Pagpreserba han Presyoso nga mga Butang ha Aton Kasaysayan

AN KATAWOHAN ni Jehova may maiha na ngan makapainteres nga kasaysayan han pag-alagad ha iya. Hibabaroan naton ito diri la ha aton mga publikasyon kondi pati liwat ha mga retrato, surat, istorya han kinabuhi, ngan mga gamit nga may kalabotan ha aton pagsingba, pagsangyaw, ngan kasaysayan. Kondi ano an kapulsanan han pagpreserba hito ngan pag-usisa han aton kasaysayan? An mga ulo han pamilya ha kadaan nga Israel kinahanglan magsumat ha ira mga anak han mga balaud ngan urusahon nga mga buhat ni Jehova basi “ira ibutang an ira paglaom ha Dios.”—Sal. 78:1-7.

An pagbiling hin importante nga mga rekord han kasaysayan maiha na nga may bahin ha pagtuman han katuyoan ni Jehova. Pananglitan, han nagsari an mga kaaway nga paundangon an pag-ayad han templo ha Jerusalem, nagsugo an hadi nga bilngon an mga rekord han kasaysayan ha Akmeta, an kapital han Media. Didto naagian an usa nga dokumento tikang kan Hadi Ciro nga naghahatag hin awtorisasyon ha pagtukod utro han templo. (Esra 6:1-4, 12) Salit natukod utro an templo uyon ha kaburut-on han Dios. Hi Lukas nga nagsurat hin Ebanghelyo nag-usisa liwat ha mga rekord han kasaysayan, ngan iya ‘ginsusog gud an kahimtang han ngatanan nga bagay tikang ha siyahan.’—Luk. 1:1-4.

An Nagmamando nga Lawas interesado gud ha aton teokratiko nga kasaysayan. May kalabotan ha panginahanglan nga tipigan, himoan hin rekord, ngan ipasa sugad nga panurundon an kasaysayan han aton pag-alagad kan Jehova, usa nga membro han Nagmamando nga Lawas an nagsiring, “Basi hibaroan kon diin kita makadto, kinahanglan hibaroan naton kon diin kita tikang.” Tungod hito, ginporma an Writing Archives Department ha sentro nga opisina ha Brooklyn, New York, ngan ilarom ito han pagdumara han Writing Committee.

AN ATON “ALBUM HAN PAMILYA” NGAN “MGA PANURUNDON”

Ha paglabay han panahon, hinay-hinay nga nangangalimtan an naglabay nga mga hitabo, ngan bangin kadam-an ha aton an naghuhunahuna nga unta nagtipig kita hin mas kompleto nga rekord han kasaysayan han aton pamilya. Ha Writing Archives, maduruto nga ginbubuhat yana an pagpreserba ngan paghimo hin rekord han aton makapainteres ngan nagtitikadamu nga panurundon. An mga retrato nga gintitipigan hin maopay ha Archives mahimo tagdon nga bahin han aton “album han pamilya.” Upod liwat ha birilhon nga mga butang nga gintitipigan ha Archives an aton daan nga mga publikasyon, makapabantad nga mga istorya han kinabuhi, ngan presyoso nga mga hinumdoman. “Mga panurundon” ito nga nagsusumat ha aton mahitungod han aton teokratiko nga kasaysayan ngan nabulig ha aton nga sumarig nga magigin maopay an tidaraon han aton espirituwal nga pamilya.

Gin-aaghat ka namon nga usisahon an Writing Archives pinaagi han bag-o nga artikulo nga “Tikang ha Aton Daan nga mga Koleksyon,” nga mababasa ha panapanahon ha aradman nga edisyon han An Barantayan. Pananglitan, ha maabot nga gowa nagpaplano kami nga magpublikar hin artikulo nga may mga retrato basi batunon ini nga mga pakiana: Ano an Dawn Mobile? Hin-o an naggamit hito? Kakan-o ito gin-gamit, ngan ano an katuyoan hito?

Pariho hin album han pamilya, an mga koleksyon ha Archives nagsusumat hin damu nga impormasyon mahitungod ha aton ngan ha aton espirituwal nga kaapoy-apoyan—an pagtoo ngan kaisog han kabugtoan hadto nga panahon, an kalipay ngan mga pagsari ha pag-alagad ha aton mahigugmaon nga Amay ha langit, ngan an paggiya ngan nagpapadayon nga suporta han Dios ha iya katawohan. (Deut. 33:27) Nasarig kami nga bibendisyonan ni Jehova an ginbubuhat yana nga pangalimbasog ha pagpreserba han kasaysayan han aton organisasyon basi mas magkaurosa kita ngan maparig-on ha pagbuhat han iya kaburut-on.

[Kahon/Retrato ha pahina 31]

An Ginbubuhat han Writing Archives

Ha pagpangandam hin mga literatura, DVD, ngan iba pa nga publikasyon nga basado ha Biblia, an aton mga parasurat, paradebuho, parasaliksik, ngan iba pa nag-uusisa han mga rekord han kasaysayan. Salit an Writing Archives naghihimo hin praktikal nga mga paagi ngan naghihirot gud ha pagtirok ngan pagpreserba hin magkalain-lain nga makasaysayan nga mga butang tikang ha mga sanga nga opisina, departamento ha Bethel, kongregasyon, indibiduwal, sekular nga mga institusyon, ngan iba pa. Tagda kon ano an ira ginbubuhat:

Pagkolekta Ngan Pag-usisa: An naiiba nga mga butang padayon nga igindudugang ha koleksyon han Archives. Damu hito an mahigugmaon nga igindonar o iginpahuram han mga indibiduwal nga an mga pamilya mga dekada na nga nag-aalagad hin matinumanon kan Jehova. An pag-usisa ngan pagtanding hito nga mga koleksyon nabulig ha aton nga mas masabtan an aton kasaysayan ngan an mga nabuhi hito nga panahon.

Paghimo hin Rekord han mga Koleksyon: An koleksyon han Writing Archives may-ada na yinukot nga butang nga an iba sobra na usa ka gatos ka tuig. Iba-iba ito nga klase ngan kinahanglan himoan hin rekord an tagsa hito basi madali mabilngan ngan magamit ha tidaraon.

Pag-ayad Ngan Pagpreserba: An daan na hinduro nga mga libro ngan iba pa nga butang gin-aayad ngan ginpipreserba ha paagi nga ginbubuhat han mga eksperto. An mga dokumento, retrato, artikulo nga gin-gunting ha mga dyaryo, salida, ngan recording ginhihimoan hin electronic file, salit mabibilngan ito ha kompyuter ngan diri na lalabtan an orihinal nga mga dokumento o iba pa nga butang nga importante ha kasaysayan.

Pagtipig Ngan Pagbiling: An daan nga mga koleksyon gintitipigan hin maopay basi diri mawara ngan diri madaot tungod han kapawa ngan kahulos. Ginhihimo yana an usa nga database ha kompyuter basi makabulig ha pagsaliksik ngan pagbiling hinin presyoso nga mga butang ha aton kasaysayan.

[Mga retrato ha pahina 32]

1. Poster han “Photo-Drama of Creation.” 2. Lista han mga suskripsyon. 3. Sound car. 4. Kobre han Abril 15, 1912 nga Watch Tower. 5. Rekord han kapriso ni J. F. Rutherford. 6. Mikropono han WBBR. 7. Ponograpo. 8. Bag nga burutangan hin mga libro. 9. Personal nga mga nota. 10. Telegrama kan J. F. Rutherford.