Posible an Kalipay ha Pamilya nga Iba-iba an Relihiyon

“Ano an hibaro nimo . . . kon maluluwas mo ba an imo asawa?”—1 KOR. 7:16.

ANO AN IMO BATON HINI NGA MGA PAKIANA?

Ano an mahihimo han mga Kristiano basi magin mamurayawon an ira pamilya bisan kon iba-iba an ira relihiyon?

Paonan-o mabubuligan han usa nga Kristiano an iya kapamilya nga diri Saksi nga karawaton an kamatuoran?

Ano an aton mahihimo basi buligan an mga igkasi-tumuroo nga an kapamilya diri Saksi?

1. Ano an mahimo magin epekto ha pamilya kon an usa kumarawat han mensahe han Ginhadian?

MAKAUSA han ginsugo ni Jesus an iya mga apostol nga magsangyaw, hiya nagsiring: “Ha paglakat niyo, pagwali nga masiring: An ginhadian han langit tikahirani na.” (Mat. 10:1, 7) Ini nga maopay nga sumat magriresulta hin kamurayawan ngan kalipay ha mga nakarawat hito. Kondi ginpahamangnoan ni Jesus an iya mga apostol nga damu an makontra ha ira pagsangyaw. (Mat. 10:16-23) An pagkontra labi na nga makuri kon tikang ito ha mga kapamilya.—Basaha an Mateo 10:34-36.

2. Kay ano nga mahimo kita magin malipayon bisan kon an aton kapamilya diri Saksi?

² Karuyag sidngon ba nga diri kita magigin malipayon kon an aton kapamilya diri Saksi? Diri. Bisan kon usahay duro an pagkontra han pamilya, diri pirme sugad hito an kahimtang. Ngan bangin diri liwat ito permanente. Agsob nga nadepende ito ha aton reaksyon ha pagkontra o kawaray interes. Dugang pa, ginbibendisyonan ni Jehova an mga maunungon ha iya, ginbubuligan hira nga magin malipayon bisan kon diri maopay an kahimtang. An mga Kristiano mahimo magin mas malipayon kon hira (1) mangalimbasog nga magin mamurayawon an panimalay ngan (2) sinsero nga mabulig ha diri Saksi nga kapamilya nga karawaton an kamatuoran.

PANGALIMBASOG NGA MAGIN MAMURAYAWON AN PAMILYA

3. Kay ano nga an usa nga Kristiano sadang mangalimbasog gud nga magin mamurayawon an pamilya?

³ Daku an posibilidad nga karawaton han pamilya an kamatuoran kon may kamurayawan ha panimalay. (Basaha an Jakobo 3:18.) Bisan kon an pamilya diri pa nagkakaurosa ha tinuod nga pagsingba, an usa nga Kristiano sadang mangalimbasog gud nga magin mamurayawon an pamilya. Paonan-o ito mahihimo?

4. Paonan-o matitipigan han mga Kristiano an ira kamurayawan han hunahuna?

⁴ Sugad nga mga Kristiano, kinahanglan tipigan naton an kamurayawan han hunahuna. Basi mahimo ito, kinahanglan mag-ampo kita nga magkaada han diri matupngan nga “kamurayawan han Dios.” (Fil. 4:6, 7) An kalipay ngan kamurayawan resulta han pag-aram mahitungod kan Jehova ngan pag-aplikar han mga prinsipyo ha Biblia. (Isa. 54:13) Importante liwat an pakigbahin ha mga katirok ngan kadasig ha ministeryo basi magin mamurayawon ngan malipayon kita. An mga Kristiano nga an kapamilya diri Saksi kasagaran na nga nakakahimo hin paagi nga makigbahin hinin importante nga mga buruhaton. Pananglitan, tagda hi Enza,a nga an bana nakontra hinduro. Antes hiya magsangyaw, iya anay gin-aasikaso an iya mga buruhaton ha balay. Hiya nagsiring, “Hura nga ginbibendisyonan ako ni Jehova hin mag-opay nga resulta ha kada panahon nga nangangalimbasog ako nga isangyaw an maopay nga sumat.” Ito nga mga bendisyon naghahatag ha iya hin kamurayawan, katagbaw, ngan kalipay.

5. Ano an bangin makuri para ha mga Kristiano nga diri Saksi an kapamilya, ngan diin hira makakabiling hin bulig?

⁵ Kinahanglan mangalimbasog gud kita nga magin murayaw an aton pakig-upod ha aton kapamilya nga diri Saksi. Bangin makuri ito kay usahay an ira karuyag ipabuhat ha aton diri uyon ha mga prinsipyo ha Biblia. An iba han aton diri Saksi nga kapamilya bangin masina kon maunungon nga ginsusunod naton an Biblia, kondi an pagin marig-on ha aton gintotoohan mahimo magresulta hin kamurayawan ha kamaihaan. Syempre, kon diri kita nakooperar bisan kon waray prinsipyo ha Biblia nga natatalapas, mahimo ito magresulta hin diri pagsinabtanay nga puydi man unta malikyan. (Basaha an Proberbios 16:7.) Kon may problema, importante nga mamiling hin Kasuratanhon nga sagdon ha mga publikasyon han matinumanon ngan maaramon nga uripon ngan ha mga tigurang.—Prob. 11:14.

6, 7. (a) Kay ano nga an iba nakontra ha ira kapamilya nga nag-aaram han Biblia ha mga Saksi ni Jehova? (b) Ano an sadang magin reaksyon han usa nga nag-aaram han Biblia o Saksi ha pagkontra han pamilya?

⁶ Mahimo magin mamurayawon an pamilya kon sumarig kita kan Jehova ngan mangalimbasog nga sabton an inaabat han aton diri Saksi nga kapamilya. (Prob. 16:20; 24:3) Mahihimo ini bisan han mga bag-o pa la nga nag-aaram han Biblia. An iba nga bana o asawa nga diri Saksi bangin diri kumontra nga mag-aram han Biblia an ira padis. Bangin sumiring pa ngani hira nga maopay ito ha ira pamilya. Kondi an iba bangin masina hinduro. Hi Ester, nga Saksi na yana, nagsiring nga nasina gud hiya han an iya bana nag-aram han Biblia ha mga Saksi ni Jehova. “Diri ko ngani ginlalabog an iya mga literatura, ginsusunog ko ito,” siring niya. Hi Howard, nga ha siyahan nadiri nga an iya asawa nag-aaram han Biblia, nagsiring: “Damu nga bana an nahahadlok nga an ira asawa ginlilimbongan basi umapi ha usa nga sekta. An usa nga bana bangin diri maaram han iya hihimoon ha iya ginhuhunahuna nga peligro, salit bangin kumontra hiya.”

⁷ An usa nga nag-aaram han Biblia nga ginkukontra han iya padis kinahanglan buligan nga makasabot nga diri hiya sadang umundang pag-aram han Biblia. Kasagaran na nga magigin maopay an sitwasyon kon magigin malumo hiya ngan matinalahuron ha iya padis. (1 Ped. 3:15) Hi Howard nagsiring, “Mapasalamaton gud ako nga an akon asawa nagpabilin nga kalmado ngan waray masina!” An iya asawa nagsiring: “Ginpirit ako ni Howard nga umundang pag-aram han Biblia kay siring niya nga ginlilimbongan la ako. Imbes nga makiglantugi, siring ko nga bangin husto hiya, pero ginsidngan ko liwat hiya nga ha tinuod la, diri ko nakikita nga ginlilimbongan ako. Salit ginhangyo ko hiya nga basahon an libro nga akon gin-aadman. Ginbasa niya ito ngan diri hiya nakakariwa ha iya nabasa. Daku gud an epekto hito ha iya.” Maopay hinumdoman nga an diri Saksi nga mga padis bangin umabat nga nag-uusahan o mabaraka nga namimeligro na an ira pag-asawa kon an ira padis nabaya basi makigbahin ha espirituwal nga mga buruhaton. Pero an mahigugmaon nga pagpasarig ha ira makakabulig gud basi diri hira umabat hin sugad hito.

BULIGI HIRA NGA KARAWATON AN KAMATUORAN

8. Ano an iginsagdon ni Pablo ha mga may padis nga diri Kristiano?

⁸ Hi apostol Pablo nagsagdon ha mga Kristiano nga diri bulagan an ira padis tungod la kay diri hiya tumuroo.b (Basaha an 1 Korinto 7:12-16.) An pirme paghunahuna nga an diri tumuroo nga padis mahimo kumarawat han kamatuoran makakabulig ha usa nga Kristiano nga magpabilin nga malipayon. Kondi ha iya pangalimbasog nga buligan an iya padis nga masabtan an kamatuoran, may-ada hiya diri sadang buhaton, sugad han iginpapakita han masunod nga mga eksperyensya.

9. Ano an diri sadang buhaton han usa nga Kristiano kon nagsasaysay han kamatuoran ha iya kapamilya nga diri Saksi?

⁹ Nalipay hinduro hi Jason han siyahan nga hinbaroan niya an kamatuoran. Hiya nagsiring, “Karuyag ko ito isumat ha ngatanan!” Kon nasasantop han usa nga nag-aaram han Biblia nga an iya hinbabaroan amo an kamatuoran, bangin malipay hiya hinduro ngan haros ito na la pirme an iya gin-iinistorya. Bangin maglaom hiya nga kakarawaton dayon han iya diri tumuroo nga kapamilya an kamatuoran, kondi bangin diri hira umuyon ha iya. Ano an reaksyon han asawa ni Jason? “Ginsumhan ako pagpinamati,” siring niya. Usa nga babaye nga kinarawat han kamatuoran 18 ka tuig na katapos magin Saksi an iya bana an nagsiring, “Kinahanglan hinay-hinay la ito nga itutdo ha akon.” Kon may-ada ka yana gindudumarahan hin pag-aram ha Biblia nga an padis diri interesado ha kamatuoran, kay ano nga diri hiya buligan nga magpraktis kon paonan-o isasaysay ha iya padis an kamatuoran ha mataktika nga paagi? Hi Moises nagsiring: “An akon pagturon-an maturo sugad hin uran; an akon yakan matunaw sugad han tun-og, sugad han taligsik ngada han huboy nga banwa.” (Deut. 32:2) An pipira la nga pulong mahitungod han kamatuoran nga ginyayakan ha husto nga paagi ngan husto nga panahon kasagaran na nga mas epektibo kay han damu hinduro nga pulong.

10-12. (a) Ano an iginsagdon ni apostol Pedro ha mga may padis nga diri Kristiano? (b) Paonan-o igin-aplikar han usa nga nag-aaram han Biblia an sagdon ha 1 Pedro 3:1, 2?

¹⁰ Hi apostol Pedro gin-giyahan han Dios nga magsagdon ha Kristiano nga mga asawa nga an bana diri tumuroo. Hiya nagsiring: “Magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.” (1 Ped. 3:1, 2) Bangin mabuligan han asawa an iya bana nga kumarawat han kamatuoran kon magpapasakop hiya ngan magpapakita hin hilarom nga pagtahod bisan kon maraot an pagtratar ha iya han iya bana. Sugad man, an Kristiano nga bana sadang magpakita hin diosnon nga paggawi ngan magin mahigugmaon nga ulo han pamilya bisan nakontra ha iya an iya asawa.—1 Ped. 3:7-9.

¹¹ Damu nga Kristiano yana an nagpahimulos ha pag-aplikar han sagdon ni Pedro. Tagda pananglitan hi Selma. Han nagtikang hiya pag-aram han Biblia ha mga Saksi ni Jehova, waray ito maruyagi han iya bana nga hi Steve. Siring ni Steve nga nasina hiya, nangabugho, ngan nahadlok. Hi Selma nagsiring: “Bisan antes pa ako mahibaro han kamatuoran, makuri na pakibagayan hi Steve ngan kinahanglan maghirot gud ako ha akon ginyayakan ngan ginbubuhat. Madali hiya masina. Han nagtikang ako pag-aram han Biblia, mas nagdugang pa gud ito.” Ano an nakabulig nga mag-oroopay an kahimtang?

¹² Nahinumdoman ni Selma an usa nga leksyon nga iya hinbaroan ha sister nga nagdumara ha iya hin pag-aram. “Usa ka adlaw,” siring ni Selma, “diri ko karuyag mag-aram han Biblia. Han gab-i antes hito, ginsuntok ako ni Steve han nangatadongan ako ha iya, ngan masurub-on ako ngan nalolooy ha akon kalugaringon. Han iginsumat ko ha bugto an nahitabo ngan an akon inaabat, ginhangyo niya ako nga basahon an 1 Korinto 13:4-7. Katapos ko ito mabasa, nangatadongan ako, ‘Diri gud ginbubuhat ni Steve ha akon an bisan hain hini.’ Kondi iba an ginpasantop ha akon han bugto pinaagi ha pagpakiana, ‘Pira hinin mahigugmaon nga buhat an imo iginpapakita ha imo bana?’ Binaton ako, ‘Waray, kay makuri gud hiya pakibagayan.’ Malumo nga nagsiring an bugto, ‘Selma, hin-o ba an nangangalimbasog nga magin Kristiano? Ikaw o hi Steve?’ Nasantop ko nga kinahanglan ko bag-uhon an akon panhunahuna, salit nag-ampo ako kan Jehova nga buligan ako nga magin mas mahigugmaon kan Steve. Hinay-hinay nga nagbag-o an sitwasyon.” Katapos hin 17 ka tuig, ginkarawat ni Steve an kamatuoran.

KON PAONAN-O MAKAKABULIG AN IBA

13, 14. Paonan-o an iba ha kongregasyon makakabulig ha kabugtoan nga an kapamilya diri Saksi?

¹³ Sugad hin mahinay nga mga turo hin uran nga nahuphop ha tuna ngan nabulig ha mga tanom nga tumubo, damu ha kongregasyon an nakakabulig nga magin malipayon an kabugtoan nga may kapamilya nga diri Saksi. “An gugma han kabugtoan an nakabulig ha akon nga magin marig-on ha kamatuoran,” siring ni Elvina nga taga-Brazil.

¹⁴ An pagkabuotan ngan maopay nga pagtagad nga iginpapakita han kabugtoan ha kongregasyon ha usa nga diri-Saksi nga kapamilya mahimo gud makabantad ha iya. Usa nga bana ha Nigeria nga kinarawat han kamatuoran 13 ka tuig tikang han nagin Saksi an iya asawa an nagsiring: “Samtang nagbibiyahe ako upod han usa nga Saksi, naruba an iya sarakyan. Namiling hiya hin mga Saksi ha kahirani nga baryo, ngan ira kami ginpahuron hito nga gab-i. Gin-asikaso kami nira nga baga hin magkiriglala kami tikang ha kabata. Dida hito gin-abat ko an Kristiano nga gugma nga pirme gin-iistorya han akon asawa.” Ha England, usa nga asawa nga kinarawat han kamatuoran 18 ka tuig tikang han nagin Saksi an iya bana an nagsiring: “An mga Saksi nag-iimbitar ha amon nga mag-asawa ha mga pangaon. Komportable gud ako ha ira.”c Usa nga bana nga taga-England liwat nga ha urhi nagin Saksi an nagsiring: “An kabugtoan nabisita ha amon, o gin-iimbitar kami ha ira, ngan naobserbaran ko nga mahigugmaon hira. Nakita ko gud ini labi na han nahospital ako ngan damu an binisita ha akon.” Puydi ka ba mamiling hin mga paagi ha pagpakita hin sugad hito nga pagtagad ha diri Saksi nga kapamilya han iba nga kabugtoan?

15, 16. Ano an makakabulig ha usa nga Kristiano nga magpabilin nga malipayon bisan kon diri karawaton han iya kapamilya an kamatuoran?

¹⁵ Syempre, bisan kon damu ka tuig na nga nagpapakita kita hin maopay nga paggawi ngan nagsasangyaw ha mataktika nga paagi, diri ngatanan nga aton kapamilya makarawat han kamatuoran. An iba diri gud magigin interesado o padayon nga makontra. (Mat. 10:35-37) Pero kon magpapakita kita hin diosnon nga mga kalidad, mahimo ito magkaada maopay gud nga resulta. Usa nga bana nga hadto diri Saksi an nagsiring: “Kon an Kristiano nga padis nagpapakita hiton makaruruyag nga mga kalidad, diri ka maaram kon ano an aada ha hunahuna ngan kasingkasing han padis nga diri tumuroo. Salit ayaw gud kawad-i hin paglaom ha imo diri tumuroo nga padis.”

¹⁶ An usa nga Kristiano mahimo la gihap magin malipayon bisan kon diri karawaton han iya kapamilya an kamatuoran. Usa nga bugto nga babaye an 21 ka tuig nga nangalimbasog nga buligan an iya bana nga karawaton an kamatuoran, pero waray hiya maglampos. Hiya nagsiring: “Nagpapabilin ako nga malipayon pinaagi ha pangalimbasog nga mapalipay hi Jehova, pagpabilin nga maunungon ha iya, ngan pangalimbasog nga maparig-on an akon espirituwalidad. An pagin okupado ha espirituwal nga mga buruhaton sugad han personal nga pag-aram, pagtambong ha mga katirok, pagsangyaw, ngan pagbulig ha akon mga kakongregasyon nakakabulig ha akon nga magin mas duok kan Jehova ngan nagpapanalipod ha akon kasingkasing.”—Prob. 4:23.

AYAW KAWAD-I HIN PAGLAOM!

17, 18. Ano an makakabulig ha usa nga Kristiano nga diri mawad-an hin paglaom bisan kon an iya kapamilya diri Saksi?

¹⁷ Kon usa ka nga matinumanon nga Kristiano nga an kapamilya diri Saksi, ayaw kawad-i hin paglaom. Hinumdumi nga “hi Jehova diri mabaya han iya katawohan tungod la han iya harangdon nga ngaran.” (1 Sam. 12:22) Hiya maupod ha imo kon magpapabilin ka nga duok ha iya. (Basaha an 2 Kronikas 15:2.) Salit ‘maglipay kan Jehova.’ Oo, ‘itubyan kan Jehova an imo agian; sarig liwat ha iya.’ (Sal. 37:4, 5) ‘Magpadayon gud ha pag-ampo,’ ngan sarig nga an aton mahigugmaon nga langitnon nga Amay makakabulig ha imo nga mailob an ngatanan nga klase hin kakurian.—Roma 12:12.

¹⁸ Pag-ampo kan Jehova nga buligan ka han iya baraan nga espiritu nga magkaada kamurayawan ha pamilya. (Heb. 12:14) Kon bubuhaton mo ini, posible nga ha kamaihaan mababantad an kasingkasing han imo kapamilya nga diri Saksi. Magigin malipayon ka ngan magigin murayaw an imo kasingkasing ngan hunahuna samtang imo ‘ginbubuhat an ngatanan ha himaya han Dios.’ (1 Kor. 10:31) Makakasarig ka liwat han gugma ngan bulig han kabugtoan ha Kristiano nga kongregasyon.

[Mga footnote]

[Retrato ha pahina 28]

Pilia an husto nga panahon ha pagsaysay han imo gintotoohan

[Retrato ha pahina 29]

Ipakita an maopay nga pagtagad ha padis nga diri tumuroo