Genesesi

4 Sambano Adamu ŵagonile ni Hawa ŵamkwakwe ŵala, mwamti ŵamkwakwewo ŵakwete msigo. Myoyo jwalakwe jwaŵeleche mwanache lina lyakwe Kaini, mwamti jwatite, “Yehofa angamuchisye kuti mbeleche mwanache jwamlume.” 2 Kaneko jwalakwe jwaŵelechesoni mwanache jwamlume lina lyakwe Abele.

Abele jwaŵele jwakulanga ngondolo, nambo Kaini jwaŵele jwakulima. 3 Pali papite ndaŵi, Kaini ŵayiche nayo yisogosi ya kumigunda kwakwe kuti ayipeleche mbopesi kwa Yehofa. 4 Nombenajo Abele ŵayiche nawo ŵanache ŵandanda kupagwa ŵa ngondolo syakwe, ni kwapeleka mbopesi pampepe ni mawuta gakwe. Yehofa ŵasangalele ni Abele soni ŵapochele mbopesi jiŵapeleche. 5 Nambo jwalakwe nganasangalala ni Kaini soni nganapochela mbopesi jiŵapeleche. Pelepo Kaini jwapile mtima soni jwatumbile mnope. 6 Ni Yehofa ŵamwusisye Kaini kuti, “Ligongo chichi mpile mtima soni mtumbile mnope chamti myoyo? 7 Naga mkuchenga ni kutanda kutenda yambone, ana une ngasindanda kumnonyela mmwejo? Nambo naga ngamkuchenga ni kutanda kutenda yambone, ulemwa ukumjuŵilila pamlango penu soni ukusaka kuti umkamule mmwejo. Ana mmwejo ngamwugomeka ulemwawo?

8 Kaneko Kaini ŵamsalile Abele mpwakwe jula kuti, “Kwende tujawule kumigunda.” Ali ayiche kumigunda kula, Kaini ŵamjimuchile Abele mpwakwe jula ni kumwulaga. 9 Panyuma pakwe Yehofa ŵamwusisye Kaini kuti, “Ana mpwenu Abele ali kwapi?” Jwalakwe ni ŵajanjile kuti, “Kwalini. Ana une ndili jwakumlondela mpwangajo?” 10 Pelepo Mlungu ni ŵamwusisye kuti, “Ligongo chichi mtesile yeleyi? Mpikane! Myasi ja mpwenu jikundilila une kutyochela mwitaka. 11 Sambano mmwejo chimŵe ŵalweseche* soni chinamtopole palitaka lyele liwugwile pakamwa pakwe kuti lipochele myasi ja mpwenu kutyochela mmyala mwenu. 12 Pandaŵi jachimchilimaga, litaka ngasilikoposya yakulya yakwanila. Mmwejo chimchiŵa mundu jwakwendajenda soni jwakutilatila pachilambo.” 13 Pelepo Kaini ŵamsalile Yehofa kuti, “Chilango* chambele ligongo lya ulemwa wanguwu chili chekulungwa mnope soni chakusawusya kuchipilila. 14 Lelo akundopola pachilambochi soni akundenda kuti ngawoneka pameso pawo. Pelepa chimbe mundu jwakwendajenda soni jwakutilatila pachilambo, mwamti jwalijose jwakusimana chachimbulagatu basi.” 15 Myoyo Yehofa ŵamsalile jwalakwejo kuti, “Paligongo lyeleli, jwalijose jwakumwulaga Kaini chachisosekwa kumwuchisya kwa maulendo 7.”

Myoyo Yehofa ŵaŵisile chimanyisyo pa Kaini ni chakulinga chakuti jwalijose jwakusimana najo akamwulaga. 16 Kaneko Kaini jwatyosile pameso pa Yehofa ni kwawula kuja kutama ku chilambo chakutilila* chichaliji chakungopokolyuŵa kwa Edeni.

17 Panyuma pakwe Kaini ŵagonile ni ŵamkwakwe, mwamti ŵamkwakwewo ŵakwete msigo ni ŵaŵeleche mwanache juŵampele lina lyakuti Enoki. Kaneko Kaini ŵatandite kutaŵa msinda. Ni ŵawupele msindawo lina lya mwanache jwakwe lyakuti Enoki. 18 Kaneko Enoki jwaŵeleche Iladi, Iladi jwaŵeleche Mehuyaele, Mehuyaele jwaŵeleche Metusayele, soni Metusayele jwaŵeleche Lameki.

19 Lameki ŵalombele achakongwe ŵaŵili. Jwamkongwe jwandanda lina lyakwe lyaliji Ada, soni jwamkongwe jwaŵili lina lyakwe lyaliji Sila. 20 Ada jwaŵeleche mwanache juŵampele lina lyakuti Yabali. Jwalakweju ni juŵaliji jwandanda kutama m’matenti soni kulanga yilango. 21 Lina lya mpwakwe lyaliji Yubala. Jwalakweju ni juŵaliji jwandanda kukamulichisya masengo yida yakwimbila ya ngonji soni yitolilo. 22 Nombenajo Sila jwaŵeleche mwanache juŵampele lina lyakuti Tubali-kaini. Jwalakweju ŵaliji jwakumanyilila kusyana mtundu uliwose wa kopa soni yisyano. Tubali-kaini ŵakwete mlumbugwe lina lyakwe Naama. 23 Kaneko Lameki jwaŵechete maloŵe gakuyichisyaga kwa Ada soni Sila achiŵamkwakwe ŵala:

25 Kaneko Adamu ŵagonilesoni ni ŵamkwakwe, mwamti ŵaŵeleche mwanache jwamlume. Ŵamkwakwewo ŵampele mwanachejo lina lyakuti Seti,* ligongo ŵatite, “Mlungu ambelesoni mwanache jwine jwakwinjila mmalo mwa Abele ligongo lyakuti Kaini ŵamwuleje Abele.” 26 Seti jwaŵelechesoni mwanache jwamlume ni ŵampele lina lyakuti Enosi. Pandaŵi jeleji ŵandu ŵatandite kuŵilanjila pa lina lya Yehofa.