Musyakeke Mukhalelo wa Wiixinnuwiha

NIIREKE mooweha wiira olelo-va, atthu anceene aniphavela wiira athokoreriweke saana waavikana akina, ni avahiweke iparakha awo paahi? Masi hata athokoreriwaka saana, awo anoona wiira khivaniphiyerya. Muupuwelo owo, oniirela mpantta mukhalelo woowiixinnuwiha ni woohixukhuru, seiyo siri ithoonyeryo sa mahiku ookiserya. — 2 Tim. 3:2.

Okhuma khalai, atthu annooniherya mukhalelo wa wiixinnuwiha. Mwa ntakiheryo, Adamu ni Eva yaaphavela ehaakhi ya othanla mmensaya etthu yooloka ni yoohiloka, nto eyo yahaakumiherya mixankiho. Ntakiheryo nikina ti na Oziya mwene a oYuda. Owo uupuwela wiira aaneemereriwa opaha nsenso mutemplo. Masi aahiiwoka vanceene. (2 Wah. 26:18, 19) Moolikanasa, afarisi ni Asaduki yuupuwela wiira vaanireerela othokoreriwa mwa enamuna ya vameekhaaya ni Muluku, mwaha woowi yaari a nloko na Abrahamu. — Math. 3:9.

Olelo-va, hiyo ninkhala ni atthu oowiixinnuwiha, nto mukhalelo owo pooti onaafetari. (aKal. 5:26) Hiyo pooti opacerya wuupuwela wiira ninnireerela wakhela eparakha emosa, aahiiso othokoreriwa mwa enamuna ya vameekhaaya. Ninrowa osyaka sai okhalana muupuwelo owo? Wanipacerya, nihaana ophavela osuwela moota Yehova onoonela awe mwaha owo. Nave malakiheryo manli ari mbiibiliyani anoonikhaliherya.

Yehova tonithanla ele ninreerela ahu waakhela. Nwehe matakiheryo vakhaani.

Vatthokoni, mulopwana ohaana ottittimihiwa ni mwaarawe, nto muthiyana ohaana ophentiwa ni iyawe. (aEef. 5:33) Anamathelana, ahaana ovahana itthu sa mukasamentoni. (1 aKor. 7:3) Anamwane ahaana owiiwelela anamuyari aya. Nave anamwane ahaana ophentiwa ni othokoreriwa ni anamuyari. — 2 aKor. 12:14; aEef. 6:2.
Yehova onihimya wiira nihaana waattittimiha axitokweene a mmulokoni, mwaha wa muteko anivara aya ni nthiti. (1 aTes. 5:12) Ikwaha sikina, axitokweene kharina ehaakhi ya okontorolari itthu anna ni arokora anivara aya. — 1 Ped. 5:2, 3.
Muluku oweemererya apinaatamu anilamulela ovekela mpoosito ni ottittimihiwa ni atthu anaalamulela aya. — aRom. 13:1, 6, 7.

Mwaha wooniphenta, Yehova onninivaha itthu sinceene ovikana iye ninreerela ahu. Okhala wiira niyariwe ni etampi, hiyo ninreerela okhwa paahi. (aRom. 6:23) Hata vari siiso, Yehova onnileiherya onivaha mareeliho manceene mwaha wa ophenta wawe woororomeleya. (Esal. 103:10, 11) Mareeliho aahiiso iparakha nnaakhela ahu, mwaha woowi Yehova oniinreerela murima. — aRom. 12:6-8; aEef. 2:8.

MOTA WOOSYAKA WIIXINNUWIHA

Musyakeke wuupuwela ntoko atthu a olumwenku ola. Moohisuwela, hiyo pooti opacerya wuupuwela wiira ninnireerela othokoreriwa mwa enamuna ya vameekhaaya waavikana atthu akina. Yesu ahooniherya moota vari aya vookhweya okhalana muupuwelo owo, okathi aarumenle awe ntakiheryo na anamuteko yaawo yaakhenle edenaario emosa. Anamuteko akina yaapacenrye muteko okhuma voosiisu mpakha makaaripi, masi akina yaavanre muteko ewoora emosa paahi. Ekurupu yoopacerya yuupuwela wiira yaahikhalana ehakhi ya wakhela musurukhu munceene okhala wiira yaapacenrye voosiisu. (Math. 20:1-16) Okathi Yesu aarumenle awe nlikanyiho nla, aahooniherya wiira atthareli awe ahaana oxukhurela ele Muluku onaavaha awe.

Anamuteko a nlikanyiho na Yesu yiikhupanyeryaka ohoolo wa patarawu aya. — Alopwana yaavanre muteko okhuma voosiisu mpakha makaaripi, yuupuwela wiira yaahaana oliviwa musurukhu munceene

Mukhaleke ooxukhuru ni muhiixinliheke. (1 aTes. 5:18) Mmutakiheke murummwa Paulo yoowo ahaavekenle anna a oKorinto mireerelo saya nnaamwi arina etireitu yoopaka eyo. (1 aKor. 9:11-14) Nihaana oxukhurela khula etthu atthu akina annivaha aya ni osyaka wiixinnuwiha.

Murummwa Paulo ni alopwana anli apakaka etenta hoothe. — Murummwa Paulo khaakhanyererya anna ni arokora onvaha musurukhu aya

Mukhaleke oowiiyeviha. Okhala wene, okathi mutthu onitepa awe wiisuupuwela, owo onoona wiira okhalana etireitu ovikana vanreerela aya. Wiiyeviha, onoonikhaliherya osyaka muupuwelo owo wowoopiha.

Ifootu: 1. Profeta Daniyeli uuluvanle ene. 2. Epooma ya oBabiloonia. 3. Mmiravo Daniyeli ni apatthani awe 3 aheeperi. — Wiiyeviha wa profeta Daniyeli, waahimwiiriha okhalana efaita para Yehova

Profeta Daniyeli ntakiheryo nooloka na mutthu oowiiyeviha. Owo khahiyo aari a emusi yoohaawa, aari ooreera, aari osuwela ni aanivara muteko oratteene. Mwaha waivaavo, pooti wiira itthu iyo sammwiiriha wuupuwela wiira aanireerela othokoreriwa saana ni waakhela iparakha. (Dan. 1:3, 4, 19, 20) Hata vari siiso, Daniyeli aari oowiiyeviha, nto mukhalelo ola waahimukhaliherya okhala a faita para Yehova. — Dan. 2:30; 10:11, 12.

Tivonto, nikhootte wiixinnuwiha ni wiitthuna mukhalelo yoowo ohireere otepa wuulaana olumwenku ola. Ohiya-vo, nihihiye oohakalala ni mareeliho Yehova onnivaha awe mwaha wa oreera wawe murima.