanelaka ni mutthu owo nnakhala oviriha okathi nuuwo. Akina pooti wiikoha so: ‘Kiira Biibiliya onihimya wiira mukristau onimukoha ihaali mutthu siiso, onnikhaliherya miteko sawe sootakhala?’ (2 Yoh. 9-11) Mpantta ola wa mbiibiliyani, onooniherya wiira anihimmwa anamavirikanya ni ale anaatumererya atthu akina okhalana mweettelo woonanara. (Wis. 2:20) Tivonto, akhala wiira mutthu owo namavirikanya aahiiso onaatumererya atthu akina opaka itthu sootakhala, axitokweene khanrowa omuxukurya. Hata vari siiso, pooti wiira mutthu owo onoorukunuxa murima awe. Masi mutthu owo aahirukunuxe murima, hiyo khaninrowa omulavuliha nnakhala omulattula para mithukumano. w24.08 30-31 itti. 14-15

Nuumala Yesu ovaha eyoolya muttitthi ole, awiixutti awe yaahirowa ophareya ewela ekalawa enarowa oKafarnawu. Nave aahirowa omwaako mekhawe osyakaka okhalihiwa mwene. (Yoh. 6:​16-20) Yeettaka siisaale, ephareya yaaninyakula okhala wiira yaanoopa epheyo yuulupale ni yaanikhumelela mawimpi ootupa. Yesu aahaakhumelela eettaka vasulu va maasi. Yesu aahimuleela Pedru wiira eetteke vasulu va maasi orowaka opuro aari awe. (Math. 14:​22-31) Nuumala Yesu okela mukalawani, epheyo yaahimaala. Nto awiixutti yaahitikinihiwa vanceene, mpakha ohimya so: “Veekeekhai, nyuwo mwa Mwaana a Muluku”. (Math. 14:33) Masi hata vari siiso, awo khiyaawenhe ovarihana waakhanle mwiiriirya ole ni etthu ele Yesu aapakenle awe muttitthi ole. Incereryaka yoowiiraneya eyo, Marko onihimya so: “Awiixutti yaahitikinihiwa vanceene, maana khiyaiwexenxe yootaphulela ya mwiiriirya wa iphaawu”. (Mar. 6:​50-52) Veekeekhai, awiixutti ale khiyaawenrye wiiwexexa owerya Yehova anvanhe awe Yesu woopaka miiriirya. w24.12 5 etti. 7

Hiyo nnoowerya wooniherya oxukhurela wahu ophenta wa Yehova nipakaka itthu sootheene ninwerya ahu vahinatthi ni nuumala nihiku na Wuupuwelela, wiira nimooniherye Yehova moota ninxukhurela ahu yoowoopola. Ohiya wiilokiherya paahi wiira nirowele muthukumano owo, nihaana waalattula atthu akina wiira arowe. Mwaatthokiheryeke atthu awo munaalattula anyu, etthu enrowa wiiraneya okathi wa muthukumano wa Wuupuwelela. Nyuwo pooti owooniherya iviidiyu sini: Exeeni Yaamwiirinhe Yesu Okhwa? ni Wuupuwelela Okhwa wa Yesu, siri esaite jw.org. Nkuupuwelani ohakalala onikhala wiirimu, vaavo ale ahiyale olaleerya ni orowela mithukumano anitthikela aya ovara miteko iyo! (Luka 15:​4-7) Okathi owo wa muthukumano wa Wuupuwelela, nimananihe waakhomasa ale ahiyale olaleerya ni orowela mithukumano ni ale anampacerya muthukumano owo. Nimphavela owooniherya wiira ninniwaakhela! — Arom. 12:13. w25.01 29 etti. 15

Yoowoopola enninikhaliherya oweha wiira Yehova, Muluku a xariya. Mukhalelo mukina muulupale omwiirihale Muluku omuruma Mwanawe, ti oniphenta wawe. (Yoh. 3:16; 1 Yoh. 4:​9, 10) Yehova oomuruma Mwanawe wiira okhwe mmureerelo ahu, maana oniphavela wiira niphwanye okumi woohimala ni niirele mpantta emusi awe. Nkuupuwelani ela: Okathi Adamu yaatthenke aya, awo yaahihiya wiirela mpantta emusi ya Yehova. Yookhumelela aya tiila: Ootheene ahu niyariwe nihiirelaka mpantta emusi ya Muluku. Masi orumeelaka mukuttho woowoopola, Yehova onninlevelela itampi sahu. Nto Yehova onrowa waahela mweemusini mwawe, atthu ootheene animwaamini ni animwiiwelela. Hata niinaano-va, nnoowerya okhalana waataana wooloka ni Yehova vamosa ni anna ni arokora. Veekeekhai, Yehova onniniphenta vanceene! — Arom. 5:​10, 11. w25.01 21 etti. 6

Yehova oonivaha etthu erina efaita yinceene, okathi aamurumme awe Mwanawe wiira okhwe mmureerelo ahu! (2 Akor. 9:15) Nyuwo munoowerya okhalana ompatthani wooloka ni Yehova, mwaha woowi Yesu oovaha okumi awe mmureerelo ahu. Nave-tho, munnilipelela ophwanya okumi woohimala muhoolo. Veekeekhai, vannikhalela omuxukhurela Yehova yoowo ovahale yoowoopola, okhala wiira onniniphenta vanceene! (Arom. 5:8) Nto wiira onikhaliherye ohihiya oxukhurela ni ohiliyala yoowoopola, Yesu ooniruma Wuupuwelela okhwa wawe khula mwaakha. (Luka 22:​19, 20) Mwaakha ola wa 2026, ninrowa Wuupuwelela Okhwa wa Yesu, Namaxexe 2 a Abril. Moohaanyiherya, ootheene ahu nnimwiilokiherya wiira nirowe muthukumano owo. Hiyo nnoottottela mureerelo vanceene, akhala wiira okathi owo nnimuupuwelela etthu Yehova ni Mwanawe, apanke aya mmureerelo ahu. w25.01 20 itti. 1-2

Nyuwo, munoowerya ohihiya wiixutta voohimya sa ophenta Yehova ni Kristu Yesu orina aya ni hiyo, akhala wiira khamunihiya wuupuwelela oratteene itthu awiirenlyaayani. Woonasa wene, nihinatthi ni nuumala nihiku na Wuupuwelela na mwaakha ola, nyuwo pooti osoma oratteene Ivangelyo. Muhisomeke ikapiitulu sinceene okathi omosa-ru. Ohiya-vo, musomeke vakhaani-vakhaani ni nweheke itthu sikina sinniiriha omphenta Yehova ni Yesu. Akhala wiira mpatisiwe khalai, nyuwo pooti wiikohaka vakhala wiira munoowerya wiixutta itthu isya ni myaha ntoko iya: Exariya ya Muluku, ophenta wawe ni yoowoopola. Ekeekhai tiila: Okathi wootheene, hiyo nnimwiixuttaka itthu isya voohimya sa myaha iya ni myaha sikina. Muhaana osoma ni otokosa soohimmwa siri iliivuru sahu sinimutthokiherya Biibiliya. w25.01 24-25 itti. 13-15