Novembro

Axitokweene annimutakiha Yehova, yoowo oniwoonela othunku atthu akumihiwe mmulokoni. Mwa ntakiheryo, khalai Yehova khaalipelenle wiira atthu awe, aisarayeli, apacerye toko orukunuxa murima, ohaleke aakhaliheryaka. Ohiya-vo, owo taapacenrye opaka etthu, aaroihelaka maprofeta awe, hata aisarayeli awo nlelo yahaarukununxe murima. Yehova aahimuleela Hoseya wiira omulevelele mwaarawe ni omukuxe, nnaamwi owo nlelo aapaka etampi. Siiso, Yehova aahiwiixuttiha atthu awe wiira yena onnoona othunku vanceene. (Hos. 3:1; Mal. 3:7) Amutakihaka Yehova, axitokweene a mmulokoni anniphavela wiira mutthu opanke etampi yuulupale orukunuxe murima ni otthikele mmulokoni. Nave awo, khanipaka itthu saarowa omooceeliha mutthu ole otthenke orukunuxa murima awe ni otthikela mmulokoni. Yesu aahilavula nlikanyiho na mwaana aarimenle, paapa awe aahimutthimakela omukhupaarela onanvaha epeexo mwanawe. (Luka 15:20) Moone wiira paapa ole khaalipelenle wiira mwanawe opacerye toko omuxonttela wiira omulevelele. Masi paapa ole aahimutthimakela mwanawe okhala wiira aanimphenta. w24.08 28 itti. 7-8

Ntoko sinooniherya aya moolumo a yoolepa ya olelo, Yehova khoniithukumanyerya ankhili. Owo onnaavaha atthu akina ankhili awe. Murummwa Yakobo ohimmye wiira Yehova onnaavaha ankhili awe ni “murima wootheene”, aahiiso “ohipwapwaka”. Owo oniphavela wiira nihooveleleke onvekela ankhili. Ohiya-vo, owo oniphavela wiira ninvekeleke. (Mir. 2:​1-6) Ankhi hiyo? Niireke nnoowerya waavaha ankhili atthu akina? (Esal. 32:8) Arumeyi a Yehova, aakhalana eparakha ya owiixuttiha atthu akina itthu yiixuntte aya. Mwa ntakiheryo, ninnaakhaliherya anamalaleerya asya olimalela muteko woolaleerya. Axitokweene anaakhaliherya arumeyi ookhaliherya opaka saana soothanleliwa saya mmulokoni. Nave-tho anna ale alimalenle muteko wooteka, annaakhaliherya anna ale ahilimalenle wiira yiixutte ni ekhaliheryeke muteko wooteka. w24.09 28-29 itti. 11-12

Anna, wiira mukhale mutokweene, nyuwo muhaana weettiha saana okumi anyu wiira atthu ahoophwanyanekeni mulattu. (1 Tim. 3:2) Ohiya-vo, muhaana wooniwaka saana ni atthu ahikhanle a mmulokoni. Atthu akina pooti wooveehani mwaha wookhala mukristau, masi ohikhale mutthu onrowa waanyiherya wiira mwa mutthu ooloka ni oororomeleya. (Dan. 6:​4, 5) Mwiikoheke so: ‘Kiireke anna, arokora ni atthu akina, annoona wiira kookhalana mweettelo wooloka?’ Nave-tho muhaana ‘osiveliwaka itthu sooreera’, aahiiso mphaveleke oweha mikhalelo sooloka sa anna ni arokora ni waattottopela. (Tito 1:8) Muhakalaleke mwaha woowiirela itthu sooreera atthu akina. Xeeni axitokweene anireerela aya okhalana mukhalelo ola wa osiveliwa itthu sooreera? Okhala wiira, awo anniviriha okathi munceene yaalipihaka anna ni arokora ni akhapelelaka miritti sikina. (1 Ped. 5:​1-3) Hata vari siiso, ohakalala aniphwanya aya mwaha wa waakhaliherya atthu akina, ti wuulupale ovikana miteko anivara aya. — Mit. 20:35.w24.11 20-21 itti. 3-5

Arumeyi ookhaliherya, annivara muteko munceene akhaliheryaka muloko. Murummwa Paulo, aanivaha efaita muteko yaavara aya alopwana awo. Etthu ennikupaliha, okhala wiira okathi aalepa awe ekarta aaroihelaka makristau yaakhala oFilipi, aanaakhomasa axitokweene ni arumeyi ookhaliherya. (Afil. 1:1) Anna anceene oopatisiwa nave arina iyaakha soovirikana, annihakalala mwaha wa okhaliherya mmulokoni ntoko arumeyi ookhaliherya. Mwa ntakiheryo, Devan aathanliwe ntoko murumeyi ookhaliherya orine ene iyaakha 18. Nave-tho munna oniitthaniwa Luis, aathanliwe ntoko murumeyi ookhaliherya orine ene iyaakha sinivikana 50. Owo ohimmye so: “Kinnoona okhala eparakha yuulupale okhaliherya mmulokoni ntoko murumeyi ookhaliherya, otepexa wene okathi kinweha aka niphento na anna ni arokora!” Nave-tho arumeyi ookhaliherya akina arina moonelo mmosa-ru. Vakhala wiira mwa munna oopatisiwa ni nlelo khahiyo mwa murumeyi ookhaliherya, niireke munniphavela okhalana yoolukama eyo? w24.11 14 itti. 1-3

Orina ene iyaakha 39, mwene Ezekiya a oYuda, aahiwereiwa vanceene onahala okhwa. Profeta Yesaya, aahimuleela Ezekiya muhupi wa Yehova, yoowo waahimya wiira yena aamookhwa. (2 Mam. 20:1) Okathi Ezekiya aiwale awe eyo, khaareere oriipiwa murima ni aahinla vanceene. Owo aahimuxonttela vanceene Yehova wiira omukhaliherye. Okathi Yehova aiwale awe nivekelo ni woona maithori a Ezekiya, owo aahimoonela othunku, mpakha ohimya so: “Kihiiwa ovekela wanyu. Nave kihoona wunla wanyu. Miyo kinimoopenuxani”. Omurumeelaka Profeta Yesaya, Yehova aahimuleela Ezekiya wiira aamuncererya okumi awe ni aamoopola oYerusalemu mmatatani mwa aSiria. (2 Mam. 20:​4-6). Exeeni mukhanle anyu oopaka, vakhala wiira mookhalana oretta onikhala ntoko wiira khamunrowa openuwa? Mmuleeleke Yehova itthu sootheene sinooxankihani, owo onimoowiriyanani hata okathi yoole muninvekela anyu munlaka. Biibiliya onihimya wiira Yehova “Tiithi oomoriwa ikharari vanceene, ni Muluku onnimaaliha mwa mikhalelo sootheene”, owo onoonimaaliha wa khula muxankiho onniphwanya. —2 Akor. 1:​3, 4. w24.12 24 itti. 15-17

Vanrowa okhala woohakalaliha owaakhela ale anrowa ohihimuxiwaka! Nave munoohakalala wiixutta itthu sinceene Yehova opattunxe awe. (Esal. 104:24; Yes. 11:9) Etthu yootepa oreera, okhala wiira munrowa ohakalalaka vanceene mwaha wa omukokhorela Yehova muhiivahaka nthowa! Niireke munoophavela oturuka mareeliho ala a muhoolo mwaha wa “opuha vakhaani miteko sa etampi”? (Ahep. 11:25) Nnakhala vakhaani! Okumi ninrowa ahu okhalana muhoolo, onrowa okhala wootepa ohakalaliha ovikana khula etthu ninrowa ahu waakhela elapo ela. Muhiliyale wiira eparayiisu, khahiyo etthu ninrowa ahu omakelaka olipelela. Onoophiya okathi ninrowa ahu okhalaka memmo. Vanooweryaneya okhala mahiku ootheene, okhala wiira Yehova onniniphenta vanceene ni onvaha Mwanawe wiira okhwe mmureerelo ahu! w25.01 29 etti. 12

Eliivuru ya aHeeperi, ennaahimya atthu yaamwaamini Yehova. Mmosa a yaawo, aari Moise. (Ahep. 3:​2-5; 11:​23-25) Moise khaahiyale waamini, okhala wiira aaniweha moota Yehova aakhaliherya awe aisarayeli, aavahaka eyoolya ni maasi moothakoni mme. (Okhu. 15:​22-25; Esal. 78:​23-25) Nuuvira mwaakha mmosa aisarayeli akhumme ene wExiitu, Yehova aahaaleiherya wiira aamwaavaha enama. Masi hata aarina waamini woolipa, Moise aahimukoha Yehova vakhala wiira anwerya opaka ele aaleihenrye awe. Moothakoni mme, yaahikhala atthu anceene ni khiyaakhanle eyoolya, nto eyo yaahimwiiriha opacerya ohoverya vakhala wiira Yehova aamwaavaha enama eniphiyerya. Yehova, aahimukoha Moise iiraka: “Niireke ntata na Yehova ti nookhuveya?” (Mmr. 11:​21-23) Vaakhala ntoko wiira Yehova aamukoha Moise wiira: ‘Nyuwo munoona wiira miyo nkiniwerya opaka ele eleihenrye aka?’ w25.03 26 itti. 1-2

Niireke vaarowa okhala vooloka, ohimya wiira etthu yiiraneyale okathi wa Mutaaseke enimwiiraneya etthu emosa-ru muhoolo? Waakhuliwa waya ti woowi nnaari. Mwaha wa xeeni? Mwaha woowi Biibiliya khonihimya eyo. Ekeekhai wiira Yesu aahilikanyiha okathi onrwa awe ni “mahiku a Nowe”. Masi owo khaalikanyinhe itthu siiraneyale okathi ole ntoko owaliwa wa mukhora ni itthu sinrowa wiiraneya muhoolo. (Math. 24:​37-39) Nowe oonenle sai okathi Yehova aamulenle awe itthu saarowa wiiraneya? Owo aahaamini ni aahipacerya oteka ekalawa. (Ahep. 11:7; 1 Ped. 3:20) Moolikanasa, vaavo atthu aniiwa aya ihapari sooreera voohimya sa Omwene wa Muluku, awo ahaana weettela itthu yiixuntte aya. (Mit. 3:​17-20) Pedru aahimuhimya Nowe okhala mutthu “aalaleya exariya.” Olelo-va, ninniimananiha vanceene wiira naalaleerye atthu olumwenku wootheene, nave ninnipaka eyo mwa enamuna yooloka. Hata niimananihaka vanceene, khaninrowa owerya waalaleerya atthu ootheene olumwenku ola ohinatthi omala. w24.05 9-10 itti. 3-5

Hiyo nihaana ophavelasa inamuna sa wooniherya oreera murima ni waattittimiha apatthani a Yehova. (Arom. 12:10) Ninrowa owerya sai opaka eyo? Enamuna emosa ennihimmwa Esaalimu 15:4. Eyo enihimya wiira ole ori muletto a muheemani mwa Yehova, khonihiya hata ohaawaka itthu saalaphenle awe Apwiya. Akhala wiira nnoohiya opaka itthu nimuleihenrye ahu Yehova, pooti waariipiha murima atthu akina. (Math. 5:37) Mwa ntakiheryo, Yehova oniphavela wiira mulopwana ni muthiyana yaakhwaniheryeke ele yaaleiheryanne aya nihiku na ekasamento aya. Nave Yehova onnihakalala vaavo onaaweha awe anamuyari evarihelaka muteko itthu anaaleiherya aya anaaya. Mwaha womphenta wahu Muluku ni atthu akina, nihaana wiimananiha opaka sootheene ninwerya ahu wiira naakhwaniheryeke itthu ninleiherya ahu. Enamuna ekina nikhanle ahu oowaattittimiha apatthani a Muluku, ori okhala atthu ooreera murima ni oosuwela owaakhela aletto. (Arom. 12:13) Oviriha okathi niri ene ni anna ni arokora ohiya paahi okathi wa mithukumano aahiiso okathi wa muteko woolaleerya, onoonikhaliherya olipiha opatthani ahu ni Yehova vamosa naawo. Ohiya-vo, vaavo ninkhala ahu atthu oowaakhela aletto, ninnimutakiha Yehova. w24.06 12 itti. 15-16

Yehova oniwiixuttiha ekeekhai, atthu yaale paahi oowiiyeviha. (Math. 11:25) Tivonto, hiyo moowiiyeviha niheemererya okhaliheriwa wiira niixutte ekeekhai. (Mit. 8:​30, 31) Hata vari siiso, nihaana okhalana ephoole wiira nihikhale atthu oowiixinnuwiha. Nakhala oowiixinnuwiha, hiyo pooti opaceryaka wuupuwela wiira moonelo ahu tori wootepa okhalana efaita, ovikana malakiheryo a mbiibiliyani ni malakiheryo ninvahiwa ahu ni mutthenkeso wa Yehova. Naaphavelaka ohihiya okhala oowiiyeviha, nihaana wuupuwelelaka wiira na atthu acikhaani nailikanyiha ni Yehova. (Esal. 8:​3, 4) Nave nihaana onvekela Yehova wiira onikhaliherye okhala oowiiyeviha ni weemererya wiira niixuttihiweke. Yehova, oonivaha Nuulumo nawe, Biibiliya, ni oonivaha mutthenkeso awe. Nto owo onoonikhaliherya wiira nivaheke efaita itthu iyo ovikana moonelo ahu. Okathi munimusoma anyu Biibiliya, mmananiheke osuwela moota Yehova onisiveliwa awe ni atthu oowiiyeviha ni moota onaanyokha awe atthu oowiixinnuwiha ni oowiisoona. Mwiimananiheke okhala oowiiyeviha, otepexa wene okathi yoole munivahiwa anyu yoothanleliwa, atthu akina anoona aya okhala eparakha yuulupale. w24.07 10 itti. 8-9

Okhuma mwaakha wa 1919, Yesu onnirumeela ekurupu yaamukhaani ya alopwana oothanliwa, wiira ahooleleke ni otthokiha muteko woolaleerya ni waavaha eyoolya enlipiha waamini wa atthareli awe. (Luka 12:42) Vannooneya wiira Yehova onnireeliha muteko alopwana awo anivara aya. (Yes. 65:​13, 14) Nahaakhanle atthu ootthokiheya, khinaarowa owerya ovara muteko Yesu onirumme awe. (Math. 28:​19, 20) Mwa ntakiheryo, nkuupuwelani sahaakhanle mittetthe nithanleliwe ahu wiira nilaleeryeke. Khula mutthu aarowa olaleeryaka opuro oniphavela awe. Nave mittetthe sikina, saamulaleeriwaka vanceene ovikana sikina. Niireke munnuupuwela mareeliho nimphwanya ahu mwaha wookhala atthu ootthokiheya? Okathi aari awe valaponi, Yesu aahaatthokiha atthareli awe nave mpakha olelo-va, owo onipaka eyo. w24.04 8-9 itti. 2-4

Kayini aari mwaana oopacerya oyariwa a Adamu ni Eva. Owo aahiravihiwa etampi ni anamuyari awe. Nave Biibiliya onnimuhimya Kayini oriki: “Miteko sawe saari sootakhala.” (1 Yoh. 3:12) Woonasa wene, ti nthowa naya Yehova ‘ahasiveliwawe ni Kayini ni sovaha sawe’, okathi Kayini owo anvahale awe mukuttho. Ohiya oturuka mukhalelo awe, “Kayini ahinanariwa vanjene: owitho wawe wahirwela mannyari.” Nto Yehova aapanke exeeni? Owo aahilavula ni Kayini. (Maph. 4:​3-7) Moone wiira Yehova aahimulavuliha saana Kayini, omuleela wiira ammureeliha akhala wiira anvaraka itthu sooreera. Nave-tho Yehova aahimulopola Kayini wiira onanariwa wawe wammwiiriha opaka itthu sootakhala. Mooriipiha murima, Kayini aahikhootta wiiwelela. Owo kheemerenrye okhaliheriwa ni Yehova wiira orukunuxe murima awe. Niireke nuumala wiiraneya etthu eyo, Yehova aahihiya weererya waakhaliherya atthu akina oturuka murima aya? Nnaari! w24.08 10 etti. 8

Moise aahiwuupuxerya atthu ale wiira Yehova aamwaavaha ohoolo woororomeleya. Okhala wiira Yehova aarowa waareelihaka aisarayeli, awo yanwerya okhalaka okathi munceene elapo aaleihenrye awe. Etthaya ya elapo ele yooleiheriwa, yaari yooloka ni yooruwerya! Moise olavulaka sa elapo eyo, aahimmye so: “Apwiya yaawo animooroihani ipooma sooreera ni suulupale sahaatakale-anyu, ni ipa soosareya mihakhu sinciene sahuukenle-anyu, ni ihime sahaathinpe-anyu ni imatta sa miri sahaaphatteiye-anyu.” (Otum. 6:​10, 11, Piipiliya Emakhuwa.) Nave-tho Moise aahaalopola aisarayeli. Owo aalenle wiira vakhala wiira yaaniphavela ovikaniha okhala elapo ele yooleiheriwa, yaahaana ohihiya omwiiwelela Yehova. Moise aahaatthokiherya efaita erina aya “othanla ekumi”, eyo piiyo, yiiwelelaka moolumo a Yehova ni otthara yaawo. (Otum. 30:20) Masi aisarayeli khiyaaphavenle omwiiwelela Yehova. Mwaha waivaavo, Yehova aaheemererya wiira aSiria ni aBabilonia, akuxe elapo ele ni waakhaliha ipottha. — 2 Mam. 17:​6-8, 13, 14; 2 Wah. 36:​15-17, 20. w24.11 9 itti. 5-6

Olelo-va, atthu anceene anihimya wiira annimukupali Yesu ni annimuthokorerya ntoko moopoli aya. (Yoh. 6:29) Yaahikhala atthu anceene oGalileya yaawo yaamwaamini Yesu, masi muhoolo mwaya yaahihiya omutthara. Mwaha wa xeeni? Atthu anceene a muttitthi ole, yaamutthara Yesu mwaha woowi aanaavaha itthu yaaphavela aya. Awo yaaphavela wiira openuxeke iretta saya, aavaheke eyoolya ni olavuleke itthu saasivela owiriyana. Yesu aahooniherya wiira khaarwiiye valaponi wiira aavaheke itthu yaapirisari aya. Moovirikana ni vo, owo aarwenle owiixuttiha etthu yaareerela aya opaka wiira akhale atthareli awe a ekeekhai. Awo yaahaana “orwa wa” yena aahiiso owiriyana ni weettela itthu sootheene iixuttiha awe. — Yoh. 5:40. w24.12 12 itti. 12-13

Exeeni enrowa omukhaliherya mulopwana, ohiya opaka itthu sihinimusivela mwaarawe? Enamuna emosa, ori wiimananiha omutakiha Yesu. Masi enamuna aathokorerya awe awiixutti awe, ntakiheryo nooloka mulopwana oothela onireerela awe otthara. Nrowe niwehe ele mulopwana oothela, oniixutta awe ni enamuna Yesu aathokorerya awe ni moota aalavula awe ni awiixutti awe. Okathi wootheene, Yesu aanaaphenta ni waattittimiha awiixutti awe. Owo khotonko waathokorerya mwa enamuna yoohiloka. Nnaamwi aarina owerya waavikana awo, owo khaarumenle owerya wawe wiira owoopopihe. Hata vari siiso, moowiiyeviha aanaavarela miteko awiixutti awe. (Yoh. 13:​12-17) Ekwaha emosa, Yesu aahimmye so: “Mwiixutteke ni miyo, okhala wiira miyo ka mutthu oomaala ni oowiiyeviha. Mwiira siiso, eyo enimoolipihani.” (Math. 11:​28-30) Nwehe wiira Yesu aari mutthu oomaala. Mutthu oomaala khahiyo oolosowa, moovirikana ni vo, owo toolipa ni onniwerya wiihiiha. Hata okathi onipaciwa awe, mutthu oomaala onnivikaniha okhala oomaaleleya ni oowiihiiha ni miyuupuwelo soohiloka. w25.01 10 itti. 10-11

Vaavo olumwenku ola onaattamela aya wanikisa, makhalelo anrowa otepaka oxankiha. Mixankiho sinrowa otepaka okhumelela, mwaha wa ohiiwanana wa anapoliitika, ikhotto, ihasara sa ephattu ni iretta. Nto wiira nihihiye okhapelela emusi ahu, exeeni enrowa onikhaliherya opaka soothanla sinooniherya wiira ninnimuroromela Yehova? Etthu yoopacerya munireerela anyu opaka, ori omuroromela Yehova ni omuleela khula etthu enooxankihani. Munvekeleke Yehova ankhili wiira mpake soothanla sooloka ni wiira ookhaliheryeni okhala oomaaleleya musyakaka “oxanka vanceene.” (Luka 12:​29-31) Muhihiye onvekela Yehova wiira ookhaliheryekeni ohakalala ni itthu murina anyu. (1 Tim. 6:​7, 8) Mutokoseke iliivuru sahu sinimutthokiherya Biibiliya, seiyo sinilavula sa moota woovilela mixankiho wa othowa musurukhu. Atthu anceene, anihimya wiira sihaakhaliherya vanceene iviidiyu ni myaha siri esaiti jw.org, sinilavula sa moota woovilela muxankiho wa othowa musurukhu. w25.03 28-29 itti. 10-11

Waahiphiya okathi wiira ale yahaakhanle ayuda, yiireleke mpantta emusi ya Muluku. Yehova aahimuruma Pedru orowa omulaleerya Korneelio wiira okhale mukristau, nnaamwi ahaakhanle muyuda. Ayuda yaanaathanya ale yahaakhanle ayuda. Nto Pedru aanipirisari oturuka enamuna uupuwela awe. Nuumala Yehova omukhaliherya Pedru osuwela ele aaphavela awe, Pedru aahituruka moota aawoonela awe ale yahaakhanle ayuda ni aahirowa omuxukurya Korneelio ohihoveryaka etthu. (Mit. 10:​28, 29) Moohakalaliha, Pedru aahirowa omulaleerya Korneelio ni atthu ootheene a vatthokoni vawe, nto ootheene aya yaahipatisiwa. (Mit. 10:​21-23, 34, 35, 44-48) Nuuvira iyaakha, Pedru aahaatumererya makristau okhala atthu ‘oowiiwanana’, aahiiso okhalana muupuwelo mmosa-ru. (1 Ped. 3:8) Hiyo nnoowerya okhalana muupuwelo mmosa-ru ni anna ni arokora, akhala wiira nnookhalana muupuwelo wa Yehova yoowo nniixutta ahu mbiibiliyani. w25.03 9-10 itti. 7-8

Enamuna atthu anuupuwela aya, enootepa ovirikana ni moota Yehova onuupuwela awe. (Mir. 17:15) Tivonto vari aya va miruku osuwela ni osyaka miyuupuwelo iyo soohiloka. Niheemererye nnakhala namavirikanya mmosa onikhulumulaka aahiiso onihiihaka omurumeela Yehova. Murummwa Paulo aahaatumererya makristau aheeperi wiira yaahana okhalana waamini woolipa, nave-tho hiyo nihaana otthara miruku iyo. Nihaana omuleeri Biibiliya ni ephoole wiira nimusuwele oratteene Yehova ni moota onuupuwela awe. Nto nihaana wiimananiha opaka eyo hata nuumala wiivahererya ni opatisiwa. Moohicikha okathi nivirinhe ahu nimurumeelaka Yehova, nihaana osoma ni wiiwexexa Nuulumo na Muluku khula nihiku. (Esal. 1:2) Akhala wiira nnoopakaka yoosoma ahu ya Biibiliya khula nihiku, eyo enoonikhaliherya olipiha mukhalelo murummwa Paulo aalepenle awe makristau aheeberi, eyo piiyo, waamini. — Ahep. 11:​1, 6. w24.09 10 itti. 7-8

Vakhala wiira nnoomoona Yehova okhala mpatthani ahu eekeekhai, vanookhweya omuroromela. Tthiri eyo ti etthu yiiraneyale ni Yosefe. Owo aanisuwela wiira ammuriipiha murima Yehova vakhala wiira aamurupihana voohiloka. Nto ti nthowa naya owo aakhontte awe moomalela. (Maph. 39:9) Wiira niwerye omoona Yehova ntoko mpatthani ahu eekeekhai, nihaana oviriha okathi munceene nivaanelaka ni yena ni osoma Nuulumo nawe. Niira siiso, waataana wahu ni yena, onrowa otepaka olipa khula nihiku. Ntoko Yosefe, nakhalana ompatthani woolipa ni Yehova, hiyo khaninrowa opaka etthu enrowa omuriipiha murima. Ale aniliyala wiira Yehova Muluku mukumi, pooti okhala vookhweya ohiya omurumeela yena. Nrowe nithokorerye etthu yaawiiranenle aisarayeli okathi yaari aya moothakoni. Awo yaanisuwela wiira Yehova Muluku a ekeekhai, masi ikwaha sikina yaanipacerya waanyiherya akhala wiira amwaakhapelelaka. (Okhu. 17:​2, 7) Mwaha waivaavo, awo yaahimurukunuwela Muluku. Hiyo khanimphavela opaka etthu emosa-ru yaapanke aya atthu awo. Hiyo nimphavela okhala atthu oowiiwelela. — aHep. 3:12 w24.06 24 itti. 14-15

Wanikisa wa olumwenku ola wootakhala ori vakhiviru, nto ninnilipelela wuncerereya mixankiho seiyo sinniiriha woona owereya ni wunla. Yehova onniniweha okathi nninla ahu ni onniriipiwa murima. Owo onniniphenta mwaha woohihiya ororomeleya wa yena nnaamwi ikwaha sikina siniphwanyaka mixankiho sinniiriha wunla. Vaavo sinniphwanya aya mixankiho, nihaana omuleela Yehova. Nihiivalaanyeke ni anna ni arokora a mmulokoni. Nave nihihiye omusoma Biibiliya wiira niphwanye nimaaliho na Yehova. Nikupaliki wiira naahihiye omurumeela Yehova moororomeleya, owo onoonireeliha. Mareeliho awo, anihela muhina yooleiherya ya Yehova yoowi muhoolo, owo onoopuputtha maithori ahu ootheene yaawo nninla ahu mwaha wooriipiwa murima, wiireliwa etthu yoohiloka nuule namphenta ahu ni mwaha woohoona etthu yoopaka okathi ninwereiwa ahu. (Wis. 21:4) Nto okathi owo ninrowa omoroxaka maithori mwaha wa ohakalala. w24.12 20 etti. 3; 25 etti. 19

Yehova oonithanla wiira nikhale Anamoona awe, ni oonileiherya wiira onoonivaha olipa murima. (Yes. 43:​10, 11) Nnoothokorerye iponto 4 sa moota Yehova onnikhaliherya awe mwa enamuna eyo. Yoopacerya, Yesu onikhala ni hiyo okathi ninlaleerya ahu ihapari sooreera. (Math. 28:​18-20) Ya nenli, Yehova onniruma malaikha wiira anikhaliherye okathi ninvara ahu muteko woolaleerya. (Wis. 14:6) Ya neeraru, Yehova onninivaha ikuru sawe soowaarya wiira sinikhaliheryeke wuupuwelela itthu niixuntte ahu. (Yoh. 14:​25, 26) Ya neexexe, nookhalana anna ni arokora annikhaliherya okathi woolaleerya. Nikhaliheriwaka ni Yehova vamosa ni anna ni arokora, hiyo nookhalana itthu sinceene nimpirisari ahu wiira nikhale oolipa murima ni ohihiya olaleerya. Masi akhala wiira munnikhulumuwa okathi munaaphwanya anyu atthu vakhaani aahiiso muhinaaphwanya anyu mmawaani, mwiikoheke so: ‘Atthu a muttetthe aka okathi ola ari woowi?’ (Mit. 16:13) ‘Kiireke anivara muteko aahiiso aronwe omerkaatu?’ Vakhala wiira eyo enimwiiraneya, niireke mwanwerya olaleerya mapuro oowaatta atthu? w24.04 17 itti. 10-11

Akhala wiira moothela ni munniphavela okhala mutokweene, atthu a vatthokoni vanyu, ahaana okhalana mweettelo wooloka. Nto muhaana osuwela ‘weettiha saana etthoko anyu’. Eyo enitaphulela wiira, muhaana osuweliwa ntoko muhooleli oophenta ni onipaka soothanla sooloka para emusi awe. Eyo enihela muhina, ohoolela omulompa Muluku vatthokoni, okhaliherya emusi awe orowela mithukumano ni olaleerya. Akhala wiira mwa paapa, aniinyu ahaana okhala owiiwelela ni arina mweettelo wooloka. (1 Tim. 3:4) Muhaana owiixuttiha ni waavaha malakiheryo mwa niphento. Ekeekhai wiira muniphavela wiira aniinyu ahakalaleke ni atthekuleke ntoko anamwane akina. Masi wiimananiha wanyu owiixuttiha, onimwaakhaliherya okhala owiiwelela, oottittimiha ni okhalana mweettelo wooloka. Ohiya-vo, muhaana wiimananiha vanceene waakhaliherya okhalana waataana wooloka ni Yehova, weettela malakiheryo a mbiibiliyani ni okela vahoolo mpakha opatisiwa. w24.11 22 itti. 10-11

Vaavo nintepa ahu oluttuweliwa muteko woolaleerya, ninrowa otepaka onweha Yehova onikhaliheryaka, ni omuroromela wahu onrowa wuncerereyaka. (1 Akor. 3:9) Muhiliyale wiira Yehova khonlikanyiha muteko muninvarela anyu ni wa atthu akina. Owo onnixukhurela ophenta munimooniherya anyu. Yehova onnihakalala okathi oniweha awe oxukhurela wanyu ni murima anyu wootheene yoovaha ela yooreera, eyo piiyo, yoowoopola. (1 Sam. 16:7; Mar. 12:​41-44) Mwaha woovahiwa yoowoopola, vanniweryaneya oleveleliwa itampi sahu, okhalana ompatthani wooloka ni Yehova ni olipelela okumi woohimala. Tivonto, khula okathi nimuxukhureleke Yehova mwaha wa niphento onoonihenrye awe nenlo nimwiirinhe onivaha mareeliho awo ootheene. (1 Yoh. 4:19) Nave-tho, nimuxukhureleke Yesu yoowo olenve okumi awe mmureerelo ahu! w25.01 31 itti. 16-18

Nkahaya muupuwele moonelo wa mulipa-oolepa Esaalimu 73. Owo aaniweha wiira atthu yahaamurumeela Yehova yaanikhalana okumi wooloka, musurukhu munceene ni khiyaaxankiheya ni khula etthu. (Esal. 73:​3-5, 12) Okathi aaweha awe atthu ale akhumelaka saana, owo uupuwela wiira wiimananiha wawe omurumeela Yehova, khiwamphwanyiha mureerelo. Mwaha wa miyuupuwelo iyo, owo aanikhulumuwa “nihiku nootheene.” (Esal. 73:​13, 14) Exeeni aapanke awe wiira omala-malihe miyuupuwelo iyo soohiloka? Nasaalimu ole, aahikela empa yoowaarya ya Yehova. (Esal. 73:​16-18) Ori ene opuro ole woomaaleleya, owo aahiwerya wuupuwela oratteene. Owo ahuupuwela wiira nnaamwi atthu ale vaakhala ntoko wiira arina okumi wooloka okathi ole, masi awo khiyaarina nlipelelo na muhoolo. Nto wuupuwelela eyo, yaahimphwanyiha murettele ni aahoona wiira omuhela Yehova nipuro noopacerya, yaari yoothanla yootepexa oloka aapanke awe. Okhala wiira aahuupuwelela oratteene mwaha ole, aahilakela ohihiya omurumeela Yehova. — Esal. 73:​23-28. w24.10 27 itti. 11-12

Yehova oonithanla wiira nikhale anamoona awe. (Yes. 43:​10-12) Iyaakha vakhaani sivinre, ekarta ya Nikhuuru Noolamulela yaahimmye so: “Eparakha yuulupale khula mmosa a hiyo onireerela awe okhalana, ori wiitthaniwa okhala Namoona a Yehova”. Masi mwaha wa xeeni? Nkuupuwelani mootheriwe ene opaka etthu yoohiloka. Vano munamphavelasa mutthu wiira owaakiheni ni aasuwelihe atthu akina wiira murimootheriwa ni wiira nyuwo mwa mutthu ooloka ni khamutonko opaka eyo. Tani mwaarowa anyu omuthanla wiira owaakiheni? Moohaanyiherya, mwaarowa omuthanla mutthu munimusuwela anyu, oororomeleya, orina mikhalelo sooloka ni okhanle ookupaliwa ni atthu akina. Mwaha woonithanla okhala Anamoona awe, Yehova onooniherya wiira onninsuwela oratteene ni onniniroromela waaleela atthu akina wiira yena paahi tori Muluku eekeekhai. Hiyo ninnixukhurela vanceene eparakha eyo ya wiihaneliwa okhala Anamoona awe nave nihaana orumeela wiira naasuwelihe atthu akina nsina nawe ni wiira itthu onihimyaniwa awe ni Satana khahiyo sa ekeekhai. Mwa enamuna eyo, ninnooniherya wiira ninkhala moovarihana ni nsina nahu, noowi Anamoona a Yehova! — Arom. 10:​13-15. w24.05 18 etti. 13

Ohiya paahi wiixuttiha, Yesu aahikhaliherya muttitthi ole mwa enamuna ekina. Enamuna xeeni ekina Yesu aakhalihenrye awe? Mwa miiriirya, Yesu aahikuxa iphaawu 5 ni ihopa piili ni owiirela awiixutti awe wiira akawele muttitthi ole. (Mar. 6:41) Mwa enamuna eyo, Yesu aahiwiixuttiha atthareli awe waarumeela atthu akina. Nave aahiwooniherya efaita erina aya waakhaliherya atthu akina ni miteko. Muupuwele moota arummwa ale yaahakalanle aya mwaha wa omukhaliherya okawa eyoolya ele, yeeyo atthu ‘ootheene yaalyiiye aya mpakha ovona’! (Mar. 6:42) Ela khahiyo yaari ekwaha yoopacerya Yesu aapwenhe awe nipuro noopacerya soophavela sa atthu akina. Okathi wootheene Yesu aari awe valaponi, aanipaka eyo. (Math. 4:23) Yesu aanihakalala vanceene okathi aawiixuttiha awe atthu akina, ni opaka itthu moowiiyeviha wiira aakhaliherye. w24.11 16 itti. 10-11

Mwaakhaliheryeke anna ni arokora okathi wa mixankiho. Okathi anna ni arokora sinaaphwanya aya ihasara sa ephattu aahiiso ikhotto, hiyo pooti opirisariki waakhaliherya naakuxaka wiira akhaleke owannyihu. Moohaanyiherya ‘mahiku ala ookiserya’, makhalelo anootepa oxankiha, nto eyo enooniherya wiira nihaana wiimananiha waakhaliherya anna ni arokora. (2 Tim. 3:1) Ohiya paahi waavaha itthu sinaathowa, masi hiyo nihaana olipiha waamini waya ni owooniherya wiira ninnaaphenta. Enamuna emosa nikhanle ahu oopaka eyo, ori wiivaha okathi wiira nivaanele naawo okathi wa mithukumano sa Empa ya Omwene. Okathi anna ni arokora anirowela aya mithukumano, nihaana wiimananiha wiira naaphente, waalipiha ni waakhaliherya wiira akhaleke oovareleleya. Nave axitokweene, anoowerya okhala ntthyawelo na anna ni arokora yaawo sinaaphwanya mixankiho soovirikana. Okathi sinikhumelela aya ihasara sa ephattu aahiiso oretta mootutuxerya, axitokweene moowaakuveya anniimananiha opaka ele aniwerya aya wiira akhaliherye. Nave axitokweene annimurumeela Biibiliya wiira yaavahe malakiheryo anna ni arokora ni waalipiha. Anna ni arokora vanimwaakhweela onvekela nikhaliheryo mutokweene onisuweliwa okhala ooreera murima, oopatthaneya ni oniwiriyana miyoonelo saya. Axitokweene anooniherya mikhalelo iya, annaakhaliherya atthu akina woona wiira anniphentiwa. Mwa enamuna eyo, awo vannaakhweela ovarihela muteko malakiheryo a mbiibiliyani anivahiwa aya ni axitokweene. — 1 Ates. 2:​7, 8, 11. w24.06 29 itti. 12-13

Nnaamwi Muluku ori ene oowerya sootheene, nihuupuweleke wiira owo khonoona owereya! Muluku ohaapattuxa apinaatamu ailikanyihaka mwaneene. Nave okhala wiira apinaatamu annoona owereya, Yehova onnoona owereya. Omuhimyaka Muluku, Biibiliya onirumeela moolumo oowi “yaaninwereiha murima” ni “yaanimuriipiha murima.” (Esal. 78:​40, 41) Yehova aahoona owereya okathi anweha awe Mwanawe ohaaxiwaka ni atthu ootakhala mpakha wiiviwa! Yoowoopola enniixuttiha wiira Yehova onniniphenta vanceenexa, waavikana amusi ahu aahiiso mpatthani ahu. (Arom. 8:​32, 38, 39) Mweekeekhai, Yehova onniniphenta vanceenexa, ovikana moota nniiphenta ahu. Niireke munniphavela okhala mahiku ootheene? Yehova onniphavela vanceene wiira mukhaleke mahiku ootheene. Niireke munniphavela wiira muleveleliwe soottheka sanyu? Yehova onniphavela vanceene olevelela soottheka sanyu. Etthu onnivekela awe tiila: Hiyo nihaana weemererya yoowoopola, omwaamini ni omwiiwelela. Yoowoopola ennooniherya wiira Yehova onniniphenta vanceenexa. — Mus. 3:11. w25.01 22-23 itti. 8-9

Ekeekhai wiira ootheene ahu, ninnipaka soothanla nttharaka ele nnoona ahu, nniiwa ahu ni moonelo ahu. Khahiyo khula okathi itthu nniiwa ahu aahiiso nnoona ahu ti soororomeleya. Vakhala wiira nimpaka soothanla niwehaka itthu nniiwa ahu ni moonelo ahu paahi, nimmalela opaka yoothanla ehinrowa omusivela Yehova. (Mus. 11:9; Math. 24:​37-39) Masi vakhala wiira nneettihiwa ni waamini, nnoopaka soothanla “sinaasivela Apwiya”. Ohiya-vo, otthara miruku sa Muluku, sinooniphwanyiha murettele wa mmupuweleloni ni ohakalala weekeekhai. (Esal. 16:​8, 9; Yes. 48:​17, 18) Nave, naahihiye weettihiwa ni waamini, nnoophwanya okumi woohimala. (2 Akor. 4:18) Ninrowa osuwela sai vakhala wiira nneettihiwa ni waamini aahiiso ni itthu nnoona ahu? Wiira nisuwele, nihaana wiikoha so: ‘Kinuupuwela exeeni vaavo kinipaka aka soothanla? Kiireke kinuupuwela paahi itthu kinwerya aka oweha? Aahiiso kinipaka soothanla kittharaka moonelo wa Yehova? w25.03 20-21 itti. 3-4

Khula mmosa a hiyo onoowerya opaka ele oniwerya awe wiira aakhaliherye akina okela eparayiisu ya nthoonyeryo. Nnoowerya opaka eyo, nimutakihaka Yehova. Owo khonimukhanyererya mutthu wiirela mpantta mutthenkeso awe. Ohiya-vo, owo ‘onnaaruuha’ atthu ooreera murima. (Yoh. 6:44; Yer. 31:3) Nuumala wiixutta voohimya sa Yehova ni mikhalelo sawe, mutthu ooreera murima onniimananiha okhala mpatthani awe. Masi moota xeeni makhalelo ahu ni mweettelo ahu, sinrowa aya waakhaliherya atthu akina okela eparayiisu ya nthoonyeryo? Enamuna emosa ori waathokoreryaka anna ni arokora mwa niphento ni mooreera murima. Okathi mutthu onipacerya awe orowela mithukumano empa ya Omwene, nimphavela omuthokorerya ntoko yaathokoreriwa aya atthu ale yaarweela mithukumano muloko wa oKorinto. Awo yaanisiveliwa ni moota yaathokoreriwa aya mpakha ohimya so: “Mweekeekhai, Muluku ori ni nyuwo.” (1 Akor. 14:​24, 25; Zak. 8:23) Nto nihaana ohihiya otthara malakiheryo a yoolepa ya olelo. w24.04 23-24 itti. 16-17