Yehova onimookhaliheryani okathi muniriipiwa anyu murima

1-2. Itthu xeeni saamuriipiha murima murummwa Paulo ni sikhanle ooniriipiha murima? Ntakiheryo nawe ninnikhaliherya sai? (Aroma 7:​21-24)

OKATHI nimmuupuwela ahu murummwa Paulo, ninnisuwela wiira aari mutthu aalalenrye ilapo sinceene, aalempe iliivuru sinceene siri mbiibiliyani ni aari mutthu aasuwela wiixuttiha. Nave murummwa Paulo, aari mulopwana oolipa murima ni oororomeleya. Masi ikwaha sikina, owo aaniriipiwa murima, okhulumuwa ni oxanka. Anamunceene a hiyo, ninnikhalana miyoonelo iyo soohiloka Paulo aarina awe.

² Mmusome Aroma 7:​21-24. Ekarta aalepenle awe aroma, Paulo aahiromola miyoonelo sikina aarina awe. Nave hiyo pooti okhalana miyoonelo iyo. Murummwa Paulo aari mukristau oororomeleya ni animwiiwelela Muluku. Masi, okhala wiira aayariwe orina ene etampi, ikwaha sikina vaanimuxankiha opaka ele Muluku oniphavela awe. Nave okathi uupuwela awe itthu soohiloka aapanke awe ohinatthi okhala mukristau, owo aaniriipiwa murima. Nave aanixanka okathi oona awe wiira oretta wanwererya khiwaarowa ovira.

3. Makoho xeeni ninrowa ahu othokorerya mwaha ola? (Nwehe enoota.)

³ Nnaamwi okathi mukina murummwa Paulo aariipiwa murima, owo aaniimananiha wiira ohimakeleke wuupuwela itthu saamuriipiha murima.a Mwaha ola, ninrowa othokorerya makoho ala: Etthu xeeni yaamwiirihale Paulo ohimya wiira “nkireere otakhaliwa”? Etthu xeeni yaamukhalihenrye Paulo ohimakela wuupuwela itthu saamuriipiha murima? Itthu xeeni sinrowa onikhaliherya okathi ninriipiwa ahu murima?

ITTHU XEENI SAAMURIIPIHA MURIMA PAULO?

4. Itthu xeeni saamuriipiha murima Paulo?

⁴ Itthu soohiloka aapanke awe ohinatthi okhala mukristau. Ohinatthi okhala mukristau, Paulo aasuweliwa okhala Saulo a oTarso. Nto, okathi owo aahipaka itthu sinceene soohiloka, seiyo muhoolo mwaya aathanana awe. Mwa ntakiheryo, owo aahikhala ni aaheemererya wiiviwa wa mulopwana oororomeleya aihaniwa Siteefano. Nto Paulo uupuwela wiira aapaka etthu yooloka. (Mit. 7:58; 8:1) Nave Paulo aanaalupattha ni waathokorerya voohiloka makristau. — Mit. 8:3; 26:​9-11.

5. Paulo oonela sai itthu soohiloka aapanke awe ohinatthi okhala mukristau?

⁵ Nuumala okhala mukristau, murummwa Paulo aaniivaha nthowa mwaha wa itthu soohiloka aapanke awe khalai. Vanikhala ntoko wiira, hata saavinre iyaakha sinceene, owo aaniriipiwa murima mwaha wa itthu iyo soohiloka uupuwela awe. Mwa ntakiheryo, okathi aalepenle awe akorinto ekarta awe yoopacerya, woonasa wene mwaakha 55 Nuumala Kristu Orwa, owo aahimmye so: “Nkiniphwanela wiihaniwa murummwa, maana kaanilupattha muloko wa Muluku.” (1 Akor. 15:9) Nuumala ovira iyaakha 5, ekarta aalepenle awe makristau a wEefeso, owo aahimmye wira miyo ka “mutthu mwaamukhaanixa mwa atthu ootheene oororomeleya”. (Aef. 3:8) Nave aahimuleela Timootheyo wiira “khalai kanveeha Muluku, kaalupattha arumeyi awe ni kaari mutthu oowiisoona.” (1 Tim. 1:13) Okathi aaxukurya awe miloko, Paulo aanixanka okathi aaphwanya awe anna aahiiso amusi aya anna awo, yaawo aalupattha awe khalai.

6. Etthu xeeni ekina yaamuriipiha murima Paulo? (Nwehe enoota.)

⁶ Mwiiwa waaheliwe mweerutthuni mwawe. Paulo aahilavula wiira aahikhalana muxankiho, yoowo waamuriipiha murima ni waalikana ni “mwiiwa” waaheliwe mweerutthuni mwawe. (2 Akor. 12:7) Paulo khonihimya mooluluwanya muxankiho ene aarina awe. Masi moolumo orumeelale awe, annooniherya wiira muxankiho owo, waanimwiiriha woona owereya vanceene. Woonasa wene, waari oretta wa mweerutthuni, mmuupuweloni aahiiso etthu ekina.b

7. Xeeni ikwaha sikina vaamuxankiha aya Paulo opaka itthu sooloka? (Aroma 7:​18, 19)

⁷ Soovonya sawe. Ikwaha sikina, Paulo aanixanka mwaha wa soovonya sawe. (Mmusome Aroma 7:​18, 19.) Owo ohimmye wiira ikwaha sikina khaapaka itthu sooloka, seiyo aaphavela awe opaka. Nto aapaka itthu soohiloka, seiyo ahaaphavela awe. Masi owo aaniimananiha olokiherya mikhalelo sawe. (1 Akor. 9:27) Hata vaari siiso, okathi mukina anipaka itthu soohiloka. Tthiri owo aaniriipiwa murima okathi aapaka awe itthu soohiloka, seiyo aimananiha awe oxintta!

ITTHU XEENI PAULO AAPAKA AWE OKATHI AARIIPIWA AWE MURIMA?

8. Etthu xeeni Paulo aapaka awe, yaamukhaliherya opaka marukunuxo?

⁸ Ikarta aalempe awe, sinnooniherya wiira Paulo aahaakhaliherya makristau, woona wiira ikuru sa Muluku saamwaakhaliherya oxintta soophavela ni mikhalelo soohiloka. (Arom. 8:13; Akal. 5:​16, 17) Ikwaha sinceene Paulo aahihimya mikhalelo ni itthu soohiloka makristau yaareerela aya okhootta wiira amusiveliheke Yehova. (Akal. 5:​19-21, 26) Eyo enooniherya wiira Paulo aanisuwela marukunuxo aareerela awe opaka. Nave aaniimananiha osoma Soolempwa wiira osuwele marukunuxo aareerela awe opaka ni moota woopaka. Nto, nikupaliki wiira Paulo aaneettela malakiheryo aavahale awe atthu akina wiira amusiveliheke Muluku.

9-10. Itthu xeeni saamukhaliherya Paulo ohihiya ohakalala? (Aefeso 1:7) (Nwehe eteseenyu.)

⁹ Nnaamwi ikwaha sikina Paulo aakhulumuwa, owo aaniimananiha wuupuwela itthu sooloka. Mwa ntakiheryo, Paulo aanihakalala vanceene okathi aaleeliwa awe itthu sooreera siiraneya miloko sa ilapo sikina. (2 Akor. 7:​6, 7) Nave aanihakalala mwaha wookhalana ompatthani wooloka ni anna ni arokora. (2 Tim. 1:4) Etthu ekina yaamuhakalaliha waari osuwela wiira aanimusiveliha Yehova. Tivonto, aanimukokhorela Muluku ni “murima wooloka”. (2 Tim. 1:3) Okathi aatthukweliwe awe mukhatteya oRoma, Paulo aahaatumererya anna ni arokora wiira atteeliweke “murima mwa Apwiya.” (Afil. 4:4) Moolumo a Paulo annooniherya wiira khahiyo okathi wootheene uupuwela mixankiho ni soovonya sawe. Nto okathi samphwanya aya miyoonelo soohiloka, owo aanuupuwela itthu sooloka, seiyo saamuhakalaliha.

¹⁰ Etthu ekina yaamukhaliherya murummwa Paulo ohihiya ohakalala, waari mukuttho woowoopola. Owo aanisuwela wiira Yehova aanimphenta ni aahivaha mukuttho para yena. (Akal. 2:20; mmusome Aefeso 1:7.) Tthiri Paulo aanikupali wiira Yehova ammulevelela itampi sawe orumeelaka mukuttho wa Yesu. (Arom. 7:​24, 25) Nnaamwi khalai aapanke itthu soohiloka ni aavonya, Paulo khaahiyale ohakalala onvarelaka “muteko Muluku”. — Ahep. 9:​12-14.

11. Ntakiheryo na Paulo, ninnilipiha sai?

¹¹ Ntoko Paulo, pooti onixankihaka wuupuwela, opaka itthu ni olavula mwa enamuna enimusivela Yehova. Nto ikwaha sikina, hiyo pooti wuupuwelaka so: “Miyo nkireere otakhaliwa!” Murokora oniihaniwa Elizac onnihimya moonelo awe, oriki: “Onnikisivela wuupuwelela moota murummwa Paulo aaxinttale awe mixankiho sawe. Nave kinnihakalala osuwela wiira mixankiho khasinikiphwanya mekhaka. Nto, ntakiheryo nawe, ninnikikhaliherya osuwela wiira Yehova onniweha mixankiho sinaaphwanya arumeyi awe.” Ntoko Paulo, etthu xeeni enrowa onikhaliherya ohihiya ohakalala hata siniphwanyaka mixankiho?

ITTHU XEENI NIKHANLE AHU OOPAKA OKATHI NINRIIPIWA AHU MURIMA?

12. Nipakeke exeeni wiira nihihiye ohakalala?

¹² Nihihiye ovara itthu sinilipiha waamini wahu. Ohihiya ovara miteko sa Muluku, onoonikhaliherya okhalana moonelo wooloka. Nave onoolikana ni opaka itthu sinnikhaliherya okhalana okumi wooloka. Okhala wene, ninnikhala saana naalyaka yoolya yooloka, opaka esersiisiyu ikwaha sinceene ni orupa okathi munceene. Mwa enamuna emosa-ru, hiyo ninnisuwela wiira ti vooloka omusoma Biibiliya khula nihiku, olaleerya, orowela mithukumano, olokiherya ni okomentari okathi wa mithukumano. Itthu iyo, sinninihakalaliha ni sinninikhaliherya oxintta miyuupuwelo soohiloka. — Arom. 12:​11, 12.

13-14. Ohihiya ovara miteko sa Muluku, onaakhaliherya sai anna ni arokora?

¹³ Nrowe nithokorerye yoowiiraneya ya John. Orina ene iyaakha 39, owo aahisuwela wiira ookhalana oretta wa kanser. Nuumala osuwela, aahixanka vanceene ni aanoova. Okhala wiira aari mmiravo, John khaakupali wiira aahikhalana kanser. Okathi owo, mwanawe mwaamulopwana aarina iyaakha 3. Etthu xeeni yaamukhalihenrye John ohimakela oriipiwa murima? Owo onihimya so: “Nnaamwi kaaxankale, kaaniimananiha wiira miyo ni emusi aka nihihiye ovara itthu saalipiha waamini wahu. Hata okathi mukina naatteliwa miteko, hiyo naanirowela mithukumano sootheene, olaleerya ni naanimulompa Muluku vatthokoni.” Uupuwelaka itthu siiraneyale, John onihimya so: “Nnaamwi wanipacerya kaaxankale ni woova, masi ophenta ni ikuru sa Yehova saahikikhaliherya ohitepa oriipiwa murima. Kinnikupali wiira Yehova onimookhaliheryani ntoko okikhalihenrye awe.”

¹⁴ Eliza, yoowo nimulavunle ahu ittima sivinre onihimya so: “Khula okathi kinirowela aka mithukumano ni omusoma Biibiliya, kinnikupali wiira Yehova onnikiwiriyana ni onnikiphenta. Osuwela eyo, ennikihakalaliha vanceene.” Mutokweene a esirkwiitu a wÁfrica oniihaniwa Nolan ni mwaarawe oniihaniwa Diane, anihimya so: “Hata nikhulumuwaka ni oriipiwa murima, hiyo khannihiya ovekela, omusoma Biibiliya, orowela mithukumano ni olaleerya. Nto Yehova onninikhaliherya ohihiya ohakalala. Khaninliyala wiira Yehova onrowa onikhaliheryaka ni onireeliha. Ninnikupali eyo, hata nihisuwelaka moota onrowa awe opaka eyo.”

15. Itthu xeeni nikhanle ahu oopaka wiira nixintte oriipiwa murima? Nvahe nlikanyiho.

¹⁵ Sookhala itthu sikina nikhanle ahu oopaka wiira nixintte oriipiwa murima. Nkahaya muupuwele wiira onoowereyani muthana. Niireke wiixookola aahiiso waatteerya paahi onniphiyerya wiira mpenuwe? Ankhi mwapaka eyo, nlelo munoona owereya? Nyuwo munoopirisari waavya manera makina aahiiso olavula ni meetiku. Mwa enamuna emosa-ru, wiira musuwele muxankiho oniwiirihani oriipiwa murima ni moota wooxintta, muhaana omusoma Biibiliya ni iliivuru sinimutthokiherya Biibiliya. Nave, muhaana olavula ni munna aahiiso murokora orina waamini woolipa wiira ookhaliheryeni. Nrowe nthokorerye inamuna sikina sinrowa wookhaliheryani.

16. Exeeni enrowa wookhaliheryani osuwela etthu eniwiirihani oriipiwa murima ni oxanka? (Esaalimu 139:​1-4, 23, 24)

¹⁶ Munvekeleke Yehova wiira ookhaliheryeni osuwela itthu munipirisari anyu. Yehova aanimusuwela saana mwene Davidi. Nave Davidi aanisuwela eyo. Tthiri eyo ti etthu yaamwiirihale Davidi onvekela Yehova wiira omukhaliherye osuwela miyuupuwelo sawe saamwiiriha oxanka. (Musome Esaalimu 139:​1-4, 23, 24.) Nave nyuwo pooti onvekela Yehova wiira ookhaliheryeni osuwela etthu eniwiirihani oxanka ni moota mukhanle anyu ooxintta. Nave pooti wiipakela makoho anrowa wookhaliheryani. Mwa ntakiheryo, mwiikoheke so: Etthu xeeni enikiiriha oxanka? Kiireke yookhala etthu enikiiriha okhalana miyuupuwelo soohiloka? Kiireke kinimakela wuupuwela paahi itthu soohiloka?

17. Myaha xeeni munireerela anyu osoma sinrowa wookhaliheryani? (Nwehe efootu.)

¹⁷ Musomeke myaha sinivarihana ni muxankiho anyu. Ikwaha sikina, ti vooreera osoma mikhalelo sa Yehova, maana sinninlipiha vanceene. Mwa ntakiheryo, murummwa Paulo aanoona wiira aaniphentiwa ni Yehova ni aanixukhurela okathi aasoma awe mikhalelo sa Yehova, ntoko olevelela. Nto mpakeke etthu emosa-ru Paulo aapaka awe. Nyuwo pooti orumeela Eliivuru Enaakhaliherya Anamoona a Yehova Otokosa Myaha Sikumiheriwe, Iversiikulu Sinaakhaliherya Makristau aahiiso iliivuru sikina sinimutthokiherya Biibiliya siniphwanyaneya nttaava nanyu, wiira mwiixutte itthu sikina sa omoriwa ikharari, olevelela ni ophenta woororomeleya wa Muluku. Mwaphwanya myaha sinookhaliheryani moovarihana ni muxankiho anyu, mpakeke elista ya myaha iyo. Nto mpweheke elista eyo opuro vanookhweelani oweha ni musomeke okathi munixanka anyu. Nave mwiimananiheke weettela ele munisoma anyu moovarihana ni muxankiho anyu. — Afil. 4:8.

18. Etthu xeeni yaakhalihenrye makristau makina?

¹⁸ Eliza, yoowo nimulavunle ahu wanipacerya wa mwaha ola, aahipacerya osoma yoowiiraneya ya Yoobi eri mbiibiliyani. Eliza onihimya so: “Okathi omosa-ru, saahikiphwanya mixankiho sinceene. Nto kaahisoma yoowiiraneya ya Yoobi. Owo aahikhalana mixankiho ni aahikhulumuwa vanceene. Hata aahaamusuwela mutthu aakumiherya mixankiho sawe, Yoobi khaahiyale okupali ni ororomela wiira Yehova ammukhaliherya.” (Yoobi 42:​1-6) Nave Diane, nimulavunle ahu ittima sivinre, onihimya so: “Miyo ni iyaka, naahipacerya osoma mikhalelo sa Yehova nirumeelaka iliivuru sahu sinimutthokiherya Biibiliya. Ninnimuxukhurela vanceene Yehova, mwaha woonikhaliheryaka otakiha mikhalelo sawe. Nto okathi ninriipiwa ahu murima mwaha wa soovonya sahu, ninnuupuwela wiira Yehova onniniixuttiha ni onikhaliherya okhalana mikhalelo sooloka. Nto eyo ennilipiha ompatthani nirina ahu ni Yehova.” — Yes. 64:8.

MUKUPALIKI WIIRA YEHOVA ONIMOOKHALIHERYANI NI WOOTTHUVELANI

19. Etthu xeeni ikwaha sikina ekhanle ooniiraneela, masi nikupaliki exeeni?

¹⁹ Hata neettelaka malakiheryo ootheene nithokorenrye ahu mwaha ola, eyo khenrowa omaliha oriipiwa wahu murima. Tthiri ikwaha sikina nnooxankaka ni oriipiwa murima. Masi nikhaliheriwaka ni Yehova, nnoowerya ohiya wuupuwela itthu sinniiriha oriipiwa murima ni nnookhala oomaaleleya. Nto nikupaliki wiira nnoohakalalaka okathi munceene, mwaha woowi nookhalana ompatthani wooloka ni Yehova ni ninnipaka itthu sinimusivela.

20. Khula nihiku nihaana opaka exeeni?

²⁰ Khula nihiku niheemereryeke wiira mixankiho, itthu siniiranenle khalai ni soovonya sahu siniirihaka ohihakalala. Okathi ninxanka ahu, Yehova onoonikhaliherya okhala oomaaleleya. (Esal. 143:10) Tthiri ninnilipelela elapo esya, yeeyo sihinrowa aya okhala itthu sinniriipiha murima. Khula nihiku ninrowa ovenyaka nihixankale, nave ninrowa ohakalalaka mwaha woomurumeela Muluku ahu oophenta, Yehova!