Moota malakiheryo a mbiibiliyani annikhaliherya aya

1-2. a) Xeeni nnihimya ahu wiira Biibiliya eliivuru ya khalai? b) Biibiliya oniwerya sai waakhaliherya atthu olelo-va?

BIIBILIYA eliivuru ya khalai. Eliivuru yoopacerya ya mbiibiliyani elempwale iyaakha 3500 sivinre. Nave eliivuru yookiserya elempwale iyaakha 2000 sivinre. Nnaamwi “Nuulumo na Muluku” nilempwale ene khalai, masi malakiheryo aya anninikhaliherya olelo-va. (Ahep. 4:12; 2 Tim. 3:​16, 17) Malakiheryo a mbiibiliyani, annaakhaliherya atthu imilyau sinceene olelo-va opaka soothanla sooloka ni okhala oohakalala.

² Moota xeeni eliivuru ela ya khalai eniwerya aya waakhaliherya atthu olelo-va? Enniwerya waakhaliherya mwaha wa mathowa manli. Noopacerya, okhala wiira Biibiliya onikhuma wa “Muluku mukumi”, yoowo ori mpattuxa ni onisuwela itthu sootheene. (1 Tim. 4:10; Arom. 16:​26, 27) Na nenli, Biibiliya ookhalana ikeekhai seiyo sihiniturukeya hata oviraka okathi. Tivonto, moota aakhaliherya awe atthu khalai ophuka mixankiho saya, onaakhaliherya mwa enamuna emosa-ru atthu a mahiku ahu ala.

3. Makoho xeeni ninrowa ahu waakhula mwaha ola?

³ Mwaha ola, nnimwiixutta waakhuliwa wa makoho ala: Malakiheryo a mbiibiliyani exeeni? Xeeni ari aya a faita olelo-va? Ninrowa osuwela sai okathi nimmusoma ahu Biibiliya? Nave nnimwiixutta moota Yesu oonihenrye awe wiira malakiheryo a mbiibiliyani aakhalana efaita yuulupale.

MALAKIHERYO A MBIIBILIYANI EXEENI?

4. Malakiheryo a mbiibiliyani exeeni?

⁴ Malakiheryo a mbiibiliyani, ikeekhai sa mbiibiliyani seiyo sinivarihana ni malamulo a Muluku. Ikwaha sikina, malakiheryo awo, anniphwanyaneya opuro ari aya malamulo aahiiso nlamulo. (Math. 22:37) Malakiheryo aakhalana efaita yuulupale ovikana malamulo. Okhala wiira malamulo anihimya etthu ene aahiiso anivareleya muteko mooluluwanya. Masi malakiheryo a mbiibiliyani, annooniherya muupuwelo wa Yehova ni moota woovarihela muteko mwa inamuna soovirikana. Nave, malakiheryo anninikhaliherya osuwela etthu emwiirihale Yehova okumiherya khula nlamulo. Malakiheryo aniphwanyaneya opuro ari aya malamulo a Yehova, pooti ovareleya muteko mwa inamuna ni okathi woovirikana. (Esal. 119:111) Ikwaha sikina, malamulo pooti opirisariki oturukiwa, masi malakiheryo khaniturukiwa ni annivareleya muteko okathi wootheene. — Yes. 40:8.

5. Ovirikana xeeni okhanle malamulo ni malakiheryo? (Nwehe efootu.)

⁵ Nrowe nthokorerye ntakiheryo nimosa ninnikhaliherya osuwela ovirikana okhanle malamulo ni malakiheryo. Muupuwele wiira maama mmosa onimuleela mwanawe wiira: Muhivare efukawu aahiiso epanela yooviha. Nto eyo yooruma aahiiso nlamulo. Masi malakiheryo aniphwanyaneya vanlamuloni-vo, taala: Muhivare etthu eniviha, maana mwavara vale munimoovya. Malakiheryo awo, khanivareleya muteko ni efukawu aahiiso epanela paahi. Masi annivareleya muteko ni khula etthu eniviha ekhanle ompaha mutthu. Nave malakiheryo awo khanivareleya muteko owannyawe paahi. Masi annivareleya muteko mapuro makina. Ekeekhai wiira okathi mwaana owo oninnuwa awe, onoorowa orumeelaka efukawu wala epanela yooviha. Hata vari siiso, owo onookhalanaka ephoole wiira ohivare opuro ekhanle aya ompaha. Nuuvira okathi, mwaana owo pooti oliyala yooruma aahiiso nlamulo aavahiwe awe ni maama awe, masi malakiheryo ene khonrowa oliyala.

XEENI MALAKIHERYO A MBIIBILIYANI ARI AYA A FAITA OLELO-VA?

6. a) Omurumeelaka Biibiliya, Yehova onnikhaliherya sai? b) Yehova oonihenrye sai wiira onninttittimiha?

⁶ Okhala wiira Yehova onniniphenta, owo oonivaha malamulo yaawo annikhaliherya wiira nihipake itthu soohiloka. (Yak. 2:11) Nave onninikhaliherya osuwela muupuwelo ni nthowa naya onnivaha awe malamulo awo. Yehova khonivahale malamulo para khula etthu. Omurumeelaka Biibiliya, Yehova oonivaha malakiheryo yaawo annikhaliherya opaka soothanla sooloka, hata nihikhanle nlamulo nnihimya mooluluwanya mwaha owo. Mwaha wa Yehova ohinivaha malamulo para khula etthu, owo onnooniherya wiira onninttittimiha. Nave oonivaha eparakha ya opaka soothanla sahu sinooniherya wiira ninnimphenta ni nimphavela omwiiwelelaka. — Akal. 5:13.

7. Nvahe ntakiheryo nnooniherya wiira malakiheryo aakhalana efaita yuulupale. (Nwehe efootu.)

⁷ Nrowe nthokorerye ntakiheryo nimosa ninrowa onikhaliherya osuwela moota malakiheryo a mbiibiliyani annikhaliherya aya. Atthu aneettiha ekaaro, ikwaha sinceene anniphwanya isinaale siniwooniherya malamulo anireerela aya wiiwelela. Malamulo awo, annimooniherya motorista mapuro okhanle awe oovukula evelositaati aahiiso wuncererya. Okathi motorista ohiniiwelela awe malamulo awo, pooti opuniriwa. Nave sookhala isinaale sikina sinnilopola opuro okhanle ookhumelela etthu yoowoopiha, ntoko esinaale enooniherya wiira annivira axinama aahiiso mapuro awo toothererya. Nto motorista orina ankhili nuumala oweha isinaale iyo, onneettiha mwa enamuna enrowa omukhaliherya osyaka omukumiherya asitenti. Nave okathi enirupa aya epula aahiiso enikhala aya etthapwe, motorista owo onnivukula evelositaati. Mwa enamuna emosa-ru, Biibiliya ookhalana malamulo anooniherya itthu nikhanle ahu oopaka ni nihikhanle ahu oopaka. Nave ookhalana malakiheryo, yaawo anilikanyihiwa ni isinaale siri mustaraatani. Malakiheryo awo khanihimya itthu mooluluwanya ntoko aniira aya malamulo. Masi okathi nniiwelela ahu, ninnisyaka wuupuwela aahiiso opaka etthu enihonona malamulo a Muluku. Tivonto, malakiheryo awo a mbiibiliyani aakhalana efaita yuulupale.

8. Okathi ninsoma ahu soowiiraneya sa mbiibiliyani, nihaana ophavela exeeni? (Aroma 12:​1, 2)

⁸ Sookhala mireerelo sikina nimphwanya ahu vaavo nniiwelela ahu malakiheryo a mbiibiliyani. Mwa ntakiheryo, awo anninikhaliherya osuwela moonelo wa Yehova. Okathi ninsoma ahu soowiiraneya sa mbiibiliyani, nihaana ophavelasa osuwela moota woovarihela muteko etthu nniixutta ahu. Nave nihaana wiikoha etthu emwiirihale Yehova weemererya olempwa mbiibiliyani yoowiiraneya eyo ni etthu enniixuttiha aya. Nto vaavo nimpaka ahu eyo, ninniixutta moota woorumeela “muupuwelo” ahu wiira nimurumeele Yehova. Nave ninniwerya osuwela “oratteene etthu Muluku oniphavela awe, yeeyo eri yooreera, yookhalela ni yoomalela.” — Mmusome Aroma 12:​1, 2.a

9. Mureerelo xeeni nimphwanya ahu vaavo nniiwelela ahu malakiheryo a mbiibiliyani? (Aheeperi 5:​13, 14)

⁹ Weettela malakiheryo a mbiibiliyani anninikhaliherya okhalana waamini woolipa. Vaavo nniiwelela ahu malakiheryo a mbiibiliyani, waataana wahu ni Yehova onnilipa. (Mmusome Aheeperi 5:​13, 14.) Okhala wene, anamwane acikhaani, anipirisari ovahiwa malamulo aahiiso ireekera wiira aweryeke opaka itthu sooloka. Awo anniiwelela malamulo awo, okhala wiira annoova opuniriwa. Yehova khonnithokorerya ntoko anamwane masi onnithokorerya ntoko atthu aalupale arina waamini. Owo onnisuwela wiira nnoopakaka soothanla moovarihana ni ele oniphavela awe. Nto okathi nimpaka ahu eyo, owo onnihakalala vanceene. — Esal. 147:11; Mir. 23:​15, 26; 27:11.

OKATHI NIMMUSOMA AHU BIIBILIYA NINROWA OSUWELA SAI MALAKIHERYO?

10. Ninrowa osuwela sai malakiheryo a mbiibiliyani?

¹⁰ Okathi nimmusoma ahu Biibiliya, nihaana ophavelasa malakiheryo yaawo annikhaliherya osuwela muupuwelo wa Yehova ni moota onoonela awe mwaha owo. Nnoowerya ophwanya malakiheryo a mbiibiliyani, vakhala wiira nnoophavelasa osuwela mathowa ene amwiirihale Yehova okumiherya malamulo. Nave vaavo nniixutta ahu etthu emwiirihale Yehova okumiherya malamulo a mbiibiliyani, eyo enninikhaliherya omusuwela saana. Okathi nimmusoma ahu Biibiliya, ti vooloka onvekela Yehova wiira onikhaliherye wiiwexexa moota onuupuwela awe. (Mir. 2:​10-12) Nave nihaana wiikoha so: Exeeni emwiirihale Yehova okumiherya nlamulo nla? Akhala wiira Yehova khonimusivela mweettelo ola, onrowa woonela sai akhala wiira kinoopaka itthu sinivarihana ni mweettelo ola? Etthu xeeni kiniixutta aka ni yoowiiraneya ela? Kinrowa ovarihela sai muteko mookumini mwaka? Vaavo nniiwexexa ahu etthu emwiirihale Yehova okumiherya malamulo ni osuwela etthu nniixutta ahu ni soowiiraneya ninsoma ahu mbiibiliyani, eyo enninikhaliherya opaka soothanla sooloka seiyo sinimuhakalaliha Yehova.

11. Okathi aalavula awe mwaha awe vamwaako, Yesu oonihenrye sai moota woosuwela malakiheryo a mbiibiliyani? (Nwehe ifootu.)

¹¹ Okathi aalavula awe mwaha awe vamwaako, Yesu aahooniherya moota nikhanle ahu oosuwela malakiheryo a mbiibiliyani. Nrowe niwehe matakiheryo mararu. Khula ntakiheryo, Yesu aapacerya oromolaka nlamulo. Nuumala-vo, aanitthokiherya etthu yaamwiirihale Yehova okumiherya nlamulo nlo. Wuupuwelela etthu Yesu aahimyale awe, enoonikhaliherya osuwela moota nikhanle ahu oovarihela muteko mookumini mwahu malakiheryo awo, wiira nipakeke soothanla sooloka.

12. Malakiheryo xeeni anivarihana ni nlamulo niri Matheyo 5:​21, 22? (Nwehe efootu.)

¹² Mmusome Matheyo 5:​21, 22. “Muhimwiive mutthu.” Malakiheryo xeeni anivarihana ni nlamulo nla? Malakiheryo ene taala: Yehova khoniphavela wiira naanyokheke atthu akina hata okhale ni miteko sahu, moolumo aahiiso inamuna sikina. Yesu aahihimya wiira hata mutthu ohiivale, pooti ohiiwelela nlamulo nlo, akhala wiira onnimunyokha mukhwaawe aahiiso onninveeha. Nto eyo ennimunanara vanceene Yehova. Mwaha wa xeeni? — 1 Yoh. 3:15.

13. Ninrowa ovarihela sai muteko malakiheryo ari Matheyo 5:​21, 22? (Nwehe ifootu.)

¹³ Ninrowa ovarihela sai muteko malakiheryo ari Matheyo 5:​21, 22? Akhala wiira khanimpweha mathowa vamurimani, hata atthu akina anithokoreryaka moohiloka. (Onam. 19:18; Yoobi 36:13) Mwaha wa xeeni? Mwaha woowi opweha mathowa va murimani pooti oniiriha olavula aahiiso opaka etthu yoohiloka para mutthu mukina. (Mir. 10:12) Nto nihaana osyaka waapa ni owootherya atthu akina itthu sikhanle oohonona mikhalelo saya sooloka. (Mir. 20:19; 25:23) Okathi Yesu aalavula awe sa osyaka waanyokha atthu akina, siira sihinatthi okumiheriwa itekonoloxiya seiyo sinirumeeliwa olelo-va, ntoko interneeti, telefooni ni komputatoore. Masi miruku aavahale awe, sinninikhaliherya ohirumeela itthu iyo wiira naalavuleke moohiloka atthu akina. Ntoko siisaale nahaarowa ahu omwiiva mutthu, nihaana osyaka olavula itthu sikhanle oohonona mikhalelo sa mutthu mukina.

14. Malakiheryo xeeni anivarihana ni nlamulo niri Matheyo 5:​27, 28? (Nwehe efootu.)

¹⁴ Mmusome Matheyo 5:​27, 28. “Muhiraruwe.” Malakiheryo xeeni anivarihana ni nlamulo nla? Malakiheryo ene taala: Yehova onninyokha orupihana woohiloka. Ohiya-vo, owo onninyokha miyuupuwelo sinivarihana ni orupihana woohiloka, seiyo sikhanle oomwiiriha mutthu opaka itthu soohiloka. Yesu aahitthokiherya wiira mulopwana oothela onithipelela onwehexexa muthiyana mukina (ohikhanle mwaarawe) mwa enamuna ya omphavela, mulopwana owo oopaka etampi. Nto nihaana osyaka miyuupuwelo sa orupihana woohiloka, hata nipirisariki wiimananiha vanceene. (Math. 5:​29, 30) Nave malakiheryo ala annivareleya muteko para makristau oohithela aahiiso oohitheliwa.

15. Ninrowa ovarihela sai muteko malakiheryo ari Matheyo 5:​27, 28? (Nwehe ifootu.)

¹⁵ Ninrowa ovarihela sai muteko malakiheryo ari Matheyo 5:​27, 28? Akhala wiira nnoosyaka khula etthu enivarihana ni orupihana woohiloka. (2 Sam. 11:​2-4; Yoobi 31:​1-3) Makristau aahaana osyaka oweha epornokarafiya. Hiyo nihuupuweleke wiira nnooweha paahi masi khaninrowa opaka itthu iyo. Nihuupuweleke ntoko atthu a moolumwenkuni, yaawo anihimya wiira sookhala ifootu aahiiso iviitiyu sinivarihana ni epornokarafiya sinnikhaliherya otthekula paahi. Okathi wa Yesu, khisaakhanle ikaruma eletorooniku saarumeeliwa para oweha iviitiyu ni ifootu. Hata vari siiso, Yesu oonivaha malakiheryo yaawo anniixuttiha moota Yehova onoonela awe ifootu ni iviitiyu, seiyo sinivarihana ni orupihana woohiloka. Malakiheryo awo, anninikhaliherya osuwela moota Yehova aarowa awe oriipiwa murima, akhala wiira nnimwinviyari efootu, mensaxe, iviitiyu aahiiso olavula moolumo anivarihana ni orupihana woohiloka para mutthu mukina. Nave annimukhaliherya mulopwana oothela ni muthiyana ootheliwa, ohihiya okhala oororomeleya ni ole othelanne awe. (Mal. 2:15) Nave-tho, annaakhaliherya makristau ootheene, oothela ni oohitheliwa, osyaka khula etthu yaakhanle oowiiriha orupihana woohiloka. — Mir. 5:​3-14.

16. Malakiheryo xeeni anivarihana ni nlamulo niri Matheyo 5:​43, 44? (Nwehe efootu.)

¹⁶ Mmusome Matheyo 5:​43, 44. “Mumphenteke mukhwiinyu”. Malakiheryo xeeni anivarihana ni nlamulo nla? Malakiheryo ene taala: Yehova oniphavela wiira naaphenteke atthu ootheene. Okathi wa Yesu, ayuda khiyavarihela muteko saana nlamulo nla, maana awo yaaphenta ale yaari ayuda paahi. Masi yaanaanyokha awanani aya. Nto Yesu aanisuwela wiira Yehova khaakumihenrye nlamulo nlo wiira neetteliweke siiso. Tiithi ihu a wiirimu oniphavela wiira naaphenteke atthu ootheene, moohicikha eraasa aya, ekultuura aya aahiiso elapo anikhuma aya. — Math. 5:​45-48.

17. Mureerelo xeeni nniphwanya ahu vaavo ninvarihela ahu muteko malakiheryo ari Matheyo 5:​43, 44? (Nwehe ifootu.)

¹⁷ Ninrowa ovarihela sai muteko malakiheryo ari Matheyo 5:​43, 44? Akhala wiira nnimwaaphentaka atthu ootheene. Opaka eyo onninikhaliherya osyaka wiirela mpantta ikhotto sa olumwenku ola. (Yes. 2:4; Mik. 4:3) Nave eyo enoonikhaliherya waathokorerya mooreerela murima atthu a eraasa, elapo ni hata ari ene a etiini ekina. (Mit. 10:​34, 35) Waaphenta atthu ootheene, onoonikhaliherya waalevelela ale anitthekenle aahiiso yaatthekenle atthu nnaaphenta ahu. — Math. 18:​21, 22; Mar. 11:25; Luka 17:​3, 4.

MUHIHIYE WEETTELA MALAKIHERYO A MBIIBILIYANI

18. a) Etthu xeeni mulakenle anyu opaka? b) Exeeni ninrowa ahu othokorerya mwaha onittharelana?

¹⁸ Ninnimuxukhurela vanceene Yehova mwaha wa onithokoreryaka ntoko atthu aalupale, ohiya ntoko anamwane! Yehova oniphavela wiira neetteleke malakiheryo a mbiibiliyani, yaawo anrowa onikhaliherya opaka soothanla sooloka. (1 Akor. 14:20) Khula okathi nimpaka ahu soothanla, nihaana “osuwela ele Yehova oniphavela awe.” (Aef. 5:17) Omphenta wahu Yehova onninikhaliherya opaka soothanla sinivarihana ni ele oniphavela awe. Nave yookhala etthu ekina ekhanle oonikhaliherya opaka soothanla sooloka. Etthu ene tiila: Murima ahu. Eyo ti etthu ninrowa ahu wiixutta mwaha onittharelana.