Nahihinumdoman Mo Ba?
Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:
Ha ano nga paagi hi Salomon usa nga ehemplo nga nagpapahamangno ha aton?
Ginbendisyonan ngan gin-gamit han Dios hi Hadi Salomon. Kondi durante han pagmando ni Salomon, inundang hiya ha pagsunod ha sagdon han Dios. Ginpakasalan niya an pagano nga anak nga babaye han Paraon, nag-asawa hiya hin damu nga kababayin-an, ngan hinay-hinay nga nagpaimpluwensya hiya ha pagano nga kababayin-an ha pagsingba ha mga dios-dios. Kinahanglan likyan naton nga hinay-hinay nga magkaada sayop nga mga disposisyon o tendensya. (Deut. 7:1-4; 17:17; 1 Hadi 11:4-8)—12/15, pahina 10-12.
Kay ano nga mahimo naton tagdon hi Sara sugad nga diosnon nga babaye ngan birilhon nga asawa?
Han ginsugo han Dios hi Abraham nga bumaya ha Ur, nangahulogan ito hin pagbaya ha ira pamilya, kasangkayan, ngan paagi han pagkinabuhi basi kumadto ha lugar nga diri nira hinbabaroan. Kondi nakigkooperar hi Sara, nasarig nga bibendisyonan hiya ni Jehova. May pagtahod hiya kan Abraham ngan nagpakita hin mag-opay nga kalidad.—1/1, pahina 8.
Kay ano nga ginhangyo ni Jehova hi Abraham nga ihalad an iya hinigugma nga anak?
Importante nga hinumdoman naton nga waray tuguti han Dios hi Abraham nga ipadayon an paghalad kan Isaak. Ito nga hitabo usa nga paagi han pagpakita han Dios nga ihahalad niya an iya Anak nga hi Jesus bisan kon daku ito nga sakripisyo para ha iya.—1/1, pahina 23.
Ano an nagpapakita nga tikang ha siyahan nga siglo, pirme may-ada pipira nga tinuod nga dinihogan nga Kristiano dinhi ha tuna?
Ha parabola ni Jesus mahitungod han “trigo” ngan han “lakatan,” an “maopay nga gahi” nangangahulogan han “mga anak han ginhadian.” (Mat. 13:24-30, 38) An lakatan matubo upod han trigo tubtob ha panahon han pag-ani. Salit bisan kon diri kita sigurado kon hin-o hadto an kaapi ha trigo nga klase, makakasiguro kita nga pirme may-ada pipira nga kaapi hito tubtob ha aton panahon.—1/15, pahina 7.
Ano an mga mahitatabo antes gud han Armagedon?
An mga nasud magpapagowa hin makatirigamnan nga deklarasyon han “Kamurayawan ngan kasigurohan!” (1 Tes. 5:3, NW) Aatakehon han mga gobyerno an buwa nga mga relihiyon. (Pah. 17:15-18) Magkakaada pag-atake ha mga magsiringba han tinuod nga Dios. Katapos, maabot na an kataposan.—2/1-E, pahina 9.
Paonan-o kita mangangalimbasog nga malamposan an tendensya nga maawa?
Ini an makakabulig ha aton: Pangalimbasog nga kultibaron an gugma ngan minagburugto nga pagbati, pakiupod ha katawohan nga nag-aalagad ha Dios, pamiling hin mga paagi ha pagbuhat hin maopay, ngan ‘magkalipay upod ha mga nagkakalipay.’ (Roma 12:15)—2/15, pahina 16-17.
Hin-o an nagyayakan han Nahuatl nga pinulongan, ngan ano an ginbubuhat para ha ira?
Ito an pinulongan han mga Aztec ha kadaan nga panahon, kondi ito pa gihapon an yinaknan han 1.5 milyon ka tawo ha Mexico. An mga Saksi nagsasangyaw ha Nahuatl nga pinulongan, ngan may mga literatura kita hito nga pinulongan.—3/1-E, pahina 13-14.
Kon nagsasagdon, ano nga mga prinsipyo an sadang naton hinumdoman?
Hibaroi an tinuod nga sitwasyon. Ayaw dayon pagbaton. Mapainubsanon nga gamita an Pulong han Dios. Kon posible, gamita an mga publikasyon nga basado ha Biblia. Ayaw pagdesisyon para ha iba.—3/15, pahina 7-9.
Ginsidngan ni Jesus an iya mga mamarati nga umupod hin duha ka milya. (Mat. 5:41) Ano an iya iginpapasabot?
Hito nga panahon, an Israel sakop han mga Romano, salit an usa mahimo obligaron han mga Romano nga magserbisyo. Han ginsidngan ni Jesus an iya mga mamarati nga umupod hin duha ka milya, karuyag niya ipasabot nga sadang nira buhaton hin malipayon an mga serbisyo nga makatadunganon nga iginpapabuhat han awtoridad.—4/1, pahina 9.