Ŵakulamula

9 Pali papite ndaŵi, Abimeleki, mwanache jwa Yelubala ŵapite kwa mwanja mjombagwe ku Sekemu. Kweleko ŵasalile jemanjajo nambosoni wosope ŵa muliŵasa lya anganga ŵakwe ŵalume* kuti, 2 “Ŵawusye ŵakulongolela* wosope ŵa mumsinda wa Sekemu uno kuti, ‘Ana yapi yampaka yasangalasye jemanja pasikati pakuti ŵanache wosope 70 ŵa Yelubala ŵalamulileje, kapena kuti mundu jumo ŵalamulileje jemanja? Sonitu akaliŵalila kuti une ndili jwamtundu wawo soni myasi jawo jisyesyene.’”*

3 Myoyo achimjombagwewo ŵapite kukwasalila maloŵe gelega ŵakulongolela wosope ŵa ku Sekemu mmalo mwa jwalakwejo. Pelepo ŵakulongolelawo ŵamnonyele mnope Abimeleki kutyochela mumtima mwawo, mwamti ŵasagwile yakuti amkuye jwalakwejo, pakuŵa jemanjaji ŵatite, “Jwelejotu ali mlongo mjetu jusyesyene.” 4 Kaneko jemanjajo ŵampele jwalakwejo mbiya sya silifa syakwana 70 syaŵasijigele kutyochela m’nyumba ja mlungu jwawo Baala-beliti. Abimeleki ŵajigele mbiyasyo ni kwalemba ganyu anyamata ŵakusoŵa yakutenda soni ŵangalondeka kuti amkuyeje. 5 Paŵatyosile kweleko, ŵapite kunyumba ja babagwe ku Ofula. Kweleko ŵawuleje achalongo achimjakwe ŵakwana 70 ŵele ŵaliji ŵanache ŵachalume ŵa Yelubala. Achalongo achimjakwe wosopeŵa ŵawulajile pa liganga limo. Mundu jumo juŵakulupwiche ŵaliji Yotamu mwanache jwamnandi jwa Yelubala. Jwalakwejo ŵakulupwiche ligongo lyakuti ŵajuŵile.

6 Kaneko ŵakulongolela wosope ŵa ku Sekemu nambosoni ŵandu wosope ŵakutama ku Beti-milo ŵasongangene pampepe ni kumlonga umwenye Abimeleki mwakuŵandikana ni chitela chekulungwa soni chipilala chachaliji ku Sekemu.

7 Ŵandu ŵane paŵamsalile yeleyi Yotamu, jwalakwe ŵapite ni kuja kwima penani pa litumbi lya Gelisimu ni kuŵecheta mwakwesya maloŵe kwa jemanjajo kuti, “Apikane jemanja ŵakulongolela ŵa ku Sekemu! Kaneko nombenajo Mlungu champikanile jemanja.

8 “Kalakala papali yitela yayasongangene pampepe kuti yilisagulile mwenye. Myoyo yitelayo yachisalile chitela cha maolifi kuti, ‘Uli mmwejo mtulamulileje.’ 9 Nambo chitela cha maolificho chajanjile kuti, ‘Ana uneji ndeche kukoposya mawuta gagakusapeleka uchimbichimbi kwa Mlungu soni kwa ŵandu ni njawule kuti ngatenganyicheje pasikati pa yitela yine mpela jwakulamulila?’ 10 Kaneko yitela yila yachisalile chitela cha mkuju kuti, ‘Mmwejo myiche kuti mtulamulileje.’ 11 Nambo chitela cha mkujucho chajanjile kuti, ‘Ana uneji ndeche kusogola yisogosi yangu yakulyolyopela soni yambone ni njawule kuti ngatenganyicheje pasikati pa yitela yine mpela jwakulamulila?’ 12 Kaneko yitela yila yachisalile chitela cha mpeleya kuti, ‘Mmwejo myiche kuti mtulamulileje.’ 13 Pelepo chitela cha mpeleyacho chajanjile kuti, ‘Ana uneji ndeche kukoposya finyo jwasambano jwajukusamtendekasya Mlungu soni ŵandu kusangalala ni njawule kuti ngatenganyicheje pasikati pa yitela yine mpela jwakulamulila?’ 14 Pambesi pakwe yitela yosope yila yalisalile liwukutu lya miŵa kuti, ‘Mmwejo myiche kuti mtulamulileje.’ 15 Pelepo liwukutu lya miŵalyo lyayijanjile yitela yineyo kuti, ‘Naga jemanja asimichisye kusagula une kuti mbe mwenye jwawo, ayiche kuti ajuŵe pasi pa m’bulili wangu. Nambo naga jemanja mkunambusya, moto ukopoche mwa une ni kutinisya mikungusa ja ku Lebanoni.’

16 “Sambano mganichisye ayi. Jemanja mumŵisile Abimeleki kuŵa mwenye. Ana yamtesileyi chili chilungamo? Soni ana pelepa mtesile yambone? Ana pelepa mlosisye umbone mtima kwa Yelubala nambosoni kwa ŵa m’liŵasa lyakwe? Ana jemanja mumtendele jwalakwejo yakuŵajilwa yaŵasosekwaga kuti mumtendele? 17 Baba ŵangu paŵamputilaga ngondo jemanja ŵaŵisile umi wawo pangosi pakusaka kumkulupusya jemanja mmyala mwa Amidiyani. 18 Nambo jemanja lelo mlijimuchile liŵasa lya baba ŵangu ni kwawulaga ŵanache ŵachalume ŵa baba ŵangu ŵakwana 70 pa liganga limo. Kaneko mumjigele Abimeleki, mwanache jwa kapolo jwamkongwe jwa baba ŵangu, ni kumŵika kuŵa mwenye pasikati pa jemanja ŵakulongolela ŵa ku Sekemu. Sonitu mtesile yeleyi ligongo lyakuti ali mlongo mjenu. 19 Nditu naga yamkutenda leloyi chili chilungamo, soni yili yambone kwa Yelubala pampepe ni ŵa m’liŵasa lyakwe, jemanja msangalale ni Abimeleki. Soni jwalakwejo asangalale pampepe ni jemanja. 20 Nambo naga nganiyiŵa myoyo, moto ukopoche mwa Abimeleki ni kumtinisya jemanja ŵakulongolela ŵa ku Sekemu soni ŵandu ŵa ku Beti-milo. Nambosoni moto ukopoche mwa ŵakulongolela ŵa ku Sekemu soni ŵandu ŵa ku Beti-milo ni kumtinisya Abimeleki.”

21 Yotamu paŵamalisisye kuŵecheta yeleyi ŵatilile ku Beeli ni kutamaga kweleko pakumjogopa Abimeleki, mlongo mjakwe.

22 Abimeleki ŵalamulile Ayisalayeli kwa yaka yitatu. 23 Kaneko Mlungu ŵakundile kuti paŵe uŵengani pasikati pa Abimeleki ni ŵakulongolela ŵa ku Sekemu. Myoyo ŵakulongolelawo ŵatandite kumtendela yindu mwangakulupichika Abimeleki. 24 Mlungu ŵakundile yeleyi ni chakulinga chakuti awuchisye ngasa siŵatesile jemanjajo pakwawulaga ŵanache 70 ŵa Yelubala. Nambosoni kuti magambo ga myasi jawo gaŵe pa Abimeleki ligongo lya kwawulaga achalongo achimjakwewo, soni kuti gaŵe pa ŵakulongolela ŵa ku Sekemu ligongo lyakumkamuchisya jwalakwejo kwawulaga achalongo achimjakwewo. 25 Myoyo ŵakulongolela ŵa ku Sekemuwo ŵatumile achalume kuti akamjuŵilile jwalakwejo kumatumbi ni chakulinga chakuti akamkong’onde. Achalumeŵa ŵaliji mkumsumula yindu jwalijose jwakupita litala lyelelyo. Pali papite ndaŵi ŵandu ŵamsalile Abimeleki ngani jeleji.

26 Kaneko Gala mwanache jwa Ebedi pampepe ni achalongo achimjakwe ŵajombochele ku Sekemu. Paŵayiche kweleko, ŵakulongolela ŵa ku Sekemu ŵamkulupilile jwalakwejo mwamti ŵaŵele kumbali jakwe. 27 Jemanjaji ŵajinjile m’migunda jawo ja mipeleya ni kukaŵa yisogosi yakwe. Kaneko ŵaminyile mipeleyajo ni kupanganya finyo. Panyuma pakwe ŵatesile pwando. Pambesi pa yosopeyi jemanjajo ŵapite ku nyumba ja mlungu jwawo ni kutanda kulya soni kumwa. Nambosoni kweleko ŵatandite kumtembelela Abimeleki. 28 Kaneko Gala mwanache jwa Ebedi jwatandite kuŵecheta kuti, “Ana Abimeleki ni ŵani, soni ana Sekemu ni ŵani kuti tumtumichileje? Ana jweleju ngaŵa mwanache jwa Yelubala, soni nduna jakwe ngaŵa Sebuli? Ligongo chichi tukusosekwa kumtumichila Abimeleki mmalo mwakwatumichila ŵanache ŵa Hamoli babagwe Sekemu? 29 Yikaŵe kuti ŵanduŵa ngwalamulila une, ngamtyosisye Abimeleki pampando.” Kaneko jwalakwejo ŵatandite kumdelela Abimeleki mwakuŵecheta kuti, “Mjonjechesye asilikali ŵenuwo ni myiche akuno kuti tumenyane.”

30 Sambano Sebuli jwakulamulila jwa msinda paŵapikene maloŵe ga Gala mwanache jwa Ebedi, ŵapile mtima. 31 Myoyo jwalakwejo ŵatumisye ŵandu mwakusisa* kuti akamsalile Abimeleki kuti, “Ana apikene? Gala mwanache jwa Ebedi ayichetu mumsinda wa Sekemu pampepe ni achalongo achimjakwe. Mwamti jemanjaji akwalimbikasya ŵandu kuti ŵajimuchile wawojo. 32 Sambano wawojo ajimuche chilo pampepe ni asilikali ŵawo ni akajuŵe kusa kwa msinda. 33 Lyuŵa pachilikatande kopoka, akajimuche ni kuja kuputa ngondo jakulimbana ni msindawo. Gala pampepe ni achalume ŵakwe pachakayiche kuti alimbane ni jemanja, akatende yiliyose kuti akamgomeche jwalakwejo.”*

34 Myoyo Abimeleki pampepe ni ŵandu wosope ŵaŵaliji ni jwalakwejo, ŵajimwiche chilo. Jemanjaji ŵagaŵene magulu mcheche ni kuwujuŵilila msinda wa Sekemuwo. 35 Sambano Gala mwanache jwa Ebedi paŵakopweche ni kwima pa geti ja msindawo, Abimeleki pampepe ni ŵandu ŵaŵaliji nawo ŵala ŵanyakwiche kuŵajuŵile kula. 36 Gala paŵaweni ŵanduwo ŵamsalile Sebuli kuti, “Mlole ŵandu akutuluka kutyochela kumatumbiko.” Nambo Sebuli ŵamjanjile jwalakwejo kuti, “Ngaŵa ŵandu ŵelewo. Mmwejo mkuyiwona yiwulili ya matumbigo ni mkupela ŵandu.”

37 Pali papite kandaŵi panandi, Gala ŵaŵechetesoni kuti, “Mlole ŵandu akwika kutyochela pakatikati pa chilambo. Soni gulu jine jikwika kunokuno nambo jijigele msewu wakutyochela ku chitela chekulungwa cha ku Muyonenimu.” 38 Sebuli ŵamjanjile jwalakwejo kuti, “Mmwejo ngati mŵecheteje mwakutwanga kuti, ‘Abimeleki ni ŵani kuti tumtumichileje? Ana jemanjajo ngaŵa ŵandu ŵamwadelelaga ŵala? Sambanotu mjawule mkamenyane nawo.”

39 Myoyo Gala ŵaliji pasogolo pa ŵakulongolela ŵa ku Sekemu pakwawula kuja kumenyana ni Abimeleki. 40 Kaneko Abimeleki ŵatandite kumtoposya Gala mwamti jwalakwejo ŵatisile, soni ŵandu ŵajinji ŵaŵaliji ni jwalakwejo ŵawulajidwe mumsewu mosope mpaka kuja kwika pa geti jakwinjilila mu msindawo.

41 Abimeleki ŵapitilisye kutama ku Aluma soni Sebuli ŵamtopwele Gala mumsinda wa Sekemu pampepe ni achalongo achimjakwe. 42 Pa lisiku lyakuyichisya ŵandu ŵaŵaliji mumsindawo ŵakopweche kusa kwa msindawo. Kaneko Abimeleki ŵapikene yeleyi. 43 Myoyo jwalakwejo ŵajigele achalume ŵaŵaliji nawo ni kwagaŵa m’magulu gatatu. Kaneko ŵapite kuja kukwajuŵilila ŵanduwo kusa kwa msindawo. Jwalakwe paŵaweni ŵandu ali mkukopoka mumsindawo, ŵajimuchile ŵanduwo nikutanda kwawulaga. 44 Abimeleki pampepe ni achalume ŵaŵaliji nawo ŵawutwiche ni kuja kwima pa geti jakwinjilila mumsindawo. Pandaŵiji magulu gane gaŵili gala gatandite kwajimuchila ŵandu ŵaŵakopweche mumsinda ŵala ni kwawulagaga. 45 Abimeleki ŵamenyene lisiku lyosope ni ŵandu ŵa mumsindawo mpaka ŵawusumwile msindawo. Jwalakwe ŵawuleje ŵandu ŵaŵaliji mwelemo kaneko ŵawugumulenye msindawo ni kuwutaga njete.

46 Sambano ŵakulongolela wosope ŵa mu sanja ja ku Sekemu paŵapikene ngani jeleji, ndaŵi jijojo ŵawutwiche ni kuja kujuŵa m’chipinda chine* cha m’nyumba jakumpopelela mlungu jwawo, lina lyakwe Eli-beliti.* 47 Ŵandu paŵagambile kumsalila Abimeleki yakuti ŵakulongolela wosope ŵa mu sanja ja ku Sekemu asongene pampepe, 48 Abimelekijo pampepe ni achalume wosope ŵaŵaliji nawo ŵapite ku litumbi lya Salimoni. Kweleko jwalakwe ŵajigele liŵago mmyala mwakwe ni kukata nyambi ja chitela. Ali akatile nyambijo, ŵajinyakwile pekoyo pakwe. Kaneko ŵasalile ŵanduwo kuti, “Yamumbweni ndili mkutendayi jemanjasoni mtende iyoyo mwachitemachitema. 49 Myoyo nombenawo ŵandu wosopewo ŵakatile nyambi sya yitela ni kutanda kumkuya Abimeleki. Kaneko ŵapite kuja kusijimika nyambisyo kusyungulila chipinda chaŵajuŵile ŵandu chila. Pambesi pakwe ŵachijochiche moto. Myoyo ŵandu wosope ŵaŵatamaga mu sanja ja ku Sekemu ŵawile. Wosope pampepe chiŵandika ŵandu 1,000, achalume ni achakongwe ŵakwe.

50 Kaneko Abimeleki ŵapite ku msinda wa Tebesi. Kweleko jwalakwe ŵakunjile matenti kuwusyungulila msindawo kaneko ŵawusumwile. 51 Pakatikati pa msindawu papali sanja jakulimbangana, mwamti achalume wosope ni achakongwe nambosoni ŵakulongolela wosope ŵa mumsindawu ŵatilile musanjaji. Jemanjaji ŵaliwugalile mkati ni kwela kwinani kumsakasa kwa sanjaji. 52 Abimeleki ŵajiŵandichile sanjajo kuti ajijonanje. Jwalakwe ŵayiche pamlango wakwe ni chakulinga chakuti ajijoche moto. 53 Kaneko jwamkongwe jwine ŵajigele liganga lyakusyajila ni kumgwichisya pamtwe Abimeleki. Mwamti ligangalyo lyakasenye chikalakasa chakwe. 54 Kaneko mwachitemachitema Abimeleki ŵamŵilasile jwakutumichila jwakwe jwakumnyakulila yida yangondo ni kumsalila kuti, “Mswekule upanga* wenuwo kuti mumalisye, kogopela kuti jemanjaji chachitanda kuŵecheta yakwamba une kuti nawulajidwe ni jwamkongwe.” Myoyo jwamasengo jwakwejo ŵamtotile jwalakwejo ni upangawo mwamti ŵawile.

55 Achalume wa ku Isalayeli paŵayiweni kuti Abimeleki awile, wosope ŵawujile kumangwawo. 56 Myoyo Mlungu ŵamwuchisye Abimeleki pa yakusakala yaŵatendele babagwe pakwawulaga achalongo achimjakwe ŵakwana 70. 57 Mlungu ŵatendekasisyesoni kuti yakusakala yosope yaŵatesile achalume ŵa ku Sekemu yawujile achimsyenewo. Myoyo matembelelo gaŵaŵechete Yotamu mwanache jwa Yelubala gagwilile jemanjajo.