Mulolo “Onnikupali Sothene Sinihimeriwawe”

“Ole ohinisoma ejornaale mulolo; masi onitepa okhala mulolo tuule onisoma ejornaale khiyakupali sotheene silempwale okhala wira siri mujornaaleni”.​—Masu ala yaalavuliwe ni August von Schlözer, mulipa-oolepa sowiiraneya ni olaleya itthu, a wAlemanha (1735-1809).

VAKHALA wira itthu saalempwa mujornaaleni iyaakha 200 sivinre khisaaroromeleya, nto sootepa ohiroromeleya itthu sinilempwa mwInternetini olelo-va eseekulu 21. Soohimmwa sowaatta, sa ekeekhai ni sowoothiwa, sa faita ni sihirina efaita, sooloka ni sowoopiha, sinnikhweya ophwanya olelo-va mwaha wa etekonologia ya vano. Hiyo nihaana okhalana ephoole okathi onithanla ahu itthu sinireerela ahu othokorerya. Vanceenexa ale anampacerya orumeela Interneti anoona wira khula etthu enikumiheriwa ya ihapari enikhala ya ekeekhai, hata silaleiwaka ni atthu ahinaasuwela aya silavulaka itthu soowoothereriwa, wala aruuheliwaka ni apatthani aya erumeeliwaka e-mail. Tivonto Biibiliya onnilopola awe mooreerela oriki: Mulolo “onnikupali sothene sinihimeriwawe, mulipa-ànkhili onniwehaweha mwettelo awe wothene”.​—Mir. 14:15.

Ninrowa owerya sai okhalana “ankhili” wira nisuweleke itthu sowoothiwa, ithale sa mpooma, wiiyeryaniwa, ni itthu sikina sowoopiha sinikhumelela mucomputadoreni mwahu? Yoopacerya, mwiikoheke so: ‘Etthu ela enikhuma nipuro wala web saiti oororomeleya, aahiiso erumeeliwe eblog ehinisuwela aka? Niireke yoovirihiwa nipuro sinithanleliwa itthu soohimmwa wira sihilaleiweke itthu soowoothiwa mwInternetini?’a Nto murumeeleke “miruku” sanyu. (Mir. 1:3) Vakhala wira yookhala ehapari enikhala ntoko khahiyo ya ekeekhai, tthiri woonasa wene ele enihimya aya khahiyo ekeekhai. Ohiya-vo, vakhala wira yoohimmwa emosa ennaaramusa atthu akina, mmuupuweleke mutthu aarowa osiveliwa wira itthu moota owo silaleiweke ni vakhala wira atthu anihimmwa wira talalen’ye yaaphavela siiso tthiri.

ATTHU OOWAASIVELA WAAROIHELA AKHWAAYA KHULA E-MAIL ENAAKHELA AYA

Atthu akina ikwaha sinceene yaaphavelaka ovuwa annitthimakela ophavelasa ihapari sa naanano wira akhale tanipacerya olaleya nto yaaphwanyakaru etthu annaaroihela atthu otheene ari mulistani mwaya, ahisuwelexaka vakhala wira itthu iyo ekeekhai wala saahiroweke waakumiherya mixankiho atthu akina. (2 Sam. 13:28-33) Masi, vakhala wira ninnaarumeela “ankhili”, ninrowa wuupuwelela ehasara ekhanle ahu oowaakumiherya atthu akina, ni woovelela ohonona nsina na mitthenkeso ni atthu aniromoliwa.

Vanitthuneya wiimananiha wira nithanlele ihapari. Tivonto atthu anceene anihiya aya wira ale anrowa osoma athanleleke ele anoona aya okhala ya ekeekhai. Nto khula mutthu onrowa oviriha okathi xeeni wira othanlele khula etthu? Okathi etthu yoothowa. (aÉf. 5:15, 16) Ohiya wuupuwela wira, “Okhala wira nkinisuwelexa kinimwaroihela”, muupuweleke so: “Okhala wira nkinisuwelexa, kinrowa orihela otakhwani!”

Mwiikoheke so: ‘Kiireke kookhalana yoolema ya waaroihela atthu akina khula e-mail enaakhela aka? Kiireke kootoko waalepela atthu ari mulistani mwaka wira kaavekele muswammaha mwaha wa waaroihela muhupi woohireerela wala wowoothiwa? Kiireke ookhala otonko okilepela ovekelaka wira kittharuwe omuroihela khula e-mail eniphwanya aka’? Musuweleke wira khula mutthu ori mulistani mwanyu onniwerya osoma khula etthu enikumiheriwa mwInternetini ni onniwerya oweha khula etthu enimusivela ni wira khonitthuneya okhaliheriwa ni nyuwo. Awo khanitthuneya oroiheliwa itthu sootheiha, iviidiyu, wala ifootu ahivekenle. Nave khivanireerela waaroihela masu oogravariwa a Biibiliya wala myaha sookopiyariwa. b Ohiya-vo, omakela waaroihela atthu itthu siniphwanya ahu nisomaka, ntoko soolepa sa Biibiliya sa yoosoma ya esumana yeeyo, waakhuliwa wa makoho a yoosoma ya muloko, pooti owiiriha atthu awo woolowela olokiherya mithukumano ni opaka yoosoma aya.

Vano munrowa opaka exeeni vakhala wira munniphwanya itthu sowoothiwa voohimya sa Anamoona a Yehova mwInternetini? Nihaana okhootta moomalela itthu moota owo. Aakhala atthu anoona wira ahaana owooniherya itthu iyo anna akina wira asuwele moonelo aya, masi eyo khenilipiha waamini, ohiya-vo enimukhaliherya mutakhali olaleya itthu soohiloka. Vakhala wira ninniweha etthu ennixankiha mwInternetini, nihaana onvekela ankhili Yehova ni olavulana munna oolipa omunepani wira onikhaliherye. (Yak. 1:5, 6; Yuda 22, 23) Yesu yoowo aamakela wootheriwa itthu soohiloka, aahaalopola atthareli awe oriki atakhali yaarowa waalupattha ni ‘owotherya sotakhala sothene’. (Math. 5:11; 11:19; Yoh. 10:19-21) Hiyo nihaana ‘otthokelela’ ni waarumeela “ankhili” wira naasuwele ‘atthu anilavula itthu sotakhala’ ni ale “ankela iphiro sotakhala”.​—Mir. 2:10-16.

MUTTITTIMIHEKE EHAKHI YA ATTHU AKINA

Hiyo nihaana okhalana ephoole mwaha wa ihapari wala sowiiraneya hata sikhalaka itthu siniiraneya mmulokoni masi sinilavuliwa ni atthu ahikhanle axineene. Hata yowiiraneya eyo eryeene ya ekeekhai, khentaphulela wira ennireerela olaleiwa. Ekeekhai wira wookhala okathi onireerela aya olaleya wala okawa yoohimmwa emosa. (Math. 7:12) Mwa ntakiheryo, khahiyo vooloka nnakhala voophenta olaleya itthu sa ohankawaani, hata itthu iyo sikhalaka sa ekeekhai. (2 aTes. 3:11; 1 Tim. 5:13) Sookhala itthu sikhanle isiiri sa axineene, nto nihaana waattittimiha atthu akina wira waphiya okathi aya axineene alaleyeke arumeelaka inamuna soweemereriwa. Olaleya itthu ohiphiiye okathi aya pooti okumiherya ehasara.

Olelo-va, okhweya olaleya itthu sikhale sa ekeekhai wala sowoothiwa, sa faita ni sihirina efaita, sooloka ni soohiloka. Khula mutthu oniroiha muhupi woolempwa hata omuroihelaka mutthu mmosa ohaana osuwela wira otthuna ni ohitthuna, muhupi owo pooti omwareela olumwenku wotheene mowaakuveya ntoko waaphila wa niitho. Niireke hiyo nnoowerya okhootta yookhanyererya ya waaroihela atthu akina khula e-mail enaakhela ahu nihuupuwelenle? Okathi onisoma ahu etthu yoohireerela, nuupuweleke wira niphento khaannipaka itthu sa olavilavi wala wooniherya itthu sa ololo. Ohiya-vo, niphento ninrowa onikhoottiherya olaleya itthu soohiloka voohimya sa otthokeya wa Yehova, itthu sowoothiwa voohimya sa anna, seiyo sinilaleiwa ni atthu ari ipottha sa “tithi a woothà”, Satana Diabo. (Yoh. 8:44; 1 aKor. 13:7) Orumeela oratteene muupuwelelo ahu onrowa onikhaliherya okhala atthu a “ankhili” ni osuwela othokorerya khula etthu eniweha ahu khula nihiku elaleiwaka. Ntoko sinihimya awe Biibiliya, Atthu ahirina “ankhili anophwanya ololo; atthu a miruku anotepa ophwanya osuwela”.​—Mir. 14:18.

[Inoota]

[Ekaaxa epaaxina 32]

MAKOHO ANIREERELA ANYU WIIKOHA MUHINATTHI OTTHITTA NIPURO NNI ENVIAR:

❑ Kiireke muhupi ola ti wa ekeekhai?

❑ Kiireke muhupi ola esiiri?

❑ Kiireke muhupi ola onoohonona nsina nooloka na mutthu owo onihimmwa?

❑ Kiireke ookhala mutthu otonko okivekela wira kittharuwe omuroihela khula e-mail enaakhela aka?