罗马书

12 所以，各位弟兄，由于上帝对我哋表现怜恤，我恳求你哋，要将身体好似祭牲噉样献俾佢，系活嘅，系圣洁嘅，系上帝接纳嘅。噉你哋就系用理智*敬奉上帝。 2 唔好再俾目前嘅制度*塑造你哋*，要更新思想而改变自己，噉你哋就可以确定上帝想你哋点样做*。上帝想你哋做嘅事系良善同完美嘅，而且系佢接纳嘅*。

3 上帝赐分外恩典俾我，所以我想同你哋每个人讲：唔好睇得自己太重要*，要思想健全，按照上帝赐*俾每个人嘅信心*衡量自己。 4 一个身体有好多部分，每个部分嘅功能都唔同。 5 我哋人数虽然多，不过都系同一个身体，同基督联合，各个部分都紧密相连。 6 我哋按照得到嘅分外恩典，各自有唔同嘅恩赐*。所以，你嘅恩赐如果系传达上帝嘅信息*，就应该按照自己嘅信心传达； 7 如果系为人服务，就应该继续服务；如果系教导人，就应该继续教导； 8 如果系鼓励*人，就应该继续鼓励；如果系同人分享*，就应该慷慨大方；如果系督导*，就应该勤恳认真；如果系怜悯人，就应该甘心乐意。

9 你哋嘅爱，唔应该虚伪。要痛恨邪恶，热爱*良善。 10 要有弟兄之爱，以温情相待，带头*互相尊重。 11 要勤奋，唔好懒散*。要靠住神圣力量满腔热诚，竭力为耶和华*效劳*。 12 要因为希望而欢欣，喺患难之中要忍耐，祷告要坚持不懈。 13 要按照弟兄*嘅需要帮助佢哋*，实践好客之道。 14 继续祝福嗰啲迫害你哋嘅人；要祝福，唔好咀咒。 15 同欢乐嘅人一齐欢乐，同哭泣嘅人一齐哭泣。 16 你点样睇自己，都要点样睇其他人。唔好心高气傲*，反而要甘于卑微*。唔好觉得自己好有智慧。

17 对边个都唔好以恶报恶。所有人认为*美好嘅事，你都要重视。 18 只要自己做得到，就要尽力同所有人和睦相处。 19 亲爱嘅朋友，唔好自行报复，要等上帝降怒*，因为圣经话：“我会惩罚*，我会治罪，呢个系耶和华*讲嘅。” 20 相反，“你嘅敌人肚饿，就要俾嘢佢食；口渴，就要俾嘢佢饮。你噉样做，就系将烧着嘅炭堆喺佢头上面*”。 21 唔好俾邪恶打败，几时都要以善胜恶。