Mutakiheke wiiyeviha wa Yehova

1. Munoonela sai osuwela wiira Yehova toowiiyeviha?

OKATHI munaaweha anyu makhulupale ni anamalamulela a mulaponi, munoona wiira awo toowiiyeviha? Nnaari. Masi Yehova, yoowo ori Muluku Oowerya Sootheene, toowiiyeviha. (Esal. 113:​5-8) Khuuvo mutthu ori oowiiyeviha vanceene onvikana Yehova. Owo khoniixinnuwiha nnakhala vakhaani. Mwaha ola, ninrowa othokorerya inamuna 4 Yehova onnithokorerya awe. Nave khula enamuna ninrowa ahu othokorerya, nnooweha moota Yehova ori awe oowiiyeviha vanceene. Nave-tho, nnooweha moota Yesu aatakiha awe wiiyeviha wa Tiithi awe. Nto, othokorerya inamuna iyo, sinoonikhaliherya okhalana ompatthani woolipa ni Yehova ni otakiha wiiyeviha wawe.

YEHOVA TOOKHWEYA OLAVULANA

2. Esaalimu 62:​8, enniixuttiha exeeni sa Yehova? (Nwehe efootu vakaapani.)

² Okhala wene, vannixankiha olavula ni atthu oowiixinnuwiha. Nave atthu oowiixinnuwiha khanaareerela murima atthu akina, maana anuupuwela wiira aakhalana efaita yinceene ni aniphavela wiira yooviweke. Masi Yehova oovirikana vanceene ni atthu awo! Okhala wiira Tiithi ihu a wiirimu toowiiyeviha, owo oniphavela wiira ninvekeleke nimuleelaka itthu sootheene nnuupuwela ahu ni sinnixankiha. (Musome Esaalimu 62:8.) Ntoko siisaale paapa oophenta oniwiriyana awe itthu sinaaxankiha ni aniphavela aya anaawe, Yehova onniwiriyana ni waakhula mavekelo ahu. Mbiibiliyani aakhala mavekelo manceene, Yehova aawiriyanne awe ni aakhunle awe. Nto mavekelo awo, annooniherya wiira Yehova tookhweya olavulana. (Yox. 10:​12-14; 1 Sam. 1:​10-18) Masi, okathi mukina pooti woovelelaka onvekela Yehova mwaha wa ifaalya sahu.

3. Etthu xeeni ennikupaliha wiira Yehova oniphavela wiira ninvekeleke ikwaha sinceene?

³ Nihaana onvekela Yehova hata nuupuwelaka wiira khanimphwanela ophentiwa ni yena. Xeeni ohimyaka siiso? Yesu aahipaka nlikanyiho na mwaana aakhumme etthoko ya paapa awe. Owo aahimulikanyiha Yehova ni paapa ooreera murima aamwaakhenle mwanawe, yoowo aapanke itthu sinceene soohiloka ni uupuwela wiira khaaphwanela waakheliwa etthoko ya paapa awe. Paapa ole apanke exeeni nuumala mwanawe otthika? Yesu aahimmye wiira nuumala paapa ole onweha mwanawe ori ene ottaiwene, aahimutthimakela “omukhupaarela, onanvaha epeexo.” (Luka 15:​17-20) Yehova ori ntoko paapa ole ooreera murima. Okathi nninvekala ahu nimuleelaka itampi ni itthu sinnixankiha, onniniwiriyana oratteene. (Wikh. 3:​19, 20) Okhala wiira Yehova onninoonela othunku, ntoko paapa ole nimulavunle ahu, moowaakuveya onninimaaliha onooniheryaka ophenta ni omoriwa wawe ikharari. (Yes. 57:15) Moota xeeni Yehova onipaka awe eyo olelo-va? Yehova onnaaruma axitokweene, amusi ni apatthani ahu, yaawo animphenta wiira anilipihe ni onimaaliha. (Yak. 5:​14, 15) Yehova onnipaka eyo, maana oniphavela wiira nikhale apatthani awe.

4. Yesu oonihenrye sai wiira aari mutthu ookhweya olavulana?

⁴ Yesu aamutakihale sai Tiithi awe? Omutakihaka Tiithi awe, Yesu toowiiyeviha. Okathi aari awe valaponi, atthu yaaniphavela omwaattamela maana aari mutthu ookhweya olavulana. Nto atthu awo, khiyoova omukoha etthu. (Mar. 4:​10, 11) Okathi Yesu aakoha awe etthu, yaanihimya moonelo aya mootaphuwa. (Math. 16:​13-16) Nave okathi yaafalyari aya, khiyoova omuleela Yesu, maana yaanisuwela wiira owo aari mutthu ooreera murima, oomoriwa ikharari ni oopixa murima. (Math. 17:​24-27) Okhala wiira Yesu aanimutakiha oratteene Tiithi awe, awiixutti awe yaahiwerya omusuwela saana Yehova. (Yoh. 14:9) Nto yaahoona wiira Yehova khahiyo ootakhala murima, oowiixinnuwiha ntoko ahooleli a itiini a okathi ole. Tthiri Yesu, aari mutthu oowiiyeviha ni ookhweya olavulana.

5. Wiiyeviha onnikhaliherya sai okhala atthu ookhweya olavulaniwa?

⁵ Ninrowa omutakiha sai Yehova? Nakhala atthu oowiiyeviha, nnimwaakhaliherya atthu akina woona okhweya olavula ni hiyo. Naahikhale atthu oowiiyeviha, pooti waakhalela nrima atthu akina, woona wiira nookhalana efaita yinceene waavikana atthu awo ni khaninrowa waalevelela yanipakela etthu yoohiloka. Nto eyo, enoowiiriha atthu awo ohiphavela onaattamela. Masi wiiyeviha onoonikhaliherya okhala atthu ooreera murima, oopixa murima ni oolevelela. Mikhalelo iyo, sinoowiiriha atthu ophavela onaattamela. (Akol. 3:​12-14) Otepexa wene axitokweene, ahaana okhala atthu ookhweya olavulana. Wiira apake eyo, ikwaha sinceene ahaana okhala ni anna ni arokora. Vaaweryaneyaka, axitokweene ahaana orowela mithukumano Empa ya Omwene, ohiya olikari aahiiso opaka eviitiyu konferensiya. Nave pooti olaleerya empa ni empa, ari ene ni anna ni arokora. Yiira siiso, atthu ootheene a mmulokoni animwaasuwela ni vanimwaakhweela waaleela itthu sinaaxankiha.

YEHOVA KHAHIYO MUTTHU OOTHIPELELA

6-7. Nvahe matakiheryo anooniherya wiira ikwaha sikina Yehova onnituruka muupuwelo awe ottharaka itthu arumeyi awe anivekela aya.

⁶ Atthu oowiixinnuwiha, anoona wiira okathi wootheene itthu anihimya aya ti soolokexa ni khaniphavela oturuka moonelo aya. Masi Yehova, yoowo okathi wootheene onisuwela itthu soolokexa, khonipaka eyo. Okhala wiira toowiiyeviha, Yehova onniwiriyana itthu atthu akina anihimya aya ni ikwaha sikina onituruka yoothanla awe ottharaka moonelo wa atthu awo. Nwehe moota Yehova aamuthokorenrye awe murokorawe Moise aihaniwa Miriyamu. Miriyamu ni Aroni, yaanimulavula voohiloka Moise, yoowo aathanliwe ni Yehova. Mwaha woopaka eyo, Miriyamu aahooniherya wiira khaamuttittimiha Yehova. Nto, Yehova aahinanariwa vanceene ni aahimphwanyiha makokho Miriyamu. Vano Aroni aahimuxonttela Moise wiira omukhaliherye Miriyamu. Nto Moise aahimuxonttela Yehova wiira ompenuxe. Niireke Yehova aahaakhula nivekelo na Moise? Aayo. Vaakhanle wiira Muluku toowiixinnuwiha, khaarowa oturuka moonelo awe. Okhala wiira Yehova toowiiyeviha, owo aahimpenuxa Miriyamu. — Mmr. 12:​1-15.

⁷ Nave ninniweha wiiyeviha wa Yehova, okathi ninthokorerya ahu moota aakhunle awe nivekelo na mwene Ezekiya. Yehova aahimuruma profeta Yesaya orowa omuleela Ezekiya wiira aamookhwa. Nto Ezekiya aahinla ni aahimuxonttela Yehova wiira ompenuxe. Yehova aahaakhula nivekelo na Ezekiya ni aahimuleela wiira aamukhala-tho iyaakha 15. (2 Mam. 20:​1, 5, 6) Tthiri Yehova onniwoonela othunku apinaatamu ni mwaha wa wiiyeviha wawe onnaawiriyana okathi aninvekela aya.

8. Matakiheryo xeeni anooniherya wiira Yesu khonithipelela moonelo awe? (Marko 3:​1-6)

⁸ Yesu aamutakihale sai Tiithi awe? Okathi aari awe valaponi, Yesu aanaapakela itthu sooloka atthu akina ni aanaakhaliherya ale yaapirisari. Mwa ntakiheryo, Yesu aahaapenuxa atthu nihiku na esaabadu, etthu yeeyo ahooleli a itiini yaakhoottiha aya ovariwa saabadu. Yesu khahiyo aari mutthu ootakhala, masi aaniwoonela othunku atthu ni khaathipelela moonelo awe. (Mmusome Marko 3:​1-6.) Nave olelo-va, okathi onivaha awe malakiheryo mmulokoni, Yesu onnooniherya othunku ni khonithipelela moonelo awe. Mwa ntakiheryo, okathi munna aahiiso murokora onipaka awe etampi yuulupale, Yesu onnimpixerya murima ni onninvaha okathi wiira orukunuxe mweettelo awe. — Wis. 2:​2-5.

9. Ninrowa owerya sai okhala atthu ahinithipelela moonelo aya? (Nwehe ifootu.)

⁹ Ninrowa omutakiha sai Yehova? Nimutakihaka Yehova, nihaana wuupuwela ni opaka itthu nihithipelelaka moonelo ahu. (Yak. 3:17) Mwa ntakiheryo, anamuyari animutakiha Yehova, khanilipelela wiira anaaya anoopakaka itthu ahiniwerya aya. Yakobe oovaha ntakiheryo nooloka, maana aahithokorerya mikhalelo sa anaawe. (Maph. 33:​12-14) Anamuyari oowiiyeviha ni ahinithipelela moonelo aya, annisuwela etthu khula mwaana oniwerya awe ovara ahimulikanyihaka ni mukhwaawe. Axitokweene ahithipeleleke moonelo aya. Mwa ntakiheryo, mutokweene khonrowa othipelela moonelo awe okathi wa muthukumano wa axitokweene. Masi onrowa okhaliherya moonelo wa axitokweene akina, akhala wiira moonelo owo khonihonona malakiheryo a mbiibiliyani. (1 Tim. 3:​2, 3) Ootheene ahu, nihaana wiimananiha otthara muupuwelo wa atthu akina, hata noonaka wiira woovirikana ni moonelo ahu. (Arom. 14:1) Khula mutthu mmulokoni, ohaana wiimananiha wiira atthu “aweheke wiira khamunithipelela moonelo anyu paahi.” — Afil. 4:5.

YEHOVA TOOPIXA MURIMA

10. Mwa inamuna xeeni Yehova onooniherya awe wiira toopixa murima?

¹⁰ Woonasa wene, muhoona wiira atthu oowiixinnuwiha khaniphavela olipelela. Awo khanipixa murima. Yehova khonipaka eyo, okhala wiira toopixa murima waavikana atthu ootheene! Mwa ntakiheryo, mahiku a Nowe Yehova aahihimya wiira anwehererya iyaakha 120, ohinatthi waapwetexa atthu ootakhala. (Maph. 6:3) Nto, Nowe aahikhalana okathi wiira aahuwe anaawe ni oteka ekalawa yuulupale okhaliheriwa ni atthu a etthoko awe. Muhoolo mwaya, moopixa murima Yehova aahinwiriyana Abrahamu okathi aamukoha awe sa opwetexiwa wa oSodoma ni oGomora. Vaakhanle wiira Yehova toowiixinnuwiha, owo ammukoha Abrahamu wiira: Munoona wiira miyo nkinisuwela etthu yoopaka? Masi, okhala wiira Yehova toowiiyeviha, aahimpixerya murima Abrahamu. — Maph. 18:​20-33.

11. Moovarihana ni 2 Pedru 3:​9, xeeni olelo-va Yehova onooniherya awe opixa murima?

¹¹ Olelo-va, Yehova onnooniherya opixa murima. Nave moopixa murima, Yehova onnilipelela ophiya okathi othanlale awe wiira omalihe olumwenku ola wootakhala. Xeeni Yehova onipixa awe murima? Mwa woowi, “khoniphavela wiira opwetexiwe nnakhala mutthu mmosa. Masi oniphavela wiira atthu ootheene arukunuxe murima.” (Mmusome 2 Pedru 3:9.) Niireke opixa murima wa Yehova onnaakhaliherya atthu? Aayo! Opixa murima wa Yehova onnaakhaliherya atthu anceene omusuwela Yehova ni okhala apatthani awe. Nave, ninnilipelela wiira atthu imilyau sinceene anoopaka etthu emosa-ru. Opixa murima wa Yehova onoomala. Ekeekhai wiira Yehova onnaaphenta atthu, masi khonrowa weemererya wiira atthu awo apakeke itthu aniphavela aya mahiku ootheene. Owo onimwaapwetexa atthu ootakhala. — Hab. 2:3.

12. Yesu aatakihale sai opixa murima wa Yehova?

¹² Yesu aamutakihale sai Tiithi awe? Okhuma khalai, Yesu onnitakiha opixa murima wa Yehova. Yesu aahinweha Satana omootheryaka Yehova ni arumeyi awe oororomeleya. (Maph. 3:​4, 5; Yoobi 1:11; Wis. 12:10) Nave ohaaweha atthu anceene atepaka ohaawa. Mweekeekhai, Yesu onniphavela vanceene wiira “opwetexe miteko sa Diabo”! (1 Yoh. 3:8) Etthu xeeni enimukhaliherya Yesu opixa murima, omulipelelaka Yehova omuleela wiira woophiya okathi woopwetexa miteko sa Diabo? Etthu emosa, okhala wiira Yesu toowiiyeviha. Owo onnisuwela wiira Yehova paahi tonithanla nihiku onrowa awe omaliha olumwenku ola wootakhala. — Mit. 1:7.

13. Xeeni ni moota xeeni Yesu aapixenrye awe murima arummwa awe?

¹³ Okathi aari awe valaponi, Yesu aanaapixerya murima arummwa awe. Mwa ntakiheryo, ikwaha sinceene arummwa yaamakela onyakulihana aphavelaka omusuwela ti pani aari muulupale, owo khuupuwenle wiira khanikhala-khala amutariki. Nave, khaahiyale waapixerya murima. (Luka 9:46; 22:​24-27) Yesu aanikupali wiira, nuuvira okathi yampaka marukunuxo. Niireke ikwaha sinceene munnifalyari etthu emosa-ru? Akhala wiira munnifalyari, niireke khivanoosivelani olamuleliwa ni Mwene oowiiyeviha ni oopixa murima?

14. Etthu xeeni enrowa onikhaliherya okhala oopixa murima?

¹⁴ Ninrowa omutakiha sai Yehova? Okathi ninkhalana ahu “muupuwelo wa Kristu”, eyo enninikhaliherya opaka itthu ni wuupuwela ntoko Yehova onuupuwela awe. (1 Akor. 2:16) Exeeni enrowa onikhaliherya wuupuwela ntoko Yesu onuupuwela awe? Enamuna emosa yuulupale, ori osoma khula nihiku yoowiiraneya ya Yesu elempwale eliivuru ya Matheyo, Marko, Luka ni Yohani. Nuumala-vo, nihaana wuupuwelela moota Yesu uupuwela awe ni etthu yaamwiiriha wuupuwela siiso. Nave, nihaana onvekela Yehova wiira onikhaliherye okhala atthu oowiiyeviha ni oopixa murima, nimutakihaka Yesu. Nakhalana muupuwelo wa Kristu, eyo enoonikhaliherya omutakiha Yehova, niipixeryaka murima ni waapixerya murima anna ni arokora. — Math. 18:​26-30, 35.

YEHOVA ONNAATHOKORERYA ATTHU OOWIIYEVIHA

15. Esaalimu 138:​6, enooniherya sai wiira Yehova onnaathokorerya atthu oowiiyeviha?

¹⁵ Musome Esaalimu 138:6. Nkahaya muupuwele ela: Yehova, yoowo ori Mpattuxa muulupale a olumwenku, onnaavaha efaita atthu oowiiyeviha! Nrowe nithokorerye matakiheryo vakhaani a atthu oowiiyeviha, yaawo Yehova aavaha awe efaita yinceene. Akina a yaawo, hiyo khinnaasuwela, masi Yehova ooruma olempwa masina aya mbiibiliyani. Mwa ntakiheryo, Debora aahiviriha iyaakha 125 ovaraka muteko etthoko ya Isakhi ni Yakobe! Nnaamwi murumeyi ola oororomeleya ohisuweliwaka vanceene, Yehova aahimuruma Moise olepa mbiibiliyani etthu enooniherya wiira aaniphentiwa vanceene. (Maph. 24:59; 35:​8, enoota.) Nuuvira iyaakha sinceene, Yehova aahimuthanla mmiravo makampusi aihaniwa Davidi, wiira okhale mwene a nloko na aisarayeli. (2 Sam. 22:​1, 36) Moohipisa nuumala Yesu oyariwa, Muluku aahiruma malaikha orowa waasuweliha amakampusi oowiiyeviha wiira oBetelehemu, ooyariwa ole aarowa okhala Mesiya. Nto amakamupusi awo, ti yaapacenrye osuwela oyariwa wa Yesu. (Luka 2:​8-11) Okathi Yosefe ni Maria yaamukunxe aya Yesu amuroihaka oTemplo, Yehova aahaavaha eparakha ya onweha Mwanawe atthu anli oowuuluvala, eyo piiyo, Simeyoni ni Ana. (Luka 2:​25-30, 36-38) Mweekeekhai, “hata Yehova okhalaka osulu, onnaathokorerya atthu oowiiyeviha”!

16. Enamuna Yesu aathokorerya awe atthu, oonihenrye sai wiira aanimutakiha Tiithi awe?

¹⁶ Yesu aamutakihale sai Tiithi awe? Omutakihaka Tiithi awe, Yesu aanaaphenta atthu oowiiyeviha ni yahooneliwa vatthu. Owo aaniwiixuttiha ikeekhai sa Omwene wa Muluku “atthu yahaasomme ni . . . atthu pure”. (Mit. 4:13; Math. 11:25) Yesu aanaapenuxa atthu yaawereiwa, nto aanipaka eyo mwa enamuna yoona aya wiira anniphentiwa ni ottittimihiwa. (Luka 5:13) Ohiyu aarowa awe wiiviwa, Yesu aahirapiha inawu sa arummwa awe, muteko yoowo waavariwa ni ipottha. (Yoh. 13:5) Ohinatthi orowa wiirimu, Yesu aahaavaha awiixutti awe, onihela muhina hiyo olelo-va eparakha ya waakhaliherya atthu akina ophwanya okumi woohimala. — Math. 28:​19, 20.

17. Ninrowa wooniherya sai waaphenta ni waattittimiha atthu akina? (Nwehe efootu.)

¹⁷ Ninrowa omutakiha sai Yehova? Hiyo ninnooniherya wiira ninnaaphenta ni waattittimiha atthu, naalaleeryaka ihapari sooreera moohicikha makhalelo aya, ekoore ya erutthu aya ni yaasomme ene aahiiso yahaasomme. Nave ninnooniherya wiira ninnaaphenta ni waattittimiha anna ni arokora, naathokoreryaka okhala aalupale onivikana hiyo moohicikha iparakha nirina ahu. (Afil. 2:3) Yehova onnihakalala okathi onniweha awe nooniheryaka wiiyeviha ni waathokorerya atthu akina moophenta ni mwa nttittimiho. — Arom. 12:10; Sof. 3:12.

18. Xeeni muniphavela anyu otakiha wiiyeviha wa Yehova?

¹⁸ Okathi nniimananiha ahu otakiha wiiyeviha wa Tiithi ihu a wiirimu, ninnitepa okhala atthu ookhweya olavulaniwa, ahinithipelela moonelo aya ni oopixa murima. Nave, ninrowa waaphentaka ni waattittimiha atthu akina, ntoko Yehova oniira awe. Muhiliyale ela: Akhala wiira ootheene ahu nnimwiimananiha otakiha wiiyeviha wa Muluku, nnootepaka okhalana efaita para Yehova! — Yes. 43:4.