Setembro

Hiyo nihaana wiimananiha vanceene wiira nikhalane waamini woolipa ni ohihiya ovukuwaka. Eyo entaphulela wiira nihaana osyaka wiiroromela mootepana. (1 Akor. 10:12) Nihaana ‘wiivarerya’ wiira noone vakhala wiira ninnikela vahoolo. Ekarta murummwa Paulo aalepenle awe akolosi, aahittittimiherya-tho efaita erina aya okhalana waamini woolipa. Makristau a oKolosi yaahikhalana waamini woolipa, masi hata vari siiso Paulo aahaalopola woopiha waya weettihiwa ni muupuwelo wa atthu ahinimusuwela Muluku. (Akol. 2:​6-10) Nave-tho Epaafara, yoowo aasuwela oratteene anna a muloko ole, aanaavekelela vanceene wiira waanikisa waya, alipe moomalela aahiiso akhalane waamini woolipa. (Akol. 4:12) Eyo enniixuttiha exeeni? Paulo ni Epaafara, yaanisuwela wiira mutthu ohaana wiimananiha vanceene ni okhaliheriwa ni Muluku wiira ohihiye olipiha waamini wawe. Awosa yaaphavela wiira, makristau a oKolosi ahihiye olipiha waamini waya nnaamwi saaphwanya mixankiho sinceene. w24.04 6-7 itti. 16-17

Omuttittimiha Yehova, onitaphulela wiira ninnimphenta vanceene, mwa enamuna nihikhanle ahu oopaka etthu ekhanle oomunyoonyiha. Tivonto, nihaana osuwela ovirikana okhanle itthu sooloka ni soohiloka aahiiso itthu sa ekeekhai ni sa ethiru, wiira niwerye omusiveliha Yehova. (Mir. 2:​3-6; Ahep. 5:14) Akhala wiira nnoowoova atthu mootepana ovikana omphenta wahu Muluku, eyo pooti oniiriha ohiya weettela ekeekhai. Nrowe nthokorerye matakiheryo a maxeefi 12, yaawo yaaronwe ohottela elapo Yehova aaleihenrye awe waavaha aisarayeli. Masi maxeefi 10 a yaawo, yaaniwoova vanceene akanaani ovikana omphenta waya Yehova. Nto awo yaahaaleela aisarayeli ahimyaka so: “Hiyo ninnojela owana n’atthu ale: t’òtupaxa onivikana hiyo.” (Mmr. 13:​27-31) Ekeekhai wiira mwa muupuwelo wa apinaatamu, akanaani yaari ootupexa. Masi ohimya wiira aisarayeli khiyaarowa owerya waaxintta awanani aya, yooniherya ohimuttittimiha Yehova. w24.07 9 itti. 5-6

Niireke nihaana okupali wiira okathi Yehova onaaphukela awe atthu ootheene, owo onnipaka eyo mwa enamuna yooloka? Aayo! Ntoko Abrahamu aasuwela awe, Yehova Muluku toohittheka, tankhili, toomoriwa ikharari ni ‘Mulamuli a elapo yootheene’. Owo oomwiixuttiha Yesu ni onvaha muritti wa waaphukela atthu ootheene. (Yoh. 5:22) Yehova ni Yesu, annimusuwela khula pinaatamu, etthu enuupuwela awe aahiiso moonelo awe. (Math. 9:4) Vaavo animphukela aya mutthu, khula okathi awo ‘anneettela exariya’! Muroromeleke wiira khula okathi Yehova onoopakaka soothanla sooloka. Ntoko apinaatamu, hiyo khaninwerya waaphukela atthu akina masi Yehova onniwerya! (Yes. 55:​8, 9) Nto moororomeleya, nimphavela wiira nimuhiyerye ophukela wootheene Yehova ni Mwanawe, Yesu, yoowo onitakiha moomalela exariya ni omoriwa ikharari wa Tiithi awe. — Yes. 11:​3, 4. w24.05 7 itti. 18-19

Nnoowerya wiixutta efaita erina aya okhala atthu anilavula ekeekhai, nuupuwelelaka etthu yiiraneyale ni Yesu nuumala omusuwela Natanayeli ekwaha yoopacerya. Okathi Filipe amulattunle awe mpatthani awe, Natanayeli wiira omusuwele Yesu, yaahiiraneya etthu yoovara murima. Nnaamwi Yesu ahaamusuwela Natanayeli, owo aahimmye so: “Mmooneke, mwisarayeli eekeekhai. Tthiri owo khorina wootha.” (Yoh. 1:47) Yesu aahimoona Natanayeli okhala oororomeleya. Ninnisuwela wiira Natanayeli aari mutthu oottheka ntoko hiyo, masi owo khootha. Owo aari oororomeleya mwa itthu sootheene. Nto Yesu aahitikinihiwa vanceene ni Natanayeli ni aahimuttottopela. Itthu sinceene Esaalimu 15 sinnivekela aya opaka, sinnivarihana ni moota nnaathokorerya ahu atthu akina. Esaalimu 15:​3, enihimya wiira mutthu ori muletto a muheemani mwa Yehova, tuule “ohiniwotherya akhw’awe: ohiniwirela akhw’awe sotakhala, nnákhala owapa.” Nto nihiwootheryeke atthu akina. — Yak. 1:26. w24.06 10 etti. 7, 9; 11 etti. 10

Akhala wiira munimwiilokiherya saana muhinatthi orowa muteko woolaleerya, vanimookhweelakani ovaanela ni atthu. Yesu aanaakhaliherya awiixutti awe wiilokiherya ohinatthi waaruma muteko woolaleerya. (Luka 10:​1-11) Awo yaahivarihela muteko itthu sootheene yiixuttihiwe aya ni Yesu. Mwaha waivaavo, awo yaahihakalala vanceene ni itthu sootheene yaawenrye aya opaka. Ninrowa wiilokiherya sai wiira nalaleerye? Nihaana wuupuwela etthu nikhanle ahu oolavula ni otthokiherya mwa enamuna yooloka nirumeelaka moolumo ahu. Ti vooloka wuupuwelela miyoonelo soovirikana sa atthu a muttetthe ahu, ni wuupuwelela vahinatthi moota nikhanle ahu owaakhula. Nto waphiya okathi wiira nimulaleerye mutthu owo, nihaana okhala oomaaleleya, ootheya-theya ni okhala atthu oopatthaneya. w24.04 16 itti. 6-7

Etthu yuulupale enniiriha olaleya ihapari sooreera, mwaha woowi ninnimphenta Yehova ni nsina nawe noowaarya. Ninnithokorerya muteko ahu woolaleerya, ntoko enamuna eninvuwiha Yehova, yoowo onimphenta ahu. Ninnikupali ni murima ahu wootheene moolumo ala ani: “Yehova, Muluku ahu oowerya, nyuwo munniphwanelela waakhela ovuwa ni nttittimiho” na arumeyi anyu oororomeleya. Hiyo ninnooniherya wiira ninninvuwiha ni omuttittimiha, vaavo nnaaleela ahu atthu akina itthu sinooniherya wiira owo ‘topattunxe itthu sootheene’ nave ninkhala mwaha woowi topattunxe okumi ahu. Ninnimooniherya owerya wahu, vaavo ninrumeela ahu okathi ahu, ikuru sahu ni mireerelo sahu, wiira nivare muteko woolaleerya moovarihana ni makhalelo ahu. (Math. 6:33; Luka 13:24; Akol. 3:23) Ohimya mookwasa, hiyo onisivela vanceene waaleela atthu akina voohimya sa Muluku yoowo nnimphenta ahu. Nave ninnihakalala waaleela atthu akina voohimya sa nsina nawe ni malamulo awe. w24.05 17 etti. 11

Yehova onninivaha murettele ni omaaleleya niinano-va nave onoonivaha okumi woohimala muhoolo. Moohaanyiherya hiyo ninnikupali wiira Yehova onoonikhaliherya ni ookhalana owerya wiira opake eyo. Sintoko arumeyi awe a khalai yaapanka aya, nihihiye opaka ele eniwerya ahu wiira nimurumeele. Tthiri eyo ti etthu Timootheyo apanke awe. (Ahep. 6:​10-12) Timootheyo aanimwaamini Muluku mukumi. (1 Tim. 4:10) Ti maana aya owo iimananiha awe vanceene onvarela muteko Yehova ni anna ni arokora. Moota xeeni apanke awe eyo? Murummwa Paulo aahimutumererya wiira aahaana osuwela wiixuttiha okhale mmulokoni aahiiso muteko woolaleerya. Nave-tho murummwa Paulo aahimuleela Timootheyo wiira aahaana waavaha ntakiheryo nooloka anna ni arokora, akhale amiravo aahiiso oowuuluvala. Timootheyo aahaakhela-tho soothanleliwa sikina soovila, seiyo saahela muhina ovaha miruku sooluluwanya masi mwa niphento para ale yaapirisari. (1 Tim. 4:​11-16; 2 Tim. 4:​1-5) Timootheyo aanikupali wiira Yehova ammutthuvela. — Arom. 2:​6, 7. w24.06 22-23 itti. 10-11

Ikwaha sinceene Yehova aahaarumeela maprofeta awe wiira aalopole ni aattaruxe atthu awe. Mwa ntakiheryo, Muluku aahimuruma Yeremiya ohimya wiira: “Nyuwo atthu a wIsarayeli, alipa-òhìwelela, mutthikele wa miyo. . . . Nkinrowa-tho woviruwelani. Ayo: miyo k’òmoriwa ikharari: nkinoviruwelani mahiku othene. Miyo k’Apwiya: nkinotha. Vano mwisuwelihe okhala alipa-òttheka: wona muharukunuwela Apwiya Muluku anyu.” (Yer. 3:​12, 13) Yehova aahimuruma Yoweli waaleela atthu wiira: “Muttharuweke ni murim’anyu wothene, . . . muhokolowele wa miyo.” (Yow. 2:​12, 13) Yehova aahimuleela Yesaya ohimya wiira: “Mwireriheke, murukunuxe mirima sanyu. Mukumihe oholo waka sonanara simpakanyu: muttharuweke wiira sotakhala.” (Yes. 1:​16-19) Omurumeelaka Ezekiyeli, Yehova aahihimya wiira: “Tthiri miyo nkinsiveliwa n’ukhwa wa mulipa-òttheka: masi kinnitteliwa murima n’urukunuxa wawe murima: kinnitthuna wiira akhaleke. . . . Miyo nkinsiveliwa n’ukhwa wa mutthu. . . . Tivó, murukunuxe murima, wiira mukhalane ekumi.” (Ezek. 18:​23, 32) Yehova onnihakalala okathi onaaweha awe atthu attharuwaka itampi saya, mwaha woowi oniphavela wiira akhaleke mahiku ootheene. w24.08 9 itti. 5-6

Ootheene ale aniirela mpantta mutthenkeso wa Muluku, onnaavaha eyoolya enilipiha waamini waya, malakiheryo, waakhapelela ni onnaavaha itthu anipirisari aya. Ntakiheryo nnooniherya wiira Yehova khonimuthanla mutthu, okhala wiira owo ohiiriha wiira Biibiliya ophwanyaneyeke elapo yootheene wiira khula mutthu oweryeke omusoma. Wanipacerya, Soolempwa Soowaarya saalempwe mattaava mararu: Eheeperi, Aramaiku ni Ekereku. Niireke ale aniwerya omusoma Biibiliya ni mattaava awo oopacerya, aakhalana waataana wooloka ni Yehova waavikana ale ahiniwerya? Nnaari, khahiyo ti yeeyo. (Math. 11:25) Wiira nikhale mpatthani a Yehova, khivanipirisari okhala oosomexa aahiiso wiixutta olavula mattaava manceene. Yehova onnaavaha ankhili awe atthu ootheene a valaponi, ohiya paahi ale asomme iskola suulupale. Yehova oheemererya wiira Nuulumo nawe, Biibiliya, nitaphuleliwe mattaava manceene. Mwa enamuna eyo, atthu a olumwenku wootheene pooti ottottela mureerelo soowiixuttiha sa mbiibiliyani, ni wiixutta moota akhanle aya okhala apatthani awe. — 2 Tim. 3:​16, 17. w24.06 6-7 itti. 13-15

Waanaattamela opwetexiwa wa makhalelo a ayuda, ntoko Yesu aahimmye awe. Makristau yaanireerela orumeela okathi waahanle, wiira alipihe mikhalelo ntoko waamini ni ovilela. (Ahep. 10:25; 12:​1, 2) Moohipisa, anooniphwanya maxakha ovikana ale yaaphwannye makristau aheeberi. (Math. 24:21; Wis. 16:​14, 16) Tivonto, nwehe miruku soovareleya muteko saavahiwe makristau aheeperi, sikhanle oonikhaliherya. Murummwa Paulo aahaatumererya wiira yaahaana osoma ni wuupuwelela Nuulumo na Muluku. (Ahep. 5:14–6:1) Murummwa Paulo aahilavula Soolempwa sa eHeeberi, atthokiheryaka wiira enamuna ele esya yoomukokhorela Yehova, yaari yooloka ovikana ele ayuda yaamukokhorela aya khalai. Paulo aanikupali wiira yasuwela ni wiiwexexa saana ekeekhai, eyo yaamwaakhaliherya osyaka soowiixuttiha soowootha. w24.09 8-9 itti. 2-3; 10 etti. 6

Awiixutti a Yesu, yaanipirisari olipihiwa. Mwaha wa xeeni? Akina yaahihiya ipa saya, yaahaahiya amusi aya ni miteko saya wiira amutthare Yesu. (Math. 19:27) Nave akina yaahithokoreriwa moohixariya mwaha wa othanla omutthara Yesu. (Yoh. 9:22) Awo yaahipaka marukunuxo mookumini mwaya okhala wiira yaanisuwela wiira Yesu aari Mesiya aaleiheriwe. (Math. 16:16) Nuumala Yesu okhwa, awiixutti ale yaahiriipiwa murima ni okhulumuwa, okhala wiira khiyaasuwela etthu yaarowa owiiraneela. Yesu aanisuwela wiira awiixutti awe yaamuriipiwa murima nuumala yena okhwa. Nave aanisuwela wiira khiyaariipiwe murima, mwaha woohikhalana waamini woolipa. Nuumala ohihimuxiwa, owo aahipacerya waalipiha awiixutti awe. Mwa ntakiheryo, aahimukhumelela Maria Madalena okathi anla awe opuro aavithiwa awe Yesu. (Yoh. 20:​11, 16) Nave-tho, aahaakhumelela awiixutti anli yaawo yeetta arowaka muttetthe wa Emawuusi. Nave, aahimukhumelela murummwa Pedru. w24.10 13 itti. 5-6

Anamuyari, mmukhaliheryeke mwaninyu waatthokiherya atthu akina etthu enimwiiriha okupali wiira ookhala Mpattuxa. Nyuwo pooti ovaanela ni mwaninyu voohimya sa Mpattuxa, murumeelaka ebroxura eni: “Será Que a Vida Teve Um Criador?” Moottharelana, munwiriyaneke mwaninyu moota aarowa awe waatthokiherya atthu akina wiira ookhala Mpattuxa. Mmutumereryeke wiira ohaana otthokiherya oratteene, vakhala wiira ookhala mutthu oniphavela ovaanelana. Mwa ntakiheryo, mwaapara awe a oskola, pooti ohimya so: “Miyo kinikupali paahi itthu kiniwerya aka oweha, nto Muluku nkitonko onweha.” Mmiravo mukristau, pooti waakhula so: “Nkuupuwelani muri ene eriyari ya etakhwa mphwanya epoosu, niireke mwaarowa wuupuwela wiira epoosu eyo erimwiithipa? Moohaanyiherya, ookhala othimpe epoosu eyo. Mwa enamuna emosa-ru, ookhala opattunxe itthu sootheene siri valaponi!” w24.12 18 etti. 16

Ootheene ahu, ninnipirisari okhaliheriwa wiira nipake soothanla sooloka. Axitokweene ni anna arina waataana woolipa ni Yehova, pooti onikhaliherya wiira nipake eyo. Hata ari ene oowuuluvala, nihuupuweleke wiira miruku annivaha aya, ti sa khalai ni khasinivareleya muteko. Yehova oniphavela wiira nitthareke ntakiheryo na anna awo oowuuluvala. Mwaha woowi, sookhala itthu sinceene akhanle aya ooniixuttiha. Khalai, Yehova anaarumeela alopwana ororomeleya wiira yaalipihe ni oweettiha atthu awe. Mwa ntakiheryo, Moise, Davidi ni murummwa Yohani. Arumeyi awo, khiyakhala okathi omosa-ru ni yaahikhalana mixankiho soovirikana. Ahinatthi okhwa, yaahaavaha miruku atthu akina wiira avikaniheke okhala oororomeleya wa Yehova. Ootheene ahu, nikhale amiravo aahiiso oowuuluvala, nnoowerya wiixutta etthu ni moolumo aya oolipiha. — aRom. 15:4; 2 Tim. 3:16. w24.11 8 itti. 1-2

Okathi wa Nowe, Muluku ahaakhoottiherya apinaatamu olya ephome. (Maph. 9:​3, 4) Nave muhoolo mwaya, Yehova aahaaleela aisarayeli wiira ahilyeeke ephome. Khula mutthu aarowa olya ephome, ahaana ‘okumihiwa munlokoni’, eyo piiyo, wiiviwa. (Onam. 7:27) Yesu aahiwiixuttiha ayuda ale wiiwelela malamulo ootheene Muluku aavanhe awe aisarayeli. (Math. 5:​17-19) Tivonto, Yesu khaavekenle ayuda ale okhuura erutthu awe yeekeekhai aahiiso owurya ephome yaari mmitikani mwawe. Vannooneya oratteene wiira Yesu aalavula mwa nthoonyeryo, ntoko siisaale aalavunle awe ni muthiyana musamariya. Owo aahimmye so: “Ole onrowa owurya maasi kinrowa aka onvaha khonivoliwa-tho . . . anrowa . . . aninvaha okumi woohimala”. (Yoh. 4:​7, 14) Yesu khaaphavela ohimya wiira muthiyana ole musamariya, aarowa ophwanya okumi woohimala mwaha woowurya maasi a vapoosu. Mwa enamuna emosa-ru, okathi Yesu aalavula awe ni muttitthi ole oKafarnawu, khaaphavela ohimya wiira yamphwanya okumi woohimala vakhala wiira yaamukhuura erutthu awe ni owurya ephome awe. w24.12 9 itti. 4-6

Mulopwana mukristau oothela, ohaana osyaka miyuupuwelo soohiloka arina aya atthu akina voohimya sa athiyana. Mwaha wa xeeni? Mwaha woowi ikwaha sikina, hiyo nimpaka etthu nittharaka muupuwelo ahu. Murummwa Paulo aahaatumererya makristau oothanliwa a oRoma, wiira ‘ahitakiheke mweettelo wa atthu a olumwenku ola’. (Arom. 12:​1, 2) Okathi murummwa Paulo aalepa awe epaphelo aaroihelaka makristau a oRoma, muloko ole wiira opakiwe ene khalai. Moolumo Paulo aaroihenle awe muloko ole, annooniherya wiira yaahikhala atthu mmulokoni, yaawo yaarina soolema ni miyuupuwelo saavarihana ni mweettelo wa olumwenku. Ti maana aya, murummwa Paulo aatumerenrye awe wiira yaahaana oturuka muupuwelo ni mweettelo aya. Nave miruku iyo, sinnivareleya muteko para makristau oothela olelo-va. Mooriipiha murima, alopwana anceene oothela olelo-va, aneettihiwa ni muupuwelo woohiloka wa olumwenku ola. Nto eyo enniwiiriha omuhasula mwaaraya. w25.01 9 etti. 4

Olelo-va, axitokweene a mmulokoni annaatteliwa miteko. Axitokweene awo, annilaleya ihapari sooreera. (2 Tim. 4:5) Awo anninivaha ntakiheryo nooloka na okhalela nthiti muteko woolaleerya. Nave annitthokiha muteko woolaleerya wa muloko aya, ni anniniixuttiha moota wookhala anamalaleerya ooloka. Nave-tho, axitokweene a mmulokoni anirumeela ntoko makhulupale a xariya ni oomoriwa ikharari. Okathi mutthu onipaka awe etampi yuulupale, axitokweene annimukhaliherya wiira otthikele okhalana waataana wooloka ni Yehova. Okathi omosa-ru, axitokweene annipaka sootheene aniwerya aya wiira muloko okhale woowaarya. (1 Akor. 5:​12, 13; Akal. 6:1) Axitokweene a mmulokoni annisuweliwa okhala amakampusi. (1 Ped. 5:​1-3) Awo annilokiherya oratteene myaha saya sinikhuma mbiibiliyani. Nave anniimananiha wiira amusuwele khula mutthu a mmulokoni ni annaaxukurya anna ni arokora. Axitokweene akina, annikhaliherya edepartamento ya oteka ni olokiherya Ipa sa Omwene, anniirela mpantta ekomisau ya akonkresu ni asembeleya, anniirela mpantta Ekomisau Enilavula ni Mameediku, anniirela mpantta Ekurupu Enaaxukurya Aretta ni miritti sikina. Mweekeekhai, axitokweene a mmulokoni annivara muteko munceene! w24.10 20 etti. 9

Mbiibiliyani, nuulumo noowi “woopoliwa”, nintaphulela mukuttho ovahiwe wiira nileveleliwe itampi sahu. Murummwa Pedru olavulaka sa woopoliwa iwo, aahimmye so: “Nyuwo moosuwela esisapo moopolaniwe anyu, mwaha wa makhalelo anyu oohiloka, yaawo muravihiwe anyu ni amuhavinre anyu. Khamoopoliwe ni itthu sinipweteya, ntoko eweero aahiiso eparatha. Ohiya-vo, moopoliwe ni ephome ya Kristu, erina efaita yuulupale, ntoko ephome ya mwaapwittipwitthi ooloka ni oohirakala.” 1 Ped. 1:​18, 19. Mwaha wa mukuttho ovahiwe, hiyo nihoopoliwa etampi ni okhwa ni ohaawa wootheene onikumiheriwa ni etampi eyo. (Arom. 5:21) Tthiri ootheene ahu, nihaana omuxukhurela Yehova ni Yesu mwaha woowi Yesu oovaha okumi awe ntoko mukuttho onnoopola. w25.02 5 itti. 15-16

Ninrowa ohihiya sai okhala owehaweha ni osyaka sooweha sikhanle ooniiriha opaka itampi suulupale? Ninniixutta etthu ni mmiravo oniromoliwa eliivuru ya Miruku ekapiitulu 7. Owo aahirupihana voohiloka ni muthiyana mmosa namararuwa. Eversiikulu 22 enihimya wiira mmiravo owo aahimutthara “nananoru”. Iversiikulu sikina sa ekapiitulu ela, sinnooniherya soothanla aapanke awe seiyo moowaakuveya saamwiirinhe opaka etampi. Etthu xeeni yaamwiirinhe mmiravo ole opaka etampi? Etthu yoopacerya, okathi vaapacenrye aya oriipa, “Owo anetta mphironi yattamenle empa ya namararuwa owo.” (Mir. 7:​8, 9) Moottharelana, nuumala onweha muthiyana owo khaamuhulunwe. Nuumala-vo, aaheemererya obexariwa ni muthiyana owo ni onanwiriyana itthu aahimya awe. Muthiyana owo aahihimya wiira aahivaha mukuttho wootthapela ni aahimmaliherya natiri ammanale awe. Waanyiheryasa, owo aaphavela wiira mmiravo ole uupuweleke wiira owo khahiyo muthiyana ootakhala. (Mir. 7:​13, 14, 21) Vaakhanle wiira mmiravo ole khaapanke itthu iya sootheene, owo khaarowa weehereriwa ni khaapaka etampi. w24.07 16 itti. 8-9; 19 etti. 19

Yehova khoneemererya wiira atthu anipaka etampi yuulupale ni ahinirukunuxa murima aya, nlelo akhaleke mmulokoni. Atthu akina pooti wuupuwelaka wiira mwaha woowi Yehova toomoriwa ikharari, owo onimweemereryaka wiira mutthu ohiniphavela ottharuwa, nlelo okhaleke mmulokoni. Masi khahiyo ti siiso Yehova onooniherya awe omoriwa ikharari. Nnaamwi Yehova ori ene oomoriwa ikharari, owo khoneemererya itthu sootheene. Ele onihimya awe okhala yooreera ni yoonanara kheniturukeya. (Yuda 4) Vaakhanle wiira Yehova onneemererya wiira ale anipaka etampi ahinattharuwa nlelo akhaleke mmulokoni, iwo khahiyo waarowa okhala omoriwa ikharari, maana atthu a mmulokoni yaamuhaawa. (Mir. 13:20; 1 Akor. 15:33) Yehova khoniphavela wiira opwetexiwe nnakhala mutthu mmosa. Owo oniphavela owoopola atthu, vaaweryaneyaka. Onnaamorela ikharari atthu yaale anirukuxa murima aya ni aniphavela otthikela okhala apatthani awe. (Ezek. 33:11; 2 Ped. 3:9) Tivo, okathi mulopwana ole a Akorinto aarukununxe awe murima awe ni aaturunke awe mweettelo awe, Yehova aahaaruma atthu a muloko ole omulevelela ni omwaakhela mmulokoni. w24.08 17 itti. 7; 18-19 itti. 14-15

Nlikanyiho na ipwittipwitthi ni ipuri, Yesu aahihimya moota onrowa awe waaphukela apinaatamu moovarihana ni moota yaakhaliherya aya axinnawe oothanliwa. (Math. 25:​31-46) Yesu, onoorowa ophukela ipwittipwitthi ni ipuri okathi wa “maxakha maalupale” ehalaka vakhaani opacerya ekhotto ya Armagedoni. (Math. 24:21) Ntoko siisale makampusi onivalaanya awe ipwittipwitthi ni ipuri, mwa enamuna emosa-ru, Yesu onimwaavalaanya atthu yaakhaliherya axinnawe oothanliwa ni ale yahaakhaliherya. Iprofesia sa mbiibiliyani, sinooniherya wiira Yehova oomuthanla Yesu, wiira okhale mphuki nave owo onoorowa waalamula apinaatamu mwa xariya. (Yes. 11:​3, 4) Yesu onnivaha ephoole moota mutthu onipaka awe itthu, onilavula awe ni moota onuupuwela awe ohela muhina moota anaathokorerya aya axinnawe Kristu. (Math. 12:​36, 37) Mwa enamuna ela, Yesu onoorowa waasuwela ale yaakhaliherya axinnawe. Enamuna emosa ale anlikanyihiwa ni ipwittipwitthi anaakhaliherya aya axinnawe Kristu, ori olaleya ihapari sooreera. w24.09 20-21 itti. 3-4

Nihaana ovarerya itthu sootheene ninkupali ahu wiira ti sa ekeekhai. Nave nnoowerya opaka eyo, nlikanyihaka itthu ninkupali ahu ni ele Biibiliya onihimya awe. Mwa ntakiheryo, mmuupuwele mmiravo yoowo onuupuwela wiira Muluku khonimuthokorerya. Niireke ohaana weemererya muupuwelo owo ni okupali? Nnaari, owo ohaana ‘ovarerya itthu sootheene’. Onoopaka eyo, vakhala wiira onoosuwela moonelo wa Yehova voohimya sa mwaha owo. Okathi nimmusoma ahu Biibiliya, onlikana ni onwiriyana Yehova. Masi wiira niphwanye waakhuliwa wa makoho ahu annixankiha, nihaana wiimananiha vanceene. Wanipacerya, nihaana osoma eversiikulu enivarihana ni nikoho nahu. Nyuwo pooti orumeela ikaruma sootheene sinikumiheriwa ni mutthenkeso wa Yehova, wiira mutokose mwaha owo. (Mir. 2:​3-6) Nave-tho, nihaana onvekela Yehova wiira onikhaliherye okathi nintokosa ahu wiira niphwanye waakhuliwa wa nikoho ninnixankiha. Nihaana ophavelasa malakiheryo a mbiibiliyani, ni myaha sikina sinivarihana ni ele ennixankiha. w24.10 25 itti. 4-5

Yehova khonaareeliha atthu yaale anipaka itthu moowiixinnuwiha aahiiso aphavelaka wooniwa. (1 Akor. 10:​24, 33; 13:4) Hata apatthani a Yesu, ikwaha sikina yaaniphavela okhalana iparakha masi ni mathowa oohiloka. Mwa ntakiheryo, nwehe etthu yiiraneyale ni arummwa a Yesu anli, Yakobo ni Yohani. Awo yahinvekela Yesu wiira aavahe opuro wa faita Moomweneni mwawe. Yesu khaattottopenle mwaha wa yoophavela aya ele ya wiixoona okhalana efaita, waavikana atthu akina. Ohiya-vo, awiixutti awe ale anli aalenle so: “Ole oniphavela okhala mukhulupale eriyari anyu, ohaana okhala murumeyi anyu. Nave ole oniphavela okhala oopacerya eriyari anyu, ohaana okhala epottha anyu.” (Mar. 10:​35-37, 43, 44) Okathi munna oniphavela awe okhala murumeyi ookhaliherya ni mathowa ooloka, eyo piiyo, waarumeela atthu akina, owo onnikhaliherya vanceene muloko. — 1aTes. 2:8. w24.11 15-16 itti. 7-8

Okathi nimpaka ahu soothanla, ophenta, onooniiriha ophavela mureerelo wa atthu akina ni okhala oowiiyeviha. (1 Akor. 10:​23, 24, 32; 1 Tim. 2:​9, 10) Niira siiso, nnoowerya opaka yoothanla enrowa wooniherya wiira ninnaaphenta ni waattittimiha atthu akina. Akhala wiira munoopaka yoothanla yuulupale, muupuweleke etthu mukhanle anyu oopaka wiira mmalelihe. Yesu oniixuttihale wiira nihaana oweha naarina musurukhu oniphiyerya. (Luka 14:28) Tivonto, muhaana oweha okathi onipirisari, mireerelo ni wiimananiha munireerela anyu opaka, wiira yoothanla anyu yeette saana. Ikwaha sikina, nyuwo muhaana waakoha atthu a etthoko anyu, etthu khula mutthu onireerela awe opaka wiira yoothanla anyu yeette saana. Xeeni vari aya vooloka opaka eyo? Opaka eyo, onimookhaliheryani oweha marukunuxo munireerela anyu opaka aahiiso othanla etthu ekina enrowa okhaliherya. Okathi munrowa anyu waaleela atthu a etthoko anyu ni owiriyana moonelo aya, anoowerya okhaliherya wiira yoothanla anyu ekhumele saana. w25.01 18-19 itti. 14-15

Yesaya oohimya-tho etthu ekina enniiriha okhala ootthapa ni oopuha mparayiisu mmo ya nthoonyeryo. Owo ohimmye wiira etthu enniiriha otthapa ni opuha okhala wiira eparayiisu eyo ekumiheriwe ni Yehova. (Yes. 65:​18, 19) Mitthenkeso sikumiheriwe ni olumwenku ola, khasiniwiixuttiha atthu voohimya sa Muluku. Tivonto Yehova onniruma awe wiira naakhaliheryeke atthu awo okhuma mitthenkeso iyo, ni wiira yiireleke mpantta eparayiisu ya nthoonyeryo yeeyo eri yootepa ohakalaliha! Ninnixukhurela vanceene mareeliho ootheene nimphwanya ahu mwaha wa wiirela mpantta okokhorela weekeekhai, nave nimphavela wiira atthu a olumwenku wootheene aphwanye mareeliho awo. (Yer. 31:12) Niireke khamunitthapa ni oxukhurela, okathi munuupuwela anyu yoolipelela murina anyu mwaha wa wiirela mpantta eparayiisu ya nthoonyeryo? Biibiliya onileiherya wiira hiyo ninrowa ‘oteka ipa sahu, nikhaleke memmo: ninrowa ophatteya miri s’evidera nilyeeke mihokorokho sahu’. Hiyo khaninrowa ‘ovaraka muteko mahala ene . . . maana ninrowa okhala nloko norerihiwa n’Apwiya’. Yehova onnileiherya wiira onoonivaha okumi weekeekhai, woovareleleya ni woohakalaliha. Owo onoopaka eyo, okhala wiira onnisuwela etthu khula mutthu oniprisari awe. Nave Yehova ‘onimwaavahaka yoolya atthu ootheene onaaphenta awe.’ — Yes. 65:​20-24; Esal. 145:16. w24.04 22-23 itti. 11-12

Hiyo ninnimpaka Yehova okhala mwala ahu, vaavo nimmuroromela ahu ni murima wootheene. Nave ninnikupali wiira ninniphwanya mureerelo, vaavo nimmwiiwelela ahu yena hata okathi wa mixankiho. (Yes. 48:​17, 18) Khula okathi nnuupuwelela ahu moota Yehova onnikhaliherya awe, eyo enniniiriha wuncererya omuroromela wahu ni okupali wiira owo onoonikhaliheryaka ovilela khula muxankiho, hata noonaka wiira khaninwerya oxintta. Yehova ori ntoko mwaako ohinikhuma opuro ori aya aahiiso ohiniturukeya. Ninnihimya eyo, maana mikhalelo sawe ni yoolakela awe, khasiniturukeya. (Mal. 3:6) Nuumala Adamu ni Eva omutthekela Yehova, owo khaaturunke yoolakela awe para apinaatamu. Murummwa Paulo ohimmye wiira Yehova, “khokhanle oowiikhootta mmansawe.” (2 Tim. 2:13) Eyo enitaphulela wiira moohicikha itthu sinikhumelela aahiiso sinipakiwa ni apinaatamu, yena khonituruka mikhalelo sawe, yoolakela awe ni malamulo awe. Nto nihaana omuroromelaka Muluku ahu, yoowo ohiniturukeya wiira onoonoopola ni onikhaliherya okathi wa mixankiho. Nave nihaana okupali wiira sooleiherya sawe sa muhoolo sinimwiiraneya. — Esal. 62:​6, 7. w24.06 27-28 itti. 7-8

Akhala wiira munninamorari, exeeni enrowa wookhaliheryani othanla othelana wala omaliha onamorari iwo? Etthu enrowa wookhaliheryani ori osuwelana saana mukina ni mukhwaawe. Woonasa wene, munnisuwela itthu sikina voohimya sa mutthu owo muhinatthi opacerya onamorari. Masi vano nyuwo mookhalana eparakha ya omusuwela saana mutthu a “vamurimani” vanyu. Eyo enihela muhina osuwela soophavela sa mutthu owo, moota ori aya waataana wawe ni Yehova, mikhalelo sawe ni moota onuupuwela awe. Nuuvira okathi, eyo enimookhaliheryani owerya waakhula makoho anittharelana: ‘Kiireke onoowerya okhala iyaka aahiiso mwaaraka onrowa okhikhaliheryaka saana?’ (Mir. 31:​26, 27, 30; Aef. 5:33; 1 Tim. 5:8) ‘Kiireke kinoowerya omphentaka ni onvaha itthu onipirisari awe nave yena opakaka etthu emosa-ru para miyo? Kiireke nnanwerya ovilelana mukina ni mukhwaawe?’ (Arom. 3:23) Nto okathi owo munisuwelana anyu mukina ni mukhwaawe, muhiliyale ela: Etthu yootepa okhalana efaita, khahiyo osuwela moota mphwanelanne anyu, masi ori oweha moota khula mmosa onrowa awe owerya wiilimaleliha makhalelo masya. w24.05 27 etti. 5

Mwene Davidi aahipaka itampi suulupale. Masi okathi profeta Natani aaronwe awe olavula ni Davidi voohimya sa soottheka aapanke awe, Davidi moowiiyeviha aahittharuwa. (Esal. 51:​3, 4, 17, moolumo ari vasulu wa eveersu 1.) Nave-tho, mwene Ezekiya aahimutthekela Yehova. (2 Wah. 32:25) Ntoko Davidi, nave-tho mwene Ezekiya aahiiyeviha ni aahittharuwa soottheka sawe moomalela. (2 Wah. 32:26) Nuumala-vo, mwene Ezekiya aahooniherya okhala oororomeleya maana “ahìra soloka vamaithoni v’Apwiya.” (2 Mam. 18:3) Exeeni nniixutta ahu? Nihaana ottharuwa voomalela soottheka sahu ni wiimananiha wiira nihitthikele soottheka simosa-ru. Ankhi vakhala wiira Axitokweene aanivaha miruku mwaha wa etthu nnoona ahu okhala yaamukhaani? Nto hiyo pooti opaceryaka wuupuwela wiira Yehova khonniphenta-tho ni wiira Axitokweene khanniphavela. Hata mamwene a wIsarayeli ikwaha sikina yaanireerela ovahiwa miruku ni ottaruxiwa. (Ahep. 12:6) Nto okathi ninttaruxiwa ahu nihaana 1) weemererya moowiiyeviha, 2) opaka marukunuxo anireerela ni 3) ohihiya omurumeela Yehova ni murima ahu wootheene. Vakhala wiira nnoottharuwa moomalela soottheka sahu, Yehova onoonilevelela. — 2 Akor. 7:​9, 11. w24.07 21 etti. 8; 22 itti. 9, 11

Mutthu opanke etampi yuulupale onnikumihiwa mmulokoni vakhala wiira onnikhootta okathi axitokweene aniimananiha aya ikwaha sinceene wiira amukhaliherye orukunuxa murima awe. (2 Mam. 17:​12-15) Miteko sawe sinnooniherya wiira owo khoniphavela wiiwelela sooruma sa Yehova. (Otum. 30:​19, 20) Nto vannilaleiwa mmulokoni wiira mutthu owo khahiyo-tho Namoona a Yehova. Masi khahiyo vanilaleiwa wiira mutthu owo uulihihiwe muru. Ohiya-vo, vanilaleiwa wiira atthu a mmulokoni aweryeke otthara malakiheryo ani: “Muhiye waataana” ni mutthu owo “nnakhala muhilyeeke ni mutthu owo.” (1 Akor. 5:​9-11) Aakhala mathowa ooloka amwiirinhe Yehova ohimya eyo. Murummwa Paulo aalempe wiira: “Eferemento vakhaani enniiriha otthu wootheene wooweetheiwa opuhuwa.” (1 Akor. 5:6) Akhala wiira natampi ohiniphavela orukunuxa murima khonikumihiwa mmulokoni, atthu akina a mmulokoni pooti wuupuwelaka wiira khivanipirisari wiiwelela sooruma sa Yehova. — Mir. 13:20; 1 Akor. 15:33. w24.08 27 itti. 3-4

Hiyo, khanniwerya waavaha atthu akina owerya ni ikuru sahu ntoko Yehova oniira awe. Masi nnoowerya orumeela ikuru sahu wiira naakhaliherye. Mwa ntakiheryo, hiyo pooti waakhaliherya anna ni arokora oowuuluvala nivaraka miteko ntoko olokiherya empa aya aahiiso orowa omerkaatu. Aahiiso, hiyo pooti wiivahererya wiira nikhaliherye okwesa ni olokiherya Empa ya Omwene. Muhiliyale wiira moolumo aakhalana owerya. Niireke munnimusuwela mutthu aarowa ohakalala mwaha wa ottottopeliwa? Niireke munnimusuwela mutthu onipirisari olipihiwa? Nto akhala wiira munnimusuwela, munoonela sai okumana nuuwo ni wooniherya wiira munnimuthokorerya? Nyuwo pooti omuxukurya, omulikarela ni omwinviyarela mensagem. Khivampirisari oxankiheya ni etthu munrowa anyu ohimya. Vakhala wiira nnoorumeela moolumo ooreera, eyo enoomukhaliherya munna aahiiso murokora ovilela mixankiho sinimphwanya ni okhala oororomeleya. — Mir. 12:25; Aef. 4:29. w24.09 28 itti. 8-10

Akhala wiira mooviriha okathi murumeelaka ntoko murumeyi ookhaliherya, woonasa wene, eyo enimookhaliheryani okhala mutokweene a mmulokoni. Niireke munniphavela opaka “etthu yooreera”, yeeyo axitokweene anipaka aya? Miteko xeeni axitokweene anivara aya? Awo annihoolela muteko woolaleerya, waaxukurya anna ni arokora, anniixuttiha ni annilipiha muloko ni moolumo ni miteko saya. Ti maana aya Biibiliya onaahimya awe alopwana awo anivara muteko munceene, okhala “soovaha.” (Aef. 4:8) Etthu xeeni munireerela anyu opaka wiira mukhale mutokweene? Mutthu oniphavela okhala mutokweene, toovirikana ni mutthu oniphavela ovara muteko vampereesani. Okhala wiira vampereesani, mwakhalana mikhalelo sinivekeliwa ni patarau wiira mphwanelele ovara muteko owo, moohaanyiherya munoophwanya. Moovirikana ni vo, wiira mutthu okhale mutokweene, khivampirisari paahi osuwela olaleerya ni wiixuttiha. Muhaana weettela malakiheryo ari mbiibiliyani para axitokweene, ari 1 Timootheyo 3:​1-7 ni Tito 1:​5-9. w24.11 20 itti. 1-3