希伯来书

2 所以，我哋一定要特别留意听到嘅说话，噉就唔会随流漂走嘞。 2 天使传达嘅信息系明确肯定嘅，如果有人违反或者唔服从，都会受到公正嘅惩罚。 3 既然由主开始传讲嘅救恩咁伟大，如果我哋无视咗，又点可能逃避到惩罚呢？何况呢个救恩仲有听到嘅人为我哋证实， 4 而上帝亦都通过神迹、奇妙嘅事*、各种大能嘅作为，同埋佢按照自己嘅意思分俾人嘅神圣力量，进一步为呢个救恩作证。

5 我哋传讲嘅未来世界，上帝冇交俾天使统治。 6 反而有人曾经作证话：“人算得乜嘢，你竟然记得佢？世人*算得乜嘢，你竟然眷顾佢？ 7 你令佢比天使卑微一啲，赐荣耀同尊荣俾佢做冠冕，委派佢管理你创造嘅万物， 8 令一切都顺服喺佢脚下。”上帝既然要一切都顺服佢*，噉即系冇留低任何嘢系唔使顺服佢嘅。不过，而家我哋仲未见到一切都顺服佢。 9 我哋见到嘅系，曾经比天使卑微一啲嘅耶稣，因为经历过死亡嘅痛苦，就得到荣耀同尊荣做冠冕。由于上帝嘅分外恩典，佢为所有人试过死亡嘅滋味。

10 一切都系为咗上帝而有，亦都系靠佢而有嘅。为咗令好多仔女*得享荣耀，佢容许带领佢哋得救嘅领袖受苦系恰当㗎，噉样呢位领袖就完美无缺*嘞。 11 令人成圣*嘅同埋得以成圣嘅，全部都出于同一位爸爸，所以耶稣*称佢哋为“弟兄”都唔觉得羞耻。 12 佢话：“我要向弟兄宣扬你嘅圣名，我要喺会众当中唱歌赞美你。” 13 佢又话：“我要信赖佢。”仲话：“睇吓！我同耶和华*赐俾我嘅仔女。”

14 既然“仔女”系血肉之躯，耶稣都成为咗血肉之躯。噉样，通过佢嘅死，佢就可以消灭有能力令人死嘅魔鬼， 15 亦都可以释放所有因为惧怕死亡而终生受奴役嘅人。 16 佢帮助嘅其实唔系天使，而系亚伯拉罕嘅后代。 17 所以，佢一定要喺各方面同佢啲“弟兄”相似，噉佢就能够成为又怜悯人又忠信嘅大祭司，为上帝服务，而且为人嘅罪献上求恩嘅祭牲*。 18 既然佢已经受过考验受过苦，而家就可以帮助嗰啲受考验嘅人嘞。