Ayaw Lingia an mga Butang ha Imo Luyo

“Waray usa ka tawo nga magbutang han iya kamot dida ha arado, ngan lumingi, nga igo han ginhadian han Dios.”—LUK. 9:62.

ANO AN IMO BATON?

Kay ano nga sadang naton ‘hinumdoman an asawa ni Lot’?

Ano an tulo nga butang nga diri naton sadang paghinunahunaon?

Paonan-o kita madungan ha pag-uswag han organisasyon ni Jehova?

1. Ano an iginpahamangno ni Jesus, ngan ano nga pakiana an nabangon?

“HINUMDUMI niyo an asawa ni Lot.” (Luk. 17:32, NW) Iginpahamangno ito ni Jesus haros 2,000 ka tuig na an naglabay, ngan mas importante gud ito yana. Kondi ano an iya karuyag sidngon hito? An mga Judio nga iya kaistorya maaram gud han nahitabo ha asawa ni Lot. Samtang hiya ngan an iya pamilya napalagiw ha Sodoma, waray hiya sumugot ha instruksyon ni Jehova. Liningi hiya ngan nagin harigi nga asin.—Basaha an Genesis 19:17, 26.

2. Ano an posible nga hinungdan nga liningi an asawa ni Lot, ngan ano an resulta han iya diri pagsunod?

² Kondi kay ano nga liningi an asawa ni Lot? Karuyag ba niya kitaon kon ano an nahitatabo? Liningi ba hiya tungod kay diri hiya makatoo nga ginbubungkag an syudad o tungod kay maluya an iya pagtoo? O liningi hiya kay naawil hiya han ngatanan nga iya ginbayaan ha Sodoma? (Luk. 17:31) Anoman an hinungdan han iya paglingi, an iya diri pagsunod nagresulta han iya kamatayon. Hunahunaa la ito! Namatay hiya ha amo gihapon nga adlaw nga ginbungkag an magraot nga taga-Sodoma ngan Gomorra. Diri urusahon nga hi Jesus nagsiring: “Hinumdumi niyo an asawa ni Lot”!

3. Paonan-o ginpabug-atan ni Jesus nga diri kita sadang lumingi ha simboliko nga paagi?

³ Kita liwat nagkikinabuhi ha panahon nga importante hinduro nga diri kita lumingi ha simboliko nga paagi. Ginpabug-atan ito ni Jesus ha iya baton ha lalaki nga nagpakiana kon puydi ba anay hiya magsarit ha iya pamilya antes magin disipulo. Hi Jesus nagsiring: “Waray usa ka tawo nga magbutang han iya kamot dida ha arado, ngan lumingi, nga igo han ginhadian han Dios.” (Luk. 9:62) Sobra ba kaistrikto o diri makatadunganon hi Jesus ha iya baton? Diri, kay maaram hiya nga an lalaki naghihimo la hin pasangil basi malikyan an responsabilidad han pagin disipulo. Siring ni Jesus nga an nalikay ha iya obligasyon ha Dios nalingi ha mga butang ha luyo. Makakaapekto gud ba ha usa kon lumingi hiya ha iya luyo samtang nag-aarado o ibutang niya an arado ngan tumalikod? Hain man hito an iya buhaton, diri hiya makakapokus ha iya pag-arado, ngan diri maopay an magigin resulta.

4. Ha ano naton sadang isentro an aton atensyon?

⁴ Imbes nga lingion an naglabay, sadang naton isentro an aton atensyon ha tidaraon. Ini an matin-aw nga ginsisiring han Biblia ha Proberbios 4:25: “Itan-aw ha matadong an imo mga mata ha unhan, ngan itan-aw an imo mga lakoplakop ha matadong ha imo atubangan.”

5. Ano an hinungdan nga diri kita sadang lumingi ha mga butang ha aton luyo?

⁵ May maopay kita nga hinungdan nga diri lumingi ha mga butang ha aton luyo. Ano ito? Aanhi na kita ha “kataposan nga mga adlaw.” (2 Tim. 3:1) Hirani na gud bungkagon han Dios diri la an duha nga magraot nga syudad, kondi an bug-os nga sistema hini nga kalibotan. Ano an makakabulig ha aton nga malikyan an pariho han nahitabo ha asawa ni Lot? Siyahan, kinahanglan hibaroan naton an pipira nga butang ha aton luyo nga bangin masulay kita nga lingion. (2 Kor. 2:11) Salit hisgotan naton kon ano ito nga mga butang ngan hibaroan kon paonan-o naton malilikyan nga magpokus hito.

AN PAGHUNAHUNA NGA MAS MAOPAY AN ATON KAHIMTANG HADTO

6. Kay ano nga an aton paghinumdom han naglabay danay diri masasarigan?

⁶ Usa nga daku nga peligro amo an sayop nga panhunahuna nga mas maopay an aton kahimtang hadto. An aton paghinumdom han naglabay danay diri masasarigan. Bangin diri tinuyo nga mahunahuna naton nga gudtiay la an aton mga problema hadto ngan mas malipayon kita, bisan kon diri man ito an tinuod nga kahimtang. Kon sugad hito an aton panhunahuna, bangin hingyapon naton an aton kahimtang hadto. Kondi an Biblia nagpapahamangno ha aton: “Ayaw pakiana, ‘Kay ano nga mauruupay man an aton pagkabutang hadto kay hiton yana?’ Diri ini maupay nga pakiana.” (Ekles. 7:10, Maopay nga Sumat) Kay ano nga peligroso gud an sugad hini nga panhunahuna?

7-9. (a) Ano an nahitabo ha mga Israelita ha Ehipto? (b) Ano an mga hinungdan nga nalipay an mga Israelita? (c) Ano an hinungdan nga nagtikang pagreklamo ngan pagngurutob an mga Israelita?

⁷ Tagda an nahitabo ha mga Israelita ha panahon ni Moises. Bisan kon ha siyahan an mga Israelita gintagad nga mga bisita ha Ehipto, han patay na hi Jose an mga Ehiptohanon nagbutang ha mga Israelita hin “mga kapatas ha pagpakuri ha ira ha ira mga luran.” (Eks. 1:11) Ha urhi, iginsugo pa ngani han Paraon nga pamatayon an ngatanan nga minasus-an nga lalaki nga ig-aanak han mga Israelita kay nadiri hiya nga magdamu hira. (Eks. 1:15, 16, 22) Salit diri urusahon nga hi Jehova nagsiring kan Moises: “Ha pagkamatuod akon hinkit-an an mga kakurian han akon katawohan nga aadto ha Ehipto, ngan hinbatian ko an ira tuok tungod han ira mga kapatas, kay ako maaram han ira mga kabidoan.”—Eks. 3:7.

⁸ Mahahanduraw mo ba an kalipay han mga Israelita han nagawas hira tikang ha pagkauripon ha Ehipto? Nakit-an nira an urusahon gud nga paggamit ni Jehova han Iya gahum pinaagi ha pagpadapat han Napulo nga Peste ha hambog nga Paraon ngan ha iya katawohan. (Basaha an Eksodo 6:1, 6, 7.) Ha kataposan gintugotan han mga Ehiptohanon an mga Israelita nga bumaya ha Ehipto. Ngani, ginsidngan nira an mga Israelita nga lumakat dayon ngan gintagan hira hin damu gud nga bulawan ngan salapi salit an Biblia nasiring nga “gin-agawan [han katawohan han Dios] an mga Ehiptohanon.” (Eks. 12:33-36) Ngan nagkalipay pa gud an mga Israelita han nakita nira an pagbungkag ha Paraon ngan ha iya kasundalohan ha Dagat nga Pula. (Eks. 14:30, 31) Sadang gud unta maparig-on an ira pagtoo ha pakakita han ngatanan nga ginbuhat ni Jehova!

⁹ Kondi diri katoohan nga waray pag-iha katapos han milagroso nga pagtalwas ha ira, nagtikang hira pagreklamo ngan pagngurutob. Ano an hinungdan? Pagkaon! Waray hira makontento ha igintagana ni Jehova ngan nagreklamo: “Nahinumdom kami han isda nga amon pinanngaon didto ha Ehipto ha waray bayad; an mga pipino, ngan an mga sandiya, ngan an mga puerro, ngan an mga sibuyas, ngan an mga lasona. Kondi yana an amon kalag nagmamara; waray lain nga nakikita kon diri ini nga mana.” (Num. 11:5, 6) Oo, sayop na gud an ira panhunahuna salit karuyag pa ngani nira bumalik ha lugar diin gin-uripon hira! (Num. 14:2-4) An mga Israelita liningi ha mga butang ha ira luyo ngan nawad-an han pag-uyon ni Jehova.—Num. 11:10.

10. Ano an leksyon para ha aton han nahitabo ha mga Israelita?

¹⁰ Ano an leksyon hito para ha aton yana? Kon may mga problema kita, diri naton sadang paghinunahunaon nga mas maopay an aton kahimtang hadto, bangin antes pa ngani kita nahibaro han kamatuoran. Bisan kon diri sayop nga pamalandungon an mga leksyon nga aton hinbaroan ha aton mga eksperyensya o panumdumon an makalilipay nga mga hitabo, kinahanglan magin timbang ngan reyalistiko an aton panhunahuna ha naglabay. Kay kon diri, bangin dumugang an aton pagin diri kontento ha aton kahimtang yana ngan hingyapon naton nga bumalik ha aton pagkinabuhi hadto.—Basaha an 2 Pedro 2:20-22.

AN ATON MGA IGINSAKRIPISYO

11. Ano an ginhuhunahuna han iba mahitungod han ira mga iginsakripisyo?

¹¹ Makasurubo, an iba nagbasol ha ira mga iginsakripisyo ngan naghunahuna nga ginkaragan la nira an mga oportunidad. Bangin hadto may oportunidad ka nga magkaada hitaas nga edukasyon o magin sikat o riko, kondi nagdesisyon ka nga diri ito karawaton. Damu nga kabugtoan an binaya ha ira daku an sweldo nga trabaho may kalabotan ha negosyo, kaliawan, edukasyon, o isport. Yana linabay na an panahon, ngan an kataposan waray pa umabot. Ginhihinunahuna mo ba kon ano daw la an imo kahimtang kon waray mo himoa ito nga mga sakripisyo?

12. Paonan-o gintagad ni Pablo an mga butang nga iya gintalikdan?

¹² Damu an iginsakripisyo ni apostol Pablo basi magin sumurunod ni Kristo. (Fil. 3:4-6) Paonan-o niya gintagad an mga butang nga iya gintalikdan? Hiya nagsiring: “An mga butang nga may bentaha ha akon, gintagad ko nga waray pulos tungod han Kristo.” Kay ano? Hiya nagsiring liwat: “Gintatagad ko gud liwat nga waray pulos an ngatanan nga butang tungod han labaw kabirilhon nga kahibaro mahitungod kan Kristo Jesus nga akon Ginoo. Tungod ha iya ginsalikway ko an ngatanan nga butang ngan gintatagad ko ito sugad nga mga basura, basi magkaada ako duok nga relasyon ha Kristo.”a (Fil. 3:7, 8, NW) Sugad la nga an usa nga naglalabog hin basura diri nanganganugon hito, hi Pablo waray magbasol han bisan ano nga oportunidad ha kalibotan nga iya gintalikdan. Para ha iya waray na ito pulos.

13, 14. Paonan-o naton masusubad hi Pablo?

¹³ Ano an sadang naton buhaton kon naghihinunahuna na kita han mga oportunidad nga aton gintalikdan? Subara an ginbuhat ni Pablo. Paonan-o? Hunahunaa kon ano kabirilhon an aada yana ha imo. May-ada ka maopay nga relasyon kan Jehova ngan nakikita niya nga matinumanon ka nga nag-aalagad ha iya. (Heb. 6:10) May maitatanyag ba ini nga kalibotan nga sugad kabirilhon han mga bendisyon nga iginhahatag ni Jehova ha aton yana ngan ihahatag pa ha tidaraon?—Basaha an Markos 10:28-30.

¹⁴ Sunod, may gin-unabi hi Pablo nga makakabulig ha aton nga magpadayon nga matinumanon. Siring niya nga iya ‘ginkalimtan an mga bagay nga tinalikdan, ngan dinadakop an mga bagay ha atubangan.’ (Fil. 3:13) Tagda nga ginpabug-atan ni Pablo an duha nga sadang naton buhaton. Siyahan, kinahanglan kalimtan naton an mga butang nga aton gintalikdan ngan diri karagan an aton kusog ngan panahon ha paghinunahuna hito. Ikaduha, pariho hin paradalagan nga nangangalimbasog nga makaabot ha finish line, kinahanglan mangalimbasog kita nga makab-ot an mga butang ha unhan ngan magpabilin nga nakapokus hito.

15. Ano an kapulsanan han pagpamalandong ha mga susbaranan han magtinumanon nga surugoon han Dios?

¹⁵ Kon aton ginpapamalandong an susbaranan han magtinumanon nga surugoon han Dios hadto ngan yana, mas mapapagios kita nga magpadayon ha unhan imbes nga magliningi ha mga butang ha aton luyo. Pananglitan, kon gindinumdom nira Abraham ngan Sara an Ur, “may katigayonan unta nira ha pagbalik.” (Heb. 11:13-15) Kondi waray hira bumalik didto. Han siyahan nga binaya hi Moises ha Ehipto, mas damu gud an iya ginbayaan kay han ginbayaan han bisan hin-o nga Israelita ha urhi. Kondi waray gin-unabi an Biblia nga naghingyap hiya nga balikon ito. Lugod, an Biblia nasiring nga “ginpakamahal niya an pagkataramayon tungod kan Kristo kay ngan ha mga bahandi han Ehipto: kay hiya naglalaom han bayad han balos.”—Heb. 11:26.

DIRI MAG-OPAY NGA EKSPERYENSYA HADTO

16. Ano an posible magin epekto ha aton han aton mga eksperyensya hadto?

¹⁶ Diri ngatanan nga eksperyensya naton mag-opay. Bangin pirme naton nahuhunahuna an aton mga sala o sayop hadto. (Sal. 51:3) Bangin nasisina o nasusubo la gihapon kita tungod han marig-on nga iginsagdon ha aton. (Heb. 12:11) Bangin diri naton nangangalimtan an kawaray hustisya—tinuod man ito nga nahitabo o ginhunahuna la naton. (Sal. 55:2) Ano an aton bubuhaton basi diri maipokus an aton hunahuna hito nga mga butang? Tagda an tulo nga ehemplo.

17. (a) Kay ano nga nagsiring hi Pablo nga hiya an “ubos han mga giuubusi ha ngatanan nga mga baraan”? (b) Ano an nakabulig kan Pablo nga diri magpadaog ha negatibo nga panhunahuna?

¹⁷ Mga sayop hadto. Para kan apostol Pablo hiya an “ubos han mga giuubusi ha ngatanan nga mga baraan.” (Efe. 3:8) Kay ano nga sugad hito an iya panhunahuna? ‘Kay gintimaraot ko an singbahan han Dios,’ siring niya. (1 Kor. 15:9) Nahahanduraw mo ba an posible nga gin-abat ni Pablo han iya iginkita an pipira nga iya gintimaraot hadto? Kondi imbes nga paghinunahunaon ito, ginhunahuna niya pirme an diri matupngan nga pagkabuotan nga iginpakita han Dios ha iya. (1 Tim. 1:12-16) Tungod hito, mapasalamaton gud hiya ngan naaghat nga magpadayon ha iya ministeryo. An iya sayop hadto kaapi han mga butang nga determinado hiya nga kalimtan. Kon magpokus liwat kita ha kalooy nga iginpakita ni Jehova ha aton, diri makakarag an aton kusog ha paghinunahuna han mga nahitabo ha naglabay nga diri na man naton mababag-o. Magagamit naton an aton kusog ha pag-alagad kan Jehova yana.

18. (a) Ano an mahimo mahitabo kon magkaada kita sayop nga panhunahuna ha iginsagdon ha aton ha naglabay? (b) Paonan-o naton masusunod an ginsiring ni Salomon mahitungod ha pagkarawat hin sagdon?

¹⁸ Marig-on nga sagdon. Ano man kon maghinunahuna kita han usa nga iginsagdon ha aton ha naglabay? Diri la ito makakapasubo o makakapasina ha aton kondi mahimo ito magin hinungdan nga ‘manluya’ kita. (Heb. 12:5) Gintatagad man naton nga “gutiay la” an sagdon kay aton ito ginsalikway o ‘nanluluya’ kita tungod kay ginkarawat naton ito ngan katapos naundang na kita ha pag-alagad, amo la gihapon an resulta—diri naton ginpapabilhan an sagdon. Mas maopay gud nga sundon an ginsiring ni Salomon: “Kapti hin maopay an pagtutdo [“disiplina,” NW]; ayaw hiya palakta, tipigi hiya; kay hiya an imo kinabuhi.” (Prob. 4:13) Pariho hin drayber nga nasunod ha mga karatola ha kalsada, karawaton naton an sagdon, sundon ito, ngan magpadayon ha unhan.—Prob. 4:26, 27; basaha an Hebreo 12:12, 13.

19. Paonan-o naton masusubad an pagtoo nira Habakuk ngan Jeremias?

¹⁹ Kawaray hustisya—tinuod man nga nahitabo o ginhunahuna la naton. May mga panahon nga bangin abaton naton an inabat ni propeta Habakuk nga nangaro kan Jehova hin hustisya. Waray niya masabti kon kay ano nga gintugotan ni Jehova an kawaray hustisya. (Hab. 1:2, 3) Importante gud nga subaron naton an pagtoo hito nga propeta nga nagsiring: “Kondi ako magmamalipay dida kan Jehova, ako magmamahimongayaon dida han Dios han akon kaluwasan.” (Hab. 3:18) Usa pa nga susbaranan amo hi Jeremias, nga ‘naglaom’ kan Jehova. Masusubad naton hiya pinaagi ha pagpakita hin bug-os nga pagtoo nga hi Jehova, an Dios han hustisya, magtatadong han ngatanan nga butang ha husto nga panahon.—Pagta. 3:19-24.

20. Paonan-o naton mapapamatud-an nga aton ‘nahihinumdoman an asawa ni Lot’?

²⁰ Nagkikinabuhi kita ha makalilipay nga panahon. Damu an mag-opay hinduro nga nahitatabo yana ngan damu pa an mahitatabo ha tidaraon. Hinaot an tagsa ha aton dumungan ha pag-uswag han organisasyon ni Jehova. Sundon naton an sagdon ha Kasuratan nga ipokus an aton hunahuna ha unhan ngan diri lumingi ha mga butang ha aton luyo. Hito nga paagi mapapamatud-an naton nga aton gud ‘nahihinumdoman an asawa ni Lot.’

[Footnote]