提摩太前书

6 做奴隶嘅*，要继续衷心噉尊重主人*，以免上帝嘅圣名同教导俾人诋毁。 2 另外，如果主人系信徒，做奴隶嘅唔应该因为主人系弟兄就唔尊重佢哋。其实，做奴隶嘅应该更加乐意效劳，好好为人服务，因为得益嘅系信徒，系亲爱嘅弟兄。

你要不断教导人呢啲事，不断劝勉人噉样做。 3 如果边个传授其他教义，唔同意我哋嘅主耶稣基督所教嘅健全*道理，亦都否定同虔诚*之道一致嘅教导， 4 佢就系骄傲自大嘅人，乜嘢都唔理解。呢种人争执成癖，沉迷于字眼上嘅争辩。呢啲行为会引发妒忌、纷争、诽谤*、恶意嘅猜疑， 5 令人为咗小事而不停争论。呢种人思想腐败，唔再拥有*真理，认为虔诚系牟利嘅手段。 6 其实虔诚而又知足，就会得到好多益处*。 7 我哋冇带乜嘢嚟到世上，亦都带唔走啲乜嘢。 8 所以，只要有衣*有食，就应该知足。

9 但系一心想发达嘅人，就落入引诱，跌落陷阱*，俾好多不智而有害嘅欲望拖累，以致沉沦灭亡。 10 贪钱系各种祸害嘅根源，有啲人一心追求财富，就误入歧途，离弃信仰，用好多痛苦整到*自己遍体鳞伤。

11 不过，你系上帝嘅仆人，应该避开*呢啲事，追求正义、虔诚、信心、爱心、忍耐、温和。 12 要为咗信仰好好奋斗*，亦都要捉紧永远嘅生命。上帝已经呼召你去得享永生，你亦都喺好多见证人面前，为永生作咗美好嘅声明。

13 我当住维持众生生命嘅上帝，又当住公开向本丢·彼拉多作过美好见证嘅基督耶稣，吩咐你： 14 要毫无瑕疵、无可指责噉遵守诫命，直到我哋嘅主耶稣基督显现。 15 到咗指定嘅时候，呢位快乐、独一嘅掌权者就会俾人睇出佢显现嘞。佢系万王之王，万主之主， 16 只有佢享有不死嘅生命。佢住喺人靠近唔到嘅光里面，冇人见过佢，亦都见唔到佢。愿佢得到尊荣同永恒嘅大能。阿们。

17 你要吩咐*嗰啲喺目前嘅制度*有钱嘅人，唔好心高气傲，亦都唔好寄望于唔可靠嘅财富，而系寄望于上帝，因为佢丰丰富富噉赐一切俾我哋享用。 18 你亦都要吩咐佢哋行善*，喺善事上富足，慷慨大方，乐意分享， 19 为自己稳阵噉积存真正嘅财富，为未来打好美好嘅根基，等佢哋可以捉紧真正嘅生命。

20 提摩太啊，要守护上帝俾你嘅信托，避开亵渎上帝*嘅空洞言论，同埋伪称“知识”嘅矛盾道理。 21 有啲人卖弄噉样嘅知识，就偏离咗信仰。

愿你哋享有分外恩典。