Miruku sooloka sinrowa onikhaliherya okathi wa mixankiho

1-2. Etthu xeeni nikhanle ahu oopaka wiira niwerye oxintta mixankiho sinniphwanya? (Nwehe efootu.)

ARUMEYI anceene a Yehova, sinnaaphwanya “mixankiho ni itthu sooriipiha murima.” (Esal. 90:10) Mwa ntakiheryo, akina annithokoreriwa moohixariya aahiiso olupatthiwa ni amusi aya mwaha wa omurumeela Yehova. Akina annihaawa mwaha wa oretta aahiiso wuuluvala. Nave akina, annihaawa mwaha wa okhweliwa mutthu yamphenta aya. Ankhi nyuwo, muxankiho xeeni oniwiirihani ohaawa?

² Etthu enrowa onikhaliherya ovilela ni osuwela etthu yoopaka okathi sinniphwanya aya mixankiho, ori okhalana moonelo wooloka. Eyo entaphulela exeeni? Wiira nisuwele, nrowe nithokorerye nlikanyiho nla: Mixankiho sinoophwanyani, sinoolikana ni itthu motorista oneettiha ekaaro okhanle awe oophwanya mustaraatani. Wiira owerye oxintta itthu iyo, owo pooti opirisariki ovira ephiro ekina, ovukula evelositaati aahiiso weemela okathi vakhaani. Masi onoowerya osuwela etthu yoopaka, akhala wiira onooweha saana etthu eyo ophwannye awe mustaraatani ekhanle oomukumiherya mixankiho. Vanooweryaneya oweha saana, akhala wiira eviituru awe khenananre aahiiso ennooneya saana. Mwa enamuna emosa-ru, wiira nisuwele etthu yoopaka okathi sinniphwanya aya mixankiho, nihaana okhalana muupuwelo wooloka. Mwaha ola, ninrowa othokorerya ipontu iya tthaaru: 1) Moota wookhalana muupuwelo wooloka okathi wa mixankiho, 2) moota woosyaka muupuwelo woohiloka ni 3) itthu nikhanle ahu oopaka okathi sinniphwanya aya mixankiho.

MOOTA WOOKHALANA MUUPUWELO WOOLOKA

3. Xeeni sinniphwanya aya mixankiho?

³ Sinaamuniphwanya mixankiho olumwenku ola wootakhala. Sinniniphwanya mixankiho, okhala wiira na atthu oottheka ni olumwenku ola onilamuleliwa ni Satana. Nave vaavo nnaattamela ahu wanikisa wa olumwenku ola, mixankiho sinootepa. Pooti oniphwanya itetere, osareya wa maasi ni mixankiho sikina sinikumiheriwa ni apinaatamu yaawo anipaka itthu sootakhala. (Math. 24:8; 2 Tim. 3:13) Yehova onoomaliha mixankiho iyo muhoolo. Vaakhanle wiira oomaliha mixankiho iyo niinaano-va, vaarowa okhalaka wiira onimukhaliherya Satana, yoowo onilamulela olumwenku ola. Tivonto, ootheene ahu, ninnilipelela oniphwanya “ehasara”. — Mus. 9:​12, enoota.

4. Xeeni arumeyi a Yehova sinaaphwanya aya mixankiho?

⁴ Sinniniphwanya mixankiho mwaha woowi nimmwiiwelela Yesu. Ikwaha sinceene, Yesu aanaaleela awiixutti awe wiira yaamulupatthiwaka mwaha wa waamini waya. (Math. 24:9; Yoh. 16:2) Tivonto, okathi ninlupatthiwa ahu, khannitikinihiwa, maana ninnisuwela nthowa naya. Nave khaninrowa ohiya okhala oororomeleya! (1 Ates. 3:​3, 4) Okathi sinniphwanya aya mixankiho mwaha wa waamini wahu, ninnisuwela wiira nneetta ephiro eniphwanyiha okumi woohimala. Nave ninnooniherya wiira nimmwiiwelela Yehova ohiya Satana. Satana onihimya wiira apinaatamu animphenta ni omukokhorela Yehova, akhala wiira itthu sinniweettela saana mookumini mwaya. Tivonto, Satana onnaakumiherya mixankiho arumeyi a Yehova wiira owehe akhala wiira khanrowa ohiya omurumeela Yehova. (Yoobi 1:​9-11) Vaavo nihinihiya ahu omuroromela Yehova, ninnooniherya wiira ninnimphenta nave owo onnihakalala. — Mir. 27:11.

5. Moolumo a Salomooni ari Musuweli 7:​13, 14, anniixuttiha exeeni? (Nwehe ifootu.)

⁵ Yehova khonikhoottiherya mixankiho okhumelela. Yehova khahiyo tootakhala nave khonneehererya. (Yak. 1:13) Nto xeeni mwene Salomooni aahimmye awe wiira “nihiku nooxankiha”, nipakiwe ni Muluku? (Mmusome Musuweli 7:​13, 14.) Yoolepa ela, kheniphavela ohimya wiira Yehova tonikumiherya itthu sootakhala. Masi iyo sinnikhumelela okhala wiira owo khonikhoottiherya. Moolumo a Salomooni ari Musuweli 7:​13, 14, anniixuttiha exeeni? Ninniixutta itthu piili: Yoopacerya, nihaana osuwela wiira olumwenku ola wa Satana, nnookhalanaka mahiku oohakalaliha ni ooxankiha. Nto akhala wiira nnookhalana mahiku oohakalaliha, nihaana omuxukhurela Muluku okhala wiira khula etthu yooreera, ninvahiwa ni yena. Ya nenli, apinaatamu khaniwerya “osuwela etthu enrowa owiiraneela muhoolo.” Eyo enitaphulela wiira, khaninsuwela akhala wiira mahiku a muhoolo anrowa okhala oohakalaliha aahiiso ooxankiha. Nto mixankiho pooti okhumelela mootutuxerya, hata para atthu ooreera murima ni ale ootakhala murima.

6. Xeeni Yehova oneemererya awe oniphwanya mixankiho? (Aheeperi 12:​7, 11)

⁶ Okathi wa mixankiho, Yehova pooti oniixuttiha omuroromela, ohiya wiiroromela. Yehova onniweha mixankiho sootheene sinniphwanya nave onninikhapelela. Hata neettaka “mapuro ooriipela”, Yehova khonihiya oneettiha, onooniherya ophenta wawe ni onivaha ikuru wiira nivileleke. (Esal. 23:4) Nave mixankiho pooti onikhaliherya osuwela itthu nihinwerya ahu ni moota woolokiherya mukhalelo ahu nikhaliheriwaka ni Yehova. (Mmusome Aheeperi 12:​7, 11.) Mwa ntakiheryo, Yoobi aahaana okhala oowiiyeviha. Yehova khahiyo taakumiherya mixankiho saamukhumelela Yoobi. Masi owo aaheemererya mixankiho iyo omukhumelela Yoobi. Nave aahirumeela mixankiho iye wiira omwiixuttihe Yoobi itthu sa faita. (Yoobi 42:​1-6) Masi nihaana osuwela wiira mixankiho Yehova oneemererya awe oniphwanya, khahiyo ti sa mahiku ootheene. Vaavo nihinihiya ahu ovilela ni ororomeleya, “ninnixintta moomalela” mixankiho sinniphwanya. — Arom. 8:​35-39.

7. Exeeni enrowa wookhaliheryani okhala oohakalala nnaamwi mulupatthiwaka?

⁷ Nnoowerya okhala atthu oohakalala hata nilupatthiwaka. Akhala wiira munnilupatthiwa mwaha wa waamini wanyu, muhuupuweleke wiira Yehova oroohiya wooreelihani. Masi musuweleke wiira mwaha wa omwiiwelela yena. Nto mukupaliki wiira owo onnihakalala ni nyuwo ni onimooreelihani. (Math. 5:​10-12) Akhala wiira munimuupuwelaka eyo, munaamuhakalala hata mulupatthiwaka, ntoko yaahakalala aya arummwa a Yesu. (Mit. 5:​40-42) Ohiya-vo, munoowerya waakhaliherya atthu akina wiixutta ekeekhai wiira “anvuwiheke Muluku”. (1 Ped. 2:12) Nkahaya mmuupuwele Yosefe yoowo aakumihiwe elapo awe oroihiwaka wExiitu. Masi Yehova aahimukhaliherya ni omureeliha hata okathi aari awe mukhatteya. Nave owo pooti wookhaliheryani okathi sinoophwanyaayani mixankiho. — Maph. 39:​3, 23.

8. Exeeni ennikhaliherya ovilela nnaamwi siniphwanyaka mixankiho?

⁸ Mixankiho sahu sinoomala. Yoowiiraneya ya Yoobi, ennooniherya wiira mixankiho sahu, sinoomala. Biibiliya onihimya wiira “Yehova aahimureeliha vanceene Yoobi ovikana woopaceryani.” (Yoobi 42:12) Nnaamwi okumi ahu ohireere mixankiho ni ohipisaka, Yehova oonileiherya oonireeliha vanceene elapo esya, onivahaka okumi woohimala. Wuupuwelela mareeliho awo a muhoolo, anninikhaliherya ovilela ni ohihiya omuroromela Yehova! — Math. 24:13.

MOOTA WOOSYAKA MUUPUWELO WOOHILOKA

9. Xeeni ninreerela ahu osyaka okhalana muupuwelo woohiloka?

⁹ Akhala wiira nnookhalana muupuwelo woohiloka okathi sinniphwanya aya mixankiho, eyo pooti oniiriha otepiha muxankiho owo. Hiyo pooti opacerya wuupuwela wiira Yehova tonikumiherya mixankiho sahu. Waahikhala okathi Yoobi uupuwela awe wiira Yehova taakumiherya mixankiho sawe. Nto eyo yaahimwiiriha “wooniherya wiira aahikhalana erasau onvikana Muluku.” (Yoobi 32:2) Nave-tho Nowemi, aahipacerya onvaha nthowa Yehova mwaha wa mixankiho sawe. (Rut. 1:​13, 20, 21) Vaakhanle wiira Yoobi ni Nowemi yaahithipelela muupuwelo aya ole woohiloka, eyo yanwiiriha ohiya omurumeela Yehova. (Mir. 19:3) Masi Yehova aahaakhaliherya okhalana muupuwelo wooloka ni muhoolo mwaya, aahaareeliha mwaha wa ororomeleya waya.

10. Muupuwelo xeeni nikhanle ahu oopacerya okhalana okathi wa mixankiho?

¹⁰ Hata nisuwelaka wiira khahiyo Yehova onikumiherya mixankiho sahu, ikwaha sikina pooti wiikohaka akhala wiira onninithokorerya. Nto muupuwelo owo pooti onikhulumula ni oniiriha ohiya omurumeela Yehova. (Mir. 24:10) Mwene Davidi ni profeta Habakuuki, saahaaphwanya mixankiho, nto ikwaha sikina, yaaniikoha akhala wiira Yehova aaniiwa mavekelo aya. (Esal. 10:1; Hab. 1:2) Hata vari siiso, awo khiyaahiyale onvekela. Yehova aahaakhula mavekelo a alopwana awo oororomeleya ni khaahiyale waakhaliherya. Nave mukupaliki wiira Yehova khonrowa ohiya wookhaliheryani. — Esal. 10:17.

11. Exeeni ekhale oowiiraneya naahisuwele saana nthowa naya mixankiho sinikhumelela aya?

¹¹ Naahisuwele saana nthowa naya mixankiho sinikhumelela aya, hiyo pooti opaceryaka wuupuwela wiira Yehova khaareerela onihiya nihaawaka. Nave pooti otikinihiwaka okathi etthu yootakhala eniiraneya aya. (1 Ped. 4:12) Eyo yaahiiraneya ni awiixutti a Yesu. Okathi Yesu aalenle awe wiira aamulupatthiwa ni wiiviwa, awo khiyaakupali wiira eyo yammwiiraneela Yesu. (Luka 18:​33, 34) Mwa ntakiheryo, Pedru khaakupali wiira Muluku aamweemererya wiira Yesu ohaaxiwe mwa enamuna ele. Masi Yesu aahaatthokiherya wiira aamuhaaxiwa. Vaakhanle wiira Yesu aahipacerya wuupuwela ntoko Pedru, aamuhiya omwiiwelela Yehova. Nave khaarowa weemererya ohaaxiwa ni wiiviwa. (Mar. 8:​31-33) Hata nuumala Yesu wiiviwa, waahivira okathi wiira awiixutti yiiwexexe etthu yaamwiirihale Yesu okhwa. Okathi aavaanela awe ni awiixutti awe, nuumala Yesu ohihimuxiwa, owo aahaakhaliherya wiiwexexa nthowa naya aahaaxiwa awe. Nto eyo yaahooniherya wiira khaanyanyanle. Owo aahooniherya eyo, aatthokiheryaka “oratteene Soolempwa”. (Luka 24:​25-27, 32, 44-48) Wuupuwelela etthu yiixuttihiwe aya ni Yesu, waahaakhaliherya osuwela etthu yaakhanle aya oopaka yapacerya olupatthiwa. Nave etthu enrowa onikhaliherya wiilokiherya mwaha wa mixankiho, ori wuupuwelela ele Biibiliya onihimya awe.

12. Okathi xeeni nikhanle ahu ookhalana muupuwelo woohiloka? Nvahe nlikanyiho.

¹² Akhala wiira nnookhalana muupuwelo woohiloka okathi sinniphwanya aya mixankiho, eyo pooti oniiriha otepiha muxankiho owo. Yesu aahooniherya moota eyo ekhanle aya oowiiraneya ni nlikanyiho na anamuteko yaavara ematta ya ewuuva. Anamuteko akina, yaahipacerya wunlaseya yuupuwelaka wiira khiyaaliviwe musurukhu yaaphwanela aya. Masi mwaneene ematta aahimwaakhula mmosa, oriki: “Mpatthani, nkiwiirenleni etthu yoohiloka.” (Math. 20:​10-13) Anamuteko ale khahiyo yaathokoreriwe moohiloka, masi khiyiiraneyale etthu yaalipelela aya. Nave olelo-va, anna ni arokora akina pooti wuupuwelaka wiira annithokoreriwa moohixariya, mwaha wa ohivahiwa eparakha yaaphavela aya. Etthu xeeni ekhanle oonikhaliherya okhalana muupuwelo wooloka, okathi ehiniiraneya aya etthu naaphavela ahu?

ITTHU NIKHANLE AHU OOPAKA OKATHI WA MIXANKIHO

13. Exeeni ekhanle oowiiraneya akhala wiira sinniniphwanya mixankiho?

¹³ Arumeyi a Yehova, annisuwela iversiikulu sa mbiibiliyani sinikhaliherya okathi wa mixankiho. Woonasa wene, pooti wiira munnirumeela wiira mwaakhaliherye atthu akina. Masi akhala wiira muxankiho owo onniphwanya hiyo, pooti oliyala moota iversiikulu iyo sinnikhaliherya aya. Mwa ntakiheryo, pooti opaceryaka wuupuwela wiira Yehova tonneehererya ni khoniwiriyana mavekelo ahu. Masi etthu xeeni enrowa onikhaliherya osyaka wuupuwela siiso?

14. Okathi wa mixankiho, etthu xeeni munireerela anyu ovekela? (Afilipi 4:13)

¹⁴ Munvekeleke Yehova wiira ookhaliheryekeni. Mmuleeleke Yehova mixankiho sanyu ni moota munoonela anyu. Okathi owo, nyuwo pooti onvekela etthu muniphavela anyu. Munvekeleke Yehova wiira oovaheeni munepa awe woowaarya, ikuru ni ankhili. Musuweleke wiira Yehova pooti waakhula nivekelo nanyu mwa enamuna mwahuupuwela anyu. (Aef. 3:20) Owo pooti orumeela malaikha ni anna ni arokora wiira yookhaliheryeni. (Esal. 34:7) Nto muhaana weemererya khula nikhaliheryo munrowa anyu ovahiwa ni Yehova nave mmuxukhureleke. Yehova, onnivaha munepa awe woowaarya. Nto mukupaliki wiira onimoovahani okathi munikhalana anyu mixankiho. — Mmusome Afilipi 4:13.

15. Etthu xeeni mukhanle anyu oopaka okathi wa mixankiho? (Nwehe efootu.)

¹⁵ Muhihiyeke ovara miteko sa Muluku. Muhaana opaka ele muniwerya anyu, hata ohikhalaka ntoko mwaapaka anyu khalai. Okathi munikhalana anyu mixankiho, mpakeke itthu sikhanle oolipiha waamini wanyu. (Esal. 119:143) Muhihiyeke omusoma Biibiliya ni wuupuwelela ele musomme anyu. Nave mukhaleleke nthiti muteko woolaleerya, muroweleke mithukumano ni wiirela mpantta. Nave-tho, muhiivalaanyeke. Nviriheke okathi munceene muri ene ni anna ni arokora, hata ikwaha sikina muhiphavelaka. — Mir. 18:1.

16. a) Itthu xeeni nikhanle ahu oopacerya waanyiherya okathi wa mixankiho? b) Ninrowa omala-maliha sai itthu nnaanyiherya ahu? (2 Akorinto 10:​4, 5)

¹⁶ Mmusomeke Biibiliya wiira mwiiwexexe itthu sinooxankihani. Okathi wa mixankiho, hiyo pooti opaceryaka okhalana miyuupuwelo soohiloka, aahiiso waanyiherya akhala wiira Yehova onninthokorerya. Miyuupuwelo iyo, pooti olikanyihiwa ni “itthu soolipexa”, seiyo soovila omala-maliha. (Mmusome 2 Akorinto 10:​4, 5.) Nyuwo munoowerya omala-maliha miyuupuwelo iyo, akhala wiira munoomusoma Biibiliya ni iliivuru sinimutthokiherya Biibiliya. Mwa ntakiheryo, niireke munnaanyiherya akhala wiira Yehova onnoophentani? Weeso, musomeke soowiiraneya sa murummwa Paulo. Okathi aalaleerya awe, saahimphwanya mixankiho sinceene. Hata vari siiso, owo khaahiyale olaleerya ni aanikupali wiira Yehova ni Yesu yammureeliha. (2 Akor. 11:​23-27) Niireke munnaanyiherya akhala wiira Yehova ohoolevelelani itthu soohiloka mwaapanke anyu khalai? Weeso, mpake elista ya soolepa sa mbiibiliyani sinooniherya wiira Yehova onnilevelela itampi sahu ni khonuupuwela-tho. (Yes. 43:25) Nuumala-vo, musomeke soolepa iyo ni muupuweleleke. (Esal. 119:97) Niireke yookhala ehasara ekhumelenle eniwiirihani waanyiherya akhala wiira Yehova onnaakhapelela arumeyi awe? Mutokoseke murumeelaka iliivuru sinimutthokiherya Biibiliya, wiira musuwele etthu enimwiiriha Muluku ohiya itthu sootakhala siiraneyaka ni moota onnikhapelela awe. (Esal. 91:​9-12) Nave musomeke soowiiraneya sa anna ni arokora yaawo ahihiyale omurumeela Yehova moohakalala hata saaphwanyaka mixankiho.a

17. Etthu xeeni nihinreerela ahu ohiya okathi wa mixankiho?

¹⁷ Pooti wiira khiivo etthu enooxankihani nenna-va. Akhala wiira ti siiso, mmuxukhureleke Yehova mwaha wa itthu sooreera onoovahaaweni. (Mus. 7:14) Masi okathi sinoophwanyaayani mixankiho, muhihiye omuroromela Yehova ni okhalana muupuwelo wooloka. Nto Muluku, “onoowooniheryani ephiro wiira nwerye ovilela” mixankiho. (1 Akor. 10:13) Masi etthu xeeni nikhanle ahu oopaka akhala wiira munna aahiiso murokora womphwanya muxankiho? Nnimwiixutta mwaha onittharelana.