‘An Anak Naruruyag Pagpahayag han Amay’
‘Waray usa nga nakilala kon hin-o an Amay, kondi an Anak; ngan ha kan kanay an Anak naruruyag pagpahayag ha iya.’—LUK. 10:22.
ANO AN IMO BATON?
Kay ano nga hi Jesus an pinakakwalipikado ha pagpahayag han iya Amay?
Paonan-o iginpahayag ni Jesus an iya Amay ha iba?
Ha ano nga mga paagi masusubad mo hi Jesus ha pagpahayag han Amay?
1, 2. Ano nga pakiana an makuri mabaton han damu nga tawo, ngan kay ano?
‘HIN-O an Dios?’ Damu an nakukurian pagbaton hini nga pakiana. Pananglitan, bisan kon kadam-an han nasiring nga Kristiano hira an natoo nga an Dios usa nga Trinidad, damu an nasiring nga imposible masabtan ito nga doktrina. An usa nga awtor mahitungod han relihiyon nagsiring: “Usa ini nga doktrina nga diri kaya abuton han limitado nga hunahuna han tawo. Diri ito maisasaysay o masasabtan han tawo.” Ha luyo nga bahin, kadam-an nga nakarawat han teoriya han ebolusyon an natoo nga waray Dios. Nasiring hira nga an ngatanan nga makaruruyag nga butang nga aton nakikita tigda la nga iniksister. Bisan pa hito, imbes nga magsiring nga waray Dios, ini an ginsiring ni Charles Darwin: “Para ha akon, an tawo waray kapas nga bug-os nga makasabot mahitungod ha Dios.”
2 Anoman an ira gintotoohan, kadam-an an may mga pakiana may kalabotan ha Dios. Kondi damu an inundang ha pamiling ha Dios han waray hira makaagi hin makapatagbaw nga mga baton. Oo, hi Satanas ‘nagbubuta han mga hunahuna han mga diri-tumuroo.’ (2 Kor. 4:4) Salit diri urusahon nga kadam-an an nawuwurok ngan diri maaram han kamatuoran mahitungod ha Amay, an Maglalarang han uniberso!—Isa. 45:18.
3. (a) Hin-o an nagpahayag ha aton han Maglalarang? (b) Ano nga mga pakiana an aton hihisgotan?
3 Kondi importante gud nga an mga tawo mahibaro han kamatuoran mahitungod ha Dios. Kay ano? Kay an mga “natawag ha ngaran ni Jehova” amo la an maluluwas. (Roma 10:13, NW) An pagtawag ha ngaran han Dios nag-uupod han pagkilala kan Jehova sugad nga Persona. Igintutdo ni Jesu-Kristo ha iya mga disipulo inin importante nga kahibaro. Iya iginpahayag ha ira an Amay. (Basaha an Lukas 10:22.) Kay ano nga naipahayag ni Jesus an Amay ha paagi nga diri mahihimo han bisan hin-o? Paonan-o niya ginbuhat ito? Ngan paonan-o naton masusubad hi Jesus ha pagpahayag ha iba mahitungod han Amay? Hisgotan naton ini nga mga pakiana.
HI JESUS AN PINAKAKWALIPIKADO HA PAGPAHAYAG HAN AMAY
4, 5. Kay ano nga hi Jesus an pinakakwalipikado ha pagpahayag han iya Amay?
4 Hi Jesus an pinakakwalipikado ha pagpahayag han iya Amay. Kay ano? Kay antes himoon an ngatanan iba pa nga buhi nga linarang, an espiritu nga linarang nga ha urhi nagin an tawo nga hi Jesus naeksister na ha langit sugad nga “Bugtong nga Anak han Dios.” (Juan 1:14; 3:18) Waray kapariho an iya kahimtang! Han waray pa iba nga linarang, nakaupod han Anak an Amay, ngan an atensyon han Amay nakada gud la ha Anak. Samtang nagkukomunikar hira ha usa kag usa ha sulod hin maiha hinduro nga panahon, nakilala han Anak an Amay ngan hinbaroan an Iya mga kalidad. Tungod hito nagin mas marig-on an ira relasyon ngan naghilarom an ira gugma ha usa kag usa. (Juan 5:20; 14:31) Sigurado nga damu gud an hinbaroan han Anak mahitungod han personalidad han iya Amay!—Basaha an Kolosas 1:15-17.
5 Ginpili han Amay an Anak nga magin Iya tagapagyakan, “An Pulong han Dios.” (Pah. 19:13) Salit hi Jesus an pinakakwalipikado ha pagpahayag han Amay ha iba. Angayan la nga hi Juan nagsiring nga hi Jesus, “an Pulong,” “nakadto ha dughan han Amay.” (Juan 1:1, 18) Han gin-gamit ni Juan ito nga ekspresyon, bangin ginhuhunahuna niya an usa nga kustomre ha pangaon nga komon ha iya panahon. An usa nga bisita nalingkod hirani gud ha usa pa nga bisita basi masayon hira makag-istorya. Kon sugad, tungod kay an Anak “nakadto ha dughan han Amay,” nagkaada hiya pribado nga mga pakiistorya ha iya Amay.
6, 7. Paonan-o padayon nga nagin mas duok an relasyon han Amay ngan han Anak?
6 An Amay ngan an Anak padayon nga nagin mas duok ha usa kag usa. An Anak ‘an kalipay han Dios ha adlaw-adlaw.’ (Basaha an Proberbios 8:22, 23, 30, 31.) Salit diri urusahon nga nagin mas duok hira ha usa kag usa samtang magkaupod nga nagbubuhat, ngan an Anak nahibaro pagsubad ha mga kalidad han iya Amay. Han ginhimo an iba pa nga intelihente nga linarang, nakita han Anak an paagi han pagtratar ni Jehova ha tagsa ha ira, ngan sigurado nga mas naapresyar niya an personalidad han Dios.
7 Bisan han ha urhi ginkwestyon ni Satanas an katungod ni Jehova ha pagmando, an Anak nagkaada higayon nga hibaroan kon paonan-o ipapakita ni Jehova an gugma, hustisya, kinaadman, ngan gahum han inatubang Hiya hin makuri nga kahimtang. Sigurado nga nakabulig liwat ito kan Jesus nga magin andam ha pag-atubang han mga kakurian nga iya maieksperyensyahan ha iya ministeryo dinhi ha tuna.—Juan 5:19.
8. Paonan-o an mga asoy ha mga Ebanghelyo nabulig ha aton nga hibaroan an mga kalidad han Amay?
8 Tungod han duok nga relasyon ni Jesus kan Jehova, mas detalyado nga naipahayag niya an Amay kay han mahihimo han bisan hin-o. May mas maopay pa ba nga paagi para ha aton nga makilala an Amay kay han pag-usisa han igintutdo ngan ginbuhat han iya bugtong nga Anak? Ha pag-ilustrar, hunahunaa kon ano kakuri para ha aton nga masabtan hin bug-os an pulong nga “gugma” pinaagi la han pagbasa han kahulogan hito ha diksyonaryo. Pero kon aton huhunahunaon an matin-aw nga mga asoy ha mga Ebanghelyo mahitungod han ministeryo ni Jesus ngan han iya paagi han pagtagad ha mga tawo, masasabtan gud naton an karuyag sidngon han ginsiring nga ‘an Dios gugma.’ (1 Juan 4:8, 16) Labot han gugma, iginpahayag liwat ni Jesus an iba pa nga kalidad han Dios ha iya mga disipulo han nakanhi hiya ha tuna.
KON PAONAN-O IGINPAHAYAG NI JESUS AN IYA AMAY
9. (a) Ha ano nga duha nga paagi iginpahayag ni Jesus an iya Amay? (b) Pag-unabi hin ilustrasyon nga nagpapakita kon paonan-o iginpahayag ni Jesus an iya Amay pinaagi han iya igintutdo.
9 Paonan-o iginpahayag ni Jesus an Amay ha iya mga disipulo ngan ha mga nagin sumurunod niya ha urhi? Ginbuhat niya ito ha duha nga paagi: pinaagi han iya mga igintutdo ngan pinaagi han iya paggawi. Siyahan, aton hisgotan an mga igintutdo ni Jesus. An iya igintutdo ha iya mga sumurunod nagpakita nga hilarom gud an iya pagsabot ha panhunahuna, pagbati, ngan mga paagi han iya Amay. Pananglitan, iginpariho ni Jesus an iya Amay ha usa nga mahigugmaon nga tag-iya hin panon han mga karnero nga binaya ha panon basi pamilngon an usa nga nawawara nga karnero. Hi Jesus nagsiring nga han naagian ito han tag-iya, ‘durodaku an iya kalipay tungod hito kay ha kasiyaman kag siyam nga waray magkawawara.’ Kay ano nga gin-gamit ni Jesus ini nga ilustrasyon? Hiya nagsaysay: “Diri amo an kaburut-on han iyo Amay nga aadto ha langit, nga may mawara hini nga mga gudtiay.” (Mat. 18:12-14) Hini nga ilustrasyon, ano an imo hibabaroan mahitungod kan Jehova? Bisan kon usahay naabat ka nga waray ka pulos o ginkalimtan na, hinumdumi nga an imo Amay ha langit interesado ngan nagtatagad ha imo. Para ha iya, usa ka “hini nga mga gudtiay.”
10. Paonan-o iginpahayag ni Jesus an Amay pinaagi han iya paggawi?
10 Ikaduha, iginpahayag ni Jesus an Amay ha iya mga disipulo pinaagi han iya paggawi. Salit han an apostol nga hi Felipe naghangyo kan Jesus: “Ipakita ha amon an Amay,” husto la nga nakasiring hi Jesus: “Nakakita na han Amay an bisan hin-o nga nakakita ha akon.” (Juan 14:8, 9, Maopay nga Sumat) Tagda an pipira nga ehemplo kon paonan-o iginpakita ni Jesus an mga kalidad han iya Amay. Han an usa nga lalaki nga sanlahon nakimalooy kan Jesus nga tambalon hiya, ginkaptan hiya ni Jesus ngan ginsidngan: “Karuyag ko; magmalinis ka.” Katapos matambal, sigurado nga nasantop han sanlahon nga hi Jehova an naghatag kan Jesus hin gahum ha pagtambal ha iya. (Luk. 5:12, 13) Sugad man, han namatay hi Lasaro, sigurado nga inabat han mga disipulo an pagpaid han Amay han hi Jesus “nangurog ha iya espiritu, ngan nasamok” ngan hiya “nagtuok.” Bisan kon maaram hi Jesus nga babanhawon niya hi Lasaro, inabat niya an kasakit han pamilya ngan kasangkayan ni Lasaro. (Juan 11:32-35, 40-43) Sigurado nga may-ada ka liwat paborito nga mga asoy ha Biblia han mga ginbuhat ni Jesus nga nabulig ha imo nga makita an kalooy han Amay.
11. (a) Han ginlimpyohan ni Jesus an templo, ano an iya iginpahayag mahitungod han iya Amay? (b) Kay ano nga nakakaliaw ha aton an asoy mahitungod han paglimpyo ni Jesus han templo?
11 Kondi ano an imo masisiring ha asoy mahitungod han paglimpyo ni Jesus han templo? Hunahunaa an nahitabo: Hi Jesus naghimo hin latigo nga pisi, ngan iya ginpaiwas ha templo an mga nagbabaligya hin mga baka ngan karnero. Iya ginpanhuwad an mga sinselyo han mga magbaralyo hin kwarta ngan ginpanbaliskad an ira mga lamesa. (Juan 2:13-17) Tungod hiton mapwersa nga ginbuhat ni Jesus, nahinumdoman han mga disipulo an igintagna ni Hadi David: “An daku nga tinguha han imo balay nakalukop ha akon.” (Sal. 69:9) Pinaagi han marig-on nga paggios, iginpakita ni Jesus nga karuyag gud niya depensahan an tinuod nga pagsingba. Nakikita mo ba hito nga asoy an personalidad han Amay? Iginpapahinumdom hito ha aton nga an Dios may-ada waray tubtoban nga gahum ha pagbungkag han karaotan ha tuna ngan karuyag gud niya buhaton ito. An paggios ni Jesus kontra ha sayop nga buhat nagpapakita kon ano an sigurado nga inaabat han Amay samtang nakikita Niya an karaotan nga kalyap ha tuna yana. Nakakaliaw gud ito ha aton kon nag-aantos kita hin kawaray hustisya!
12, 13. Ano an imo hibabaroan mahitungod kan Jehova ha paagi han pagtratar ni Jesus ha iya mga disipulo?
12 Hisgotan naton an usa pa nga ehemplo—an paagi han pagtratar ni Jesus ha iya mga disipulo. Pirme hira nagdidiskusyon kon hin-o ha ira an mas labaw. (Mar. 9:33-35; 10:43; Luk. 9:46) Tungod han maiha nga pakig-upod ni Jesus ha iya Amay, maaram hiya kon ano an panhunahuna ni Jehova ha tendensya nga magpahitaas. (2 Sam. 22:28; Sal. 138:6) Nakita liwat ni Jesus nga ito nga inklinasyon iginpakita ni Satanas nga Yawa. Iton mapahitas-on nga linarang interesado gud nga magin prominente ngan magkaada hitaas nga posisyon. Salit sigurado nga nasubo gud hi Jesus han iya naobserbaran nga padayon nga nagpakita hin pagkaambisyoso an mga disipulo nga iya ginbansay! Iginpakita pa ngani ito han iya ginpili nga mga apostol! Tubtob ha ultimo gud nga adlaw han kinabuhi ni Jesus dinhi ha tuna, iginpakita nira an pagin ambisyoso. (Luk. 22:24-27) Bisan pa hito, padayon nga ginsaway niya hira ha mahigugmaon nga paagi, ngan waray gud hiya mawad-i hin paglaom nga ha urhi masusubad nira an iya pagkamapainubsanon.—Fil. 2:5-8.
13 Nakikita mo ba an personalidad han Amay ha mapailubon nga pagtadong ni Jesus ha sayop nga mga tendensya han iya mga disipulo? Ha mga ginbuhat ngan ginsiring ni Jesus, nakikita mo ba an Amay, nga diri nagsasalikway ha iya katawohan bisan kon pauroutro hira nga nagsasayop? Diri ba an paghibaro han mga kalidad han Dios nagpapagios ha aton nga mag-ampo ha iya basi ipahayag an aton pagbasol kon nakakahimo kita hin mga sayop?
KARUYAG HAN ANAK NGA IPAHAYAG AN IYA AMAY
14. Paonan-o iginpakita ni Jesus nga karuyag niya ipahayag an iya Amay?
14 Damu nga diktador an nangangalimbasog nga padayon nga kontrolon an ira mga sakop pinaagi ha diri pagsumat ha ira han mga impormasyon nga kinahanglan nira hibaroan. Ha kabaliktaran, karuyag ni Jesus isumat ha iba an mga impormasyon nga iya hinbaroan mahitungod han Amay, salit iginpahayag niya an ngatanan nga kinahanglan nira hibaroan mahitungod ha Iya. (Basaha an Mateo 11:27.) Sugad man, iginhatag ni Jesus ha iya mga disipulo an “kinaadman, basi nga kilal-on [nira] hiya nga matuod,” hi Jehova nga Dios. (1 Juan 5:20) Ano an karuyag sidngon hito? Ginbuligan ni Jesus an iya mga sumurunod nga masabtan an iya mga igintutdo mahitungod han Amay. Waray niya itago an iya Amay ha misteryoso nga katutdoan nga waray bisan hin-o nga makakasabot, sugad han katutdoan han Trinidad.
15. Kay ano nga waray anay isumat ni Jesus an pipira nga impormasyon mahitungod han iya Amay?
15 Iginsumat ba ni Jesus an ngatanan nga iya hinbabaroan mahitungod han iya Amay? Waray. Maaramon nga waray anay niya isumat an damu nga butang nga iya hinbabaroan. (Basaha an Juan 16:12.) Kay ano? Kay hito nga panahon, an iya mga disipulo “diri pa makakahimo pagdara” hito. Kondi sugad han iginsaysay ni Jesus, damu pa gud nga kahibaro an ipapahayag kon umabot na ‘an parabulig,’ an baraan nga espiritu, nga maggigiya ha ira “ngadto han ngatanan nga kamatuoran.” (Juan 16:7, 13, Maopay nga Sumat) Sugad la nga an maaramon nga mga kag-anak diri nagsusumat han pipira nga impormasyon ha ira mga anak tubtob nga dumaku na hira ngan masabtan na nira ito, hi Jesus liwat naghulat nga magin hamtong an iya mga disipulo ngan masabtan na nira an pipira nga impormasyon mahitungod han Amay. Mahigugmaon nga ginkonsiderar ni Jesus an ira mga limitasyon.
SUBARA HI JESUS PINAAGI HAN PAGBULIG HA IBA NGA MAKILALA HI JEHOVA
16, 17. Kay ano nga maisusumat mo ha iba an mahitungod han Amay?
16 Kon nakikilala mo hin maopay an usa ngan naaapresyar an iya pagkamahigugmaon, diri ba napapagios ka nga magsumat ha iba mahitungod ha iya? Han nakanhi hi Jesus ha tuna, nag-istorya hiya mahitungod han iya Amay. (Juan 17:25, 26) Posible ba nga masubad naton hiya ha pagsumat ha iba mahitungod kan Jehova?
17 Sugad han aton ginhisgotan, mas hilarom gud an kahibaro ni Jesus mahitungod han Amay kay han hinbabaroan han iba. Kondi karuyag niya isumat an iba hito, ngan ginbuligan pa ngani niya an iya mga sumurunod nga masabtan an mas higlarom nga butang mahitungod han personalidad han Dios. Ha bulig ni Jesus, diri ba mas nakilala naton an aton Amay ha paagi nga diri hinbabaroan han kadam-an yana? Mapasalamaton gud kita nga pinaagi han mga katutdoan ngan paggawi ni Jesus, karuyag niya ipahayag ha aton an iya Amay! Ha pagkamatuod, daku nga dungog para ha aton nga kilala naton an Amay. (Jer. 9:24; 1 Kor. 1:31) Samtang nangangalimbasog kita nga magin duok kan Jehova, nagigin duok hiya ha aton. (Jak. 4:8) Salit maisusumat na naton ha iba an aton hinbabaroan mahitungod han Amay. Paonan-o naton ito mahihimo?
18, 19. Ha ano nga mga paagi maipapahayag mo an Amay ha iba? Isaysay.
18 Kinahanglan subaron naton hi Jesus ha pagpahayag han Amay pinaagi han aton mga pulong ngan buhat. Hinumdumi nga damu han aton nakakaistorya ha ministeryo an diri maaram kon hin-o an Dios. Bangin sayop an ira gintotoohan mahitungod ha Dios kay gintutdoan hira hin buwa nga mga doktrina. Mahimo naton isumat ha ira an aton hinbabaroan ha Biblia mahitungod han ngaran han Dios, han iya katuyoan para ha katawohan, ngan han iya personalidad. Sugad man, puydi naton ipakiistorya ha aton mga igkasi-tumuroo an pipira nga asoy ha Biblia nga nagsusumat han personalidad han Dios ha paagi nga diri naton nasasabtan hadto. Hito nga paagi, makakapahimulos liwat hira.
19 Diri ba sadang liwat naton ipahayag an Amay pinaagi han aton paggawi samtang nangangalimbasog kita nga subaron hi Jesus? Kon nakikita han mga tawo ha aton mga buhat an gugma ni Kristo, maruruyag liwat hira nga magin duok ha Amay ngan kan Jesus. (Efe. 5:1, 2) Gindasig kita ni apostol Pablo nga ‘magsubad ha iya, sugad nga hiya nagsubad kan Kristo.’ (1 Kor. 11:1) Daku gud an aton pribilehiyo ha pagbulig ha mga tawo nga makita hi Jehova ha paagi han aton paggawi! Oo, hinaot kita ngatanan padayon nga magsubad kan Jesus pinaagi ha pagpahayag han Amay ha iba.