Dezembro

Nuumala wiiwa Nuulumo na Muluku, awiixutti a Yesu yaahaamini ni weettela mookumini mwaya. (Yoh. 17:6) Masi yaahitikinihiwa nuumala onweha Yesu okhwaaka vamwirini va nihaaxeryo. Yesu aanisuwela wiira awiixutti awe yaanimwaamini ni yaanimphenta. Masi aahoona wiira etthu yaahalela, waari wiiwexexa soolempwa. (Luka 9:​44, 45; Yoh. 20:9) Nto owo aahaakhaliherya wiiwexexa ele soolempwa sinihimya aya. Nwehe wiira Yesu, khaisuwanyeihale okathi aakhumelenle awe awiixutti anli yaarowa muttetthe wa Emawuusi. Ohiya-vo, owo aapakenle makoho. Mwaha wa xeeni? Woonasa wene, Yesu aaphavela osuwela etthu yuupuwela aya ni ele yaari vamurimani vaya. Nto yaahipaka eyo. Awo yaamulenle wiira yuupuwela wiira Yesu aarowa okhala Mwene ni anwoopola mmatatani mwa aroma. (Luka 24:​18-27) Yesu aahirumeela soolempwa wiira aakhaliherye alopwana ale wiiwexexa ele yiiraneyale. Nuuvira okathi, Yesu aahaakhumelela awiixutti akina ohiyu onaatthokiherya iprofesia saamuhimya yena. — Luka 24:​33-48. w24.10 14 itti. 9-10

Yesu ohiixuttihiwa ni Tiithi awe a wiirimu, etthu yoopaka ni yoohimya. Ottharaka ntakiheryo na Yesu, mutthenkeso wa Yehova onnimurumeela Biibiliya wiira oniixuttihe etthu eri yooloka ni yoohiloka. Nave, onniniixuttiha okhala moovarihana ni ele Yehova oniphavela awe. (2 Tim. 3:​16, 17) Mutthenkeso wa Yehova, khula okathi onninuupuxerya omusoma Biibiliya ni weettela ele eniixutta ahu. Ninnittottela mureerelo okathi nimmusoma ahu Biibiliya, nirumeelaka iliivuru sinimutthokiherya. Mwa ntakiheryo, hiyo pooti olikanyiha ele ninsoma ahu mbiibiliyani ni malakiheryo ninvahiwa ahu mmutthenkesoni. Nave, ororomela wahu mutthenkeso wa Yehova, onnincerereya okathi ninweha ahu wiira malakiheryo awo anikhuma mbiibiliyani. (Arom. 12:2) Yesu aanilaleya “ihapari sooreera sa Omwene wa Muluku”. (Luka 4:​43, 44) Ohiya-vo, Yesu aahaaruma awiixutti awe wiira yaahaana olaleya ihapari sooreera sa Omwene. (Luka 9:​1, 2; 10:​8, 9) Ootheene ale anitthara malakiheryo a Yehova olelo-va, annilaleya ihapari sa Omwene, moohicikha mapuro anikhala aya. w24.04 9 itti. 5-7

Muroromeleke malakiheryo a mutthenkeso wa Yehova. Khalai, Yehova aahimurumeela Moise nuumala-vo Yoxuwa, wiira yaavaheke malakiheryo arumeyi awe. (Yox. 1:​16, 17) Aisarayeli yaaniphwanya mareeliho, okathi yaathokorerya aya alopwana awo, ntoko atthu yaathanliwe ni Yehova. Nuuvira iyaakha sinceene, vaavo waapakiwa aya muloko wa ekristau, arumeyi a Yehova yaavahiwa malakiheryo ni arummwa 12. (Mit. 8:​14, 15) Moottharelana, ekurupu eyo yaahinnuwa, nto yaanihela muhina axitokweene akina a oYerusalemu. Vaavo atthu yaatthara aya malakiheryo yaavahiwa aya ni alopwana awo oowaamini, “atthu a mmulokoni yaanitepa olipihiwa waamini waya, nave khula nihiku atthu yaanincerereya”. (Mit. 16:​4, 5) Nave-tho olelo-va, ninniphwanya mareeliho, vaavo nintthara ahu malakiheryo ninvahiwa ahu ni mutthenkeso wa Yehova. w24.07 10 etti. 10

Yehova aanimphenta vanceene mwene Davidi. Owo aahimuhimya Davidi okhala mulopwana onihakalaliha murima aka. Masi Davidi aahipaka itampi suulupale, ohela muhina oraruwa ni wiiva. Moovarihana ni Nlamulo na Moise, Davidi aaniphwanela wiiviwa. (Onam. 20:10; Mmr. 35:31) Masi Yehova aaniphavela omukhaliherya Davidi wiira orukunuxe murima. Owo aahimuruma profeta awe Natani wiira orowe okumana ni mwene owo, nnaamwi Davidi ahoonihenrye nnakhala vakhaani wiira aaniphavela orukunuxa murima. Natani aahirumeela nlikanyiho wiira omukhaliherye Davidi woona wiira aahipaka itampi suulupale. Vano Davidi aahoona wiira aahimuriipiha murima vanceene Yehova. Nto aahirukunuxa murima. (2 Sam. 12:​1-14) Owo oolepa esaalimu enooniherya moota aariipiwe awe murima mwaha wa etthu aapanke awe. (Esal. 51, muru) Okathi atthu anceene apanke etampi anisoma aya esaalimu ela, anniphwanya nimaaliho ni annirukunuxa murima. Niireke khannihakalala woona wiira Yehova aanimphenta murumeyi awe Davidi ni aahimukhaliherya ottharuwa? w24.08 10 etti. 9

Atthu anceene, anihimya wiira okhala paapa aahiiso maama, muteko muulupale. Akhala wiira mwa namuyari, ninnoottottopelani mwaha wa ovara muteko muulupale wiira mwaakhaliherye aniinyu olipiha waamini waya. (Otum. 6:​6, 7) Vaavo mwaninyu oninnuwa awe, pooti opacerya wookohani voohimya sa sookupali sahu ohela muhina malamulo a mbiibiliyani. Wanipacerya, makoho a mwaninyu pooti wooxankihani. Pooti wuupuwelaka wiira mwaana owo onipaka makoho awo mwaha woowi khonimukupali Muluku ni Biibiliya. Masi okathi anamwane aninnuwa aya, ahaana opaka makoho wiira alipihe waamini waya. (1 Akor. 13:11) Tivonto, muhixankeke. Vaavo mwaninyu onookohaaweni, murumeeleke okathi owo wiira mmukhaliherye olipiha omwaamini wawe Muluku ni Biibiliya. w24.12 14 itti. 1-2

Makristau yaanipirisari okhalana waamini woolipa, maana opaka eyo yaamwaakhaliherya ovilela okathi oYudeya saarowa aya opacerya mixankiho. (Ahep. 10:​37,38) Yesu aahaalopola awiixutti awe wiira nuumala oweha oYerusalemu orukureriwe ene ni anakhotto, awo yaahaana otthyawela omiyaakoni. Makristau yaakhala epooma ele ya oYerusalemu ni ale yaakhala oYudeya, yaahaana wiiwelela miruku iye. (Luka 21:​20-24) Okathi ole, vaavo anakhotto yaawoopopiha aya waatuphela atthu, ale yaakhala ota yaanitthyawela muhina mwa epooma ele, okhala wiira ixiri saya saari soovareleleya. Nto miruku iye sa otthyawela omiyaakoni, saakhala ntoko wiira khisaavareleya muteko. Tivonto, vaanipirisari okhalana waamini woolipa. makristau aheeperi yaanipirisari waaroromela ale Yesu aathanlalya awe, wiira avaheke malakiheryo mmulokoni. Woonasa wene, ale yaahoolela miloko yaahivaha malakiheryo ookhalela a moota wootthyawa ni okathi wootthyawa. — Ahep. 13:17. w24.09 10 itti. 9-10

Okathi aari awe valaponi, Yesu aahivara oratteene muteko Tiithi awe aamurumme awe. (Yoh. 17:4) Yesu khuupuwela wiira yena paahi taawerya ovara muteko wa Yehova. Owo aahiwiixuttiha atthu akina ovara saana muteko ole. Yesu aanaaroromela awiixutti awe. Owo aahaavaha muritti wa olaleya ihapari sooreera ni waakhapelela arumeyi a Muluku. Yesu aahaavaha miruku awiixutti awe masi mwa enamuna yoophenta. Awiixutti awe akina, khiyaakupali wiira yena aahikhwa ni ohihimuxiwa. Tivonto, aakhalihenrye awe osuwela ekeekhai aavahaka miruku. (Luka 24:​25-27; Yoh. 20:27) Owo aahaaleela wiira yaahaana okhalela nthiti waakhapelela arumeyi a Muluku, ohiya wiithukumanyerya mihakhu. (Yoh. 21:15) Owo aahiwuupuxerya wiira ahiilikanyiheke ni atthu akina. (Yoh. 21:​20-22) Aahaakhaliherya oturuka moonelo woohiloka yaarina aya voohimya sa Omwene, ni wiira yaahaana oluttuweliwa olaleya ihapari sooreera. — Mit. 1:​6-8. w24.10 15-16 itti. 13-14

Wiiwelela onnoopola okumi. Ntoko siisaale aisarayeli yaahanle aya okela Elapo Yooleiheriwa, nave-tho hiyo nihanle vakhaani okela elapo Tiithi ahu oleihenrye awe, eyo piiyo, mparayiisu. (Yes. 35:1; Luka 23:43) Satana ni malaikha awe khanrowa-tho waahapuxaka atthu muhoolo. (Wis. 20:​2, 3) Khenrowa-tho okhala etiini yoowootha ni atthu khanrowa-tho owokiwaka. (Wis. 17:16) Ikuvernu sa apinaatamu, khasinrowa-tho waahaaxaka atthu. (Wis. 19:​19, 20) Yehova khonrowa weemererya wiira atakhali akele mparayiisu. (Esal. 37:​10, 11) Atthu ootheene, anrowa wiiwelelaka malamulo a xariya a Yehova, nave eyo enoorowa okumiherya murettele. Ohiya-vo, atthu anrowa ororomelanaka mukina ni mukhwaawe. (Yes. 11:9) Tthiri, ninnilipelela okathi itthu iyo sootheene sinrowa aya wiiraneya! Navikaniha omwiiwelela Yehova, nnookhalana eparakha ya okhala mparayiisu, ohiya iyaakha vakhaani paahi, masi mahiku ootheene. — Yoh. 3:16. w24.11 9 itti. 7

Olelo-va, eprofesia ela ennitepa wiiraneya ovikana khalai. Ihapari sooreera sa Omwene, sinnilaleiwa mattaava anivikana 1 000, nave atthu anceene anikhala valaponi, anoowerya wiixutta voohimya sa Omwene wa Muluku, arumeelaka esaiti jw.org. Masi Yesu aahaaleela awiixutti awe wiira khiyaarowa omaliha “weetta mittetthe sootheene”, aahiiso khiyaarowa owerya omulaleerya khula mutthu, nihinatthi ophiya nihiku noophukela. (Math. 10:23; 25:​31-33) Nave-tho masu ala a Yesu, annivareleya muteko mahiku ahu ala. Imilyau sinceene sa atthu, anikhala mapuro yaale nihinwerya ahu olaleerya mootaphuwa. Ohiya-vo, khula minuutu aniyariwa anamwane. Masi hata vari siiso, hiyo ninnipaka ele eniwerya ahu wiira naalaleerye ihapari sooreera “atthu anikhala mulaponi, atthu a maloko ootheene, a mahimo ootheene”. (Wis. 14:6) Ekeekhai ti yoowi, khaninrowa owerya waalaleerya atthu ootheene, wanikisa ohinatthi ophiya. w24.05 10 itti. 6-7

Okathi aalavula awe, Yesu aanaamaaliha ni waalipiha ale yanwiriyana. Owo khaapwapwela ale yaamutthara. (Luka 8:​47, 48) Tthiri nla ntakiheryo nooloka alopwana makristau anireerela aya otthara! Yesu aahimmye wiira alopwana, yaahaana ovikaniha okhala oororomeleya ni mwaaraya. Owo aahirumeela moolumo a Tiithi awe, vaavo aahimmye awe wiira mulopwana “okhaleke ni mwaarawe”. (Math. 19:​4-6) Nuulumo na ekereku nitaphuleliwe va noowi “okhaleke”, nintaphulela ‘okhala erutthu emosa-ru aahiiso okolarana’. Eyo enooniherya wiira ophenta mulopwana ni mwaarawe akhanle aya oowooniheryana, ohaana okhala woolipa, vanakhala ntoko arookolarana. Vakhala wiira mutthu mmosa onoopaka etthu enrowa omukumiherya muxankiho mukhwaawe, oowanli aya annihaawa. Mulopwana onimphenta mwaarawe, onoorowa osyaka inamuna sootheene sa epornokrafia. Vakhala wiira enookhumelela etthu yoohiloka, moowaakuveya owo onoorowa ‘osyaka oweha itthu sihirina efaita’. (Esal. 119:37) Ntoko Yoobi, mulopwana oothela, ohaana olakela vamurimani vawe, ohinwehexexa muthiyana mukina ni muupuwelo woohikhalela. — Yoobi 31:1. w25.01 10 itti. 12-13

Olevelela, pooti okhala muxankiho para apinaatamu. Enamuna Yehova onnilevelela awe, ti yoovirikana ni moota hiyo nnaalevelela ahu atthu akina. Khuuvo mutthu mukina oniwerya olevelela ntoko Yehova. Nasaalimu aahimmye wiira Yehova ‘onnaalevelela atthu ni murima wootheene, wiira ottittimihiweke’. (Esal. 130:4) Ekeekhai ti yoowi, Yehova ‘onnilevelela ni murima wootheene’. Yehova paahi tonisuwela ele enitaphulela aya okhala mutthu oolevelela. Aphavelaka wooniherya moota Yehova onilevelela awe, alipa-oomulepa Biibiliya yaanirumeela nuulumo nimosa na eheeperi naavirikana ni nle yaarumeela aya ahimyaka olevelela wa apinaatamu. Vaavo Yehova onimulevelela awe mutthu, owo onnittipiha etampi ya mutthu owo. Siiso, mutthu owo onoowerya otthikela okhalana waataana wooloka ni Yehova. Ninnimuxukhurela vanceene Yehova mwaha wa onilevelelaka mwa enamuna ela. w25.02 8 itti. 1-3

Etthu eniiriha muteko ahu woolaleerya okhumela saana, khahiyo atthu awo owiriyana aahiiso nnaari. Mwaha wa xeeni? Mwaha woowi, hiyo nimpaka ele Yehova ni Mwanawe Yesu anirumme aya wiira nipakeke, ori olaleerya. Hata nihaaphwanyaka atthu oovaanelana aahiiso akhoottaka ele enihimya ahu, hiyo ninnihakalala okhala wiira ninnisuwela wiira nimmuhakalaliha Tiithi ihu a wiirimu. (Mir. 27:11) Ninnihakalala vanceene vaavo munna onimphwanya awe mutthu onisiveliwa ekeekhai okathi woolaleerya. Erevista ya Owehaweha yoolikanyiha muteko woolaleerya ni muteko wa omphavelasa mwaana orimenle. Nave atthu anceene, anniirela mpantta muteko owo wa omphavelasa mwaana mapuro oovirikana. Nuumala mwaana owo ophwanyiwa, atthu ootheene annihakalala ohiya paahi ole omphwanye. Moolikanasa, atthu ootheene a mmulokoni annikhaliherya muteko owo woolaleerya ni owerya omaliha muttetthe athanleliwe aya. Nave vaavo mutthu onipacerya awe orowela mithukumano, atthu ootheene annihakalala. w24.04 18 itti. 13-14

Ninnihakalala vanceene okathi nnuupuwela ahu itthu sinrowa wiiraneya muhoolo! Nikhaliheriwaka ni Yehova, ninlipelela wiira atthu anceene yiixutte ekeekhai ahinatthi opacerya maxakha maalupale. Nave, ninnihakalala osuwela wiira hata okathi wa maxakha maalupale, woonasa wene atthu anceene pooti othanla okhuma olumwenku ola wa Satana ni waataana ni hiyo, wiira ninvuwiheke Yehova! Nilipelelaka ophiya okathi owo, nookhalana muteko munceene ninreerela ahu ovara. Nookhalana eparakha ya ovara muteko ohinrowa otthikeliwa-tho, okhanle olaleya ihapari sooreera sa Omwene wa Muluku elapo yootheene. Nave nihihiye waalopola atthu akina mwaha wa itthu sinrowa wiiraneya muhoolo. Awo ahaana osuwela wiira moohipisa makhalelo a olumwenku ola anoomala. Nihihiye olaleerya mwaha wa ophenta, eyo piiyo, ophenta ihapari sooreera, waaphenta atthu ni etthu yootepexa okhalana efaita, omphenta Yehova ni nsina nawe. Tivonto, nihihiye okhalela nthiti muteko woolaleerya mpakha Yehova ohimya wiira: “Vaaphiyerya!” w24.05 19 itti. 14-16

Ohiyu ole aarowa awe wiiviwa, Yesu aahimwiixuttiha Pedru ni arummwa akina, efaita erina aya wiiyeviha. Arummwa ale, yaahitikinihiwa vanceene okhala wiira muteko ole wa orapiha inawu, okhala wene, waavariwa ni ipottha. Biibiliya onihimya wiira Yesu aahirula nlaya nawe, aahikuxa etuwalya otthukwelela muyuununi mwawe, aahiitthela maasi mpasiyani ni onapacerya orapiha inawu sa awiixutti awe. (Yoh. 13:​4, 5) Yesu aahirapiha inawu sa arummwa awe 12, omuhela muhina Yuda, yoowo muhoolo mwaya anvarinhe. Woonasa wene, waahivira okathi munceene Yesu ovaraka muteko ole, masi moowiiyeviha owo aahimaliha. Nuumala-vo, moopixa murima Yesu aahaatthokiherya oriki: “Nyuwo munnisuwela etthu ewiirenlyaakani? Nyuwo munnikihimya okhala ‘Mwiixuttihi’ ni ‘Pwiya’, nto enihimya anyu ekeekhai. Tthiri miyo ka Mwiixuttihi ni Pwiya. Tivonto, akhala wiira miyo, kiri Pwiya ni Mwiixuttihi, koorapiha inawu sanyu, nyuwo-tho muhaana orapihanaka inawu”. — Yoh. 13:​12-14. w25.03 10 itti. 9-11

Khivanikhweya ovikaniha omwaattamela Yehova olumwenku ola wootakhala ninkhala ahu. Atthu anceene khanikupali wiira Muluku ookhala. Nave ikwaha sikina, vanikhala wiira ale ahinimurumeela Yehova, annipuha. Vaavo itthu iyo siniiraneya aya, waamini wahu pooti opaceryaka ovukuwa. Ekeekhai wiira hiyo pooti ohuupuwela wiira Muluku khokhanle, masi pooti opaceryaka waanyiherya vakhala wiira onninikhaliherya. Mulipa-oolepa Esaalimu 73, aahikhalana moonelo mmosa-ru. Nto atthu yaattamanne awe, yaanikhootta wiiwelela malamulo a Muluku nave yaakhala moovarihana ni soophavela saya. Mwaha waivaavo, owo aahipacerya waanyiherya vakhala wiira vaari va faita omurumeela Muluku. (Esal. 73:​11-13) Exeeni yaamukhalihenrye nasaalimu oturuka moonelo awe? Owo uupuwelela etthu yaarowa owiiraneela ale yaarowa ohiya omurumeela Yehova. (Esal. 73:​18, 19, 27) Nave aanuupuwelela mareeliho anikhumelela mwaha woomurumeela Muluku. Nto hiyo nihaana wuupuwelelaka mareeliho ootheene Yehova onivaha awe. w24.06 25 itti. 16-17

Okathi wa khalai, atthu akina yaanaakophiha musurukhu aya anna yaari oohaawa wiira atthu awo eliveke musurukhu munceene anna ale yahaawerya aya. Nave makhulupale makina yaaneemererya okunyariwa wiira ephukeke milattu moohixariya. Masi Yehova onnaanyokha atthu anipaka itthu iyo. (Ezek. 22:12) Vaarowa okhala va miruku khula mmosa a hiyo wuupuwelela moota onoonela awe musurukhu. Mwiikoheke so: ‘Kiireke kinnuupuwela vanceene musurukhu ni itthu khaakhanle aka oothuma kaarina munceene? Koolihiwa musurukhu, kiireke kinnipisa oliva kuupuwelaka wiira mutthu owo khonrowa orumeela niinaano vaava? Kiireke mwaha wookhalana musurukhu munceene, kinniixoona okhala a faita waavikana atthu akina? Kiireke kinnoona ovila waaxukhurela atthu akina? Kiireke kinnimoona mukina okhala mutthu oniithukumanyerya muhakhu, mwaha wookhalana musurukhu munceene paahi? Kiireke apatthani aka taale arina musurukhu paahi ni nkinaathokorerya saana ale ahirina musurukhu?’ Ootheene ahu nnoowerya okhapelela waataana wahu ni Muluku, nihiphentaka musurukhu mootepana. Namphentaka vanceene Yehova ovikana musurukhu, owo khonikhala-khala onihiyaka! w24.06 12-13 itti. 17-18

Wiira niwerye okhootta sooweeha, nihaana okhalana ni wunnuuherya soophavela sooloka. Vakhala wiira nnimwiixutta ‘onyokha sootakhala ni ophenta sooreera’ eyo enoonikhaliherya opaka itthu sooloka. (Am. 5:15) Nave nakhalana soophavela sooloka, sinoonikhaliherya osyaka sooweeha. Nihaana okhalela nthiti ovara miteko sa Muluku. Vaavo nihincompela ahu mithukumano ni muteko woolaleerya, ninnincererya yoophavela ahu ya omuhakalaliha Yehova. (Math. 28:​19, 20; Ahep. 10:​24, 25) Nave, okathi ninsoma ahu ni wuupuwelela Nuulumo na Muluku, ninnilipiha ophenta wahu opaka itthu sooloka ni osyaka opaka itthu soohiloka. (Yox. 1:8; Esal. 1:​2, 3; 119:97) Muhiliyale etthu Yesu aalenle awe awiixutti awe. Owo aahimmye so: “Nvekeleke voohihiyererya, wiira muhimore mweehereriwaka”. (Math. 26:41) Tthiri, Yehova onoonikhaliherya wuncererya yoophavela ahu ya omuhakalaliha. — Yak. 4:8. w24.07 17-18 itti. 14-16

Ale aniwiixuttiha atthu akina itthu anisuwela aya, annitakiha enamuna Yehova onaavaha awe ankhili awe. Musuweleke wiira Yehova onnaavaha ankhili awe ni murima wootheene. Mwa enamuna emosa-ru, nihaana owiixuttiha atthu akina itthu ninsuwela ahu. Nto nihuupuweleke wiira vakhala wiira nnoomwiixuttiha mutthu mukina pooti onivikana aahiiso onaakha mpantta ahu. Nihuupuweleke so: ‘Miyo khuuvo okiixuttinhe! Atthu akina anihimya wiira okhala wiira yiixuntte mekhaya nave-tho awo khanrowa omwiixuttiha mutthu mukina’. Arumeyi a Yehova, ahuupuweleke siiso. Ohiya waakhaliherya paahi ni itthu ninsuwela ahu, ‘nihaana opaka sootheene ninwerya ahu wiira nimukhaliherye mutthu owo wiixutta itthu sootheene ninsuwela ahu’. (1 Ates. 2:8) Hiyo nimphavela wiira atthu yaale ninwiixuttiha ahu, esuweleke “owiixuttiha atthu akina”. (2 Tim. 2:​1, 2) Akhala wiira nnoowiixuttiha atthu akina itthu ninsuwela ahu, eyo enoonikhaliherya ni atthu awo ninwiixuttiha ahu anookhala asuweli ni oohakalala. w24.09 29 itti. 12-13

Atthu akina anuupuwela wiira khanisuwela itthu sinceene wiira arumeeliweke mmulokoni. Akhala wiira munuupuwela siiso, muhikhulumuwe. Moohaanyiherya, mookhalana mikhalelo sooloka wiira mwaakhaliherye atthu akina. Munoonela sai oleeri masu a murummwa Paulo ari 1 Akorinto 12:​12-30 ni ovekela voohimya sa mwaha owo? Iversiikulu iyo, Paulo onnooniherya wiira khula murumeyi a Yehova, woohelani muhina nyuwo, mookhalana efaita wa Yehova ni mmulokoni. Mwiimananiheke opaka ele eniwerya anyu wiira mmurumeeleke Yehova ni waakhaliherya anna ni arokora. Tivonto, mukupaliki wiira axitokweene animoona wiimananiha wanyu, ni animoovahani miritti, seiyo muniwerya anyu omaleliha. (Arom. 12:​4-8) Makristau ootheene ahaana olipiha waataana waya ni Yehova, okhala oolikana ene waakhaliherya atthu akina moohakalala ni ovaha ntakiheryo nooloka ni mweettelo aya. w24.11 17 itti. 12-13

Ana aahikhalana mixankiho sinceene, seiyo saamwiiriha wunla aahiiso oriipiwa murima. Muxankiho mmosa waamuriipiha vanceene murima, okhala wiira iyawe aahikhalana muthiyana mukina, aihaniwa Penina, yoowo aamuhasula vanceene. Muxankiho mukina, okhala wiira Ana khaarina anamwane, masi Penina aahikhalana. (1 Sam. 1:​1, 2) Ikwaha sinceene, Penina aaninveeha Ana mwaha woohiyara. Ana aanixanka vanceene mpakha ‘opacerya wunla ni ohinaphavela olya’. Nave-tho, owo “aahiriipiwa murima vanceene”. (1 Sam. 1:​6, 7, 10) Etthu xeeni Ana aapanke awe wiira ovukule oriipiwa murima? Etthu emosa aapanke awe, yaari orowa otabernaakulu onvekela Yehova. Owo aahimuxonttela Yehova ohimyaka so: “Nkawehani moota kinhaawa aka, mukuupuwele, muhimuliyale murumeyi anyu.” (1 Sam. 1:11) Yehova aahiiwa nivekelo na Ana ni muhoolo mwaya owo aahirupala. — 1 Sam. 1:​19, 20; 2:21. w24.12 21 itti. 5-7

Yoowoopola enniixuttiha wiira Yesu onnaathokorerya vanceene atthu, otepexa wene, awiixutti awe. (Yoh. 13:1) Mwa ntakiheryo, itthu sikina Yesu aarowa awe ovara valaponi, saarowa okhala sooxankiha, otepexa wene, owo aahaana ovilela mpakha okhwa. Masi Yesu aahivara itthu iya sootheene sooxankiha, ohiya mwaha woorummwa ni Yehova wiira ovareke, masi mwaha woowi aanaaphenta vanceene atthu. Ti maana aya, owo aanaalaleerya, aaniwiixuttiha ni aanaakhaliherya. Hata nihiku aarowa awe wiiviwa, Yesu aahiivaha okathi wiira orapihe inawu sa arummwa awe, owiixuttihe, aavahe malakiheryo ni waalipiha. (Yoh. 13:​12-15) Hata okathi Yesu aakhomeliwe awe vamwirini va nihaaxeryo, aahimuleela nakrime aamwaattamenle, voohimya sa eparayiisu, ni aahinvekela Yohani wiira omukhapeleleke maama awe. (Luka 23:​42, 43; Yoh. 19:​26, 27) Yesu aahooniherya wiira aanaaphenta vanceene atthu, ohiya paahi okhwaaka mmureerelo aya, masi-tho mwaha woowaathokorerya moophenta ni mooreerela murima. w25.01 23 etti. 11

Biibiliya onnirumeela nlikanyiho nla, wiira onikhaliherya wiiwexexa ele enitaphulela aya olevelela weekeekhai. Hiyo niri ntoko “ipottha sa etampi”. Masi okathi Yehova onnilevelela awe, ninnitaphuliwa “okhala ipottha sa etampi”. (Arom. 6:​17, 18; Wis. 1:5) Olevelela wa Yehova, onnintaphula okhala ipottha sa etampi, nto eyo enninihakalaliha vanceene. Mwaha wa mukuttho woowoopola Yehova okumihenrya awe, hiyo pooti ohimya wiira noopenuxiwa eretta naarina ahu. (1 Ped. 2:24) Ntoko siisale mutthu orina eretta yoowoopiha, onihakalala awe nuumala openuwa, hiyo nave ninnihakalala mwaha woosuwela wiira Yehova oonilevelela soottheka sahu. Eyo eniweryaneya paahi mwaha wa mukuttho woowoopola wa Yesu, yoowo onnikhaliherya okhalana waataana wooloka ni Yehova. w25.02 11 etti. 16; 12 etti. 17

Nlikanyiho na italento, Yesu onnaalavula arumeyi anli yaari oororomeleya ni pwiya aya, masi mmosa khaarorormeleyale. (Math. 25:​14-30) Arumeyi ale anli oororomeleya, anithoonyerya makristau oothanliwa. Pwiya aya, Yesu, onnaalattula arumeyi awe wiira ‘atteeliweke murima ni pwiya aya’. Awo anrowa waakhela etthuvo aya wiirimu, eyo piiyo, ohihimuxiwa woopacerya. (Math. 25:​21, 23; Wis. 20:5b) Ntakiheryo na murumeyi ole oohiroromeleya, ninnaalopola makristau oothanliwa. Masi moota xeeni? Awo ahaana wooniherya wiira annikhalela nthiti miteko saya ni toowehaweha. Nlikanyiho na italento ni na imwali, Yesu khaaphavela ohimya wiira makristau oothanliwa yaarowa okhala oolosowa. Ohiya-vo, owo aaphavela otthokiherya etthu yaarowa okhumelela vakhala wiira yaamuhiya okhalela nthiti miteko saya. Awo yaamuhiya ‘olipiherya wiihaniwa waya ni othanliwa waya’, nave awo khiyaarowa weemereriwa wiirela mpantta Omwene wa wiirimu. w24.09 22 etti. 10; 23 itti. 12-13

Ootheene ahu, ninnipaka ele eniwerya ahu, wiira nikhalaneke yoolya ni okhapelela emusi ahu. (Mus. 7:12; 1 Tim. 5:8) Ekeekhai wiira vaavo ninthanla ahu muteko, ninnuupuwela musurukhu ninrowa ahu waakhelaka. Masi vakhala wiira nnuupuwela paahi musurukhu ninrowa ahu waakhelaka, eyo enooniherya wiira khanneettihiwa ni waamini. Mutthu oneettihiwa ni waamini, onnuupuwela vakhala wiira muteko onrowa awe ovaraka, khonrowa waafetari ompatthani awe ni Yehova. Owo ohaana wiikoha so: ‘Kiireke muteko ola khonirowa okiiriha opaka etthu Yehova oninyokha awe?’ (Mir. 6:​16-19) ‘Kiireke muteko ola, onookiiriha ocompela mithukumano aahiiso ohikhalana okathi woolaleerya ni omusoma Biibiliya? Kiireke muteko ola onookiiriha oviriha okathi munceene kittaivelanne ene ni emusi aka?’ Vakhala wiira nookhala nikoho munaakhula anyu wiira aayo, vaamukhala va miruku oheemererya muteko owo, hata moonaka wiira vanooxankiha ophwanya muteko mukina. Okhala wiira nneettihiwa ni waamini, ninnipaka soothanla sinooniherya wiira ninniroromela wiira Yehova onoonivaha itthu nimpirisari ahu. — Math. 6:33; Ahep. 13:5. w25.03 21 itti. 5-6

Khula okathi, nihaana waathokorerya anna ni arokora ntoko Yehova onaathokorerya awe. Hiyo nnoopaka eyo, akhala wiira nnoowehexexaka mikhalelo saya sooloka, ohiya ifaalya saya. Maana moohipisa, ifaalya iyo sinoomala-mala. Nihaana ophukaka mixankiho ni anna ni arokora awo mwa niphento. Mwa enamuna emosa-ru, etthu enrowa waakhaliherya atthu akina okela eparayiisu ya nthoonyeryo, woona moota anithokoreriwa aya. Okhala wene, hiyo ninnixukhurela vanceene mwaha wa Yehova onivaha eparayiisu eyo ya vameekhaaya. Akhala wiira mutthu oniphavela okhala oohakalala, oomaaleleya ni oovareleleya, ohaana wiirela mpantta eparayiisu eyo ni ohikhuma-tho! Masi nihaana okhalana ephoole, okhala wiira Satana onniimananiha opaka sootheene oniwerya awe wiira oniwoke ni onikumihe mparayiisu-mmo. (1 Ped. 5:8; Wis. 12:9) Nihikhala-khale neemereryaka wiira owo opaka eyo. Nto nihaana wiimananiha okhapelela oreera ni murettele nirina ahu eparayiisu eyo ya nthoonyeryo. w24.04 24-25 itti. 18-19

Anamuyari pooti waakhaliherya anaaya okhalela nthiti okokhorela weekeekhai. Nwiixuttiheke aniinyu ni moolumo anyu ni ntakiheryo nanyu wiira okhalela nthiti miteko sa muluku, eyo piiyo, omusoma Biibiliya, ohicompela mithukumano ni orowela muteko woolaleerya, sihaana okhala itthu sa efaita mookumini mwahu. Mwaahiire siiso, aniinyu pooti wuupuwelaka wiira okhala Namoona a Yehova, khahiyo etthu ya faita, masi anipaka eyo okhala wiira ‘etiini ya emusi’. Eyo pooti owiiriha ohihela nipuro noopacerya okokhorela weekeekhai aahiiso ohiya omurumeela Yehova. Akhala wiira mutthu oohiya omurumeela Yehova, niireke wiira eyo entaphulela wiira khonrowa-tho okhala mpatthani a Yehova? Nnaari, maana owo pooti wiittaruxa ni otthikela omukokhorela Yehova mwa enamuna yooloka. Woonasa wene, mutthu owo pooti opirisariki ohiya okhala oowiixinnuwiha ni weemererya nikhaliheryo na axitokweene a mmulokoni. (Yak. 5:14) Vanikhala vooreera vaavo mutthu onipaka awe sootheene oniwerya awe, wiira omutthikele Yehova! w24.07 24-25 itti. 18-19

Munrowa onamorari sai mwa enamuna eninvuwiha Yehova? Nuuvira okathi, osivelana wanyu, pooti otepaka wuncerereya. Masi muhaana osyaka opaka itthu sikhanle oomuriipiha murima Yehova. Musyakeke ovaanela itthu sinivarihana ni orupihana, okhala opuro atthu akina ahiniwerya aya woowehasani ni musyakeke ohapaliwa. (Aef. 5:3) Akhala wiira khamunisyaka itthu iya, muupuwelo wa ophavela orupihana woohiloka onrowa otepaka wuncerereya vamurimani vanyu, nto eyo ewiirihekeni opaka itthu sikhanle oomuriipiha murima Yehova. Munoonela sai ovaanelaka ikwaha sinceene itthu sikhanle ookhaliherya onamorari wanyu okhala woottittimiheya ni oninvuwiha Yehova? (Mir. 22:3) Itthu sinooniherya osivelana, sinimooneya vaavo ophentana wanyu onincerereya aya. Nave munoophavelaka opaka itthu mookhalela sinooniherya wiira munnimphenta tthiri. Masi akhala wiira ophavela orupihana onnincerereya vamurimani vanyu, vanookhala woovila opaka soothanla sooloka. (Nsip. 1:2; 2:6) Nto ophavela omooniherya wanyu osiveliwa, pooti owiirihani ohiwerya wiikasoopa ni opaka itthu sikhanle oomuriipiha murima Yehova. (Mir. 6:27) Okathi munipacerya anyu onamorari, muhaana ovaanela itthu mukhanle anyu oopaka moovarihana ni malakiheryo a mbiibiliyani. — 1 Ates. 4:​3-7. w24.05 29 itti. 10-11

Hiyo nimphavela wiira atthu akina aroromeleke wiira nnimwaakhaliherya okathi wa mixankiho. (Mir. 17:17) Exeeni nikhanle ahu oopaka wiira anna ni arokora aniroromeleke? Etthu nikhanle ahu oopaka, ori otakiha mikhalelo sa Yehova khula nihiku ni omaleliha itthu ninleiherya ahu ni okathi ene yoowo naaleihenrye ahu. Axitokweene oororomeleya, annikhaliherya vanceene muloko. Moota xeeni? Okathi anamalaleerya anoona aya wiira annireerela ovekela nikhaliheryo na axitokweene, awo annipaka eyo mootaphuwa. Nto eyo ennaakhaliherya ovukula oxanka. Nave okathi anamalaleerya awo anisuwela aya wiira annikhaliheriwa ni axitokweene khula okathi anipirisari aya, awo annoona wiira anniphentiwa. Anna ni arokora annitepa waaroromela axitokweene, vaavo anisuwela aya wiira awo khanrumeela muupuwelo aya, masi animurumeela Biibiliya ni iliivuru sahu sinimutthokiherya Biibiliya wiira avahe malakiheryo. Nave axitokweene annitepa ororomeliwa, vakhala wiira khanaaleela atthu akina isiiri sanya ni annipaka itthu anileiherya aya. w24.06 30 itti. 14-15

Nihilipeleleke wiira Yehova onoomaliha mixankiho sahu sootheene olumwenku ola wootakhala, masi nikupaliki wiira owo onoonikhaliherya okathi wootheene. (Esal. 41:3) Orumeelaka ikuru sawe soowaarya, Yehova onoonivaha ikuru, osuwela ni murettele wiira niwerye ovilela. (Mir. 18:14; Afil. 4:13) Nave owo onninimaaliha onivahaka nlipelelo noowi muhoolo khuuvo onrowa ohimyaka wiira miyo ka muretta. (Yes. 33:24) Nnoowerya ophwanya nimaaliho na Yehova okathi nimmusoma ahu Biibiliya. Okathi ninriipiwa ahu murima, Nuulumo na Yehova pooti onlipiha ni onikhaliherya okhala oomaaleleya. (Arom. 15:4) Murokora mmosa a wÁfrica oCidental, nuumala ophwanyaniwa oretta wa Kanser aaninla vanceene. Owo onihimya so: “Yoolepa emosa enikimaaliha, Yesaya 26:3. . . . Eversiikulu ela, ennikimaaliha ni okikhaliherya ovilela khula muxankiho onkiphwanya.” Niireke yookhala yoolepa, munoona anyu wiira ennoomaalihani okathi munikhalana anyu mixankiho sookhulumula vanceene? w24.12 24 itti. 17-18

Axitokweene annaamorela ikharari, ale ahiyale omurumeela Yehova. Awo aniphavela wiira epwittipwitthi eyo erimenle, etthikele owaani. (Luka 15:​22-24, 32) Okathi mutthu onitthikela awe mmulokoni, Yehova, Yesu, malaikha ni muloko wootheene, annihakalala! (Luka 15:7) Yehova khoneemererya wiira ale ahiniphavela ottharuwa itampi saya, akhaleke mmulokoni. Masi, owo nlelo onneererya waakhaliherya. Oniphavela wiira awo atthike. Nwehe moota Yehova oniwoonela awe ale anirukunuxa murima aya. Hoseya 14:​4, onihimya so: ‘Miyo kinimwaattikiherya atthu aka wa miyo: kinimwaaphenta ni murima aka wootheene. Nkinaaviruwela-tho’. Osuwela moota Yehova oniwoonela awe ale anirukunuxa murima, onimwaakhaliherya axitokweene oweha itthu sinooniherya wiira mutthu owo oopacerya orukunuxa murima. Moolumo ala animwaalipiha ale ahiyale omurumeela Yehova, wiira nlelo onnaaphenta ni oniphavela wiira amuhokolowele. w24.08 28 itti. 8-9