Magkalipay Kita ha Aton Paglaom
“[May-ada kita] paglaom han kinabuhi nga waray kataposan, nga an Dios, nga diri makakagbuwa, nagsaad han waray pa an mga katuigan nga waray kataposan.”—TITO 1:2.
SUGAD NGA REPASO
Kay ano nga masisiring naton nga may kalipay ha langit kon an usa nga dinihogan nagpapabilin nga matinumanon tubtob ha kamatayon?
Ha ano nga paagi an katumanan han paglaom han iba nga mga karnero may kalabotan ha paglaom han mga dinihogan?
Kon karuyag naton nga matuman an aton paglaom, ano nga mga buhat han ‘putli nga pagkinabuhi’ ngan “pagtahod ha Dios” an sadang naton ipakita?
1. Paonan-o an paglaom nga iginhahatag ni Jehova ha aton makakabulig ha aton nga makailob?
HI Jehova an “Dios han paglaom,” siring ni apostol Pablo. Nagsiring liwat hiya nga hi Jehova mahimo ‘magpuno ha aton han bug-os nga kalipay ngan kamurayaw ha pagtoo, basi magin hura kita ha paglaom ha gahum han espiritu.’ (Roma 15:13) Kon matin-aw ha aton an aton paglaom, maiilob naton an bisan ano nga kahimtang ngan magpapabilin kita nga malipayon ngan murayaw. Dinihogan man kita o kaapi han iba nga mga karnero, an aton paglaom magigin sugad hin ‘angkla han aton kinabuhi, marig-on ngan kasasarigan.’ (Heb. 6:18, 19, Maopay nga Sumat) Ini nga paglaom makakabulig ha aton durante han sugad-bagyo nga mga kahimtang, basi diri kita mahianod han pagruhaduha o kakulang hin pagtoo.—Basaha an Hebreo 2:1; 6:11.
2. Ano an duha nga paglaom para ha mga Kristiano yana, ngan kay ano nga an ‘iba nga mga karnero’ interesado ha paglaom han mga dinihogan?
2 An tagsa nga Kristiano yana may-ada paglaom. An nanhibilin han ‘gutiay nga panon’ han dinihogan nga mga Kristiano may paglaom nga magkaada imortal nga kinabuhi ha langit sugad nga mga hadi ngan saserdote upod ni Kristo ha iya Ginhadian. (Luk. 12:32; Pah. 5:9, 10) An mas damu gud nga ‘iba nga mga karnero’ may paglaom nga mabuhi ha waray kataposan ha paraiso nga tuna sugad nga mga sakop han Mesianiko nga Ginhadian. (Pah. 7:9, 10; Juan 10:16) Diri gud sadang hingalimtan han iba nga mga karnero nga an ira kaluwasan nadepende ha ira aktibo nga pagsuporta ha dinihogan nga “kabugtoan” ni Kristo nga aanhi pa ha tuna. (Mat. 25:34-40) Kakarawaton han mga dinihogan an ira balos, pero sigurado liwat nga matutuman an paglaom han iba nga mga karnero. (Basaha an Hebreo 11:39, 40.) Siyahan, aton usisahon an paglaom nga iginhatag ha mga dinihogan.
AN “BUHI NGA PAGLAOM” HAN DINIHOGAN NGA MGA KRISTIANO
3, 4. Paonan-o an dinihogan nga mga Kristiano ‘igin-aanak’ utro “ngadto ha buhi nga paglaom,” ngan ano ito nga paglaom?
3 Hi apostol Pedro may duha nga surat para ha dinihogan nga mga Kristiano, nga iya gintawag nga “mga pinili.” (1 Ped. 1:1) Naghatag hiya hin mga detalye han makaruruyag nga paglaom han gutiay nga panon. Ha siyahan nga surat ni Pedro, hiya nagsiring: “Pagdayawon an Dios ngan Amay han aton Ginoo Jesu-Kristo, nga tungod ha iya daku nga kalooy ipinanganak liwat kita ngadto ha buhi nga paglaom tungod han pagkabanhaw ni Jesu-Kristo tikang ha mga minatay, ha usa nga panurundon nga diri madinunuton, ngan waray buring, ngan nga diri magkawawara, nga igin-aandam ha iyo didto ha langit, nga ginbantayan han gahum han Dios, pinaagi ha pagtoo, ngadto ha kaluwasan nga andam pagpahayag ha urhi nga panahon. Tungod hini nalilipay gud kamo.”—1 Ped. 1:3-6.
4 An limitado nga kadamu han mga Kristiano nga ginpili ni Jehova nga makaupod ni Kristo ha Ginhadian ha langit ‘igin-aanak’ utro. Ginagamit ni Jehova an iya baraan nga espiritu basi ampunon hira sugad nga iya mga anak ngan dihogan hira basi magin mga hadi ngan saserdote upod ni Kristo. (Pah. 20:6) Hi apostol Pedro nagsiring nga tungod hini nga ‘pag-anaka’ utro nagin posible ha ira nga magkaada “buhi nga paglaom,” nga iya gintawag nga ‘usa nga panurundon nga diri madinunuton ngan waray buring ngan diri mawawara’ nga igin-andam ha ira “didto ha langit.” Diri urusahon nga an mga dinihogan “nalilipay gud” ha ira buhi nga paglaom! Kondi matutuman la ito kon magpapabilin hira nga matinumanon.
5, 6. Kay ano nga an dinihogan nga mga Kristiano kinahanglan ‘manalinguha gud nga maparig-on an pagtawaga ha ira’ ha langit?
5 Ha ikaduha nga surat ni Pedro, iya gin-aghat an dinihogan nga mga Kristiano nga ‘panalinguhaon gud nga maparig-on an pagtawaga ngan pagpilia ha ira.’ (2 Ped. 1:10) Kinahanglan pirme nira ipakita an Kristiano nga mga kalidad sugad han pagtoo, diosnon nga debosyon, minagburugto nga pagbati, ngan gugma. Hi Pedro nagsiring: “Kon ini nga mga butang iyo ngan nahuhura, ginhihimo kamo nira nga diri mga hubya ngan diri mga waray bunga.”—Basaha an 2 Pedro 1:5-8.
6 Hi Kristo nagsiring ha dinihogan nga mga tigurang ha siyahan-siglo nga kongregasyon ha Piladelpia ha Asia Minor: “Kay ginbantayan mo an pulong han akon pagpailob, pagbabantayan ko man liwat ikaw ha oras ha pagsulay, an oras nga tiarabot ha bug-os nga kalibotan, ha pagproyba ha mga nag-uukoy ha tuna. Makanhi ako ha kadagmitan: kapti hin marig-on an aada ha imo, nga waray bisan hin-o nga kumuha han imo pudong-pudong.” (Pah. 3:10, 11) Kon an usa nga dinihogan nga Kristiano diri magpapabilin nga matinumanon, diri niya makakarawat an “pudong-pudong han himaya nga diri malalaya” nga iginsaad ha mga pinili nga magpapabilin nga matinumanon tubtob ha kamatayon.—1 Ped. 5:4; Pah. 2:10.
PAGSULOD NGADTO HA GINHADIAN
7. Ano nga makalilipay nga paglaom an gin-unabi ni Judas ha iya surat?
7 Han mga 65 K.P., hi Judas nga bugto ni Jesus ha nanay nagsurat ha iya igkasi-dinihogan nga mga Kristiano. Hiya nagsiring nga hira an “mga gintawag.” (Jud. 1; itanding an Hebreo 3:1.) Karuyag unta niya magsurat ha ira mahitungod han paglaom han kaluwasan para ha ngatanan nga dinihogan nga Kristiano. (Jud. 3) Pero may iba pa nga importante nga butang nga kinahanglan niya isurat. Bisan pa hito, ha kataposan han iya halipot nga surat, gin-unabi niya an makalilipay nga paglaom han dinihogan nga mga Kristiano, nasiring: “Niyan ngadto ha sadang makabantay ha iyo ha paghipakdol, ngan makapaatubang ha iyo han iya himaya nga waray buring ngan may daku nga kalipayan. Ha usa la nga Dios nga aton Manluluwas, pinaagi kan Jesu-Kristo nga aton Ginoo, magin an himaya, paghadi, kagamhanan, ngan pagburut-an, hadto pa ha ngatanan nga panahon, ngan niyan, ngan ha ngatanan nga mga katuigan.”—Jud. 24, 25.
8. Uyon ha Judas 24, ano an nagpapakita nga may kalipay ha langit kon an usa nga dinihogan nagpapabilin nga matinumanon tubtob ha kamatayon?
8 Sigurado nga karuyag han tagsa nga matinumanon nga dinihogan nga Kristiano nga mapanalipdan ha ‘kahipakdol,’ nga magriresulta ha iya kabungkagan. An mga dinihogan may paglaom nga banhawon ni Jesu-Kristo tikang ha mga patay ngadto ha pagin hingpit nga espiritu nga mga linarang. Hito nga paagi makakaatubang na hira ha presensya han Dios. Kon an usa nga dinihogan mamatay nga matinumanon, sigurado nga hiya ‘babanhawon ha lawas nga espirituhanon,’ babanhawon nga “diri madinunuton . . . , ha himaya.” (1 Kor. 15:42-44) Kon duro an “kalipay ha langit ha usa nga makasasala, nga nagbabasol,” handurawa an kalipay ha langit kon an usa han kabugtoan ni Kristo nagpapabilin nga matinumanon tubtob ha kamatayon. (Luk. 15:7) Hi Jehova ngan an magtinumanon nga espiritu nga linarang magkakalipay upod han usa nga dinihogan nga nakarawat han iya balos nga ‘may daku nga kalipay.’—Basaha an 1 Juan 3:2.
9. Ha ano nga paagi “ighahatag gud” ha magtinumanon nga dinihogan an pagsulod ngadto ha Ginhadian, ngan ano an epekto hini nga paglaom ha mga dinihogan nga aanhi pa ha tuna?
9 Pariho kan Judas, hi Pedro nagsurat ha dinihogan nga mga Kristiano nga kon magpapabilin hira nga matinumanon, “ighahatag gud ha [ira] an bug-os nga pagsulod ngadto ha ginhadian nga waray kataposan han aton Ginoo ngan Manluluwas nga hi Jesu-Kristo.” (2 Ped. 1:10, 11) Han nagsiring hi Pedro nga “ighahatag gud” ha ira an pagsulod ngadto ha Ginhadian, bangin an karuyag sidngon niya amo an mahimayaon gud nga pagsulod nira ha langit. Bangin gintutudlok liwat niya an damu nga bendisyon nga ira makakarawat ha langit. An mga dinihogan magigin malipayon gud ngan mapasalamaton kon ira gindudumdom an ira iginpakita nga pagkamatinumanon. Ini nga paglaom nagpaparig-on ha dinihogan nga mga Kristiano nga magpabilin nga matinumanon samtang aanhi pa hira ha tuna.—1 Ped. 1:13.
AN PAGLAOM HAN IBA NGA MGA KARNERO
10, 11. (a) Ano an paglaom han iba nga mga karnero? (b) Ha ano nga paagi an katumanan han tunan-on nga paglaom may kalabotan kan Kristo ngan ha “pagpahayag han mga anak han Dios”?
10 Nagsurat hi apostol Pablo ha dinihogan nga “mga anak han Dios” mahitungod han ira mahimayaon nga paglaom nga magin “mga manurunod upod” ni Kristo. Katapos iya gin-unabi an makalilipay nga paglaom nga iginhahatag ni Jehova ha diri maihap nga iba nga mga karnero: “An buhi nga paglaom han [tawhanon nga] mga binuhat naghuhulat ngada ha pagpahayag han mga anak han Dios [an mga dinihogan]. Kay an mga binuhat nasakop ha pagpakadaku, diri tungod ha iya kalugaringon nga buot, kondi tungod hadton nagsakop ha ira, ha paglaom. Nga sugad man an mga binuhat ngahaw magkakaluwas tikang ha pagkauripon han pagkamadinunuton ngadto ha kaluwasan han paghimaya han mga anak han Dios.”—Roma 8:14-21.
11 Gintagan ni Jehova hin paglaom an katawohan han nagsaad hiya hin katalwasan tikang ha “daan nga halas,” hi Satanas nga Yawa, pinaagi han iginsaad nga “katulinan” o binhi. (Pah. 12:9; Gen. 3:15) An siyahan nga bahin hito nga binhi amo hi Jesu-Kristo. (Gal. 3:16) Pinaagi han kamatayon ngan pagkabanhaw ni Jesus, nagin posible ha katawohan nga magkaada paglaom nga makatalwas ha pagin uripon han sala ngan kamatayon. An katumanan hini nga paglaom may kalabotan ha “pagpahayag han mga anak han Dios.” An mga dinihogan nga aadto na ha langit amo an ikaduha nga bahin han binhi. ‘Ipapahayag’ hira kon bumulig na hira kan Kristo ha pagbungkag han maraot nga sistema ni Satanas. (Pah. 2:26, 27) Magriresulta ito hin kaluwasan ha mga kaapi han iba nga mga karnero nga makakatalwas ha daku nga kagol-anan.—Pah. 7:9, 10, 14.
12. Ano nga makalilipay nga mga kapulsanan an makakarawat han katawohan kon ipapahayag na an mga dinihogan?
12 Daku gud nga kalipay an mapapahimulsan han katawohan durante han Usa ka Yukot ka Tuig nga Pagmando ni Kristo! Hito nga panahon, an “mga anak han Dios” ‘ipapahayag’ ha lain nga paagi. Hira magigin mga saserdote upod ni Kristo ngan mabulig ha katawohan nga kumarawat han mga kapulsanan han iya halad lukat. Sugad nga mga sakop han Ginhadian han Dios, an masinugtanon nga katawohan hinay-hinay nga ‘maluluwas tikang ha pagkauripon han pagkamadinunuton.’ Tatalwason hira tikang ha mga epekto han sala ngan kamatayon. Kon magpapabilin hira nga matinumanon kan Jehova ha bug-os nga Milenyo ngan ha ultimo nga pagsari ha kataposan hito, an ira mga ngaran permanente nga isusurat ha “basahon han kinabuhi.” Hira magkakaada han “kaluwasan han paghimaya han mga anak han Dios.” (Pah. 20:7, 8, 11, 12) Makalilipay gud ito nga paglaom!
TIPIGAN NATON NGA BUHI AN ATON PAGLAOM
13. Kay ano nga nagin posible an aton paglaom, ngan san-o ipapahayag hi Kristo?
13 An duha nga surat ni Pedro may damu nga impormasyon nga makakabulig ha mga dinihogan ngan ha iba nga mga karnero nga tipigan nga buhi an ira paglaom. Iya iginsaysay nga nagkaada hira paglaom, diri tungod han ira mga buhat, kondi tungod han “grasya” o diri matupngan nga pagkabuotan han Dios. Hiya nagsurat: “Magligdong kamo ngan maglaom hin hingpit han grasya nga pagdadad-on nganhi ha iyo kon magpahayag na hi Jesu-Kristo.” (1 Ped. 1:13) Hi Kristo ipapahayag kon kumanhi hiya basi balosan an iya magtinumanon nga sumurunod ngan ipadapat an mga paghukom ni Jehova ha magraot.—Basaha an 2 Tesalonika 1:6-10.
14, 15. (a) Basi matipigan nga buhi an aton paglaom, diin naton kinahanglan isentro an aton hunahuna? (b) Ano an iginsagdon ni Pedro?
14 Basi matipigan nga buhi an aton paglaom, kinahanglan isentro naton an aton hunahuna ngan kinabuhi ha tiarabot nga adlaw ni Jehova. Iya bubungkagon an “mga langit,” o tawhanon nga mga gobyerno yana, ngan an “tuna,” an maraot nga katawohan ngan an “mga kasangkapan” hito. Hi Pedro nagsurat: “Magtionan-o an iyo mga ginawian . . . , nga naghuhulat ngan nagtitinguha gud kamo han pag-abot han adlaw han Dios, nga hito nga adlaw an mga langit nga aada ha kalayo ngan an ngatanan nga mga kasangkapan matutunaw tungod han paso nga nakakasunog?”—2 Ped. 3:10-12.
15 An “mga langit” ngan “tuna” yana liliwanan han “mga bag-o nga langit [an Ginhadian ni Kristo] ngan bag-o nga tuna [bag-o nga sosiedad han matadong nga katawohan].” (2 Ped. 3:13) Katapos, matin-aw nga nagsagdon hi Pedro kon ano an sadang naton buhaton basi padayon nga ‘hulaton’ o tipigan nga buhi an aton paglaom ha iginsaad nga bag-o nga kalibotan: “Busa, mga hinigugma, tungod nga naghuhulat kamo hini nga mga bagay, magtalinguha gud kamo nga hiagian kamo ha iya atubangan ha paghidait, nga waray buring ngan kasaypanan.”—2 Ped. 3:14.
PAGKINABUHI UYON HA ATON PAGLAOM
16, 17. (a) Ano nga mga buhat han ‘putli nga pagkinabuhi’ ngan “pagtahod ha Dios” an sadang naton ipakita? (b) Paonan-o matutuman an aton paglaom?
16 Sadang naton tipigan nga buhi an aton paglaom, ngan kinahanglan liwat nga magkinabuhi kita uyon ha aton paglaom. Sadang naton siguruhon nga an aton pagkatawo gin-uuyonan ni Jehova. An ‘putli nga pagkinabuhi’ nag-uupod han pirme ‘paggawi hin maopay’ ha butnga han mga nasud pinaagi han pagbuhat han husto ha paniplatan han Dios. (2 Ped. 3:11; 1 Ped. 2:12) Kinahanglan ‘maghigugmaay kita ha usa kag usa.’ Nahiuupod hito an pagbuhat han ngatanan nga aton mahihimo nga tipigan an pagkaurosa han aton bug-os-kalibotan nga pagminagburugto, bisan ha aton mismo kongregasyon. (Juan 13:35) An mga buhat nga nagpapakita hin “pagtahod ha Dios” amo an mga buhat nga nagpaparig-on han aton duok nga relasyon kan Jehova. Upod hito an kinasingkasing nga pag-ampo ngan an aton adlaw-adlaw nga pagbasa han Biblia, personal nga pag-aram ngan pamalandong, pagsingba han pamilya, ngan aktibo nga pakigbahin ha pagsangyaw han “Maopay nga Sumat han ginhadian.”—Mat. 24:14.
17 Karuyag han tagsa ha aton nga magkaada han pagkatawo nga gin-uuyonan ni Jehova ngan iya luluwason kon iya na bubungkagon inin maraot nga sistema. Kon sugad hito an aton pagkatawo, matutuman an aton paglaom, an “paglaom han kinabuhi nga waray kataposan, nga an Dios, nga diri makakagbuwa, nagsaad han waray pa an mga katuigan nga waray kataposan.”—Tito 1:2.
[Retrato ha pahina 22]
An dinihogan nga mga Kristiano ‘igin-aanak’ utro “ngadto ha buhi nga paglaom”
[Retrato ha pahina 24]
Ha iyo pamilya, tipigi nga buhi an iyo paglaom