“Anamwane nivahiwe ni Yehova”

ETTHU xeeni munuupuwela anyu okathi muniiwa anyu nuulumo noowi yoohiyeriwa? Woonasa wene, nyuwo munuupuwela musurukhu, empa, ematta, etereno wala etthu ekina ya efaita yinceene munivahiwa anyu aahiiso ohiyeriwa ni mmusi anyu. Moohaanyiherya, nyuwo munnivaha efaita ni munnikhapelela etthu eyo nvahiwe anyu.

Biibiliya onihimya wiira “anamwane nivahiwe ni Yehova.” (Esal. 127:3) Nto anamuyari animphenta Yehova, annaavaha efaita yinceene anaaya. Annipaka sootheene aniwerya aya wiira yaavaheke anaaya itthu sinaathowa, waakhaliherya okhalana okumi wooloka ni ompatthani woolipa ni Yehova.

Masi anamuyari anceene olelo-va, khanaathokorerya anaaya ntoko yoovaha enikhuma wa Muluku. (Yes. 49:15; 2 Tim. 3:1-3) Masi akina, anniphavela waakhapelela saana anaaya, masi khaniwerya mwaha wa mixankiho. Mixankiho xeeni siniwiiriha anamuyari ohiwerya waakhaliherya anaaya? Etthu xeeni Yehova oniphavela awe wiira anamuyari apakeke? Anamuyari makristau, anrowa waahuwa sai anaaya wiira yannuwa vale akhale oohakalala?

MIXANKIHO

Okhanyereriwa ni amusi aahiiso ni atthu akina. Mittetthe sikina, anamuyari arina anamwane anceene, annittittimihiwa ni olavuliwa saana. Nto anamathelana akina annikhanyereriwa ni amusi ni mavisiinyu aya, waayara anamwane anceene hata asuwelaka wiira khanrowa owerya waakhapelela.
Oxanka mwaha wa wuupuwela itthu sa muhoolo. Mittetthe sikina, mwaha wa othowa yoolya, waatta iretta ni othowa ispitaali, itthu iyo sinniwiiriha anamathelana akina waayara anamwane anceene, yuupuwelaka wiira mmosa-mmosa pooti wunnuwa. Nave, anamathelana anceene annithanla waayara anamwane anceene yuupuwelaka wiira yuuluvala vale, anamwane awo animwaakhapelelaka. Eyo ennitepa wiiraneya, ilapo seiye kuvernu ohinaakhaliherya awe aahiiso waakhapelela atthu oowuuluvala.
Ohiwerya ompaka palaneyamento. Mittetthe sikina, anamathelana akina khanimpaka palaneyamento, nto eyo enniwiiriha athiyana orupala nnaamwi ahiphavelaka. Nave akina annikhootta ompaka palaneyamento, yuupuwelaka wiira onimwaakumiherya mixankiho aahiiso iretta. Nave akina khaniwerya ompaka palaneyamento mwaha woowi mirette iyo sinitumihiwa musurukhu munceene.a

ETTHU XEENI YEHOVA ONIPHAVELA AWE WIIRA ANAMUYARI APAKEKE?

Emusi emosa avirihaka okathi ari ene hoothe oparki. Paapa onwiriyanaka oratteene mwanaya mwaamuthiyana okathi onilavula awe. Maama onvonyaka poola ni mwanaya mwaamulopwana. — Nviriheke okathi muri ene ni khula mwaana

Mwaavaheke aniinyu itthu anipirisari aya. Yehova oniphavela wiira anamuyari yaavaheke anaaya itthu anipirisari aya. Nave onilipelela wiira avareke muteko wiira yaavaheke anaaya yoolya, ikuwo ni opuro wookhala. Nave-tho, oniphavela wiira anamuyari awiixuttiheke anaaya. Anamuyari makristau, aniphavela wiira anaaya akhaleke owaani, yinnuweke ni yaakhaliheryeke wiixutta itthu sikina. Nave anamuyari awo, aniphavela wiira aviriheke okathi munceene ari ene ni anaaya, wiira anamwane awo, yooneke wiira annikhapeleliwa ni ophentiwa. Yehova khonilipelela wiira anamuyari akhale athaaciri para waakhapelela anaaya. Yosefe ni Maria, anamuyari yaawo Yehova aathanlale awe wiira amukhapeleleke Mwanawe, khiyaarina musurukhu munceene. Masi yaanivara muteko wiira amukhapeleleke Yesu. — Math. 13:55, 56; Luka 2:24.

Malakiheryo a mbiibiliyani: “Tthiri, akhala mutthu ohinaakhapelela amusi awe, vanceenexa ale anikhala vatthokoni vawe, owo onnikhootta waamini. Nave tootepa otakhala onvikana mutthu ohinaamini.” — 1 Tim. 5:8.

Yehova onnisuwela wiira anamuyari annipirisari okhaliheriwa vaavo anuuluvala aya. Nto anamwane animooniherya wiira annaattittimiha anamuyari aya, yaakhaliheryaka okathi anuuluvala aya. (Okhu. 20:12; 1 Tim. 5:4) Yehova onnihakalala vanceene okathi anamuyari anuupuwela aya wiira ahaana waakhapelela anaaya, ohiya anaaya waakhapelela anamuyari aya. — 2 Akor. 12:14.

Nwiixuttiheke aniinyu voohimya sa Yehova. Anamuyari makristau, tarina muritti wa waakhaliherya anaaya omphenta Yehova. Etthu yootepa okhalana efaita para Yehova, ori anamuyari owiixuttiha anaaya voohimya sa Yehova. — Otum. 6:6, 7.

Malakiheryo a mbiibiliyani: “Mwaahuweke [aniinyu] ni nwiixuttiheke muttharaka malakiheryo a Yehova.” — Aef. 6:4.

YEHOVA ONIMOOKHALIHERYANI

Anamathelana avaanelaka owannyeya. Amutthukunle ene Biibiliya ampweha vameesa vaya. — Nvaaneleke vahinatthi, nummeru na anamwane muniphavela anyu waayara

Musuweleke nummeru na anamwane munrowa anyu waayara. Akhala wiira munniphavela waayara anamwane, muupuweleke makhalelo anyu. Mwa ntakiheryo, niireke munoowerya waahuwa anamwane anceene? Munoowerya okhalana musurukhu wiira mwaavaheke yoolya, ikuwo, waaroiha oskola ni ovirihaka okathi muri ene ni anamwane awo? Tivonto, nvaanele ni ole muthelanne anyu wiira musuwele nummeru na anamwane munrowa anyu waayara. Okathi munipaka anyu eyo, musuweleke wiira Yehova oniphavela wiira mmukhapeleleke oratteene khula mwaana. Yehova onnisuwela wiira khahiyo itthu sootheene sinrowa weettaka ntoko apalano naapanke ahu. (Mus. 9:11) Masi mukupaliki wiira Yehova onimookhaliheryani okhala namuyari ooloka.

Malakiheryo a mbiibiliyani: “Apalano a mutthu orina ankhili anneetta saana, masi atthu ootheene ookhummwa murima, anoohaawa.” — Mir. 21:5.

“Ti pani a nyuwo aaphavelaka oteka empa yoorakamela osulu, ohinikilaathi toko, onaweha aarina musurukhu oniphiyerya omaliha empa eyo?” — Luka 14:28.

Mmuheleke Yehova nipuro noopacerya vatthokoni vanyu. Omukokhorela wanyu Yehova okhaleke nipuro noopacerya vatthokoni vanyu. Akhala wiira mookhalana anamwane, mmwiixuttiheke khula mwaana omphenta Yehova. Mwaakhaliherye ovaha ephoole ni wiixutta etthu okathi wa mithukumano. Khula esumana, mmulompeke Muluku vatthokoni. Nwiixuttiheke aniinyu osuwela olaleerya. Musuweleke wiira owiixuttiha aniinyu, muritti anyu, khahiyo wa amusi anyu aahiiso atthu akina. Owiixuttiha aniinyu onipirisari okathi ni wiimananiha. Masi munoohakalalaka vanceene okathi munrowa anyu waawehaka aniinyu amurumeelaka Yehova.

Malakiheryo a mbiibiliyani: “Kaiwaka wiira anaaka anneettela ekeekhai, kinnitteeliwa murima vanceene. Khiivo etthu ekina enikitteeliha murima siiso.” — 3 Yoh. 4.b

Mmuroromeleke Yehova. Vakhala wiira munnuupuwela okhalana anamwane aahiiso mookhalana, musuweleke wiira malakiheryo a Yehova aakhalana efaita ovikana ekultuura wala soolema sa muttetthe anyu.

Ifootu: 1. Anamuyari akilanthe ene ni mwanaya mwaamulopwana omuthukumanoni. Mwaana owo onvenxale ene ntata wiira okomentari. 2. Emusi emosa elaleeryaka hoothe. Paapa onilaleerya ni mwanaya mwamuthiyana, vano maama ori ni anaaya anli. — Wiira mulipihe waamini wa aniinyu, onipirisari okathi ni wiimananiha

Hata muthanlaka waayara anamwane vakhaani, muhiliyale wiira Yehova onimookhaliheryakani muuluvala vale. Muhaayareke anamwane anceene, muupuwelaka wiira muuluvala animoovahakani musurukhu. Muhooveke wiira muhoolo munrowa ohala mekhinyu. Yehova ooleiherya wiira onrowa wookhapelelakani ni khonrowa ohiya opaka eyo. — Yox. 23:14.

Malakiheryo a mbiibiliyani: “Mmuroromele Yehova ni murima anyu wootheene; muhiroromele osuwela wanyu. Mmuupuweleke mootheene muneetta anyu, nto owo onimookolola iphiro sanyu.” — Mir. 3:5, 6.

“Miyo kaari mmiravo, nto vano kihuuluvala; masi nkinamoone naxariya onyanyaliwe ene; nnakhala nkinawoone anaawe avekaka eyoolya.” — Esal. 37:25.

“Khula okathi, muheleke opuro woopacerya Omwene ni exariya ya Muluku. Vano, itthu iya sikina sootheene, munimuncereriwa.” — Math. 6:33.

Anamwane, eperesenti Yehova aavahale awe anamuyari. Yehova onnihakalala vanceene, okathi onaaweha awe anamuyari yaakhapelelaka anaaya ntoko oniphavela awe! Anamuyari annivaha efaita yinceene ele Yehova oniphavela awe wiira apakeke, ohiya moonelo aahiiso itthu sinipakiwa ni atthu a muttetthe aya. Ti nthowa naya anithanla aya nummeru na anamwane anrowa aya waayara. Nto eyo enimwaakhaliherya omukhapelela khula mwaana, nave anamwane ootheene animunnuwaka moohakalala ni anomphentaka Yehova. Okathi anipaka aya eyo, anamuyari makristau annooniherya wiira anamwane yoovaha enikhuma wa Yehova.

Awo annihakalala ni yoothanla aya

Niireke anamuyari annixanka okathi anithanla aya waayara anamwane vakhaani? Muxankiho owo onnaaphwanya anamuyari anikhala mittetthe soothowa musurukhu. Nwehe itthu anihimya aya anamuyari anikhala ilapo soothowa musurukhu.

Niireke munnikhanyereriwa waayara anamwane anceene?

“Aayo, hata ni anna ni arokora mmulokoni. Anamathelana amosa yaanikohale so: Xeeni mmuyanre anyu mwaana mmosa paahi? WÁfrica nno, akhala wiira murina mwaana mmosa, munooniwa ntoko khamurina mwaana. Masi vakhala wiira murina anli, munooniwa ntoko murina mmosa. Hata nuumala omuyara mwaana a nenli, nlelo naanikhanyereriwa waayara anamwane akina.” — Jeremias

Niireke sootoko woophwanyani mixankiho mwaha woowi mwaayanre anamwane vakhaani?

“Nnaari. Okhala wiira miyo ni mwaaraka naathanlale waayara anamwane vakhaani, naniwerya waavaha itthu sinaathowa ni waakhaliherya okhalana ompatthani wooloka ni Yehova. Okhala wiira anamuyari aka yaahaayara anamwane anceene, kaanaaweha vaaxankihaka onivaha itthu naapirisari ahu ni oniroiha oskola.” — Jeremias

Aniinyu anoonela sai yoothanla anyu?

“Aniihu annihakalala vanceene mwaha woowi khasinaaphwanya mixankiho sinaaphwanya anamwane akina ahireere oyareliwa.” — Filipe

“Okathi yannuwa aya, aniihu yaanihakalala okhala wiira yaanisuwela wiira naanaakhapelela ni waaphenta. Ikwaha sinceene naanaalattula owaani anna ni arokora animphenta vanceene Yehova ni arina ntakiheryo nooloka. Nto awo yaanintumererya wuncererya muteko nanvarela ahu Yehova. Olelo-va, aniihu annitthara ntakiheryo na anna ni arokora awo.” — Carlos

Niireke munnihakalala mwaha wa othanla okhalana anamwane vakhaani?

“Okhala wiira nithanlale waayara anamwane vakhaani, ninniwerya waakhapelela oratteene. Iyaakha tthaaru sivinre, kooperteri muteko kaaliviwa aka musurukhu munceene. Masi okhala wiira naayanre anamwane vakhaani, khanimpirisari othuma itthu sinceene sinnithowa.” — Jeremias

“Waayara anamwane vakhaani, woonikhaliherya waavaha itthu sinaathowa ni olipiha waamini waya. Nave eyo, yaahinikhaliherya orumeela mapuro oothowa anamalaleerya. Nave-tho, ninniwerya oviriha okathi ni khula mwaana ni omukhapelela moovarihana ni makhalelo awe. Aniihu ootheene annimurumeela Yehova ni anniimananiha wuncererya muteko aninvarela aya.” — Lenadi

Etthu xeeni yooreera muniphavela anyu waaleela anamuyari akina?

“Kooweha wiira moolumo ari Esaalimu 34:10b, teekeekhai, yaawo anihimya so: ‘Ale animwaavya Yehova, khasinrowa waathowa itthu sooreera.’ Yehova onninivaha itthu sootheene nimpirisari ahu.” — Rafael

a Anamathelana tanithanla nummeru na anamwane aniphavela aya waayara, okathi akhanle aya ooviriha para omuyara mukina ni apalaneyamento ahinrowa owiiriha okumiha erukulu. Khuuvo oneemereriwa waaphukela mwaha wa soothanla saya. (Arom. 14:4, 10-13) Nave anamathelana ahaana ohiliyala malakiheryo ari 1 Akorinto 7:3-5.

b Eversiikulu ela, nuulumo noowi “anamwane” anihimmwa atthu yaale Yohani aawiixuttihale awe ekeekhai. Nave anamuyari annikhalana moonelo mmosa-ru okathi aniwiixuttiha aya anaaya.