‘Nakuha Ko an Atensyon han mga Tawo’

Han an bug-os-panahon nga magwarali nga hi Charlotte White inabot ha Louisville, Kentucky, U.S.A. nga may de-kaliding nga maleta, ginkinita gud hiya han mga tawo.

TUIG adto han 1908, ngan ginkinita gud hi Sister White han mga tawo tungod han iya dara nga bag-o nga naimbento—an Dawn-Mobile. “Gin-uroistoryahan ito han mga tawo,” siring niya, “ngan nakuha ko an ira atensyon.”

Nasantop han mga Estudyante han Biblia, an tawag hadto ha mga Saksi ni Jehova, nga kinahanglan isangyaw an presyoso nga mga kamatuoran nga ira hinbaroan ha ira maduruto nga pag-aram han Kasuratan. Damu an nagkaada kahibaro ha Biblia tungod han serye han mga libro nga Millennial Dawn (ha urhi gintawag liwat nga Studies in the Scriptures). An mga Kristiano nga andam magbiyahe ngan makakahimo hito kinadto ha higrayo nga lugar—ha mga bungto, barangay, ngan kaumhan—basi itanyag ini nga mga libro nga gintawag nga “Bulig Para ha mga Estudyante han Biblia” ha iba nga naruruyag gud pagbasa.

Han 1908, gintatanyag nira Sister White ngan han iba nga madasigon nga parasangyaw han Ginhadian an unom nga tomo hini nga libro ha kantidad nga $1.65 (U.S.). Imbes nga ihatag dayon an mga libro ha tagbalay, nagpapaorder hira ngan gindudul-ong ito, kasagaran na ha adlaw han sweldo, ngan nagkukolekta hin gutiay nga kantidad nga igo la ha gastos han pag-imprinta hito. Usa nga lalaki nga nakontra an nagreklamo nga gutiay gud la an igindudonar han mga tawo kon nakuha hira han mga libro!

Nahinumdoman ni Malinda Keefer nga kada semana nakakapaorder hiya hin 200 tubtob 300 nga libro. Kondi tungod kay damu hinduro an naruruyag ha Millennial Dawn, nagkaada hin problema. An ikaunom nga tomo la 740 ka pahina! “An 50 nga libro 18 ka kilo,” siring han The Watch Tower, salit “makuri gud” an pagdul-ong hito, labi na para ha mga sister.

Basi masulbad ito nga problema, hi Brother James Cole nag-imbento hin napipilo nga burutangan nga may duha nga kaliding ngan puydi taoran hin maleta pinaagi hin mga tornilyo. Diri na kinahanglan magdara hin magbug-at nga karton nga puno hin libro, salit an nag-imbento mismo nagsiring: “Diri mababari an akon mga sugbong.” Iya iginpresentar ito nga iya naimbento ha 1908 nga kombensyon han mga Estudyante han Biblia ha Cincinnati, Ohio, ngan nalipay an mga tinambong. An tagsa nga durho han nabalabag nga puthaw may butones nga may nakaukit nga Dawn-Mobile, kay kasagaran na nga an sulod hito mga tomo han Millennial Dawn. Pinaagi han gutiay nga pagpraktis, masayon na la an pagdara hin maleta nga puno hin libro gamit an usa la nga kamot. Puydi ito pahataason o pahamuboon, ngan puydi ito pakalidingon ha diri sementado nga kalsada. Katapos han bug-os nga adlaw ha ministeryo, an mga kaliding mahimo piluon ha may ligid han maleta basi masayon mabitbit tipauli, magbaktas man o sumakay.

An mga sister nga aada ha bug-os-panahon nga pag-alagad puydi magkaada libre nga Dawn-Mobile. An iba makakakuha hito ha kantidad nga $2.50 (U.S.). Hi Sister Keefer nga aada ha retrato eksperto gud paggamit han Dawn Mobile salit kaya niya ito guyuron ha usa la nga kamot ngan an iya luyo nga kamot may dara nga lain nga bag nga may mga libro. Tungod kay nakaagi hiya hin damu nga interesado ha usa nga bungto nga may minahan ha Pennsylvania, U.S.A., kasagaran na nga tulo o upat ka beses hiya nga nagbabalik-balik pag-agi ha usa nga tulay ha adlaw nga gindudul-ong niya an mga libro.

Ha ikatarapos han dekada 1980, naimbento han usa nga piloto an bag nga may kaliding nga komon na nga nakikita yana ha mga airport ngan ha mga kalsada han syudad. Kondi mga usa ka gatos ka tuig na an naglabay, an madasigon nga mga Estudyante han Biblia posible gud nga nalipay nga ginkikinita hira han mga tawo samtang ira gin-guguyod an Dawn-Mobile ngadto nganhi ha pagpasarang hin birilhon nga mga liso han kamatuoran ha Biblia.

[Blurb ha pahina 32]

Hi Sister Keefer kasagaran na nga tulo o upat ka beses nga nagbabalik-balik pag-agi ha usa nga tulay ha adlaw nga gindudul-ong niya an mga libro

[Blurb ha pahina 32]

Ito an solusyon ha problema han pagdul-ong han mga libro nga Millennial Dawn