Murumeeleke malakiheryo a mbiibiliyani wiira mwiixuttihe murima anyu

1-2. a) Eparakha xeeni Adamu ni Eva yaavahiwe aya? b) Yaarowa wooniherya sai oxukhurela waya?

AXINAMA anipaka itthu moovarihana ni moota apattuxiwe aya. Maakina manceene anivara muteko apakeliwe aya. Masi apinaatamu aavirikana ni inama aahiiso maakina. Hiyo nipattuxiwe mwa enamuna ya vameekhaaya ni ennisivela, okhala wiira nimpaka soothanla mootaphuwa, eyo piiyo, ninthanla ele nimphavela ahu mookumini. Biibiliya onihimya wiira Muluku ampattunxe mulopwana oopacerya, Adamu, iilikanyihaka mmansawe. (Maph. 1:​26, 27) Nto Adamu ni Eva yaapattuxiwe mwa enamuna ya vameekhaaya, okhala wiira yaaniwerya opaka soothanla saya.

² Yehova khaavahale Adamu ni Eva elista ya malamulo wiira atthareke. Owo aahaavaha muteko wa okhapelela elapo, waayara anamwane ni aahaaleela itthu vakhaani yahaakhanle aya oopaka. (Maph. 1:28; 2:​16, 17) Adamu ni Eva yaahaana ohipaka itthu yaakhoottiheriwe aya ni Yehova. Vakhala wiira yaamwiira siiso, yaamooniherya wiira yaanimphenta Yehova, yaaniphavela omuhakalaliha ni yaanixukhurela eparakha ya othanla mootaphuwa ni khula etthu Yehova aavahale awe. — Mir. 23:15.

3. Adamu ni Eva yaarumenle sai eparakha yaavahiwe aya ya othanla mootaphuwa?

³ Biibiliya onihimya wiira Adamu ni Eva khiyaarumeenle saana eparakha yaavahiwe aya, ya othanla mootaphuwa. Awo yaahithanla ohimwiiwelela Yehova. Yoothanla aya khiyoonihenrye wiira yaanimphenta ni omuxukhurela Yehova. (Maph. 3:​1-7) Nto olelo-va, ninnihaawa mwaha wa yoothanla aya yoohiloka. — Arom. 5:12.

4. a) Moovarihana ni Akalaasia 6:​5, etthu xeeni ootheene ahu ninreerela ahu wuupuwela? b) Etthu xeeni ekina Yehova onivahale awe ninrowa ahu othokorerya?

⁴ Olelo-va, makhalelo ahu tootepa oxankiha. Okhala wiira khula nihiku nihaana opaka soothanla soovirikana. (Mmusome Akalaasia 6:5.) Soothanla sikina ti sookhweya masi sikina ti sooxankiha. Nto ninrowa owerya sai opaka soothanla sinimusivela Yehova? Etthu enrowa onikhaliherya ori osuwela wiira nihaana okhaliheriwa ni Yehova. (Mir. 16:3; Yer. 10:23) Hata Yesu yoowo aari oohittheka aanisuwela wiira aahaana okhaliheriwa ni Muluku. (Ahep. 5:7) Okhala wiira na apinaatamu oottheka, nihaana wiiwelelaka vanceene malakiheryo a Yehova. Vano nrowe nithokorerye etthu ekina Yehova onivahale awe, enrowa onikhaliherya opaka soothanla sooloka, eyo piiyo, murima ahu.

MURIMA EXEENI?

5. a) Murima exeeni? b) Murima onnikhaliherya sai? (Aroma 2:​14, 15)

⁵ Murima etthu Muluku aavahale awe apinaatamu, yoowo onaakhaliherya osuwela etthu yooloka ni yoohiloka. Hata atthu yaale ahinisuwela malamulo a Muluku, awo aakhalana murima. (2 Akor. 4:2) Nto murima ahu onninikhaliherya osuwela vakhala wiira etthu nimpaka ahu, olavula aahiiso wuupuwela ti yooloka wala nnaari. (Mmusome Aroma 2:​14, 15.) Etthu nnoona ahu okhala yooloka, murima ahu pooti onileela wiira ti yoohiloka. (1 Sam. 26:​8-11) Nto murima ahu pooti onitumererya opaka etthu eri yooloka. Hata nirina ene eparakha ya opaka soothanla mootaphuwa, eyo khentaphulela wiira soothanla sahu sootheene sinnimusivela Yehova. Nto murima ahu pooti onikhaliherya osuwela akhala wiira yoothanla ninrowa ahu opaka ti yooloka aahiiso ti yoohiloka.

6. Xeeni ikwaha sikina murima ahu ohinnikhaliherya aya opaka soothanla sooloka?

⁶ Masi ikwaha sikina, murima ahu pooti ohinikhaliheryaka. Okhala wiira noorava etampi ya Adamu ni Eva, nto murima ahu khonvara saana. Moota nihuuwale ahu, elapo niyariwe ahu aahiiso soophavela sahu soohiloka, pooti waafetari murima ahu. Biibiliya onihimya wiira murima ahu pooti okhala “woohilipa”, woonanara, nave pooti okhala ntoko “opahiwe ni eyuuma yooviha” ni “wootakhala”. (1 Akor. 8:12; Tito 1:15; 1 Tim. 4:2; Ahep. 10:22) Nto murima siiso, khonrowa onikhaliherya opaka soothanla sooloka. Owo pooti olikana ni epalansa yoohononeya enipirisari olokiheriwa. Nihaana wiimananiha vanceene, wiixuttiha murima ahu wiira onikhaliheryeke opaka soothanla sooloka. (1 Ped. 3:16) Ninrowa owerya sai opaka eyo?

MOOTA WOOWIIXUTTIHA MURIMA AHU

7-8. a) Ninrowa wiixuttiha sai murima ahu? b) Malakiheryo a mbiibiliyani annikhaliherya sai? Nvahe ntakiheryo. (Nwehe eteseenyu.)

⁷ Ninrowa wiixuttiha sai murima ahu? Nihaana omusoma Biibiliya khula nihiku ni ophavela osuwela etthu eri yooloka ni yoohiloka para Yehova. Osoma malamulo ari mbiibiliyani anoonikhaliherya osuwela itthu sinimusivela Yehova. Ntoko nithokorenrye ahu mwaha ovinre, nooweha wiira khula nlamulo ninvareleya muteko para mwaha mmosa paahi. Ti nthowa naya ninreerela ahu ophavelasa malakiheryo a mbiibiliyani, okhala wiira awo anoonikhaliherya osuwela muupuwelo ni moonelo wa Yehova. — Yes. 55:9.

⁸ Okumi ahu pooti olikanyihiwa ni mutthu oneetta moothakoni. Okathi mutthu oneetta awe moothakoni, akhala wiira khorina itthu sinimukhaliherya osuwela onrowa awe, pooti orimeela. Masi akhalana maapha anooniherya isinaale sa opuro okhanle awe oovira ni onaweha khula okathi, maapha awo pooti omukhaliherya woona wiira nlelo khorimenle. Nto yoolakela ahu yuulupale ori omuhakalaliha Yehova. Hata nisuwenle ene yoolakela ahu eyo yuulupale, khula okathi nihaana omusomaka Biibiliya yoowo onilikanyihiwa ni maapha. Nave nihaana owehaka malakiheryo a mbiibiliyani, yaawo ari ntoko isinaale siri mphironi. Niira siiso, nnoowerya opaka soothanla sinrowa omusivela Yehova.

9. Etthu xeeni ekina eniromoliwa Aroma 9:​1, ekhanle oonikhaliherya wiixuttiha murima ahu?

⁹ Wiira niwerye wiixuttiha oratteene murima ahu, nihaana okhaliheriwa ni ikuru soowaarya. (Mmusome Aroma 9:1.) Ikuru soowaarya sinoonikhaliherya osuwela moonelo ni muupuwelo wa Muluku. Nave pooti onivaha ikuru wiira niweryeke opaka itthu ntoko Yehova oniphavela awe. (Afil. 2:13) Nto etthu xeeni nikhanle ahu oopaka wiira ikuru soowaarya sinikhaliherye?

10. Exeeni nikhanle ahu oopaka wiira ikuru soowaarya sinikhaliherye? (Luka 11:​10, 13)

¹⁰ Nvekeleke ikuru soowaarya. (Mmusome Luka 11:​10, 13.) Nikupaliki wiira Yehova khula okathi onoonivahaka ikuru sawe soowaarya vakhala wiira nnonvekela. (Yoh. 3:34) Owo onnaavaha ikuru sawe soowaarya atthu ootheene animwiiwelela. (Mir. 1:23; Yak. 1:5) Masi etthu xeeni ekina ekhanle oonikhaliherya wiixuttiha murima ahu?

11. a) Etthu xeeni yootepexa okhalana efaita mookumini mwahu? b) Xeeni vari aya vooloka okhalana murima wooloka ni woowiixuttihiwa?

¹¹ Khula okathi mwiimananiheke opaka itthu sinimusivela Yehova. (Mir. 8:​34, 35) Eyo teri etthu yootepexa okhala efaita mookumini mwahu. Akhala wiira nnookhalana yoolakela ya omuhakalaliha Yehova, hata siniphwanyaka mixankiho mookumini mwahu, eyo enoonikhaliherya wiixuttiha murima ahu. Nto nnoowerya okhalana murima wooloka, vakhala wiira nnimuupuwelaka ntoko Yehova onuupuwela awe ni osyaka itthu sihinimusivela. Okhala wiira olumwenku ola khokhanle saana, nto ninnipirisari okhalana murima wooloka ni onnikhaliherya. Nave ikwaha sinceene nihaana opaka soothanla seiyo Biibiliya ohinihimya awe mooluluwanya. Soothanla iyo, sinihela muhina matthekulelo ahu, muteko woovara, osoma oskola ni moota ninkhala ahu ni atthu akina. Ninrowa osuwela sai vakhala wiira noopaka soothanla sooloka sinimusivela Yehova? — 2 Akor. 1:12.

12. Exeeni enrowa onikhaliherya osuwela akhala wiira murima ahu onnileela opaka etthu yooloka? (Aefeso 5:10)

¹² Muupuweleleke etthu munisoma anyu mbiibiliyani. (Esal. 49:3) Okathi munimusoma anyu Biibiliya, mmananiheke oweha malakiheryo anrowa wookhaliheryani osuwela moonelo wa Yehova. (Mmusome Aefeso 5:10.) Malakiheryo awo anoonikhaliherya osuwela etthu yooloka nikhanle ahu oopaka okathi sinniphwanya aya mixankiho, aahiiso akhala wiira murima ahu onnileela opaka yoothanla yooloka okathi owo. (Mir. 2:​4-9, 11-13) Nave anoonikhaliherya olokiherya murima ahu wiira nipakeke ele Yehova oniphavela awe. — Ahep. 5:14.

13. Nihinatthi opaka yoothanla etthu xeeni nikhanle ahu oopaka? Nvahe ntakiheryo.

¹³ Muhipakeke yoothanla muhinatthi osuwela moota Yehova onoonela awe. Khanimphavela waatakiha aisarayeli yaawo yaathipelenle okhala oYuda, nuumala Yerusalemu opwetexiwa mwaakha wa 607 Ohinatthi Kristu Orwa. Awo yaahimuleela Yeremiya wiira: “Yehova Muluku anyu, onileele ephiro nikhanle ahu ootthara ni etthu nikhanle ahu oopaka.” (Yer. 42:​3-6) Nto awo yaahipaka yoothanla khalai ene. Aisarayeli khiyaasiveliwe ni etthu Yehova aarumme awe opaka, khiyaamwiiwelenle ni yaapaka itthu saasivela. Saahaaphwanya mixankiho sinceene mwaha wa yoothanla aya. (Yer. 42:​19-22; 43:​1, 2, 4) Nto nihinatthi opaka yoothanla, nihaana ophavelasa malakiheryo a mbiibiliyani wiira nisuwele etthu Yehova oniphavela awe ni opaka yeeyo.

14. Xeeni vari aya vooloka otthara malakiheryo a mbiibiliyani okathi nimpaka ahu soothanla?

¹⁴ Mpakeke soothanla sinivarihana ni malakiheryo a mbiibiliyani. (Math. 7:​24-29; Yak. 1:​23-25) Vaavo nimpaka ahu soothanla sinivarihana ni malakiheryo a mbiibiliyani, ninneemererya wiira ikuru soowaarya sinikhaliheryeke. Nto Yehova khonrowa ohiya onivaha ikuru sawe soowaarya. (Mit. 5:32) Vakhala wiira khannemererya weettihiwa ni ikuru soowaarya sa Yehova, nnooriipiwaka murima nave ninrowa ovaraka muteko ohinivarihana ni ikuru soowaarya. (Aef. 4:30; Yes. 63:10; Mit. 7:51) Nto Yehova pooti ohiya onivaha ikuru sawe soowaarya. (Esal. 51:11; 1 Ates. 5:19) Eyo yaarowa okhala etthu yoowoopiha maana nimpirisari ikuru soowaarya sa Yehova wiira sinikhaliheryeke. — Aef. 3:16.

MOOTA WOOPHWANYA MALAKIHERYO A MBIIBILIYANI ANROWA ONIKHALIHERYA

15-16. a) Ninrowa ophwanya sai malakiheryo a mbiibiliyani anrowa onikhaliherya? b) Malakiheryo xeeni anrowa omukhaliherya naskola anyu ohiya ompaha sikaro?

¹⁵ Murumeeleke iliivuru sinnikhaliherya otokosa. Nihinatthi ovarihela muteko malakiheryo a mbiibiliyani, nihaana osuwela opuro alempwale aya mbiibiliyani. Mwa ntakiheryo, nkuupuwelani wiira naskola anyu a Biibiliya khoniiwexexa xeeni Yehova ohineemererya awe ompaha sikaro. Woonasa wene owo pooti wuupuwelaka so: Biibiliya khonilavula sa ompaha sikaro. Nto ninsuwela sai wiira ti voohiloka ompaha sikaro? Mwaarowa omukhaliherya sai ophwanya malakiheryo a mbiibiliyani anivarihana ni mwaha owo? Etthu emosa mukhanle anyu oopaka ori otokosa ni yena murumeelaka Eliivuru Enaakhaliherya Anamoona a Yehova Otokosa Myaha Sikumiheriwe. Nyuwo pooti omooniherya naskola anyu mpantta oni: “Ompaha soona”. Vathi va mpantta owo, munoophwanya mwaha oni: “Muluku onoonela sai ompaha soona”. (Munwehe Owehaweha 1 a Junho, 2014.) Nuumala osoma mwaha owo, soolepa xeeni ni malakiheryo xeeni onrowa awe ophwanya?

¹⁶ Aakhala malakiheryo ala 5 akhanle oomukhaliherya naskola anyu. 1) Niheemererye okhala ipottha sa etthu eniphwanyiha okhwa. (Arom. 6:16) 2) Nihaana osyaka itthu sootheene sikhanle ookumiherya muxankiho okumi ahu. (2 Akor. 7:1) 3) Yehova oniphavela wiira nimurumeeleke ni okumi ahu wootheene. (Math. 22:37) 4) Nisyakeke opaka itthu sikhanle oowaakumiherya mixankiho atthu akina. (Math. 22:39; 1 Akor. 10:24) 5) Yehova pooti onivaha ikuru wiira niweryeke opaka itthu sooloka. (Afil. 4:13) Nnaamwi ompaha sikaro ohiromoliwaka mooluluwanya mbiibiliyani, masi malakiheryo aniphwanyaneya mbiibiliyani, pooti omukhaliherya naskola anyu osuwela moonelo wa Yehova voohimya sa mwaha owo.

17. Akhala wiira munninamorari, munrowa ophwanya sai malakiheryo anrowa wookhaliheryani opaka yoothanla yooloka?

¹⁷ Akhala wiira munnuupuwela othela aahiiso otheliwa, malakiheryo xeeni anrowa wookhaliheryani opaka soothanla sooloka? Eliivuru Enaakhaliherya Anamoona a Yehova Otokosa Myaha Sikumiheriwe, pooti wookhaliheryani vanceene. Nwehe mpantta oni: “Ikasamento ni ifesta sa ekasamento”. Opuro owo, munoophwanya elista ya myaha ohela muhina malakiheryo vakhaani a mbiibiliyani. Nrowe niwehe malakiheryo 6 akhanle oowaakhaliherya ale aninamorari. 1) Niireke khula etthu enipakiwa ofestani wa ekasamento eninvuwiha Yehova? (1 Akor. 10:​31, 32) 2) Niireke ikuwo sahu ti soophwanelela ni khasinrowa ovukula waamini wa atthu akina? (1 Tim. 2:9; 1 Ped. 3:​3, 4) 3) Okathi munilokiherya anyu ekasamento anyu, muheererye waatakiha atthu a olumwenku ola wa Satana. (Yoh. 17:14; Yak. 1:27; 1 Yoh. 2:​15, 16) 4) Mulokiheryeke saana ekasamento anyu ni itthu sinrowa opakiwa ofestani wa ekasamento. (1 Akor. 14:40) 5) Musyakeke ifesta sootakhala seiyo atthu aniwurya aya mpakha ohapaliwa. (Akal. 5:21) 6) Nyuwo pooti omuthanla munna wiira ookhaliheryeni olokiherya efesta eyo mwa enamuna enrowa onvuwiha Yehova. — Yoh. 2:​8, 9.

18-19. a) Eliivuru xeeni ekina ekhanle oonikhaliherya? b) Malakiheryo xeeni aniphwanyaneya eliivuru ela, anrowa wookhaliheryani opaka yoothanla yooloka voohimya sa ifesta? (Nwehe ekaaxa eni “Moota woosuwela malakiheryo a mbiibiliyani”.)

¹⁸ Etthu ekina enaakhaliherya anamunceene, ti eliivuru eni: Iversiikulu Sinaakhaliherya Makristau. Eliivuru ela, sookhala soolepa sa mbiibiliyani ni myaha sinikhaliherya mwa inamuna soovirikana. Vakhala wiira munoothanla mwaha mmosa, nyuwo munoophwanya elista ya makoho ni soolepa, sinrowa wookhaliheryani ophwanya malakiheryo a mbiibiliyani. Mwa ntakiheryo, mukristau pooti wiikoha so: Ifesta xeeni kihinireerela aka wiirela mpantta? Vakhala wiira munniikoha siiso, pooti osoma eliivuru eyo mpantta oni: “Ifesta ni iferiyatu”. Nuumala-vo, murowe muru mwaamukhaani oni: “Iferiyatu xeeni ni ifesta makristau ahiniirela aya mpantta?”

¹⁹ Nwehe malakiheryo aniphwanyaneya mpantta oni: “Xeeni vari aya vooloka ohiirela mpantta ifesta sinivarihana ni etiini yoowootha? (1 Akor. 10:21; 2 Akor. 6:​14-18; Aef. 5:​10, 11).” Mpantta owo, onnilavula matakiheryo a ifesta soohiloka. Vathi va muru mwaamukhaani oni: “Ifesta sinivuwiha elapo”, sookhala soolepa sinceene sikhanle oomukhaliherya mukristau opaka soothanla sooloka akhala wiira pooti aahiiso nnaari wiirela mpantta ifesta sa mulaponi. Ninnixukhurela vanceene mutthenkeso wa Yehova mwaha wa onivahaka malakiheryo yaawo annikhaliherya wiixuttiha murima ahu!

MOONIHERYEKE WIIRA MUHIIXUTTIHA MURIMA ANYU

20. Ninrowa wooniherya sai wiira nihiixuttiha saana murima ahu?

²⁰ Ninnimuxukhurela vanceene Yehova mwaha woonivaha eparakha ya opaka soothanla sahu. Masi nihaana wiixuttiha murima ahu wiira niweryeke opaka soothanla sininvuwiha Yehova. Nave nnooweryaka opaka soothanla sinivarihana ni etthu oniphavela awe. Nto wiira niwerye opaka eyo, nihaana okhaliheriwa ni ikuru soowaarya sa Yehova. Nave nihihiye onvekela Yehova wiira onivaheke ikuru sawe soowaarya ni okhala moovarihana ni malakiheryo awe. Malakiheryo a mbiibiliyani anoonikhaliherya wiixuttiha murima ahu. Akhala wiira nnoorumeela saana soovaha iyo sa Yehova, nnimoona wiira Biibiliya onoonikhaliheryaka mookumini mwahu. — 2 Tim. 3:​16, 17; Ahep. 4:12.