LIJIGANYO 17
Ana Yesu Akwete Ndamo Syamtuli?
Patukulijiganya yajwatesile Yesu ali pachilambo chapasi, tukusatanda kumanyilila ndamo syakwe. Ndamosi mpaka situkamuchisye kuti tumŵandichile jwalakwe soni Atati ŵakwe ŵali Yehofa. Ana sine mwa ndamosi sili syapi? Ana mpaka tumsyasye chamtuli Yesu paumi wetu?
1. Ana Yesu ali mpela Atati ŵakwe chamtuli?
Kwa yaka yejinji Yesu jwalijiganyisye yindu yejinji kutyochela kwa Atati ŵakwe ali kwinani. Ligongo lya yeleyi, jwalakwe akusaganisya soni kutenda yindu mpela Atati ŵakwe. (Aŵalanje Yohane 5:19.) Yesu jwajigalile ndamo sya Atati ŵakwe. Ni ligongo lyakwe jwalakwe jwatite, “Mundu jwambweni une ŵaweni soni Atati.” (Yohane 14:9) Patukulijiganya ya ndamo sya Yesu, tuchimmanyilila chenene Yehofa. Mwachisyasyo, Yesu jwatendelaga chanasa ŵandu. Yeleyi yikusalosya kuti nombe najo Yehofa akusatuganichisya.
2. Ana Yesu aŵele ali mkumnonyela chamtuli Yehofa?
Yesu jwatite, ‘Ŵandu ŵachilambo chapasi akuŵajilwa kumanyilila kuti une ngwamanyilila Atati, ni ligongo lyakwe ngusatendaga chilichose mpela mwakundamulila une kuti nachitende.’ (Yohane 14:31) Yesu ali pachilambo chapasi jwalosisye kuti jwanonyelaga Atati ŵakwe mwakwapikanila. Jwatendaga yeleyi atamose kuti ndaŵi sine yaliji yakusawusya. Yesu jwanonyelaga mnope Atati ŵakwe, mwamti jwaliji jwakusachilila kwasalila ŵane ya Atati soni kwakamuchisya kuti aŵe paunasi wambone ni Atatiwo.—Yohane 14:23.
3. Ana Yesu aŵele ali mkwanonyela chamtuli ŵandu?
Baibulo jikusasala kuti Yesu ‘akusasengwa [“kusangalala,” NWT] nawo ŵanache ŵa ŵandu.’ (Misyungu 8:31) Yesu ŵalosisye yeleyi mwakwalimbikasya soni kwakamuchisya ŵandu. Yakusimonjesya yajwatesile Yesu yalosisye kuti jwakwete machili. Konjechesya pelepa yalosisyesoni kuti ali jwachanasa. (Maliko 1:40-42) Jwalakwe nganatendaga yindu mwangalwe soni jwaliji jwangali lusagu. Yajwaŵechetaga Yesu yalimbikasyaga ŵandu ŵanganisyo syambone. Yesu jwaliji jwakusachilila kulaga soni kuwa ligongo lya kwanonyela ŵandu wosope. Nambope jwalakwe jwanonyelaga mnope ŵandu ŵaŵatendaga yiŵajiganyaga.—Aŵalanje Yohane 15:13, 14.
KULIJIGANYA YEJINJI
Chitulijiganye yejinji yakwamba ndamo sya Yesu, yampaka tutende kuti tulosyeje chinonyelo soni koloŵa makono mpela mwaŵatendele jwalakwe.
4. Yesu akusiŵanonyela Atati ŵakwe
Chisyasyo cha Yesu chikusatujiganya yampaka tutende kuti tumnonyeleje Mlungu. Aŵalanje Luka 6:12 soni Yohane 15:10; 17:26. Kaneko akambilane chiwusyo achi:
Ana mpaka tulosye chamtuli kuti tukusamnonyela Yehofa mpela mwaŵatendelaga Yesu?
Yesu jwanonyelaga Atati ŵakwe ŵakwinani soni jwaŵechetanaga kupitila mu lipopelo
5. Yesu akusiŵasamalilaga ŵandu
Yesu jwaliji jwakwaganichisya mnope ŵane. Jwalakwe jwakamulichisye masengo ndaŵi soni machili gakwe pakwakamuchisya ŵandu, atamose kuti ndaŵi sine jwapelaga. Aŵalanje Maliko 6:30-44, kaneko akambilane yiwusyo ayi:
Mwakamulana ni lilembali, ana Yesu jwalosisye uli kuti akusiŵaganichisyaga ŵane?—Alole vesi 31, 34, 41, ni 42.
Ana chichi chachamtendekasyaga Yesu kwakamuchisya ŵandu?—Alole vesi 34.
Pakuŵapo Yesu akusalosya ndamo sya Yehofa, ana yeleyi yikutujiganya chichi pakwamba ya Yehofa?
Ana mpaka tumsyasye chamtuli Yesu pangani jakwatendela ŵane chanasa?
6. Yesu ali jwakoloŵa makono
Yesu jwaliji jwakoloŵa makono atamose kuti nganakola yindu yejinji paumi wakwe. Jwalakwe jwatulimbikasisyesoni kuti tuŵeje ŵakoloŵa makono. Aŵalanje Masengo 20:35, kaneko akambilane chiwusyo achi:
Mwakamulana ni yaŵasasile Yesu, ana chichi champaka chitukamuchisye kuŵa ŵakusangalala?
Alolele FIDIYO, kaneko akambilane chiwusyo achi.
Ana ni matala gane gapi gampaka tulosye kuti tuli ŵakoloŵa makono atamose kuti nganitukola yindu yejinji paumi?
Ana akumanyilila?
Baibulo jikusatujiganya kuti tukusosekwa kupopela kwa Yehofa kupitila mu lina lya Yesu. (Aŵalanje Yohane 16:23, 24.) Patukupopela m’litala lyeleli, tukusalosya kuti tukuyamichila yaŵatesile Yesu pakutukamuchisya kuti tuŵe paunasi ni Yehofa.
YAKUSAŴECHETA ŴANDU ŴANE: “Mlungu yangamkwaya patukulagasika.”
Pakujigalila ndamo sya Atati ŵakwe, ana Yesu akusatenda yamtuli yakulosya kuti yikusamkwayaga patukulagasika?
YALIJIGANYISYE
Yesu akusamnonyela Yehofa soni akusaŵanonyela ŵandu. Ligongo lyakuti Yesu akusatenda yindu mpela Atati ŵakwe, patukummanyilila chenene Yesu ni patuchimmanyilila chenenesoni Yehofa.
Yiwusyo Yakuwilisya
Ana mpaka tumnonyele chamtuli Yehofa mpela mwaŵatendele Yesu?
Ana mpaka twanonyele chamtuli ŵandu mpela mwaŵatendele Yesu?
Ana ni ndamo japi ja Yesu jajikusasangalasyaga mnope?
YAKULINGA YINESONI
Alole ndamo sine sya Yesu syampaka asyasye.
“Kuti Amsyasye Yesu Aŵe . . .” (Yesu—Ndi Njira, Choonadi ndi Moyo, peji 317)
Alijiganye ligongo lyakwe kupopela kupitila mu lina lya Yesu kuli kwakusosekwa.
“Ligongo Chichi Tukusosekwa Kupopela mu Lina lya Yesu?” (Sanja ja Mlonda, Febuluwale 1, 2008)
Ana Baibulo jikusasalaga chilichose pangani jakawoneche ka Yesu?
Ana tukulijiganya chichi kutyochela pachanasa chiŵatendelaga Yesu achakongwe?
“Mlungu Akusiŵachimbichisya Ŵane” (Sanja ja Mlonda, Sepetemba 1, 2012)