Ucimwene wa Mlungu Ucityosya Acimmagongo Ŵakwe

1, 2. (a) Ana ni maumboni gapi gagakulosya kuti Mwenye jwetu aŵele mkulamulila kutandila mu 1914? (b) Ana mu mtwe awuno citukambilane yamtuli?

YILI yakulimbikasya cikulupi kulola yawukombwele kutenda Ucimwene wa Mlungu atamose kuti ukwete acimmagongo. (Sal. 110:2) Mwenye jwetu jukombwele kola likuga lya ŵandu ŵakulalicila mwakulipeleka. Jukombwelesoni kwaswejesya ŵakumkuya ŵakwe mwausimu soni muyakutenda yawo. Masiku agano ŵandu ŵa Mlungu ali ŵakusangalala ni mkamulano wapacilambo cosope capasi, atamose kuti acimmagongo ŵa Ucimwene alinjilile kusokonasya mkamulanowu. Yindu yosope yaukombwele kutenda Ucimwene yatukambilene m’bukuji, yikupeleka umboni wamacili wakuti kutandila mu 1914, Mwenye jwetu juŵele juli mkulamulila atamose kuti jukwete acimmagongo.

² Nambope pacakangakaŵapa, Ucimwene ciwutende yindu yakusimonjesya yejinji. Ucimwenewu ‘ciuyice’ ni ‘kumasya’ acimmagongo ŵakwe. (Mat. 6:10; Dan. 2:44) Nambo ndaŵiji mkanijiyice, pana yindu yine yaciyitendekwe. Ana yindu yeleyi yili yapi? Yakulocesya yine ya m’Baibulo yikusajanga ciwusyoci. Kwende tukambilane yine mwa yakulocesyayi kuti tumanyilile yindu yaciyitendekwe kusogoloku.

3. Ana ni cakutendekwa candanda capi catukwembeceya?

³ Kwenesya ya Mtendele. Pakuwulembela mpingo wa ku Tesalonika, ndumetume Paulo jwakolasile cindu candanda catukwembeceya kusogoloku. (Aŵalanje 1 Atesalonika 5:2, 3.) M’cikalataci Paulo akukolanga ya “Lisiku lya Yehofa,” [NW] lyalicitanda ni kwimucilidwa kwa “Babiloni Jwamkulungwa.” (Ciw. 17:5) Nambope lisiku lya Yehofa mkaniliyice mitundu ja ŵandu jiciŵeceta kuti, ‘Tuli pamtendele ni pambone!’ Komboleka kuti maloŵega gaciŵa cimanyisyo cakupelecedwa kamo kapena mwakuwilisyawilisya. Ana acimlongola ŵadini cacijenesya nawo maloŵega? Pakuŵa acimlongolaŵa ali mbali ja cilambo, mwangakayicila jemanjaji yalumo ni mitundu ja ŵandu caciŵeceta yimpepe kuti, “Pana mtendele!” (Yel. 6:14, NW; 23:16; 17; Ciw. 17:1, 2) Kwenesya ya mtendeleku, ciciŵa cimanyilo cakulosya kuti lisiku ya Mlungu lisigele panandi kutanda. Acimmagongo ŵa Ucimwene wa Mlungu, ‘ngasapakombola kose kutila.’

4. Ana kupikanicisya cakulocesya ca Paulo cakwenesya kuti tuli pamtendele soni pambone mpaka kutukamucisye camtuli?

⁴ Ana kupikanicisya cakulocesyaci mpaka kutukamucisye camtuli? Paulo jwalembile kuti, “Nambo jemanja nganimŵa m’cipi, kuti lisikulyo limsisimusye mpela jwawiyi.” (1 Ates. 5:3, 4) Mwakulekangana ni ŵandu ŵane, m’weji tukusamanyilila muciyimalile yindu yayikutendekwa pacilambopa. Nambo ciwusyo mpaka ciŵe cakuti, Ana cakulocesya cakuti “tuli pamtendele ni pambone” cicikwanilicikwa mwamtuli? Tukusosekwa kwembeceya kaje kuti citulole mwayicitendecela. M’yoyo kwende, “Tuŵe mesope soni ŵaganisya cenene.”—1 Ates. 5:6, NW; Zef. 3:8.

5. Ana kundanda kwa “yisawusyo yakogoya mnope” kucitendekwa yamtuli?

⁵ Kwimucilidwa kwa dini. Akumbucile kuti Paulo jwalembile kuti, “Ndaŵi jele ŵandu tacitiji, ‘Tuli pamtendele ni pambone,’ pelepo conasiko cicasimana mwacisisimucisya.” Mpela mwayikusaŵela kuti kumesya kwa njasi kukusakuyana ni kulindima, m’yoyosoni ŵanduŵa pacacigamba kuŵeceta kuti, “Tuli pamtendele ni pambone!” ndaŵi jijojo ‘conasiko cakusisimucisya cicasimana.’ Ana conasikoci cili ca cici? Candanda ciciŵa ca “Babiloni Jwamkulungwa,” jwali dini syosope syaunami. Dinisi sikusakolanjidwasoni kuti “jwamkongwe jwakulijesya kapena kuti lihule.” (Ciw. 17:5, 6, 15) Konasika kwa dini syasikusalikolanga kuŵa sya Ciklistu ni madini gane gosope gaunami kuciŵa kutanda kwa “yisawusyo yakogoya mnope.” (Mat. 24:21; 2 Ates. 2:8) Cakutendekwaci cicasisimucisya ŵandu ŵajinji. Ligongo cici tukuŵeceta yeleyi? Ligongo lyakuti, pandaŵijo lihuleli liciliwonaga kuŵa ‘mwenye ŵangasalila.’ Mwangajembeceya licimanyilila kuti lyaganisyaga yindu yanganiyiŵa yitendekwe. “Lisiku limpepe” cacityosyedwa mwacitema.—Ciw. 18:7, 8.

6. Ana ŵani ŵacacijonaga “Babiloni Jwamkulungwa”?

⁶ Ana ŵani ŵacacijonaga “Babiloni Jwamkulungwa”? Ciciŵa “cilombo” cakola “misengo likumi.” Buku ja Ciwunukuko jikusalosya kuti cilomboci cikusajimila ciwanja ca United Nations (UN). Misengo likumiji jikwimila maulamusi gosope gandale gagapali gagakusacikamucisya “cilombo cecejewu.” (Ciw. 17:3, 5, 11, 12) Ana kajonanjidwe kakweka kaciŵa kakogoya uli? Yilambo yayipanganyisye ciwanja ca United Nations yicimsumula yipanje yakwe yosope, kumlya mnowu wakwe, kaneko ni “kumponya pamoto kuti atinice.”—Aŵalanje Ciwunukuko 17:16.a

7. Ana maloŵe ga Yesu pa Mateyu 24:21, 22 gakwanilicikwe camtuli mu yaka 100 yandanda? (b) Ana maloŵega gacikwanilicikwa camtuli msogolo?

⁷ Kunandiya masiku. Mwenye jwetu jwasasile yayicitendekwa pandaŵi ja yisawusyo yakogoya mnope. Jwalakwejo jwatite, ‘Nambo Mlungu tacigapungula masikugo ligongo lya ŵandu ŵaŵasagulidwe ni jwalakwe msyene.’ (Aŵalanje Mateyu 24:21, 22.) Maloŵe ga Yesuga gakwanilicikwe panandi mu 66 C.E. Pandaŵiji Yehofa ‘ŵapungwile masiku’ gakwimucila ga asilikali ŵa Ciloma ku Yelusalemu. (Mak. 13:20) Yeleyi yakamucisye Aklistu ku Yelusalemu ni ku Yudeya kuti akulupuce. Nambi yiciŵa uli pakwanilicikwa kwa pacilambo cosope capasi kwacikutendekwe pa yisawusyo yakogoya mnope? Yehofa kupitila mwa Mwenye jwetu, ‘cacipungula’ masiku gele ciwanja ca United Nation cicijimucila dini. Yehofa cacitenda yeleyi pakusaka kuti dini jisyesyene jikajonanjidwa pampepe ni dini jaunami. M’yoyo dini syosope syaunami pasicijonajidwa, dini jisyesyene jicikulupuka. (Sal. 96:5) Kwende sambano tukambilane yayicitendekwa panyuma pakuti mbali jandanda ja yisawusyo yakogoya mnope jimasile.

8, 9. Ana Yesu komboleka kuti jwasalaga ya ŵani paŵaŵecetaga yimanyilo yakusimonjesya yakwinani, soni ŵandu cacitenda cici pacaciyiwona yimanyiloyi?

⁸ Cakulocesya ca Yesu cakwamba ya masiku gakumalisya cikusalosya kuti pacitendekwa yindu yine Alimagedo jili jisigele panandi kutanda. Yakutendekwa yandanda yatukambilane yikusimanikwa mu Ngani Syambone sya Mateyu, Maliko soni Luka.—Aŵalanje Mateyu 24:29-31; Mak. 13:23-27; Luk. 21:25-28.

⁹ Yimanyilo yakusimonjesya yakwinani. Yesu jwasasile mkanipaŵe kuti, “Lyuŵa tiliciŵilila, mwesi tuwucileka kuŵala, ndondwa tisicigwa kutyocela kwinani.” Mwangakayicila ŵandu ngasajembeceya kuŵala kutyocela kwa acimlongola ŵa dini. Yeleyi yigopolela kuti ngasadalila acimlongola ŵa dini kuti ŵakamucisye. Ana pelepa nikuti Yesu jwasalaga kuti kwinani kusyesyene kucitendekwa yakusimonjesyayi? Komboleka. (Yes. 13:9-11; Yow. 2:1, 30, 31) Ana ŵandu tacitenda cici ni yimanyilo yataciyiwonayi? Jemanjaji “tacilagasika” ligongo “tacimala lunda.” (Luk. 21:25 NW; Zef. 1:17) Kusala yisyene, acimmagongo ŵa Ucimwene wa Mlungu, kutandila ‘ayimwene ni acikapolo’ “tacikomoka ligongo lya woga pakwembecela yindu yayili mkwisa” ni tacitila kuti akajuŵe. Nambope ngasagapata malo gambone gakuŵa pakusaka kutila kutumbila kwa Mwenye jwetu.—Luk. 21:26; 23:30; Ciw. 6:15-17.

10. Ana ni kwelusya kwamtuli kwacacijenesya Yesu? (b) Ana ŵandu ŵali kumbali ja Ucimwene soni ŵakusisya cacitenda yamtuli?

¹⁰ Kulekanganya Ngondolo ni Mbusi. Acimmagongo wosope ŵa Ucimwene wa Mlungu caciyiwona yindu yayicijonjecesya yipwetesi yawo. Yesu jwatite, “Tacimwona Mwanace jwa mundu ali mkwisa m’mawunde, mwamacili gekulungwa ni lumbili kapena kuti ucimbicimbi.” (Mak. 13:26) Kuwonecela kwamaciliga kuciŵa cimanyilo cakulosya kuti Yesu ayice kukwenesya yakwelusya. Mumbali jine ja cakulocesyaci, Yesu jwalondesisye yejinji yakwamba kwelusya kucacikujenesya pandaŵijo. Nganiji jikusasimanikwa mu citagu ca ngondolo ni mbusi. (Aŵalanje Mateyu 25:31-33, 46.) Pandaŵiji ŵandu ŵakulupicika ŵali pasi pa Ucimwene wa Mlungu cacijelusidwa kuti ali mpela “ngondolo” ni “cacinyakusya mitwe [jawo]” pakumanyilila kuti ‘cikulupusyo cawo ciŵandicile.’ (Luka 21:28) Nambo ŵakusisya ŵa Ucimwene cacajelusya kuti ali mpela “mbusi” soni “tacilila” pakumanyilila kuti akulindilila [“conasiko,” NW].—Mat. 24:30; Ciw. 1:7.

11. Ana tukusosekwa kukumbucila yamtuli patukambilana yindu yayicitendekwayi?

¹¹ Panyuma pakuti Yesu apelece cimanyisyo cakwelusya kwa ŵandu “ŵangosyo syosope,” yindu yakulekanganalekangana yicitendekwa Alimagedo mkanijitande. (Mat. 25:32) Kwende tukambilane yindu yiŵili mwa yakutendekwayo. Yindu yakwe yili kwimucila kwa Gogi soni kwasonganya ŵasagulwe. Patukulola yakutendekwa yiŵiliyi, tukusosekwa kumbucila kuti maloŵe ga Mlungu gangasala ndaŵi jisyesyene jayicitendecela yinduyo. Kusala yisyene, yikuwoneka kuti yakutendekwayi yicikuyana, cine pacikutendekwa, cinesoni ni pacikutanda.

12. Ana Satana cacajimucila kwakogaya ŵani pangondo jakulimbana ni Ucimwene wa Mlungu?

¹² Kwimucilidwa kwakogoya. Gogi jwa Magogi cacajimucila ŵasagulwe nambosoni acimjawo ŵali ŵangondolo sine. (Aŵalanje Esekiele 38:2, 11.) Jeleji jiciŵa ngondo jakumalisya ja Satana jakulimbana ni Ucimwene wa Mlungu. Tukuŵeceta yeleyi ligongo Satanaju aŵele ali mkulimbana ni ŵasagulwe ŵasigalile pacilambo capasi kutandila paŵamtopwele kwinani. (Ciw. 12:7-9, 17) Ligongo lyakuti Aklistu ŵatandite kwasonganganyila mumpingo wa Ciklistu, Satana aŵele ali mkulingalinga kuti yindu yikajendelaga cenene mwausimu ŵanduŵa. Nambo nganiyimjendela cenene. (Mat. 13:30) Nambope, dini syosope syaunami sili sijonanjidwe, ŵandu ŵa Mlungu caciwoneka mpela ŵangali “ndenje syakupeleka citeteyo.” Pandaŵiji Satana caciwuwona welewu kuŵa upile wakwe wakwajonanga ŵanduŵa. M’yoyo Satana cacitendekasya kuti Gogi jwa Magogi [mkamulano wa mitundu] ŵajimucile kwakogoya ŵandu ŵali pasi pa Ucimwenewu.

13. Ana Yehofa cacitenda yamtuli pakwakamucisya ŵandu ŵakwe?

¹³ Jwakulocesya Esekiele akusala yayicitendekwa pakwamba ya Gogi. Jwalakwe ŵatite, “Cimciyika kutyocela ku malo genu gagali kutali mnope ku mbali ja kumpoto. Cimciyika ni ŵandu ŵajinji. Wosopeŵa caciyika pamahaci, ni liciŵa likuga lyekulungwa mnope lya asilikali. Mpela mawunde gagawunicile cilambo, cimciyika kukulimbana ni ŵandu ŵangu.” (Esek. 38:15, 16; NW) Ana Yehofa cacitenda yamtuli ni likuga lyekulungwa lyaliciwoneka mpela lyakusawusya kuligomekalyo? “Kutumbila kwangu kuciŵa kwekulungwa mnope,” akuti m’yoyo Yehofa. “Cinjimjigalila upanga.” (Esek. 38:18, 21; aŵalanje Sakaliya 2:8.) Yehofa cacitendapo kandu pakwakamucisya ŵakutumicila ŵakwe pacilambo capasi. Yehofa cacitenda yeleyi pangondo ja Alimagedo.

14, 15. Ana ni cakutendekwa capi cacicitendekwa cakundanda kwandaŵi ja kwimucila kwakogoya kwa Satana?

¹⁴ Mkanitukambilane yacacitenda Yehofa pakwacenjela ŵandu ŵakwe pa ngondo ja Alimagedo, kwende tulolele kaje cindu cine cacicitendekwa. Cakutendekwaci cicitanda pakwimucila kwakogoya kwa Satana mpaka cakundanda kwandaŵi jele Yehofa cacitendapo kandu pa Alimagedo. Mwakamulana ni mwatuyiwonele mu ndime 11, cakutendekwa caŵilici cili kwasonganya ŵasagulwe ŵasigalile pacilambo.

¹⁵ Kwasonganya ŵasagulwe. Mateyu ni Maliko ŵalembile yayicitendekwa Alimagedo jili jisigele panandi kutanda. Jemanjaji ŵasasile yaŵaŵecete Yesu yakwamba “ŵasagulidwe ni Mlungu,” ŵali Aklistu ŵasagulwe. (Alole ndime 7.) Pakulikolanga kuti ali Mwenye, Yesu jwatite, “Jwalakwe tacigatuma malayika gakwe kumitepa mcece jacilambo capasi, kukwasonganya ŵandu ŵakusagulidwa ni Mlungu kutyocela kumtepa wine wacilambo capasi mpaka kumbesi jine soni jijakwe.” (Mak. 13:27; Mat. 24:31) Ana ni kusonganya kwamtuli kwakukusala Yesu pelepa? Jwalakwe nganasalaga ya kwadinda cidindo kakumalisya kapena kuti kwapa cimanyisyo kwakucitendekwa yisawusyo yakogoya mnope yili yisigele panandi kutanda. (Ciw. 7:1-3) M’malo mwakwe, Yesu akusala yacakutendekwa cacicitendekwa pandaŵi ja yiwusyo yakogoya mnope. M’yoyo komboleka kuti pandaŵi jine, Satana ali atandite kwajimucila ŵandu ŵa Mlungu, ŵasagulwe ŵacaciŵa ciŵela pacilambo capasi cacasonganyicisya kwinani.

16. Ana ŵasagulwe ŵacacijimuka ni kwawula kwinani cacitenda cici pangondo ja Alimagedo?

¹⁶ Ana kwasonganyicisya ŵasagulwe kwinani kucikamulana camtuli ni cakutendekwa cakuyicisya caciciŵa ngondo ja Alimagedo? Ndaŵi jakwasonganya ŵasagulweji, jikulosya kuti ŵasagulwe wosope caciŵa ali apite kwinani pajicitandaga ngondo ja Mlungu ja Alimagedo. Pacaciŵa kwinani ŵa 144,000 ŵacacilamulila yimpepe ni Klistu cacipocela ulamusi wakumkamucisya Yesu konanga acimmagongo ŵa Ucimwene wa Mlungu pakamulicisya masengo “simbo ja cisyano.” (Ciw. 2:26, 27) Kaneko ŵasagulwe ŵacacijimuka ni kwawula kwinaniŵa, pampepe ni malayika ga macili, cacimkuya Klistu, Mwenye jwa Ngondo pacacijawulaga kukumenyana ni “likuga lyekulungwa lya asilikali ŵamacili,” ŵali acimmagongo ŵacaciŵa ali asigele panandi kuti ŵajonanje ŵandu ŵa Mlungu. (Esek. 38:15) Makugaga pagacisimana, pelepo nikuti ngondo ja Alimagedo jicitanda.—Ciw. 16:16.

17. Ana ŵandu ŵali mpela “mbusi” yicamalila wuli pa Alimagedo?

¹⁷ Kwelusya. Ngondo ja Alimagedo jiciŵa mbesi ja yisawusyo yakogoya mnope. Pandaŵiji, Yesu cacikamulasoni masengo gane. Kupwatika pakuŵa Jwakwelusya jwa “ngosyo syosope,” Yesu cacijonanga mitundu ja ŵandu. Ŵeleŵa ali ŵandu ŵajelusidwe kuti ali mpela “mbusi.” (Mat. 25:32, 33) Pakamulicisya masengo “upanga wakutema mnope,” Mwenye jwetu ‘cacijonanga mitundu ja ŵandu.’ Kusala yisyene wosope ŵali mpela mbusi, kutandila “ayimwene” mpaka “acikapolo” cacajonanga.—Ciw. 19:15, 18; Mat. 25:46.

18. (a) Ana ni upile wamtuli waucatendecela ŵandu ŵali mpela “ngondolo”? (b) Ana pambesi pakugomeka kwakwe, Yesu cacitenda yamtuli?

¹⁸ Welewutu uciŵa upile wekulungwa kwa ŵandu ŵacaciŵa m’likuga lyele Yesu ŵalijelwisye kuŵa mpela “ngondolo.” M’malo mwakuti likuga lyekulungwa lya asilikali ŵa Satana ŵalisoni “mbusi” lisijonanje ngondolosyo, “likuga lya ŵandu ŵangaŵalanjika” lya “ngondolo, lilyawonekaga kuŵa lyangali ŵakulicenjela,” ‘licipunda mu yisawusyo yekulungwa kapena kuti yakogoya.’ (Ciw. 7:9, 14) Pambesi pakuti ŵagomece soni kwatyosya acimmagongo wosope ŵa Ucimwene wa Mlungu, Yesu cacimponya Satana ni yiŵanda yakwe mwisimbo. Mwisimbomo, jemanjaji ngasakolasoni macili galigose gakwasokonasya ŵandu mpaka payicimala yaka 1,000.—Aŵalanje Ciwunukuko 6:2; 20:1-3.

19, 20. Ana mpaka tukamulicisye masengo camtuli yatukulijiganya pa Yesaya 26:20 soni pa 30:21?

¹⁹ Ana mpaka tulikosecelesye camtuli payindu yakogoya yaciyitendekwe kusogoloku? Sanja ja Mlonda jine jatite, “Kuti mundu cakulupuce akusosekwa kuŵa jwakupikanila.” Ana ligongo cici tukuŵeceta yeleyi? Kwanga kwa ciwusyoci mpaka tukupate kutyocela ku maloŵe ga Yehofa gakwakalamusya Ayuda ŵiŵatamaga mumsinda wa Babiloni. Yehofa ŵaliji ali asasile mkanipaŵe kuti Babiloni cacigomecedwa. Nambo ana ŵandu ŵa Mlungu ŵasosekwaga kutenda cici pakosecela cakutendekwaci? Yehofa ŵatite, “Ŵandu ŵangu, mjawule mkajinjile m’nyumba syenu, ni kuwugala matanga gakwe. Mkajuŵe mwelemo ndaŵi jamnono kwembecela kuti lutumbilo lwa Ambuje lumale.” (Yes. 26:20) Alolesoni maloŵe gagakamulicisye masengo mulilembali. Mwana maloŵe mpela, “mjawule,” “mkajinjile,” soni gakuti “mkajuŵe.” Maloŵega gakulosya kuti Yehofa akwalamula ŵandu yakutenda. Ayuda ŵaŵapikanile kulamulaku, nganatyoka m’nyumba syawo. Yeleyi yakamucisye kuti akasimana ni asilikali ŵaŵajendaga m’misewu. Camti m’yoyo, kuti akulupuce ŵasosekwaga kupikanila maloŵe ga Yehofa.b

²⁰ Ana tukulijiganya cici pelepa? Mwakamulana ni muyaŵelele ni ŵandumetume ŵakalaŵa, kuti tukulupuce yindu yaciyitendekwe kusogoloku, yikudalila kupikanila yakusatusalila Yehofa. (Yes. 30:21) Yehofa akusatusalila yeleyi kupitila kumpingo. Camti m’yoyo, tukusosekwa kupikanila ni mtima wosope yakusatusalila Yehofayi. (1 Yoh. 5:3) Naga apano tukusapikanila, nikuti tuciŵasoni ŵakusacilila kumpikanila Yehofa kusogoloku. Kutenda yeleyi kucitendekasya kuti Yehofa ŵali Atati ŵetu, soni Yesu jwali Mwenye jwetu atucenjele. (Zef. 2:3) Kutucenjelaku kucitupa upile wakulilolela acimsyewe yaucitenda Ucimwene wa Mlungu pakwatyosya acimmagongo ŵakwe. Kusala yisyene yeleyi yiciŵa yakutendekwa yangaliŵalicika.