Mmuroromeleke Muluku Oowerya Sootheene

1. Mixankiho xeeni samphwanyale Yoobi?

MOOTUTUXERYA, mulopwana oowaamini iihaniwa Yoobi, aahiperteri itthu sootheene aarina awe. Mwa ntakiheryo, anaawe ootheene yaahikhwa, inama sawe saahiiyiwa ni sikina saahiiviwa, ni arumeyi awe anceene yaahikhwa. Moottharelana, Yoobi waahimphwanya oretta wootepa owereya. Nave, atthu akina yaahipacerya ohimuttittimiha. Nave-tho, apatthani awe araru, yaahilavula itthu sanwereyale vanceene. Amwaarawe yaawo aaphenta awe, yaahixanka mpakha omuleela Yoobi wiira: “Munveehe Muluku, mukhweeke!” (Yoobi 2:9; 15:​4, 5; 19:​1-3) Mixankiho iya sootheene, pooti wiira sanvukula waamini wa Yoobi ni sammwiiriha wuupuwela wiira Yehova, khonaakhapelela ale animphenta ni animurumeela.

2-3. a) Etthu xeeni nikhanle ahu oowuupuwela okathi sinniphwanya aya mixankiho? b) Itthu xeeni piili ninrowa ahu wiixutta ni eliivuru ya Yoobi?

² Ninkhala okathi, makhalelo ari aya “ooxankiha ni oowoopiha.” (2 Tim. 3:1) Nto ikwaha sikina, pooti oniphwanyaka mixankiho sikhanle ooweehererya omuroromela wahu Yehova. Vaavo sinniphwanya aya mixankiho sinceene okathi omosa-ru, hiyo pooti otepa oriipiwa murima ni oxanka, nuupuwelaka wiira khaninrowa owerya ovilela. Mixankiho iyo, sinniwiiriha atthu akina waanyiherya akhala wiira Yehova onnaathokorerya.

³ Akhala wiira munuupuwela siiso, muhikulumuwe. Itthu saamwiiranenle Yoobi, saahimwiixuttiha wiira Yehova khonaanya-nyala ale animuroromela. Nave ninniixutta wiira nihaana omuroromelaka Yehova ni okupali wiira khula okathi, onoonikhaliheryaka. Etthu enrowa onikhaliherya ohihiya omuroromela Yehova, ori osoma eliivuru ya Yoobi, ni oweha itthu piili nniixutta ahu. Itthu sene tiiya: Yoopacerya, Yehova tori Muluku Oowerya Sootheene. Ya nenli, Yehova ookhalana owerya wa ohimya itthu sikhanle oowiiraneya. Nave owo onninikhapelela onivahaka itthu nimpirisari ahu wiira nihihiye okhala apatthani awe.

SATANA AAHIKHALA MUTHUKUMANO WAAPAKIWE WIIRIMU

4. Exeeni yiiraneyale okathi Yehova ni malaikha yaathukumanne aya wiirimu?

⁴ Nihiku nimosa, “anamwane a Muluku eekeekhai” yaahirowa wiixooniherya ohoolo wa Yehova. Biibiliya onihimya wiira “Satana aahirwa vaavo.” (Yoobi 1:6) Ela ekwaha yoopacerya Biibiliya onimwiitthana awe “Satana” okhala nwanani a Muluku. Okathi waakhanle aya muthukumano ole wiirimu, Satana khahiyo aari mwaana oororomeleya a Muluku. Muthukumano owo, waapakiwe nuumala Satana okhala nwanani a Yehova. Nave khiirela mpantta emusi ya Yehova ya wiirimu ni ya valaponi. Okathi Yehova aalavunle awe moolumo ari Maphattuwelo 3:​15, aahooniherya wiira Satana khiirela-tho mpantta emusi awe. Tivonto, Satana khoniirela mpantta emusi ya Yehova ya wiirimu, eyo piiyo, “muthiyana”. Moovarihana ni eversiikulu ela, muthiyana owo, aamukumiherya “osuulu” awe.

5. Nniixutta exeeni ni muthukumano waapakiwe wiirimu?

⁵ Yehova, oheemererya olempwa mbiibiliyani itthu saalavuliwe muthukumano ole waapakiwe wiirimu. Moolumo a Satana, annooniherya wiira owo tootakhala ni onniwootherya itthu soohiloka arumeyi a Yehova. (Yoobi 1:9; mulikanyihe ni Wiisuupulula 12:10.) Itthu siiraneyale muthukumano ole, sinnooniherya wiira Yehova, onnirumeela owerya wawe mwa enamuna yooloka ni mwa xariya. Nave, ninniixutta wiira Muluku Oowerya Sootheene, Yehova, onnivaha mukano itthu nikhanle ahu oopaka aahiiso oohipaka.

YEHOVA TONIHELA MUKANO

6. Okathi wa muthukumano ole Yehova oonihenrye sai wiira taahoolela? (Yoobi 1:​7, 8)

⁶ Mmusome Yoobi 1:​7, 8. Okathi wa muthukumano ole, Yehova taahoolela. Tivonto, Yehova aahipaceriha muthukumano ole omukohaka Satana so: “Kiira monweha murumeyi aka Yoobi?” Yehova, aanisuwela wiira Satana aaphavela omukumiherya mixankiho Yoobi. Nrowe niwehe moota Yehova aarumenle awe owerya wawe wiira omukhaliherye Yoobi.

7. Moovarihana ni Yoobi 1:​10, 11, itthu xeeni Satana oniwootherya awe apinaatamu animurumeela Yehova?

⁷ Mmusome Yoobi 1:​10, 11. Yehova tori Muluku Oowerya Sootheene ni onnirumeela owerya wawe mwa enamuna oniphavela awe. (Yer. 32:17; Dan. 4:35) Masi Satana aahihimya wiira Yehova onirumeela owerya wawe mwa enamuna yoohiloka. Nave, aahihimya wiira Yoobi ni apinaatamu akina, animurumeela Muluku mwaha woowi Yehova onnaavaha itthu sooloka. Nave-tho, aahimmye wiira apinaatamu animurumeela Yehova, okhala wiira aniphavela oreelihiwa. Yehova oonenle sai itthu sootheene Satana aahimyale awe?

8-9. Etthu xeeni Yehova aamulenle awe Satana wiira ohipake ni mwaha wa xeeni? (Yoobi 1:12) (Nwehe eteseenyu.)

⁸ Mmusome Yoobi 1:12. Yehova aahimweemererya Satana omweehererya Yoobi. Masi aahimuleela etthu ahaakhanle awe oopaka. Olavulaka ni Satana, Yehova aahimyale so: “Muhimwiirihe etthu yootakhala!” Malaikha ootheene yaari muthukumano ole, yaanimwiiwa Yehova onvahaka malamulo ale Satana. Satana aahaana wiiwelela malamulo a Yehova. Nave khaarina owerya wa omwiiriha etthu ekina Yoobi, ehikhanle paahi ele eemereriwe awe ni Yehova. Nave olelo-va, Yehova khonimweemererya Satana opaka itthu sootheene oniphavela awe. Yehova aahirumeela okhulupale ni owerya wawe wiira omukhapelele Yoobi. Nave aahooniherya wiira owo Muluku axariya ni oophenta.

⁹ Palano a Satana khaakhumenle saana, okhala wiira Yoobi khaahiyale omuroromela Tiithi awe a wiirimu. (Yoobi 1:22) Masi Satana aaniphavela omweehererya-tho Yoobi.

10. Xeeni Yehova aamweemerenrye awe Satana omweehererya-tho Yoobi? (Yoobi 2:​2-6)

¹⁰ Mmusome Yoobi 2:​2-6. Moottharelana, Satana aahimwiiriha Yoobi itthu sikina sootepa otakhala wiira omuhiihe omurumeela Yehova. Satana aahimyale wiira Yoobi aamuhiya omurumeela Yehova wiira oopole okumi awe. Yehova aahimweemererya Satana omweehererya Yoobi, omuruuhelaka eretta yootepexa owereya. Yehova aahipaka eyo, ophavelaka omooniherya Satana wiira itthu aahimya awe khahiyo saari seekeekhai. Hata eemerenrye, Yehova aahinvaha mukano Satana. Yehova aamulenle so: “Muhimwiive!” Nto Satana aahaana wiiwelela. Mwa enamuna ela, Yehova aahooniherya-tho wiira torina owerya wookumiherya malamulo, okhala wiira khiivo etthu ekina Satana aakhanle awe oopaka ohikhanle wiiwelela.

YEHOVA AAHIMALIHA MIXANKIHO SA YOOBI

11. Moovarihana ni Yoobi 42:​10-13, Yehova aamureelihale sai Yoobi?

¹¹ Mmusome Yoobi 42:​10-13. Nuumala Yoobi wooniherya wiira khaarowa ohiya okhala oororomeleya, Yehova kheemerenrye wiira Satana omweehererye-tho Yoobi. Nto Yehova aahimaliha mixankiho sa Yoobi. Nave, khiivo etthu ekina Satana aakhanle awe oopaka. Satana khaarina owerya wa omukhoottiherya Yehova omukhapelela ni omureeliha Yoobi.

12. Nvahe ntakiheryo, nnooniherya moota Yehova onirumeela awe owerya wawe wiira aakhaliherye arumeyi awe.

¹² Mahiku ala ookiserya, arumeyi anceene a Yehova, anniweha moota Yehova onirumeela awe owerya wawe wiira aakhapelele. Mwa ntakiheryo, mwaakha wa 1945, okathi wa manazista, Anamoona a Yehova oowiiraka 230 yaari opuro onivariwa muteko wookhanyereriwa, Yehova aahaakhaliherya wiira ahiiviwe. Alavulaka itthu saawiiranenle, yaahimyale wiira “Yehova aahinoopola ntoko aawooponle awe amiravo araru aheeperi munlittini na mooro. Aheeperi awo, khiyankha mwiixi nuumala okhuma munlittini na mooro. Mwa enamuna emosa-ru, okathi Yehova aakhaliherye awe Anamoona ale 230, waamini waya waahitepa olipa ovikana khalai. Yehova aahaavaha ikuru sawe. Awo yaahixoona ntoko Daniyeli nuumala woopoliwa munlittini na akharamu. Okhuma okathi ole yoopoliwe aya, awo yaahithanla ohihiya omurumeela Yehova moororomeleya. Nave ahimyale wiira khanrowa ohiya omurumeela Yehova mahiku ootheene.” — Mulikanyihe ni Daniyeli 3:27; 6:22.

13. Okathi sinoophwanyaayani mixankiho, etthu xeeni mukhanle anyu ookupali? (Nwehe ifootu.)

¹³ Nave olelo-va, pooti oniphwanyaka mixankiho seiyo sinikhala ntoko wiira niri munlittini mwa akharamu. (1 Ped. 5:​8-10) Ikwaha sikina, pooti okhulumuwa nuupuwelaka wiira mixankiho sahu khasinrowa omala. Etthu enrowa onikhaliherya okathi sinniphwanya aya mixankiho, ori wuupuwelela yoowiiraneya ya Yoobi. Masi nikupaliki wiira Yehova onoomaliha mixankiho sahu niinaano-va aahiiso muhoolo. Yehova, khonrowa weemererya wiira olumwenku ola wootakhala ovikaniheke okhala siisa. Okhala wiira oothanla nihiku onrowa awe opwetexa. Nto khiivo etthu enrowa omukhoottiherya!

YEHOVA ONNAAPHENTA ARUMEYI AWE OOROROMELEYA

14-15. Etthu xeeni Yehova oniphavela awe para arumeyi awe oororomeleya ni mwaha wa xeeni? (Yoobi 14:15) (Nwehe eteseenyu vakaapani.)

¹⁴ Mmusome Yoobi 14:15. Tiithi ihu a wiirimu, toororomeleya ni atthu ale animuroromela. Owo onaaphenta vanceene arumeyi awe. Nave okathi anikhwa aya, onniphavela ni onileiherya waahihimuxa. Okathi onrowa awe waahihimuxa arumeyi awe akhwiiye, ootheene ahu ninrowa ohakalalaka. — Yes. 65:17.

¹⁵ Nnaamwi saamalihiwe mixankiho sawe, Yoobi nlelo aakhala olumwenku ola wa Satana. Biibiliya onihimya wiira Yehova aahimureeliha Yoobi, okhala wiira aahimaliha oretta awe ni aahinvaha mireerelo sinceene, ovikana iye aarina awe khalai. Nave muhoolo, Yehova ononvaha mireerelo sinceene Yoobi, ovikana iye anvahale awe okathi ole. Veekeekhai, Yehova oniphavela wiira arumeyi awe oororomeleya akhalane ohakalala weekeekhai ni yapuheke muhoolo. Okathi owo, onimwaareeliha arumeyi awe ootheene animuroromela, aavahaka okumi woohimala. (Wis. 21:​3, 4) Okhala wiira Yehova Muluku Oowerya Sootheene, khuuvo onrowa omukhoottiherya opaka ele oniphavela awe. Wupuwelela moota onrowa awe onireeliha muhoolo, eyo enninimaaliha okathi sinniphwanya aya mixankiho!

16. Etthu xeeni enniiriha omuroromela Yehova?

¹⁶ Nuuvira okathi munceene okhalaka, Yoobi aahikhwa. Masi okhala wiira Yehova Muluku Oowerya Sootheene, owo onoowerya omuhihimuxa Yoobi. (Otum. 32:39) Nto waphiya okathi othanlale awe, khuuvo onrowa omukhoottiherya Yehova waahihimuxa ale onaaphenta awe akhwiiye. — Arom. 8:​38, 39.

MMUROROMELEKE YEHOVA

17. Etthu xeeni enooniherya wiira Satana khoniwerya waamala-maliha arumeyi a Yehova?

¹⁷ Eliivuru ya Yoobi, yooniixuttiha itthu sinceene sinniiriha omuroromelaka Yehova ni murima ahu wootheene. Ninnimuxukhurela vanceene Yehova, okhala wiira kheemerenrye wiira Satana aamala-malihe arumeyi awe Yehova! Olelo-va, atthu oowiiraka imilyau 9, annimurumeela Yehova moororomeleya. Nto eyo enooniherya wiira Yehova, Muluku Oowerya Sootheene. Ikuvernu sa mulaponi ni ahooleli a itiini, ikwaha sinceene annimananiha wiira arumeyi a Yehova ahiye omurumeela ni olaleya ihapari sooreera. Masi awo khaniwerya, okhala wiira Yehova yoowo ori Muluku Oowerya Sootheene, tonnikhaliherya. (Yes. 54:17) Nto khuuvo oniwerya onihiiha waaleela atthu akina wiira Yehova tori Muluku a ekeekhai ni wiira Satana nawoothe. Hata nikhwaaka, Yehova onoorowa onihihimuxa ni waahihimuxa ootheene ale oororomeleya. — Hos. 13:14.

18. Xeeni nihimpirisari ahu woova itthu sinrowa wiiraneya muhoolo?

¹⁸ Okathi nnuupuwelela ahu itthu nisomme ahu eliivuru ya Yoobi, eyo enninikhaliherya olipiha omwaamini wahu Yehova. Nave enninikhaliherya okupali wiira Yehova onoonikhaliheryaka, moohicikha etthu enrowa okhumelela muhoolo. Nto khanimpirisari woova. Yapacerya maxakha maalupale, Satana ni atthu awe anrowa wuupuwelaka wiira ti vookhweya waatuphela arumeyi a Muluku. Masi ntoko aamukhalihenrye awe Yoobi khalai, Yehova onoorowa waakhaliherya arumeyi awe. Nave khonrowa weemererya wiira Satana aakumiherye mixankiho sihinrowa omala. Moohipisa, Yehova onoorowa omala-maliha mixankiho sootheene Satana onaakumiherya awe apinaatamu. Satana ni malaikha awe ootakhala, anrowa otthukiwa ni oriheliwa mulittini moowiixa, mwa iyaakha 1000. (Luka 8:31; Wis. 20:​1-3) Moottharelana, Satana ni atthu ootheene animukhaliherya anrowa opwetexiwa moomalela, ntoko Yehova oleihenrye awe. — Maph. 3:15; Arom. 16:20; Wis. 20:10.

19. Mareeliho xeeni anrowa aya wakhela ale animuroromela Yehova? (Nwehe eteseenyu.)

¹⁹ Ninnilipelela ni murima ahu wootheene elapo esya, weiwo ninrowa ahu okhalana okumi wooloka ni ohakalala weekeekhai. Ekumi enrowa okhala yootepa ohakalaliha ovikana moota nnuupuwela ahu. Yehova onileiherya so: “Moone! Miyo kinnipaka itthu sootheene isya.” (Wis. 21:5) Moolumo ala aniphavela ohimya exeeni? Okhuma wanipacerya aahiiso oxardim ya wedeni Satana ni malaikha awe ootakhala onnaakumiherya mixankiho sinceene apinaatamu. Nto Yehova amaliha mixankiho iyo, enrowa okhala ekwaha yoopacerya apinaatamu anirowa aya okhala mootaphuwa. Tthiri vanrowa okhala voohakalaliha! Waphiya okathi owo, khaninrowa ovirihaka nnakhala ohiyu omosa nihirumpe, mwaha wa mixankiho sa olumwenku ola wa Satana. Ale anrowa woopowa okathi wa Armagedoni anooweha miiriirya sinceene siiraneyaka. Anooweha iretta sootheene simalihiwaka. Moottharelana, anoopacerya ohihimuxiwa atthu ale nnaaphenta ahu. Nto ootheene ahu ninrowa okhalana ekumi yeeyo Yehova aaphavela awe okhuma wanipacerya!

20. Etthu xeeni mulakenle anyu opaka?

²⁰ Mahiku ala ookiserya, sinooniphwanyaka mixankiho sinceene. Nto nihaana okhala oolipa murima wiira nihihiye okhala oororomeleya. Nave nihaana omuroromelaka ni murima ahu wootheene Yehova ni omwiiwelela, okhala wiira owo tori Mukhulupale. Nihaana omphenta Yehova ni wooniherya wiira Satana nawoothe. Naahihiye omuroromela Yehova, Muluku Oowerya Sootheene, nikupaliki wiira muhoolo nnimwaakhela mareeliho manceene, yaawo onrowa awe waavaha arumeyi awe oororomeleya!