Pagtraydor—Usa nga Bahin han Tigaman han Kataposan nga mga Adlaw!
“Mationan-o kami kamaunungon, kamatadong ngan kawaray-sayop.”—1 TES. 2:10, NW.
PAMILNGA ININ NANGUNGUNA NGA MGA PUNTO:
Ano nga mga leksyon an aton hibabaroan ha pagtraydor nga ginbuhat nira Delila, Absalon, ngan Judas Iskariote?
Paonan-o naton masusubad an pagkamaunungon nga iginpakita nira Jonatan ngan Pedro?
Paonan-o kita makakapabilin nga maunungon ha aton padis ngan kan Jehova?
1-3. (a) Ano an usa nga bahin han tigaman han kataposan nga mga adlaw, ngan ano an nahiuupod hito? (b) Ano an tulo nga pakiana nga aton hihisgotan?
ANO an ginkaparihoan nira Delila, Absalon, ngan Judas Iskariote? Hira nga tulo diri maunungon. Hi Delila diri maunungon kan Hukom Samson nga nahigugma ha iya. Hi Absalon diri maunungon ha iya tatay nga hi Hadi David. Hi Judas diri maunungon ha iya Agaron nga hi Kristo Jesus. An maraot nga ginbuhat han tagsa ha ira nakadaot ngan nakapasubo gud ha iba! Kondi kay ano nga sadang kita magin interesado hito?
2 Usa nga awtor an nagsiring nga an pagtraydor usa han pinakakomon nga kaluyahan han tawo. Diri kita sadang mahipausa hito. Han hi Jesus naghatag han tigaman han “kataposan han kalibotan,” hiya nagsiring: “Damu an . . . magtuturutubyanay an usa kag usa.” (Mat. 24:3, 10) An “pagtraydor” nagpapasabot nga “itubyan o isurender ha kaaway pinaagi ha paglimbong o pagkadiri-maunungon.” Ito nga pagkadiri-maunungon nagpapamatuod nga nagkikinabuhi na kita ha “kataposan nga mga adlaw” diin an mga tawo “diri-maunungon, . . . mga traydor,” sugad han igintagna ni Pablo. (2 Tim. 3:1, 2, 4, NW) Bisan kon agsob nga ginhihimo han mga parasurat hin libro ngan iskrip han sine nga baga hin makaruruyag o romantiko an mga buhat han pagkadiri-maunungon, ha tinuod nga kinabuhi an pagkadiri-maunungon ngan pagtraydor nagriresulta hin kasakit ngan pag-antos. Oo, ito nga mga buhat bahin gud han tigaman nga nagkikinabuhi na kita ha kataposan nga mga adlaw!
3 Ano nga mga leksyon an aton hibabaroan tikang ha Biblia mahitungod han mga nagin diri maunungon? Ano nga mga susbaranan han mga nagpakita hin pagkamaunungon an mahimo naton subaron? Ngan kan kanay kita sadang magpabilin nga maunungon? Hisgotan naton ito.
NAGPAPAHAMANGNO NGA MGA EHEMPLO HAN NAGLABAY
4. Paonan-o gintraydoran ni Delila hi Samson, ngan kay ano nga maraot gud ito?
4 Siyahan, hisgotan naton an malimbong nga hi Delila, nga ginhigugma ni Hukom Samson. Karuyag ni Samson manguna ha pakig-away ha mga Pilisteohanon para ha katawohan han Dios. An lima nga punoan han mga Pilisteohanon bangin maaram nga diri tinuod an gugma ni Delila kan Samson, salit gintanyagan nira hiya hin daku nga kantidad basi usisahon kon ano an sekreto han talagsahon nga kusog ni Samson basi ira mapatay hiya. Ginkarawat han makikwarta nga hi Delila an ira tanyag, kondi tulo ka beses hiya nga napakyas ha pagdiskobre han sekreto ni Samson. Salit ginpinirit ni Delila hi Samson “pinaagi han iya mga pulong, ngan gin-aghat hiya.” Ha urhi “an [kan Samson] kalag gin-urit ha makamaratay.” Salit iginsumat niya kan Delila nga waray pa gud maaruti an iya buhok ngan kon arotan ito, mawawara an iya kusog.a Ha pakahibaro hito, ginpaarotan ni Delila an buhok ni Samson samtang nakaturog ha iya paa, katapos iya igintubyan hi Samson ha mga kaaway basi buhaton nira ha iya anoman an ira karuyag. (Huk. 16:4, 5, 15-21) Maraot gud an ginbuhat ni Delila! Tungod han kahakog, iya gintraydoran an lalaki nga nahigugma ha iya.
5. (a) Paonan-o gintraydoran ni Absalon hi David, ngan ano an iginpakita hito mahitungod ha iya? (b) Ano an inabat ni David ha pagtraydor ni Ahitopel?
5 Sunod, tagda an traydor nga hi Absalon. Tungod han duro nga ambisyon, determinado hiya nga agawon an trono han iya amay, hi Hadi David. Siyahan iya ‘ginkawat an kasingkasing han mga tawo ha Israel’ pinaagi han buwa nga mga saad ngan pagpakita nga kunohay nahigugma hiya ha ira. Ginhahangkopan ngan ginhaharokan niya hira nga baga hin interesado gud hiya ha ira ngan ha ira panginahanglan. (2 Sam. 15:2-6) Nakombinse pa ngani ni Absalon an tinaporan nga sangkay ni David nga hi Ahitopel nga traydoran hi David ngan umapi ha pagrebelde. (2 Sam. 15:31) Ha Salmo 3 ngan 55, iginsaysay ni David an iya inabat hito nga pagkadiri-maunungon. (Sal. 3:1-8; basaha an Salmo 55:12-14.) Iginpakita ni Absalon an iya pagbalewaray han pagkasoberano han Dios pinaagi han iya maraot nga plano ngan dayag gud nga pakigkunsabo kontra han hadi nga ginpili ni Jehova. (1 Kron. 28:5) Kondi napakyas an pagrebelde ni Absalon, ngan hi David padayon nga nagmando sugad nga dinihogan ni Jehova.
6. Paonan-o gintraydoran ni Judas hi Jesus, ngan paonan-o ginagamit an ngaran nga Judas yana?
6 Yana hunahunaa an ginbuhat han traydor nga hi Judas Iskariote kan Kristo. Ha ultimo nga pagselebrar ni Jesus han Paskua kaupod an iya 12 nga apostol, hiya nagsiring ha ira: “Matuod ako nasiring ha iyo, nga usa ha iyo an magtutubyan ha akon.” (Mat. 26:21) Ha urhi hito nga gab-i, ginsumatan ni Jesus hira Pedro, Jakobo, ngan Juan ha hardin han Getsemani: “Kitaa, an titubyan ha akon iini na.” Inabot dayon hi Judas ha hardin upod an mga nakigkunsabo ha iya, “ngan ha kadagmitan hiya dinaop kan Jesus, ngan siniring: Malipay ka, Rabi, ngan hinadkan hiya.” (Mat. 26:46-50; Luk. 22:47, 52) Gintraydoran ni Judas “an waray sala nga dugo” ngan igintubyan hi Jesus ha Iya mga kaaway. Ngan ha ano nga kantidad igintubyan hi Jesus han makikwarta nga hi Judas? Ha 30 la ka bug-os nga salapi! (Mat. 27:3-5) Tikang hito nga panahon, an ngaran nga Judas ginagamit na ha pagtawag ha usa nga traydor, labi na hadton nagtatraydor ha iya sangkay.b
7. Ano nga mga leksyon an aton hinbaroan ha ginbuhat ni (a) Absalon ngan ni Judas (b) Delila?
7 Ano nga leksyon an aton hinbaroan hinin nagpapahamangno nga mga ehemplo? Hi Judas ngan hi Absalon pariho namatay ha makaarawod nga paagi kay gintraydoran nira an dinihogan ni Jehova. (2 Sam. 18:9, 14-17; Buh. 1:18-20) Ngan an ngaran ni Delila pirme nagpapahinumdom han pagkadiri-maunungon ngan diri tinuod nga gugma. (Sal. 119:158) Importante gud nga isalikway naton an tendensya nga magin ambisyoso o hakog, nga magigin hinungdan nga mawara an pag-uyon ni Jehova ha aton! Diri ba mapwersa gud ito nga mga leksyon nga mabulig ha aton nga kangalasan an pagkadiri-maunungon?
SUBARA AN MGA MAUNUNGON
8, 9. (a) Kay ano nga kan David nanumpa hi Jonatan nga magin maunungon? (b) Paonan-o naton masusubad hi Jonatan?
8 Ha Biblia damu liwat an susbaranan ha pagin maunungon. Aton hisgotan an duha ha ira ngan usisahon kon ano nga leksyon an aton hibabaroan. Siyahan hisgotan naton an usa nga nagin maunungon kan David. Hi Jonatan nga suhag nga anak ni Hadi Saul posible gud unta nga magin sunod nga hadi han Israel. Pero hi David an ginpili ni Jehova. Gintahod ni Jonatan an desisyon ni Jehova. Waray hiya maawa kan David o maghunahuna ha iya nga karibal. Lugod, “an kalag ni Jonatan nahakaw-it ha kalag ni David” ngan nanumpa hiya nga magin maunungon kan David. Iginhatag pa ngani niya kan David an iya mga bado, espada, pana, ngan bakos, ha pagpasidungog kan David sugad nga hadi. (1 Sam. 18:1-4) Ginbuhat ni Jonatan an ngatanan basi ‘parig-unon an kamot ni David,’ ngan iya pa ngani iginbutang ha peligro an iya kinabuhi para panalipdan hi David kan Saul. Hi Jonatan maunungon nga nagsiring kan David: “Ikaw mahahadi ha Israel, ngan ako an ikaduha ha imo.” (1 Sam. 20:30-34; 23:16, 17) Salit diri urusahon nga han namatay hi Jonatan, iginpahayag ni David an iya kasubo ngan gugma kan Jonatan pinaagi hin masurub-on nga kanta.—2 Sam. 1:17, 26.
9 Waray magruhaduha hi Jonatan kon kan kanay hiya magigin maunungon. Bug-os nga nagpasakop hiya ha Soberano nga hi Jehova ngan sinuporta ha dinihogan han Dios nga hi David. Yana liwat, bisan kon waray kita hatagi hin espesyal nga pribilehiyo ha kongregasyon, kinahanglan kinaburut-on nga suportahan naton an kabugtoan nga ginpili nga manguna ha aton.—1 Tes. 5:12, 13; Heb. 13:17, 24.
10, 11. (a) Kay ano nga hi Pedro nagpabilin nga maunungon kan Jesus? (b) Paonan-o naton masusubad hi Pedro, ngan ano an sadang naton buhaton?
10 Usa pa nga susbaranan amo hi apostol Pedro nga nagsaad nga magin maunungon kan Jesus. Naggamit hi Kristo hin ilustrasyon basi buligan an iya mga disipulo nga masabtan kon ano kaimportante nga magpakita hira hin pagtoo ha iya lawas ngan dugo nga hirani na ihalad. Diri literal ito nga ilustrasyon, kondi damu an nangirhat hito ngan binaya ha iya. (Juan 6:53-60, 66) Salit hi Jesus nagpakiana ha iya 12 nga apostol: “Karuyag man niyo pagbulag ha akon?” Hi Pedro an binaton: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan. Ngan kami tinoo ngan nakilala, nga ikaw amo an Baraan han Dios.” (Juan 6:67-69) Karuyag ba sidngon nga bug-os nga nasabtan ni Pedro an ngatanan nga ginsiring pa la ni Jesus mahitungod han Iya hihimoon nga paghalad han iya kinabuhi? Bangin diri. Bisan pa hito, determinado hi Pedro nga magin maunungon ha dinihogan nga Anak han Dios.
11 Waray hunahunaa ni Pedro nga bangin sayop la an panhunahuna ni Jesus ngan ha urhi masasantop Niya ito ngan babawion an Iya ginsiring. Lugod, mapainubsanon nga ginkarawat ni Pedro nga hi Jesus an “may mga pulong han kinabuhi nga waray kataposan.” Yana liwat, ano an aton reaksyon kon may mabasa kita ha aton mga publikasyon tikang ha ‘matinumanon nga tinaporan’ nga makuri masabtan o iba ha aton panhunahuna? Kinahanglan mangalimbasog gud kita nga masabtan ito imbes nga maglinaom nga magkakaada pagbag-o nga mauyon ha aton panhunahuna.—Basaha an Lukas 12:42.
MAGPABILIN NGA MAUNUNGON HA IMO PADIS
12, 13. Ano an bangin magin hinungdan nga an usa diri magin maunungon ha iya padis, ngan kay ano nga an edad diri puydi himoon nga pasangil para ha sugad nga paggawi?
12 An bisan ano nga klase hin pagtraydor maraot gud ngan diri sadang tugotan nga makadaot han kamurayawan ngan pagkaurosa han Kristiano nga pamilya ngan han kongregasyon. Salit aton hisgotan kon paonan-o naton mapaparig-on an aton pagkamaunungon ha aton padis ngan ha aton Dios.
13 An pag-adulteryo usa han pinakamasakit nga klase hin pagtraydor. An usa nga nag-adulteryo waray magin maunungon ha iya padis ngan an iya atensyon nahingadto na ha iba. Diri ginlalaoman nga nag-uusahan na la an ginbayaan nga padis ngan bug-os nga nabag-o an iya kinabuhi. Paonan-o ito nahitatabo ha duha nga tawo nga hadto naghigugmaay? Kasagaran nga nagtitikang ito kon an mag-asawa nawawad-an na hin interes ha pagbati han usa kag usa. Hi Gabriella Turnaturi, usa nga propesor ha sociology, nagsiring nga an pagkadiri-maunungon mahimo mahitabo tungod kay diri na ginbubuhat han mag-asawa an ngatanan nga ira mahihimo ha pagparig-on han ira relasyon. Mahimo ito mahitabo bisan ha mga maiha na nga mag-asawa. Pananglitan, usa nga 50 anyos nga lalaki nga 25 ka tuig na nga inasaw-an an nakigdiborsyo ha iya maunungon nga asawa basi makaupod an iba nga babaye nga iya naruruyagan. An iba nasiring nga normal la ito ha mga sugad hito an edad. Kondi an edad diri puydi himoon nga pasangil para ha sugad nga paggawi. An pagin diri maunungon ha padis diri normal. Pagtraydor ito.c
14. (a) Ano an inaabat ni Jehova ha pagkadiri-maunungon ha pag-asawa? (b) Ano an ginsiring ni Jesus mahitungod ha pagkadiri-maunungon ha pag-asawa?
14 Ano an inaabat ni Jehova ha mga nabulag ha ira padis nga waray Kasuratanhon nga hinungdan? An aton Dios “nangangalas han pagbulag,” ngan nagyakan hiya hin mapwersa nga mga pulong kontra ha mga nag-aabuso ngan nag-aabandona ha ira padis. (Basaha an Malakias 2:13-16.) Pariho han iya Amay, hi Jesus nangangalas liwat ha pagkadiri-maunungon ha pag-asawa, ngan iya igintutdo nga diri puydi isalikway o bayaan han usa an iya padis ngan gumios nga baga hin waray nahitabo.—Basaha an Mateo 19:3-6, 9.
15. Paonan-o mapaparig-on han mga inasaw-an an ira pagkamaunungon ha ira padis?
15 Paonan-o an mga inasaw-an makakapabilin nga maunungon ha ira padis? An Pulong han Dios nasiring: “Pagmalipay dida ha asawa [o bana] han imo pagkabatan-on” ngan, “Pag-ukoy ha malipayon kaupod han asawa [o bana] nga imo hinihigugma.” (Prob. 5:18; Ekles. 9:9) Samtang nagtitikalagas an mag-asawa, kinahanglan buhaton nira an ngatanan basi magpabilin nga marig-on an ira relasyon ha pisikal ngan ha emosyonal. Nangangahulogan ito hin paghatag hin atensyon ha usa kag usa, paggahin hin panahon ha usa kag usa, ngan pagin mas duok ha usa kag usa. Kinahanglan mangalimbasog hira nga tipigan an ira pag-asawa ngan an ira relasyon kan Jehova. Basi mahimo ito, an mag-asawa kinahanglan mag-aram han Biblia nga magkaupod, regular nga makigbahin ha ministeryo nga magkaupod, ngan magkaupod nga mag-ampo ha pangaro han bendisyon ni Jehova.
MAGPABILIN NGA MAUNUNGON KAN JEHOVA
16, 17. (a) Ha ano nga paagi an aton pagkamaunungon ha Dios bangin masarihan ha pamilya ngan ha kongregasyon? (b) Ano nga eksperyensya an nagpapakita nga an pagsunod ha sugo han Dios nga diri makig-upod ha mga kapamilya o paryente nga ginpaiwas ha kongregasyon mahimo magkaada maopay nga resulta?
16 May mga membro han kongregasyon nga nakahimo hin dagku nga sala ngan gindisiplina “hin mabaskog, basi hira magmarig-on ha pagtoo.” (Tito 1:13) Tungod han ira paggawi, an iba kinahanglan paiwason ha kongregasyon. “Adton kinmarawat” hito nga disiplina nabuligan nga mapahiuli an ira relasyon ha Dios. (Heb. 12:11, Maopay nga Sumat) Ano man kon may paryente kita o duok nga sangkay nga napaiwas ha kongregasyon? Dida hito masasarihan kon kan kanay kita maunungon—hito ba nga indibiduwal o ha Dios. Hi Jehova nagkikita ha aton kon nasunod ba kita ha iya sugo nga diri makigkomunikar ha bisan hin-o nga ginpaiwas ha kongregasyon.—Basaha an 1 Korinto 5:11-13.
17 Tagda an usa nga ehemplo nga nagpapakita han mahimo magin maopay nga resulta kon an pamilya maunungon nga nasunod ha sugo ni Jehova nga diri makig-upod ha mga kapamilya o paryente nga ginpaiwas ha kongregasyon. An usa nga batan-on nga lalaki sobra 10 ka tuig na nga ginpaiwas ha kongregasyon. Durante hito nga panahon an iya tatay, nanay, ngan upat nga bugto ‘waray makig-upod-upod’ ha iya. May mga panahon nga naghihimo hiya hin paagi nga makaupod hira, pero maopay na la nga an tagsa nga membro han pamilya nagpabilin nga marig-on ha diri pakigkomunikar ha iya. Han nakabalik na hiya ha kongregasyon, siring niya nga hadto pirme hiya namimingaw ha iya pamilya labi na ha gab-i kon nag-uusahan la hiya. Kondi siring niya nga kon nakig-upod hira ha iya hin bisan madaliay la, makukontento na unta hiya. Kondi tungod kay waray gud hira makigkomunikar ha iya ha bisan ano nga paagi, an iya duro nga hingyap nga makaupod hira an usa nga hinungdan nga karuyag niya mapahiuli an iya relasyon kan Jehova. Hinumdumi ito kon nasusulay ka nga talapason an sugo han Dios nga diri makig-upod ha imo mga kapamilya o paryente nga ginpaiwas ha kongregasyon.
18. Katapos hisgotan an mga kapulsanan han pagin maunungon ngan an magraot nga resulta han pagkadiri-maunungon, ano an imo determinasyon?
18 Nagkikinabuhi kita ha kalibotan nga kalyap an pagtraydor ngan pagkadiri-maunungon. Kondi ha Kristiano nga kongregasyon damu an maunungon nga kabugtoan nga puydi naton subaron. An ira paagi han pagkinabuhi nagpapamatuod mahitungod ha ira, nga sugad hin nasiring: “Mga testigo kamo, pati an Dios, kon mationan-o kami kamaunungon, kamatadong ngan kawaray-sayop ha iyo nga mga tumuroo.” (1 Tes. 2:10, NW) Hinaot kita ngatanan magpabilin gud nga maunungon ha Dios ngan ha usa kag usa.
[Mga footnote]
a An gintikangan han kusog ni Samson diri an iya buhok mismo kondi an ginsimbolohan hito—an iya espesyal nga relasyon kan Jehova sugad nga Nasareo.
b Salit an ekspresyon nga “harok ni Judas” nangangahulogan hin “pagtraydor.”
c Para han bulig ha pag-atubang han pagkadiri-maunungon han padis, kitaa an artikulo nga “Kon Paonan-o Malalamposan an Pagkadiri-Maunungon han Imo Padis,” ha Hunyo 15, 2010 nga An Barantayan, pahina 29-32.
[Retrato ha pahina 10]
Hi Pedro maunungon ha dinihogan nga Anak han Dios bisan kon ginsalikway Hiya han iba