Mukupaliki sooleiherya sa Yehova

1. Xeeni ninreerela ahu omuroromela Yehova? (Esaalimu 31:​2-5)

NINKHALA olumwenku ola wootakhala atthu anceene ari aya oohiroromeleya ni anaawoka akhwaaya. Ti voovila omphwanya mutthu oomuroromela. Mapatarawu manceene toohiroromeleya. Atthu anceene anithumiha, annaawoka makiliyenti aya. Nave atthu akina khanaaroromela hata apatthani aya. Masi ti voohakalaliha osuwela wiira khula okathi, nihaana omuroromela Yehova! Okhala wiira owo, “Muluku a ekeekhai”. (Musome Esaalimu 31:​2-5.) Yehova khonootha, khula etthu enihimya awe ti ya ekeekhai. Nto nikupaliki wiira etthu onihimya awe onoopaka.

2. Ipontu xeeni ninrowa ahu othokorerya mwaha ola?

² Mwaha ola ninrowa othokorerya ipontu 3. Yoopacerya, xeeni ninreerela ahu omuroromelaka Yehova ni murima ahu wootheene? Ya nenli, etthu Muluku a ekeekhai onipaka awe nenna-va wiira omalelihe sooleiherya sawe. Ya neeraru, moota onrowa awe opwetexa olumwenku ola wootakhala onilamuleliwa ni Satana. Ipontu iya sinoonikhaliherya waalaleerya atthu akina ikeekhai sa mbiibiliyani.

XEENI NINREERELA AHU OMUROROMELAKA YEHOVA NI MURIMA AHU WOOTHEENE?

3. Xeeni ninreerela ahu omuroromelaka Yehova ni murima ahu wootheene?

³ Nihaana omuroromela Yehova, okhala wiira Mpattuxa. Owo topattunxe erimu, elapo ni itthu sootheene sikumi. (Maph. 1:1; Esal. 36:9; Wis. 4:11) Nave Yehova oopaka itthu sinaakhaliherya apinaatamu okhala akumi ni oweryaka ovara miteko saya. Owo onnikhapelela ni khonrowa ohiya okhapelela itthu sootheene sikumi siri wiirimu ni valaponi. Tivonto, nihaana omuroromelaka Yehova okumi ahu wootheene, maana owo tori Mpattuxa, torina ankhili ni owerya.

4. Ninsuwela sai wiira Yehova onniniphenta?

⁴ Nihaana omuroromelaka Yehova okhala wiira onniniphenta. Owo oonipattuxa maana oniphavela wiira nikhaleke akumi ni nihakalaleke ntoko yena. Nookhalana eparakha ya okhalana mikhalelo sa Yehova ntoko ophenta ni oreera murima, mwaha woowi Yehova onipattunxe ailikanyihaka mmansawe. (Maph. 1:26) Yehova ooneemererya opaka soothanla nimphavela ahu. Nave oonivaha elapo ela yooreera wiira nikhaleke. (Esal. 115:16) Yehova aahaavaha Adamu ni Eva muteko wootepa ohakalaliha, eyo piiyo, okhaliha elapo okhala eparayiisu. (Maph. 1:28; 2:15) Owo aahaavaha soolya soosiva, miri soovirikana, axinama ni itthu sikina. Yehova aahaavaha itthu iyo sootheene, maana aaphavela wiira ahakalaleke. Iya itthu vakhaani paahi, sinooniherya wiira “ophenta woororomeleya wa Yehova, onikhala mahiku ootheene”. — Esal. 103:17.

5. a) Nuumala Adamu ni Eva omutthekela, Yehova oonihenrye sai wiira khohiyale yoolakela awe? b) Sooleiherya xeeni Yehova omalelihale awe? (Nwehe ekaaxa eni: “Khula okathi Muluku onihimya ekeekhai.”)

⁵ Nihaana omuroromela Yehova okhala wiira onnipaka itthu sootheene onileiherya awe. Owo khopanke “elapo ela mahala ene, masi opanke wiira ekhaliweke”. (Yes. 45:​18, 19) Nuumala Adamu ni Eva omutthekela Muluku, awo yaahilamuliwa okhwa. Vaakhala ntoko wiira Diabo aahimukhoottiherya Yehova opaka ele aaphavela awe valaponi ni apinaatamu. Masi Satana khaawenrye, okhala wiira khula okathi Yehova onnipaka etthu oniphavela awe. (Yes. 46:​10, 11) Nto Yehova khohiyale yoolakela awe ya owiiriha apinaatamu okhalaka valaponi mahiku ootheene. Yehova owenrye sai opaka eyo? Owo aahiweemererya Adamu ni Eva waayara anamwane. Nave onvaha Mwanawe mmosa ene wiira owoopole anamwane a Adamu. Oopaka eyo wiira apinaatamu akhalane nlipelelo na okhala mahiku ootheene valaponi. — Yoh. 3:16.

ETTHU MULUKU A EKEEKHAI ONIPAKA AWE WIIRA OMALELIHE SOOLEIHERYA SAWE

6. Etthu xeeni Yehova aahimyale awe yaarowa omwiiraneela Satana?

⁶ Enowa yuulupale ya khalai, yeeyo eniihaniwa Diabo ni Satana,a ti yaawiirihale Adamu ni Eva ohimwiiwelela Muluku. (Wis. 12:9; Maph. 3:​4, 5; Yoh. 8:44) Masi Yehova aahihimya wiira muhoolo, Satana ampwetexiwa mwaha wa itthu soohiloka aapanke awe. (Maph. 3:15) Yehova aahimyale wiira ohinatthi Satana opwetexiwa, atthu anceene yammuttharaka ni opaka itthu soohiloka ntoko yena. Masi atthu akina yaarowa okhala oororomeleya wa Yehova.

7. a) Tani anitthara ntakiheryo noohiloka na Satana? b) Etthu xeeni enrowa owiiraneela?

⁷ Malaikha ni atthu akina, khanimwiiwelela Muluku. Nto awo annitthara ntakiheryo noohiloka na Satana. Mwaha waivaavo, awo aniirela mpantta osuulu wa Satana. Masi Yehova oothanla nihiku onrowa awe ompwetexa Satana ni ale animukhaliherya. — Dan. 2:44; Arom. 16:20.

8. Etthu xeeni Yesu opanke awe mwaakha wa 1914? (Nwehe ifootu.)

⁸ Etthu xeeni ennikupaliha wiira yooleiherya ya Yehova ya ompwetexa Satana ni ale animukhaliherya enimwiiraneya? Mwaakha wa 1914, Yesu aahiwana ekhotto ni Satana ni ale animukhaliherya. Nto Yesu aahixintta okhala wiira aahimurihela vathi Satana ni malaikha awe ootakhala. (Wis. 12:​7-9) Ekhotto eyo yaawaniwa wiirimu, masi apinaatamu saahaaphwanya mixankiho sinceene valaponi. Biibiliya onihimya wiira “mootakhaliwa nyuwo elapo ya vathi ni ephareya, okhala wiira Diabo ookhuruwela wa nyuwo, onanariwe ene vanceene, maana oosuwela wiira orina okathi vakhaani paahi”. (Wis. 12:12) Okhuma mwaakha ole, etthu yuulupale Satana oniphavela awe, ori waahapuxa atthu anceene wiira ahimwiiweleleke Muluku. Ti nthowa naya mixankiho sintepa aya mahiku ala. Masi moohipisa, Yesu onoomaleliha oxintta wawe, maana onompwetexa Satana ni ootheene ale animukhaliherya. (Wis. 6:2) Nto Yesu onootteeliha nsina na Yehova moomalela ni onimooniherya wiira Satana nawoothe. (Esal. 45:​4-6) Tthiri atthu ootheene anoosuwela wiira Yehova, Muluku a ekeekhai! — Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

YEHOVA ONNAATHUKUMANYA ALE ANIMPHENTA

9. Tani Yehova onaathukumanya awe olelo-va?

⁹ Olipelelaka okathi onrowa awe ompwetexa Satana ni ale animukhaliherya, Yehova onnithukumanya “itthu sootheene mwa Kristu: Itthu siri wiirimu ni itthu siri valaponi.” (Aef. 1:10) Nuulumo noowi “itthu siri wiirimu”, nimphavela waahimya makristau oothanliwa, yaawo Yehova aathanlale awe wiira yalamuleleke ni Yesu wiirimu. Nave nuulumo noowi “itthu siri valaponi”, nimphavela waahimya arumeyi a Muluku, yaawo anrowa okhalaka Mparayiisu valaponi. Arumeyi ootheene a Yehova ari wiirimu ni valaponi, annikhalela nthiti waakhaliherya atthu akina wiixutta ekeekhai ni owooniherya wiira Satana nawoothe.

10. Etthu xeeni Yehova onirumeela awe wiira aathukumanye ale animphenta? (Wiisuupulula 14:​6, 7)

¹⁰ Yehova onnirumeela olaleiwa wa ihapari sooreera, wiira aathukumanye ale animphenta, olumwenku wootheene. (Mmusome Wiisuupulula 14:​6, 7.) Nnaamwi ihapari sooreera silaleiwaka ni apinaatamu, nave malaikha annikhaliherya muteko owo. Olaleiwa wa ihapari sooreera, onnooniherya itthu soowoothiwa siniixuttihiwa ni Babiloonia Muulupale, yoowo ori mutthenkeso wa olumwenku wootheene wa itiini soowootha. Mwa iyaakha sinceene, Satana onnirumeela itiini soowootha wiira owiixuttihe atthu itthu soohiloka voohimya sa Yehova. (Wis. 18:​2, 4) Masi moohipisa, itiini sootheene soowootha sinoopwetexiwa. Nto ale animphenta Yehova yoowo ori Muluku a ekeekhai, anonvuwihaka ntoko oniphavela awe. — Wis. 17:16.

11. Ninrowa waasuwela sai makristau a ekeekhai?

¹¹ Atthu Yehova onaathukumanya awe, ta ikultuura soovirikana, akina toosoma vanceene, akina khasomme nave atthu awo ta olumwenku wootheene. (Wis. 7:​9, 10) Vaavo aneemererya aya “ihapari sooreera”, awo annikupali wiira aaphwanya ekeekhai, annihakalala ni annipacerya wiirela mpantta emusi ya Yehova. (Mar. 13:10) Olelo-va, vanniweryaneya waasuwela ale animurumeela ni ahinimurumeela Yehova ntoko oniphavela awe. Profeta Malakiya aahimmye so: “Nyuwo munootthikela oweha ovirikana okhanle eriyari ya mutthu a xariya ni mutthu ootakhala, ni ovirikana okhanle eriyari ya mutthu onimurumeela Muluku ni ole ohinimurumeela.” (Mal. 3:18) Vanniweryaneya waasuwela makristau a ekeekhai, mwaha wa mweettelo aya ni muteko anivara aya wa olaleya ihapari sooreera.

12. Exeeni eniiraneya vaavo ninlaleya ahu ihapari sooreera?

¹² Vaavo ninlaleya ahu “ihapari iya sooreera sa Omwene”, ninniiwelela yooruma ya Yesu ni ninnikhaliherya wiiraneya wa iprofesia. (Math. 24:14; 28:​18-20) Nave ninnaakhaliherya atthu a olumwenku wootheene okhala awiixutti a Kristu ni okhalana nlipelelo na omukokhorelaka Muluku mahiku ootheene. Okathi ninlaleya ahu ihapari sooreera ninnikhaliherya wiiraneya ele Yehova oniphavela awe. Nto eyo eparakha yuulupale nirina ahu!

KHUUVO ONIWERYA OMUKHOOTTIHERYA YEHOVA OPAKA ETTHU ONIPHAVELA AWE

13. Tani Satana onitepa awe waalupattha, ni mwaha wa xeeni?

¹³ Satana Diabo khoreere onanariwa, maana osuwela wiira “orina okathi vakhaani paahi” wiira opwetexiwe. (Wis. 12:​12, 13) Nto onnaalupattha vanceene ale Yehova aathanlale awe wiira yalamuleleke ni Yesu wiirimu. Okhala wiira awo anneettela sooruma sa Muluku ni aakhalana “muteko wa omukhalela onamoona Yesu.” (Wis. 12:17; 14:12) Nave ootheene ale anaakhaliherya ale oothanliwa, annilupatthiwa ni Satana.

14. Etthu xeeni enrowa wiiraneya nuumala Satana waatuphela arumeyi a Muluku? (Nwehe vakaapani.)

¹⁴ Nuumala Babiloonia Muulupale opwetexiwa, atthu ootheene animukhaliherya Satana, anoorowa waatuphela arumeyi a Muluku. Nto okathi owo enoopacerya ekhotto ya Harmagedoni. (Wis. 16:​13, 14, 16) Yesu ni malaikha a wiirimu, anoowoopola arumeyi a Yehova ni omala-maliha itthu sootheene soohiloka sa olumwenku ola wa Satana. (Wis. 19:​19-21) Nave atthu ootheene ootakhala ni anawoothe, anrowa opwetexiwa. (Wis. 21:8) Okathi owo, atthu ootheene anoosuwela wiira Yehova, tori Muluku a ekeekhai ni axariya.

15. Etthu xeeni ennikupaliha wiira sooleiherya sa Yehova sinimwiiraneya? (Yesaya 65:​16, 17) (Nwehe eteseenyu.)

¹⁵ Olelo-va, olumwenku ti wootakhala ni atthu anceene khanilavula ekeekhai. Masi arumeyi a Yehova toowiiraana okhala wiira Yehova onnaakhaliherya. Nave mpakha-va, Yehova onnivikaniha waathukumanya atthu. Khiivo etthu ekhanle oomukhoottiherya Yehova waakhaliherya arumeyi awe ovara muteko woolaleerya. (Mmusome Yesaya 65:​16, 17.) Nto nikupaliki wiira sooleiherya sa Yehova sinimwiiraneya. Mwaha wa xeeni? Mwaha woowi moolumo a murummwa Paulo, ari Aroma 8:​38, 39, annooniherya wiira “nnakhala okhwa, aahiiso okumi, wala malaikha, nnakhala ikuvernu, aahiiso itthu sikhanle vano wala itthu sinrowa okhumelela muhoolo, nnakhala owerya, hata itthu sa musulu, nnakhala itthu sa vathi, aahiiso itthu sikina sipattuxiwe, khasiniwerya onivalaanya ni ophenta wa Muluku, weiwo onooniheriwa mwa Kristu Yesu, Pwiya ahu.”

16. Exeeni eniwiirihani omuroromela Yehova ni murima anyu wootheene?

¹⁶ Sookhala itthu sinceene niixuntte ahu sinniiriha omuroromela Yehova, Muluku a ekeekhai. Yehova Mpattuxa ahu nave onniniphenta vanceene. Owo onnaathukumanya atthu a olumwenku wootheene wiira amukokhoreleke ntoko oniphavela awe. (Yes. 60:22; Zak. 8:23) Ninnisuwela wiira Yehova onnimaleliha itthu onileiherya awe. Nave moohipisa onompwetexa Satana ni onoomala-maliha itthu soothene soowootha Satana onihimya awe. Nto nihaana onvekela Yehova ntoko Davidi yoowo aavekenle so: “Ottottopeliwe Yehova, Muluku . . . yoowo paahi onipaka itthu sootikiniha. Nsina nawe noovuwa, nittottopeliweke mahiku ootheene, ni ovuwa wawe osareye mulaponi mootheene”. — Esal. 72:​18, 19.