Efaita erina aya opatisiwa ni ele enitaphulela aya

1. Ninsuwela sai wiira opatisiwa, yoowiixuttiha ya efaita yinceene ya mbiibiliyani?

HIYO ninnihakalala vanceene okathi nnaaweha ahu atthu akina apatisiwaka! Mwaanisuwela wiira eyo yaahiwiiraneela makristau a okathi wa arummwa? Muthukumano woopacerya waapakiwe mwaakha wa 33 Nuumala Kristu Orwa, awo yaahaaweha atthu anceene apatisiwaka. Okathi owo, murummwa Pedru aahilavula mwaha waatthokiherya ele enitaphulela aya opatisiwa. (Mit. 2:​38, 40, 41) Muhoolo mwaya, murummwa Paulo aahimyale wiira, “soowiixuttiha soopacerya sinimuhimya Kristu” saahela muhina “mwiixuttiho wa inamuna soovirikana sa opatiso”. (Ahep. 6:​1, 2) Opatisiwa ti mwiixuttiho woopacerya wa mbiibiliyani. Hata vari siiso, nihaana osuwela ele enitaphulela aya. Mwaha wa xeeni?

2. Xeeni ninreerela ahu osuwela efaita erina aya opatisiwa?

² Akhala wiira mutthu oniphavela okhalana empa yoolipa, owo onipirisari waalipiha alisenso a empa eyo. Mwa enamuna emosa-ru, wiira mutthu okhalane waamini woolipa, onipirisari wiiwexexa ikeekhai sa mbiibiliyani. Eyo enihela muhina osuwela efaita erina aya opatisiwa. Ootheene ahu nihaana osuwela efaita erina aya opatisiwa, hata nipatisiwe ene khalai aahiiso mwiimananihaka wiira mpatisiwe. Nto mwaha ola, nnoothokorerya makoho ala anittharelana: Opatisiwa onitaphulela exeeni? Opatisiwa onihela muhina exeeni? Xeeni nimpatisiwa ahu mwa nsina na Tiithi, ni na Mwaana, ni na ikuru soowaarya?

ELE ENITAPHULELA AYA OPATISIWA

3. Okathi mutthu onipatisiwa awe, onooniherya exeeni?

³ Okathi mutthu onipatisiwa awe, onooniherya exeeni? Owo onniwooniherya atthu akina wiira 1) Onnikupali itthu sootheene iixuntte awe mbiibiliyani sinimuhimya Yehova Muluku ni Yesu Kristu. 2) Onnooniherya wiira oottharuwa itampi sawe, 3) Oopaka marukunuxo wiira omurumeeleke Yehova, 4) Onnikupali wiira Yesu tonnoopola etampi ni okhwa ni 5) Onnooniherya wiira oopaka nivekelo omuleiheryaka Yehova wiira onrowa opakaka itthu sinimusivela Yehova. Vaavo mutthu oniivahererya awe wa Yehova ni opatisiwa, onnipacerya okumi musya yoowo onrowa awe omurumeelaka Yehova mahiku ootheene.

4. Opwinihiwa ni okumihiwa mmaasini, onitaphulela exeeni? (Nwehe efootu.)

⁴ Okathi mutthu onipatisiwa awe, onnipwinihiwa mmaasini erutthu awe yootheene ni onnikumihiwa.a Vanikhala ntoko wiira aaroovithiwa ni onahihimuxiwa. (Mulikanyihe ni Akolosi 2:12.) Vaavo mutthu onipatisiwa awe, onooniherya wiira ooturuka mweettelo awe ni oowara omutthu musya. Xeeni nnihimya ahu siiso? Okhala wiira okathi mutthu onipwinihiwa awe mmaasini, eyo enitaphulela wiira oohiya mweettelo awe wa khalai. Nave okathi onikumihiwa awe mmaasini, eyo enitaphulela wiira oopacerya okumi musya, eyo piiyo, onrowa opakaka ele Yehova oniphavela awe.

5. Xeeni wiimananiha mutthu onipaka awe wiira opatisiwe, onlikana aya ni wiimananiha wa Nowe okathi aateka awe ekalawa? (1 Pedru 3:​18-21)

⁵ Mmusome 1 Pedru 3:​18-21. Wiimananiha mutthu onipaka awe wiira opatisiwe, pooti olikanyiha ni wiimananiha wa Nowe okathi aateka awe ekalawa. Akhala wiira mpacenrye niinaano omusoma Biibiliya, woonasa wene vannooxankihani opaka marukunuxo wiira mpatisiwe. Nto pooti wooxankihani vanceene opaka marukunuxo awo, ntoko siisaale vaamuxankihale aya Nowe oteka ekalawa. Niireke vannireerela tthiri wiimananiha vanceene? Aayo, ntoko siisaale Nowe iimananihale awe! Muluku taapanke eteseenyu ya ekalawa. Nto wiira Nowe oopowe epula ya mutaaseke, aahaana otthara oratteene malakiheryo aavahiwe awe ni Muluku. Mwaha wa waamini ni okhaliheriwaka ni Yehova, Nowe aahipaka etthu aarummwale awe. Tthiri Nowe “aahipaka sootheene aarummwale awe ni Muluku.” Nto nyuwo muhaana omutakiha Nowe. — Maph. 6:22.

6. Mwa enamuna xeeni opatisiwa onnoopola aya?

⁶ Eversiikulu 21, murummwa Pedru aalempe wiira opatisiwa “onniwoopolani”. Ekeekhai wiira opwinihiwa mmaasini paahi khonimwiiriha mutthu woopowa, nnakhala khonittipiha itampi sawe. Mwaha wa xeeni? Mwaha woowi, ephome ya Yesu paahi, tenittipiha itampi sahu. (1 Yoh. 1:7) Hata vari siiso, opatisiwa wookhalana efaita yinceene, maana Yehova tonirumme. Nave opatisiwa, “onithoonyerya onvekela Muluku murima wooloka.” Yehova onimoolevelelani itampi sanyu orumeelaka mukuttho wa Yesu. Okhala wiira Yehova onnipaka eyo, nto opatisiwa onninoopola, eyo piiyo, onninikhaliherya ophwanya okumi woohimala.

OPATISIWA ONIHELA MUHINA EXEENI?

7. Malakiheryo xeeni anireerela otthariwa okathi wa opatiso?

⁷ Biibiliya onihimya wiira opatisiwa onihela muhina opwinihiwa mmaasini erutthu yootheene. Masi khonihimya itthu sikina mutthu okhanle awe oopaka okathi onipatisiwa awe. Hata vari siiso, Biibiliya onninivaha malakiheryo yaawo annikhaliherya okathi wa opatiso. Mwa ntakiheryo, onninikhaliherya osuwela ikuwo nikhanle ahu oowara ni itthu ale aniweha opatiso akhanle aya oopaka, wiira okathi owo okhale woottittimiheya. (1 Akor. 14:40; 1 Tim. 2:9) Okhala wene, axitokweene tanaapatisa atthu, masi eyo khenitaphulela wiira nihaana waavuwiha. (1 Akor. 1:​14, 15) Yehova onnivaha efaita opatiso moohicikha akhala wiira atthu aniweha ari vakhaani aahiiso anceene. — Mit. 8:36.

8. Makoho xeeni anikohiwa aya ale anrowa opatisiwa? Yoolakela ya makoho ala tiivi? (Miteko 2:​38-42) (Nwehe efootu.)

⁸ Biibiliya onnooniherya wiira naaphavelaka woopowa, nihaana olaleya waamini wahu ohoolo wa atthu. (Arom. 10:​9, 10) Tivonto, ti vooloka opaka eyo nihiku mutthu onipatisiwa awe, okhala wiira opatisiwa onniniphwanyiha woopowa! Eyo ti etthu eniiriha okohiwaka makoho manli ale anrowa opatisiwa. Makoho ene taala: Noopacerya, “moottharuwa soottheka sanyu, muhiivahererya wa Yehova ni muhaamini wiira apinaatamu, anoowerya woopoliwa paahi mwaha wa mukuttho wa Yesu Kristu?” Nikoho nla ninninuupuxerya mwaha Pedru aalavunle awe nihiku na Pentekoositi. Nave yoolakela aya owuupuxerya ale anrowa opatisiwa, itthu apanke aya wiira aphwanelele opatisiwa. Nikoho na nenli tinla, “munnisuwela wiira opatisiwa wanyu, onooniherya wiira nyuwo mwa Namoona a Yehova ni muniirela mpantta mutthenkeso wa Yehova?” Yoolakela ya nikoho nla, waakhaliherya ale anrowa opatisiwa osuwela itthu anrowa aya opakaka muhoolo. Awo annileiherya wiira anrowa ottharaka malakiheryo a mutthenkeso wa Yehova ni anrowa omukokhorelaka Yehova vamosa ni anna ni arokora. Eyo enoolikana ni etthu yaapanke aya atthu yaapatisiwe nihiku na Pentekoositi. (Musome Miteko 2:​38-42.) Nto atthu yaawo anaakhula wiira aayo makoho ala, anniphwanelela opatisiwa.

9. Itthu xeeni nikhanle ahu oopaka wiira nimusiveliheke Muluku?

⁹ Pooti wiira muhinatthi wiixutta ekeekhai, mwaahikhalana mweettelo wooloka ni khimwaapaka itampi suulupale. Nave woonasa wene, muhuuwale etthoko ya Anamoona a Yehova ni ahookhaliheryani omphenta Yehova. Niireke munnipirisari ottharuwa ni opatisiwa wiira mmusiveliheke Muluku? Aayo. Mwaha wa xeeni? Mwaha woowi, hata nihitonko opaka itampi suulupale, nihaana osuwela wiira nniyariwa nirina ene etampi. Nto etampi eyo, enniniiriha orakamelana ni Muluku. (Esal. 51:5) Okathi nimmusuwela ahu oratteene Yehova, nihaana ohela nipuro noopacerya ele oniphavela awe. Nto nihaana ottharuwa mweettelo ahu wa khalai ni orukunuxa murima, eyo piiyo, okhalana mweettelo onimusivela Tiithi ahu a wiirimu. Nuumala-vo, nihaana opatisiwa. — Mit. 3:19.

10. Etthu xeeni mukhanle anyu oopaka akhala wiira khalai mwaahipatisiwa etiini anyu?

¹⁰ Vakhala wiira khalai mwaahikhalana etiini anyu, woonasa wene mwaahipatisiwa. Hata vari siiso, muhaana opatisiwa wiira mukhale Namoona a Yehova. Mwaha wa xeeni? Mwaha woowi, okathi owo khimwaamusuwela oratteene Yehova Muluku ni Yesu. Nave hata mwaapanke nivekelo mwiivahereryaka wa Muluku, etthu mwaamuleihenrye anyu khenivarihana ni ele oniphavela awe. Mwa ntakiheryo, okathi aari awe wEefeso, murummwa Paulo aahaasuwela alopwana akina, yaawo yaapatisiwe, masi khiyaasuwela oratteene ekeekhai voohimya sa Yesu. Nto awo yaahaana otthikela opatisiwa.b (Mit. 19:​1-5) Mwa enamuna emosa-ru, olelo-va, Yehova onneemererya opatisiwa wa mutthu, akhala wiira onnisuwela oratteene ele Muluku oniphavela awe.

“MWA NSINA NA TIITHI, NI NA MWAANA, NI NA IKURU SOOWAARYA”

11. Onitaphulela exeeni opatisiwa “mwa nsina na Tiithi, ni na Mwaana, ni na ikuru soowaarya”? (Matheyo 28:​18-20)

¹¹ Yesu aahimmye wiira awiixutti asya yaahaana opatisiwa “mwa nsina na Tiithi, ni na Mwaana, ni na ikuru soowaarya”. (Mmusome Matheyo 28:​18-20.) Exeeni Yesu aaphavela awe ohimya ni moolumo awo? Mbiibiliyani nuulumo noowi “nsina”, ikwaha sinceene onihimmwa mukhalelo wa mutthu. Nave pooti ohimmwa okhulupale aahiiso owerya mwaneene nsina nlo orina awe. Nto okathi nimpaka ahu etthu “mwa nsina na” mutthu, nnooniherya okhulupale aahiiso owerya orina awe mutthu owo. (Mulikanyihe ni Matheyo 10:41.) Okathi nimpatisiwa ahu mwa nsina na Yehova ni na Yesu, ninnooniherya wiira awo tanisuwela etthu eri yooloka ni tarina owerya wa onileela itthu nikhanle ahu oopaka. Nave okathi nimpatisiwa ahu mwa nsina na ikuru soowaarya, eyo enitaphulela wiira ninrowa ottharaka malakiheryo. Vano nrowe nthokorerye moota nikhanle ahu oopatisiwa mwa nsina na Tiithi, ni na Mwaana, ni na ikuru soowaarya.

12. Opatisiwa mwa nsina na Tiithi onihela muhina okupali exeeni? (Wiisuupulula 4:11) (Nwehe .)

¹² Mwa nsina na Tiithi. Hiyo ninnikupali wiira Yehova tonivahale okumi ni Tiithi ihu a wiirimu. Nave ninnikupali wiira owo Muluku Oowerya Sootheene ni topattunxe itthu sootheene. (Mmusome Wiisuupulula 4:11.) Ninnirumeela nsina nawe okathi nninvekela ahu nikupaliki wiira onniiwa mavekelo ahu. Nave ninnirumeela nsina nawe okathi ninlaleerya ahu. (Esal. 65:2) Masi yookhala etthu ekina ninreerela ahu okupali wiira nipatisiwe mwa nsina na Tiithi. Mwa ntakiheryo, ale yaawiriyana mwaha wa Pedru nihiku na Pentekoositi, yaanimusuwela Yehova. Masi okhuma nihiku nle, awo yaahaana okupali wiira Yehova aamwaavaha okumi woohimala omurumeelaka Yesu Kristu. Hiyo nave nihaana okupali etthu emosa-ru. — Arom. 5:8.

13. Opatisiwa mwa nsina na Mwaana onihela muhina okupali exeeni? (Nwehe efootu.)

¹³ Mwa nsina na Mwaana. Hiyo ninnikupali wiira Yesu Mwaana mmoseene a Muluku. Yesu ti “ephiro”, yoowo paahi tonnikhaliherya okhala apatthani a Muluku. (Yoh. 14:6) Nave ninnikupali wiira Yesu, tori Moopoli ahu, maana ohookhwa wiira niwerye ophwanya okumi woohimala. Osuwela eyo, enniniiriha otthara ntakiheryo nawe mahiku ootheene, ohiya paahi nihiku nimpatisiwa ahu. (1 Yoh. 2:6) Nimutakihaka Yesu, ninnikhalela nthiti muteko woolaleerya ni khanneemererya etthu, nnakhala mutthu onikhoottiherya ovara muteko ola. (Luka 4:43) Hata nilupatthiwaka, noolakela ohihiya omukokhorela Yehova moororomeleya. (2 Tim. 3:12) Hiyo ninnimuttittimiha Yesu, okhala wiira tori “muru wa muloko”. Nto hiyo ninnitthara malakiheryo a atthu ale Yesu aathanlale awe wiira ahooleleke muloko ni waakhapelela atthareli awe. — Aef. 4:​8, 11, 12; 5:23.

14. a) Opatisiwa mwa nsina na ikuru soowaarya onihela muhina osuwela exeeni? (Nwehe efootu.) b) Inamuna xeeni sikina anipatisiwa aya makristau oothanliwa? (Nwehe ekaaxa eni: “Inamuna sikina makristau oothanliwa anipatisiwa aya.”)

¹⁴ Mwa nsina na ikuru soowaarya. Hiyo ninnisuwela ekeekhai voohimya sa ikuru soowaarya. Nave ninnisuwela wiira ikuru soowaarya khahiyo mutthu ni khasiniirela mpantta yoowiixuttiha ya amuluku araru. Nave-tho, ninnikupali wiira ikuru soowaarya, saahaakhaliherya maprofeta ni atthu yaamulepa Biibiliya. Tivonto, ninsoma ahu Nuulumo na Muluku ni weettela ele nniixutta ahu. (2 Ped. 1:​20, 21) Nave hiyo ninniimananiha ohipaka itampi suulupale, maana ninnisuwela wiira napaka etampi, Yehova khonrowa onivaha ikuru sawe soowaarya ni muloko khonrowa weettaka saana. — Aef. 4:30.

15. Etthu xeeni ninreerela ahu ohihiya wiiwexexa?

¹⁵ Akhala wiira moopatisiwa, muhihiye wiiwexexa “mwiixuttiho wa inamuna soovirikana sa opatiso”c ni opaka ele mwaamuleihenrye anyu Yehova, okathi mwaivaherenrye anyu ni opatisiwa. Ankhi vakhala wiira khampatisiwe? Niireke yookhala etthu enookhoottiheryani? Mwaha onittharelana, nnimwiixutta etthu mukhanle anyu oopaka wiira mphwanelele opatisiwa.