Muhihiye olipiha ompatthani anyu ni Yehova

1. Itthu xeeni apinaatamu anipirisari aya wiira ahihiye okhala akumi? (Matheyo 5:3)

YEHOVA onnisuwela itthu apinaatamu anipirisari aya. Mwa ntakiheryo, wiira nihihiye okhala akumi, nihaana okhalana yoolya, ikuwo soowara ni opuro wookhala. Naahikhalane itthu iyo, hiyo pooti okhalana mixankiho aahiiso okhwa. Nave Yehova onnisuwela wiira yookhala etthu ekina ya efaita yinceene, apinaatamu anipirisari aya. Etthu ene tiila: Owo onipattunxe wiira nimusuweleke ni weettela malakiheryo awe. (Mmusome Matheyo 5:3.) Nto naaphavelaka ophwanya ohakalala weekeekhai, nihaana ohihiya omusuwela ni omuroromela.

2. Mukhalelo ahu onilikana sai ni nasimola?

² Moolumo ala oowi “omusuwela Muluku”, anitaphulela exeeni? Nttaava na ekereku, moolumo ala animooniherya mutthu oohaawa aahiiso onivekela esimola. Nkahaya mmuupuwele mutthu onivekela esimola owanre ene itarapo ni okilaathale ene waattamela mphironi. Owo khoreere ohasuwa ni ootteettheya mwaha woowi khoreere ovoliwa etala. Nto mwaha wa makhalelo awe, atthu anceene khaniphavela omwaattamela. Othana, nsuwa ninnimpaha vanceene, nave ohiyu onniriiriwa mwaha woohikhalana opuro wookhala. Nasimola owo, onnisuwela wiira ohaana okhaliheriwa wiira ohihiye okhala mukumi ni okhalana ikuru. Mwa enamuna emosa-ru, mutthu oniphavela omusuwela Muluku, onnisuwela wiira ohaana okhaliheriwa ni Muluku. Tivonto, mutthu owo onniimananiha osoma malakiheryo Yehova onaavaha awe atthu animphenta.

3. Mwaha ola, ninrowa othokorerya exeeni?

³ Mwaha ola, wanipacerya ninrowa oweha etthu nniixutta ahu ni muthiyana a oFeniisia, yoowo anvekenle Yesu wiira omukhaliherye. Yoowiiraneya ya muthiyana ole, ennooniherya mikhalelo 3, seiyo ale aniphavela omusuwela Muluku anireerela aya okhalana ni wooniherya. Nuumala-vo, ninrowa othokorerya ntakiheryo na murummwa Pedru, Paulo ni mwene Davidi, yaawo yaarina waamini woolipa.

NTAKIHERYO NOOLOKA NA WIIYEVIHA, OTHIPELELA NI WAAMINI

4. Etthu xeeni yaamwiirihale muthiyana a oFeniisia orowa olavula ni Yesu?

⁴ Ekwaha emosa, muthiyana a oFeniisia aahirowa olavula ni Yesu. Mwanawe mwaamuthiyana aanihaawa “vanceene mwaha wa nlaikha nootakhala” nanvanre. (Math. 15:​21-28) Muthiyana ole aahikhoroma, onamuxonttela Yesu wiira omukhaliherye mwanawe. Nrowe niwehe mikhalelo 3 muthiyana ole oonihenrye awe ni moota nikhanle ahu ootakiha.

5. Yesu aamwaakhunle sai muthiyana a oFeniisia? Mikhalelo xeeni muthiyana a oFeniisia oonihenrye awe? (Nwehe eteseenyu.)

⁵ Muthiyana ole a oFeniisia, aahooniherya wiiyeviha weekeekhai. Etthu xeeni enniiriha ohimya siiso? Okhala wiira khoonale wiira Yesu aahinveha, mwaha wa enamuna aamwaakhunle awe. Yesu aahimulikanyiha muthiyana ole ni axaana a alapwa. Okhala wene, alapwa yaahuuwa ni atthu yahaakhanle ayuda. Mwaari mwa nyuwo, mwaarowa woonela sai moota Yesu aakhunle awe? Niireke mwaarowa wuupuwela wiira Yesu ohooveehani ni mwaamuhiya onvekela nikhaliheryo? Masi muthiyana a oFeniisia khaapanke eyo. Nave ohiya paahi wooniherya wiiyeviha, masi-tho owo aahooniherya mukhalelo mukina, eyo piiyo, othipelela. Ninniweha eyo, okathi aahaahiyale awe onvekela Yesu wiira omukhaliherye. Etthu xeeni yaamwiirihale othipelela? Waari mwaha wa omwaamini Yesu. Nto okathi Yesu oonale awe waamini woolipa wa muthiyana ole, owo aahimukhaliherya. Muhiliyale wiira Yesu iira omulenle ene niinaano-ru wiira: “Muluku okirumme orowa wa atthu a Isarayeli paahi, yaawo ari ntoko ipwittipwitthi sirimenle.” Nto Yesu aahipaka ele muthiyana ole aavekenle awe, oomolaka nlaikha nanvanre mwanawe mwaamuthiyana.

6. Ntakiheryo na muthiyana a oFeniisia, ninniixuttiha exeeni?

⁶ Naaphavelaka ottottela mureerelo malakiheryo a Yehova, nihaana otthara ntakiheryo na muthiyana a oFeniisia. Nihaana okhala atthu oowiiyeviha, oothipelela ni okhalana waamini woolipa. Atthu oowiiyeviha, tanithipelela omuxonttela Muluku wiira aakhaliherye. Nave nihaana omwaamini Yesu ni waaroromela atthu onaaruma awe wiira yaavaheke malakiheryo awiixutti awe. (Math. 24:​45-47) Nakhalana mikhalelo iyo, nnoomusiveliha Yehova ni Yesu, nto awo anoonikhaliherya okhalana waamini woolipa. (Mulikanyihe ni Yakobo 1:​5-7.) Nrowe niwehe moota Yehova onneettiha awe ni onnivaha awe itthu nimpirisari ahu wiira niphwanye ohakalala weekeekhai. Nave nnooweha etthu nniixutta ahu ni ntakiheryo na murummwa Pedru, Paulo ni mwene Davidi.

MMUTAKIHAKA PEDRU, MUHIHIYE OSOMA NUULUMO NA MULUKU

7. Muteko xeeni Pedru aavahiwe awe? Etthu xeeni aareerela awe opaka? (Aheeperi 5:14–6:1)

⁷ Nrowe niwehe ntakiheryo na murummwa Pedru. Owo aari mmosa a ayuda yaapacenrye osuwela wiira Yesu aari Mesiya. Pedru aanisuwela wiira Yehova aahimuruma Yesu wiira owiixuttihe atthu “moolumo a okumi woohimala.” (Yoh. 6:​66-68) Ohinatthi otthikela wiirimu, Yesu aahimuleela murummwa Pedru wiira: “Mulyiheke ipwittipwitthi saka.” (Yoh. 21:17) Murummwa Pedru aahivara oratteene muteko ole aavahiwe awe ni Yesu. Nto Yehova aahimuruma olepa ikarta piili, seiyo siri mbiibiliyani. Hata vaari siiso, murummwa Pedru aahaana osoma Nuulumo na Muluku. Mwa ntakiheryo, owo aanisoma oratteene ikarta saalempwale ni murummwa Paulo. Ekeekhai wiira, Pedru aanisuwela wiira itthu sikina Paulo aalempe awe “ti soovila wiiwexexa”. (2 Ped. 3:​15, 16) Hata vaari siiso, owo khaahiyale osoma. Pedru aanikupali wiira Yehova ammukhaliherya wiiwexexa ni weettela “yoolya yoolipa”, yeeyo Paulo aarummwale awe olepa ikarta sawe. — Mmusome Aheeperi 5:14–6:1.

8. Etthu xeeni Pedru aapanke awe okathi aavahiwe awe malakiheryo ni nlaikha na Muluku?

⁸ Murummwa Pedru aahooniherya wiira animwaamini Yehova, okathi aatthara awe malakiheryo aavahiwa awe. Mwa ntakiheryo, okathi ari awe epooma ya oYope, owo aahoonihiwa etthu yootikiniha. Nlaikha naahimuruma Pedru wiiva ni okhuura inama saahimmwa okhala sa mwiikho ni nlamulo aavahiwe awe Moise. Nto Pedru, yoowo aari muyuda aanoona okhala etthu yoohiloka opaka ele nlaikha nle naamurumme aya. Wanipacerya, Pedru aakhunle so: “Pwiya, nkinikhuura nnakhala vakhaani, maana khenakele mwaano mwaka etthu yoohiloka ni enikhoottihiwa ni nlamulo.” Vano nlaikha naahimuleela wiira: “Muhihimyeke okhala soohiloka itthu Muluku oreerinhe awe.” (Mit. 10:​9-15) Pedru aahipaka etthu aarummwale awe ni aahituruka muupuwelo awe. Ninsuwela sai? Moohipisa nuumala yoowoonihiwa ele, alopwana araru yaahiphiya etthoko Pedru aamanke awe. Pwiya aya, yoowo ahaakhanle muyuda aihaniwa Korneelio, aahaaruma omurowela Pedru. Ayuda yaanaathokorerya ale yahaakhanle ayuda okhala atthu oohiloka. Nto ehinatthi yoowoonihiwa ele, Pedru khaarowa weemererya okela empa ya Korneelio mwaha woowi Korneelio khahiyo aari muyuda. (Mit. 10:​28, 29) Masi, moowaakuveya Pedru aaheemererya malakiheryo aavahiwe awe ni Yehova. (Mir. 4:18) Nto aahimulaleerya Korneelio, amusi awe ni apatthani awe, yaawo yaari vatthokoni va Korneelio. Tthiri Pedru aahihakalala vanceene okathi aaweha awe yeemereryaka ekeekhai, waakhela ikuru soowaarya ni apatisiwaka. — Mit. 10:​44-48.

9. Itthu xeeni piili sinniiriha osoma ikeekhai soovila wiiwexexa?

⁹ Nimutakihaka Pedru, khula nihiku nihaana osoma Nuulumo na Muluku. Okathi ninsoma ahu, nnimwiixuttaka itthu sookhweya wiiwexexa. Nave nihaana wiimananiha osoma ni wiixutta ikeekhai sa mbiibiliyani soovila wiiwexexa. Nto wiira nipake eyo, nihaana wiivaha okathi. Musuweleke wiira wiimananiha iwo khahiyo ti wa mahala. Mwaha wa xeeni? Mwaha wa itthu piili. Yoopacerya, nnimwiixutta itthu sinnikhaliherya wuncererya omphenta ni omuttittimiha wahu Yehova. Ya nenli, okathi ninrowa ahu wiixuttaka itthu sikina nahaasuwela ahu voohimya sa Yehova, iyo sinooniiriha waaleela atthu akina. (Arom. 11:33; Wis. 4:11) Ntakiheryo na Pedru ninniniixuttiha etthu ekina. Etthu ene tiila: Okathi wiiwexexa wahu ikeekhai sa mbiibiliyani onilokiheriwa aya, moowaakuveya nihaana oturuka muupuwelo ahu ni moota nimpaka ahu itthu. Napaka eyo, Yehova khonrowa ohiya oneettiha ni nnoowerya omukokhorela moororomeleya.

MMUTAKIHAKA PAULO, MUKHALANEKE MIKHALELO SINIMUSIVELA YEHOVA

10. Moovarihana ni Akolosi 3:​8-10, etthu xeeni ninreerela ahu opaka wiira nimusiveliheke Yehova?

¹⁰ Naaphavelaka ophwanya ohakalala wekeekhai ni omweemererya Yehova oneettiha, nihaana okhalana mikhalelo sinimusivela. Nto Yehova onninooniherya mikhalelo iyo mbiibiliyani. Murummwa Paulo olempe wiira nihaana orula “omutthu wa khalai” ni owara “omutthu wa niinaano”. (Mmusome Akolosi 3:​8-10.) Nto onipirisari okathi ni wiimananiha wiira nikhalane mikhalelo sinimusivela Muluku. Nrowe nithokorerye ntakiheryo na Paulo. Okathi aari awe mmiravo, owo aaniimananiha wiira omusiveliheke Muluku. (Akal. 1:14; Afil. 3:​4, 5) Masi, Paulo khaasuwela moota woomukokhorela Muluku ntoko oniphavela awe. Nave ohiya paahi ohisuwela itthu Yesu aixuttihale awe, Paulo aari mutthu oowiixinnuwiha. Tthiri owo aari “oowiisoona” ni aahikhalana mikhalelo sikina soohiloka. — 1 Tim. 1:13.

11. Marukunuxo xeeni Paulo aapanke awe? Mutthokiherye.

¹¹ Ohinatthi okhala mukristau, Paulo aari mutthu oowaakuva onanariwa. Yoowiiraneya eri eliivuru ya Miteko, ennooniherya wiira onanariwe ene, Paulo “aahilakela waahaaxa ni owiiva awiixutti” a Yesu. (Mit. 9:1) Nuumala okhala mukristau, Paulo aahiimananiha vanceene wiira orule omutthu wa khalai. (Aef. 4:​22, 31) Hata vaari siiso, waahikhala okathi Paulo ni Baarnaba, yaanyakulihanne aya vanceene. (Mit. 15:​37-39) Okathi ole Paulo khaapanke itthu ntoko Muluku oniphavela awe. Masi hata vaari siiso, owo khaahiyale wiimananiha omusiveliha Yehova. — 1 Akor. 9:27.

12. Etthu xeeni yaamukhalihenrye Paulo opaka marukunuxo mookumini mwawe?

¹² Murummwa Paulo aahiwerya opaka marukunuxo mookumini mwawe, okhala wiira aari mutthu oowiiyeviha ni khairoromela mmansawe. (Afil. 4:13) Omutakihaka Pedru, Paulo aaroromela “ikuru sinikhuma wa Muluku”. (1 Ped. 4:11) Hata vaari siiso, ikwaha sikina Paulo aanifalyari ni aaniriipiwa murima. Nto okathi owo, Paulo aanuupuwela itthu sooloka aapakeliwe awe ni Tiithi awe a wiirimu. Eyo yaanimukhaliherya ohihiya opaka marukunuxo wiira omusiveliheke Muluku. — Arom. 7:​21-25.

13. Ninrowa otthara sai ntakiheryo na Paulo?

¹³ Nimutakihaka Paulo, moohicikha okathi ovinre nimurumeelaka Yehova, nihaana ohihiya opaka marukunuxo. Ntoko niixutte ahu mwaha ola, eyo enihela muhina orula omutthu wa khalai ni owara omutthu wa niinaano. Hata okathi mukina nifalyariki aahiiso nimulavulelaka mwa enamuna yoohiloka mutthu mukina, nihuupuweleke wiira khaninrowa owerya opaka marukunuxo. Nto nihaana wiimananiha oturuka muupuwelo ahu ni moota nimpaka ahu itthu. (Arom. 12:​1, 2; Aef. 4:24) Nihiliyale ela: Akhala wiira nimphavela owara omutthu musya, nihaana omweemererya Yehova oniixuttiha ni osuwela ele onnivekela awe wiira nipakeke.

MMUTAKIHAKA DAVIDI, MMWEEMERERYE YEHOVA WOOKHAPELELANI

14-15. Yehova onaakhapelela sai arumeyi awe? (Esaalimu 27:5) (Nwehe vakaapani.)

¹⁴ Naaphavelaka ophwanya ohakalala weekeekhai, nihaana omweemererya Yehova onikhapelela. Mwa inamuna xeeni Yehova onnikhapelela awe? Etthu xeeni nikhanle ahu oopaka wiira Yehova onikhapeleleke?

¹⁵ Mwene Davidi aahilavula moota Yehova onnikhapelela awe okathi wa mixankiho. (Musome Esaalimu 27:5.) Yehova onaakhapelela sai arumeyi awe olelo-va? Owo onnaakhapelela owaakiheryaka khula etthu yaarowa ohonona ompatthani arina aya ni yena. Nave onnileiherya wiira khuuvo kapwitthi opakeliwe waahaaxa arumeyi awe, onrowa ovara muteko. (Esal. 34:7; Yes. 54:17) Nnaamwi Satana ni ale animukhaliherya arina ene owerya, awo khanrowa owerya onikumiherya mixankiho sihinimala. Hata aweryaka oniiva, Yehova onrowa onihihimuxa muhoolo. (1 Akor. 15:​55-57; Wis. 21:​3, 4) Nave Yehova onninikhapelela onivahaka ikuru wiira niwerye ovilela mixankiho saarowa oniiriha ohiya omurumeela. (Mir. 12:25; Math. 6:​27-29) Tiithi ihu oophenta a wiirimu oonivaha anna ni arokora, yaawo annikhaliherya. Nave oonivaha axitokweene wiira anixukuryeke para onilipiha. (Yes. 32:​1, 2) Okathi ninrowela ahu mithukumano, ninniweha enamuna ekina Yehova onnikhaliherya awe ni onikhapelela. — Ahep. 10:​24, 25.

16. Yehova aamukhapelenle sai Davidi?

¹⁶ Okathi Davidi aamwiiwelela awe Yehova, owo aanimukhapelela omukhaliheryaka opaka soothanla sooloka, seiyo samphwanyiha ohakalala weekeekhai. (Mulikanyihe ni Miruku 5:​1, 2.) Masi okathi ahaamwiiwelela awe Yehova, Davidi saanimphwanya mixankiho mwaha wa soothanla sawe. (2 Sam. 12:​9, 10) Nave ikwaha sikina, Davidi saanimphwanya mixankiho mwaha wa soothanla sa atthu akina. Okathi eyo yiiraneya aya, Davidi aanimuleela Yehova itthu sootheene saamuxankiha. Nto Yehova aanimmaaliha ni omulipiha Davidi, omulipiheryaka wiira aanimphenta ni ammukhapelela. — Esal. 23:​1-6.

17. Ninrowa otthara sai ntakiheryo na Davidi?

¹⁷ Nnoowerya omutakiha Davidi, niphavelasaka malakiheryo a Yehova nihinatthi opaka yoothanla. Hata Yehova onikhapelelaka, ikwaha sikina pooti oniphwanya mixankiho mwaha wa soothanla sahu soohiloka. (Akal. 6:​7, 8) Okathi sinniphwanya aya mixankiho mwaha wa soothanla sa atthu akina, nihaana omutthukulela Yehova murima ahu, nimuleelaka itthu sootheene. Nave nikupaliki wiira onoonikhaliherya ni onikhapelela mmuupuweloni ni murima ahu. — Afil. 4:​6, 7.

MUHIHIYE OLIPIHA OMPATTHANI ANYU NI YEHOVA

18. Muupuwelo xeeni atthu anceene arina aya? Ninrowa owerya sai ohihiya olipiha ompatthani ahu ni Yehova? (Nwehe ifootu.)

¹⁸ Yoolepa ya mwaakha wa 2026, eni: “Oohakalala taale anisuwela wiira ahaana omusuwela Muluku.” Olelo-va, ti vooloka opaka ele Yesu aahimmye awe nimuroromelaka Yehova ni malakiheryo onnivaha awe. Mwaha wa xeeni? Mwaha woowi atthu akina khaniphavela omusuwela Muluku. Akina annikupali wiira Muluku ookhala, masi khanimukokhorela ntoko oniphavela awe. Nave atthu akina aniroromela miruku ni malakiheryo a apinaatamu. Nto, niheemererye ohapuxiwa ni muupuwelo wa atthu awo. Ninrowa owerya sai ohihiya olipiha ompatthani ahu ni Yehova? Nnoowerya nihihiyaka osoma Nuulumo na Yehova, okhalana mikhalelo sinimusivela, omwiiwelela ni weemererya wiira onikhapeleleke.