Ginpapanalipdan Kita ni Jehova Basi Maluwas
‘Kamo ginbabantayan han gahum han Dios pinaagi ha pagtoo ngadto ha kaluwasan nga andam pagpahayag ha urhi nga panahon.’—1 PED. 1:4, 5.
ANO AN IMO BATON?
Paonan-o kita iginpahirani ni Jehova ha tinuod nga pagsingba?
Paonan-o kita magpapagiya kan Jehova pinaagi han iya sagdon?
Paonan-o kita gindadasig ni Jehova?
1, 2. (a) Ano an pasarig ha aton nga bubuligan kita han Dios nga magpabilin nga matinumanon? (b) Ano kakilala ni Jehova an tagsa ha aton?
“AN MAGPADAYON tubtob ha kataposan, ini amo an maluluwas.” (Mat. 24:13) Pinaagi hini nga mga pulong, iginpatin-aw ni Jesus nga basi maluwas kita kon ipadapat na han Dios an iya paghukom ha kalibotan ni Satanas, kinahanglan magpabilin kita nga matinumanon tubtob ha kataposan. Kondi diri ini nangangahulogan nga naglalaom hi Jehova nga mahihimo naton ito ha aton kalugaringon nga kinaadman o kusog. An Biblia nagpapasarig ha aton: “An Dios matinumanon, nga diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.” (1 Kor. 10:13) Ano an iginpapasabot hito?
2 Basi masiguro ni Jehova nga diri kita sulayon labaw han aton maaakos, kinahanglan maaram hiya han ngatanan mahitungod ha aton, pati na an aton mga problema, an aton pagkatawo, ngan kon tubtob diin an aton maiilob. Nakilala gud ba ha aton an Dios? Oo. Iginpapakita han Kasuratan nga maaram hi Jehova han ngatanan mahitungod ha aton. Maaram hiya han aton rutina kada adlaw ngan han aton batasan. Nababasa pa ngani niya an aton hunahuna ngan kasingkasing.—Basaha an Salmo 139:1-6.
3, 4. (a) Paonan-o iginpapakita han eksperyensya ni David nga hi Jehova interesado gud ha tagsa ha aton? (b) Ano an makatirigamnan nga ginbubuhat ni Jehova yana?
3 Diri gud ba katoohan nga an Dios magpapakita hin sugad nga interes ha aton nga mga tawo la? Ginpamalandong han salmista nga hi David ini nga pakiana, ngan nagsiring hiya kan Jehova: “Kon gintatan-aw ko an imo kalangitan, nga amo an binuhat han imo mga tudlo, an bulan ngan an mga bitoon nga imo ginpahimutang; ano la an tawo nga basi mo hiya mahinumdoman?” (Sal. 8:3, 4) Posible nga iginpakiana ini ni David tungod han iya mismo naeksperyensyahan. Han hi David, an puto nga anak ni Jesse, usa pa la nga batan-on nga magbarantay hin karnero, gintagad hiya ni Jehova nga “tawo nga iya karuyag” ngan ginpili hiya nga magin lider han Israel. (1 Sam. 13:14, Maopay nga Sumat; 2 Sam. 7:8) Hunahunaa la an posible gud nga gin-abat ni David han iya nasantop nga an Maglalarang han uniberso interesado gud ha iya ginhunahuna ngan mga pagbati bisan kon magbarantay la hiya hin karnero!
4 Mahipapausa gud liwat kita kon aton papamalandungon an iginpapakita ni Jehova nga interes ha aton yana. Iya gintitirok ha tinuod nga pagsingba “an birilhon nga mga butang han ngatanan nga nasud,” ngan ginbubuligan niya an iya mga surugoon nga magpabilin nga matinumanon. (Hag. 2:7) Basi mas masabtan kon paonan-o kita ginbubuligan ni Jehova nga magpabilin nga matinumanon, hisgotan anay naton kon paonan-o niya iginpapahirani an mga tawo ha tinuod nga pagsingba.
IGINPAHIRANI HAN DIOS
5. Paonan-o iginpapahirani ni Jehova an mga tawo ha iya Anak? Paghatag hin ehemplo.
5 Hi Jesus nagsiring: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” (Juan 6:44) Iginpapasabot hito nga basi magin disipulo ni Kristo, ginkikinahanglan naton an bulig han Dios. Paonan-o iginpapahirani ni Jehova ha iya Anak an mga tawo nga sugad-karnero? Pinaagi han pagsangyaw han maopay nga sumat ngan han paggios han baraan nga espiritu. Pananglitan, han hi Pablo ngan an iya mga kaupod nga misyonero nakadto ha Filipos, nakilala nira hi Lydia ngan ginsangyawan hiya han maopay nga sumat. An Biblia nasiring: “An iya kasingkasing binuksan han Ginoo, basi makapamati gud han mga bagay nga ginyayakan ni Pablo.” Oo, gin-gamit han Dios an iya baraan nga espiritu basi buligan hi Lydia nga masabtan ngan karawaton an mensahe, salit nagpabawtismo hiya ngan an iya panimalay.—Buh. 16:13-15.
6. Paonan-o kita ngatanan iginpahirani han Dios ha tinuod nga pagsingba?
6 Kan Lydia la ba ito nahitabo? Diri gud. Kon usa ka nga dedikado nga Kristiano, ikaw liwat iginpahirani han Dios ha tinuod nga pagsingba. Sugad la nga an aton langitnon nga Amay may nakita nga birilhon ha kasingkasing ni Lydia, may nakita liwat Hiya nga maopay ha imo. Han nagtikang ka pagpamati ha maopay nga sumat, gin-gamit ni Jehova an iya baraan nga espiritu basi buligan ka nga masabtan ito. (1 Kor. 2:11, 12) Han nangalimbasog ka nga iaplikar an imo hinbaroan, ginbendisyonan niya an imo pangalimbasog nga buhaton an iya kaburut-on. Han igindedikar mo ha iya an imo kinabuhi, nalipay an iya kasingkasing. Oo, tikang han naglakat ka ha dalan ngadto ha kinabuhi, kaupod mo hi Jehova ha tagsa mo nga pitad.
7. Kay ano nga makakasiring kita nga bubuligan kita han Dios nga magpabilin nga matinumanon?
7 Tungod kay ginbuligan kita ni Jehova nga magtikang paglakat upod ha iya, diri kita niya papabay-an nga maglugaring pangalimbasog nga makapabilin nga matinumanon. Maaram hiya nga sugad la nga waray kita mahibaro han kamatuoran ha aton la kalugaringon nga pangalimbasog, diri liwat kita magpapabilin ha kamatuoran ha aton la kalugaringon nga pangalimbasog. Ha surat ni apostol Pedro ha dinihogan nga mga Kristiano, hiya nagsiring: ‘Kamo ginbabantayan han gahum han Dios pinaagi ha pagtoo ngadto ha kaluwasan nga andam pagpahayag ha urhi nga panahon.’ (1 Ped. 1:4, 5) An prinsipyo hini nga mga pulong aplikado ha ngatanan nga Kristiano, ngan an tagsa ha aton yana sadang magin interesado hito. Kay ano? Kay ginkikinahanglan naton ngatanan an bulig han Dios basi makapabilin kita nga matinumanon ha iya.
GINPUPUGNGAN BASI DIRI MAKABUHAT HIN SAYOP
8. Kay ano nga bangin mameligro kita nga makabuhat hin daku nga sayop?
8 An mga problema ngan an aton pagkadiri-hingpit mahimo magin hinungdan nga an aton panhunahuna diri na magin pariho han panhunahuna ni Jehova. Tungod hito bangin diri ngani naton masantop nga namimeligro na kita nga makabuhat hin daku nga sayop. (Basaha an Galasia 6:1.) Igin-iilustrar ini han usa nga hitabo ha kinabuhi ni David.
9, 10. Paonan-o ginpugngan ni Jehova hi David nga diri makabuhat hin daku nga sayop, ngan ano an Iya ginbubuhat para ha aton yana?
9 Han ginlilinanat hi David ni Hadi Saul, hi David nagpakita hin daku nga pagpugong ha kalugaringon pinaagi han diri pagbulos hiton maabugho nga hadi. (1 Sam. 24:2-7) Kondi waray pag-iha katapos hito, nadaog hiya han iya pagkadiri-hingpit. Nagkinahanglan hiya hin pagkaon ngan tubig para ha iya kalugaringon ngan ha iya kaupod nga kalalakin-an ngan matinalahuron nga nangaro hin bulig ha iya igkasi-Israelita nga hi Nabal. Gin-insulto ni Nabal hi David ngan diniri pagbulig ha iya. Nasina hinduro hi David ngan nagdesisyon pagbulos kan Nabal ngan ha iya bug-os nga panimalay. Waray masantop ni David nga magigin salaan hiya ha dugo ha atubangan han Dios kon iya papatayon an inosente nga mga tawo. Kondi an asawa ni Nabal nga hi Abigail nagpugong kan David basi diri niya mahimo inin daku nga sayop. Nasantop ni David nga gin-gamit ni Jehova hi Abigail ha pagpanalipod ha iya, salit nagsiring hiya kan Abigail: “Bulahan hi Jehova, an Dios han Israel, nga nagpadara ha imo hini nga adlaw pakigkita ha akon: ngan bulahan an imo sarabotan, ngan bulahan ka, nga nagpugong ha akon niyan nga adlaw ha pakasala tungod han pagpaagay hin dugo, ngan ha pagpanimalos pinaagi han akon kalugaringon nga kamot.”—1 Sam. 25:9-13, 21, 22, 32, 33.
10 Ano nga leksyon an aton hibabaroan hini nga asoy? Gin-gamit ni Jehova hi Abigail basi pugngan hi David nga diri makabuhat hin daku nga sayop. Ginbubuhat liwat niya ito para ha aton yana. Syempre, diri naton sadang laoman nga may susugoon an Dios ha pagpugong ha aton ha kada panahon nga hirani na gud kita magsayop. Diri liwat kita maaram kon paonan-o magios an Dios ha bisan ano nga kahimtang o kon ano an iya itutugot nga mahitabo basi matuman an iya katuyoan. (Ekles. 11:5) Bisan pa hito, makakasarig kita nga hi Jehova pirme maaram han aton kahimtang ngan bubuligan kita niya nga magpabilin nga matinumanon ha iya. Hiya nagpapasarig ha aton: “Paglaladngan ko ikaw ngan igsusulsog ko ikaw han dalan nga imo kakadtoan: sasagdonan ko ikaw ngan ha bawbaw nimo ibubutang ko an akon mata.” (Sal. 32:8) Paonan-o kita ginsasagdonan ni Jehova? Paonan-o kita makakapahimulos hito? Ngan kay ano nga makakasiguro kita nga ginigiyahan ni Jehova an iya katawohan yana? Tagda kon paonan-o ito nga mga pakiana ginbabaton ha libro han Pahayag.
GINPAPANALIPDAN PINAAGI HIN SAGDON
11. Ano gud an hinbabaroan ni Jehova mahitungod han nahitatabo ha mga kongregasyon han iya katawohan?
11 Ha bisyon nga nakarekord ha Pahayag kapitulo 2 ngan 3, gin-usisa han ginhimaya nga hi Jesu-Kristo an pito nga kongregasyon ha Asia Minor. Iginpapakita han bisyon nga nakikita ni Kristo diri la an kabug-osan nga nahitatabo kondi pati na an espisipiko nga mga sitwasyon. Ha pipira nga kahimtang, nag-unabi pa ngani hiya hin mga indibiduwal, ngan naghatag hiya hin kumendasyon o sagdon nga ginkinahanglan han tagsa nga kongregasyon. Ano an iginpapasabot hito? Ha katumanan han bisyon, an pito nga kongregasyon nagrirepresentar han dinihogan nga mga Kristiano katapos han 1914, ngan an prinsipyo han iginsagdon ha pito nga kongregasyon aplikado ha ngatanan nga kongregasyon han katawohan han Dios ha tuna yana. Salit makakasiring kita nga ginigiyahan ni Jehova an Iya katawohan pinaagi han iya Anak. Paonan-o kita makakapahimulos hito nga paggiya?
12. Paonan-o kita magpapagiya kan Jehova?
12 Usa nga paagi nga makakapahimulos kita ha mahigugmaon nga paggiya ni Jehova amo an personal nga pag-aram. Pinaagi han mga publikasyon han matinumanon ngan maaramon nga uripon, hi Jehova nagtatagana hin damu nga sagdon tikang ha Kasuratan. (Mat. 24:45) Kondi basi makapahimulos hito, kinahanglan maggahin kita hin panahon ha pag-aram hito ngan pag-aplikar han aton hinbabaroan. An personal nga pag-aram usa nga paagi nga hi Jehova ‘nagbabantay ha aton ha paghipakdol.’ (Jud. 24) May gin-adman ka na ba ha aton mga publikasyon nga baga hin iginsurat para gud ha imo? Karawata ito sugad nga pagtadong tikang kan Jehova. Sugad la nga bangin tapikon ka han usa nga sangkay kon may karuyag hiya ipakita ha imo, mahimo gamiton ni Jehova an iya espiritu basi ipakita ha imo an usa nga bahin han imo paggawi o personalidad nga kinahanglan mo pauswagon, ngan han iba liwat nga pariho ha imo. Kon ginsusunod naton an paggiya han espiritu, nagpapagiya kita kan Jehova. (Basaha an Salmo 139:23, 24.) May kalabotan hini, maopay nga usisahon naton kon ano kadaku nga panahon ngan pangalimbasog an aton ginagamit ha pag-aram.
13. Kay ano nga maaramon nga usisahon naton kon ano kadaku nga panahon ngan pangalimbasog an aton ginagamit ha pag-aram?
13 An paggahin hin daku nga panahon ha kaliawan makakaubos han aton panahon nga ginkikinahanglan ha personal nga pag-aram. An usa nga bugto nagsiring: “Masayon gud la maibalewaray an personal nga pag-aram. Mas damu na yana an kaliawan, ngan mas barato na ito. May-ada hito ha TV, kompyuter, ngan telepono. Napapalibotan kita hito.” Kon diri kita mag-ikmat, bangin hinay-hinay nga magtikadaku an panahon nga aton igin-gagahin ha kaliawan tubtob nga waray na kita panahon ha personal nga pag-aram ngan pamalandong. (Efe. 5:15-17) An tagsa ha aton sadang magpakiana: ‘Ano kaagsob ako naggagahin hin panahon ha pag-aram han higlarom nga butang ha Pulong han Dios? Ginbubuhat ko la ba ito kon nag-aandam ako hin pahayag o bahin ha katirok?’ Kon amo, bangin mas maopay nga gamiton naton an panahon nga igin-gahin para ha pagsingba han pamilya o personal nga pag-aram basi pag-adman an higlarom nga butang ha Biblia ngan pamilngon an kinaadman ni Jehova nga sugad hin bahandi. Ito nga kinaadman makakapanalipod ha aton ngan makakabulig basi magpabilin kita nga matinumanon tubtob ha kataposan.—Prob. 2:1-5.
GINPAPARIG-ON HAN PAGDASIG
14. Paonan-o iginpapakita han Biblia nga interesado gud hi Jehova ha aton mga pagbati?
14 Hi David nakaeksperyensya hin damu nga makuri ngan makasurubo nga kahimtang ha iya kinabuhi. (1 Sam. 30:3-6) Iginpapakita han Biblia nga maaram hi Jehova han iya mga pagbati. (Basaha an Salmo 34:18; 56:8.) Maaram liwat an Dios han aton mga pagbati. Nakakaliaw ha aton an paghinumdom nga an Dios maaram kon kita “may masinakitnon nga kasingkasing” ngan masurub-on gud. Nakaliaw ito kan David, nga nagkanta: “Malilipay ako ngan maandak dida hiton imo ginkaloy-an; kay ikaw nakakakita han akon kagol-anan: . . . Nakilala mo an kakurian han akon kalag.” (Sal. 31:7) Kondi labaw pa an ginbubuhat ni Jehova kay ha paghibaro la han aton kakurian. Ginpaparig-on kita niya pinaagi han pagliaw ngan pagdasig ha aton. Usa nga paagi nga iya ginagamit amo an Kristiano nga mga katirok.
15. Ano nga leksyon an aton hibabaroan ha naeksperyensyahan ni Asap?
15 An usa nga kapulsanan han pagtambong ha mga katirok igin-iilustrar han naeksperyensyahan han salmista nga hi Asap. Tungod kay iya ginhinunahuna an mga kawaray hustisya, nagruhaduha hiya kon mapulsanon ba an pag-alagad ha Dios. Nanluya hiya. Sugad hini an iya pagsaysay han iya inabat: “An akon kalag nasubo, nabasoni ako didi han akon kasingkasing.” Tungod hito, hapit na hiya umundang ha pag-alagad kan Jehova. Ano an nakabulig kan Asap nga matadong an iya panhunahuna? “Kinadto ako ha kanan Dios lugar nga baraan,” siring niya. Didto, upod han iya mga igkasi-magsiringba ni Jehova, nahibalik an iya husto nga panhunahuna. Nasantop niya nga temporaryo la an kalamposan han magraot ngan sigurado nga tatadungon ni Jehova an kawaray hustisya. (Sal. 73:2, 13-22) Usahay bangin sugad liwat hito an aton inaabat. An kawaray hustisya nga nahitatabo ha kalibotan ni Satanas nakakaistres ngan nakakapaluya ha aton. An pagtambong ha mga katirok upod han kabugtoan nakakarepresko ha aton ngan nabulig ha aton nga magpabilin nga malipayon ha pag-alagad kan Jehova.
16. Paonan-o makakabulig ha aton an susbaranan ni Hana?
16 Kondi ano man kon may nahitabo ha kongregasyon nga tungod hito nakukurian ka pagtambong ha mga katirok? Bangin kinahanglan mo umundang ha imo pribilehiyo ngan naaawod ka, o nagkaada kamo diri pagsinabtanay han usa nga bugto. Kon ito an imo kahimtang, makakabulig ha imo an susbaranan ni Hana. (Basaha an 1 Samuel 1:4-8.) Hinumdumi nga nasusubo gud hiya tungod han ginhihimo ni Penina, an usa pa nga asawa han iya bana. Nagigin mas makuri gud an kahimtang ni Hana kon an ira pamilya napakadto ha Shilo kada tuig ha paghalad kan Jehova. Nakapasubo gud ito kan Hana salit “hiya nagtuok, ngan waray kumaon.” Pero waray niya ito himoa nga hinungdan nga diri na kumadto ha lugar diin makakasingba hiya kan Jehova. Nakita ni Jehova an iya pagkamatinumanon ngan ginbendisyonan hiya.—1 Sam. 1:11, 20.
17, 18. (a) Ha ano nga mga paagi kita nakakakarawat hin pagdasig ha mga katirok? (b) Ano an imo inaabat ha mahigugmaon nga pagmangno ni Jehova ha aton basi buligan kita nga maluwas?
17 Maopay nga subaron han mga Kristiano yana hi Hana. Kinahanglan regular kita nga tumambong ha mga katirok. Sugad han naeksperyensyahan na naton ngatanan, ha mga katirok nakakarawat naton an pagdasig nga aton ginkikinahanglan. (Heb. 10:24, 25) Naliliaw kita han mahigugmaon nga pakig-upod han kabugtoan. An ginsisiring ha usa nga pahayag o komento bangin makabantad ha aton kasingkasing. Antes o katapos han katirok, bangin may makaistorya kita nga bugto nga namamati ha aton o nagyayakan hin mga pulong nga nakakaliaw ha aton. (Prob. 15:23; 17:17) Samtang nagkakanta kita kan Jehova, nadadasig ngan nalilipay kita. Labi na nga ginkikinahanglan naton an pagdasig nga aton nakakarawat ha mga katirok kon ‘nababaraka ngan nagugupong’ kita. Ha mga katirok ginpaparig-on kita ni Jehova pinaagi han iya “mga pagliaw” ngan ginbubuligan kita ha aton determinasyon nga magpabilin nga matinumanon.—Sal. 94:18, 19; Maopay nga Sumat.
18 Tungod han mahigugmaon nga pagmangno han aton Dios, naabat kita hin kasigurohan pariho han inabat han salmista nga hi Asap nga nagkanta kan Jehova: “Imo ginkaptan an akon too nga kamot. Imo ako pagmamandoan han imo sagdon.” (Sal. 73:23, 24) Mapasalamaton gud kita nga ginpapanalipdan kita ni Jehova basi maluwas!
[Retrato ha pahina 28]
Ikaw liwat iginpahirani ni Jehova ha tinuod nga pagsingba
[Retrato ha pahina 30]
Napapanalipdan kita kon aton gin-aaplikar an sagdon han Dios
[Retrato ha pahina 31]
Napaparig-on kita han pagdasig nga aton nakakarawat