加拉太書

3 不明事理嘅加拉太人啊，既然你哋已經清楚明白耶穌基督釘喺木柱上嘅意義*，噉到底係邊個迷惑咗你哋呢？ 2 我淨係想問你哋一樣嘢：你哋得到神聖力量，係因為遵守法典，定係因為信從聽到嘅信息呢？ 3 你哋咁不明事理㗎咩？你哋一開始順從神聖力量嘅引導，而家反而要採納人嘅做法*？ 4 你哋受咗咁多苦，都係白費㗎咩？我好肯定唔係白費嘅！ 5 令你哋得到神聖力量，而且喺你哋當中施行奇跡嘅嗰位*，佢噉樣做，係因為你哋遵守法典，定係因為你哋信從聽到嘅信息呢？ 6 諗吓亞伯拉罕嘅例子吖，佢「信從耶和華*，就被視為*正義嘅人嘞」。

7 你哋一定知道，邊個持守信心，邊個就係亞伯拉罕嘅子孫。 8 既然上帝喺聖經預告，佢會因為列國嘅人有信心而將佢哋稱為正義嘅人*，佢就事先將呢個好消息話俾亞伯拉罕知：「萬國都會因為你而贏得福分。」 9 所以，持守信心嘅人，而家就同有信心嘅亞伯拉罕一齊贏得福分嘞。

10 邊個只係依靠法典*就會受咀咒，因為聖經話：「邊個冇貫徹遵守法典所寫嘅一切，就會受咀咒。」 11 好明顯，喺上帝眼中，冇人可以憑住遵守法典而稱為正義嘅人*，因為「正義嘅人會由於有信心而活著」。 12 法典並唔係以信心為基礎嘅，因為法典係話：「邊個遵守呢一切，就會因為噉而得到生命。」 13 聖經亦都話：「所有掛喺木柱上嘅人，都係受咀咒嘅。」基督代替咗我哋成為受咀咒嘅，佢救贖我哋，令我哋擺脫咗法典嘅咀咒， 14 噉亞伯拉罕嘅福分就可以通過基督耶穌延伸到列國嘅人身上，等我哋可以憑住信心得到上帝承諾嘅神聖力量。

15 各位弟兄，等我舉個日常嘅例子吖：人訂立嘅誓約一生效，就冇人可以廢除，亦都唔可以再附加啲咩條文。 16 上帝嘅承諾係對亞伯拉罕同埋佢嘅後代*講嘅。聖經唔係話「你啲子孫*」，就好似係對好多子孫講嘅噉，而係話「你嘅後代*」，即係只有一位，就係基督。 17 我仲想指出一點：上帝既然一早就訂立咗呢個誓約，430年之後先至頒布嘅法典自然唔能夠令誓約失效，令承諾作廢。 18 如果上帝賜下產業係根據法典，噉就唔再係根據承諾賜下嘞。不過，上帝係通過承諾，仁慈噉賜產業俾亞伯拉罕嘅。

19 噉點解要有摩西法典呢？法典係後嚟添加嘅，目的係令犯法嘅事變得明顯，直到獲得承諾嘅嗰位後代嚟到為止。法典係通過天使經中間人頒布嘅*。 20 單方面嘅安排唔需要中間人，而上帝就係單方面作出承諾嘅*。 21 照噉睇，法典同上帝嘅承諾係唔係對立呢？當然唔係啦！如果已經頒布嘅法典俾到生命人，人一早就靠法典得到正義嘞。 22 但係聖經表明，人係喺罪嘅控制之下嘅。噉信從耶穌基督嘅人，就可以因為信從佢而得到承諾嘅福分。

23 不過，呢種信仰*嚟到之前，我哋一直受到法典看守同埋監管，盼望上帝將呢種信仰啟示出嚟。 24 於是，法典成為咗我哋嘅監護人*，帶領我哋到基督嗰度，等我哋能夠因為有信心而稱為正義嘅人*。 25 而家，既然呢種信仰已經嚟到，我哋就唔再受監護人*監管嘞。

26 由於信從基督耶穌，你哋全部都成為上帝嘅仔女。 27 你哋已經受浸同基督聯合，全部都效法咗*基督。 28 無論係猶太人定係希臘人*，奴隸定係自由人，男人定係女人，由於你哋同基督耶穌聯合，全部都係一體嘞。 29 你哋既然屬於基督，就真係亞伯拉罕嘅後代，係根據承諾領受產業嘅人。