Agosto

Ninnivekela wiira vaweryaneya yiiwe ele ninhimya ahu ni athanle omurumeela Yehova hoothe ni hiyo. Masi exeeni enrowa owiiraneela ale ahinniwiriyana nenna-va, ohela muhina amusi ahu? Pooti wiira Yehova onoorowa owoopola atthu yaa le anrowa orukunuxa murima, okathi anrowa aya onweha Babilonia Muulupale opwetexiwaka. Okhala wiira ti siiso, ti wa faita wiimananiha waalaleerya. Etthu nnaaleela ahu awo olelo-va, pooti waakhaliherya wuupuwelela muhoolo. (Munwehe-tho Ezekiyeli 33:33.) Woonasa wene, awo pooti wuupuwelelaka muhupi naalalenrye ahu ni owiiriheke opacerya omurumeela Yehova hoothe ni hiyo ohinatthi okathi omala. Ntoko kwarta a oFilipi, yoowo aaturunke muupuwelo awe nuumala oweha ekhumelelaka “etetere yuulupale”, waanyiheryasa ale ahinniwiriyana olelo-va, pooti oturuka muupuwelo aya muhoolo nuumala onweha Babilonia Muulupale opwetexiwaka. — Mit. 16:​25-34. w24.05 17 itti. 9-10

Hiyo ninniixutta etthu yuulupale ni itthu murummwa Paulo aalepenle awe makristau aHeeperi. Akina khiyaarina waamini woolipa, ti maana aya yaatthikenle aya ophavela waamwa nipele, ohiya olya eyoolya yoolipa. (Ahep. 5:12) Awo, khiyeemerenrye inamuna isya Yehova aarumenle awe wiira awiixuttihe. (Mir. 4:18) Mwa ntakiheryo, nuumala Yesu okhwa, Nlamulo na Moise khinaavareleya-tho muteko. Masi makristau makina ayuda, yaanithipelela weettela Nlamulo nno na Moise, nnaamwi saavinre iyaakha 30 nuumala omala-malihiwa orweela wa mukuttho wa Yesu. (Tito 1:10) Khula mutthu aasoma ekarta Paulo aaroihenle awe aHeeperi, anwerya okupali wiira eyo eyoolya yoolipa yaarowa waakhaliherya olipiha waamini waya. Ekarta eyo yaamwaakhaliherya woona enamuna esya ni yooloka ya omukokhorela Yehova. Nave yaamwaakhaliherya olipa murima wiira ahihiye olaleerya nnaamwi yaalupatthiwa ni ayuda. — Ahep. 10:​19-23. w24.04 6 etti. 15

Atthu imilyau sinceene annookhwa, okhuma okathi yoole Adamu ni Eva vamosa ni Satana amutthekenle aya Yehova. Etthu xeeni anlipelela aya atthu ala ootheene? Ekurupu yaamukhaani ya atthu 144.000, yaawo animutthara Kristu moororomeleya, anoohihimuxiwa wiira yaakhele okumi ohinikhwa wiirimu. (Wis. 14:1) Nave atthu imilyau sinceene alopwana ni athiyana yamphenta Yehova, anoorowa otthikela okhala akumi okathi Yehova onrowa awe “waahihimuxa . . . anaxariya.”. . . Nave animwaakhela okumi woohimala valaponi, akhala wiira khanihiya okhala oororomeleya okathi wa olamulelo wa Kristu wa Iyaakha Ekonto Emosa ni okathi wa yooweeha yookiserya. (Dan. 12:13; Ahep. 12:1) Nave okathi owo wa olamulelo wa Kristu wa Iyaakha Ekonto Emosa, “ale ahikhanle anaxariya” waahela muhina ale ahitonko omurumeela Yehova aahiiso “ale avanre miteko sootakhala”, anookhalana eparakha ya oturuka mweettelo aya ni okhala oororomeleya wa Yehova. (Yoh. 5:29; Luka 23:​42, 43) Moovirikana ni vo, atthu akina ootakhala murima, owo oolakela ohaahihimuxa. — Luka 12:​4, 5. w24.05 2 etti. 3; 5 etti. 15; 6 etti. 17

Mutthu oniphavela okhala muletto muheemani mwa Yehova ni ohihiya omusiveliha yena, tuule “onilavula ekeekhai vamurimani vawe.” (Esal. 15:2) Eyo khentaphulela paahi ohikhala atthu oowootha. Masi Yehova oniphavela wiira nikhaleke atthu oororomeleya mwa itthu sootheene ninlavula ahu ni nimpaka ahu. (aHep. 13:18) Eyo etthu ya faita maana “Yehova onnimunyokha mutthu oowootha, masi onnaataana ni mutthu oororomeleya.” (Mir. 3:32) Atthu ‘anilavula ekeekhai vamurimani vaya’ khanoothererya okhala oowiiwelela ari ene ni atthu akina, masi nuumala okhala mekhaya enapaka itthu sihinimusivela Muluku. Masi taale anikhala oororomeleya khula okathi. Mutthu oohiroromeleya, pooti opaceryaka ohoviherya malamulo makina a Yehova. (Yak. 1:​5-8) Vakhaani-vakhaani owo pooti opaceryaka ohimwiiwelela Yehova ni itthu onoona awe wiira khasirina efaita yuulupale. Nto okathi onoona awe wiira khoniirihiwa etthu ni ohiroromeleya wawe, owo onnincererya opaka itthu soohiloka sihinimusivela Yehova nlelo uupuwelaka wiira onimurumeela Yehova. Mutthu siiso Yehova khoneemererya okokhorela wawe. (Mus. 8:11) Masi hiyo nihaana okhala atthu oororomeleya mwa itthu sootheene. w24.06 10 itti. 7-8

Ntoko arumeyi a Yehova, hiyo ninniphenta vanceene ikeekhai siri mbiibiliyani. Waamini wahu onnilipa mwaha wa ikeekhai iyo. (Arom. 10:17) Nave ninnikupali wiira Yehova oopaka muloko wa ekristau ntoko “epilaari ni alisenso a ekeekhai.” (1 Tim. 3:15) Satana aamuhakalala vanceene vaakhanle wiira noohiya ororomela ikeekhai niixuntte ahu mbiibiliyani aahiiso malakiheryo ninvahiwa ahu ni mutthenkeso wa Muluku. (Aef. 4:14) Moohipisa, Diabo onoomwara-mwarya itthu soowoothiwa nave onimwiiriha maloko waalupattha arumeyi a Yehova. (Wis. 16:​13, 14) Nave ninnisuwela wiira Satana onimwiimananiha vanceene wiira aawoke arumeyi a Yehova. (Wis. 12:9) Tivonto vari aya va faita okhuma nenla-va, wiixutta ni osuwela ovirikana okhanle ikeekhai ni itthu soowoothiwa sinihimmwa ni Satana, wiira nihihiye weettela ekeekhai. (Arom. 6:17; 1 Ped. 1:22) Nave eyo, ti etthu enrowa onikhaliherya okathi wa maxakha maalupale! w24.07 8 itti. 1-3

Okathi Yehova aathanlale awe aisarayeli wiira akhale nloko nawe, owo aahipaka nivarihano naawo. Nto, aisarayeli yaahileiherya wiiwelela malamulo awe. Vaakhanle wiira yaamweettela malamulo awe, Yehova aamwaakhapelela ni aamwaareeliha. Masi, vaakhanle wiira aisarayeli yaamuhiya wiiwelela malamulo awe aahiiiso yaamuthanla waakokhorela amuluku akina, owo aamuhiya waakhapelela. Nto awo yaamuhaawa. Masi eyo khentaphulela wiira Yehova khaatthikela-tho waathokorerya. Awo yanwerya “ohokolowela w’Apwiya Muluku aya, yiwelelaka molumo aya.” (Otum. 30:​1-3, 17-20) Ni moolumo makina, aisarayeli yanwerya orukunuxa murima. Vaakhanle wiira yaamwiira siiso, Yehova anwaattamela ni aamutthikela waareeliha. Atthu Yehova aathanlale awe, yaahihiya omwiiwelela ikwaha sinceene. Nto awo yaahihaawa mwaha wa yeeyo. Masi Yehova khaahiyale waakhaliherya atthu awe wiira atthikele omurumeela. Owo aahaaruma maprofeta awe ikwaha ikwaha sene wiira yaatumererye atthu awe orukunuxa murima ni atthikele wa yena. — 2 Mam. 17:​13, 14. w24.08 9 itti. 4-5

Makristau aheeperi yaakhala oYerusalemu ni oYudeya, saanaaphwanya mixankiho sinceene nuumala Yesu okhwa. Nuuvira okathi vakhaani nuumala okhumelela muloko oYerusalemu, makristau awo yaahipacerya olupatthiwa vanceene. Nuuvira iyaakha 20, makristau ale waahaaphwanya muxankiho mukina woothoiwa. Yaahiiraneya eyo, mwaha wa etala yaakhumelenle elapo ele. (Mit. 11:​27-30) Mwaakha wa 61 Nuumala Kristu Orwa, makristau ale yaahikhalana murettele nalikanyiha ni itthu saarowa okhumelela muhoolo. Okathi owo, makristau ale yaahaakhela ekarta murummwa Paulo aalepenle awe. Tthiri ekarta eyo, yaaphiyale okathi wooreerela. Ekarta ele yaaphiyale okathi wooreerela, okhala wiira okathi wa murettele yaarina aya, khiwaarowa opisa. Murummwa Paulo ahaavaha miruku makristau ale, saarowa waakhaliherya ovilela mixankiho saarowa waaphwanya. w24.09 8 itti. 1-2

Okathi sinniphwanya aya mixankiho, anna ni arokora anninlipiha vanceene. Yehova onnaarumeela anna ni arokora wiira onooniherye niphento nawe. Awo pooti onimaaliha avirihaka okathi ari ene ni hiyo, ni onimaaliha aniwiriyanaka okathi nnaaleela ahu mixankiho sahu. Awo pooti osoma yoolepa emosa ya mbiibiliyani aahiiso ovekela ni hiyo. (Arom. 15:4) Ikwaha sikina, munna aahiiso murokora pooti onuupuxerya moonelo wa Yehova voohimya sa mwaha owo. Nto eyo pooti onikhaliherya ovilela. Anna ni arokora pooti onikhaliherya anivahaka itthu sinnithowa. Ikwaha sikina, vannireerela waavekela nikhaliheryo. (Mir. 17:17) Awo pooti ohisuwela itthu sinnixankiha ni nimpirisari ahu. (Mir. 14:10) Mwakhalana muxankiho, mukhaleke ootaphuwa waaleela apatthani anyu arina waamini woolipa. Mwaaleeleke etthu ekhanle aya oopaka wiira yookhaliheryeni. Nyuwo pooti olavula ni mutokweene mmosa aahiiso anli yaawo ari apatthani anyu. Arokora akina, annikhala ootaphuwa vaavo anlavula aya ni arokora akina arina waamini woolipa. w24.10 10 itti. 15-16

Atthu anceene, annoolya eyoolya yooloka ni opaka esersiisiyu khula nihiku wiira akhalane okumi wooloka. Hata vari siiso, awo kharina nlipelelo na okhala mahiku ootheene. Woonasa wene, atthu awo anuupuwela wiira khivaniweryaneya mutthu okhala ohuuluvalaka aahiiso ohikhwaaka. Moovirikana ni vo, Yesu aahihimya wiira apinaatamu vanniweryaneya ophwanya “okumi woohimala” ntoko onihimya awe Yohani 3:16 ni 5:24. Mwa mwiiriirya, nihiku nimosa Yesu aahivaha iphaawu ni ihopa muttitthi muulupale wa atthu. Tthiri eyo yaari etthu yooreera, masi etthu aahimmye awe nihiku naattharelana, yaahitepa waatikiniha atthu ale. Muttitthi ole waahimutthara Yesu mpakha oKafarnawu, mukerekhere mwa ephareya ya oGalileya, weiwo owo aaleelale awe wiira vanweryaneya atthu akhwiiye ohihimuxiwa wiira akhalane okumi woohimala. (Yoh. 6:​39, 40) Moolumo a Yesu, anooniherya wiira hata nikhwaaka nnoohihimuxiwa. Nave amusi ni apatthani ahu akhwiiye, pooti oweryaneyaka ohihimuxiwa wiira aphwanye okumi woohimala. w24.12 8 itti. 1-2

Yoohimmwa emosa enikhuma Organização Mundial da Saúde, enihimya wiira alopwana akina oothela, annimuhasula mwaaraya, ammanaka, anveehaka ni apakaka itthu sinooniherya wiira khaninvaha efaita. Alopwana akina oothela, annimuttittimiha mwaaraya yakhala ni atthu akina, masi okathi anikhala aya anli paahi, annimuhasula. Masi xeeni alopwana akina animuhasula aya mwaaraya? Woonasa wene, awo ahuuwale ni paapa oohiphenta. Nto eyo enniwiiriha wuupuwelaka wiira mweettelo aya owo khahiyo wootepa otakhala. Nave akina mwaha wa mapuro yinnuwale aya. Mwa ntakiheryo, alopwana akina annimuhasula mwaaraya, mwaha woowi alopwana anceene a muttetthe aya anipaka yeeyo. Awo anoona wiira ahaana omuhasula mwaaraya para osuweliwa wiira tanimantari. Alopwana akina khiyiixuttihiwe okhala oowiihiiha ni ohitepa onanariwa. Alopwana akina anniweha epornokrafia ikwaha sinceene, nto eyo enniwiiriha waaphavelaka athiyana ni ophavelaka orupihana woohiloka. Irelatoorio sikina, sinihimya wiira okathi wa eretta ya koronaviiru, alopwana anceene yaamutepa omuhasula mwaaraya. Ekeekhai ti yoowi, mulopwana ohimuhaaxeke mwaarawe. w25.01 8 itti. 2-3

Yesu aahitthokiherya tiivi yaari yooruma yuulupale ya Nlamulo aavahiwa awe Moise oriki: “Mumphenteke Yehova Muluku anyu ni murima anyu wotheene, ni okumi anyu wotheene, ni ikuru sanyu sotheene ni muupuwelo anyu wotheene.” (Luka 10:27) Moone wiira omphenta wahu Yehova, onihela muhina murima ahu, itthu nimphavela ahu, moonelo ni muupuwelo ahu. Nave eyo, enihela muhina omukokhorela ni murima ahu ni ikuru sahu sootheene. Ohiya-vo, omphenta Yehova, onnivarihana ni muupuwelo ahu, eyo piiyo, enamuna nnuupuwela ahu. Ekeekhai wiira, khaninwerya osuwela voomalela muupuwelo wa Yehova. Masi nnoowerya osuwela oratteene muupuwelo wa Yehova, vakhala wiira nnoosuwela toko oratteene “muupuwelo wa Kristu.” Yesu aanisuwela oratteene muupuwelo wa Tiithi awe ni aanitakiha voomalela. — 1 Akor. 2:16. w25.03 8 etti. 1

Yesu aari oohittheka ntoko Adamu aari awe ohinatthi ottheka. (1 Akor. 15:45) Nto mwaha wa Yesu okhwa wiira oliverye itampi sahu, vaaweryaneya owo oliverya moomalela itthu sootheene Adamu ahononne aya. (Arom. 5:19) Tivonto, Yesu ookhalihiwa “Adamu ookiserya.” Nto khivanipirisari mutthu mukina wiira orwe oliverye itthu Adamu ahononne aya. Yesu ohookhwa “ekwaha emosa paahi.” (Ahep. 7:27; 10:12) Ovarihana xeeni okhanle, oleveleliwa itampi ni mukuttho woowoopola? Muluku aahipaka etthu wiira apinaatamu aleveleliwe itampi ni awerye otthikela waataana ni yena. Masi wiira eyo eweryaneye, waahaana oliviwa mukuttho woowoopola. Nto mukuttho owo, onithoonyerya ephome ya Yesu emwaraxiwe wiira nileveleliwe itampi sahu. — Ahep. 9:14. w25.02 5 itti. 12-13

Omuthokorerya Yehova ntoko Muluku mukumi, eyo enoonikhaliherya oxintta mixankiho sahu. Mwaha wa xeeni? Vaavo sinniphwanya aya mixankiho, etthu yootepa okhalana efaita ori wuupuwelela okhulupale wa Yehova, maana Satana ohimmye wiira saniphwanya mixankiho nnoohiya omurumeela Yehova. Nto moota nnoonela ahu mixankiho sahu, eyo ennooniherya moota nimmuroromela ahu Yehova. (Yoobi 1:​10, 11; Mir. 27:11) Vaavo nihinhiya ahu ororomeleya wa Yehova hata siniphwanyaka mixankiho, ninnooniherya wiira ninnimphenta Yehova nave itthu Satana onihimya awe ti soowoothiwa. Ankhi nyuwo, niireke sinnoophwanyani mixankiho ntoko olupatthiwa ni kuvernu, othoiwa musurukhu, ohaakheliwa saana okathi woolaleerya, aahiiso muxankiho mukina? Vakhala wiira munniroromeleya hata soophwanyakani mixankiho, muupuweleke wiira Yehova onnihakalala. Masi muhiliyale wiira owo khonrowa weemererya woophwanyani muxankiho muhinrowa anyu owerya ovilela. Yehova onimoovahani ikuru munipirisari anyu wiira nwerye ovilela. w24.06 22 etti. 9

Niireke munnisuwela sootteettheya sanyu? Ti vootakhala wuupuwela wiira khanirina sootteettheya aahiiso wuupuwela wiira nookhalana ikuru wiira nixintte sooweha sootheene sinniphwanya. (1 Yoh. 1:8) Muhiliyale ele murummwa Paulo aahimmye awe wiira hata ale aneettihiwa ni munepa wa Muluku pooti opaka etampi akhala wiira anoohiya okhala oowehaweha. (Akal. 6:1) Nto nihaana okhala oowiiyeviha ni osuwela wiira ootheene ahu nookhalana sootteettheya. (2 Akor. 13:5) Nto akhala wiira noosuwela sootteettheya sahu, exeeni nikhanle ahu oopaka? Nimpirisari wiimananiha vanceene wiira nihimore neehereriwaka! Mwa ntakiheryo, ixiri sa ipooma okathi ole wa Biibiliya, opuro waatepa woopiha waakhala vamukhora. Ti maana aya yaakhala aya makwarta manceene wiira ewehaweheke. Mwa enamuna emosa-ru, nihaana okhalana ephoole aahiiso osuwela sootteettheya sahu wiira nihimore. — 1 Akor. 9:27. w24.07 15 itti. 5-7

Miteko iyo sooreera, ntoko sihimmwale aya yoolepa ya olelo, sinihela muhina olaleerya. Nto vaavo nimmusoma ahu Biibiliya ni wuupuwelela ele esomme ahu, omwaamini wahu Yehova onnilipa ni ninniweha efaita erina aya waalaleerya atthu akina ihapari sa Omwene. Wiira muttottele muraarelo Nuulumo na Muluku, muhisomeke ni wuupuwelela mwaakuveyasaka. Musyakeke osoma mwaatteliwe ene miteko. Vakhala wiira munisoma mpantta onoovilani wiiwexexa, muhituphe. Ohiya-vo, mmurumeele Índice das Publicações da Torre de Vigia aahiiso Eliivuru Enaakhaliherya Anamoona a Yehova Otokosa Myaha Sikumiheriwe, wiira mphwanye otthokiheriwa waya eversiikulu eyo. Vakhala wiira munimwiivaha okathi wiira musomeke ni ephoole, omuroromela wanyu Biibiliya onoolipa. (1 Ates. 5:21) Vakhala wiira munookupaliki, munoohakalalaka vanceene ni ophavela waaleela atthu akina itthu mwiixuntte anyu. w24.04 15 itti. 4-5

Davidi aahimmye wiira, Muluku tooreera “murima, nave okathi wootheene ori oolikana ene wiira olevelele.” (Esal. 86:5) Mikeya aalempe so: “Khavo muluku mukina onlikana ni nyuwo, Apwiya. Nyuwo munnilevelela sottheka, munniliyala ohìwelela wahu.” (Mik. 7:18) Nave Yesaya aahimmye wiira: “Atakhali ahiye ephiro aya, nave awo ahiye miyuupuwelo saya. Atthikele wa Yehova, yoowo onrowa waamorela ikharari, amutthikele Muluku ahu, okhala wiira onimwaalevelela ni murima awe wootheene.” (Yes. 55:7) Wiira amutakihe Yehova, atthu a muloko wa oKorinto yaahaana omulevelela mutthu ole ni omooniherya wiira yaanimphenta. Paulo aahimmye wiira vaakhanle wiira aamulevelela mutthu ole aarukununxe murima, awo yaamooniherya wiira anniiwelela mwa itthu sootheene. Nnaamwi mulopwana ole aakumihiwe mmulokoni miyeeri vakhaani paahi, masi owo aahirukunuxa murima. Tivo, axitokweene khiyaapirisari olipelela ovira okathi munceene, ahinatthi omuttikiherya mmulokoni. w24.08 17-18 itti. 12-13

Ninkhala okathi wooxankiha! Nto moohipisa sinimwiiraneya itthu soowoopiha. Muhoolo, Yesu onrowa waaphukela apinaatamu. Olavulaka sa okathi owo woophukela, Yesu aahaavaha awiixutti awe “ethoonyeryo” ya otthika wawe ni “omala wa olumwenku.” (Math. 24:3) Ithoonyeryo iyo soolempwa eliivuru ya Matheyo ikapiitulu 24 ni 25 nave-tho iyo sinniphwanyaneya eliivuru ya Marko ekapiitulu 13 ni Luka ekapiitulu 21. Yesu oorumeela malikanyiho mararu wiira onilopole. Nlikanyiho noopacerya, ti na ipwittipwitthi ni ipuri, na nenli ti na imwali saarina ankhili ni sahaarina ankhili ni na neeraru ti na italento. Malikanyiho ala, anoonikhaliherya wiiwexexa moota Yesu onrowa awe waaphukela apinaatamu moovarihana ni miteko saya. w24.09 20 itti. 1-2

Yesu ntakiheryo nahu nuulupale. Itthu sootheene aavara awe, waari mwaha womphenta Tiithi awe ni atthu akina. Niphento ti naamwiiriha waakhaliherya atthu akina ni ovara miteko mowiiyeviha. (Math. 20:28; Yoh. 13:​5, 14, 15) Nto anna vakhala wiira itthu sootheene munipaka mwaha wa niphento, Yehova onimooreelihani ni wookhaliheryani ophwanya soolukama sanyu, ntoko okhala murumeyi ookhaliherya. (1 Ped. 5:5) Atthu anceene moolumwenkuni, annaattottopela atthu oowiixinnuwiha ni aniphavela mureerelo aya. Masi arumeyi a Yehova nnaari. Munna onaakhaliherya atthu akina mwaha wa niphento ntoko Yesu, khonrowa ophavelaka efaama, okhulupale nnakhala wiixoona okhalana efaita waavikana atthu akina. Akhala wiira mulopwana oowiixinnuwiha aamuthanliwa ntoko murumeyi ookhaliherya, woonasa wene, amukhoottaka ovara miteko seiye sihinooneliwa vatthu, okathi onikhaliherya awe ipwittipwitthi sa Yehova. Nave owo pooti wuupuwelaka wiira ookhalana efaita ohinreerela awe ovaraka miteko iyo. — Yoh. 10:12. w24.11 15 itti. 6-7

Olumwenku wootheene, ninnaapirisari anna wiira akhale “soovaha.” (Aef. 4:8) Akhala wiira mwa munna oopatisiwa, niireke muri oolikana ene waakhaliherya atthu akina “anireerela okhaliheriwa”? (Mir. 3:27) Niireke munniimananiha wiira mukhale murumeyi ookhaliherya? Akhala wiira mwa murumeyi ookhaliherya, niireke munniimananiha wiira mukhale mutokweene wiira nvare muteko mwaakhaliheryaka anna ni arokora? Niireke munnipaka marukunuxo mookumini mwanyu wiira mphwanelele orowela Eskola ya Anamalaleerya a Omwene? Eskola eyo, enoowiixuttihani ni wookhaliheryani wiira nvikaniheke orumeeliwa ni Yesu. Akhala wiira munuupuwela wiira khivaniweryaneya ophwanya iparakha iyo, mmuleeleke Yehova. Munvekeleke Yehova wiira oovaheeni munepa awe woowaarya ni ookhaliheryeni omaleliha khula yoothanleliwa munrowa anyu waakhela. (Luka 11:13) Mwaha wa Yesu waarumeelaka anna yaawo ari “soovaha”, enooniherya wiira owo khonihiya onikhapelela mahiku ala ookiserya. (Math. 28:20) Ninnimuxukhurela vanceene Mwene ahu yoowo ori oophenta, oovaha ni onisuwela itthu nimpirisari ahu, nuumala-vo, onanivaha anna wiira anikhaliheryeke. w24.10 23 itti. 16-17

Ekeekhai wiira arumeyi a Muluku sinimwaaphwanyaka mixankiho sinceene. Masi hata vari siiso, ninnisuwela wiira moohipisa mixankiho iyo “sinoliyaliwa khuluwi”, nave Yehova onoomala-maliha. (Yes. 65:16) Vakhaani-vakhaani, Yehova onoomaliha mixankiho sahu sootheene, nave hata miyuupuwelo soohiloka khaninrowa okhala-tho. Hata mahiku ala, ninniphwanya ohakalala vaavo ninrowela ahu mithukumano, maana iwo sinniniiriha omaaleleya ni ninniwerya oliyala mixankiho sinikumiheriwa ni olumwenku ola wootakhala. Vaavo nnooniherya ahu mikhalelo sinikumiheriwa ni munepa woowaarya ntoko ophenta, otteeliwa murima, murettele ni oreera murima, ninnikhaliherya okhaliha murettele ni omaaleleya mparayiisu ya nthoonyeryo. (Akal. 5:​22, 23) Ootheene ahu, nookhalana eparakha yuulupale ya wiirela mpantta mutthenkeso wa Muluku. Ale ahinikhuma mparayiisu ya nthoonyeryo, moohipisa animoona siiraneyaka iprofesia sinceene sa Muluku sa opattuxa erimu esya ni elapo esya. w24.04 22 itti. 9-10

Nnaamwi okathi makristau aninamorari aya ori ene woohakalaliha, masi awo ahaana ovarerya saana maana nlo nivalo nuulupale nikhanle oowiiriha othelana. Nihiku anithelana aya, awo annimuleiherya Yehova wiira anrowa ophentanaka ni ottittimihana mukina ni mukhwaawe okumi aya wootheene. Nto nihinatthi oleiherya khula etthu, nihaana wuupuwela saana. Nave eyo, enihela muhina yooleiherya ya othelana. Yoolakela ya onamorari, ori osuwelana oratteene mukina ni mukhwaawe wiira apake yoothanla yooloka. Ikwaha sikina, yoothanla eyo pooti okhala othelana aahiiso omala-maliha onamorari iwo. Nto akhala wiira makristau annithanla omala-maliha onamorari waya, eyo khentaphulela wiira onamorari waya khokhumenle saana. Masi eyo entaphulela wiira aamaleliha yoolakela ya onamorari, eyo piiyo, opaka yoothanla yooloka. Xeeni vari aya vooloka osuwela saana yoolakela ya onamorari? Mukristau oohithela aahiiso oohitheliwa orina moonelo wooloka, khokhanle oonamorari ohiphavelaka othelana. w24.05 26-27 itti. 3-4

Ikwaha sikina, amiravo makristau pooti woovaka waatthokiherya akina sookupali saya. Mwa ntakiheryo, awo pooti wuuliwa muru otthokiherya etthu eniwiiriha ohikupali wiira itthu siroothatuwa. Mwaha wa xeeni? Mwaha woowi, maprusoore pooti ohimya aka wiira muupuwelo woowi itthu siroothatuwa ti weekeekhai. Vakhala wiira mwa namuyari, exeeni enrowa omukhaliherya mwaninyu, osuwela wiira ele yiixuntte awe mbiibiliyani teri ekeekhai? Mmukhaliheryeke woona wiira owo khompirisari wuuliwa muru, maana onnisuwela ekeekhai voohimya sa soopattuxiwa. Mwaha wa xeeni? Mwaha woowi, hata masientista makina, annikupali wiira itthu khahiyo siroothatuwa masi ookhala opattunxe. Masientista awo, annikupali wiira ookhala mutthu a miruku opattunxe itthu sootheene sootikiniha. Nto awo khanikupali muupuwelo woowi itthu siroothatuwa. Etthu enrowa omukhaliherya mwaninyu olipiha waamini wawe ni ohoovelela, ori osuwela etthu yaakhalihenrye anna ni arokora okupali wiira okumi oroopattuxiwa. w24.12 18 itti. 14-15

Yesu aanikupali wiira yaamukhala atthu akina yaarowa weemererya ihapari sooreera. Nto eyo yaahimukhaliherya ohakalala ni ohihiya olaleerya. Mwa ntakiheryo, nuuvira mwaakha mmosa Yesu olaleeryaka, owo aahisuwela wiira yaahikhala atthu anceene yaaphavela owiriyana ihapari sooreera. Owo aahaalikanyiha atthu awo, ntoko ipyo silikanne wiira sihemphwe. (Yoh. 4:35) Nuuvira mwaakha mmosa, owo aahaaleela awiixutti awe wiira “soolya khasireere mmatta.” (Math. 9:​37, 38) Muhoolo mwaya owo, aahihimya-tho so: “Soolya khasireere mmatta . . . munvekele Mwaneene ematta wira aaruuhe anamuteko.” (Luka 10:2) Yesu aanikupali wiira yaamukhala atthu yaarowa owiriyanaka ihapari sooreera. Okathi yiiraneya aya eyo, owo aanihakalala vanceene. Ophavelaka waakhaliherya awiixutti awe ohihiya okhalela nthiti muteko woolaleerya, Yesu aahaaleela wiira muhupi yaalaleya aya waamukumiherya mireerelo sinceene. w25.03 18-19 itti. 15-16

Yehova ntthyawelo nahu. Ntoko siisale nikhuku niri vamwaako, nikhanle aya oomukhaliherya mutthu okathi wa munamukhaya, mwa enamuna emosaru, Yehova onoonikhaliherya okathi sinniphwanya aya mixankiho soovirikana. Owo onninikhaliherya okhapelela waataana nirina ahu ni yena. Nave onninlipiherya wiira khiivo etthu aahiiso muxankiho onniphwanya nenna-va, onrowa okhala wa okathi wootheene. Nave-tho, owo onnileiherya wiira muhoolo onoomala-maliha khula etthu ennikumiherya mixankiho ni enniiriha ohikhala oovareleleya. (Ezek. 34:​25, 26) Enamuna emosa nikhanle ahu ompaka Yehova okhala Ntthyawelo nahu, ori onvekela. Vaavo nninvekela ahu Yehova, owo onninivaha “murettele” awe. Nave onookhapelela murima ahu ni muupuwelo ahu. (Afil. 4:​6, 7) Yehova khonikhala-khala oninyanyalaka. Nto nihaana omuroromela yena maana owo ori ntoko mwala wa mahiku ootheene. (Yes. 26:​3, 4) Yehova khonrowa ohiya okhala. Nave owo onnileiherya owiriyana mavekelo ahu ni onikhaliherya khula okathi nimpirisari ahu. Nave nihaana omwaamini Yehova, okhala wiira owo toororomeleya wa ale animurumeela. (2 Sam. 22:26) Owo khonikhala-khala oliyalaka itthu nimpakenle ahu, nave khula okathi onoonireelihaka. — Ahep. 6:10; 11:6. w24.06 27 itti.4-6

Nihaana osyaka itthu sikhanle oohonona opatthani ahu ni Yehova ntoko, matthekulelo oohiloka, itthu nniiwa ahu ni iye ninweha ahu. Nave, nihaana okhalana ephoole ni apatthani nnaathanla ahu ni osyaka wuupuwela wiira musurukhu aahiiso othaaciri ti etthu ya faita mookumini mwahu. Vakhala wiira nooweha etthu enivukula omphenta wahu Yehova, nihaana wiimananiha moowakuveya ni olokiherya muupuwelo ahu ni itthu nimpaka ahu. (Math. 5:​29, 30) Niheemererye wiira murima ahu okhale wookawanyeya. Hiyo pooti opacerya wiiwoka wiira apatthani oohiloka khanrowa onihonona, mwaha woowi ninnikhalela nthiti miteko sa Muluku. Mwa ntakiheryo, nkuupuwelani nihiku nooriirya vanceene muri ene ota wa empa anyu. Mwaha wooriiriwa munnivolowa mpaani, nwara ekasako anyu masi muhiwala mukhora anyu. Niireke epheyo yooriirya khiyarowa ovolowa ni esareyeke mpa mwanyu? Moohaanyiherya epheyo yaamusareya mpa mwinyu. Exeeni nnixutta ahu ni ntakiheryo nla? Nniixutta wiira ohiya paahi wiimananiha opaka itthu sooloka sinlipiha omphenta wahu Yehova, yookhala etthu ekina ninreerela ahu opaka. Etthu ene, ori owala mukhora wiira “epheyo”, ehivolowe mpa mwihu. Eyo entaphulela wiira nihaana waahiya apatthani ahu oohiloka ni muupuwelo woohiloka wa olumwenku ola, wiira ohikawanye murima ahu ni ohihonone omphenta wahu Yehova. — Aef. 2:2. w24.07 21 itti. 6-7

Mweekeekhai Yesu khaareere ohaawa nave aahaana ovilela ohixariya wootheene. Nnaamwi samphwannye mixankiho iye sootheene, owo khaahiyale okhala oororomeleya wa Tiithi awe. Ohiya onvekela Tiithi awe wiira aahukhumu anakhotto ale, owo aavekenle so: “Tiithi, mwaalevelele, maana khanisuwela etthu aniira aya.” (Luka 23:34) Okathi nnaavekelela ahu atthu annihaaxa, ninnivukula opweha mathowa va murimani, onanariwa, nave ninnituruka enamuna nnaathokorerya ahu ale annihasula. Mpakha wanikisa wa olumwenku ola, khanniwerya osuwela inamuna sa ohixariya sinrowa oniphwanya. Moohicikha enamuna ninrowa ahu othokoreriwa muhoolo, nihihiye onvekela nikhaliheryo Yehova. Ohiya-vo, muhihiye otthara malakiheryo a mbiibiliyani nave muhihiye omutakiha Yesu okathi munithokoreriwa anyu moohixariya. Vakhala wiira munoopaka eyo, mukupaliki wiira Yehova onimooreelihakani mahiku ootheene. — 1 Ped. 3:​8, 9. w24.11 6 etti. 16; 7 itti. 17, 19

Yehova khoneemererya itthu sootheene. Owo onninyokha etampi. (Esal. 5:​4-6) Owo onilipelela wiira ootheene ahu niiweleleke malamulo awe, yaawo ari mbiibiliyani. Masi, Yehova onnisuwela wiira ootheene ahu noorava etampi ni khanniwerya omwiiwelela mwa enamuna yoomalela. (Esal. 130:​3, 4) Yehova khanimusivela atthu yaale ‘ahinimuttittimiha ni anitthara mweettelo woohiloka onooniherya ohuuliwa muru, yoothereryaka oreera murima wuulupale wa Muluku’. (Yuda 4) Mweekeekhai, Biibiliya onnilavula sa “opwetexiwa atthu ootakhala”, okathi enrowa aya owaniwaka ekhotto ya Muluku eniihaniwa Armagedoni. (2 Ped. 3:7; Wis. 16:16) Masi Yehova khoniphavela wiira opwetexiwe mutthu. Biibiliya onnihimya oratteene wiira Yehova “oniphavela wira atthu otheene arukunuxe murima.” (2 Ped. 3:9) Ntoko Yehova, axitokweene annipixa murima okathi animukhaliherya aya mutthu opanke etampi yuulupale, wiira orukunuxe murima awe ni otthikele waataana ni Yehova. w24.08 26 itti. 1-2

Sintoko Yehova, hiyo nnoowerya waavaha atthu akina itthu anipirisari aya. Mwa ntakiheryo, niireke ookhala munna aahiiso murokora onipirisari yoolya aahiiso ikuwo? Yehova pooti woorumeelani wiira mmukhaliherye munna owo aahiiso murokora owo. Arumeyi a Yehova annisuweliwa okhala atthu oovaha, akhaliheryanaka mukina ni mukhwawe okathi wa mixankiho. Mwa ntakiheryo, okathi wa eretta ya Koronaviiru, anna ni arokora yaahaavaha eyoolya, ikuwo ni itthu sikina ale yaapirisari. Nave-tho, anamunceene yaanivaha musurukhu aya wiira akhaliherye muteko onivariwa olumwenku wootheene. Opaka eyo, yahaakhaliherya anna ni arokora olumwenku wootheene yaapirisari okhaliheriwa okathi ole wooxankiha. Anna awo ni arokora yaaheettela moolumo ari Aheeperi 13:16 ani: “Muhiliyale owiirela sooreera atthu akina, ni okawana naawo itthu sirina anyu. Itthu iyo siri ntoko mikuttho, ni sinnimuhakalaliha vanceene Muluku.” w24.09 27 itti. 6-7

Nkuupuwelani mphavelasaka muteko wiira mukhaliheryeke emusi anyu. Nto muhiiwa wiira aakhala mapuro manli aniphaveliwa aya anamuteko. Vano nyuwo munnivarerya itthu sootheene, ntoko muteko ene, okathi onivira ovariwaka muteko owo, okathi munrowa anyu oviriha mweettaka murowaka omutekoni ni itthu sikina. Masi miteko iyo soomiili khahiyo sootthekeya para makristau. Woonasa wene, munnithanla muteko mmosa okhala wiira onnoosivelani aahiiso mwaha woowi oniliviwa musurukhu munceene. Masi sookhala itthu sikina munireerela anyu ovarerya muhinatthi weemererya muteko owo. othanla khonivariwa okathi sinikhala aya mithukumano sa muloko anyu? Niireke muteko owo onrowa anyu othanla, khonrowa wookhoottiheryani okhalana okathi wookhaliherya emusi anyu okhala yoovareleleya, yoohakalala ni olipiha waataana waya ni Yehova? Wiipakela makoho ala, onimookhaliheryani ohela nipuro noopacerya “itthu sootepa oreera”, eyo piiyo, omukokhorela wanyu Muluku, okhapelela emusi anyu ohiya ophavelasa muhakhu. Mwiira siiso, munoopaka yoothanla Yehova onrowa awe oreeliha. w25.01 17 itti. 11-13

Nnaamwi atthu akina atonko ene woothokoreryani moohiloka, mukupaliki wiira Yehova onnoophentani ni onnoovahani efaita. Vakhala wiira “mookhulumuwa”, muupuweleke wiira Yehova ooweha itthu sooreera vamurimani vanyu ni ohiiruuhela wa yena. (Yoh. 6:44) Khula okathi, Yehova oniphavela wookhaliheryani maana onnoothokoreryani. Nnoowerya wiixutta moota Yehova onnithokorerya awe ni ntakiheryo na Yesu. Okathi aari awe valaponi, anaareerela murima atthu yaixoona ohikhalana efaita mwaha wa itthu yaapakeliwa aya ni atthu akina. (Math. 9:​9-12) Okathi muthiyana mmosa yoowo aavirinhe iyaakha sinceene owereiwaka aavanre awe nlaya na Yesu, ororomelaka wiira ampenuwa, owo aahimmaaliha ni omuttottopela mwaha wa waamini wawe. (Mar. 5:​25-34) Yesu onnitakiha moomalela mikhalelo sa Tiithi awe. (Yoh. 14:9) Tivonto, mukupaliki wiira Yehova onnoothokoreryani ni onniweha mikhalelo sooreera murina anyu ohela muhina waamini ni omphenta wanyu. w24.10 7 itti. 4-5

Okumi awe wootheene, Davidi ahaana ovilela mixankiho sinceene seiyo saamwiiriha wunla. Yaahikhala atthu anceene yaamunyokha. Hata amusi ni apatthani awe, khiyaamuroromela ni yaaniphavela omukumiherya mixankiho. (1 Sam. 19:​10, 11; 2 Sam. 15:​10-14, 30) Waahikhala okathi Davidi sihaareerya aya omphwanya mixankiho, mpakha olepa so: “Kootemwa mwaha wa omakelaka wunla; Ohiyu wootheene kinninaaniha ekhaama aka ni maithori; Okathi kininla aka, maithori aka annisareya vakhaterani vaka ntoko maasi.” (Esal. 6:6) Nnaamwi samphwannye mixankiho sinceene, Davidi aanikupali wiira Yehova aanimphenta. Owo olempe so: “Yehova onimwiiwa wunla waka.” (Esal. 6:8) Moolumo Davidi aalempe awe, annooniherya wiira Yehova onniniphenta vanceene ni onninthokorerya okathi ninxanka ahu. Davidi aatthokihenrye wiira maithori awe aathukumanyiwa mmurupani mwa Yehova ni oolepa muliivuruni mwawe. Davidi aanikupali wiira Yehova aaniweha ni aanisuwela etthu yaamuxankiha. Nave owo aanikupali wiira Tiithi awe oophenta a wiirimu, aanisuwela ohiya paahi mixankiho sawe, masi enamuna owo oonela awe. w24.12 22 itti. 11-12