Mulokiheryeke moota muniixuttiha anyu mwaalaleeryaka

1. Etthu xeeni makristau anireerela aya olokiherya ni xeeni vari aya vooloka opaka eyo? (2 Timootheyo 4:2) (Nwehe eteseenyu.)

OLAVULAKA ni awiixutti awe, Yesu aahimmye so: “Murowe mwawiixuttiheke atthu . . . weettela itthu sootheene koorumalyaakani.” (Math. 28:​19, 20) Ni moolumo ala, Yesu aaphavela ohimya wiira makristau ootheene ahaana owiixuttiha atthu akina. Mweekeekhai, Yehova onnaaweha atthu aniphavela omurumeela. Nto, malaikha anninikhaliherya waaphwanya atthu awo. (Mit. 13:48; Yoh. 6:44; Wis. 14:6) Hata vari siiso, nihaana osuwela moota woowiixuttiha atthu voohimya sa Yehova. Nrowe niwehe ntakiheryo ovahale awe murummwa Paulo ni Baarnaba. Biibiliya onihimya wiira okathi Paulo ni Baarnaba yaalaleerya aya esinagoga ya wIkoonio, awo “yaahilavula saana, mpakha muttitthi muulupale wa ayuda ni akereku waamini.” (Mit. 14:1) Moohaanyiherya, Paulo ni Baarnaba, yaaniixuttiha saana. (Mmusome 2 Timootheyo 4:2.) Makristau ootheene animwiira saana, akhala wiira anoolokiherya moota aniixuttiha aya.

2. Xeeni atthu akina anuupuwela aya wiira khaniwerya wiixuttiha saana?

² Atthu akina, anuupuwela wiira khaniwerya wiixuttiha saana, okhala wiira khasomme vanceene. Nave, akina anoona wiira khaniwerya waatthokiherya saana atthu akina. Alopwana akina aniromoliwa mbiibiliyani, yuupuwela siiso. (Okhu. 4:10; Yer. 1:6) Atthu akina, pooti okhulumuwa yuupuwelaka wiira khanisuwela wiixuttiha saana, okhala wiira kharina soosoma sa Biibiliya aahiiso khanisuwela itthu sinceene sa muteko woolaleerya. Masi khahiyo wiira atthu ootheene nnaalaleerya ahu aahiiso ninlavulana ahu anrowa weemererya ihapari ninlaleya ahu. Akhala wiira atthu anneemererya aahiiso khaneemererya, eyo khenooniherya wiira khaninsuwela wiixuttiha. Ntoko niwehale ahu, Yehova ni malaikha, tannikhaliherya wiira naaphwanye ale aarina murima wooloka. Hata vari siiso, nihaana wiimananiha wiira nilaleye ihapari sooreera mwa enamuna enaavara murima atthu. Tivonto, mwaha ola ninrowa oweha inamuna tthaaru, sinrowa onikhaliherya olokiherya moota woowiixuttiha atthu okathi woolaleerya.

NAATHOKORERYEKE SAANA ATTHU

3. Xeeni atthu anceene waasivela aya onwiriyana Yesu?

³ Biibiliya onihimya wiira, Yesu aanisuwela “makhalelo a atthu”. (Yoh. 2:25) Moolumo ala, anooniherya wiira Yesu aanisuwela ele atthu yuupuwela aya ni ele yaawiiriha opaka etthu. Okhala wiira Yesu aanaasuwela atthu aalavulana awe, eyo yaahimukhaliherya olavula itthu saavara murima. Yesu aanisuwela wiira atthu yaanipirisari ovahiwa malakiheryo ni omaalihiwa, maana ahooleli a itiini, yaanaahasula atthu anceene. (Math. 9:36; 23:4) Yesu aahiixuttiha itthu saakhalihenrye atthu ale. Itthu sene, siri mwaha aalavunle awe vamwaako. Atthu anceene yaanirowa onwiriyana Yesu, okhala wiira aanilavula itthu saavara murima.

4. Ninrowa wooniherya sai wiira ninnaathokorerya atthu akina? (Nwehe ifootu.)

⁴ Nnimooniherya wiira ninnaathokorerya atthu akina, akhala wiira ninnisuwela itthu sinaaxankiha. Olumwenku ola wa Satana, khasireere itthu sootakhala. Tivonto, khula mutthu nimmulaleerya ahu, yookhala etthu enimuxankiha. Akhala wiira nnimuupuwela eyo, enooniiriha ophavela waakhaliherya. Mwa ntakiheryo, niireke yookhala etthu ekhumelenle niinaano enaaxankiha atthu a muttetthe ahu? Niireke anamuyari akina annixanka yuupuwelaka wiira anaaya pooti waakhumelela etthu yootakhala oskola? Niireke muttetthe anyu vannaaxankiha atthu ophwanya muteko? Nkahaya muupuwele moota okumi onaaxankiha aya atthu, yaawo ahirina nlipelelo Biibiliya onihimya awe. Mwaha woowi atthu awo anikhala mahiku ala “ooxankiha ni oowoopiha.” — 2 Tim. 3:1; Yes. 65:​13, 14.

5. Yesu aavirikanne sai ni ahooleli a itiini? (Matheyo 11:​28-30)

⁵ Yesu aanaathokorerya atthu yanwiriyana. Nave atthu awo yaanisuwela eyo, okhala wiira aanaathokorerya saana. Yesu aari oovirikana ni ahooleli a itiini. Ahooleli a itiini yuupuwela wiira yaahikhalana efaita yuulupale waavikana atthu akina. Tivonto, ikwaha sinceene khiyaathokorerya saana atthu akina. (Math. 23:13; Yoh. 7:49) Masi Yesu aanaareerela murima ni aanaathokorerya saana atthu. Okhala wiira Yesu aari “mutthu oomaala ni oowiiyeviha”, eyo yaahimukhaliherya okhala mwiixuttihi ooloka. (Mmusome Matheyo 11:​28-30.) Nave-tho, hiyo nihaana waareerela murima atthu ni waattittimiha.

6. Ninrowa waareerela sai murima ni waattittimiha ale annilupattha?

⁶ Atthu akina khaniphavela owiriyana ihapari ninlaleya ahu, nave akina anninlupattha. Yesu ooniixuttiha wiira naathokoreryeke saana atthu yaale annilupattha. Masi-tho, oonileela wiira nihaana opaka etthu ekina. Yesu aahimmye so: “Nwiireleke itthu sooreera ale anoonyokhani. Mwaareeliheke ale anoophavelelani itthu sootakhala”. Nave-tho, aahihimya wiira: “Mwaavekeleleke ale anooruwanani.” (Luka 6:​27, 28) Akhala wiira nnimuupuwela wiira sookhala itthu siniwiiriha atthu ohiphavela owiriyana ihapari ninlaleya ahu, vanoonikhweela waareerela murima, hata anilupatthaka. Ekeekhai wiira atthu akina khaniphavela wiira nilaleeryeke. Woonasa wene, akina khaniphavela olavula ni hiyo mwaha woowi sookhala itthu sinaaxankiha. Pooti wiira niphiyale vatthokoni vaya okathi woohireerela. Moohicikha etthu enaaxankiha atthu awo, khula okathi nihaana otthara moolumo ala ani: “Moolumo anyu ekhaleke ooreera, ooweeleeliwa ni maakha, wiira musuweleke moota woomwaakhula khula mutthu.” (Akol. 4:6) Akhala wiira nnimwaathokoreryaka atthu, nisuwelaka wiira sookhala itthu sinaaxankiha, eyo enooniiriha ophavela owiixuttiha wiira naakhaliherye.

MMURUMEELEKE BIIBILIYA OKATHI MUNIIXUTTIHA ANYU

7. Yesu aarumeela exeeni okathi iixuttiha awe? (Yohani 7:​14-16)

⁷ Itthu Yesu iixuttiha awe, khisaakhuma mmuru mwawe, masi saakhuma mbiibiliyani. Nave aaniwooniherya atthu awo, moota saarowa aya waakhaliherya. Owo aaniwiixuttiha atthu mwa enamuna yookhweya, wiira aweryeke wiiwexexa ni wuupuwela itthu yiixutta aya. Biibiliya onihimya wiira itthu Yesu “aixuttiha awe saakhuma wa Muluku,” masi khaixuttiha “ntoko alipa-oowiixuttiha nlamulo.” Nto atthu “yaahitikinihiwa vanceene” ni moota aixuttiha awe. (Mar. 1:22) Alipa-oowiixuttiha nlamulo okathi wa Yesu, yiixuttiha itthu ahooleli a itiini oovuwa yiixuttiha aya. Masi Yesu aawiixuttiha Nuulumo na Muluku atthu ale. Nnaamwi Yesu aakhanle wiirimu ni Muluku, owo kheerenrye waaleela itthu sootheene aasuwela awe, ophavelaka ohimmwa aahiiso owooniherya atthu ale wiira khiyaasuwela etthu. Masi aahirumeela Nuulumo na Muluku wiira owiixuttihe etthu Muluku aaphavela awe wiira apakeke. (Mmusome Yohani 7:​14-16.) Mweekeekhai, Yesu oowooniherya makristau ootheene moota woowiixuttiha.

8. Pedru aatthanre sai ntakiheryo na Yesu?

⁸ Awiixutti a Yesu yaanimutakiha, maana yaaniwiixuttiha atthu Nuulumo na Muluku. Mwa ntakiheryo, Pedru aahirumeela Nuulumo na Muluku, okathi aalavula awe ni muttitthi wa atthu nihiku na Pentekoositi mwaakha wa 33 Nuumala Kristu Orwa. Pedru khahiyo aari mutthu aasomme iskola suulupale. Hata vari siiso, aahaavara murima atthu yanwiriyana okathi aatthokiherya awe soolempwa, saalavula sa iprofesia Yesu aamalihenrye awe. (Mit. 2:​14-37) Etthu xeeni yiiraneyale? Etthu ene tiila: “Ootheene yaale yaakhenle ni murima wootheene moolumo a Pedru, yaahipatisiwa. Nto nihiku nle, atthu oowiiraka 3.000 yaahitakaahana ni awiixutti.” — Mit. 2:41.

9. Xeeni vanireerela aya omurumeela Biibiliya okathi nniixuttiha ahu?

⁹ Biibiliya paahi, toniwerya waakhaliherya atthu opaka marukunuxo wiira amusiveliheke Muluku. (Ahep. 4:12) Tivonto, nihaana omurumeela Biibiliya okathi nniixuttiha ahu, ohiya wiixuttiha itthu nnuupuwela ahu. (2 Tim. 4:2) Miruku 2:​6, onihimya so: “Yehova tonaavaha atthu ankhili; mwaano mwawe annikhuma moolumo a osuwela ni a miruku.” Okathi nimmurumeela ahu Biibiliya naixuttihaka, ninniwiiriha atthu owiriyana etthu Yehova onihimya awe. (Mal. 2:7) Nave ninnaakhaliherya osuwela wiira miruku anisoma aya mbiibiliyani, sookhalana efaita yinceene ovikana miruku sinivahiwa ni apinaatamu. Itthu Biibiliya oniixuttiha awe, sinikhuma wa Muluku ni sinninikhaliherya opaka itthu sinimusivela ni okhala atthu oohakalala. — 2 Tim. 3:​16, 17.

10. Ninrowa omooniherye sai naskola ahu wiira itthu oniixutta awe sinikhuma mbiibiliyani?

¹⁰ Okathi muniilokiherya anyu wiira mwiirihe yoosoma ya Biibiliya, nweheke soolepa munrowa anyu omooniherya ole munimusomiha anyu. Nnaamwi nrumeelaka ifootu ni iviitiyu, naskola ahu a Biibiliya ohaana osuwela wiira etthu yootepexa okhala efaita, ti ele Biibiliya oniixuttiha awe. Okathi munimusomiha anyu naskola anyu a Biibiliya, musomeke soolepa sa mbiibiliyani seiyo sikhanle oomukhaliherya. Nave mmooniheryeke moota okhanle awe oovarihela muteko iversiikulu iyo mweekumini mwawe. Hata okathi onimooniherya anyu ifootu aahiiso iviitiyu, mmananiheke omukhaliherya oweha moota sinivarihana aya ni ele Biibiliya onihimya awe. Masi nyuwo khompirisari olavula vanceene aahiiso osoma soolepa sinceene siri mpantta owo. Okathi munisoma anyu yoolepa ya mbiibiliyani, munvaheke okathi naskola anyu wiira uupuwelele ele oniixutta awe ni iiwexexe etthu enitaphulela aya. Ikwaha sikina, pooti opirisariki nyuwo aahiiso naskola anyu otthikela osoma eversiikulu eyo. Akhala wiira nnimwiira siiso, nnimooniherya wiira khanimwiixuttiha etthu enihimya aya eliivuru, efootu aahiiso eviitiyu eyo, masi nimmwiixuttiha Nuulumo na Muluku. — 1 Akor. 2:13.

11-12. a) Ninrowa waapixerya sai murima anaskola ahu a Biibiliya? (Miteko 17:​1-4) (Nwehe efootu.) b) Ninrowa waakhaliherya sai atthu ahinisuwela ele Biibiliya onihimya awe?

¹¹ Ikwaha sikina, pooti okhala mwaha onaaxankiha anaskola a Biibiliya weemererya aahiiso wiiwexexa. Akhala wiira eyo enimwiiraneya, muhihiye olaleya “Nuulumo na Muluku . . . mwaapixeryaka murima”. (2 Tim. 4:2) Khahiyo wiira atthu ootheene annipaka marukunuxo aahiiso anniiwexexa mwa enamuna emosa-ru. Itthu sikina Biibiliya oniixuttiha awe, ti sookhweya wiiwexexa. Masi pooti okhala sooxankiha para atthu akina. Muhiliyale wiira ayuda yaakhala oTesaloonika, khiyiiwexexa moowaakuveya itthu Paulo iixuttiha awe. Nto Paulo aahaana waatthokiherya oratteene wiira yiiwexexe etthu Nuulumo na Muluku naahimya aya. Nto eyo, yaahaakhaliherya ayuda akina wiiwexexa etthu yaixutta aya. — Musome Miteko 17:​1-4.

¹² Enamuna ekina ninrowa ahu wooniherya waapixerya murima anaskola ahu, ori waakoha etthu ni waavaha okathi wiira yaakhule. Mwaawiriyaneke oratteene ni mphaveleke osuwela moota anoonela aya mwaha owo. Nuumala-vo, musomeke yoolepa ya mbiibiliyani wiira mwaakhaliherye anaskola anyu osuwela moota Muluku onoonela awe mwaha owo. Nave-tho, muupuwele ela: Atthu akina khatonko omutthukula Biibiliya ni khanisuwela etthu enihimya awe. Niireke owooniherya Biibiliya oowimpirimiriwa onimwaakhaliherya? Nyuwo pooti owooniherya opuro oni: “Masu Oopacerya a Nuulumo na Muluku”, yaawo ari Biibiliya a Elapo Esya wiira nwooniherye iponto suulupale siri mbiibiliyani. Woonasa wene, pooti waakhaliherya anaskola anyu wiiwexexa efaita erina aya iponto iyo, musomaka yoolepa emosa aahiiso piili siri nikoho 15 na mpantta owo. Mwapaka eyo, munoowooniherya moota Biibiliya onrowa awe waakhaliherya ophwanya ohakalala olelo-va. Akhala wiira munimwaakhaliherya anaskola anyu a Biibiliya oweha efaita Biibiliya orina awe, anrowa ophavelaka wiixutta itthu sikina.

MWAAKHALIHERYEKE OMUSUWELA YEHOVA

13. Okathi nniixuttiha ahu, nimphavela waakhaliherya atthu osuwela exeeni? Nvahe ntakiheryo.

¹³ Yoolakela ahu yuulupale naalaleeryaka, ori waakhaliherya atthu omusuwela Yehova ni okhala apatthani awe. (Yak. 4:8) Nkuupuwelani wiira muniphavela omukhaliherya mutthu ophwanya etthu eri nipuro nooriipela. Nyuwo mwaarowa omurumeela lampata wiira mmwaleele opuro owo, ohiya wiimwaleela mmansinyu. Mwa enamuna emosa-ru, okathi ninwiixuttiha ahu atthu akina, khanimphavela owooniherya wiira ninnisuwela itthu sinceene. Masi nimphavela owooniherya wiira Yehova ni malamulo awe tarina efaita yuulupale.

14. Ninrowa waakhaliherya sai anaskola ahu a Biibiliya opaka itthu sinimusivela Yehova?

¹⁴ Okathi munimusomiha anyu naskola anyu a Biibiliya, mmukhaliheryeke ophavela opaka itthu sinimusivela Yehova. (Mir. 27:11) Yoolakela anyu, khahiyo paahi omwiixuttiha osyaka itthu soohiloka ni opaka itthu sooloka wiira okhale Namoona a Yehova. Masi nyuwo muniphavela wiira naskola anyu opake marukunuxo wiira omusiveliheke Yehova. Mwa ntakiheryo, akhala wiira yookhala etthu yoohiloka naskola anyu ohiniwerya awe ohiya, nyuwo pooti omukoha so: “Xeeni Yehova oninyokha awe etthu eyo? Xeeni Yehova onoovekelaaweni wiira muhiye etthu eyo nnaamwi yoosivelakani? Yehova onooniherya sai wiira onnoophentani?” Okathi munimukhaliherya anyu naskola anyu a Biibiliya omusuwela Yehova ni mikhalelo sawe, eyo enoomukhaliherya woona wiira Yehova onnimphenta. Opaka eyo, enoomukhaliherya naskola anyu omphenta ni ophavela opaka itthu sinimusivela Yehova.

MUHIHIYE OLOKIHERYA MOOTA MUNIIXUTTIHA ANYU

15. Exeeni mukhanle anyu oopaka wiira mulokiherye enamuna muniixuttiha anyu?

¹⁵ Nihihiye onvekela Yehova wiira onikhaliherye osuwela etthu nikhanle ahu oopaka, wiira nilokiherye enamuna nniixuttiha ahu. (1 Yoh. 5:14) Nuumala ovekela, nihaana opaka itthu sinivarihana ni ele nivekenle ahu. Nave, nihaana ovahaka ephoole okathi wa mithukumano, maana ti weiwo Yehova onniixuttiha awe moota nikhanle ahu oowiixuttiha atthu akina. Nuumala-vo, nihaana ovarihela muteko etthu niixuntte ahu. Nyuwo pooti omulattula munna aahiiso murokora wiira oohooleni yoosoma anyu ya Biibiliya. Nuumala-vo, mmukoheke etthu mukhanle anyu oopaka wiira mulokiherye moota muniixuttiha anyu. Muupuweleke itthu naskola anyu onisuwela awe ni ohinisuwela awe voohimya sa mwaha owo. Mmananiheke wuupuwela moota naskola anyu onoonela awe mwaha munithokorerya anyu. Okathi munimusomiha anyu, mmukhaliheryeke mutthu owo osuwela mireerelo oniphwanya awe ni itthu oniixutta awe ni osuwela itthu sooloka Yehova onileihenrye awe. Mwiira siiso, munoomukhaliherya naskola anyu okhala mpatthani a Yehova ni okhala oohakalala. — Esal. 1:​1-3.

16. Xeeni vari aya vooloka ohihiya olokiherya moota nniixuttiha ahu?

¹⁶ Ninnihakalala vanceene mwaha wa owiixuttiha atthu akina voohimya sa Yehova. Nave elapo esya, nnookhalana eparakha ya owiixuttiha atthu anceene. Nto nihihiye waathokorerya atthu anniwiriyana, waakhaliherya omuroromela Biibiliya, ni owooniherya wiira Yehova ni malamulo awe tarina efaita yuulupale. Napaka eyo, nnoowerya olokiherya moota nniixuttiha ahu okathi woolaleerya.