Munniwerya Woona Ntata na Muluku Mweekumini Mwanyu?

“Ntata n’Apwiya nnimwakhapelela arumeyi aya”.​—YES. 66:14.

ISIPO: 32, 26

MUNOOWERYA OTTHOKIHERYA?

Xeeni atthu akina aniwerya aya woona ntata na Muluku mweekumini mwaya, variki akina ahoonaka?

Etthu xeeni ennooniherya wira Yehova onninikhapelela olelo-va?

Nipakeke exeeni wira niweryeke woona ntata na Muluku mweekumini mwahu?

1, 2. Itthu xeeni atthu akina anuupuwela aya voohimya sa Muluku?

ANAMUNCEENE anuupuwela wira itthu sinipakiwa ni apinaatamu khasinivarihana ni ele enipaka awe Muluku. Tthiri, akina anikupali wira Muluku khoniphavela osuwela nnakhala vakhaani ele eniwiiraneela apinaatamu. Nuumala okhumelela Munamukhaya Muulupale oniireliwa Haiyan yoowo aapwetenxe mireerelo sinceene elapo ya oFilipina mweeri wa Novembro 2013, mukhulupale a muttetthe mmosa aahimmye so: “Woonasa wene Muluku ooninyanyala”.

² Atthu akina annipaka itthu yuupuwelaka wira Muluku khoniwerya woona ele enipaka aya. (Yes. 26:10, 11; 3 Yoh. 11) Awo anoolikana ni ale murummwa Paulo aahimya awe oriki: “Awo àkhotta omusuwela sana Muluku”. Atthu awo “mmurimani mwaya mosareya sotakhala sothene; otakhala murima, milili, olimalela sonanara”.​—aRom. 1:28, 29.

 3. (a) Makoho xeeni anireerela ahu wiikoha voohimya sa Muluku? (b) Moovarihana ni Biibiliya antaphulela exeeni masu ani “ntata” na Yehova?

³ Ankhi hiyo? Moovirikana ni atthu ale aromoliwe osulu iwe, hiyo ninnisuwela wira Yehova onnoona khula etthu enivara ahu. Niireke hiyo ninniwerya woona ntata na Muluku nnikhaliheryaka ni onikhapelela? Niireke hiyo nri eriyari ya atthu yaale Yesu yaahimmye awe wira “anomona Muluku”? (Math. 5:8) Wira niiwexexe ele enitaphulela aya, nipacerye oweha matakiheryo ari mBiibiliyani a atthu yaawenrye woona ntata na Muluku nivaraka muteko ni ale yaakhoottale woona. Nuumala-vo ninrowa woona oratteene moota ntata na Muluku ninvara aya muteko nirumeelaka waamini wahu. Okathi onrowa ahu othokorerya iponto iya, musuweleke wira Biibiliya ikwaha sinceene onnilavula sa “ntata” na Muluku ophavelaka ohimya ikuru, seiyo sinirumeela awe wira aakhaliherye arumeyi awe ni waaxintta awanani awe.​—Mmusome Otumererya 26:8.

AWO KHIYAAWENRYE WOONA NTATA NA MULUKU

 4. Xeeni awanani aIsarayeli yahaawenrye aya woona ntata na Muluku?

⁴ Okathi wa aIsarayeli, atthu anceene yaahikhalana eparakha ya woona ni wiiwa itthu Muluku saapanke awe mwaha wa aIsarayeli. Yehova aahiwoopola atthu awe aakumihaka elapo ya wEjiitu, nuumala-vo yaahaapwetexa mamwene otheene mphironi mwaavira aya. (Yox. 9:3, 9, 10) Nnaamwi mamwene ale otheene yaakhala okhopela wa muro Yordani yaiwale ni woona itthu Muluku aapanke awe “othene aya yahipatthana, khupwexererya maloko ànakhotto aya wira emutuphele Yoxuwa n’atthu a Isarayeli”. (Yox. 9:1, 2) Hata okathi yoole yaapacenrye aya owana ni Yoxuwa, awo yanwerya woona wira owo aakhaliheriwa ni ntata na Muluku. Akhaliheriwaka ni Yehova, “nsuwa nahemela, mweri khuhetta-tho, mpakha atthu a Isarayeli owunlela ikuhu awanani aya”. (Yox. 10:13) Yehova taatthunne wira awanani ale ‘alipihe mirima saya, wira ewane ekhotto n’atthu a Isarayeli’. (Yox. 11:20) Awanani a Isarayeli khiyaatthunne weemererya wira Muluku taawaakiha aIsarayeli, ni wira eyo ti yaakumihenrye oxinttiwa waya.

 5. Exeeni Mwene ootakhala Akhabi yaakhoottale awe weemererya?

⁵ Muhoolo mwaya mwene ootakhala Akhabi aahikhalana eparakha ya woona moota ntata na Muluku naavara aya muteko. Eliya aahimuhimeerya wira: “Iyakha iya khinrupa-tho epula, khunikhala-tho okame mpakha vankelaka ohimya”. (1 Mam. 17:1) Tthiri Akhabi aahisuwela wira Eliya aalavula mwa nsina na Yehova, masi khuhiphavela wiiwelela. Muhoolo mwaya, Akhabi ahoona mooro okhumaka wiirimu okathi Eliya waavekenle awe wira Muluku opattihe mukuttho awe. Nuumala-vo, Eliya aahihimya wira Yehova aarowa omaliha elimwe ele oriki: “Mulokihe ekaro, mutthyaweleke owani, epula ehophwanyeni”. (1 Mam. 18:22-45) Akhabi ahoona itthu iyo sotheene sikhumelelaka, masi nlelo anvira okhoottaka wira sotheene iye sooniherya ikuru sa Muluku. Nlikanyiho nla ni ale ahimmwale wanipacerya iwe, anniniixuttiha etthu emosa yuulupale, eyo piiyo, nihaana waavya enamuna ya owerya woona ntata na Yehova nivaraka muteko.

AWO YAAHIWERYA WOONA NTATA NA YEHOVA

6, 7. Exeeni atthu akina a okathi wa Yoxuwa yaawenrye aya woona?

⁶ Moovirikana ni mamwene ale ootakhala, aakhala atthu akina yaawenrye woona ntata na Muluku, nnaamwi awo okathi mukina yaarina makhalelo mamosaru yaarina aya atthu ale akina aromoliwe. Mwa ntakiheryo, moovirikana ni maloko ale yaawana ni aIsarayeli okathi wa Yoxuwa, maGibeyoni yaahirowa waavekela aIsarayeli wira yaataane. Nthowa xeeni? Awo yaahimmye so: “Hiyo arumeyi anyu ninkhuma elapo y’ottaiwene, nihìwa elavuliwaka Apwiya Muluku anyu. Tthiri nihìwa sivuwihiwaka miteko saya, seiyo sipakalyaya”. (Yox. 9:3, 9, 10) Awo yaahikhalana ankhili nto yaahiwerya woona wira aIsarayeli yaakhaliheriwa ni Muluku.

⁷ Rahabi nave aahiwerya woona ntata na Muluku nivaraka muteko. Nuumala osuwela moota Yehova aawooponle awe atthu awe, owo aahaahimeerya anamahottela anli aIsarayeli wira: “Miyo kosuwela wira Apwiya ahòvahani elapo ela”. Nnaamwi olavula masu ale ni ohimya wira aanimukupali Muluku yaari etthu yowoopiha okathi ole, Rahabi aanaamini wira Yehova anwerya omoopola owo ni amusi awe.​—Yox. 2:9-13; 4:23, 24.

 8. Moota xeeni aIsarayeli akina yaawenrye aya woona ntata na Muluku?

⁸ Moovirikana ni mwene ole ootakhala a wIsarayeli, Akhabi, aIsarayeli akina yaale yoonale moota Yehova aamwaakhunle awe Eliya oruuhaka mooro, yaahikupali wira nle naari ntata na Muluku naakumiherya itthu iye. Okathi yaawenhe aya mooro okhumaka wa Yehova, nto onapattiha mukuttho ole awo yaalavunle so: “Apwiya [Yehova] t’akhanle Muluku” ekeekhai! (1 Mam. 18:39) Tthiri atthu ale yaahiwerya woona ntata na Muluku!

 9. Moota xeeni ninwerya ahu omoona Yehova ni ntata nawe olelo-va?

⁹ Matakiheryo oohiloka ni ooloka athokorenrye ahu aanikhaliherya osuwela ele enitaphulela aya omoona Muluku wala woona moota ntata nawe ninvara aya muteko. Okhala wira noomusuwela Muluku, hiyo nnoowerya woona ntata nawe, vaavo vanisuwela ahu mikhalelo ni soopaka sawe. (aÉf. 1:18) Tthiri, hiyo nimphavela olikanaka ni atthu a khalai ni a niinano aniwerya woona moota Yehova onaakhaliherya awe atthu awe. Hata vari siiso, niireke hiyo nookhalana itthu sinnooniherya wira Muluku onnaakhaliherya atthu awe olelo-va?

ITTHU SINNOONIHERYA NTATA NA MULUKU OLELO-VA

10. Exeeni enooniherya wira Yehova onnaakhaliherya atthu mahiku ala? (Nwehe elatarato yoopacerya.)

¹⁰ Hiyo nookhalana itthu sinceene sinnooniherya wira Yehova nlelo onnaakhaliherya atthu. Ikwaha sinceene, ninniiwa sowiiraneya sa atthu yanvekela Muluku wira axukuriwe ni Anamoona nto eyo khiiraneyaka. (Esal. 53:3) Okathi waalaleerya awe empa ti empa muttetthe mmosa wa esisiro yaamukhaani ya oFilipina, Allan aahimphwanya muthiyana nto muthiyana owo khupacerya wunla. Owo onihimya so: “Vaasiisu yoole muthiyana owo aahinvekela Yehova wira Anamoona awe amphwanye. Okathi aaryaawe mwali, owo aahitoko omusoma Biibiliya ni Anamoona a Yehova, masi aahihiya osoma nuumala otheliwa khithaamela esisiro ele. Muluku aahaakhula nivekelo na muthiyana ole moowaakuveya tivonto vanvanre aya murima onanla”. Muhina mwa eyaakha emosa owo aahivahererya ekumi awe wa Yehova khubatiziwa.

11, 12. (a) Mwa inamuna xeeni Yehova onaakhaliherya awe arumeyi awe? (b) Muhimye yowiiraneya emosa ya mutthu aatonko okhaliheriwa ni Muluku.

¹¹ Arumeyi anceene a Muluku aatoko woona moota aakhalihenrye awe ohiya soolema soohiloka ntoko omulya soona, mirette soohapala, wala oweha epornografia. Anamunceene anihimya wira yaaheererya ikwaha sinceene ottharuwa soolema iyo mekhaya masi khuhiwerya. Masi okathi yanvekenle aya nikhaliheryo Yehova, owo ahaavaha ‘owerya wulupalexa’ nto nuumala-vo yaahiwerya oxintta otteettheya waya.​—2 aKor. 4:7; Esal. 37:23, 24.

¹² Yehova ohaakhaliherya arumeyi awe anceene oxintta mixankiho saya. Mwa ntakiheryo, Amy aahikhalana muxankiho okathi waavahiwe awe muteko wa okhaliherya oteka Empa ya Omwene ni empa ya mamisionaario esisiro emosa ya oPacífico. Owo onihimya so: “Hiyo naakhala ewateelo yaamukhaani, nto khula nihiku nahaana ovira iphiro saari maasi wira niphiye nipuro naateka ahu empa”. Owo-tho ahaana wiixutta soolema sa mapuro ale, ohiya-vo muttetthe ole khaarina aluuxu nnakhala maasi ooloka. Amy onihimya so: “Etthu yaatepinhe muxankiho aka okhala wira nihiku nimosa kaahimpwapwela murokora mmosa aavarana ahu muteko. Kaaronwe owaani koonaka wira itthu sotheene saahikimalela. Noophiya ekwaartu kaakhalaka nnaamwi yaariipale, kaahinvekela Yehova ni murima aka wotheene, wira okikhaliherye”. Okathi yaapacenrye aya opatta aluuxu, Amy aahikuxa erevista Owehaweha yaarina mwaha waalavula sa eprograma ya atthu animaliha osoma oGileadi yaalavula itthu sotheene saamuxankiha okathi ole ntoko makhalelo masya, wunkheliwa owaani, ni waasuwela atthu asya yaakhalana awe. Owo onihimya so: “Ohiyu ole kaahimoona Yehova okilavulihaka. Eyo yaahikikhaliherya ovikaniha ovara muteko aka ole”.​—Esal. 44:25, 26; Yes. 41:10, 13.

13. Itthu xeeni sinnooniherya wira Yehova onnaakhaliherya atthu awe “wakiha n’ulipiha ehapari yorera”?

¹³ Mwaha wa Anamoona a Yehova owerya “wakiha n’ulipiha ehapari yorera” eyo enooniherya wira awo annikhaliheriwa ni ntata noowerya na Yehova. (aFil. 1:7) Iguvernu sinceene soomananiha okhoottiha muteko wa atthu a Muluku. Masi vaavo vaniweha ahu ottuli ni woona wira Anamoona a Yehova aavahiwa irasau siniphiyerya 268 itribunaali suulupale sa ilapo soovirikana ni ovahiwa irasau 24 sa Corte Europeia dos Direitos Humanos, okhuma mwaakha wa 2000, tthiri vannooneya wira khuuvo oniwerya woceeliha ntata na Muluku ovara muteko aya.​—Yes. 54:17; mmusome Yesaya 59:1.

14. Ninwerya sai woona ntata na Muluku mmutekoni woolaleerya ni wiiraana orina ahu?

¹⁴ Muteko woolaleerya onivariwa olumwenku wotheene oniweryaneya ni nikhaliheryo na Muluku paahi. (Math. 24:14; Mit. 1:8) Ohiya-vo, muupuwele-tho emusi yowiiraana ni ya maloko otheene erina aya atthu a Yehova, tthiri eyo etthu emosa yahaarowa oweryaneya opakiwa ni atthu ari ota wa nikhuuru na Muluku, tivonto atthu yaawo a ota annilavula ariki: “Vekekhai, Muluku ori ni nyuwo!” (1 aKor. 14:25) Mpakha-va nihoona mathowa manceene anniiriha okupali wira Muluku onnaakhaliherya atthu awe. (Mmusome Yesaya 66:14.) Ankhi nyuwo munniwerya woona? Niireke nyuwo munniwerya woona oratteene ntata na Muluku mweekumini mwanyu?

MUNNIWERYA WOONA NTATA NA YEHOVA NIVARAKA MUTEKO MWEEKUMINI MWANYU?

15. Mutthokiherye etthu okathi mukina ekhanle oonooceeliha owerya woona oratteene ntata na Yehova mweekumini mwahu.

¹⁵ Itthu xeeni sikhanle oonooceeliha woona oratteene ntata na Muluku nivaraka muteko mweekumini mwahu? Mixankiho sinnikhumelela pooti onikhulumula. Okathi onikhumelela aya, hiyo pooti oliyala moota Yehova otonko awe onikhaliherya khalai. Okathi yoole pwiyamwene Yezabeli aaphavela awe omwiiva profeta Eliya, profeta owo aahiliyala moota Muluku aamukhalihenrye awe nihiku nenne. Olavulaka sa Eliya, Biibiliya onihimya wira owo aahivekela “okhwa”. (1 Mam. 19:1-4) Nto waarowa omalihiwa sai muxankiho ole wa Eliya? Owo aatthuneya onvekela Yehova nikhaliheryo.​—1 Mam. 19:14-18.

16. Ninrowa opaka exeeni wira niweryeke omoona Muluku ntoko Yobi?

¹⁶ Yobi aahixankiheya ni itthu saamukhumelenle mpakha ohiwerya woonela mixankiho sawe ntoko Muluku soonela awe. (Yobi 42:3-6) Moolikana ni Yobi, woonasa wene hiyo nintthuneya wiimananiha wira niweryeke omoona Muluku. Ninrowa opaka sai eyo? Nirumeelaka ele elempwale mBiibiliyani, hiyo nihaana wuupuwelelaka itthu siniiraneya vakhiviru vahu. Vakhala wira ninniwerya woona moota Yehova onnikhaliherya awe khula nihiku, nto nnoowerya omoona okhala a ekeekhai. Nuumala-vo, moolikana ni Yobi, nnoowerya ohimya so: “Mpakha olelo, miyo kanosuwelani kìwaka muhimmwaka pahi; nto vano kihowehani ni maitho ak’ala”.

17, 18. (a) Mwa inamuna xeeni nikhanle ahu oowerya woona wira Yehova onninikhaliherya tthiri? (b) Muhimye sowiiraneya sinooniherya wira Muluku onninikhaliherya tthiri olelo-va.

¹⁷ Munrowa owerya sai woona ntata na Yehova? Nwehe matakiheryo ala: Woonasa wene nyuwo munnoona wira enamuna yiixuntte anyu ekeekhai mukhaliheriwe ni Muluku. Niireke mootoko orowa omuthukumanoni wa eKristau, nto nuumala wiiwa mwaha onilavuliwa, munahimya so: “Tthiri ela ti etthu kaaphavela aka”! Wala mootoko woona waakhuliwa wa nivekelo nanyu. Woonasa wene mwaahilakela wuncererya muteko oninvarela anyu Muluku nto mutteeliwa murima woona moota Yehova aakhalihenrye awe wiimananiha wanyu. Aahiiso mootoko ohiya muteko waavara anyu wa mulaponi mphavelaka okhaliherya miteko sa Muluku nto moona wira yooleiherya ya Muluku yoowi “Miyo nkinonyanyalani-tho”, ti ya ekeekhai? (aHéb. 13:5) Nakhalana moonelo wooloka omunepani, nnoowerya woona moota Yehova otonko awe onikhaliherya mwa inamuna sinceene.

¹⁸ Sarah a elapo ya oQuênia onnihimya yowiiraneya awe oriki: “Miyo kaahinvekelela mutthu aamusomiha aka kinamoona wira khiyaamusivela yoosoma awe ya Biibiliya. Kaahimukoha Yehova vakhala wira vaamureerela ohiya wiiriha yoosoma ele. Kimalihakaru nivekelo nle, telefoni aka aahiruma. Aakiligarela ti yoole aamusomiha aka Biibiliya okikohaka vakhala wira vanweryaneya orowa ni miyo omuthukumanoni! Nto miyo kaahitteeliwa murima vanceene!” Mwawehexexa oratteene, nyuwo munoowerya woona moota ntata na Muluku nnivara aya muteko mweekumini mwanyu. Rhonna, murokora onikhala wÁsia, onihimya so: “Mutthu khoniwerya woona nikhaliheryo na Yehova ehikhanle etthu yookhumelenle. Masi yakhumelela etthu vannitepa okhweya woona moota owo onnikhapelela awe!”

19. Exeeni-tho enitthuneya wira nikhale vamosa ni atthu ale anrowa omoona Muluku?

¹⁹ Yesu aahimmye so: “Òreriwa t’ale òrera murima, okhala wira anomona Muluku”. (Math. 5:8) Ninrowa okhala sai “òrera murima”? Hiyo nihaana okhala ooloka vamurimani vahu ni ottharuwa khula etthu yoohiloka yaapaka ahu. (Mmusome 2 aKorinto 4:2.) Okathi oniphavela ahu omwiiwelela oratteene Muluku ni okhalana mweettelo wooloka, nto ninniikhaliha eriyari ya atthu anireerela omoona Muluku. Muru onittharelana onrowa othokorerya etthu ekhanle oonikhaliherya owerya woona oratteene nikhaliheryo na Yehova mweekumini mwahu, eyo piiyo, waamini wahu.