Ukuncokola Nommelwane—Ngaba Bonke Abantu Abalungileyo Baya Ezulwini?

AMANGQINA KAYEHOVA ayakuthanda ukuncokola nabamelwane bawo ngeBhayibhile. Ngaba ukho umbandela weBhayibhile owakhe wanombuzo ngawo? Ungathanda ukwazi iinkolelo zamaNgqina kaYehova? Ukuba kunjalo, ungabi mathidala ukuwabuza xa udibana nawo. Aya kuyiphendula imibuzo yakho.

AmaNgqina kaYehova adla ngokuncokola kanje nabantu. Makhe sithi iNgqina ekuthiwa ngUMarcus lincokola nomninimzi ekuthiwa ngURobert.

Yintoni Abayokuyenza Ezulwini Abo Baya Khona?

UMarcus: Xa ujonga kwikamva, ngaba ucinga izinto ziza kuphucuka, ziza kuya zisiba mbi okanye ziza kuhlala zinje?

URobert: Ndivakalelwa ukuba ziza kuphucuka. Ndijonge phambili ukuya ezulwini ukuze ndibe kunye neNkosi.

UMarcus: Lithemba elihle elo. IBhayibhile ithetha okuninzi ngendlela izulu elililo nangelungelo lokuya khona. Ngaba wakhe wacinga ukuba yintoni eyokwenziwa ezulwini ngabo baya khona?

URobert: Siya kuhlala noThixo size simdumise ngonaphakade.

UMarcus: Ngokuqinisekileyo lithemba elihle elo. Okunik’ umdla, kukuba iBhayibhile ayithethi kuphela ngamalungelo abaza kuwafumana abo baya khona kodwa ikwathetha nangomsebenzi abaza kuwenza.

URobert: Nguwuphi ke lowo?

UMarcus: Uchazwe apha kwiSityhilelo 5:10. Le vesi ithi: “Wabenza [uYesu] baba bubukumkani nababingeleli kuThixo wethu, yaye baza kulawula njengookumkani phezu komhlaba.” Ngaba uyaqhaphela Mthunzi, ukuba lo msebenzi abo baya ezulwini abaza kuwenza?

URobert: Ithi baza kulawula njengookumkani phezu komhlaba.

UMarcus: Oku kubangela umdla, akunjalo?

Baza Kulawula Bani?

UMarcus: Ngoku ke, ngaba akuvumi na ukuba abo baza kulawula ezulwini njengookumkani, bamele babe nabantu abaza kubalawula? Ngapha koko, iba yintoni injongo yokumisela urhulumente kungekho bantu aza kubalawula?

URobert: Ndiyayifumana ingongoma.

UMarcus: Ngoko ke, umbuzo ekusengqiqweni ukuwubuza ngulo, Baza kulawula bani?

URobert: Ndicinga ukuba siza kulawula abantu abalapha emhlabeni abangekabhubhi baze baye ezulwini.

UMarcus: Oko kusengqiqweni—ukuba bonke abantu abalungileyo baya ezulwini. Kodwa ikho nenye inkalo esinokukhe siyihlole. Akungebi bethu abantu—abanye abalungileyo—abazukuya ezulwini?

URobert: Andizange ndeva ngamaKristu akholelwa kuloo nto.

UMarcus: Lo mbuzo ndiwubuza ngenxa yoko sikufunda kwiNdumiso 37:29. Khawuyifunde le vesi.

URobert: Kulungile. Ithi: “Amalungisa aya kuwudla ilifa umhlaba, Ahlale kuwo ngonaphakade.”

UMarcus: Enkosi. Ngaba uqaphele ukuba uninzi lwabantu abalungileyo luza kuhlala phi?

URobert: Le vesi ithi baza kuhlala emhlabeni.

UMarcus: Kunjalo kanye—futhi abazukuhlala nje ithuba elincinane. Qaphela kwakhona ukuba le vesi ithi: “Ahlale kuwo ngonaphakade.”

URobert: Mhlawumbi oko kuthetha ukuba kuya kusoloko kukho abantu abalungileyo emhlabeni. Xa sisifa size siye ezulwini, kuza kuzalwa abanye abantu abalungileyo abaza kungena endaweni yethu.

UMarcus: Abantu abaninzi bebeya kuyitolika ngaloo ndlela le vesi. Kodwa akungebi le vesi ithetha into eyahluke kwaphela kunaleyo? Ngaba ithi abantu abalungileyo bona ngokwabo baya kuhlala emhlabeni ngonaphakade?

URobert: Andikulandeli ukuba ufuna ukuthini.

IParadesi Esemhlabeni Yexesha Elizayo

UMarcus: Kwakhona, khawuqwalasele ukuba ithini iBhayibhile ngokuphathelele ubomi emhlabeni kwikamva. Masifunde iSityhilelo 21:4. Ngokuphathelele abantu abaza kuphila kwikamva, le vesi ithi: “Uya [uThixo] kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Ngaba alivuyisi eli themba?

URobert: Ewe liyavuyisa. Kodwa ndicinga ukuba apha iBhayibhile ithetha ngendlela ubomi obuza kuba yiyo ezulwini.

UMarcus: Ewe, liyinyaniso elokuba abo baza kuphila ezulwini baza kufumana iintsikelelo ezifanayo. Kodwa khawuphinde uqwalasele le vesi kwakhona. Ithi kuza kwenzeka ntoni ngokufa?

URobert: Ithi “kungabi sabakho kufa.”

UMarcus: Uchan’ ucwethe. Ngoko ke, umele ukuba uyavumelana nam xa kusithiwa into ethile ayizukubakho kwakhona, kuthetha ukuthi ibikho ngaphambili.

URobert: Kunjalo.

UMarcus: Kodwa akuzange khe kubekho ukufa ezulwini, akunjalo na? Kulapha emhlabeni apho abantu babhubhayo.

URobert: Kwekhu! Kuza kufuneka ndicinge ngale nto.

UMarcus: Uyabona Robert, iBhayibhile ifundisa ukuba abantu abathile abalungileyo baza kuya kuphila ezulwini kodwa abantu abaninzi baza kuphila emhlabeni ngonaphakade. Eneneni, ndiqinisekile ukuba uvile ngala mazwi adumileyo athi: “Banoyolo abanobulali; ngokuba umhlaba baya kuwudla ilifa bona.”—Mateyu 5:5, IBhayibhile YesiXhosa.

URobert: Ewe, ndiyivile loo vesi ifundwa ecaweni amaxesha amaninzi.

UMarcus: Ukuba abalulamileyo baza kuwudla ilifa umhlaba, ngaba loo nto ithetha ukuba baza kuphila emhlabeni? Abo baza kuphila emhlabeni baza kunandipha iingenelo ezichazwe kusengaphambili kwiSityhilelo. Baza kubona umhlaba wethu utshintsha ngokupheleleyo kuba uThixo uza kuphelisa yonke into embi—nkqu nokufa.

URobert: Ndiya kubona apho uya khona, kodwa andiqondi ukuba ungabambelela nje kwivesi enye okanye ezimbini ukuze uxhase ingongoma yakho.

UMarcus: Ewe. Eneneni, kukho iZibhalo eziliqela ezithetha ngendlela ubomi obuza kuba yiyo apha emhlabeni. Mhlawumbi ndingakhe ndikubonise ezinye zezona vesi ndizithandayo, ukuba unalo ixesha?

URobert: Ewe, ndinayo imizuzu embalwa.

“Angabikho Ongendawo”

UMarcus: Ngaphambilana siye safunda ivesi 29 kwiNdumiso 37. Masiphinde sibuyele kuyo. Kodwa kwesi isihlandlo, siza kufunda eye-10 neye-11. Khawuncede usifundele ezi vesi.

URobert: Kulungile. Zithi ke: “Kusele ithutyana, angabikho ongendawo; Uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”

UMarcus: Enkosi. Uqwalasele phaya kwivesi 11, ukuba baza kuhlala phi “abalulamileyo,” okanye abantu abalungileyo?

URobert: Ithi “baya kuwudla ilifa umhlaba.” Noko ke, ndicinga ukuba le vesi ibhekisela kweli xesha lethu, ngapha koko, abantu abalungileyo baphila emhlabeni kanye ngoku.

UMarcus: Kunjalo kanye. Noko ke, qaphela ukuba kwale vesi ithi abantu abalungileyo baza kuziyolisa “ngobuninzi boxolo.” Ngaba lukho uxolo emhlabeni namhlanje?

URobert: Hayi, Alukho.

UMarcus: Ngoko ke, siza kuzalisekiswa njani esi sithembiso? Mhlawumbi singenza olu thelekiso: Masithi unendlu oyiqashisileyo. Abanye babantu abahlala kule ndlu balungile—bayayinyamekela indawo abahlala kuyo yaye bafuna ukuba ngabamelwane abalungileyo kwabanye. Uyakuvuyela ukuqeshisa ngendlu yakho kubo. Kodwa abanye abahlala kwakule ndlu abalunganga; bayayonakalisa yaye babaphethe kakubi abanye. Ngoko ke, ukuba aba bangalunganga abafuni kutshintsha, yintoni oza kuyenza?

URobert:Ndiza kubagxotha.

UMarcus: Uza kwenza kanye loo nto uThixo kubantu abangalunganga abasingqongileyo. Khawuphinde ujonge ivesi ye-10. Ithi: “Angabikho ongendawo.” Ngamanye amazwi, uThixo uza “kubagxotha” abantu abaphatha kakubi abanye. Emva koko abantu abalungileyo baya kutsho baphile ngoxolo emhlabeni. Ndiyaqonda ukuba le nto yokuba abantu abalungileyo baza kuhlala emhlabeni ngonaphakade isenokuba yahlukile kuleyo ubuyifundiswa ngaphambili.

URobert: Ewe, andizange khe ndiyive loo nto ecaweni yam.

UMarcus: Yaye njengoko ubusele utshilo ngaphambilana, akwanelanga ukuhlola nje ivesi enye okanye ezimbini ngalo mba. Enyanisweni, kufuneka siyihlolisise yonke iBhayibhile ngokuphathelele ikamva labantu abalungileyo. Kodwa ngokusuka eZibhalweni esiye sazifunda, ngaba ucinga ukuba inako ukwenzeka into yokuba abantu abathile abalungileyo baza kuya ezulwini, ngoxa abanye abantu abaninzi abalungileyo beza kuphila apha emhlabeni ngonaphakade?

URobert: Andiqinisekanga. Kodwa mandivume ukuba ibonakala ngathi injalo ngokweZibhalo oye wazifunda. Kuza kufuneka khe ndiwuhlafune ngakumbi lo mba.

UMarcus: Njengoko uhlolisisa le nyewe, kusenokuphakama eminye imibuzo. Ngokomzekelo, kuza kwenzeka ntoni ngabantu abalungileyo ababephila ngaphambi kwethu? Ngaba bonke basezulwini? Ukuba akunjalo, baphi ngoku?

URobert: Ngokwenene ibangela umdla le mibuzo.

UMarcus: Mhlawumbi zimbini izinto endinokukwenzela zona. Okokuqala, mandikubhalele phantsi iZibhalo ezithetha ngalo mxholo.a Okwesibini, ndingathanda ukuphinda ndibuye ukuze sixubushe ngezi Zibhalo emva kokuba uye wafumana ithuba lokuzifunda yaye wacingisisa ngazo. Ngaba ndingaphinda ndibuye?

URobert: Ewe, kulungile. Ndiyabulela.

[Umbhalo osemazantsi]