Ŵakulamula

8 Kaneko achalume ŵa mu mbumba* ja Efulayimu ŵamwusisye Gidiyoni kuti, “Ligongo chichi mtesile yeleyi kwa m’weji? Uli nganimtuŵilanga pandanda pene pamwajawulaga kuja kumenyana ngondo ni Amidiyani?” Pelepo ŵakanganile mnope ni jwalakwejo. 2 Nambo Gidiyoni ŵajanjile jemanjajo kuti, “Ana une ndesile chichi kumpunda jemanja? Ana yindu yekulungwa yatesile jemanja achalume ŵa mu mbumba ja Efulayimu akuyiwona mpela yamwana? Jemanjatu mtesile yindu yekulungwa kupunda yatutesile m’weji yisukulu ya Abi-eseli.* 3 Ana Mlungu nganampeleka Olebi ni Seebi, ŵakulamulila ŵa Chimidiyani mmyala mwa jemanja? Nambi une ndesile chichi kumpunda jemanja?” Ni maloŵe gelega, Gidiyoni ŵatamiche mtima pasi jemanjajo.

4 Kaneko Gidiyoni ŵayiche ku lusulo lwa Yolodani ni komboka lusulolo. Jwalakwe pampepe ni achalume 300 ŵaŵaliji nawo ŵala ŵaliji ali apesile, nambo nganaleka kwatoposya adani ŵawo ŵala. 5 Myoyo Gidiyoni ŵaŵendile achalume ŵa ku Sukoti kuti, “Chonde ŵagaŵile mikate achalume ŵandilinawoŵa. Ligongo jemanjaji apesile soni machili gamalile. M’weji tukugatoposya mamwenye gaŵili ga Amidiyani, mwenye Seba soni mwenye Salimuna.” 6 Nambo ŵakulamulila ŵa ku Sukoti ŵamjanjile jwalakwejo kuti, “Ana mumkamwile kala mwenye Seba soni Salimuna kuti m’weji twape asilikali ŵenu mikate?”* 7 Gidiyoni paŵapikene maloŵe gelega ŵatite, “Ligongo lya maloŵe gamŵechetega, Yehofa pachampeleche Seba soni Salimuna mmyala mwangu, jemanja chinjimkwapula ni yikoti ya miŵa ya m’chipululu.” 8 Paŵatyosile kweleko, ŵayiche kumsinda wa Penueli. Kweleko ŵaŵendilesoni yakulya, nambo achalume ŵa ku Penueli ŵamjanjilesoni yakulandana ni yaŵajanjile achalume ŵa ku Sukoti. 9 Pelepo Gidiyoni ŵajanjilesoni achalume ŵa ku Penueliwo kuti, “Naga ngawuje chenene, chinjiyika ni kugumulanya sanja jenuji.”

10 Sambano Seba soni Salimuna ŵaliji ku Kalikoli ni gulu jawo ja asilikali chiŵandika 15,000. Pagulu josope ja asilikali ŵakungopokolyuŵa, ŵeleŵa ni ŵaŵasigele. Nambo asilikali ŵakwana 120,000 ŵakunyakula maupanga* ŵaliji ali awulajidwe. 11 Sambano Gidiyoni ŵapitile msewu wa ŵandu ŵakutama m’matenti chakungopokolyuŵa kwa Noba soni Yogibeha ni kuja kumenyana ngondo ni adani ŵawowo kumatenti gawo mwakusisimuchisya. 12 Mwenye Seba soni Salimuna paŵatandite kutila, jwalakwe ŵagatopwesye mamwenye gaŵiligo mpaka ŵagakamwile. Ali amkamwile mwenye Seba soni Salimuna asilikali wosope m’matentigo yasokonasisye nganisyo.

13 Kaneko Gidiyoni mwanache jwa Yowasi paŵawujaga kungondoko ŵajigele litala lyakwawula ku Helesi. 14 Jwalakwejo paŵawujilaga ŵamkamwile mnyamata jwine jwa ku Sukoti ni kumwusya yakwamba kweleko. Myoyo mnyamatajo ŵalembile mena 77 ga achalume ŵakulamulila soni achakulungwakulungwa ŵa ku Sukoti ni kumpa jwalakwejo. 15 Pelepo Gidiyoni ŵapite kwa achalume ŵa ku Sukoti ni kwasalila kuti, “Ngati jemanja mwanyosyaga uneji pakuŵecheta kuti, ‘Ana mumkamwile kala mwenye Seba soni Salimuna kuti m’weji twape mikate asilikali ŵenu ŵapesilewo?’ Mamwenye galatu ni aga, mwenye Seba soni mwenye Salimuna.” 16 Kaneko jwalakwe ŵajigele achakulungwakulungwa ŵa mumsindawo ni kwakwapula ni yikoti ya miŵa ya m’chipululu. Pelepo jwalakwe ŵalosisye lyosi achalume ŵa ku Sukotiwo. 17 Kaneko ŵapite kuja kugwisya sanja mumsinda wa Penueli ni kwawulaga achalume ŵa mumsindamo.

18 Sambano Gidiyoni ŵamwusisye Seba soni Salimuna kuti, “Ana achalume ŵamwawuleje ku Taboli ŵawonekaga mwamtuli?” Jemanjajo ŵamjanjile jwalakwejo kuti, “Ŵawonekaga mpela wawojo, jwalijose ŵawonekaga mpela mwanache jwa mwenye.” 19 Pelepo jwalakwe ŵasalile jemanjajo kuti, “Ŵelewo ŵaliji achalongo achimjangu, ŵanache ŵa mama ŵangu. Nditu ngulumbila pameso pa Yehofa Mlungu jwaumi, yikaŵe kuti mwalesile achalongo achimjanguwo ngawulaga, unesoni ngamkaninamwulaga jemanja.” 20 Kaneko Gidiyoni ŵamsalile mwanache jwakwe jwandanda lina lyakwe Yeteli kuti, “Mnyakuche, mwawulaje jemanjaji.” Nambo Yeteli nganaswekula upanga wakwe ligongo lyakuti ŵajogopaga jemanjajo, pakuŵa jwalakwe ŵaliji mnyamata jwachinandipile. 21 Pelepo mwenye Seba soni Salimuna ŵamsalile Gidiyoni kuti, “Naga mmwejo mli ŵalume ŵasyesyene, myiche mtuwulaje mwasyene.” Myoyo Gidiyoni ŵanyakwiche ni kumwulaga Seba soni Salimuna, nambosoni jwalakwe ŵajigele yakusalalisya yakuwoneka mpela mwesi wanakopokape yayaliji mu ngosi sya ngamila.

22 Kaneko achalume ŵa mu Isalayeli ŵamsalile Gidiyoni kuti, “Mmwejo mŵe ŵakutulamulila. Mmwejo, ŵanache ŵenu soni yisukulu yenu mtulamulileje, ligongo mtukulupwisye mmyala mwa Amidiyani.” 23 Nambo Gidiyoni ŵajanjile jemanjajo kuti, “Une ngimba jwakumlamulila jemanja, soni ŵanache ŵangu ngasaŵa ŵakumlamulila jemanja. Yehofa ni juchamlamulileje.” 24 Gidiyoni ŵapitilisye kwasalila jemanjajo kuti, “Nambo ngusaka kwaŵenda chindu chimo. Jwalijose ambe ndolo* ja pambula kutyochela pa yindu yakwe yapatile kungondo.” Yeleyi yaliji myoyo ligongo lyakuti adani ŵawowo ŵawalaga ndolo syagolide palupula, pakuŵa ŵaliji ŵa mtundu wa Ayisimayeli. 25 Jemanjajo ŵajanjile kuti, “Nditu chitwape yindu yaŵendileyo.” Pelepo ŵanduwo ŵatandiche mkanjo pasi mwamti jwalijose ŵajigele ndolo ja pambula kutyochela pa yindu yaŵapatile kungondo kula ni kusiponya pelepo. 26 Ndolo syagolide sya pambula syaŵaŵilasisye sila usito wakwe wakwanile makilogalamu 19.* Usito welewu ngaŵalanjila yakusalalisya yakuwoneka mpela mwesi wanakopokape, ndolo syelewulewu, yakuwala yakuwoneka mpela yechejewu yaŵawalaga mamwenye ga ku Midiyani soni yakuwala m’lukosi yaŵasiwechaga ngamila.

27 Kaneko Gidiyoni ŵajigele golidejo ni kamulichisya masengo pakupanganya chakuwala cha efodi ni ŵachiŵisile mumsinda wakwe wa Ofula. Kaneko Ayisalayeli wosope ŵatandite kuchitindiŵalila chakuwala cha efodicho. Yeleyi yatendekasisye kuti aliyikachisye yakusawusya jwalakwejo soni liŵasa lyakwe.

28 Mwelemu ni muŵatendele Ayisalayeli pakwagomeka Amidiyani, mwamti nganakolasoni machili gakulimbana ni Ayisalayeli. Pambesi pakwe, m’chilambomo mwaliji mwangalisoni ngondo kwa yaka 40 pandaŵi josope jele Gidiyoni ŵaliji umi.

29 Myoyo Yelubala* mwanache jwa Yowasi ŵawujile kumangwakwe ni kutamaga kweleko.

30 Gidiyoni ŵakwete ŵanache ŵachalume 70,* pakuŵa ŵalombele achakongwe ŵajinji. 31 Jwalakwe ŵakwetesoni ŵakongwe ŵanandi ku Sekemu, ŵaŵamŵelechele mwanache jwamlume. Gidiyoni ŵampele mwanachejo lina lyakuti Abimeleki. 32 Pambesi pakwe, Gidiyoni mwanache jwa Yowasi ŵawile ali atemi ni umi wambone soni welewu. Kaneko ŵamsichile m’malembe ga Yowasi babagwe gagaliji mumsinda wa Ofula mu dela ja yisukulu ya Abi-eseli.

33 Gidiyoni paŵagambile kuwa, Ayisalayeli ŵatandilesoni kuyitindiŵalila yiwanichisyo ya Baala, mwamti mpakana ŵamsagwile Baala-beliti kuti aŵe mlungu jwawo. 34 Ayisalayeli ŵamliŵalile Yehofa Mlungu jwawo juŵakulupwisye jemanjajo mmyala mwa adani ŵawo wosope ŵakwasyungulila. 35 Jemanjaji nganiŵalosyasoni chinonyelo changamala ŵamwiŵasa lya Yelubala, jwali Gidiyoni, pa yindu yambone yosope yaŵatendele Ayisalayeli.