Hadianon nga mga Saserdote Para ha Kapulsanan han Ngatanan nga Katawohan
“Pinili kamo nga kamamatan, hadianon nga pagkasaserdote, baraan nga nasud, katawohan nga kalugaringon han Dios.”—1 PED. 2:9.
1. Kay ano nga an “panihapon han Ginoo” gintatawag liwat nga Memoryal, ngan ano an katuyoan hito?
HA GAB-I han Nisan 14 han 33 K.P., ginsaurog ni Jesus ngan han iya 12 nga apostol an Judio nga Paskua ha ultimo nga higayon. Katapos pagawson an traydor nga hi Judas Iskariote, ginsaurog ni Jesus ha siyahan nga higayon an lain nga okasyon, nga ha urhi gintawag nga “panihapon han Ginoo.” (1 Kor. 11:20) Hi Jesus duha ka beses nga nagsiring: “Buhata niyo ini nga hinumdoman niyo ha akon.” Ini nga okasyon gintatawag liwat nga Memoryal, an paghinumdom han kamatayon ni Kristo. (1 Kor. 11:24, 25) Ha pagsunod hini nga sugo, kada tuig ginsasaurog han mga Saksi ni Jehova an Memoryal. Hini nga tuig 2012, an Nisan 14 ha kalendaryo han mga Judio nagtitikang ha katunod han adlaw, ha Huwebes, Abril 5.
2. Ano an ginsiring ni Jesus mahitungod han mga emblema nga iya gin-gamit?
2 Simple nga iginsaysay han disipulo nga hi Lukas an ginbuhat ngan ginsiring ni Jesus hito nga okasyon: “Han pagkapot hin usa nga tinapay, hiya nagpasalamat, ngan iya ginpinitpinit, ngan ihinatag ha ira, ngan nasiring: Iini an akon lawas, nga ipinanhatag tungod ha iyo; ini buhata niyo nga hinumdoman ha akon. Ha sugad nga paagi kinapot hin usa nga irimnan ha katapos han panihapon, ngan siniring: Ini nga irimnan amo an bag-o nga testamento han akon dugo, nga iginbisibis tungod ha iyo.” (Luk. 22:19, 20) Ano an pagsabot han mga apostol ni Jesus hini nga iya ginsiring?
3. Ano an pagsabot han mga apostol ha kahulogan han mga emblema?
3 Sugad nga mga Judio, pamilyar an mga apostol ha mga hayop nga iginhahalad ha Dios han mga saserdote ha templo ha Jerusalem. Iginhahalad ito basi makarawat an pag-uyon ni Jehova, ngan damu liwat hito an para ha kapasayloan han mga sala. (Leb. 1:4; 22:17-29) Salit nasabtan han mga apostol nga han nagsiring hi Jesus nga an iya lawas ngan dugo ‘ihahatag ngan ibibisibis tungod ha ira,’ karuyag niya sidngon nga iya ihahatag an iya hingpit nga kinabuhi sugad nga halad. Ito nga halad mas birilhon gud kay han halad nga mga hayop.
4. Ano an karuyag sidngon ni Jesus han nagsiring hiya: “Ini nga irimnan amo an bag-o nga testamento han akon dugo”?
4 Ano an karuyag sidngon ni Jesus han nagsiring hiya: “Ini nga irimnan amo an bag-o nga testamento [o kauyonan] han akon dugo”? Maaram an mga apostol han tagna mahitungod han bag-o nga kauyonan nga nakarekord ha Jeremias 31:31-33. (Basaha.) Iginpakita han ginsiring ni Jesus nga iya na gintitikangan iton bag-o nga kauyonan nga isasaliwan ha Balaud nga kauyonan nga ginhimo ni Jehova ha Israel pinaagi kan Moises. Ini ba nga duha nga kauyonan may kalabotan ha usa kag usa?
5. Ano nga mga oportunidad an iginhatag ha Israel han Balaud nga kauyonan?
5 Oo, may kalabotan gud an mga katuyoan hiton duha nga kauyonan. Han iginhatag ni Jehova an Balaud nga kauyonan ha Israel, hiya nagsiring: “Kon masugot kamo ha akon tingog hin ungod, ngan pagbantayan niyo an akon kauyonan, dida hito maaakon kamo kalugaringon labaw ha ngatanan nga katawohan: kay akon an bug-os nga tuna: ngan ha akon magiginhadian kamo han mga saserdote, ngan baraan nga nasud.” (Eks. 19:5, 6) Ano an pagsabot han mga Israelita hini nga mga pulong?
AN SAAD NGA MAGIN HADIANON NGA MGA SASERDOTE
6. Ano nga saad an matutuman ha bulig han Balaud nga kauyonan?
6 Nasabtan han mga Israelita an pulong nga “kauyonan,” kay naghimo na hi Jehova hin sugad hito nga seryoso nga pakigsabot ha ira kaapoy-apoyan nga hi Noe ngan hi Abraham. (Gen. 6:18; 9:8-17; 15:18; 17:1-9) Sugad nga bahin han kauyonan ni Jehova kan Abraham, Hiya nagsaad: “Ha imo katulinan an mga nasud ha kalibotan pagbabaraanon.” (Gen. 22:18) Ginhimo ni Jehova an Balaud nga kauyonan basi makabulig ha pagtuman hini nga saad. Basado hito nga kauyonan, an Israel mahimo magin “kalugaringon [ni Jehova] labaw ha ngatanan nga katawohan.” Ano an katuyoan hito? Basi hira ‘magin ginhadian han mga saserdote’ para kan Jehova.
7. Ano an iginpapasabot han mga pulong nga ‘ginhadian han mga saserdote’?
7 An mga Israelita pamilyar ha mga hadi ngan mga saserdote. Pero usa la nga lalaki ha kadaan nga panahon an gin-uyonan ni Jehova nga magin hadi ngan saserdote ha pariho nga panahon, hi Melkisedek. (Gen. 14:18) Pinaagi han Balaud nga kauyonan, ginhatagan ni Jehova an mga Israelita hin oportunidad nga pagtikangan hin ‘ginhadian han mga saserdote.’ Ha urhi gin-unabi han Kasuratan ini nga mga pinili sugad nga “hadianon nga pagkasaserdote,” karuyag sidngon, mga hadi nga magigin mga saserdote liwat.—1 Ped. 2:9.
8. Ano an ginbubuhat han mga saserdote nga pinili han Dios?
8 Syempre, an hadi nagmamando. Kondi ano an ginbubuhat han saserdote? An Hebreo 5:1 nagsasaysay: “An tagsa-tagsa nga hitaas nga saserdote, tungod nga kinuha tikang ha mga tawo, gintungdan tungod ha mga tawo ha mga bagay nga nahitutungod ha Dios, basi hiya maghalad hin mga hatag ngan mga halad tungod ha mga sala.” Kon sugad, an usa nga saserdote nga ginpili ni Jehova nagrirepresentar ha katawohan ha Iya atubangan. Nakikimalooy hiya ha Dios nga pasayloon an ira mga sala pinaagi han paghalad hin mga halad. Nagrirepresentar liwat hiya kan Jehova ha atubangan han katawohan pinaagi ha pagtutdo ha ira han Iya mga balaud. (Leb. 10:8-11; Mal. 2:7) Hini nga mga paagi, an saserdote nabulig ha makasasala nga mga tawo nga mapahiuli ha Dios.
9. (a) Ano an kondisyon basi makarawat han mga Israelita an saad nga pagtikangan hin ‘ginhadian han mga saserdote’? (b) Kay ano nga hi Jehova nagpili hin mga saserdote ha sulod han Israel? (c) Kay ano nga an mga Israelita diri magigin ‘ginhadian han mga saserdote’ samtang sakop han Balaud nga kauyonan?
9 An Balaud nga kauyonan naghatag ha mga Israelita hin oportunidad nga magin mga hadi ngan saserdote para ha kapulsanan han “ngatanan nga katawohan.” Kondi may kondisyon inin makaruruyag hinduro nga paglaom: “Kon masugot kamo ha akon tingog hin ungod, ngan pagbantayan niyo an akon kauyonan.” Masusunod ba “hin ungod” han mga Israelita an tingog ni Jehova? Oo. Hingpit ba nga masusunod nira ito? Diri. (Roma 3:19, 20) Ito an hinungdan nga ha sulod han Israel nagpili hi Jehova hin mga saserdote nga diri mga hadi, basi maghalad hin mga hayop para ha mga sala han mga Israelita. (Leb. 4:1–6:7) Upod hito nga mga sala an mga sala han mga saserdote. (Heb. 5:1-3; 8:3) Ginkarawat ni Jehova ito nga mga halad, pero diri ito bug-os nga nakakakuha han mga sala han mga naghahalad. An mga saserdote nga sakop han Balaud nga kauyonan diri bug-os nga makakapahiuli ha Dios bisan han sinsero nga mga Israelita. Ini an ginsiring ni apostol Pablo: “An dugo han mga lalaki nga baka ngan kanding diri gud sadang makakuha han mga sala.” (Heb. 10:1-4) Tungod kay gintalapas han mga Israelita an Balaud, ginpanhimaraot hira. (Gal. 3:10) Hito nga kahimtang, diri hira makakag-alagad sugad nga hadianon nga mga saserdote para ha ngatanan nga katawohan.
10. Ano an katuyoan han Balaud nga kauyonan?
10 Nangangahulogan ba ito nga an mga Israelita diri gud magigin ‘ginhadian han mga saserdote’ sugad han iginsaad ni Jehova? Diri. Kon mangangalimbasog gud hira nga sumugot kan Jehova, magkakaada hira hito nga oportunidad, pero diri samtang sakop hira han Balaud. Kay ano? (Basaha an Galasia 3:19-25.) An Balaud nagpanalipod ha masinugtanon nga mga Israelita tikang ha buwa nga pagsingba. Nakabulig liwat ito ha ira nga masabtan nga makasasala hira ngan nagkikinahanglan hin halad nga mas labaw kay han maihahalad han ira hitaas nga saserdote. Usa ito nga magturutdo nga magtutugway ha ira ngadto ha Kristo, o Mesias, mga titulo nga nangangahulogan “Usa nga Dinihogan.” Pero kon umabot na an Mesias, titikangan niya an bag-o nga kauyonan nga igintagna ni Jeremias. An mga nagkarawat han Kristo nagin bahin han bag-o nga kauyonan ngan magigin ‘ginhadian han mga saserdote.’ Hisgotan naton kon paonan-o.
AN MGA KAAPI HAN BAG-O NGA KAUYONAN MAGIGIN HADIANON NGA MGA SASERDOTE
11. Paonan-o ginhimo ni Jesus nga posible para ha iba nga magin hadianon nga mga saserdote?
11 Han 29 K.P., inabot an Mesias, hi Jesus nga taga-Nasaret. Han mga 30 anyos hiya, iginpresentar niya an iya kalugaringon ha pagbuhat han kaburut-on ni Jehova para ha iya ngan ginsimbolohan ito pinaagi han bawtismo ha tubig. Ginkilala hiya ni Jehova sugad nga “an akon hinigugma nga Anak,” ngan gindihogan hiya, diri hin lana, kondi han baraan nga espiritu. (Mat. 3:13-17; Buh. 10:38) Pinaagi hito nga pagdihog ginpili hiya nga magin Hitaas nga Saserdote ngan tidaraon nga Hadi han ngatanan nga natoo ha iya. (Heb. 1:8, 9; 5:5, 6) Hihimoon niya nga posible para ha iba nga magin hadianon nga mga saserdote.
12. Ano an nagin posible tungod han halad ni Jesus?
12 Sugad nga Hitaas nga Saserdote, ano an maihahalad ni Jesus nga pinaagi hito bug-os nga mapapasaylo an napanunod nga sala han mga tawo nga may pagtoo ha iya? Sugad han iya ginsiring han iya gintikangan an Memoryal han iya kamatayon, an iya hingpit nga kinabuhi sugad nga tawo an ihahalad. (Basaha an Hebreo 9:11, 12.) Tikang han nabawtismohan hi Jesus han 29 K.P., sugad nga Hitaas nga Saserdote ginkarawat niya an mga pagsari ngan pagbansay tubtob han iya kamatay. (Heb. 4:15; 5:7-10) Han nabanhaw hiya, sinaka hiya ha langit ngan iginpresentar kan Jehova an bili han iya halad. (Heb. 9:24) Katapos, mahimo na hiya makimalooy kan Jehova para ha mga nagpapakita hin pagtoo ha iya halad ngan bumulig ha ira nga mag-alagad ha Dios nga may paglaom nga mabuhi ha waray kataposan. (Heb. 7:25) Pinaagi hito nga iya halad, nagin marig-on liwat an bag-o nga kauyonan.—Heb. 8:6; 9:15.
13. Ano an paglaom han mga kaapi han bag-o nga kauyonan?
13 An mga kaapi han bag-o nga kauyonan didihogan liwat han baraan nga espiritu. (2 Kor. 1:21) Upod hito an magtinumanon nga Judio ngan ha urhi an mga Hentil. (Efe. 3:5, 6) Ano an mga paglaom han mga kaapi han bag-o nga kauyonan? Bug-os nga mapapasaylo an ira mga sala. Hi Jehova nagsaad: “Akon igpapasaylo an ira karat-an, ngan an ira sala diri ko na dudumdumon.” (Jer. 31:34) Tungod kay ginpasaylo na an ira mga sala, mahimo na hira magin ‘ginhadian han mga saserdote.’ Hi Pedro nagsiring ha dinihogan nga mga Kristiano: “Pinili kamo nga kamamatan, hadianon nga pagkasaserdote, baraan nga nasud, katawohan nga kalugaringon han Dios, basi nga iyo unta igpahayag an mga kamahalan hadton nagtawag ha iyo tikang ha kangitngitan ngadto ha iya katingalahan nga kahayag.” (1 Ped. 2:9) Ginkotar ni Pedro an ginsiring ni Jehova ha Israel han ginhatag Niya an Balaud, ngan gin-aplikar ito ni Pedro ha mga Kristiano nga kaapi han bag-o nga kauyonan.—Eks. 19:5, 6.
HADIANON NGA MGA SASERDOTE NGA MAPULSANON HA NGATANAN NGA KATAWOHAN
14. Diin mag-aalagad an hadianon nga mga saserdote?
14 Diin mag-aalagad an mga kaapi han bag-o nga kauyonan? Dinhi ha tuna, diin sugad nga grupo mga saserdote hira nga nagrirepresentar kan Jehova ha katawohan pinaagi ha ‘pagpahayag han iya mga kamahalan’ ngan pagtagana hin espirituwal nga pagkaon. (Mat. 24:45; 1 Ped. 2:4, 5) Katapos hira mamatay ngan mabanhaw, mag-aalagad hira upod ni Kristo ha langit ngan bug-os nga tutumanon an ira mga buruhaton sugad nga hadi ngan saserdote. (Luk. 22:29; 1 Ped. 1:3-5; Pah. 1:6) Ha pagpamatuod hini, nakita ni apostol Juan ha bisyon an damu nga espiritu nga linarang hirani ha trono ni Jehova ha langit. Ha “bag-o nga kanta” para ha “Kordero,” hira nagkakanta: “Ikaw . . . nagpalit ngadto ha Dios pinaagi han imo dugo han mga tawo tikang ha tagsa-tagsa nga panon, ngan yinaknan, ngan katawohan, ngan nasud, ngan ginhihimo mo hira ngadto ha aton Dios nga ginhadian ngan mga saserdote; ngan naghahadi hira ha tuna.” (Pah. 5:8-10) Ha lain nga bisyon, hi Juan nagsiring mahitungod hini nga mga hadi: “Magkakahihimo hira nga mga saserdote han Dios ngan ni Kristo, ngan maghahadi hira upod niya hin usa ka yukot ka tuig.” (Pah. 20:6) Upod ni Kristo, hira magigin hadianon nga mga saserdote para ha kapulsanan han ngatanan nga katawohan.
15, 16. Ha ano nga mga paagi magigin mapulsanon ha katawohan an hadianon nga mga saserdote?
15 Paonan-o an 144,000 magigin mapulsanon ha mga tawo ha tuna? Ha Pahayag kapitulo 21 iginhulagway hira sugad nga syudad ha langit, an Bag-o nga Jerusalem nga gintatawag nga “asawa han Kordero.” (Pah. 21:9) An bersikulo 2 tubtob 4 nasiring: “Ngan hinkit-an ko an baraan nga bungto, an bag-o nga Jerusalem, nga nalusad tikang ha langit ha Dios, nga andam na sugad ha asawa nga babaye rinayandayanan tungod ha iya asawa nga lalaki. Ngan hinbatian ko an daku nga tingog nga tikang ha lingkuranan nga hadianon, nga nasiring: Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira, ngan magigin ira Dios: ngan pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasákit pa gud: kay an siyahan nga mga bagay nag-agi na.” Makalilipay gud ito nga mga bendisyon! Mawawara na an kamatayon, an nangunguna nga hinungdan han pagtangis, kabido, ngan kasákit. An matinumanon nga katawohan magigin hingpit na ngan bug-os nga maipapahiuli ha Dios.
16 Ha Pahayag 22:1, 2, dugang nga iginhuhulagway an mga bendisyon nga mapapahimulsan pinaagi hinin hadianon nga mga saserdote: “Pinakita ako niya hin salog nga tubig han kinabuhi, masilaw sugad hin salaming, nga nag-aagos tikang ha lingkuranan nga hadianon han Dios ngan han Kordero, nga ha butnga han mga dalan [han Bag-o nga Jerusalem]. Nga hini nga ligid han salog may kahoy han kinabuhi, nga namumunga hin napulo kag duha ka lain nga bunga nga nagbubunga ha ikinabulan: ngan an mga dahon han kahoy amo an tambal ha mga nasud.” Pinaagi hinin simboliko nga mga tagana, an “mga nasud,” o an ngatanan nga pamilya ha tuna, bug-os nga matatambal ha pagkadiri-hingpit nga napanunod tikang kan Adan. Oo, “an siyahan nga mga bagay nag-agi na.”
TATAPUSON HAN HADIANON NGA MGA SASERDOTE AN IRA BURUHATON
17. Ano nga buruhaton an matatapos han hadianon nga mga saserdote ha kataposan han 1,000 ka tuig?
17 Ha kataposan han 1,000 ka tuig nga pagserbisyo, nabuligan na han hadianon nga mga saserdote an katawohan nga magin hingpit. Hito nga panahon ipipresentar na kan Jehova han Hitaas nga Saserdote ngan Hadi nga hi Jesu-Kristo an hingpit nga katawohan. (Basaha an 1 Korinto 15:22-26.) Natapos na han hadianon nga mga saserdote an ira buruhaton.
18. Kon matapos na an buruhaton han hadianon nga mga saserdote, paonan-o hira gagamiton ni Jehova?
18 Katapos hito, paonan-o gagamiton ni Jehova inin hadianon nga mga saserdote nga kaupod ni Kristo? An Pahayag 22:5 nasiring: “Maghahadi hira ha mga katuigan ha mga katuigan.” Hin-o an ira mamandoan? Waray gin-unabi an Biblia. Pero tungod kay imortal na hira ngan may eksperyensya ha pagbulig ha diri-hingpit nga katawohan, hira padayon nga magigin mga hadi nga gagamiton ni Jehova ha pagtuman han iya mga katuyoan ha waray kataposan.
19. Ano an mahihinumdoman han mga matambong ha Memoryal?
19 Ha aton pagsaurog han Memoryal han kamatayon ni Jesus ha Huwebes, Abril 5, 2012, mahihinumdoman naton ini nga mga katutdoan han Biblia. An gutiay nga nanhibilin han dinihogan nga mga Kristiano nga aanhi pa ha tuna makikigbahin ha mga emblema nga tinapay nga waray ipaturubo ngan pula nga alaksiw basi ipakita nga kaapi hira han bag-o nga kauyonan. Ipapahinumdom hito ha ira an ira makaruruyag nga mga pribilehiyo ngan responsabilidad ha waray kataposan nga katuyoan han Dios. Hinaot kita ngatanan tumambong nga mapasalamaton gud ha pagtagana ni Jehova hin hadianon nga mga saserdote para ha kapulsanan han ngatanan nga katawohan.
[Retrato ha pahina 29]
An hadianon nga mga saserdote magigin mapulsanon ha katawohan ha kadayonan