Òwe

24 Má ṣe jowú àwọn ẹni ibi,

Má sì jẹ́ kó máa wù ọ́ láti bá wọn kẹ́gbẹ́,+

 2 Nítorí ìwà ipá ni ọkàn wọn ń rò,

Ètè wọn sì ń sọ̀rọ̀ ìjàngbọ̀n.

 3 Ọgbọ́n la fi ń gbé ilé* ró,+

Òye sì la fi ń fìdí rẹ̀ múlẹ̀.

 4 Nípa ìmọ̀ ni àwọn yàrá rẹ̀ yóò fi kún fún

Onírúurú ìṣúra tó ṣeyebíye tó sì fani mọ́ra.+

 5 Ẹni tó gbọ́n jẹ́ alágbára,+

Ìmọ̀ sì ni èèyàn fi ń mú kí agbára rẹ̀ pọ̀ sí i.

 6 Ìtọ́sọ́nà ọlọgbọ́n ni kí o fi ja ogun rẹ,+

Nípasẹ̀ ọ̀pọ̀ agbani-nímọ̀ràn,* ìṣẹ́gun* á wà.+

 7 Ọgbọ́n tòótọ́ ga ju ohun tí ọwọ́ òmùgọ̀ lè tẹ̀;+

Kò* ní ohun kankan láti sọ ní ẹnubodè ìlú.

 8 Ẹnikẹ́ni tó bá ń gbèrò ibi,

Ọ̀gá elétekéte la ó máa pè é.+

 9 Èrò tí kò mọ́gbọ́n dání* máa ń yọrí sí ẹ̀ṣẹ̀,

Àwọn èèyàn sì máa ń kórìíra afiniṣẹ̀sín.+

10 Tí o bá rẹ̀wẹ̀sì ní ọjọ́ wàhálà,*

Agbára rẹ ò ní tó nǹkan.

11 Gba àwọn tí wọ́n fẹ́ lọ pa sílẹ̀,

Sì fa àwọn tó ń ta gọ̀ọ́gọ̀ọ́ lọ sí ibi pípa sẹ́yìn.+

12 Tí o bá sọ pé: “Ṣebí a ò mọ̀ nípa rẹ̀,”

Ṣé Ẹni tó ń ṣàyẹ̀wò ọkàn* kò mọ̀ ni?+

Bẹ́ẹ̀ ni, Ẹni tó ń wò ọ́* máa mọ̀

Yóò sì san ẹnì kọ̀ọ̀kan lẹ́san gẹ́gẹ́ bí iṣẹ́ rẹ̀.+

13 Ọmọ mi, jẹ oyin, nítorí ó dára;

Oyin inú afárá sì ń dùn lẹ́nu.

Tí o bá wá a rí, ọjọ́ ọ̀la rẹ á dára

Ìrètí rẹ kò sì ní pa rẹ́.+

15 Má ṣe lúgọ sí tòsí ilé olódodo láti ṣe é níbi;

Má ṣe ba ibi ìsinmi rẹ̀ jẹ́.

16 Nítorí olódodo lè ṣubú ní ìgbà méje, á sì tún dìde,+

Àmọ́ àjálù yóò mú kí ẹni burúkú ṣubú pátápátá.+

17 Tí ọ̀tá rẹ bá ṣubú, má ṣe dunnú,

Tó bá sì kọsẹ̀, má ṣe jẹ́ kí ọkàn rẹ yọ̀;+

18 Nítorí Jèhófà yóò rí i, á sì bí i nínú,

Á sì yí ìbínú rẹ̀ kúrò lórí rẹ̀.*+

19 Má ṣe kanra* nítorí àwọn aṣebi;

Má ṣe jowú àwọn ẹni ibi.

20 Nítorí ọjọ́ ọ̀la ẹni ibi kò lè dáa;+

Fìtílà àwọn ẹni burúkú ni a ó pa.+

24 Ẹni tó bá ń sọ fún ẹni burúkú pé, “Olódodo ni ọ́,”+

Àwọn èèyàn yóò gégùn-ún fún un, àwọn orílẹ̀-èdè yóò sì dá a lẹ́bi.

25 Àmọ́ yóò dáa fún àwọn tó ń bá a wí;+

Òjò ìbùkún ohun rere yóò rọ̀ sórí wọn.+

27 Múra iṣẹ́ tí o máa ṣe lóde sílẹ̀, kí o sì wá gbogbo nǹkan sílẹ̀ ní pápá;

Lẹ́yìn náà, kọ́ ilé* rẹ.

29 Má sọ pé: “Bó ṣe ṣe sí mi ni màá ṣe sí i pa dà;

Màá san ohun tó ṣe pa dà fún un.”*+

30 Mo kọjá lẹ́gbẹ̀ẹ́ oko ọ̀lẹ,+

Lẹ́gbẹ̀ẹ́ ọgbà àjàrà ẹni tí kò ní làákàyè.*

31 Mo rí i pé igbó ti kún bò ó;

Èsìsì ti bo ilẹ̀ rẹ̀,

Ògiri olókùúta rẹ̀ sì ti wó lulẹ̀.+

32 Mo kíyè sí i, mo sì fi í sọ́kàn;

Mo rí i, mo sì kọ́ ẹ̀kọ́* yìí:

33 Oorun díẹ̀, ìtòògbé díẹ̀,

Kíkáwọ́ gbera díẹ̀ láti sinmi,

34 Ipò òṣì rẹ yóò sì dé bí olè,

Àti àìní rẹ bí ọkùnrin tó dìhámọ́ra.+