Asagule Kumlambila Mlungu Mwakuŵajilwa

1, 2. Ana akusosekwa kuliwusya chiwusyo chapi, soni ligongo chichi kutenda yeleyo kuli kwakusosekwa mnope?

KUPITILA mukulijiganya Baibulo, alijiganyisye kuti ŵandu ŵajinji ŵakusati akusamlambilaga Mlungu, akusajiganya soni kutenda yindu yakusayiŵengaga Mlungu. (2 Akolinto 6:17) Lyeleli ni ligongo lyakwe Yehofa akutulamula kuti tukopoche mu dini jaunami, jajili “Babulo Jwamkulungwa.” (Chiwunukuko 18:2, 4) Ana wawojo akusosekwa kutenda chichi pangani jeleji? Jwalijose akusosekwa kusagula jika yakutenda. M’yoyo tukusosekwa kuliwusya kuti, ‘Ana ngusaka kumlambilaga Mlungu m’litala lyakusasaka jwalakwe kuti namlambilileje, kapena ngusaka kumlambilaga m’litala lyanalisyoŵelele?’

² Naga ŵatyosile mu dini jaunami, nikuti ŵatesile chenene. Nambo mwine komboleka kuti pana yitendo soni ndamo sine sya dini jaunami syakusasangalala nasyo. Kwende tulole yine mwa yitendo soni ndamo syelesi, ni tulole ligongo lyakwe tukusosekwa kuyiwonaga mwakusayiwonela Yehofa.

 3. (a) Ana ligongo chichi ŵane mpaka ayiwoneje kuŵa yakusawusya kuleka kamulichisya masengo yiwanichisyo pakulambila? (b) Ana Baibulo jikusati uli pakwamba ya kamulichisya masengo yiwanichisyo pakumlambila Mlungu?

³ Ŵandu ŵane aŵele ali mkamulichisya masengo yiwanichisyo soni kola malo gane gakulambilila m’nyumba syawo kwa yaka yejinji. Naga akusatendaga yeleyi mpaka ayiwoneje kuŵa yakusawusya kapena yakulemwecheka kumlambilaga Mlungu mwangakamulichisya masengo yeleyi. Nambo tukaliŵalila kuti Yehofa akusatujiganya mwampaka tumlambilileje. Soni Baibulo jikusatusalila mwakupikanika chenene kuti Yehofa ngakusasakaga kuti tukamulichisyeje masengo yiwanichisyo patukumlambila.—Aŵalanje Ekisodo 20:4, 5; Salimo 115:4-8; Yesaya 42:8; 1 Yohane 5:21.

 4. (a) Ana ligongo chichi ngatukusosekwa kwalambilaga achinangolo ŵetu ŵaŵawile kalakala? (b) Ana ligongo chichi Yehofa ŵasalile ŵandu ŵakwe kuti akalingaga kuŵechetana ni ŵawe?

⁴ Ŵandu ŵane akusamalilaga ndaŵi jejinji soni machili pakusaka kwasangalasya achinangolo ŵawo ŵaŵawile kalakala. Jemanjaji akusayikana atamose pakwalambila achinangolowo. Nambo tulijiganyisye kuti ŵandu ŵawe ngaŵa mkutukamuchisya soni kutuwulasya. Jemanjaji nganaŵa ni umi kumalo ganegakwe. Yisyesyene yakwe ni yakuti, yili yakogoya kulinga kuŵechetana ni jemanjaji, ligongo utenga uliwose wampaka uwoneche kuti ukutyochela kwa jwachinasi jwetu juŵawile ukusatyochelaga kwa misimu jakusakala. Lyeleli ni ligongo lyakwe Yehofa ŵalamwile Ayisalayeli kuti akalingaga kuŵechetana ni ŵawe kapena kutenda chilichose chakwayana ni yamisimu.—Detulonomo 18:10-12; alole Maloŵe Gakumbesi 25 ni 30.

 5. Ana chichi champaka chakamuchisye kuti aleche kamulichisya masengo yiwanichisyo pakumlambila Mlungu soni kuleka kulambila achinangolo ŵawo ŵakalakala?

⁵ Ana chichi champaka chakamuchisye kuti aleche kamulichisya masengo yiwanichisyo pakumlambila Mlungu soni kuleka kulambila achinangolo ŵaŵawile kalakala? Akusosekwa kuŵalangaga Baibulo soni ganichisyaga mwakusokoka mwakusayiwonelaga Yehofa yindu yeleyi. Jwalakwe akusayiwonaga yeleyi kuŵa “yakunyalaya.” (Detulonomo 27:15) Apopeleje kwa Yehofa lisiku lililyose ni kum’ŵendaga kuti ŵakamuchisye kuyiwonaga yindu mpela mwakusayiwonelaga jwalakwe. Am’ŵendejesoni kuti ŵakamuchisye kuti amlambileje mwakusasachila jwalakwe. (Yesaya 55:9) Akakayichilaga kuti Yehofa chachapa machili gakusosechela kuti atyosye chilichose chakamulana ni kulambila kwa unami.

 6. Ana ligongo chichi lisiku lya 25 December ŵalisagwile kuŵa lisiku lyaŵapagwile Yesu?

⁶ Kusyungulila pachilambo chosope, lisiku lyakupagwa kwa Yesu lyakolanjidwa Klisimasi lili lyakumanyikwa mnope, soni ŵandu ŵajinji akusaganisya kuti palisikuli akusasangalalila kupagwa kwa Yesu. Nambo lisiku lyeleli lili lyakamulana ni kulambila kwaunami. Buku jine jikusasalaga kuti ŵandu ŵachiloma ŵanganaŵa Aklistu ŵasangalalilaga kupagwa kwa lyuŵa. Jemanjaji ŵasalaga kuti lyuŵa lyapali pa 25 December. M’yoyo achimlongola wa dini ŵasakaga kuti ŵandu ŵeleŵa aŵe Aklistu. Ni ŵasagwile lisiku lya 25 December nikusangalalilaga kupagwa kwa Yesu. Nambo Yesu nganapagwa pa lisikuli. (Luka 2:8-12) Ŵakulijiganya ŵa Yesu nganasangalalilaga kupagwa kwa Yesu. Buku jine jasasile kuti pali papite yaka 200 chipagwile Yesu, “pangali jwalijose juŵamanyililaga lisiku lyaŵapagwile Yesu, soni ŵandu ŵakuŵalanjikape ni ŵaŵayikosyaga ya lisiku lyaŵapagwile Yesu.” (Sacred Origins of Profound Things) Ŵandu ŵatandite kusangalalila Klisimasi panyuma pa yaka mahandiledi gejinji Yesu ali ayiche pachilambo chapasi.

 7. Ana ligongo chichi Aklistu ŵasyesyene ŵangasangalalila lisiku lyakupagwa kwa Yesu?

⁷ Ŵandu ŵajinji akusamanyililaga kuti lisiku lya 25 December lyatyochele kwa ŵandu ŵanganaŵa Aklistu soni kuti palisikuli patendekwaga yisangalalo soni kupelegana mituka. Mwambone, ndaŵi jine ku England soni mbali sine sya ku America ŵandu ŵalekasyaga kusangalalila lisiku lyakupagwa kwa Yesu ligongo lyakuti lisikuli lyatyochele kwa ŵandu ŵanganaŵa Aklistu. Jwalijose juŵasangalalilaga lisikuli ŵampaga chilango. Nambo mkupita kwandaŵi ŵandu ŵatanditesoni kusangalalila lisikuli. Ana ligongo chichi Aklistu ŵasyesyene ŵangasangalalila lisiku lyakupagwa kwa Yesu? Lili ligongo lyakuti akusasakaga kumsangalasya Mlungu pachilichose chakusatendaga.

8, 9. Ana ligongo chichi Aklistu ŵakala nganasangalalilaga masiku gakupagwa?

⁸ Yisangalalo yine yakusasangalalilaga mnope ŵandu yili ya lisiku lyakupagwa kwawo. Nambo ana Aklistu akusosekwa kusangalalilaga lisiku lyakupagwa? Baibulo jikusagamba kusala ya yisangalalo yakusangalalila masiku gakupagwa yayatendekwe ni ŵandu ŵanganalambilaga Yehofa. (Genesesi 40:20; Maliko 6:21) Ŵandu ŵasangalalilaga masiku gakupagwa pakusaka kuchimbichisya milungu jaunami. Lyeleli ni ligongo lyakwe Aklistu ŵakala “ŵayiwonaga kuti kusangalalila lisiku lyakupagwa kwa mundu jwalijose kwaliji ndamo ja ŵandu ŵachikusa.” Jasasile yeleyi buku ja The World Book Encyclopedia.

⁹ Kalakala ŵandu ŵa ku Loma soni ku Greece ŵakulupililaga kuti mundu jwalijose paŵapagwaga paŵaga msimu ŵakuti chiwumchenjeleje mundujo kwa umi wakwe wosope. Buku jakuti The Lore of Birthdays jatite, “Msimuwu wakolaga mkamulano wine wakusimonjesya pasikati pa mlungu soni mundu jwapagwilejo.”

10. Ana ligongo chichi Aklistu ngakusosekwa kusangalalila masiku gakupagwa?

¹⁰ Ana akuganisya kuti Mlungu mpaka ajitichisye yisangalalo yayikwete mkamulano ni dini jaunami? (Yesaya 65:11, 12) Iyayi, jwalakwe nganaŵa atesile yeleyo. Lyeleli ni ligongo lyakwe ngatukusasangalaliga masiku gakupagwa kapena yisangalalo yiliyose yakamulana ni dini jaunami.

11. Ana ligongo chichi ŵandu ŵane akusasangalalilaga yisangalalo? Nambo ana chakusosekwa mnope kwa m’weji chiŵeje chichi?

¹¹ Ŵandu ŵane akusamanyililaga kuti lisiku lya 25 December soni yisangalalo yine yatyochele kwa ŵandu ŵanganaŵa Aklistu nambo jemanjaji akusajendelechela kusangalalila yindu yeleyi. Jemanjaji akusaganisya kuti masiku ga yisangalaloyi gakusiŵapaga lipesa lyakunguluka ni ŵamwiŵasa mwawo. Ana wawojo akusayiwonaga chati m’yoyo? Kunguluka ni ŵamwiŵasa mwetu nganikuŵa kulemwa. Yehofa ni juŵatandisye liŵasa, soni jwalakwe akusasakaga kuti tuŵeje paunasi wambone ni ŵamwiŵasa mwetu. (Aefeso 3:14, 15) Nambope, tukusosekwa kuwuwonaga unasi wetu ni Yehofa kuŵa ŵakusosekwa mnope, m’malo mwakwamba kwasangalasya ŵachinasi ŵetu mwakusangalalila yisangalalo yaunami ya dini. Lyeleli ni ligongo lyakwe ndumetume Paulo jwatite, “Ndaŵi syosope asimichisyeje kuti yakusayijitichisyaga Ambuje yili yapi.”—⁠Aefeso 5:⁠10.

12. Ana chichi champaka chimtendekasye Yehofa kuti akajitichisya chisangalalo?

¹² Ŵandu ŵajinji akusaganisya kuti ndandililo ja yisangalalo yeleyi jangali yakusawusya yiliyose, nambo ana Yehofa akusayiwonagasoni mwakamulana ni jemanjaji? Jwalakwe jwangajitichisya yisangalalo yayatyochele kukulambila kwaunami, kapena yisangalalo yakwachimbichisya ŵandu soni chilambo. Mwambone, Aiguputo ŵakwete yisangalalo yejinji yakusangalalila milungu jawo jaunami. Nambo panyuma pakuti Ayisalayeli atyosile ku Iguputo, jemanjaji ŵajigalile chisangalalo chimo chaŵatendaga Aiguputo ni ŵachipele lina lyakuti “Chisangalalo cha Yehofa.” Nambo Yehofa ŵapele chilango ligongo lyakutenda chisangalalochi. (Ekisodo 32:2-10) Nambo mpela muŵaŵechetele jwakulochesya Yesaya, m’weji ngatukusosekwa ‘kwaya chilichose changaswejela.’—Aŵalanje Yesaya 52:11.

13. Ana mpaka aliwusye yiwusyo yapi naga akusaka kuleka kusangalalila nawo yisangalalo?

¹³ Naga akuleka kusangalalila yisangalalo, mpaka aliwusye yiwusyo yejinji. Mwambone, mpaka aliwusye kuti, Ana mpaka ndende yatuli naga achimjangu ŵa kumasengo akumbusya ligongo lyakwe ngakusangalalila nawo lisiku lyakupagwa kwa Yesu? Ana mpaka ndende yatuli naga mundu jwine akumba mtuka ligongo lyakumbuchila chisangalalo cha kupagwa kwa Yesu? Ana ngusosekwa kutenda yatuli naga ŵamkwangu akusaka kuti sangalalile chisangalalo chinechakwe? Ana mpaka nakamuchisye chatuli ŵanache ŵangu kuti akatumbila ligongo lyakuti ngakusangalalila chisangalalo kapena lisiku lyakupagwa?

14, 15. Ana mpaka atende uli naga mundu jwine akwasosela yambone kapena kwapa mtuka ligongo lya chisangalalo?

¹⁴ Akusosekwa kamulichisya masengo lunda lwawo lwaganisya pakusagula yakutenda mu yakutendekwa yiliyose. Mwambone, naga ŵandu akwasosela yambone palisiku lyakusangalalila chisangalalo chinechakwe mpaka agambe kwayamichila ŵanduwo mwauchimbichimbi. Nambo naga mundujo akusaka kumanyilila yejinji, mpaka asagule kumsalila ligongo lyakwe wawojo ŵangatendaga nawo chisangalalocho. Nambope, ndaŵi syosope akusosekwa kuŵa ŵakwaganichisya ŵane, ŵakulinandiya soni ŵakwachimbichisya ŵane. Baibulo jikusasala kuti, “Ndaŵi syosope maloŵe genu gaŵeje gakusangalasya, mpela kuti mgatasile njete, kuti mmanyilile mwampaka mumjanjile mundu jwalijose.” (Akolose 4:6) Komboleka kwasalila kuti akusasangalalaga kunguluka ni ŵane soni kupeleka mituka, nambo asagwile kuti akatenda yeleyo pandaŵi ja yisangalalo.

¹⁵ Ana mpaka atende uli naga mundu jwine jwakwe ŵapele mtuka? Baibulo jangatupa ndandanda wa malamusi panganiji, nambo jikusatusalila kuti tukusosekwa kuŵa ni chikumbumtima chambone. (1 Timoteo 1:18, 19) Komboleka kuti mundu jwakwapa mtukajo jwangamanyililaga kuti wawojo ŵangasangalalilaga chisangalalochi. Kapena mpaka ajile kuti, “Ngumanyilila kuti ŵangasangalalilaga chisangalalo, nambope ngusaka kuti nape mtuka awu.” Muyakutendekwa yeleyi, mpaka asagule kupochela mtukawo kapena kana. Nambo akusosekwa kulolechesya kuti chilichose chasagwilecho chaleche ni chikumbumtima chambone. Ngatukusaka kutenda chilichose champaka chijonanje unasi ŵetu ni Yehofa.

16. Ana mpaka atende wuli naga ŵamwiŵasa mwawo akusaka kusangalalila yisangalalo?

¹⁶ Ana mpaka atende wuli naga ŵamwiŵasa mwawo akusaka kusangalalila chisangalalo? Ngakusosekwa kulimbana nawo. Akumbuchileje kuti nombenawo akwete upile wakusagula yakutenda. M’yoyo akusosekwa kutenda yindu mwakwaganichisya soni kuchimbichisya yasagwileyo, mpela mwakusasachila wawojo kuti ŵane achimbichisyeje yakusagula yawo. (Aŵalanje Mateyu 7:12.) Nambo ana mpaka atende uli naga ŵamwiŵasa mwawo akusaka kuti wawojo atende nawo yindu yine yakwe pandaŵi ja kusangalalila chisangalalo? Mkanasagule yakutenda, akusosekwa kupopela kaje kwa Yehofa kuti ŵakamuchisye kusagula mwakuŵajilwa. Aganichisye chenene ya chakutendekwacho, soni awungunyewungunye yine yakwayana ni nganijo. Ndaŵi syosope akumbuchileje kuti chakulinga chawo chili kusaka kumsangalasya Yehofa.

17. Ana mpaka ŵakamuchisye chamtuli ŵanache ŵawo kuti akakumbilaga achimjawo pakusangalalila yisangalalo?

¹⁷ Ana mpaka atende wuli kuti ŵakamuchisye ŵanache ŵawo kuti akakumbilaga pakwawona achimjawo ali kusangalalila yisangalalo? Ndaŵi ni katema ŵatendeleje yindu yineyakwe yambone ŵanachewo. Mpaka soni ŵasangalasyeje mwakwapa mituka. Nambo mtuka ŵakusosekwa mnope ŵampaka ŵape ŵanache ŵawo uli kupata ndaŵi ja kunguluka nawo soni kwalosya chinonyelo.

18. Ana ligongo chichi tukusosekwa kusimanikwaga pamisongano jachiklistu?

¹⁸ Kuti tumsangalasye Yehofa, tukusosekwa kulekangana ni dini jaunami, soni yitendo yakwe mpela kusangalalila yisangalalo. Nambosoni tukusosekwa kamulana ni kulambila kusyesyene. Ana mpaka tutende yeleyi chatuli? Litala limo lyampaka tutendele yeleyi, lili kusimanikwa mwakutamilichika pamisongano ja chiklistu. (Aŵalanje Ahebeli 10:24, 25.) Misongano jili mbali jakusosekwa mnope jakulambila kusyesyene. (Salimo 22:22; 122:1) Patusongene tukusakola upile ŵakulimbikasyana jwine ni mjakwe.—Aloma 1:12.

19. Ana ligongo chichi kuli kwakusosekwa kwasalila ŵane yakwamba usyesyene wa m’Baibulo walijiganyisye?

¹⁹ Mbali jine jakulosya kuti asagwile kulambila kusyesyene, jili kwasalila ŵane yalijiganyisye kutyochela m’Baibulo. Ŵandu ŵajinji pakuyiwona yindu yakusakala yayikutendekwa pachilambopa akusatengukaga. Komboleka kuti wawojo akwamanyilila ŵane ŵakutenguka ni yindu yakusakala. Mpaka ŵasalile yakwamba yindu yambone yakuyijembecheya kusogoloku. Pakusimanikwa pamisongano jachiklistu soni kwasalila ŵane yakwamba usyesyene wa m’Baibulo, ngasasaka atapanandi kuŵa kumbali ja dini jaunami, soni chachiwambala yitendo yakwe. Naga asagwile kumlambila jwalakwe m’litala lyakuŵajilwa, akakayichila kuti chachiŵa ŵakusangalala soni kuti Yehofa chachapa majali ligongo lya mtawu ŵawo.—Malaki 3:10.