Paghalad hin Bug-os-Kalag nga mga Halad kan Jehova
“Kon ano an iyo pagbuhaton, buhata niyo ha kinasingkasing [“bug-os-kalag,” NW], sugad nga ha Ginoo.”—KOL. 3:23.
1-3. (a) Tungod kay iginhatag ni Jesus an iya kinabuhi sugad nga halad, karuyag sidngon ba nga diri na hi Jehova nagkikinahanglan hin bisan ano nga halad tikang ha aton? Isaysay. (b) Ano an mahimo naton ipakiana mahitungod han aton mga halad yana?
HA SIYAHAN nga siglo K.P., iginpahayag ni Jehova ha iya katawohan nga pinaagi han halad lukat ni Jesus, natapos na an Mosaiko nga Balaud. (Kol. 2:13, 14) An ngatanan nga iginhahalad han mga Judio hin ginatos ka tuig na diri na kinahanglanon ngan waray na kapulsanan. Natuman na han Balaud an katuyoan hito sugad nga ‘magturutdo ha pagdara ngadto kan Kristo.’—Gal. 3:24.
2 Diri karuyag sidngon hito nga an mga Kristiano diri na interesado ha mga halad. Lugod, hi apostol Pedro nagsiring nga kinahanglan kita ‘maghalad hin mga espirituhanon nga halad, nga karuruyagon ha Dios pinaagi kan Jesu-Kristo.’ (1 Ped. 2:5) Dugang pa, iginpatin-aw ni apostol Pablo nga an tagsa nga bahin han kinabuhi han dedikado nga Kristiano husto la nga tagdon nga “halad.”—Roma 12:1.
3 Kon sugad, an usa nga Kristiano naghahalad kan Jehova pinaagi ha paghatag ha iya hin pipira nga butang o pagsalikway hin pipira nga butang para ha iya. Uyon ha aton hinbabaroan ha mga iginhalad hadto han mga Israelita, paonan-o naton masisiguro nga kakarawaton ni Jehova an ngatanan nga iginhahalad naton yana?
HA ADLAW-ADLAW NGA PAGKINABUHI
4. Ano an sadang naton hinumdoman mahitungod han aton adlaw-adlaw nga buruhaton?
4 Ha aton adlaw-adlaw nga pagkinabuhi, bangin makuri hunahunaon kon ano an kalabotan han aton mga buruhaton ha paghatag hin mga halad kan Jehova. Bangin an mga buruhaton ha balay, eskwelahan, trabaho, o an pamalit ngan iba pa baga hin waray epekto ha aton relasyon ha Dios. Pero kon igindedikar mo na an imo kinabuhi kan Jehova o nagpaplano pagbuhat hito ha tidaraon, importante hinumdoman nga inin adlaw-adlaw nga mga buruhaton makakaapekto ha imo relasyon ha iya. Mga Kristiano kita 24 oras ha usa ka adlaw. An mga prinsipyo ha Kasuratan kinahanglan iaplikar ha tagsa nga bahin han aton kinabuhi. Salit hi Pablo nag-aghat ha aton: “Kon ano an iyo pagbuhaton, buhata niyo ha kinasingkasing [“bug-os-kalag,” NW], sugad nga ha Ginoo, ngan diri nga tungod ha mga tawo.”—Basaha an Kolosas 3:18-24.
5, 6. Ano an sadang naton hinumdoman may kalabotan ha aton pamado ngan paggawi kada adlaw?
5 An adlaw-adlaw nga buruhaton han usa nga Kristiano diri bahin han iya sagrado nga pag-alagad. Pero tungod kay gin-aaghat kita ni Pablo nga magbuhat hin “bug-os-kalag” nga sugad hin para kan Jehova, napapagios kita nga hunahunaon an aton bug-os nga pagkinabuhi. Salit paonan-o naton ini maiaaplikar? An aton ba paggawi ngan pamado desente ha ngatanan nga panahon? O ha aton adlaw-adlaw nga buruhaton, maaawod ba kita nga magpakilala nga Saksi ni Jehova, bangin tungod han aton paggawi o pamado? Diri gud unta ito mahitabo ha aton! Diri naton karuyag nga magbuhat hin bisan ano nga magpapasipara ha ngaran han Dios.—Isa. 43:10; 2 Kor. 6:3, 4, 9.
6 Aton usisahon kon paonan-o an hingyap nga magbuhat hin “bug-os-kalag” nga sugad hin para kan Jehova makakaapekto ha iba-iba nga bahin han aton kinabuhi. Samtang aton ginhihisgotan ito, hinumdumi nga an ngatanan nga iginhalad han mga Israelita kan Jehova kinahanglan an ira pinakamaopay.—Eks. 23:19.
KON ANO AN EPEKTO HA IMO KINABUHI
7. Ano an nahiuupod ha aton pagdedikar ha Dios?
7 Han nagdedikar ka kan Jehova, nagdesisyon ka nga gamiton an imo bug-os nga kinabuhi ha pag-alagad ha iya, diri ba? Nagpapasabot ito nga uunahon mo hiya ha tagsa nga bahin han imo kinabuhi. (Basaha an Hebreo 10:7.) Maopay ito nga desisyon. Sigurado nga napamatud-an mo nga kon nangangalimbasog ka nga hibaroan an kaburut-on ni Jehova ha usa nga butang ngan nagbubuhat uyon hito, maopay gud an resulta. (Isa. 48:17, 18) An katawohan han Dios baraan ngan malipayon tungod kay iginpapakita nira an mga kalidad han nagtututdo ha ira, hi Jehova.—Leb. 11:44; Sal. 104:31.
8. Kay ano nga sadang naton hinumdoman nga para kan Jehova baraan an mga halad han mga Israelita?
8 Para kan Jehova, baraan an mga halad han mga Israelita. (Leb. 6:25; 7:1) An Hebreo nga pulong nga iginhubad nga “pagkabaraan” nagpapasabot hin pagin bulag o para gud la ha Dios. Basi karawaton ni Jehova an aton mga halad, kinahanglan magin bulag kita ha kalibotan ngan ha maghugaw nga impluwensya hito. Diri naton hihigugmaon an mga butang nga ginkakangalasan ni Jehova. (Basaha an 1 Juan 2:15-17.) Nangangahulogan ini nga kinahanglan likyan naton an pakig-upod ha bisan hin-o o pagbuhat hin bisan ano nga makakahimo ha aton nga mahugaw ha pagkita han Dios. (Isa. 2:4; Pah. 18:4) Nangangahulogan liwat ini nga diri kita magkikinita o magpapantasya ha mga butang nga mahugaw o imoral.—Kol. 3:5, 6.
9. Kay ano nga importante an aton pagtratar ha iba?
9 Gin-aghat ni Pablo an iya mga igkasi-tumuroo: “Ayaw niyo hikalimti an pagbuhat hin maopay ngan pagkamahatagon: kay ha sugad nga mga halad an Dios nalilipay.” (Heb. 13:16) Kon sugad, para kan Jehova, an pirme pagin maopay ngan pagbuhat hin maopay ha iba usa nga halad nga iya kinakarawat. An mahigugmaon nga pagtagad ha iba usa nga pangirilal-an han tinuod nga mga Kristiano.—Juan 13:34, 35; Kol. 1:10.
MGA HALAD HA PAGSINGBA
10, 11. Ano an pagtagad ni Jehova ha aton ministeryo ngan pagsingba, ngan ano an sadang magin epekto hini ha aton?
10 Usa nga paagi nga makakabuhat kita hin maopay ha iba amo an “pagsumat han aton paglaom.” Ginsasalingabot mo ba an tagsa nga higayon nga magsangyaw? Inin importante nga buruhaton han Kristiano gintawag ni Pablo nga “halad han pagdayeg, nga amo, an bunga han mga im-im nga nagsusumat han [kanan Dios] ngaran.” (Heb. 10:23; 13:15; Hos. 14:2) Makakabulig gud an paghunahuna kon ano kadaku nga panahon an aton ginagamit ha pagsangyaw han maopay nga sumat ngan kon paonan-o kita mag-uuswag ha pagbuhat hito. Damu nga bahin han Katirok ha Pag-alagad an mabulig ha aton may kalabotan hini. Kondi tungod kay an aton pormal ngan diri pormal nga pagsangyaw “halad han pagdayeg” ngan bahin han aton pagsingba, ito nga halad kinahanglan an pinakamaopay nga aton mahihimo. Iba-iba an aton kahimtang, pero an kadaku han panahon nga aton ginagamit ha pagpasamwak han maopay nga sumat agsob nga nagpapakita han aton apresasyon ha espirituwal nga mga butang.
11 An mga Kristiano regular nga nagsisingba kan Jehova, ha balay man o ha kongregasyon. Ginsusugo kita ni Jehova nga buhaton ito. Bisan kon diri na naton kinahanglan sundon an balaud han Sabbath o magbiyahe ngadto ha Jerusalem para ha mga piyesta, may mahibabaroan pa gihapon kita nga leksyon tikang hito nga mga balaud. Naglalaom pa gihapon an Dios nga bayaan naton an waray pulos nga mga buruhaton ngan mag-aram han iya Pulong, mag-ampo, ngan tumambong ha mga katirok. Ngan an Kristiano nga mga ulo han pamilya may responsabilidad nga magdumara han pagsingba han pamilya. (1 Tes. 5:17; Heb. 10:24, 25) May kalabotan ha aton espirituwal nga mga buruhaton, maopay nga pakianhan naton an aton kalugaringon, ‘Puydi ko ba pauswagon an kalidad han akon pagsingba ha Dios?’
12. (a) Ha ano maipapariho yana an paghalad hin insenso ha pagsingba ha kadaan nga panahon? (b) Paonan-o ito sadang makaapekto ha aton mga igin-aampo?
12 Hi Hadi David nagkanta kan Jehova: “An akon pag-ampo mahibutang ha imo atubangan sugad hin insenso.” (Sal. 141:2) Hunahunaa an imo mga pag-ampo—kon ano kaagsob ka nag-aampo ngan kon ano an imo igin-aampo. Ha libro han Pahayag, an “mga pag-ampo han mga baraan” iginpariho ha insenso. Nasiring ito nga an mga pag-ampo nga kinakarawat ni Jehova sugad hin mahamot nga halad. (Pah. 5:8) Ha kadaan nga Israel, an insenso nga regular nga iginhahalad ha altar ni Jehova kinahanglan andamon hin maopay uyon ha espisipiko nga mga instruksyon. Ginkakarawat la ito ni Jehova kon iginhalad ito uyon ha mga instruksyon nga iya ginhatag. (Eks. 30:34-37; Leb. 10:1, 2) Ha pariho nga paagi, kon an aton kinasingkasing nga mga pag-ampo uyon ha kaburut-on ni Jehova, makakasiguro kita nga iya ito kakarawaton.
PAGHATAG NGAN PAGKARAWAT
13, 14. (a) Ano an ginbuhat ni Epaprodito ngan han kongregasyon ha Filipos para kan Pablo, ngan paonan-o ito gintagad ni Pablo? (b) Paonan-o naton masusubad hi Epaprodito ngan an mga taga-Filipos?
13 An mga donasyon nga kwarta ha pagsuporta han bug-os-kalibotan nga buruhaton maipapariho ha halad, daku man o gutiay nga kantidad an aton iginhahatag. (Mar. 12:41-44) Ha siyahan nga siglo K.P., hi Epaprodito ginpakadto ha Roma han kongregasyon ha Filipos basi panginanoon an mga panginahanglan ni Pablo. Matin-aw nga hi Epaprodito may dara nga kwarta nga regalo han kongregasyon. Diri ini an siyahan nga higayon nga an mga taga-Filipos nagin mahinatagon kan Pablo. Nagregalo hira ha iya basi diri na hiya mamroblema hin kwarta ngan mas daku nga panahon an iya magagamit ha ministeryo. Paonan-o gintagad ni Pablo ito nga regalo? Gintawag niya ito nga “mahamot nga halad nga sadang karawaton, ngan makaruruyag ha Dios.” (Basaha an Filipos 4:15-19.) Gin-apresyar gud ni Pablo an pagkabuotan han mga taga-Filipos, ngan nalipay liwat hito hi Jehova.
14 Yana, nalilipay gud liwat hi Jehova ha aton mga donasyon para ha bug-os-kalibotan nga buruhaton. Dugang pa, nagsasaad hiya nga kon padayon nga uunahon naton an iya Ginhadian, itatagana niya an ngatanan nga aton panginahanglan ha espirituwal ngan pisikal.—Mat. 6:33; Luk. 6:38.
IPAKITA AN IMO APRESASYON
15. Ano an pipira nga hinungdan nga mapasalamaton ka kan Jehova?
15 Damu gud an aton hinungdan nga magpasalamat kan Jehova. Diri ba sadang naton hiya pasalamatan kada adlaw tungod han iya regalo nga kinabuhi? Iginhahatag niya an ngatanan nga aton ginkikinahanglan basi mabuhi—pagkaon, bado, ngan urukyan sugad man an hangin nga aton gin-giginhawa. Dugang pa, an aton pagtoo nga iginbasar ha husto nga kahibaro naghahatag ha aton hin paglaom. Angayan la nga magsingba kita kan Jehova ngan maghalad ha iya hin pagdayaw tungod kay hiya an aton Maglalarang ngan tungod han iya ginbubuhat para ha aton.—Basaha an Pahayag 4:11.
16. Paonan-o naton maipapakita nga gin-aapresyar naton an halad lukat ni Kristo?
16 Sugad han aton nahibaroan ha nahiuna nga artikulo, an birilhon gud nga regalo han Dios ha katawohan amo an halad lukat ni Kristo. Ito an gimaopayi nga kapahayagan han gugma han Dios ha aton. (1 Juan 4:10) Paonan-o naton ipapakita nga gin-aapresyar naton ito? Hi Pablo nagsiring: “An gugma ni Kristo naglulugos ha amon; kay naghuhukom kami sugad hini, nga an usa namatay tungod ha ngatanan, . . . ngan hiya namatay tungod ha ngatanan, basi nga an mga buhi diri na magkabubuhi tungod ha ira la ngahaw, kondi ngadto ha iya nga tungod ha ira namatay ngan nabanhaw liwat.” (2 Kor. 5:14, 15) Karuyag sidngon ni Pablo nga kon gin-aapresyar naton an diri matupngan nga pagkabuotan han Dios, gagamiton naton an aton kinabuhi basi pasidunggan Hiya ngan an Iya Anak. Maipapakita naton an aton gugma ngan apresasyon ha Dios ngan kan Kristo pinaagi han aton pagsugot ngan han aton hingyap nga magsangyaw ngan maghimo hin mga disipulo.—1 Tim. 2:3, 4; 1 Juan 5:3.
17, 18. Ha ano nga mga paagi ginpauswag han iba an ira halad han pagdayaw kan Jehova? Paghatag hin ehemplo.
17 Puydi mo ba pauswagon an imo halad han pagdayaw ha Dios? Katapos pamalandungon an ngatanan nga kaopayan nga ginbubuhat ni Jehova para ha ira, damu an napagios nga maghimo hin mga pagbag-o basi dugangan an ira panahon ha pagsangyaw han Ginhadian ngan ha iba pa nga teokratiko nga buruhaton. An iba nakakag-auxiliary payunir hin usa ka bulan o sobra pa kada tuig, ngan an iba nagin mga regular payunir. May-ada liwat iba nga nabulig ha pagtukod hin mga pasilidad nga ginagamit ha pag-alagad kan Jehova. Diri ba mag-opay gud ini nga paagi han pagpakita han aton apresasyon? Kon husto an aton motibo ha pagbuhat hito—basi ipakita an apresasyon ngan pagpasalamat—kakarawaton ito ni Jehova.
18 Damu nga Kristiano an napagios nga ipakita an ira pagpasalamat kan Jehova. Usa hito hi Morena. Nagdaku hiya nga Katoliko kondi damu an iya mga pakiana mahitungod ha Dios ngan ha katuyoan han kinabuhi. Namiling hiya hin baton ha iya relihiyon ngan ha mga pilosopiya ha Asia kondi waray hiya makaagi hin makapatagbaw nga mga baton. Nabaton la an iya mga pakiana han nag-aram hiya han Biblia ha mga Saksi ni Jehova. Naapresyar gud niya an mga baton han Kasuratan ha ngatanan niya nga pakiana ngan an kalipay nga iya inabat tungod hito salit karuyag niya magpasalamat kan Jehova pinaagi ha paggamit han iya bug-os nga kusog ha pag-alagad ha Iya. Katapos han iya bawtismo, nagin regular nga auxiliary payunir hiya, ngan han nagin posible na ha iya kahimtang, nagregular payunir hiya. Nahitabo ito 30 ka tuig na an naglabay, ngan tubtob yana hi Morena nag-aalagad pa gihapon hin bug-os-panahon.
19. Paonan-o mo mapapauswag an imo mga halad kan Jehova?
19 Syempre, damu nga magtinumanon nga magsiringba ni Jehova an diri nakakagpayunir tungod han ira kahimtang. Anoman an aton nahihimo ha pag-alagad kan Jehova, kita ngatanan makakaghalad hin espirituwal nga mga halad nga iya kinakarawat. Ha aton paggawi, kinahanglan sundon gud naton an mga prinsipyo ha Biblia tungod kay maaram kita nga nagrirepresentar kita kan Jehova ha ngatanan nga panahon. Ha pagtoo, bug-os nga nasarig kita nga tutumanon han Dios an iya mga katuyoan. Ha mag-opay nga buhat, nabulig kita ha pagpasamwak han maopay nga sumat. Salit tungod han kinasingkasing nga apresasyon ha ngatanan nga ginbubuhat ni Jehova para ha aton, padayon kita nga maghalad hin bug-os-kalag nga mga halad kan Jehova.
[Blurb ha pahina 25]
An pagkamaopay ba ni Jehova nagpapagios ha imo nga pauswagon an imo halad han pagdayaw?
[Retrato ha pahina 23]
Ginsasalingabot mo ba an tagsa nga higayon nga magsangyaw?