Tuchiŵa Ŵakusangalala Naga Tukumlambila Mlungu Mwakuŵajilwa

1-2. Ana chichi chachikusamtendekasya Yehofa kwitichisya kulambila kwetu?

ANA papikene maloŵe gakuti “kulambila” akusaganisya ya chichi? Komboleka akuganisya ya m’bale jwakupopela kwa Yehofa mwakutyochela pasi pamtima ali atindiŵele. Mwinesoni akuganisya ya liŵasa lyakusangalala lyalikulijiganya Baibulo.

² Wosopeŵa mpaka tujile kuti akulambila. Ana Yehofa chachisangalala ni kulambila kwawoku? Jwalakwe chachisangalala naga kuli kwakamulana ni yakusasaka jwalakwejo, nambosoni naga akusamnonyela ni kumchimbichisya. Tukusamnonyela mnope Yehofa. Tukusamanyililasoni kuti jwalakwe akusasosekwa kumlambila, mwamti tukusasaka kumlambilaga m’litala lyambone mnope.

 3. Ana chitukambilane chichi munganiji?

³ Munganiji, chitulole mitundu ja kalambile jiŵajijitichisyaga Yehofa mundaŵi jakala. Chitulolesoni mitundu 8 jakalambile jakusajijitichisya Yehofa masiku agano. Patukulijiganya , tulinje ganichisya yatukusosekwa kutenda kuti tujongolele kalambile ketu. Chitulolesoni ligongo lyakwe kumlambila Yehofa m’litala lyakusalijitichisya mpaka kututendekasye kuŵa ŵakusangalala.

 4. Ana ŵandu ŵaŵamlambilaga Mlungu Yesu mkanayiche pachilambopa ŵalosisye chamtuli kuti ŵamnonyelaga Mlungu?

⁴ Ŵandu ŵakulupichika mpela Abele, Nowa, Abulahamu, soni Yobu ŵalosisye kuti akusamnonyela soni kumchimbichisya Yehofa. Ana ŵatesile chamtuli yeleyi? Jemanjaji ŵatesile yeleyi mwakuŵa ŵakupikanila, ŵakulupichika, soni mwakupeleka mbopesi kwa Mlungu. Baibulo jangasala yosope yaŵatendaga jemanjaji pakulambila. Yatukumanyilila yili yakuti ŵatesile yakakombwele pakusaka kumchimbichisya Yehofa. Mwamti Yehofa ŵajitichisye kulambila kwawo. Pali papitile ndaŵi, Yehofa jwapeleche Chilamusi cha Mose kwa Aisalaeli. Mu chilamusichi mwapali malangiso gakusala yaŵasosekwaga kutenda Aisalaeli kuti Yehofa ajitichisye kulambila kwawo.

 5. Ana papali kuchenga kwamtuli pangani ja kulambila Yesu ali awile soni ali ajimwiche ku ŵawe?

⁵ Yesu ali awile soni ali ajimwiche ku ŵawe, Yehofa nganasakaga kuti ŵandu ŵakwe asunjeje Chilamusi cha Mose. (Alo. 10:4) Aklistu ŵasosekwaga kupikanila lilamusi lyasambano, “lilamusi lyaŵajiganyisye Klistu.” (Agal. 6:2) Jemanjaji akalosisye kuti akupikanila ‘lilamusili’ ngaŵa mwakwinjisya pamtima malamusi gelewu gakusala yakusosekwa kutenda ni yangakusosekwa kutenda. Nambo ŵasosekwaga kusyasya chisyasyo cha Yesu soni kutendaga yaŵajiganyisye. Masiku aganosoni, Aklistu akusatendaga yosope yampaka akombole kuti amkuyeje Klistu ni chakulinga chakuti amsangalasyeje Yehofa soni akusapata “chipumulisi.”—Mat. 11:29.

 6. Ana tukusosekwa kutenda chichi kuti tupindule mnope ni lijiganyoli?

⁶ Pachitukambilaneje mtundu wuliwose wa kalambile akusosekwa kuliwusya kuti, ‘Ana ngutenda chenene yindu yapi pambali jeleji?’ Mpaka aliwusyesoni kuti, ‘Ana mpaka njongolele yindu yine pa kalambile kangu?’ Mpaka asangalaleje ni yindu yakutenda chenene apano. Nambo akusosekwasoni kum’ŵenda Yehofa kuti ŵakamuchisye kumanyilila yakusosekwa kongolela pakumlambila.

 7. Ana Yehofa akusapikana wuli ni mapopelo getu gakutyochela pasi pa mtima?

⁷ Tukusamlambila Yehofa patukupopela kwa jwalakwe. Baibulo jikusawanichisya mapopelo getu ni ubani welinganye chenene waŵapelekaga ŵandu ku chitemti chakulambilila soni kunyumba ja Mlungu. (Sal. 141:2) Ubaniwu wakoposyaga kaliwungo kakamsangalasyaga Mlungu. Mwakulandana ni yeleyi, mapopelo getu gakutyochela pasi pamtima, ‘gakusamsangalasya’ jwalakwe atamose tuli tugambile kuŵecheta maloŵe gamnono. (Mis. 15:8; Det. 33:10) Tukwete magongo gakupikanika gakututendekasya kulupilila kuti Yehofa akusasangalala pakutuwona tuli mkulosya chinonyelo chetu soni patukumyamichila jwalakwe kupitila m’lipopelo. Jwalakwe akusasaka kuti tumsalileje yatukudandawula, yatukwembecheya soni yatukusaka. Myoyo, mkanaŵe kupopela kwa Yehofa, mpaka atende chenene kuganichisya yindu yakusaka kumsalila. Yeleyi yichakamuchisya kuti apeleche lipopelo lyakusalala mnope kwa Atati ŵawo ŵakwinani.

 8. Ana tukwete upile wamtuli wakumlumba Mlungu?

⁸ Tukusamlambila Yehofa patukumlumba jwalakwe. (Sal. 34:1) Tukusamlumba Yehofa patukuyamichila ndamo syakwe syapenani soni masengo gakwe. Tuchikombola kumlumba Mlungu naga tukwete mtima wakuyamichila. Patukuganichisya ya umbone wa Yehofa, pa yosope yatutendele, tuchikola magongo gejinji gakututendekasya kumyamichila. Masengo ga kulachila gakusatupa upile ‘wakupeleka maloŵe getu mpela mbopesi jakwitichisya lina lyakwe.’ (Aheb. 13:15) Mkanitupeleche lipopelo kwa Yehofa tukusaganichisya kaje yatukusaka kusala. Mwakulandana ni yeleyi tukusosekwa kuganichisya kaje yatukusaka kuŵecheta kwa ŵandu ŵatusimene nawo mu utumiki. Tukusasaka kuti “mbopesi” sya kuyamichila siŵeje syambone. Patukwalalichila ŵane tukusaŵecheta kutyochela mumtima.

 9. Mpela muyaŵelele ni Aisalaeli ŵakala, ana tukusapindula chamtuli patukusimanikwa pamisongano? Asale yayatendechele.

⁹ Tukusamlambila Yehofa patukusimanikwa pamisongano. Yehofa ŵasalile Aisalaeli ŵakala kuti, “Achalume wosope ŵa mtundu wenu akwenela kwika kukwalambila AMBUJE, katatu pa chaka kumalo gamope gakwalambila AMBUJE gala.” (Det. 16:16) Jemanjaji ŵasosekwaga kuleka nyumba syawo soni mbeju syawo sili syangali ŵakusilolela. Nambo Yehofa ŵasalile jemanjaji kuti, “Pangali jutachisaka kusumula chilambo chenucho pa gele masiku gatatu ga pa chaka, gakwawula kuja kulilosya pameso pa une AMBUJE Mlungu jwenu.” (Eks. 34:24) Ligongo lyakumdalila Yehofa, Aisalaeli ŵaŵamjogopaga Mlungu ŵajawulaga kukumlambila jwalakwe chaka chilichose. Kutenda yeleyi kwakamuchisyaga kuti achipikanichisye chenene Chilamusi cha Mlungu. Yakamuchisyagasoni kuti aganichisyeje ya umbone wa Mlungu nambosoni ŵasangalalaga ligongo ŵalimbikasyanaga jwine ni mjakwe. (Det. 16:15) M’wejisoni patukulingalinga kusimanikwa pa misongano ja Chiklistu, tukusapindula mpela muŵapindulilaga jemanjaji. Sonitu Yehofa akusangalala naga tukosechele kuti tukajanje mwakata pamisonganoji.

10. Ligongo chichi kwimba nyimbo jili mbali jakusosekwa mnope pa kulambila kwetu?

¹⁰ Tukusamlambila Yehofa patukwimba nyimbo ni Aklistu achimjetu. (Sal. 28:7) Aisalaeli ŵakuwonaga kwimba nyimbo kuŵa mbali jakusosekwa mnope pakulambila kwawo. Mwachisyasyo Mwenye  Daudi jwasagwile Alefi ŵakwana 288 kuti ajimbeje kunyumba ja Mlungu. (1 Mbi. 25:1, 6-8) Masiku aganosoni, mpaka tulosye kuti tukusamnonyela Mlungu mwakwimba nyimbo syakumlumba. Ngatukusosekwa kuŵa ŵakumanyilila kwimba kuti tukombole kutenda yeleyi. Aganichisye ayi. Ndaŵi syejinji wosopewe ‘tukusalemwa pakuŵecheta’ nambo yeleyi yangatutendekasyaga kuti tuleche kuŵecheta patuli pamisongano kapena patukulalichila. (Yak. 3:2) Mwakulandana ni yeleyi, ngatukusosekwa kunda kuti kapikaniche ka maloŵe getu patukwimba nyimbo katulepelekasyeje kwimba nyimbo syakumlumba Yehofa.

11. Mwakamulana ni Salimo 48:13, ligongo chichi tukusasosekwa kupata ndaŵi jakulijiganya Baibulo peŵasa?

¹¹ Tukusamlambila Yehofa mwakulijiganya Maloŵe gakwe soni patukwajiganya ŵanache ŵetu yakwamba jwalakwe. Pa lisiku lyakupumula, Aisalaeli ŵalekaga masengo gawo ga lisiku ni lisiku. Ŵatendaga yeleyi kuti alimbisye unasi wawo ni Yehofa. (Eks. 31:16, 17) Ŵandu ŵakulupichika pandaŵijo ŵasalilaga ŵanache ŵawo yakwamba Yehofa soni yindu yambone yakusatendaga. Masiku aganosoni tukusasosekwa kupata ndaŵi jakulijiganya Maloŵe ga Mlungu. Jelejitu jili mbali ja kulambila kwetu, soni patukulijiganya yikusatukamuchisya kuti tumŵandichile Yehofa. (Sal. 73:28) Kupwatika pelepa, achinangolo pakulijiganya ni ŵanache ŵawo, akusiŵakamuchisya ŵanachewo kuti amnonyeleje mnope Yehofa soni kuti aŵe najo pa unasi wambone.—Aŵalanje Salimo 48:13.

12. Ana tukulijiganya chichi pa mwaŵagawonelaga Yehofa masengo gakutaŵa chitenti chakulambilila ni yindu ya mu chitemtichi?

¹² Tukusamlambila Yehofa patukutaŵa soni kulinganya malo gakulambilila. Baibulo jikusasala kuti masengo gakulinganya chitenti chakulambilila soni yindu ya mu chitemtichi galiji “masengo geswela.”(Eks. 36:1, 4, NWT.) Masiku aganosoni, Yehofa akusagawona kuti masengo gakutaŵa Nyumba sya Uchimwene soni malo gane gakwayana ni yindu ya Uchimwene gali gapadela. Abale ni alongo ŵane akusamalila ndaŵi jelewu ali mkukamula masengoga. Ana ngatukusayamichila yakusatendayi pakusaka kamuchisya masengo ga Uchimwene? Nambosoni jemanjaji akusakamula masengo ga kulalichila. Ŵane mwa jemanjaji komboleka akusasaka kuŵa apayiniya. Achakulungwa ŵamumpingo mpaka alosye kuti akusiŵakamuchisya pamasengo gakutaŵaga mwakwajitichisya abale ni alongoŵa kuti aŵe apayiniya naga ali ŵakuŵajilwa. Chinga tukusakombola masengo gakutaŵa kapena iyayi, wosopewe mpaka tukamuchisye kuti yindu yayikusataŵidwayi yiŵeje yeswela. Tukusalinganyasoni yayijonasiche.

13. Ana tuyiwoneje chamtuli yakupeleka yetu yakamuchisya masengo ga Uchimwene?

¹³ Tukusamlambila Yehofa mwakupeleka yakupeleka yakamuchisya pamasengo ga Uchimwene. Aisalaeli ŵasosekwaga kujigala kane kakwe pakwawula ku kukuwonechela pameso pa Yehofa. (Det. 16:16) Jemanjaji ŵasosekwaga kujigala chakupeleka mwakamulana ni mwayiŵelele yindu pa umi wawo. Kutenda yeleyi kwalosyaga kuti akuyamichila yindu yambone yaŵatendelaga Mlungu. Ana uweji mpaka tulosye chamtuli kuti tukusamnonyela Yehofa soni kuyamichila yindu yambone yakusatutendela? Litala limo lyakutendela yeleyi, lili mwakupeleka mbiya syakamuchisya pampingo wetu soni pa masengo ga pachilambo chosope naga kutenda yeleyo kuli kwakomboleka. Pangani jeleji, ndumetume Paulo jwasasile kuti, “Naga mundu akusaka kupeleka, Mlungu akusapochela yele yakwete mundujo, soni ŵangamkanganichisya kuti apeleche yamkanakola.” (2 Akoli. 8:4, 12) Yehofa akusayamichila yindu yiliyose yakusapeleka mundu kutyochela pasi pamtima atamose yili yamnono chamtuli.—Maliko 12:42-44; 2 Akoli. 9:7.

14. Mwakamulana ni Misyungu 19:17, ana Yehofa akusayiwona chamtuli yatukusatenda pakwakamuchisya ŵane?

¹⁴ Tukusamlambila Yehofa patukwakamuchisya Aklistu achimjetu ŵakusosechela chikamuchisyo. Yehofa ŵasasile kuti chachawuchisya Aisalaeli ŵaŵakamuchisyaga ŵakulaga. (Det. 15:7, 10) Yeleyi yili yisyene. Ndaŵi jilijose jatumkamuchisye jwakulupilila mjetu jwakusosechela chikamuchisyo, Yehofa akusayiwona kuti tukumpa jwalakwejo. (Aŵalanje Misyungu 19:17.) Mwachisyasyo, Aklistu ŵa ku Filipi ali atumisye mbaso kwa Paulo juŵaliji mu ukayidi, jwalakwe jwajikolasile kuŵa “mbopesi jajaliji jakupocheledwa ni kumsangalasya” Mlungu. (Afil. 4:18) Alole mumpingo mwawomo ni aliwusye kuti, ‘Ana pana mundu jwampaka namkamuchisye?’ Yehofa akusasangalala pakutuwona tuli mkukamulichisya masengo ndaŵi jetu, machili getu, lunda lwetu soni yindu yatukwete pakwakamuchisya ŵakulaga. Jwalakwe akusayiwona yeleyi kuŵa mbali ja kulambila kwetu.—Yak. 1:27.

15. Ligongo chichi Aklistu ŵasyesyene ŵangakuwona kumlambila Mlungu kuŵa kwakupesya atamose kuti kukusasaka ndaŵi soni machili?

¹⁵ Kulambila kusyesyene kukusasaka ndaŵi soni machili. (1 Yoh. 5:3) Tukuŵecheta yeleyi ligongo lyakuti tukusamlambila Yehofa ligongo lyakuti tukusamnonyela. Aganichisye ya mwanache jwakusaka kwapa kane kakwe babagwe. Komboleka jwalakwe amalile ndaŵi jejinji ali mkwambula chiwulili chakuti ŵape babagwewo. Mwanachejo ngakudandawula ya ndaŵi jamalile ali mkwambula chiwulilicho. Jwalakwe akusiŵanonyela babagwe, soni akusangalala pakupeleka mtukawo kwa babagwe. Mwakulandana ni yeleyi, ligongo lyakuti tukusamnonyela Yehofa, tukusasangalala kumalila ndaŵi soni machili getu pakumlambila jwalakwe.

16. Mwakamulana ni Ahebeli 6:10, ana Yehofa akusapikana wuli ni yindu yatukusakombola kutenda pakusaka kumsangalasya?

¹⁶ Achinangolo ŵachinonyelo ŵangajembecheyaga kuti ŵanache ŵawo chiŵatendeleje yindu yakulandana. Jemanjaji akusamanyililaga kuti mwanache jwalijose ali jwakulekangana ni mjakwe soni kuti yindu paumi wa ŵanachewo yikusaŵa yakulekangana. Mwakulandana ni yeleyi, Atati wetu ŵakwinani akusapikanichisya mwayiŵelele yindu paumi wa jwalijose. Komboleka wawojo mpaka akombole kutenda yejinji kupunda ŵandu ŵane ŵakwamanyilila soni ŵakusiŵanonyela. Mwinesoni nganaŵa akombwele kutenda yejinji mpela mwakutendela ŵane, ligongo lyakuti ali ŵachekulupe, akulwala, kapena ligongo lya maudindo ga mu ulombela. Ngakusosekwa kutenguka ligongo lya yeleyi. (Agal. 6:4) Yehofa ngasaliŵalila masengo gawo. Naga akusapeleka yampaka akombole soni ni yakulinga yambone, jwalakwe chachisangalala. (Aŵalanje Ahebeli 6:10.) Yehofa akusamanyilila atamose yakusasaka wawojo mumtima mwawo. Mwamti jwalakwe akusasaka kuti wawojo asangalaleje soni kwikutila ni yindu yakusakombola kutenda pakumlambila.

17. (a) Ana mpaka tutende chichi naga tukuyiwona kuti yikutusawusya kutenda yindu yine yatukambilene munganiji? (b) Ana mbali sine syasili mu libokosi lyakuti “Yindu Yine Yampaka Yitukamuchisye Kuŵa Ŵakusangalala” syakamuchisye chamtuli?

¹⁷ Ana mpaka tutende chichi naga tukusayiwona kuŵa yakusawusya kutenda yine mwa yindu yatukambilene munganiji, mpela kulijiganya Baibulo kapena kulalichila? Naga tukutenda yindu yeleyi ndaŵi ni katema, tuchisangalala mnope soni tuchipindula mnope. Kulambila kwetu mpaka tukulandanye ni kutenda masewela gakulimbisya chilu kapena kwimba nyimbo pakamulichisya masengo chida chakwimbila. Naga ngatukusatenda yeleyi kaŵilikaŵili, nganiyiŵa yitukamuchisye. Nambi wuli naga tusagwile kuti tutendeje ndaŵi ni katema? Pandanda mpaka tutendeje maseŵelaga kapena kwimba nyimboku mwapanandipanandi nambo kaneko mpaka tutendeje kwa ndaŵi jelewu. Patukuyiwona kuti kulingalinga kwetuku kwana yakuyichisya yambone, mpaka tutande kusangalala. Yeleyi ni yampaka tutendesoni pangani ja kulambila kwetu.

18. Ana chindu champaka tutende chakusosekwa mnope ni chichi, soni ana pakusaŵa yakuyichisya yamtuli?

¹⁸ Chindu chakusosekwa mnope champaka tutende chili kumlambila Yehofa ni mtima wetu wosope. Naga tukutenda yeleyi, tuchikola umi wambone soni tuchimlambila Yehofa mpaka kalakala. (Mis. 10:22) Apano tukwete kala mtendele wamumtima ligongo tukusamanyilila kuti Yehofa akusiŵakamuchisya ŵakutumichila ŵakwe pakusimana ni yakusawusya. (Yes. 41:9, 10) Tukwete magongo gakututendekasya kusangalala patukwalambila Atati ŵetu ŵachinonyelo ŵali ‘ŵakwenela kupochela lumbili ni uchimbichimbi’ ligongo ni ŵaŵapanganyisye yosope.—Chiw. 4:11.