Mwaakhaliheryeke amusi anyu ahikhanle Anamoona a Yehova

1-2. Okathi mwaapacenrye anyu omusoma Biibiliya, amusi anyu yoonenle sai?

OLAVULAKA ni mulopwana aaphavela omutthara, Yesu aamulenle so: “Muroweke owaani, ori amusi anyu, mwaaleele itthu sootheene Yehova owiirenlyaaweni”. (Mar. 5:19) Yesu aahilavula eyo, maana aanisuwela wiira apinaatamu waasivela waaleela amusi aya itthu sikhumelenle niinaano.

² Nyuwo moonenle sai okathi mwaapacenrye anyu omusoma Biibiliya? Woonasa wene, mwaahihakalala ni mwaaniphavela waaleela amusi anyu itthu sooreera mwiixutta anyu! Masi pooti wiira amusi anyu khiyaasiveliwe osuwela wiira mwaasomihiwa Biibiliya ni Anamoona a Yehova. Nave pooti wiira, awo yaahipacerya woolupatthani. Akhala wiira eyo yaahiwiiraneelani, mwaha ola onimookhaliheryani osuwela etthu mukhanle anyu oopaka wiira muhihiye ororomeleya wa Yehova ni okhalana waataana wooloka ni amusi anyu.

3. Iponto xeeni ninrowa ahu othokorerya mwaha ola?

³ Mwaha ola, ninrowa othokorerya iponto iya sinittharelana: 1) Moota othunku onrowa aya onikhaliherya waathokorerya saana amusi ahu ahikhanle Anamoona a Yehova,a hata ahiphavelaka omusuwela Muluku, 2) etthu nikhanle ahu oopaka vakhala wiira annilavula aahiiso opaka etthu enniwereya, 3) moota opixa wahu murima onrowa aya waakhaliherya amusi ahu ni okupali wiira muhoolo awo pooti omurumeela Yehova, 4) moota nikhanle ahu oowooniherya wiira ninnaaphenta.

NWOONELEKE OTHUNKU

4. Yesu aawoonela sai ale yahaaphavela wiiwa ihapari aalaleya awe?

⁴ Yesu khaahiya weererya waakhaliherya atthu ale yahaaphavela wiiwa ihapari aalaleya awe. Owo aahimyale wiira aalikana ni mulopwana aavara muteko ematta ya ewuuva. Mulopwana owo, aahirumeela inamuna sinceene wiira okhaliherye mwiri awe wunnuwa ni wiima mihokorokho. (Luka 13:​6-9) Okathi Yesu aalavunle awe nlikanyiho nno, iira ovirihale ene iyaakha tthaaru omananihaka waakhaliherya ayuda omwaamini ni okhala awiixutti awe. Xeeni ohalaka wiimananiha vanceene waakhaliherya? Okhala wiira Yesu aaniwoonela othunku atthu. Nto eyo yaahimukhaliherya waapixerya murima.

5. Exeeni yaamwiiriha Yesu owoonelaka othunku atthareli awe yaari ayuda?

⁵ Yesu aaniwoonela othunku atthareli awe yaari ayuda, mwaha woowi ahooleli a itiini khiyaakhaliherya omusuwela Muluku. Owo aanaaweha atthu awo “ntoko ipwittipwitthi sihirina makampusi aya.” (Mar. 6:34) Ohalaka okathi vakhaani wiira iiviwe, Yesu aahinla nuumala oweha esitati ya oYerusalemu. Maana aanisuwela wiira atthu a esitati ele yaamookhwa mwaha wa ohimwaamini Yehova ni Yesu. (Luka 19:​41-44) Nimutakihaka Yesu, vakhala wiira nnoowoonelaka othunku amusi ahu ahikhanle Anamoona a Yehova, eyo enooniiriha waakhaliherya ni waalaleerya hata ahiphavelaka.

6. Xeeni ninreerela ahu waapixerya murima amusi ahu ahikhanle Anamoona a Yehova? (Akalaasia 6:9)

⁶ Mmusome Akalaasia 6:9. Hata niinaano-va amusi ahu ahiphavelaka omusuwela Yehova, nihaana waapixerya murima ni ohihiya waavarela “miteko sooreera”. Hiyo ninnisuwela wiira onnivira okathi wiira atthu ahiye itthu anikupali aya ni apacerye omwaamini Yehova. Niireke munnuupuwela wiira khalai khamwaarina nlipelelo ni khimwaamusuwela Muluku? (Aef. 2:12) Moohaanyiherya, nyuwo mwaapirisanri okhaliheriwa. Nto vakhala wiira munimwaapixerya murima amusi anyu ahikhanle Anamoona a Yehova, munimwaakhaliherya omusuwela Yehova.

MUHIWEHEXEXEKE MOOLUMO AAHIISO ITTHU SOOHILOKA ANIPAKA AYA

7. Exeeni woonasa wene, yaawiiriha axinnawe Yesu ohimwaamini yena?

⁷ Woonasa wene, axinnawe Yesu yaahiiwa miiriirya aapanke awe oGalileya. (Luka 4:​14, 22-24) Hata vari siiso, awo khiyaamini wiira Yesu aari Mesiya. (Yoh. 7:5) Mwaha wa xeeni? Biibiliya khonihimya etthu ene yaawiiriha. Masi onnooniherya itthu piili saawiiriha ayuda akina ohikhala awiixutti a Yesu. Akina yoova opacerya olupatthiwa ni mavisiinyu aya, yasuweliwa wiira yaanimwaamini Yesu. (Yoh. 9:​18-22) Akina yaanimusuwela Yesu okhuma enamwane awe, nto eyo yaanaaxankiha okupali wiira aari Mwaana a Muluku. (Mar. 6:​1-4) Woonasa wene, itthu iyo saahiwiiriha axinnawe Yesu ohimwaamini. Niireke itthu iyo ti siniwiiriha amusi anyu ohiphavelaka weemererya muhupi ninlaleya ahu?

8. Woonasa wene, etthu xeeni ekhanle oowiiriha amusi ahu olavula aahiiso opaka etthu moohireerela murima?

⁸ Muupuweleke etthu ewiirihale olavula aahiiso opaka etthu eyo. Woonasa wene, axinnawe Yesu yaari hoothe ni amusi aya, yaawo yaahimmye wiira “owo oroovahuwa.” (Mar. 3:21) Etthu xeeni yaawiirihale ohimya wiira Yesu aaroovahuwa? Biibiliya onnooniherya wiira okathi ole, Yesu aakhalela nthiti olaleerya ni waapenuxa atthu ni khaarina okathi woolya. (Mar. 3:20) Niireke axinnawe yuupuwela wiira Yesu khaawerya ovara itthu sikina ni aathipelela ovara muteko awe yoole paahi? Pooti wiira yuupuwela siiso. Amusi ahu pooti wuupuwelaka wiira ninnitepexa oviriha okathi munceene nimukokhorelaka Yehova. Akhala wiira anuupuwela siiso, nihaana owooniherya ni miteko ni moolumo ahu wiira na atthu ooreera murima.

9. Exeeni enrowa waakhaliherya amusi ahu oturuka muupuwelo aya sa moota aniwoonela aya Anamoona a Yehova? (1 Pedru 3:​1, 2) (Nwehe ifootu.)

⁹ Mweettelo anyu okhaleke wooreera. Moolumo ahu ni miteko sahu sooreera, pooti waakhaliherya amusi ahu oturuka muupuwelo aya voohimya sa Anamoona a Yehova. (Mmusome 1 Pedru 3:​1, 2.) Mwa ntakiheryo, mmuupuwele murokora otheliwe ni mulopwana ohinimurumeela Yehova. Mulopwana owo pooti wuupuwelaka wiira ori mekhawe aahiiso onyoonyiheya, okathi murokora owo onirowela awe mithukumano wala muteko woolaleerya. Vakhala wiira murokora owo khoniphavela wiira iyawe uupuweleke siiso, pooti oturuka eporokaraama awe ya ovara miteko sa Yehova wiira oviriheke okathi munceene ori ene ni iyawe. Murokora owo pooti orowa olaleerya okathi iyawe onaatteliwa awe miteko aahiiso ohinikhala awe owaani. Akhala wiira murokora owo onooturuka eporokaraama awe wiira omuhakalalihe iyawe, woonasa wene onoomukhaliherya iyawe oturuka moota oniwoonela awe Anamoona a Yehova.

10. Okathi atthu akina anilavula aya itthu sihinnisivela, ninrowa omutakiha sai Yesu?

¹⁰ Khahiyo wiira khula okathi amusi anyu anoovaanyihaayani, muhaana owaakhula. Okathi Yesu ootheriwe awe wiira aanilya ni owurya vanceene, owo kheerenrye wiixaakiha. Ohiya opaka eyo, owo aahaatumererya oweha itthu aapaka awe, wiira yoone vakhala wiira itthu ootheriwa awe saari sa ekeekhai. (Math. 11:19) Nave ntakiheryo nawe, naanooniherya wiira aahikhalana moonelo wooloka ni aari oohakalala. (Mulikanyihe ni Yohani 2:​2, 6-10.) Nimutakihaka Yesu, okathi atthu akina anilavula aya itthu sinninyoonya, nihiphaveleke wiixaakiha khula okathi. Ohiya-vo, miteko sahu sihaana owooniherya wiira na atthu ooreera murima ni oohakalala. Nto eyo pooti owiiriha atthu awo ohikupali itthu nnootheriwa ahu.

MWAAPIXERYEKE MURIMA NI MUKUPALIKI WIIRA ANOOPAKA MARUKUNUXO

11. Yesu aathokorerya sai axinnawe?

¹¹ Biibiliya onnooniherya wiira Yesu aanaapixerya murima axinnawe. Mwa ntakiheryo, vanikhala ntoko wiira okathi Yesu aapanke awe mwiiriirya awe woopacerya oKanani, axinnawe yaari vaavo. (Yoh. 2:​11, 12) Ntoko niwehale ahu wanipacerya, hata nuumala onweha opakaka mwiiriirya, awo khiyaamwaamini. Masi hata yahaamwaamini, Yesu khaahiyale waakhapelela. Biibiliya onnooniherya wiira nuuvira iyaakha tthaaru opanke ene mwiiriirya awe woopacerya oKanani, owo aahaalavuliha axinnawe mooreera murima. — Yoh. 7:​5-8.

12. Exeeni ekhanle oonikhaliherya okhalana nlipelelo wiira amusi ahu pooti opacerya omurumeela Yehova?

¹² Ninnisuwela wiira Yehova toomoriwa ikharari. Nto osuwela eyo enninikhaliherya okhalana nlipelelo wiira amusi ahu pooti othanla omurumeela Yehova. Okathi itiini soowootha sinrowa aya opwetexiwa, amusi ahu pooti wuupuwela wiira naanaaleela wiira eyo yaamwiiraneya.b (Wis. 17:16) Nto, yapacerya maxakha maalupale, awo pooti othanla omukokhorela Yehova hoothe ni hiyo. Okathi amusi ahu sinaaphwanya aya mixankiho, nihaana waakhaliherya. Woonasa wene, awo animweemererya ikeekhai sa mbiibiliyani akhala wiira ninnaaphenta ni waareerela murima.

MOONIHERYEKE WIIRA MUNNAAPHENTA

13. Hata nikhalelaka nthiti omurumeela Yehova, ninrowa wooniherya sai wiira ninnaathokorerya amusi ahu?

¹³ Hata nikhalelaka nthiti omurumeela Yehova, khanimphavela wiira amusi ahu yuupuweleke wiira khannaaphenta aahiiso khanimphavela oviriha okathi niri ene naawo. (Math. 7:12) Ninrowa owooniherya sai wiira ninnaathokorerya? Sookhala itthu sinceene nikhanle ahu oopaka, masi nrowe niwehe itthu vakhaani.

14-15. Ninrowa wooniherya sai wiira ninnaaphenta amusi ahu ahikhanle Anamoona a Yehova? Nvahe ntakiheryo.

¹⁴ Mulavulaneke ikwaha sinceene ni nwooniheryeke wiira munnaaphenta. Nnimooniherya wiira ninnaaphenta amusi ahu, akhala wiira ninnilavulana aahiiso waalikarela ikwaha sinceene. Mwa ntakiheryo, hiyo pooti owinviyarela mensaaxe, owinviyarela ifootu okathi ninkhuma ahu ifeeriya, okathi nneetta ahu mukwaha aahiiso nintthekula ahu ni apatthani ahu. Nave hiyo pooti waavaha eperesenti aahiiso waalepela ekarta. Okathi nimpaka ahu eyo, ninnikhalana waataana wooloka naawo. Nto vaavo nnaareerela ahu murima amusi ahu, eyo ennaakhaliherya woona wiira ninnaaphenta.

¹⁵ Nrowe nthokorerye yoowiiraneya ya murokora Ana, yoowo onikhala wArménia. Amusi awe aalimalela okhala hoothe okathi wa aniversaario ni ifesta sikina. Nuumala Ana okhala Namoona a Yehova, amusi awe yaahixanka, maana yuupuwela wiira Ana aamuhiya oviriha okathi ori ene naawo. Nave yaahixanka yuupuwelaka wiira yoothanla awe yammukumiherya mixankiho muhoolo. Ana aakhalihenrye sai amusi awe ohitepa oxanka? Owo onihimya so: “Okathi kinaaxukurya aka amusi aka, kinnaaleela itthu sooreera sinikiiraneela ni itthu kinimakela aka opaka. Nave kinnaalattula owaani ni kinnaasuweliha apatthani aka. Nto eyo, ennaakhaliherya amusi aka woona wiira nlelo kinnaaphenta. Amusi aka anceene annikittottopela okhala wiira kinnihakalala, nto awo khanixanka mwaha wa miyo.”

16. Yesu oonihenrye sai wiira aanimuthokorerya muhima awe aihaniwa Yakobo? (Nwehe enoota.)

¹⁶ Mooniheryeke wiira munnaathokorerya amusi anyu. Nuumala ohihimuxiwa, Yesu aahooniherya wiira aanimuthokorerya muhima awe aihaniwa Yakobo, maana aahirowa olavula ni yena. (1 Akor. 15:7) Nto Yakobo, aahihakalala vanceene mwaha woosuwela wiira khaanyanyaliwe ni Yesu. Nave eyo, yaahimukhaliherya Yakobo osuwela wiira Yesu aari Mesiya. Nuumala ovaanela ni Yesu, Yakobo aahirowa waasuweliha amusi awe wiira Yesu aari Mesiya.c — Mit. 1:14.

17. Ninrowa weettela sai malakiheryo ari Aroma 12:15? (Nwehe efootu.)

¹⁷ Mmusome Aroma 12:15. Amusi ahu annikhalana okathi woohakalaliha ni wooxankiha. Nto akhala wiira nnimwaathokoreryaka saana khula okathi, eyo enimwaakhaliherya oturuka moota aniwoonela aya Anamoona a Yehova.d Mwa ntakiheryo, okathi animuyara aya mwaana, hiyo pooti waattottopela ni waavaha iperesenti, opaka eyo nnimooniherya wiira ninnihakalala naawo. Okathi anikhweliwa aya mutthu yamphenta aya, nihaana waamaaliha, waakhaliherya naavahaka itthu anipirisari aya aahiiso opaka itthu sikina wiira naakhaliherye. Nave nnimooniherya wiira khinaanyanyanle, naalikarelaka, owinviyarela mensaaxe aahiiso waaxekurya ikwaha sinceene, otepexa wene okathi sinaaphwanya aya mixankiho.

18. Ninrowa otthara sai ntakiheryo na Andreya?

¹⁸ Mwaasuweliheke amusi anyu anna ni arokora. Nuumala osuwela wiira Yesu aari Mesiya, Andreya aahirowa omwiitthana munnawe aihaniwa Pedru wiira orowe akumane ni Yesu. (Yoh. 1:​40-42) Hiyo pooti opaka etthu emosa-ru ni amusi ahu. Mwa ntakiheryo, munoonela sai waalattula orowela mithukumano sa mmulokoni aahiiso orowa otthekula hoothe ni apatthani anyu? Okathi munaasuweliha anyu anna ni arokora, amusi anyu animoona wiira Anamoona a Yehova anoolikana ni atthu akina ni tooreera murima.

19. Hata amusi ahu ahisuwelaka saana sookupali sahu, naathokoreryeke sai? (1 Pedru 3:15)

¹⁹ Mmusome 1 Pedru 3:15. Amusi ahu anoosuwela nthowa naya ninkhootta ahu opaka itthu sikina, vakhala wiira annoona wiira ninnaareerela murima ni ninnaathokorerya mwa nttittimiho. Hata nihipakaka hoothe ifesta, ni soolema sikina, amusi ahu anooxukhurela ni ohakalala, vakhala wiira nnoomananihaka oviriha okathi niri ene naawo. Mwa ntakiheryo, hiyo pooti waalattula owaani, olya hoothe, waavaha itthu sooreera ni opaka itthu sikina soohakalaliha niri ene naawo.

MUHIHIYE WAAKHALIHERYA

20. Ntakiheryo na Yakobo ninnilipiha sai?

²⁰ Yakobo aahiperteri eparakha ya omuhoola Yesu okathi aalaleerya awe, masi nuuvira okathi Yakobo aahikhala mwiixutti a Yesu. (Akal. 1:​18, 19; 2:9) Nnaamwi wanipacerya ahaakhanle mwiixutti a Yesu, Yakobo aahisuwela ni aaneettela itthu sinceene Yesu iixuttihale awe okathi aari awe valaponi. Mwa ntakiheryo, Yakobo aahaalepela makristau ekarta ni aahilavula itthu sa efaita Yesu iixuttihale awe okathi aalavula awe Mwaha awe Vamwaako.e

21. Xeeni nihinreerela ahu ohiya waakhaliherya amusi ahu ahikhanle Anamoona a Yehova?

²¹ Hata niimananihaka vanceene waathokorerya ni waareerela murima amusi ahu ahikhanle Anamoona a Yehova, awo pooti ohinireerela murima ni ohiphavela omurumeela Yehova. Nto xeeni vahinreerela aya waanyanyala? Mwaha woowi nimphavela omutakiha Yehova ni Yesu Kristu, yaawo ari oomoriwa ikharari. Nto okathi wootheene nihaana waareerelaka murima ni waathokorerya amusi ahu. (Luka 6:​33, 36) Naahihiye waaphenta, woonasa wene awo pooti oturuka moonelo aya. Hata ahiturukaka moonelo aya, awo khanrowa oliyala itthu naaleelale ahu voohimya sa Yehova ni itthu sooloka onrowa awe opaka muhoolo. Naahihiye waakhaliherya ni waareerela murima amusi ahu, awo pooti othanla omukokhorela Yehova hoothe ni hiyo. Nto eyo, enooniphwanyiha ohakalala wuulupale!