Moota woolokiherya ekasamento eninvuwiha Yehova

1-2. Yehova onoonela sai ekasamento?

NIIREKE moonoivari ni munimpaka palano wiira muthele aahiiso otheliwa? Akhala wiira ti siiso, vaareera! Woonasa wene, muhaatteliwa miteko wiira mulokiherye ekasamento anyu. Yehova onnihakalala vanceene aawehaka eyo. Owo oniphavela wiira nyuwo ni ole munrowa anyu othelana, muhakalaleke nihiku na ekasamentoa anyu ni nuumala ekasamento eyo. — Mir. 5:18; Nsip. 3:11.

² Ti vooloka onvuwiha Yehova, nihiku na ekasamento anyu. Mwaha wa xeeni? Nave, munrowa owerya sai opaka eyo? Mwaha ola, olokiheriwe yuupuweliwaka ale anoivanri ni anilokiherya ekasamento aya. Masi malakiheryo ninrowa ahu othokorerya, anoonikhaliherya ootheene ahu onvuwiha Yehova nihiku na ekasamento aahiiso akhala wiira ninrowa ovekeliwa miruku sa moota woolokiherya ekasamento.

XEENI VARI AYA VOOLOKA ONVUWIHA YEHOVA?

3. Exeeni anireerela aya wuupuwela ale animpaka palano a ekasamento ni mwaha wa xeeni?

³ Makristau animpaka palano a ekasamento aya, ahaana olokiherya attharaka malakiheryo Yehova orumme awe olempwa mbiibiliyani. Mwaha wa xeeni? Mwaha woowi Yehova tokumihenrye ekasamento ni ti yoowo aathelihale Adamu ni Eva. (Maph. 1:28; 2:24) Tivonto, okhala wiira Yehova tokumihenrye ekasamento, ale aniphavela othelana, ahaana olokiherya ekasamento aya aphavelaka onvuwiha.

4. Etthu xeeni ekina eniwiiriha ale anithelana ophavela onvuwiha Yehova nihiku na ekasamento aya?

⁴ Yookhala etthu ekina yuulupale, ekhanle oowiirihani otthara malakiheryo a Yehova, okathi munimpaka anyu palano para ekasamento anyu. Etthu ene tiila: Yehova ti Tiithi inyu a wiirimu ni mpatthani anyu ooloka. (Ahep. 12:9) Nave, munniphavela wiira muhihonone ompatthani murina anyu ni Yehova. Tthiri, muniphavela wiira itthu seette saana nihiku na ekasamento anyu, wiira muhimuriipihe murima. (Esal. 25:14) Okathi munuupuwela anyu itthu sootheene Yehova owiirenlyaaweni ni onrowa awe owiirelani, niireke khivanireerela opaka sootheene muniwerya anyu wiira ekasamento anyu envuwihe? — Esal. 116:12.

MUNROWA ONVUWIHA SAI YEHOVA?

5. Biibiliya onrowa waakhaliherya sai ale animpaka palano a ekasamento?

⁵ Biibiliya khonivaha elista ya ireekera aahiiso malamulo a moota ekhanle aya oopakiwa ekasamento ni vakhala wiira anoopaka efesta aahiiso nnaari. Nto ale anrowa othelana pooti ompaka palano moovarihana ni makhalelo aya, soolema sa elapo eyo ni itthu sinaasivela. Masi awo, aahaana wiiwelela malamulo a kuvernu voohimya sa ekasamento. (Math. 22:21) Nto vakhala wiira ale anrowa othelana annilokiherya ekasamento aya ettharaka malakiheryo a mbiibiliyani, anonvuwiha Yehova ni omuhakalaliha. Malakiheryo xeeni akhanle aya ootthara?

6. Xeeni ale anrowa othelana anireerela aya wiiwelela malamulo a kuvernu anivarihana ni ekasamento?

⁶ Mwiiweleleke malamulo a kuvernu. (Arom. 13:​1, 2) Ilapo sikina, aakhala malamulo a kuvernu, ale anrowa othelana anireerela aya otthara wiira athelane. Nto ale anrowa othelana, aahaana osuwela malamulo awo anivekeliwa. Vakhala wiira khanisuwela malamulo anivarihana ni muttetthe aya, aahaana waakoha axitokweene.b

7. Mikhalelo xeeni sinireerela wooniheriwa nihiku na ekasamento?

⁷ Mwiiriheke nihiku nlo okhala noottittimiheya. (1 Akor. 10:​31, 32) Nyuwo munniphavela wiira nihiku na ekasamento anyu, atthu yooniheryeke mikhalelo sinikumiheriwa ni ikuru soowaarya sa Muluku, ohiya mikhalelo sinikumiheriwa ni olumwenku ola. (Akal. 5:​19-26) Okhala wiira mulopwana tonrowa okhala muhooleli a etthoko awe, owo ookhalana muritti wa oweha akhala wiira nihiku na ekasamento awe ninrowa okhala noohakalaliha ni noottittimiheya. Etthu xeeni enrowa omukhaliherya? Etthu enrowa omukhaliherya ori olavuliwa mwaha wa ekasamento onikhuma mbiibiliyani. Okathi munna onivekeliwa olavula mwaha, onilavula awe mwa nttittimiho ni moophenta, onimwaakhaliherya atthu ootheene woona wiira ekasamento yoovaha enikhuma wa Yehova. Nave onimwaakhaliherya ootheene aniwiriyana, ottittimiha okathi owo. Vaaweryaneyaka, makristau anrowa othelana annithanla olavuliwa mwaha aya Empa ya Omwene. Tivonto, mwaaphavela orumeela Empa ya Omwene, nihinatthi ophiya nihiku na ekasamento anyu, muhaana waalepela ekarta axitokweene a mmulokoni wiira olavuliwe mwaha.

8. Etthu xeeni mukhanle anyu oopaka wiira efesta anyu envuwihe Yehova? (Aroma 13:13)

⁸ Mmusome Aroma 13:13. Vakhala wiira munithanla opaka efesta nihiku na ekasamento anyu, etthu xeeni mukhanle anyu oopaka wiira ehivarihaneke ni muupuwelo wa atthu a mulaponi? Nuulumo na ekereku noowi “ifesta sootakhala”, nintaphulela ifesta seiyo atthu anithukumana aya anawurya vanceene ni orumiha muusika mpakha wiila vanceenexa. Mwaaphavelaka wiira ekhale eviinyu okathi wa efesta ya ekasamento anyu, mwiimananiheke wiira ohikhale nnakhala mutthu mmosa onrowa owurya vanceene aahiiso ohapaliwa.c Vakhala wiira onoorumihiwa muusika, muhekele evulume enrowa waakhaliherya atthu ovaanela. Nvareryeke vahinatthi muusika owo, wiira etthu enihimya aya ehaaveehe atthu ari vakasamento-vo.

9. Ale anrowa othelana ahaana ovarerya exeeni?

⁹ Ikasamento sa mapuro makina, amusi ni apatthani a noivo aahiiso noiva anneemela analavula etthu. Nave ikasamento sikina sinnooniheriwa iviitiyu wala ifootu sa ole onrowa othela aahiiso otheliwa wala enamuna ekina ya otthekula. Itthu iya pooti wiiriha nihiku nlo okhala nootepa ohakalaliha. Masi mukhalaneke ephoole wiira itthu iyo sikhaleke soolipiha. (Afil. 4:8) Mwiikoheke so: ‘Kiireke etthu ela enimooniherya wiira kinnaattittimiha atthu akina? Kiireke kinimooniherya wiira kinnittittimiha ekasamento?’ Nikoho nikina nirina efaita yuulupale tinla: ‘Kiireke kinoorowa onvuwiha Yehova?’ Nnaamwi otheiha ikwaha sikina oreeraka, musyake ohimya itthu soohikhalela, seiyo saarowa owiiriha atthu akina wuupuwela orupihana. (Aef. 5:3) Vakhala wiira amusi anyu ni apatthani anoolokiherya etthu wiira yalavule okasamentoni, nvarerye wiira ahihimye itthu muhiniphavela anyu.

10. Ale anrowa othelana, xeeni anireerela aya osuwela itthu aniwerya aya ni ahiniwerya aya? (1 Yohani 2:​15-17)

¹⁰ Musuweleke itthu muniwerya anyu ni muhiniwerya anyu. (Mmusome 1 Yohani 2:​15-17.) Yehova onnihakalala okathi onaaweha awe arumeyi awe aphavelaka onvuwiha, ohiya wiivuwiha. Tivonto, makristau oowiiyeviha anoorowa osyaka okastari musurukhu munceene, aphavelaka wooniwa paahi. Masi mireerelo xeeni sinrowa okhumelela, vakhala wiira ekasamento anyu khenrowa waattiheriwa itthu? Niwehe ntakiheryo na munna a oNoruega oniihaniwa Mike. Owo onihimya so: “Hiyo khinaakomphe musurukhu, tivonto kinaahiyale okhala mapioneero. Nnaamwi ekasamento ahu yahaattiheriwa itthu, masi yaahireera ni kheniliyaliwa.” Murokora a wÍndia oniihaniwa Tabitha, onihimya so: “Hiyo naahisyaka oxankiheya ni itthu sinceene. Okhala wiira ekasamento ahu khiyaattiheriwe itthu, khinaarina itthu sinceene soovara ni naahisyaka onyakulihana ni amusi.”

11. Xeeni noivo ni noiva anireerela aya othanla ikuwo sookhalela para nihiku na ekasamento aya? (Nwehe ifootu.)

¹¹ Niireke moothanla ikuwo munrowa anyu owara nihiku na ekasamento anyu? Mweekeekhai, nyuwo muniphavela ophwaneliwa vanceene. Hata khalai, noivo ni noiva yaanithanla oratteene ikuwo saarowa waaphwanela. (Yes. 61:10) Ekeekhai wiira ikuwo munrowa anyu owara soovirikana ni ikuwo muniwara anyu okathi mukina. Masi hata vari siiso, sihaana okhala sookhalela. (1 Tim. 2:9) Muheemererye wiira ikuwo aahiiso itthu sikina, sikhale sootepa okhalana efaita ekasamento anyu. — 1 Ped. 3:​3, 4.

12. Xeeni ale anrowa othelana anireerela aya okhootta soolema sihinivarihana ni Biibiliya?

¹² Mukhootteke soolema sihinivarihana ni Biibiliya. (Wis. 18:4) Olumwenku ola oneettihiwa ni Satana, ikasamento sinceene sinipakiwa, soosareya soolema sinivarihana ni etiini yoowootha, okhwiri ni itthu soowoothiwa. Tthiri, Yehova oniphavela wiira nikhootteke itthu iyo soohiloka. (2 Akor. 6:​14-17) Akhala wiira muttetthe anyu sookhala soolema muhinisuwela anyu oratteene, mutokoseke malakiheryo a mbiibiliyani anrowa wookhaliheryani othanla vakhala wiira pooti opaka aahiiso ohipaka.

13. Nilavulaka sa eperesenti, ale anrowa othelana anrowa omutakiha sai Yehova?

¹³ Niireke muttetthe munikhala anyu, yookhala yoolema ya ale alattuliwe waavaha eperesenti ale anithelana? Eperesenti khula mutthu onrowa awe ovaha, pooti olipaka ni musurukhu orina awe. Ekeekhai wiira makristau annitumereriwa okhala atthu oovaha, nto annihakalala okathi anivaha aya. (Mir. 11:25; Mit. 20:35) Masi, nisyakeke owiiriha ale nnaalattula ahu woona wiira ahaana ovaha eperesenti. Nave nihiwiiriheke wuupuwela wiira, yavaha eperesenti yaamukhaani khanirowa oxukhureliwa ni khanrowa ohakalala. Ohiya opaka eyo, nimutakihaka Yehova, nihaana owiiriha ale nnaalattula ahu ovahaka eperesenti ni murima wootheene ni moovarihana ni makhalelo aya. — 2 Akor. 9:7.

MUSYAKEKE NI MUXINTTE MIXANKIHO

14. Mixankiho xeeni sinaaphwanya atthu akina anrowa othelana?

¹⁴ Pooti wiira sinookhumelela mixankiho, okathi munilokiherya anyu ekasamento enrowa onvuwiha Yehova. Mwa ntakiheryo, pooti wooxankihani opaka ekasamento yoohaattiheriwa itthu. Charlie, yoowo onikhala Ilhas Salomão, onihimya so: “Vaahinixankiha vanceene waathanla atthu naarowa ahu waalattula. Nookhalana apatthani anceene, nave yoolema ya opuro ninkhala ahu, khula mutthu oniwehererya wiira onoolattuliwa!” Tabitha, yoowo nimulavunle ahu ittima sivinre, onihimya so: “Muttetthe ninkhala ahu, ti yoolema waalattula atthu anceene. Waahivira okathi wiira anamuyari ahu yeemererye yoophavela ahu ya waalattula atthu 100 paahi.” Sarah, a elapo ya wÍndia, onihimya so: “Atthu aniwehexexa waatta wa musurukhu mutthu owo orina awe ni moota onooneliwa awe mmuttettheni. Amusi aka akina ahikhanle Anamoona, yaahipaka ifesta sa ekasamento sa musurukhu munceene. Nto eyo, yaanikiiriha ophavela opaka efesta ya ekasamento yuulupale ni ya musurukhu munceene waavikana awo.” Etthu xeeni enrowa wookhaliheryani oxintta mixankiho iya ni sikina?

15. Ovekela onikhaliherya sai okathi mutthu onimpaka awe palano a ekasamento?

¹⁵ Nvekeleke mwaha wa apalano a ekasamento anyu. Munvekeleke Yehova mmuleelaka mixankiho sanyu ni itthu munuupuwela anyu. (Afil. 4:​6, 7) Mwa ntakiheryo, pooti onvekela Yehova wiira ookhaliheryeni opaka soothanla sooloka, omaaleleya okathi munixanka anyu ni olipa murima okathi munipaka anyu soothanla sinivirikana ni itthu atthu akina yaalipelela aya. (1 Ped. 5:7) Okathi munrowa anyu woonaka wiira Yehova onnaakhula mavekelo anyu, omuroromela wanyu onrowa otepaka olipa. Tabitha, onihimya-tho so: “Miyo ni noivo aka, naanoova ohiiwanana yoohi-ru ni amusi ahu. Tivonto, khula okathi naapacerya ovekela nihinatthi waalavula apalano a ekasamento ahu. Naanoona wiira Yehova aaninikhaliherya, maana naanikhalana murettele miyo ni noivo aka ni amusi ahu.”

16-17. Ovaanela oratteene onikhaliherya sai olokiherya ekasamento?

¹⁶ Nvaaneleke oratteene ni mwa nttittimiho. (Mir. 15:22) Nyuwo ni noiva anyu, munoopirisariki opaka soothanla sinceene. Soothanla iyo sinihela muhina, nihiku munrowa anyu othelana, musurukhu munrowa anyu okastari, atthu munrowa anyu waalattula ni itthu sikina. Muhinatthi opaka yoothanla, nvaaneleke, nweheke etthu Biibiliya onihimya awe enivarihana ni mwaha owo ni mwaakoheke anna ni arokora arina ankhili ni anivaha ntakiheryo nooreera. Okathi khula mutthu onihimya awe itthu oniphavela awe, mulavuleke mooreerela murima, muhithipeleleke moonelo anyu ni muturukeke vaareerelaka. Akhala wiira amusi anyu, niire so, anamuyari anyu, annivekela etthu yookhalela, pooti weemererya. Mwiira siiso, munimooniherya wiira munnaattittimiha. Muhiliyale wiira nihiku na ekasamento anyu ti na faita ni noohakalaliha para anamuyari anyu. Vakhala wiira khamuneemererya yooveka aya, moophenta ni mwa nttittimiho mwaaleele mathowa aniwiirihani oheemererya. (Akol. 4:6) Mwaatthokiherye saana amusi anyu wiira muniphavela wiira nihiku na ekasamento anyu nikhale noohakalaliha ni ninvuwihe Yehova.

¹⁷ Pooti wooxankihani waatthokiherya anamuyari anyu soothanla sanyu, vakhala wiira khahiyo Anamoona a Yehova. Masi munoowerya waatthokiherya mooreerela murima ni mwa nttittimiho. Munna mmosa, yoowo onikhala wÍndia, oniihaniwa Santhosh, onihimya so: “Okathi wa ekasamento ahu, anamuyari ahu yaaphavela wiira nihele muhina soolema sinceene sa etiini hindu. Miyo ni noiva aka, naahiviriha okathi munceene wiira naatthokiherye soothanla sahu. Naaheemererya itthu yaavekenle aya, noonale ahu wiira khisaarowa omunanara Yehova. Mwa ntakiheryo, naahituruka soolya sikina naathanlale ahu wiira silyiwe, nihela yoolya yaathanlale aya. Nave, naahilakela ohirumiha muusika ni wiina, okhala wiira awo khalimalenle.”

18. Etthu xeeni mukhanle anyu oopaka wiira nihiku na ekasamento itthu seette saana? (1 Akorinto 14:40) (Nwehe efootu.)

¹⁸ Mutthokiheke saana itthu. Akhala wiira munoolokiherya saana itthu, woonasa wene, khamunrowa otepa oxanka nihiku na ekasamento anyu. (Mmusome 1 Akorinto 14:40.) Wayne yoowo onikhala oTaiwan, onihimya so: “Mahiku vakhaani nihinatthi ophiya nihiku na ekasamento ahu, naahipaka muthukumano ni atthu ootheene yaarowa onikhaliherya. Naahilavula sa apalano a nihiku na ekasamento, ni naahinsayari itthu naarowa ahu opaka wiira noone vakhala wiira saamweetta saana.” Nto wiira mwaattittimihe atthu mwaalattunle anyu, mulokiherye itthu sootheene okathi wooreerela.

19. Muhaana opaka exeeni wiira itthu seette saana ofestani?

¹⁹ Munoosyaka mixankiho sikina, vakhala wiira munimwiilokiherya vahinatthi. (Mir. 22:3) Mwa ntakiheryo, vakhala wiira muttetthe anyu atthu annirowa ofestani hata ahilattuliwe, nwehe etthu ekhanle anyu oopaka wiira ohikhumelele muxankiho. Mwaaleele amusi anyu ahikhanle Anamoona a Yehova etthu muniphavela anyu ni mwaatthokiherye moota munoonela anyu soolema sikina sinivarihana ni ekasamento. Pooti owooniherya mwaha ori esaiti jw.org, yoowo oni: “Como é que são os casamentos das Testemunhas de Jeová?” Nto wiira itthu seette saana nihiku na ekasamento anyu, pooti onvekela munna orina waamini woolipa wiira okhale “tiretoore a efesta.” (Yoh. 2:8) Vakhala wiira munoomutthokiherya apalano ootheene a ekasamento anyu, owo pooti okhaliherya wiira itthu seette ntoko muniphavela anyu ni ekasamento anyu ekhale yoottittimiheya.

20. Etthu xeeni ale anrowa othelana anireerela aya ohiliyala?

²⁰ Nuumala oweha itthu iya sootheene sinihela muhina olokiherya ekasamento, pooti wiira mooxanka vakhaani. Masi muhiliyale wiira ekasamento ti ya nihiku nimosa paahi. Musuweleke wiira nihiku munrowa anyu othela, munrowa opaceryaka omurumeela Yehova hoothe ni mwaarinyu. Mwiimananiheke wiira ekasamento anyu ekhale yoohaattiheriwa itthu ni yoottittimiheya. Mukhaliheriwaka ni Yehova munoowerya olokiherya ekasamento anyu. Nto mmuroromeleke Yehova ni murima wootheene. Okathi munrowa anyu wuupuwelaka itthu siiraneyale, munrowa wuupuwelaka itthu sooreera, soohakalaliha ni khamunrowa othanana. — Esal. 37:​3, 4.