Muluku onninimaaliha mwa mikhalelo sootheene

1. Xeeni ninreerela ahu waamaaliha atthu akina?

OOTHEENE ahu, ninneehereriwa ni “itthu soovirikana”. Nto okathi owo, ninnipirisari omaalihiwa ni olipihiwa. (1 Ped. 1:6) Ninnixukhurela vanceene okathi atthu akina annimaaliha aya. Nto nihaana waamaalihaka atthu akina okathi sinaaphwanya aya mixankiho. (Math. 7:12) Yehova, “Muluku onnimaaliha mwa mikhalelo sootheene” ni onniixuttiha moota nikhanle ahu oowaamaaliha “ale sinaaphwanya mixankiho soovirikana.” Nto nnoowerya otthara ntakiheryo nawe, naamaalihaka atthu akina. (2 Akor. 1:​3, 4; 1 Ates. 4:18) Hiyo ninnaamaaliha anna ni arokora okhala wiira ninnaaphenta. Mwaha ola, nnoothokorerya ipontu iya tthaaru. 1) Onitaphulela exeeni waamaaliha atthu akina? 2) Ninrowa owerya sai waamaaliha atthu akina? 3) Etthu xeeni nikhanle ahu oopaka naaphavelaka omaalihiwa?

ONITAPHULELA EXEENI WAAMAALIHA ATTHU AKINA?

2. Biibiliya oniphavela ohimya exeeni aalavulaka sa “waamaaliha” atthu akina?

² Mbiibiliyani, nuulumo na ekereku nitaphuleleliwe “waamaaliha”, pooti okhalana sootaphulela soovirikana, moovarihana ni mwaha onithokoreriwa. Pooti otaphulela “waalipiha” aahiiso “waatumererya”. (Arom. 12:8; nwehe enoota “waalipiha.”) Nave pooti otaphulela omwiitthana aahiiso okhala ni mutthu owo wiira nimukhaliherye. Nkahaya mmuupuwele mutthu yoowo onitthimaka orowaka omukhaliherya mpatthani awe orina mixankiho. Mutthu owo pooti orumeela inamuna soovirikana wiira omukhaliherye. Masi yoolakela awe yuulupale, omuhiya mpatthani awe ori ene saana.

3. Ntakiheryo na Baarnaba ninniixuttiha exeeni? (Nwehe eteseenyu.)

³ Nrowe nthokorerye ntakiheryo na mbiibiliyani. Mukristau iitthaniwa Yosefe, khula okathi aanaamaaliha ni waakhaliherya atthu akina. Nto eyo yaahiwiiriha arummwa akina opacerya omwiitthana Baarnaba, nsina nenlo nintaphulela “ole onaalipiha akina”. (Mit. 4:36) Tthiri nsina nlo naahimphwanela mwaha wa moota aakhaliherya awe atthu akina. Tivonto, khaatthikenle wiitthaniwa okhala Yosefe, masi iitthaniwa Baarnaba. Biibiliya onihimya wiira ikwaha sinceene, Baarnaba aanaakhaliherya anna ni arokora okathi yaapirisari aya. Mwa ntakiheryo, nuumala Saulo okhala mukristau, owo aahirowa oYerusalemu wiira aasuwele makristau makina. Masi makristau yaari oYerusalemu yaanimoova Saulo, mwaha woowi khalai, aanaalupattha vanceene anna ni arokora. Hata vari siiso, Baarnaba aanimuroromela Saulo ni aahaasuweliha arummwa. — Mit. 9:​26-28.

MOOTA WOOWAAMAALIHA ATTHU AKINA

4. Moota xeeni nikhanle ahu oowaalipiha atthu akina? (Aroma 1:​11, 12)

⁴ Vaaweryaneyaka mwaaxekuryeke. Yehova onnaaruma arumeyi awe wiira yaamaaliheke aahiiso waalipiha atthu akina. Mwa ntakiheryo, okathi profeta Eliya aaxankale awe, Yehova aahiruma nlaikha wiira namulipihe. (1 Mam. 19:​4-7) Nave murummwa Paulo aaniphavela vanceene waaxekurya anna ni arokora wiira aalipihe. (Mmusome Aroma 1:​11, 12.) Vaavo munimuxukurya anyu mutthu, nviriheke okathi munceene muri ene ni yena, nto eyo enoomulipiha. (1 Akor. 16:7) Vakhala wiira khamuniwerya omuxukurya mutthu owo, nyuwo pooti omulikarela, omulepela ekarta aahiiso omwinviyarela mensaxe. Yehova oniphavela wiira mwaalipiheke atthu akina. Niireke munneemererya orummwa ni Yehova?

5. Xeeni ikwaha sikina vanivila aya waaxukurya atthu akina? Nvahe ntakiheryo.

⁵ Okhala wiira ninkhala mahiku ookiserya, ikwaha sikina pooti okhala vooxankiha waaxukurya atthu akina okathi anipirisari aya olipihiwa. Ntakiheryo na Onesiiforo yoowo aakhala wEfeso, ninniniixuttiha etthu. Mwa ntakiheryo, okathi Paulo aatthukweliwe awe oRoma, Onesiiforo aaniphavela omulipiha. Nto owo aahimwaavya Paulo nnaamwi opaka eyo yaari etthu yoowoopiha, maana yammwiiriha otthukweliwa aahiiso wiiviwa. (2 Tim. 1:​16-18) Nave Anamoona a Yehova a oRússia, annipaka etthu emosa-ru okathi annaya anilupatthiwa aya mwaha wa waamini waya. Okathi munna aahiiso murokora oniroihiwa awe ophukeliwa, anna ni arokora annirowa omulipiha nnaamwi asuwelaka wiira opaka eyo pooti waakumiherya muxankiho. Nto mwiivaheke okathi wiira mwiixutte ni matakiheryo a arumeyi a Yehova a khalai ni a mahiku ala, yaawo anaakhaliherya atthu akina ni ahinihiya ohakalala, nnaamwi alupatthiwaka.

6. Nilavulaka sa waalipiha atthu akina, ninrowa omutakiha sai Yehova? (Nwehe efootu.)

⁶ Mwaawiriyaneke oratteene. Okathi profeta Eliya oova awe ni uupuwela awe wiira aamwiiviwa, owo aahinvekela Yehova ni aahimuleela itthu sootheene saamuxankiha. Masi Yehova aanisuwela mixankiho sootheene samphwanya Eliya. Hata vari siiso, Yehova aahiwiriyana ni ephoole nivekelo na Eliya. Okathi aavekela awe, Eliya aalavula etthu emosa-ru, masi Yehova aanimpixerya murima! (1 Mam. 19:​9, 10, 14) Nave profeta Habakuuki aahimuleela Yehova mixankiho sawe ni otakhala oona awe wiiraneyaka. Moopixa murima, Yehova aahinwiriyana Habakuuki nnaamwi ikwaha sikina aalavula mwa enamuna yahooniherya nttittimiho. (Hab. 1:​2, 3) Nave olelo-va, Yehova onniwiriyana mavekelo ahu hata osuwelaka etthu nimphavela ahu. Nto nnoowerya omutakiha Yehova, naawiriyanaka ni ephoole ni mwa nttittimiho okathi anna ni arokora anilavula aya. Ninrowa owerya sai opaka eyo? Nnoowerya opaka eyo akhala wiira khinnaathikila moolumo okathi anilavula aya, akhala wiira khininnanariwa okathi anilavula aya etthu yoohiloka, ni akhala wiira ninnaawiriyana ni ephoole hata alavulaka etthu emosa-ru. — Yak. 1:19; Mus. 7:9.

7. Ninrowa osuwela sai moota woomukhaliherya mutthu onipirisari?

⁷ Musuweleke etthu mukhanle anyu oopaka wiira mmukhaliherye. Hiyo khaninwerya osuwela etthu eri vamurimani va mutthu ntoko Yehova oniwerya awe. Masi nnoowerya osuwela moota woomukhaliherya mutthu onipirisari, ninwiriyanaka ni ephoole. Muhuupuweleke wiira munnisuwela etthu mpatthani anyu oniphavela awe. Owo pooti opirisariki okhaliheriwa mwa enamuna yoovirikana ni ele mwaarowa anyu ophavela, vaakhanle wiira ti nyuwo. Ootheene ahu na atthu oovirikana. Nto mwiivaheke okathi, munwiriyaneke ni ephoole ni mooreerela murima, mmukoheke itthu sinrowa wookhaliheryani osuwela moota woomukhaliherya. — Mir. 20:5.

8. Nuumala Laazaro okhwa, Yesu aamulipihale sai Marta ni Maria? (Nwehe ifootu.)

⁸ Nrowe niwehe moota Yesu aamulipihale awe Marta ni Maria nuumala Laazaro okhwa. Oowanli aya, yaahixanka vanceene mwaha wa okhweliwa murokoraya. Masi Yesu aahaamaaliha mwa inamuna soovirikana. Nuumala Marta olavula, Yesu aahimuupuxerya ikeekhai sa mbiibiliyani voohimya sa nlipelelo na ohihimuxiwa ni aahimukhaliherya olipiha waamini wawe nlipelelo nlo. Masi Biibiliya khonihimya wiira okathi Maria anla awe, Yesu aahilavula ni yena sa nlipelelo na ohihimuxiwa. Ohiya-vo, Yesu aahinla ni Maria ni aahimukoha opuro Laazaro aavithiwe awe. (Yoh. 11:​20-35) Etthu xeeni nniixutta ahu? Okathi nnaalipiha ahu ale sinaaphwanya mixankiho, nihuupuweleke wiira aniphavela omaalihiwa mwa enamuna emosa-ru.

9. Ninrowa omurumeela sai Biibiliya wiira naalipihe atthu akina? (Aroma 15:​4, 5)

⁹ Mmurumeeleke Biibiliya. Okathi munisoma anyu yoolepa enimulipiha mutthu simphwannye mixankiho, eyo ennimukhaliherya olipiha nlipelelo orina awe ni sooleiherya sa Yehova. (Mmusome Aroma 15:​4, 5.) Nlipelelo nlo, ninnimukhaliherya mutthu owo, woona wiira onniphentiwa ni okhapeleliwa ni Yehova. (Yes. 40:31) Munrowa ophwanya sai soolepa sikhanle oomulipiha mutthu owo? Wiira mphwanye elista ya soolepa mukhanle anyu oorumeela, murowe mpantta oni: “Nimaaliho”, ori eliivuru Iversiikulu Sinaakhaliherya Makristau. Munvekeleke Yehova wiira ookhaliheryeni orumeela saana iversiikulu iyo wiira simulipihe mutthu owo. Nave ikuru sawe soowaarya, sinimookhaliheryani wuupuwelela iversiikulu soomaliha sikhanle oomukhaliherya. — Yoh. 14:26.

10. Xeeni vari aya vooloka olavula mooreerela murima naaphavelaka waamaaliha atthu akina?

¹⁰ Mulavuleke mooreera murima. Ikwaha sikina, wiira naamaalihe apatthani ahu, nihaana waakhaliherya aahiiso waatumererya oturuka moota anuupuwela aya voohimya sa muxankiho aya. Nto muhaana wuupuwela saana etthu yoohimya muhinatthi olavula. Mphaveleke omulipiha mutthu owo, ohiya omuriipiha murima mwaha wa moolumo anyu. (Mir. 12:18) Nihaana omutakiha Yehova sa moota aamukhalihenrye awe Eliya. Owo uupuwela wiira aahanle mekhawe ni khahiyo aari profeta aavara saana muteko awe. Mooreerela murima, Yehova aahimukhaliherya Eliya oturuka moota uupuwela awe. Masi khaamulenle wiira muupuwelo awe khokhanle saana. (1 Mam. 19:​15-18) Mooreerela murima, muhaana waakhaliherya anna ni arokora, masi muupuwelaka saana etthu yoohimya muhinatthi olavula. Okathi munilavula anyu mwaha aahiiso ovaha ekomentaario omithukumanoni, mulavuleke mooreerela murima ni mmananiheke waalipiha anna ni arokora.

11. Moota xeeni nikhanle ahu oowaakhaliherya ale sinaaphwanya mixankiho? (1 Yohani 3:18)

¹¹ Mwaavaheke itthu anipirisari aya. Okathi atthu akina sinaaphwanya aya mixankiho, nihaana opaka etthu wiira naakhaliherye ohiya olavula moolumo oolipiha paahi. (Mmusome 1 Yohani 3:18.) Baarnaba oovaha ntakiheryo nooloka na moota woopaka eyo. Nuumala owo otumiha mpantta mmosa wa etereno awe, musurukhu ene aahaavaha arummwa wiira yaakhaliheryeke anna ni arokora yaari oohaawa. (Mit. 4:​36, 37) Nave anna ni arokora olelo-va, annivaha ntakiheryo nooloka na opaka etthu wiira yaakhaliherye ale anipirisari. Gabriela yoowo onikhala oPolônia aahixanka vanceene okathi epheyo yuulupale yaahononne aya empa awe. Owo onihimya so: “Miyo ni anamuyari aka, naahixanka vanceene. Nave khinaasuwela moota woolokiherya empa ahu. Masi anna ni arokora ni mavisiinyu ahu, yaahirwa olokiherya empa ahu. Awo yaavanre muteko ole nihiku nimosa paahi ni yaahimaliha. Ntakiheryo naya nookikhaliherya olipiha waamini waka, ni okupali wiira Yehova onnaaruma arumeyi awe wiira yaakhaliherye ele anihaawa.”

12. Munrowa waakhaliherya sai anna ni arokora ovilela ni ohihiya omuroromela Yehova?

¹² Muhihiye omuroromela Yehova. Okathi Paulo iiwale awe wiira makristau a oTesaloonika khiyaahiyale omuroromela Yehova hata yaalupatthiwa, waamini wawe waanilipa. Nto aaniimananiha waakhaliherya ni aanisuwela wiira muteko owo aavara awe khahiyo waari wa mahala. (1 Ates. 3:​5-8) Nave aanisuwela wiira aamulipihaka waamini wa anna ni arokora akina, aahihiye omuroromela Yehova hata simphwanyaka mixankiho. (Akol. 2:​1, 2) Mwa enamuna emosa-ru, okathi anna ni arokora anniweha aya nivilelaka ni nimuroromelaka Yehova okathi sinniphwanya aya mixankiho, awo annilipa vanceene.

13. Mukhalelo xeeni ninreerela ahu okhalana okathi nnaamaaliha ahu atthu akina?

¹³ Mpixeke murima. Anna ni arokora ariipiwe murima, pooti ovira okathi wiira atthikele okhala saana hata naamaalihaka. Tivonto, Biibiliya onihimya awe wiira “mulipihaneke . . . mukina ni mukhwaawe”. Moolumo ala anooniherya wiira khula okathi naalipiheke ale anipirisari olipihiwa. (1 Ates. 5:11) Mpixeke murima okathi munaamaaliha anyu ale aniphavela okhaliheriwa. (1 Ates. 5:14) Ikwaha sikina, ootheene ahu ninnipirisari omaalihiwa aahiiso olipihiwa ni atthu akina. Nto etthu xeeni nikhanle ahu oopaka naaphavelaka omaalihiwa?

OKATHI NIMPIRISARI AHU OMAALIHIWA

14-15. Etthu xeeni ninreerela ahu opaka okathi ninxanka ahu?

¹⁴ Munvekeleke Yehova. Okathi munixanka anyu, munvekeleke Yehova wiira oolipiheni. (Esal. 94:19) Okathi munivekela anyu, mmuleeleke itthu sootheene sinooxankihani. (Esal. 62:8) Ekeekhai wiira Yehova onnisuwela itthu sinooxankihani hata muhinatthi onvekela. Masi okathi munimuuleela anyu, munnooniherya wiira munnimuroromela ni onniwiriyana mavekelo anyu. Nto Yehova khula okathi onnimukhaliherya mutthu onimuroromela ni oninvekela yena. (Mar. 11:24) Afilipi 4:​6, 7, onihimya so: “Mmuxukhureleke, mmusuwelihaka itthu muninvekela anyu. Siiso, murettele wa Muluku, yoowo onvikana osuwela wootheene wa apinaatamu, onoosuka mirima sanyu ni miyuupuwelo sanyu.”

¹⁵ Mwaavekeleke atthu akina wiira yookhaliheryeni. Munvekele nikhaliheryo mpatthani anyu aahiiso mutokweene munimuroromela anyu. Anna ni arokora, anniphavela vanceene wookhaliheryani, masi awo khanrowa osuwela mixankiho sanyu muhaalenle. (Mir. 14:10) Mwaavekeleke wiira yoowiriyaneni oratteene, awuupuxeryeni yoolepa aahiiso mwaha onrowa woolipihani wala woomaalihani.

16. Etthu xeeni ekhanle oowiiraneya okathi anna ni arokora aneererya aya wookhaliheryani?

¹⁶ Mukhaleke oopixa murima ni oolevelela. Anna ni arokora, pooti opaka etthu yoohiloka okathi aneererya aya wookhaliheryani. Mwa ntakiheryo, awo pooti olavula aahiiso opaka etthu ekhanle oowoowereyani. Vakhala wiira eyo enimwiiraneya, mwaapixeryeke murima. (1 Akor. 13:​4, 7) Nave muupuweleke moolumo ari Yakobo 3:​2, ani: “Akhala mutthu ohinittheka ni moolumo, owo toomalela”. Masi musuweleke wiira etthu yuulupale aniphavela aya anna ni arokora, ori wookhaliheryani hata afalyariki. Nto muhiliyale wiira: “Murima onniphavela tthiri, masi erutthu teri yootteettheya.” — Math. 26:41.

17. Exeeni mulakenle anyu opaka?

¹⁷ Ootheene ahu, ninnipirisari okhaliheriwa okhala wiira ninkhala mahiku ookiserya. Nave ninnisuwela wiira makhalelo a olumwenku ola anootepa otakhala ni awanani a Muluku anootepa opaka itthu soohiloka. Mwaha waivaavo, ninnipirisari omaalihiwa. Nto ootheene ahu nihaana wiimananiha waamaaliha ni waalipiha atthu akina.