“Nkinakhale Mekhaka”

NTAKIHERYO NA ANAMUYARI AKA

Paapa aka ni maama aka, yaanikupali vanceene etiini ya ekatoolika. Okathi yiixuttale aya mbiibiliyani wiira nsina na Muluku ti Yehova, awo yaahikhala Anamoona a Yehova ooluttuweliwa. Paapa aka, aahihiya weetta ni elatarato ya Yesu. Owo aahirumeela osuwela wawe muteko wa okalapintero, aalokiherya antari oopacerya a empa ahu wiira ekhale Empa ya Omwene, oSan Juan Del Monte. Naahirakamela vakhaani oManila, ekapitaali ya oFilipina.

Nuumala miyo oyariwa mwaakha wa 1952, anamuyari aka yaahipacerya okiixuttiha voohimya sa Yehova ntoko yaawiixuttihale aya axuulupale aka 4 ni axirokoraka 3. Okathi kannuwa aka, paapa aka aahikitumererya osomaka ekapiitulu emosa ya mbiibiliyani khula nihiku, ni aahikisomiha iliivuru soovirikana sa mutthenkeso ahu. Ikwaha sikina, anamuyari aka yaanaalattula owaani axitokweene a esirkwiitu ni anna yaakhaliherya obetheli. Emusi ahu yaanihakalala ni olipihiwa okathi yaawiriyana aya soowiiraneya sa anna awo. Nto eyo, yooniiriha ohela nipuro noopacerya mookumini mwahu, miteko sa Yehova.

Miyo kihiixutta vanceene ni ntakiheryo na anamuyari aka, yaawo yaamuroromela vanceene Yehova. Nuumala maama aka yoowo kamphentexa aka okhwa, miyo ni paapa aka naahipacerya muteko wa opioneero mwaakha wa 1971. Masi mwaakha wa 1973, kirina ene iyaakha 20, apaapa yaahikhwa. Nuumala apaapa ni amaama okhwa, miyo kaahixanka ni kaahixoona wiira kaari mekhaka. Masi nlipelelo niri mbiibiliyani, nenlo “ninnikhaliherya okhala oolipa nihihoveryaka etthu”, nookikhaliherya ohihiya okhala oolipa ni ohihiya omulipelela Yehova. (aHeeb. 6:19) Ohivinre okathi munceene nuumala paapa aka okhwa, kaaheemererya yoothanleliwa ya opioneero wa vameekhaaya esisiro ya oCoron, eprovinsia ya oPalawan.

KIRUMEELAKA MEKHAKA NI SOOTHANLELIWA SOOXANKIHA

Okathi kaaphinye aka oCoron, kaarina iyaakha 21. Okhala wiira kaahilimalela okhala ositati, kaahitikinihiwa nuumala ophiya esisiro ele yahaakhanle aya atthu anceene arina energia, yahaakhanle aya itorneera sa maasi ni yaari aya amootu ni ikaaro vakhaani. Nnaamwi yaari anna vakhaani, miyo nkaarina pioneero mukhwaaka, nto ikwaha sinceene kaalaleerya mekhaka. Mweeri woopacerya, kaahinkheliwa ni amusi aka vamosa ni apatthani aka. Ohiyu kaaniwehexexa itheneeri ni kinapacerya wunla. Kaaniphavela ohiya orumeela ntoko pioneero ni otthikela owaani.

Okathi owo, miyo kaanimuleela Yehova itthu kuupuwela aka ni saakixankiha. Kaanuupuwela itthu kaasoma aka mbiibiliyani ni iliivuru sa mutthenkeso ahu. Ikwaha sinceene kaanuupuwela moolumo ari Esaalimu 19:14. Kaahoona wiira Yehova onookhala “Mwala aka ni moopoli aka”, akhala wiira kinimuupuwelela itthu sinimusivela. Itthu ntoko miteko sawe ni mikhalelo sawe. A Sentinela aarina mwaha oni “Nunca está sozinho”,a aahikikhaliherya vanceene. Miyo kaahisoma ikwaha sinceene. Okathi ole kaari aka mekhaka, kaanoona wiira Yehova aari ni miyo, okhala wiira kaahikhalana eparakha ya ovekela, osoma ni wuupuwelela ele kaasoma aka.

Ohivinre okathi munceene nuumala ophiya oCoron, kaahithanliwa okhala mutokweene. Okhala wiira kaari mekhaka ntoko mutokweene, khula esumana kaahaana weettiha muthukumano wa Exikola ya Orummwa wa Muluku, Muthukumano wa Orummwa, Yoosoma ya Biibiliya ya Muloko ni ohoolela Yoosoma ya Owehaweha. Nave khula esumana, kaanilavula myaha sa wuumalani wa esumana. Angelito aanaatteliwa miteko, nto eyo yaanimukhaliherya ohiixoonaka wiira ori mekhawe!

Muteko aka woolaleerya oCoron, khiwaareere okhumela saana okhala wiira anaxikola aka akina a Biibiliya yaahipatisiwa. Hata vari siiso, saahikhala itthu sikina saakixankiha. Ikwaha sikina, kaahaana opaka mikwaha soorakamela wiira kiphiye opuro kaarowa aka olaleerya. Nuumala ophiya, nkaasuwela opuro kaarowa aka orupa. Nave muttetthe muloko waalaleerya awe, waahela muhina isisiro sinceene saamukhaani. Ikwaha sikina, wiira kiphiye muttetthe kaarowa aka olaleerya, kaahaana ovira mphareya kimurumeelaka parku mwaamukhaani orina mutooro! Okathi owo wootheene wooxankiha, Yehova aanikikhapelela ni okikhaliherya. Masi kaahoona wiira Yehova aamukiixuttiha, mwaha wa mixankiho saarowa okiphwanya muhoolo ni yoothanleliwa aka esya.

OPAPUA NOVA GUINÉ

Mwaakha wa 1978, kaahithanleliwa orowa oPapua Nova Guiné, onorti wa Austrália weiwo sihireere miyaako, seiyo sinlikana ni miyaako siri wEspanha. Kaahitikinihiwa vanceene, nuumala osuwela wiira atthu oowiiraka imilyau 3 a muttetthe ole, yaanilavula mattaava anivikana 800. Moohakalaliha atthu anceene yaaniwerya olavula nttaava pidgin na oMelanésia, nenlo ninsuweliwa okhala nttaava tok pisin.

Kaahithanleliwa muloko wa nttaava na enkelexi, ekapitaali ya oPorto Moresby. Muhoolo mwaya, kaahithaamela muloko wa nttaava tok pisin ni kaahipacerya osoma oskola wiira kiixutte nttaava nlo. Kaahipacerya orumeela ele kiixutta aka okathi kaalaleerya aka. Nto eyo yaahikikhaliherya wiixutta nttaava nlo moowaakuveya. Ohivinre okathi munceene, kaahilavula mwaha ni nttaava tok pisin. Kaaahitikinihiwa vanceene, nuumala othanliwa ntoko mutokweene a esirkwiitu ohinatthi omala mwaakha nuumala ophiya oPapuásia-Nova Guiné. Kaanixukurya miloko sinceene saalavula nttaava tok pisin, iprovinsia sinceene.

Okhala wiira miloko saahirakamelana, miyo kaahaana waalokiherya asembeleya a esirkwiitu anceene ni weetta mikwaha sinceene. Wanipacerya, kaahixoona okhala mekhaka okhala wiira kaari elapo esya weiwo atthu yaalavula aya nttaava noovirikana ni nawaka. Nave atthu awo yaarina soolema soovirikana ni iye kaalimalenle aka. Khula esumana, kaahaana oviyaxari ni eviyawu kirowaka oxukurya miloko, okhala wiira elapo ele khasireere waatta miyaako ni iphiro saya khasikhanle saana. Ikwaha sikina, eviyawu kaawela aka yaanikhalana mixankiho ni kaawela mekhaka. Okathi keetta aka mikwaha iyo, kaanixanka ntoko okathi keetta aka ni parku!

Atthu vakhaani paahi ti yaarina telefooni, nto wiira kilavule ni anna ni arokora kaahaana orumeela ikarta. Ikwaha sikina, kaaniphiya ikarta saka sihinatthi waaphwanya anna ni arokora. Nto kaahaana waakoha atthu akina mapuro yaakhala aya Anamoona a Yehova. Khula okathi kaaphwanya aka anna, kaanoona wiira awo yaari ooxukhuru ni oophenta. Nto eyo yaanikiiriha wuupuwelela etthu yaakiiriha wiimananiha vanceene. Miyo kooweha wiira Yehova khoreere okikhaliherya mwa inamuna sinceene. Nto eyo yookikhaliherya olipiha waataana waka ni Yena.

Ekwaha yoopacerya naathukumanne ahu esisiro ya oBougainville, anamathelana amosa ahakalanle ene, yaahikaattamela anahimya so: “Niireke munninuupuwela?” Kinnuupuwela wiira kootoko waalaleerya anamathelana ala, ekwaha yoopacerya kaaphiyale aka oPorto Moresby. Kaahipacerya omusoma Biibiliya hoothe, masi muhoolo mwaya kaahinvahererya munna a muttetthe ole wiira aasomiheke. Masi vano anamathelana awo aapatisiwa! Tthiri ala mareeliho vakhaani paahi kiphwanye aka okathi kaarumeela aka oPapuásia-Nova Guiné, iyaakha soowiiraka 3.

EMUSI YAAMUKHANI YOOWATTELIWA MITEKO

Kihinatthi okhuma oCoron mwaakha wa 1978, kaahimusuwela murokora ooreera ni aakhalela nthiti miteko sawe, iitthaniwa Adel. Owo aari Pioneera ookilaatheya ni aahuwa anaawe anli, Samuel ni Shirley. Nave okathi omosa-ru, iira omukhapelelaka maama awe oowuuluvala. Mweeri wa Maio a 1981, kaahitthikela oFilipina wiira kamuthele Adel. Nuumala othelana hiyo naarumeela ntoko mapioneero ni naanikhapelela emusi ahu.

Nnaamwi kaarina emusi para okhapelela, mwaakha wa 1983, kaahilattuliwa-tho orumeela ntoko pioneero a vameekhaaya, esisiro ya oLinapacan, eprovinsia ya oPalawan. Emusi yootheene yaahithaamela mapuro ale oothowa anamalaleerya, weiwo ahaakhanle nnakhala Namoona a Yehova. Nuuvira mwaakha mmosa, maama awe Adel aahikhwa. Okhalela nthiti muteko woolaleerya, waahinikhaliherya ovilela oriipiwa murima. Naahipaceriha soosoma sa Biibiliya seiyo saakhela vahoolo oLinapacan. Mwaha waivaavo, naanipirisari Empa ya Omwene para opaka mithukumano. Nto naahuupuwela oteka mmensihu. Muhina mwa iyaakha 3 nuumala ophiya elapo ele, naahihakalala nuumala waaweha atthu oowiiraka 110 yaawo yaarwiiye nihiku na Wuupuwelela. Anceene a yaawo, yaahikela vahoolo mpakha opatisiwa nuumala hiyo okhuma.

Mwaakha wa 1986, kaahithanleliwa elapo ya oCulion, esisiro yeeyo yahaareere aya atthu yaawereiwa eretta ya makokho. Nuumala-vo, Adel aahilattuliwa okhala pioneera a vameekhaaya. Wanipacerya naanixankiheya moota woowaalaleerya atthu yaarina makokho. Ixornaale sa elapo ele, saahihimya wiira atthu yaarina eretta ya makokho yaahilooliwa ni khivaapirisari woova okhala wiira khiyaarowa waaraviha atthu akina. Atthu anceene yaarina makokho, yaanirowela mithukumano empa ya murokora mmosa. Nuuvira okathi, naahiilimaleliha makhalelo ale masya ni naahoona wiira yaari eparakha, waaleela nlipelelo na mbiibiliyani atthu yaawo yaixoona wiira aanyanyaliwa ni Muluku ni khiyaaphaveliwa ni atthu akina. Vaari voohakalaliha waaweha atthu akina yahaareere owereiwa, ahakalalaka mwaha wa osuwela wiira muhoolo, anookhalana okumi wooloka. — Luka 5:12, 13.

Aniihu yaalimalenle sai makhalelo a oCulion? Miyo ni Adel, naahaalattula arokora anli imwali, wiira akhaleke ni hiyo para aniihu akhalane apatthani ooloka. Samuel, Shirley ni arokora ale anli, waanaasivela owiixuttiha anamwane akina voohimya sa ikeekhai sa mbiibiliyani. Vano miyo ni Adel, naanasomiha anamuyari aya anamwane awo. Okathi ole, naaniiriha soosoma sa Biibiliya soowiiraka 11. Okhala wiira naahikhalana soosoma sa Biibiliya saarowa vahoolo, eyo yaahikhaliherya okhumelela muloko musya!

Wanipacerya, kaari mekhaka ntoko mutokweene a mmulokoni. Muhoolo mwaya, efiliyaali yaahikivekela ohoolela mithukumano oCulion, weiwo yaari aya anamalaleerya 8. Nave-tho efiliyali yaahikivekela opaka etthu emosa-ru kirowaka eviila ya oMarily, weiwo yaari aya anamalaleerya 9. Nto wiira mutthu ophiye muttetthe ole aahaana weetta iwoora 3 ni parku. Nuumala mithukumano, naaneetta iwoora sinceene nrowaka wiiriha soosoma sa Biibiliya muttetthe mmosa oniitthaniwa oHalsey.

Nuumala atthu anceene wiixutta ekeekhai oMarily ni oHalsey, naahiteka Ipa sa Omwene mapuro awo oomanli. Sintoko oLinapacan, anna ni arokora ni ale yaasiveliwa ekeekhai, yaanivaha mireerelo saya ni yaanirwa ovara muteko. Nto okhala wiira Empa ya Omwene ya oMarily yaari yuulupale ni vaaniweryaneya okela atthu 200, eyo yaaninikhaliherya waapakaka asembeleya opuro ole.

ORIIPIWA MURIMA, WIIXOONA OKHALA MEKHAKA NI OTTHIKELA OHAKALALA

Mwaakha wa 1993 nuumala anamwane wunnuwa, miyo ni Adel naahipacerya ovara muteko wa osirkwiitu oFilipina. Nuuvira okathi, mwaakha wa 2000 kaahirowela Exikola ya Anamalaleerya a Omwene wiira katereinariwe ntoko mwiixuttihi a exikola ele. Miyo kuupuwela wiira nkaarowa owerya ovara muteko ole, masi Adel aanikilipiha khula okathi. Owo aahikuupuxerya wiira khula okathi, Yehova aamukivaha ikuru wiira kiwerye omaleliha yoothanleliwa ele esya. (aFil. 4:13) Adel aahilavula eyo, okhala wiira Yehova aahimukhaliherya omaleliha miteko sawe hata okathi wa mixankiho.

Mwaakha wa 2006, okathi kaasomiha aka exikola ya anamalaleerya, mwaaraka Adel aahiphwanyaniwa oretta oniitthaniwa Parkinson. Hiyo naahixanka! Okathi kuupuwenle aka ohiya yoothanleliwa aka wiira kimukhapeleleke mwaaraka, owo aahimmye so: “Xontte, mmwaavye meediku wiira okikhaliherye ni oretta aka ola. Miyo koosuwela wiira Yehova onoonikhaliherya ohihiya yoothanleliwa ahu”. Iyaakha 6 saattharelana, Adel khaahiyale omurumeela Yehova ni khaikhupanyerya. Okathi ahaawerya awe weetta, Adel aalaleerya ori ene vakhatterani vawe ya maroota. Omithukumanoni, okathi vaamuxankiha aya olavula, Adel aanaakhula oromolaka nuulumo nimosa aahiiso manli. Anna ni arokora yaanimwinviyarela mensagem Adel, amuxukhurelaka mwaha wa ntakiheryo nawe na ovilela mpakha mwaakha wa 2013 okhwiiye awe. Kooviriha iyaakha sinivikana 30 kiri ene ni mwaaraka oororomeleya ni kamphentexa aka. Masi vano kinniriipiwa murima ni kinnoona wiira kootthikela okhala mekhaka.

Adel aaphavela wiira kihihiye yoothanleliwa aka, nto ti etthu kaapanke aka. Miyo nkaahiyale ovara miteko sa Muluku, nto eyo yookikhaliherya ohoona wiira kiri mekhaka. Okhuma mwaakha wa 2014 mpakha 2017, kaahithanleliwa oxukuryaka miloko sa nttaava na etagalog, ilapo seiyo muteko wa Anamoona a Yehova waakhoottihiwa aya. Nuumala-vo, miyo kaahixukurya miloko saalavuliwa nttaava na etagalog oTaiwan, wAmerica ni oCanada. Mwaakha wa 2019, kaahiixuttiha Exikola ya Anamalaleerya a Omwene nttaava na enkelexi, wIndia ni oTailandia. Soothanleliwa iya sootheene, kaaniphwanya ohakalala wuulupale. Kinnitepa ohakalala okathi kinivara aka miteko sa Yehova.

OKATHI WOOTHEENE NAANIKHALANA ITTHU NAAPIRISARI AHU

Khula yoothanleliwa kaavahiwaka, kaanaaphenta anna ni arokora. Nto mwaha waivaavo, khiwaakhweya waalaxerya. Okathi owo wootheene, kihiixutta omuroromela Yehova ni murima aka wootheene. Okathi wootheene kaanoona wiira Yehova aanikikhaliherya, nto eyo yaanikiiriha weemererya marukunuxo yaakhumelela. Olelo-va, kinirumeela ntoko Pioneero a vameekhaaya oFilipina. Miyo koohakalala ni muloko ola musya, yoowo anna anikiphenta aya ni okikhapelela. Nave kinnihakalala onweha Samuel ni Shirley atakihaka ororomeleya wa maama aya. — 3 Yoh. 4.

Miyo sookiphwanya sooweha sinceene, ohela muhina onweha mwaaraka yoowo kamphentexaka ohaawaka mpakha okhwa mwaha wa oretta ole muulupale. Nave-tho, kihiilimaleliha makhalelo manceene masya. Hata vari siiso, miyo kooweha wiira Yehova, “khankhala ottaiwene ni hiyo”. (Mit. 17:27) Ntata na Yehova ‘khaninkhuveya’ wiira naakhaliherye ni waalipiha arumeyi awe, hata ale anikhala mapuro ooxankiha. (Yes. 59:1) Yehova yoowo ori Mwala aka, onnikikhaliherya okathi wootheene. Nto miyo kinnimuxukhurela vanceene. Miyo nkinakhale mekhaka.